MUSABINEMA HILAIRE v. AIRTEL TIGO RWANDA LTD N’UNDI

# MUSABINEMA HILAIRE v. AIRTEL TIGO RWANDA LTD N’UNDI

- Source: Amategeko - Section: Decisions (Judgements) - Date: 2022-12-20 - Case/document no.: RS/INJUST/RCOM 00012/2022/SC - Collection: Supreme Court

## Text

## Page 1

MUSABINEMA HILAIRE v. AIRTEL TIGO RWANDA LTD N’UNDI [Rwanda URUKIKO RW’IKIRENGA – RS/INJUST/RCOM 00012/2022/SC (Cyanzayire, PJ, Hitiyaremye na Muhumuza, J.) 20 Ukuboza 2022] Amategeko agenga imiburanishirize y’imanza z’ubucuruzi – Urubanza rusubirishwamo ku mpamvu z’akarengane – Gusaba indishyi - Utaragize icyo anenga urubanza rusabirwa gusubirwamo ku mpamvu z’akarengane, nta ndishyi zo gushorwa mu manza agenerwa. Incamake y’ikibazo: MUSABINEMA Hilaire yandikiye Perezida w‘Urukiko rw’Ikirenga asaba kureka ikirego, asobanura ko nyuma yaho atangiye ikirego cyo gusubirishamo urubanza ku mpamvu z’akarengane, yumvikanye na HABINGOMA Jacques ndetse habaho n’irangizarubanza rigaragaza ko yamusoneye ubwishyu. Avuga ko nyuma yo kubona ko nta zindi nyungu afite zo gukomeza gukururukana mu manza, yanditse asaba kureka ikirego. Imbere y’uru Rukiko, ashimangira ibikubiye mu ibaruwa yanditse areka ikirego, yemera ko ikibazo yari afite cyakemutse mu bwumvikane. HABINGOMA Jacques avuga ko kureka ikirego ari uburenganzira bwa MUSABINEMA Hilaire, ko ariko akwiye gucibwa indishyi zo gushorwa mu manza n’igihembo cya Avoka kingana na 1.000.000 Frw kuko babimusabye kuva kera akabyanga. Airtel Tigo Rwanda Ltd nayo ivuga ko kureka ikirego ari uburenganzira bwa MUSABINEMA Hilaire, ko ariko nabo basaba Urukiko kumutegeka kubaha 1.500.000 Frw y’igihembo cya Avoka na 500.000 Frw y‘ikurikiranarubanza. Incamake y’icyemezo: 1. Ku birebana n’indishyi zisabwa muri uru rubanza, Urukiko rurasanga HABINGOMA Jacques agomba guhabwa 500.000 Frw y’igihembo cya Avoka agenwe mu bushishozi bw’Urukiko kuko 1.000.000 Frw asaba ari menshi. Urukiko rurasanga kandi Airtel Tigo Rwanda Ltd nayo igomba guhabwa 500.000 Frw y’igihembo cya Avoka na 300.000 Frw y’ikurikiranarubanza agenwe mu bushishozi bw’Urukiko. Naho indishyi zo gushorwa mu manza HABINGOMA Jacques asaba zo ntazo yahabwa kubera ko n’ubundi ntacyo yari yaranenze urubanza rwasabirwaga gusubirwamo ku mpamvu z’akarengane. Urukiko rwemeye kureka ikirego cyo gusubirishamo ku mpamvu z’akarengane urubanza kwakozwe. Amategeko yashingiweho: Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 122 na 124. Urubanza I. IMITERERE Y’URUBANZA

## Page 2

[1] HABINGOMA Jacques yareze Airtel Tigo Rwanda Ltd na MUSABINEMA Hilaire mu Rukiko rw’Ubucuruzi, avuga ko batubahirije amasezerano y’ubukode bw’inzu yo gukoreramo ubucuruzi bwabo bagiranye. Yavugaga ko ku itariki ya 06/06/2017, basinyanye amasezerano y’ubukode bw’inzu, MUSABINEMA Hilaire akaba yaravugaga ko ahagarariye Airtel Tigo Rwanda Ltd, yishyura amezi atatu y’ubukode gusa. Avuga ko nyuma haje gukoreramo abandi bantu basiga n’amarange batabyumvikanyeho, abajije bamubwira ko bazaza bakabivuganaho. [2] Airtel Tigo Rwanda Ltd yireguye ivuga ko itazi impamvu HABINGOMA Jacques ayirega kandi nta masezerano bagiranye, uretse ko uwo witwa MUSABINEMA Hilaire yasabye Airtel Tigo Rwanda Ltd kuba umu agent wayo akabyemererwa, ko ariko ibyo yagombaga gukoresha ndetse n’aho gukorera ari we byarebaga, ko ntaho Airtel Tigo Rwanda Ltd yari ihuriye nabyo. MUSABINEMA Hilaire we ntabwo yigeze agaragara ngo atange ibisobanuro ku byo yaregwaga. [3] Ku itariki ya 23/05/2019, Urukiko rw’Ubucuruzi rwaciye urubanza, rwemeza ko ikirego cyatanzwe na MUSABINEMA Hilaire gifite ishingiro kuri bimwe, rutegeka ko amasezerano yakozwe ku itariki ya 06/06/2017 atabazwa Airtel Tigo Rwanda Ltd, ko ahubwo agomba kubazwa uwayasinye ariwe MUSABINEMA Hilaire, rumutegeka kwishyura HABINGOMA Jacques indishyi zingana na 20.991.000 Frw, no kwishyura Airtel Tigo Rwanda Ltd indishyi zo gushorwa mu manza zingana na 600.000 Frw. [4] MUSABINEMA Hilaire yajuririye urwo rubanza mu Rukiko Rukuru rw’Ubucuruzi, ku itariki ya 08/05/2020, urwo Rukiko ruca urubanza n° RCOMA 00511/2019/CHC/HCC rwemeza ko ubujurire bwe nta shingiro bufite, ko icyemezo cyafashwe mu rubanza rujuririrwa kidahindutse, rumutegeka guha Airtel Tigo Rwanda Ltd indishyi zingana na 500.000 Frw. [5] Ku itariki ya 04/06/2020, MUSABINEMA Hilaire yandikiye Perezida w’Urukiko rw’Ubujurire asaba ko urubanza n° RCOMA 00511/2019/CHC/HCC rwaciwe n’Urukiko Rukuru rw’Ubucuruzi ku itariki ya 08/05/2020 rwasubirwamo ku mpamvu z’akarengane. Nyuma yo gusuzuma ubwo busabe, Perezida w’Urukiko rw’Ubujurire yandikira Perezida w’Urukiko rw’Ikirenga amusaba ko urwo rubanza rwasubirishwamo ku mpamvu z’akarengane. Amaze kubona raporo yakozwe kuri urwo rubanza, Perezida w’Urukiko rw’Ikirenga yemeje ko rwongera kuburanishwa, ruhabwa n° RS/INJUST/RCOM 00012/2022/SC. [6] Ku itariki ya 24/11/2022, MUSABINEMA Hilaire yandikiye Perezida w’Urukiko rw’Ikirenga asaba kureka ikirego mu rubanza n° RS/INJUST/RCOM 00012/2022/SC, avuga ko nyuma yaho atangiye ikirego gisaba gusubirishamo urubanza ku mpamvu z’akarengane, yumvikanye na HABINGOMA Jacques. Ikibazo kigomba gusuzumwa muri uru rubanza akaba ari ukumenya niba ubusabe bwe bwakwemerwa n’ingaruka zabyo. II. IKIBAZO KIGIZE URUBANZA N’ISESENGURWA RYACYO Kumenya niba MUSABINEMA Hilaire yakwemererwa kureka ikirego cye n’ingaruka zabyo. [7] Ku itariki yavuzwe haruguru, MUSABINEMA Hilaire yandikiye Perezida w‘Urukiko rw’Ikirenga asaba kureka ikirego mu rubanza n° RS/INJUST/RCOM 00012/2022/SC. Asobanura

## Page 3

ko nyuma yaho atangiye ikirego cyo gusubirishamo urubanza ku mpamvu z’akarengane, yumvikanye na HABINGOMA Jacques ndetse habaho n’irangizarubanza rigaragaza ko yamusoneye ubwishyu. Avuga ko nyuma yo kubona ko nta zindi nyungu afite zo gukomeza gukururukana mu manza, yanditse asaba kureka ikirego. [8] Imbere y’uru Rukiko, MUSABINEMA Hilaire ari hamwe na Me KAGABO Théoneste umwunganira, ashimangira ibikubiye mu ibaruwa yanditse areka ikirego, yemera ko ikibazo yari afitanye na HABINGOMA Jacques cyakemutse mu bwumvikane, ko kandi ntacyo akimurikiranyeho. [9] Me NGIRO Sauveur uburanira HABINGOMA Jacques avuga ko kureka ikirego ari uburenganzira bwa MUSABINEMA Hilaire, ko ariko akwiye gucibwa indishyi zo gushorwa mu manza n’igihembo cya Avoka kingana na 1.000.000 Frw kuko babimusabye kuva kera akabyanga. [10] Me KAYIGIRWA Télesphore uhagarariye Airtel Tigo Rwanda Ltd nawe avuga ko kureka ikirego ari uburenganzira bwa MUSABINEMA Hilaire, ko ariko nabo basaba Urukiko kumutegeka kubaha 1.500.000 Frw y’igihembo cya Avoka na 500.000 Frw y‘ikurikiranarubanza. UKO URUKIKO RUBIBONA [11] Ingingo ya 122 y’Itegeko n° 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, iteganya ko kureka ikirego ari ukwiyambura ububasha bwo kuburana, ibyo bikajyana no kwiyambura uburenganzira umuntu yari afite bwo gukomeza gukurikirana icyo kirego. Ukwemera k’undi muburanyi si ngombwa. Ingingo ya 124, igika cya kabiri, y’iryo Tegeko, iteganya ko uretse ikirego cyangwa urubanza ashobora gucibwa amafaranga y’amagarama cyangwa igihembo cya Avoka n’andi yose yatanzwe n’uwo yari yareze mu gukurikirana urubanza. [12] Urukiko rurasanga nk’uko byavuzwe haruguru, muri dosiye hari ibaruwa MUSABINEMA Hilaire yandikiye Urukiko rw‘Ikirenga ku itariki ya 24/11/2022 avuga ko aretse ikirego cyo gusubibirashamo urubanza ku mpamvu z’akarengane yari yatanze muri uru Rukiko kubera ko habaye ubwumvikane n’uwo baburana ariwe HABINGOMA Jacques. [13] Urukiko rurasanga kandi MUSABINEMA Hilaire yemera imbere y’uru Rukiko mu iburanisha ry’urubanza ryabaye none ku wa 20/12/2022 ibikubiye mu ibaruwa yavuzwe haruguru. [14] Nyuma yo kwiherera, hashingiwe ku ngingo ya 122 y’Itegeko n° 22/2018 ryavuzwe haruguru, Urukiko rwafatiye icyemezo mu ntebe ko MUSABINEMA Hilaire yemerewe kureka ikirego cyo gusubirishamo urubanza ku mpamvu z’akarengane yari yatanze muri uru rukiko kuko byakozwe mu buryo bukurikije amategeko. [15] Ku birebana n’indishyi zisabwa muri uru rubanza, Urukiko rurasanga HABINGOMA Jacques agomba guhabwa 500.000 Frw y’igihembo cya Avoka agenwe mu bushishozi bw’Urukiko kuko 1.000.000 Frw asaba ari menshi. Urukiko rurasanga kandi Airtel Tigo Rwanda Ltd nayo igomba guhabwa 500.000 Frw y’igihembo cya Avoka na 300.000 Frw y’ikurikiranarubanza agenwe mu bushishozi bw’Urukiko. Ayo mafaranga atanzwe hashingiwe ku biteganywa n’ingingo ya 124, igika cya kabiri, y’Itegeko ryavuzwe haruguru.

## Page 4

[16] Urukiko rurasanga indishyi zo gushorwa mu manza HABINGOMA Jacques asaba zo ntazo yahabwa kubera ko n’ubundi ntacyo yari yaranenze urubanza rwasabirwaga gusubirwamo ku mpamvu z’akarengane. III. ICYEMEZO CY’URUKIKO [17] Rwemeye ukureka ikirego cyo gusubirishamo ku mpamvu z’akarengane urubanza n° RCOMA 00511/2019/CHC/HCC rwaciwe n’Urukiko Rukuru rw’Ubucuruzi ku itariki ya 08/05/2020 kwakozwe na MUSABINEMA Hilaire; [18] Rumutegetse kwishyura HABINGOMA Jacques 500.000 Frw y’igihembo cya Avoka; [19] Rumutegetse kandi kwishyura Airtel Tigo Rwanda Ltd 800.000 Frw akubiyemo ay’igihembo cya Avoka n’ay‘ikurikiranarubanza.