UBUSHINJACYAHA v. MUSHINZIMANA

# UBUSHINJACYAHA v. MUSHINZIMANA

- Source: Amategeko - Section: Decisions (Judgements) - Date: 2025-09-29 - Case/document no.: RPAA01050/2024/CA - Collection: Court of Appeal

## Text

## Page 1

UBUSHINJACYAHA v. MUSHINZIMANA [Rwanda URUKIKO RW’UBUJURIRE – RPAA01050/2024/CA (Umugwaneza, J. P.) 29 Nzeri 2025] Amategeko agenga imanza nshinjabyaha – Igabanyagihano – Kongera kugabanyirizwa igihano – Uregwa wahamijwe icyaha cyo kugurisha ibiyobyabwenge agahanishwa igihano cy’igifungo cy’imyaka cumi n’itanu, ntiyakongera kugabanyirizwa mu gihe aricyo gihano gito giteganywa n’itegeko kuri icyo cyaha ndetse no ku kindi cyaha cyose gihanishwa igifungo cya burundu. Amategeko agenga imanza nshinjabyaha – Umurongo watanzwe n’urukiko – Umurongo watanzwe n’urukiko ntukomeza gukurikizwa mu gihe itegeko wari ushingiyeho ryavuyeho cyangwa ryahindutse. Incamake y’ikibazo: Mushinzimana yafatanywe udupfunyika dutanu (5) tw’urumogi yari ashyiriye umukiriya, ashyikirizwa Ubugenzacyaha nabwo bumushyikiriza Ubushinjacyaha bumurega mu Rukiko Rwisumbuye rwa Gasabo. Bwamureze bumushinja icyaha cyo gucuruza ibiyobyabwenge byo mu bwoko bw’urumogi, busaba ko cyamuhama, agahanishwa igifungo cya burundu. Mushinzimana yireguye avuga ko adacuruza urumogi ahubwo ko arunywa, agasobanura ko impamvu yemeye mbere ko arucuruza ari uko yakubiswe. Urukiko Rwisumbuye rwaciye urubanza rwemeza ko Uregwa ahamwa n’icyaha cyo gucuruza ibiyobyabwenge byo mu bwoko bw’urumogi. rumuhanisha igifungo cya burundu n’ihazabu ya 20.000.000Frw. Iki cyemezo yakijuririye mu Rukiko Rukuru asaba kugabanyirizwa igihano kuko yemeye icyaha, akaba ari n’ubwa mbere akurikiranywe mu butabera ariko akaba yarahanishijwe igihano kirekire. Ubushinjacyaha nabwo bwamusabiye kugabanyirizwa ibihano hashingiwe ku itegeko rishya rigena ibyaha n’ibihano muri rusange. Nyuma yo gusuzuma impamvu z’ubujurire z’Uregwa, Urukiko Rukuru rwemeje ko imikirize y’urubanza rwajuririwe ihindutse gusa ku bijyanye n’ibihano byari byahawe Uregwa, maze rumuhanisha igifungo cy’imyaka 15 n’ihazabu ya 5.000.000Frw. Uregwa yongeye ajuririra muri uru Rukiko rw’Ubujurire asaba kongera kugabanyirizwa ibihano, kuko ngo rutabimugabanyirije mu buryo buhagije kandi afite impamvu nyoroshyacyaha ndetse akaba amaze kugororoka. Asobanura ko yahabwa igihano kiri munsi y’igihano gito giteganyijwe n’Itegeko, kuko yemeye icyaha ku buryo budashidikanywaho, akaba ari ubwa mbere akurikiranywe mu butabera ku buryo buzwi no kuba icyaha yakoze amaze kucyicuza agisabira imbabazi ndetse no kuba yarafatanwe ingano nto y’urumogi, nta ngaruka mbi cyagize kuri rubanda, akaba amaze kugororoka, ndetse akaba asaba ko yagabanyirizwa n’ihazabu. Ubushinjacyaha bwasubije ubu bujurire bw’Uregwa buvuga ko atakongera kugabanyirizwa ibihano yahawe mu rubanza rujuririrwa, kuko mu kumuhanisha ibihano bito biteganywa n’Itegeko Urukiko Rukuru rwitaye kuri izo mpamvu nyoroshyacyaha, rushingira no ku ngingo ya 2 agace ka a na d y’Itegeko No 059/2023 ryo ku wa 04/12/2023 rihindura Itegeko No 68/2018 ryo ku wa 30/08/2018, riteganya ibyaha n’ibihano muri rusange. Incamake y’icyemezo: 1. Uregwa wahamijwe icyaha cyo kugurisha ibiyobyabwenge agahanishwa igihano cy’igifungo cy’imyaka cumi n’itanu, ntiyakongera kugabanyirizwa mu gihe aricyo gihano gito giteganywa n’itegeko kuri icyo cyaha ndetse no ku kindi cyaha cyose gihanishwa igifungo cya burundu. 2. Umurongo watanzwe n’urukiko ntukomeza gukurikizwa mu gihe itegeko wari ushingiyeho ryavuyeho cyangwa ryahindutse. Ubujurire nta shingiro bufite.

## Page 2

Amategeko yashingiweho: Itegeko No 059/2023 ryo ku wa 04/12/2023 rihindura Itegeko No 68/2018 ryo ku wa 30/08/2018, riteganya ibyaha n’ibihano muri rusange, ingingo ya 2. Itegeko N° 69/2019 ryo ku wa 08/11/2019, rihindura ingingo ya 263 y’Itegeko N° 68/2018 ryo ku wa 30/08/2018, riteganya ibyaha n’ibihano muri rusange, ingingo ya 11. Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ingingo ya 60. Imanza zifashishijwe: RPAA00043/2024/CA, Ubushinjacyaha v. Rukundo rwaciwe n’Urukiko rw’Ubujurire ku wa 29/04/2025. RPAA00159/2023/CA, Ubushinjacyaha v. Mporanyurukundo Jean Clément rwaciwe n’Urukiko rw’Ubujurire ku wa 26/04/2024. RPAA00006/2023/CA, Ubushinjacyaha v. Bahati Emmanuel rwaciwe n’Urukiko rw’Ubujurire ku wa 29/12/2023. RPAA00367/2020/CA, Ubushinjacyaha v. Twagirumukiza Innocent Réponse, rwaciwe n’Urukiko rw’Ubujurire ku wa 22/12/2023. RPAA00539/2021/CA, Ubushinjacyaha v. Nshimiyimana Bukuru, rwaciwe n’Urukiko rw’Ubujurire ku wa 24/02/2023. RPAA00132/2021/CA, Ubushinjacyaha v. Uyisenga Théogène, rwaciwe n’Urukiko rw’Ubujurire ku wa 15/07/2022. RPAA00408/2020/CA, Ubushinjacyaha v. Niyitegeka Augustin rwaciwe n’Urukiko rw’Ubujurire ku wa 27/06/2022. RPAA00048/2020/CA, Ubushinjacyaha na Bimenyimana Jean Paul, rwaciwe n’Urukiko rw’Ubujurire ku wa 26/05/2022. Urubanza I. IMITERERE Y’URUBANZA [1] Mushinzimana Jean Claude yaketsweho gucuruza ibiyobyabwenge byo mu bwoko bw’urumogi, ubwo ku wa 16/06/2022, yafatanwaga udupfunyika dutanu (5) tw’urumogi yarashyiriye umukiriya. Maze ashyikirizwa Ubugenzacyaha. [2] Iperereza, rirangiye, Ubushinjacyaha bwamureze mu Rukiko Rwisumbuye rwa Gasabo, icyaha cyo gucuruza ibiyobyabwenge byo mu bwoko bw’urumogi, busaba ko cyamuhama, agahanishwa igifungo cya burundu. [3] Mushinzimana Jean Claude, yireguye avuga ko adacuruza urumogi ahubwo ko arunywa, agasobanura ko impamvu yemeye mbere ko arucuruza ari uko yakubiswe. [4] Mu rubanza RP00683/2022/TGI/GSBO, rwaciwe ku wa 29/07/2022, Urukiko Rwisumbuye rwa Gasabo, rwasanze hari ibimenyetso bihamya Mushinzimana Jean Claude, icyaha cyo gucuruza ibiyobyabwenge byo mu bwoko bw’urumogi, aribyo: a) Imvugo ye yemera icyaha abazwa mu Bugenzacyaha, agasobanura uko yagikoze, aho arurangurira ndetse akavuga n’amafaranga aranguza n’ayo agurisha; b) Imvugo y’umutangabuhamya Ikizere Aimeé umushinja gucuruza urumogi no kuba yarafatanwe udupfunyika 5 tw’urumogi; c) Raporo y’inzego z’ibanze isobanura ibiyobyabwenge yafatanwe n’uburyo abicuruza.

## Page 3

Urukiko rushingiye kuri ibyo bimenyetso, rwahamije Mushinzimana Jean Claude, icyaha cyo gucuruza ibiyobyabwenge byo mu bwoko bw’urumogi. Rumuhanisha igifungo cya burundu n’ihazabu ya 20.000.000Frw. [5] Mushinzimana Jean Claude yajuririye urwo rubanza mu Rukiko Rukuru, asaba kugabanyirizwa igihano kuko yemeye icyaha, akaba ari n’ubwa mbere akurikiranywe mu butabera ariko akaba yarahanishijwe igihano kirekire. [6] Ubushinjacyaha buvuga ko yagabanyirizwa ibihano hashingiwe ku Itegeko rishya rihana ibyaha. [7] Mu rubanza RPA01421/2022/HC/KIG, rwaciwe ku wa 23/09/2024, Urukiko Rukuru, nyuma yo gusuzuma impamvu z’ubujurire za Mushinzimana Jean Claude, rwasanze, mu rwego rwo guhuza igihano n’uburemere bw’icyaha, kuba Mushinzimana Jean Claude yaraburanye yemera icyaha aregwa no kuba ari ubwa mbere akurikiranywe ku buryo buzwi mu butabera, ari impamvu zituma igihano yahanishijwe ku rwego rubanza cyongera kugabanywa. Rwemeza ko imikirize y’urubanza rwajuririwe ihindutse gusa ku bijyanye n’ibihano yari yahawe. Rumuhanisha igifungo cy’imyaka 15 n’ihazabu ya 5.000.000Frw. [8] Mushinzimana Jean Claude, yajuririye Urukiko rw’Ubujurire, urubanza ruhabwa RPAA01050/2024/CA, ruburanishwa mu ruhame ku wa 11/09/2025, Mushinzimana Jean Claude yunganiwe na Me Micomyiza Liliane, Ubushinjacyaha buhagarariwe na Ndagijimana Charles, Umushinjacyaha ku rwego rw’igihugu. [9] Mu mwanzuro w’ubujurire, Mushinzimana Jean Claude na Me Micomyiza Liliane umwunganira, basaba ko yagabanyirizwa igihano, basobanura ko Urukiko Rukuru rutarabimugabanyirije muburyo buhagije kandi afite impamvu nyoroshyacyaha ndetse akaba amaze kugororoka, rukaba kandi rwirengagije ko akamaro k’igihano katareberwa ku buremere bw’icyaha gusa ko hakwiye kwitabwa no ku nyungu z’uregwa. [10] Ubushinjacyaha buvuga ko Mushinzimana Jean Claude yaragabanyirijwe ibihano nk’uko bigaragara mu gika cya 7 cy’urubanza rujuririrwa, ahabwa gito giteganywa n’Itegeko bityo ko kitakongera kugabanywa. [11] Hakurikijwe izo mpaka, muri uru rubanza, harasuzumwa ikibazo cyo kumenya niba Mushinzimana Jean Claude akwiriye kugabanyirizwa ibihano. II. ISESENGURA RY’IKIBAZO KIGIZE URUBANZA Kumenya niba Mushinzimana Jean Claude akwiriye kugabanyirizwa ibihano [12] Mushinzimana Jean Claude na Me Micomyiza Liliane umwunganira, basaba ko yagabanyirizwa igihano, agahabwa ikiri munsi y’igihano gito giteganywa n’Itegeko kubera impamvu nyoroshyacyaha z’uko yemeye icyaha ku buryo budashidikanywaho, akaba ari ubwa mbere akurikiranywe mu butabera ku buryo buzwi no kuba icyaha yakoze amaze kucyicuza agisabira imbabazi ndetse no kuba yarafatanwe ingano nto y’urumogi (udupfunyika dutanu) kandi nta n’ingaruka icyaha cyagize muri rubanda, akaba amaze kugororoka.Mu miburanire yabo, basaba kandi no kugabanyirizwa ihazabu. [13] Mushinzimana Jean Claude n’umwunganira, basabye kandi kugabanyirizwa ibihano bashingiye no kumurongo watanzwe mu rubanza RPAA00408/2020/CA, rwaciwe ku wa 27/06/2022, Ubushinjacyaha buburana na Niyitegeka Augustin no mu rubanza no RPAA00132/2021/CA, rwaciwe ku wa 15/07/2022, haburana Ubushinjacyaha na Uyisenga Théogène, uvuga ko Urukiko rushobora kugabanya igihano rushingiye ku ngano y’ibiyobyabwenge ushinjwa yatunze cyangwa yacuruje, mu rwego rwo guhuza igihano n’uburemere bw’icyaha(principe de proportionalité de la peine ă l’infraction).

## Page 4

[14] Mushinzimana Jean Claude yanasabye kugabanyirizwa igihano nk’uko byakozwe mu rubanza no RPAA00539/2021/CA, rwaciwe n’Urukiko rw’Ubujurire ku wa 24/02/2023, haburana Ubushinjacyaha na Nshimiyimana Bukuru, aho yafatanwe udupfunyika icumi tw’urumogi agahanishwa igifungo cy’imyaka itanu avuye ku gifungo cy’imyaka 25 yari yahanishijwe n’Urukiko rubanza. [15] Ubushinjacyaha buvuga ko Urukiko mu rubanza rujuririrwa mu gika cya 7 rwaragabanyirije Mushinzimana Jean Claude ibihano rwitaye ku mpamvu nyoroshyacyaha ze, rushingira ku ngingo ya 2 agace ka a na d y’Itegeko No 059/2023 ryo ku wa 04/12/2023 rihindura Itegeko No 68/2018 ryo ku wa 30/08/2018, riteganya ibyaha n’ibihano muri rusange, rumuhanisha igihano gito giteganywa n’Itegeko, kingana n’igifungo cy’imyaka 15 n’ihazabu ingana na milioni eshanu(5.000.000Frw), bityo ko kitakongera kugabanywa. [16] Bukomeza buvuga ko ibyo bihuzwa n’umurongo watanzwe mu rubanza RPAA00159/2023/CA, rwaciwe n’Urukiko rw’Ubujurire ku wa 26/04/2024, Ubushinjacyaha buburana na Mporanyurukundo Jean Clément, aho Urukiko rw’Ubujurire rwasanze adakwiye kugabanyirizwa igihano kuko igihano yahawe n’Urukiko gikwiranye n’uburemere bw’icyaha yahamijwe. [17] Naho ku bijyanye n’urubanza Mushinzimana Jean Claude yasabye gushingiraho mu kumugabanyiriza ibihano, busanga bidashoboka ko rwashingirwaho, kuko ingingo ya 60 y’Itegeko riteganya ibyaha n’ibihano muri rusange, yashingirwagaho mu kugabanya ibihano yarahinduwe kandi umurongo wariho hakoreshwa iyo ngingo mu kugabanya ibihano ntiwakomeza gukurikizwa kandi itagikoreshwa nk’uko bigaragara mu murongo watanzwe mu rubanza RPAA00006/2023/CA, rwaciwe n’Urukiko rw’Ubujurire ku wa 29/12/2023, haburana Ubushinjacyaha na Bahati Emmanuel, aho mu gika cya 35, Urukiko rwasobanuye ko Umurongo wari uriho ntushobora gukurikizwa mu gihe Itegeko wari ushingiyeho ryavuyeho cyangwa ryahinduwe. [18] Busoza bugaragaza ko igihano Mushinzimana Jean Claude yahanishijwe kitagabanywa ngo kijye munsi y’imyaka 15 n’ihazabu y’amafaranga 5.000.000Frw kuko aricyo gito giteganywa n’Itegeko rishya. Busaba ko hagumishwaho imikirize y’urubanza rwajuririwe. UKO URUKIKO RUBIBONA Impaka kuri iyi ngingo, zishingiye kukumenya niba Mushinzimana Jean Claude akwiriye kugabanyirizwa igihano kuri uru rwego, kuburyo yahanishwa igifungo kiri munsi y’imyaka cumi n’itanu (15) n’ihazabu ya milioni eshanu(5.000.000Frw) yahanishijwe n’Urukiko Rukuru, kubera impamvu nyoroshyacyaha, n’urubanza yagaragaje. [19] Ku birebana no kugabanya igihano mu gihe hari impamvu nyoroshyacyaha, ingingo ya 2 y’Itegeko N° 059/2023 ryo ku wa 04/12/2023 rihindura Itegeko N° 68/2018 ryo ku wa 30/08/2018 riteganya ibyaha n’ibihano muri rusange, iteganya ko iyo umucamanza yemeje impamvu nyoroshyacyaha, ashobora kugabanya igihano ku buryo bukurikira: (a) igifungo cya burundu gishobora kugabanywa ariko ntikijye munsi y’igihano cy’igifungo cy’imyaka 15, (d) igihano cy’ihazabu gishobora kugabanywa kugeza kuri kimwe cya kane cy’igihano cy’ihazabu gito giteganyirijwe icyaha cyakozwe. [20] Ku kibazo kijyanye no kumenya niba umuntu wahamijwe icyaha cyo kugurisha ibiyobyabwenge ashobora kugabanyirizwa igihano ku buryo kijya munsi y’igifungo cy’imyaka cumi n’itanu (15) hashingiwe ku mpamvu nyoroshyacyaha, cyakemuwe mu manza zitandukanye zaciwe n’uru Rukiko, kuva aho Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange risohokeye; muri izo manza harimo n’urubanza RPAA00043/2024/CA rwaciwe n’Urukiko rw’Ubujurire ku wa 29/04/2025, Ubushinjacyaha buburana na

## Page 5

Rukundo1. Muri izo manza, Urukiko rw’Ubujurire rwemeje ko icyo gihano kidashobora kugabanywa kuko aricyo gito giteganywa n’itegeko kuri icyo cyaha ndetse no ku kindi cyaha cyose gihanishwa igifungo cya burundu. [21] Naho kubyerekeranye no kumenya niba mu kugabanya igihano, Urukiko rushobora gushingira ku manza zaciwe hashingiwe ku ngingo ya 602 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, byatanzweho umurongo mu rubanza RPAA00367/2020/CA, rwaciwe n’Urukiko rw’Ubujurire ku wa 22/12/2023, haburana ubushinjacyaha na Twagirumukiza Innocent Réponse. Muri urwo rubanza, Urukiko rw’Ubujurire rwifashishije ibyemejwe mu rubanza RPAA00048/2020/CA3 rwaciye ku wa 26/05/2022, haburana Ubushinjacyaha na Bimenyimana Jean Paul, rwemeza ko imanza zose zaciwe mbere y’uko Itegeko Nº 59/2023 ryo ku wa 04/12/2023 rihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange yateganyaga uburyo bwo kugabanya ibihano risohoka, zitagikoreshwa, harimo urubanza RS/INCONST/SPEC00003/2019/SC kimwe n’izindi manza zose zagendeye muri uwo murongo wo kugabanya igihano kugeza munsi y’igihano gito giteganyijwe n’itegeko4. [22] Nk’uko bigaragara mu gika cya 75 cy’urubanza rujuririrwa, Urukiko Rukuru, mu rwego rwo guhuza igihano n’uburemere bw’icyaha ndetse runashingiye ku mpamvu nyoroshyacyaha z’uko ari ubwa mbere Mushinzimana Jean Claude akurikiranwe mu buryo buzwi mu butabera no kuba yaraburanye yemera icyaha aregwa ndetse rushingiye no ku ngingo ya 2 y’Itegeko N° 059/2023 ryo ku wa 04/12/2023 rihindura Itegeko N° 68/2018 ryo ku wa 30/08/2018 riteganya ibyaha n’ibihano muri rusange, rwaramugabanyirije igihano, rumuhanisha igifungo cy’imyaka cumi n’itanu (15) n’ihazabu y’amafaranga y’u Rwanda miliyoni eshanu (5.000.000Frw) aho kuba igifungo cya burundu n’ihazabu y’amafaranga milioni makumyabiri (20.000.000Frw) yahanishijwe n’Urukiko Rwisumbuye. [23] Urukiko rw’Ubujurire rushingiye ku ngingo ya 2 agace ka (a) n’aka (d), y’Itegeko N° 059/2023 ryo ku wa 04/12/2023 ndetse no ku murongo wafashwe n’Urukiko rw’Ubujurire rugendeye kuri iyo ngingo nk’uko byasobanuwe haruguru mugika cya 20, rurasanga igihano Mushinzimana Jean Claude yahanishijwe n’Urukiko Rukuru, cy’igifungo cy’imyaka 15 n’ihazabu y’amafaranga milioni eshanu (5.000.000Frw) aricyo gito gishoboka ku cyaha yahamijwe cyo gucuruza ibiyobyabwenge byo mu bwoko bw’urumogi mu gihe hari impamvu nyoroshyacyaha, bityo kikaba kidakwiye kugabanywa. [24] Hashingiwe kubimaze kuvugwa byose, Urukiko rw’Ubujurire rurasanga ibyasabwe na MUSHINZIMANA Jean Claude n’umwunganizi we, ko yagabanyirizwa igihano yahawe cy’igifungo cy’imyaka cumi n’itanu (15), n’ihazabu ya 5.000.000Frw, agahabwa ikiri munsi y’icyo Itegeko riteganya, hashingiwe ku mpamvu nyoroshyacyaha ze, ndetse n’imanza bagaragaje, nta shingiro bifite, kuko Urukiko Rukuru, rwaramugabanyirije ibihano rwitaye ku mpamvu nyoroshyacyaha ze, nk’uko byasobanuwe haruguru mu gika cya 22, ahabwa igihano gito gishoboka, kitajya munsi y’igifungo cy’imyaka cumi n’itanu(15) n’ihazabu y’amafaranga angana na milioni eshanu(5.000.000Frw). [25] Urukiko rw’Ubujurire rurasanga kandi ibyasabwe na Mushinzimana Jean Claude, ko urubanza no RPAA00539/2021/CA, rwaciwe n’Urukiko rw’Ubujurire ku wa 24/02/2023, haburana Ubushinjacyaha

1 Reba igika cyarwo cya 17. 2 Iyo ngingo yateganyaga uburyo bwo kugabanya igihano ariko Urukiko rw’Ikirenga n’urw’Ubujurire zisobanura mu manza zitandukanye ko ubwo buryo bwo kugabanya ibihano bunyuranye n’amahame y’ubutabera buboneye n’ubwigenge bw’umucamanza kuko budatanga ubwinyagamburiro buhagije bufasha umucamanza guhuza uburemere bw’icyaha, ingaruka zacyo n’igihano. 3Reba igika cyarwo cya 26 aho Urukiko rwasobanuye ibijyanye n’uko umurongo wari uriho udashobora gukurikizwa mugihe itegeko wari ushingiyeho ryavuyeho cyangwa ryahinduwe. 4 Reba igika cya 17-18 cy’urubanza no RPAA00367/2020/CA, rwaciwe n’Urukiko rw’Ubujurire ku wa 22/12/2023, haburana Ubushinjacyaha na Twagirumukiza Innocent Réponse. 5 Reba urubanza RPA01421/2022/HC/KIG, rwaciwe n’Urukiko Rukuru, ku wa 23/09/2024.

## Page 6

na Nshimiyimana Bukuru wagabanyirijwe igihano kugeza ku gifungo cy’imyaka itanu, rwashingirwaho mukumugabanyiriza ibihano, nta shingiro bifite, hashingiwe ku murongo wagarutsweho mu gika cya 21 cy’uru rubanza, watanzwe mu rubanza RPAA00367/2020/CA, rwaciwe n’Urukiko rw’Ubujurire ku wa 22/12/2023, kuko ingingo ya 60 urwo rubanza n’izindi manza zashingirwagaho mukugabanya igihano, yahinduwe n’ingingo ya 2 y’Itegeko No 059/2023 ryo ku wa 04/12/2023, riteganya ibyaha n’ibihano muri rusange. III. ICYEMEZO CY’URUKIKO [26] Rwemeje ko ubujurire bwatanzwe na Mushinzimana Jean Claude nta shingiro bufite. [27] Rwemeje ko urubanza RPA01421/2022/HC/KIG, rwaciwe n’Urukiko Rukuru, ku wa 23/09/2024, rudahindutse mu ngingo zarwo zose. [28] Rutegetse ko Mushinzimana Jean Claude akomeza guhanishwa igifungo cy’imyaka cumi n’itanu (15) n’ihazabu y’amafaranga y’u Rwanda miliyoni eshanu (5.000.000Frw). [29] Rutegetse ko Mushinzimana Jean Claude asonewe gutanga amagarama y’urubanza kuko aburana afunze.