MUTEBI v. MUKAGASAZA

# MUTEBI v. MUKAGASAZA

- Source: Amategeko - Section: Decisions (Judgements) - Date: 2013-03-15 - Case/document no.: RCAA0143/11/CS - Collection: Supreme Court

## Text

## Page 1

MUTEBI v. MUKAGASAZA [Rwanda URUKIKO RW’IKIRENGA – Nº RCAA0143/11/CS (Nyirinkwaya, P.J., Havugiyaremye na Munyangeri, J.) 15 Werurwe, 2013] Amategeko agenga umuryango – Ababana batarashakanye mu buryo bukurikije amategeko – gutandukana – Ikoreshwa ry’ Itegeko Nº 59/2008 ryo kuwa 10/09/2008 rikumira kandi rihana ihohoterwa iryo ariryo ryose rishingiye ku gitsina – Itegeko Nº 59/2008 ryo kuwa 10/09/2008 rikumira kandi rihana ihohoterwa iryo ariryo ryose rishingiye ku gitsina rigamije gukemura ibibazo by’ababanaga mu buryo butemewe n’amategeko mu gihe habayeho kudakomeza kubana no gukemura ibijyanye n’imitungo bari bafitanye mu rwego rwo kurinda ko hagira ukandamiza undi ku bijyanye n’umutungo bafitanye cyangwa bahahanye – Itegeko Nº 59/2008 ryo kuwa 10/09/2008 rikumira kandi rihana ihohoterwa iryo ariryo ryose rishingiye ku gitsina, ingingo ya 39 Amategeko agenga umuryango – Ababana batarashakanye mu buryo bukurikije amategeko – gutandukana – Igabana ry’umutungo – Kuba abatangangabuhamya bemeza ko imitungo yose ababana bidakurikije amategeko bayishakanye kubwibyo igobwa kubagabanywa – Igihe hakoreshwa igenagaciro ku imitungo igomba kugabanywa Amategeko agenga umuryango – Gutandukana – Igisobanuro cyo kuba Ababana batarashakanye mu buryo bukurikije amategeko batumvikana – Kutumvikana hagati yabashakanye mu buryo budakurikije amategeko nti bisobanura ko baba batandukanye mu gihe bakomeje kubana mu inzu Amategeko agenga umuryango – Ikoreshwa ry’igenagaciro ku imitungo igabanywa– Igenanagaciro singombwa igihe abagomba kugabana ibintu ntawe usaba ko ibyobagabana bigurishwa kugirango bagabane igiciro. Amategeko agenga imibiranishirize y’imanza mbonezamubano – Guca urubanza ku ikitaregewe – Indishyi – Amerekezo yo guca urubanza ku ikitaregewe – Gushorwa mu manza – Urukiko ntirufata icyemezo ku kutitaregewe – Kuba haribyo umuburanyi yatakaje akurikirana urubanza ndetse akanaburanirwa na Avoka abiherwa indishyi zigenwa mubushishozi bw’Urukiko – Indishyi z’akababaro ntizigenwa iyo uzisaba atagaragaza ibimenyetso. Incamake y’ikibazo: Mutebi na Mukagasana babanye mu buryo butemewe n’amategeko babyarana abana batandatu, baje kutumvikana mu mibanire yabo. Mukagasaza yatanze ikirego mu Rukiko rw’Ibanze Kacyiru arusaba kwemeza ko yabyaranye na Mutebi maze Urukiko rurabyemeza, yarongeye nanone atanga ikirego mu Rukiko Rwisumbuye rwa Gasabo asaba ko rubagabanya imitungo bashakanye kandi bafitanye, maze urwo Rukiko rushingira ku ingingo ya 39 y’itegeko Nº 59/2008 ryo kuwa 10/09/2008 rikumira kandi rihana ihohoterwa iryo ariryo ryose rishingiye ku gitsina rwemeza ko ababurana bagabana imitungo bashakanye hanyuma bose bakagira ku buryo bungana uburenganzira n’inshingano zo kurera abana babo.

## Page 2

Mutebi yajuririye icyo cyemezo mu Urukiko Rukuru, rwemeza ko abana bagomba gukomeza kubana na nyina, n’umutungo ukagabanywa nk’uko Urukiko Rwisumbuye rwabigennye. Ntiyanyuzwe n’icyo cyemezo maze akijuririra mu Rukiko rw’Ikirenga avuga ko: - Umucamanza yakoresheje nabi ingingo ya 39 y’itegeko ryavuzwe haruguru kuko we atigeze ashyingirwa cyangwa ngo abe yarabigerageje, ko niba Mukagasaza yumva bakwiye kugabana imitungo hashingiwe kuri iyo ngingo yagombye kugaragaza icyemezo cy’abashakanye cya Mutebi n’undi mugore avuga ko bashakanye ko kandi iri tegeko ryasohotse yaramaze gutandukana na Mukagasaza maze umucamanza yemeza ko bagabana imitungo ntaho ashingiye, - Urukiko rusanze bagamba kugabanywa iyo mitungo hakorwa igenagaciro kayo katagize aho kabogamiye kandi bakagabana kuburyo bungana imitungo bashakanye gusa. - Umucamanza yaraciye urubanza ku ikitaregewe kuko mu kubagabanya imitungo yahaye abana kandi nyamara asanga atagomba kuzungurwa akiriho kuko igihe cyo kuzungura kitaragera; Naho kubyerekeye gucunga abana; - Avuga ko yerekanye ibimenyetso by’uko imyitwarire ya Mukagasaza atari myiza ariko umucamanza avuga ko abana bazabana na nyina bakazihitiramo aho baba bamaze kuba bakuru Mukagasaza akavuga ko nta makosa yakozwe n’umucamanza mu igabanywa ry’imitungo ko kandi impamvu yahawe gucunga abana aruko Mutebi yari yarataye urugo ko kandi atanagize uwo abahererezaho kuko yavuze nibakura bazihitiramo aho bagomba kuba, anasaba Urukiko ko rumugenera indishyi z’akababaro, igihembo cy’avoka hamwe n’amafaranga y’ikurikirana rubanza. Incamake y’icyemezo: 1. Ingingo ya 39 y’ itegeko Nº 59/2008 ryo kuwa 10/09/2008 rikumira kandi rihana ihohoterwa iryo ariryo ryose rishingiye ku gitsina igamije igamije gukemura ibibazo by’ababanaga mu buryo butemewe n’amategeko mu gihe habayeho kudakomeza kubana no gukemura ibijyanye n’imitungo bari bafitanye mu rwego rwo kurinda ko hagira ukandamiza undi ku bijyanye n’umutungo bafitanye cyangwa bahahanye, ikindi kandi kuba harabayeho kutumvikana hagati yababana ntibivuga ko baba batandukanye kubwibyo rero iy’ingingo ikwiye gukoreshwa mu kubagabanya imitungo. 2. Kuba abatangangabuhamya bemeza ko imitungo yose ababuranyi bayishakanye kubwibyo igobwa kubagabanywa. 3. Igenanagaciro singombwa igihe abagomba kugabana ibintu ntawe usaba ko ibyobagabana bigurishwa rero ikigamijwe aha ni ukureba imitungo bashakanye cyangwa se bafitanye yagabanywa, hatirengagijwe uburenganzira bw’abana nk’uko bivugwa mu ngingo ya 39 y’ itegeko Nº 59/2008 ryo kuwa 10/09/2008 rikumira kandi rihana ihohoterwa iryo ariryo ryose rishingiye ku gitsina iteganya ko igabana ry’umutungo rivugwa mu gika cya 2 cy’iyi ngingo ritavutsa abana babyaranye uburenganzira bahabwa n’amategeko. 4. Kugenera abana ibibatunga ntibyitwa izungura. 5. Kuba gucunga abana ataricyo kibazo cyaregewe, urukiko ntirushobora kugira icyemezo rubifataho.

## Page 3

6. Kuba haribyo umuburanyi yatakaje akurikirana urubanza ndetse akanaburanirwa na Avoka abiherwa indishyi zigenwa mubushishozi bw’Urukiko, naho kubijyanye n’indishyi z’akababaro umuburanyi ntazigenerwa iyo nta bimenyetso atanga. Ubujurire nta shingiro bufite; Amagarama y’urubanza aherereye kuri Mutebi Hamisi. Amategeko yakoreshejwe: Itegeko Nº 59/2008 ryo kuwa 10/09/2008 rikumira kandi rihana ihohoterwa iryo ariryo ryose rishingiye ku gitsina, ingingo ya 39 nta manza zashingiweho. Urubanza IMITERERE Y’URUBANZA [1] Mutebi Hamisi alias Fungamani yabanye na Mukagasaza Amina mu buryo butemewe n’amategeko babyarana abana batandatu. Baje kutumvikana mu mibanire yabo bituma ikibazo gishyikirizwa inkiko. [2] Mukagasaza Amina yabanje gutanga ikirego mu Rukiko rw’Ibanze rwa Kacyiru arusaba kwemeza ko yabyaranye na Mutebi Hamisi abana batandatu bavuzwe haruguru, ari bo Mutebi Hamisi, Umutoni Neema, Rehema Nadia, Sempabwa Musa, Rafiki Ibrahim na Kiyaga Muhamud, urwo rukiko rubyemeza mu rubanza Nº RC0315/07/TB/KCY. Mukagasaza Amina yatanze ikindi kirego mu Rukiko Rwisumbuye rwa Gasabo asaba ko rubagabanya imitungo bashakanye kandi bafitanye. [3] Urwo Rukiko rushingiye ku ngingo ya 39 y’itegeko Nº 59/2008 ryo kuwa 10/09/2008 rikumira kandi rihana ihohoterwa iryo ariryo ryose rishingiye ku gitsina, rwemeje ko ababurana bagabana imitungo bashakanye, Mukagasaza akagumana iduka riri ku Muhima n’inzu iri mu Kagari ka Kamutwa-Kacyiru, annexes zayo zikagumana abana, naho Mutebi agahabwa inzu iri Lyantonde-Uganda n’ikibanza kiri kuri Mont Kigali, bose bakagira ku buryo bungana uburenganzira n’inshingano zo kurera abana babo. [4] Mutebi Hamisi yajuririye Urukiko Rukuru, urwo rukiko rwemeza ko abana bagomba gukomeza kubana na nyina, n’umutungo ukagabanywa nk’uko Urukiko Rwisumbuye rwabigennye. Mutebi yajuririye na none urwo rubanza mu Rukiko rw’Ikirenga, avuga ko umucamanza yemeje ko bagabana amazu ane ntaho ashingiye, naho Mukagasaza akavuga ko nta makosa yakozwe n’umucamanza mu igabanywa ry’imitungo. [5] Urubanza rwaburanishijwe mu ruhame kuwa 15/01/2013 Mutebi Hamisi aburanirwa na Me Munyankindi Jean Pierre, naho Mukagasaza Amina aburanirwa na Me Mbonyimpaye Elias.

## Page 4

IBIBAZO BIGIZE URUBANZA N’ISESENGURA RYABYO Kumenya niba itegeko Nº 59/2008 ryo ku wa 10/09/2008 rikumira kandi rihana ihohoterwa iryo ariryo ryose rishingiye ku gitsina ryarakoreshejwe nabi n’Inkiko zabanje. [6] Ku bw’ibanze, Me MunyankindI Jean Pierre uburanira Mutebi Hamisi avuga ko umucamanza yumvise akanakoresha nabi ingingo ya 39 y’itegeko Nº 59/2008 ryo kuwa 10/09/2008 rikumira kandi rihana ihohoterwa iryo ariryo ryose rishingiye ku gitsina, bituma arishingiraho agabanya ababuranyi imitungo bidakwiye. Iyi ngingo igira iti ababanaga nk’umugore n’umugabo batashyingiranywe mu buryo buteganywa n’amategeko, bashyingirwa hakurikije ihame ry’ubushyingiranywe bw’umugore umwe n’umugabo umwe. Mu gihe umwe mu barebwa n’ibivugwa mu gika kibanziriza iki, yabanaga n’abagore cyangwa n’abagabo benshi, abanza kugabana ku buryo bungana na buri wese mu bo babanaga, umutungo bari bafitanye cyangwa bahahanye mbere y’uko ashyingirwa. Igabana ry’umutungo rivugwa mu gika cya kabiri cy’iyi ngingo ntirivutsa abana babyaranye uburenganzira bahabwa n’amategeko. [7] Mutebi ahereye ku ngingo y’itegeko ivuzwe haruguru avuga ko atigeze ashyingirwa cyangwa ngo abe yarabigerageje, ko niba Mukagasaza yumva bakwiye kugabana imitungo hashingiwe kuri iyo ngingo yagombye kugaragaza icyemezo cy’abashakanye (attestation de mariage) cya Mutebi n’undi mugore avuga ko bashakanye. Avuga ko kuba ibyo bitarakozwe bikwiye gufatwa nk’aho umucamanza yemeje igabanywa ry’imitungo atabigaragarije impamvu. [8] Me Mbonyimpaye Elias uburanira Mukagasaza Amina avuga ko ibyo uburanira Mutebi Hamisi avuga nta shingiro byahabwa, kubera ko umucamanza wo mu Rukiko Rukuru yabimusubije ku rupapuro rwa kabiri, igika cya munani mu rubanza rwajuririwe, aho yasobanuye ko umushingamategeko yashatse gukosora ikibazo cy’ababanaga batarasezeranye bajya gutana umugore ntagire icyo abona. Avuga ko umucamanza atakoresheje nabi ingingo ya 39 y’itegeko ryavuzwe haruguru, ahubwo yabisobanuye ku buryo bwumvikana kuko yavuze ko iyo umugore agaragaje ko imitungo bayishakanye n’umugabo nta mpamvu batayigabana. Uko Urukiko rubibona [9] Ingingo ya 39 y’ itegeko Nº 59/2008 ryo kuwa 10/09/2008 rikumira kandi rihana ihohoterwa iryo ariryo ryose rishingiye ku gitsina iteganya ko ababanaga nk’umugore n’umugabo batashyingiranywe mu buryo buteganywa n’amategeko, bashyingirwa hakurikije ihame ry’ubushyingiranywe bw’umugore umwe n’umugabo umwe. Mu gihe umwe mu barebwa n’ibivugwa mu gika kibanziriza iki, yabanaga n’abagore cyangwa n’abagabo benshi, abanza kugabana ku buryo bungana na buri wese mu bo babanaga, umutungo bari bafitanye cyangwa bahahanye mbere y’uko ashyingirwa. Igabana ry’umutungo rivugwa mu gika cya kabiri cy’iyi ngingo ntirivutsa abana babyaranye uburenganzira bahabwa n’amategeko. [10] Mu isesengura ry’iyi ngingo, byumvikana ko igamije gukemura ibibazo by’ababanaga mu buryo butemewe n’amategeko mu gihe habayeho kudakomeza kubana no gukemura ibijyanye n’imitungo bari bafitanye, ikaba itareba abatandukanye mbere y’uko iri tegeko risohoka, ahubwo ireba abagiye kureka gukomeza kubana mu rwego rwo kurinda ko hagira ukandamiza undi ku bijyanye n’umutungo bafitanye cyangwa bahahanye. Iki gitekerezo

## Page 5

kigaragara mu rubanza rwaciwe n’Urukiko rw’Ikirenga kuwa 10/09/2008 aho rwasobanuye ko ingingo ya 39 y’iri tegeko igamije kurengera abatandukanye bamaze igihe babana nk’umugabo n’umugore batarashyingiranywe bafatanya byose. [11] Urukiko rurasanga ibyo Mutebi Hamisi avuga ko itegeko Nº 59/2008 ryo kuwa 10/09/2008 rikumira kandi rihana ihohoterwa iryo ariryo ryose rishingiye ku gitsina ryasohotse baratandukanye nta shingiro bifite kuko inyandiko ziri muri dosiye zigaragaza ko kugeza muri 2010 Mutebi na Mukagasaza, n’ubwo babanaga nabi bari bakibana. Urugero ni nk’ikirego Mutebi Hamisi yatanze kuwa 21/10/2010 mu nzego z’Ubuyobozi bw’ibanze avuga ko Mukagasaza yaciye urugi rw’icyumba yaryamagamo ubwo yari afunzwe akamwiba ibintu byose byarimo. Kuba barabanaga nabi rero bikaba bitavuze ko bari baratandukanye ku buryo iri tegeko ritakoreshwa. [12] Urukiko rurasanga itegeko Nº 59/2008 ryo kuwa 10/09/2008 rikumira kandi rihana ihohoterwa iryo ariryo ryose rishingiye ku gitsina nk’uko bimaze kugaragazwa mu bika bibanziriza iki ritarakoreshejwe nabi n’Inkiko zibanza nk’uko Mutebi Hamisi abiburanisha, bityo rikaba rigomba gukurikizwa hagabanywa imitungo ababuranyi bahahanye. Ku byerekeye imitungo Mutebi Hamisi na Mukagasaza Amina bagomba kugabana. [13] Me Munyankindi avuga ko, kubw’igitangaza urukiko rusanze iyo mitungo igomba kugabanywa ababurana, hakorwa expertise itagira aho ibogamiye ku mitungo yose, bakabagabanya ku buryo bungana imitungo bashakanye yonyine, hatagiyemo iyo Mutebi yashakanye n’undi mugore cyangwa iyo yari atunze mbere y’uko babana na Mukagasaza kuko itegeko ribiteganya rityo. [14] Me Munyankindi avuga ko imitungo Mutebi afitanye na Mukagasaza yemera ko bagabana ari tagisi ebyiri, akabanza gato kari Mont Kigali n’iduka riri ku muhima rifite agaciro ka 14.023.000 frw, yavuye mu nzu bari bafite i Nyamirambo bakayigurisha agashyirwa muri iryo duka. [15] Avuga ko amazu (inzu nini na annexes zayo 3) ari Kacyiru ayafitiye ikimenyetso cy’ifishi yakozwe mu 1981 igaragaza igihe amazu yubakiwe, ko rero Mukagasaza yayamusanganye uretse kugenda ayavugurura, bityo akaba atagomba kubarwa mu mitungo igabanywa, umucamanza akaba yarayatanze ntacyo ashingiyeho. Avuga kandi ko imitungo yabonye kuva mu 1999 itakagombye kugabanywa kuko bari batakibana, ko baramutse bagabanye habanza gukurwamo imigabane y’abana. [16] Avuga na none ko umucamanza yirengagije ko inzu iri Lyatonde – Uganda ayisangiye n’uwitwa Kajura, ikaba itagomba kujya mu mutungo ugabanywa, ko kandi yagaragarijwe agaciro (expertise) n’umuntu utabifitiye ububasha. [17] Ikindi avuga ni uko umucamanza yaciriye urubanza ku kitaregewe kuko mu kugabanya Mutebi na Mukagasaza imitungo bashakanye yahaye n’abana annexes kandi nyamara asanga atagomba kuzungurwa akiriho kuko igihe cyo kuzungura kitaragera. [18] Ku kibazo kijyanye n’ugomba gucunga abana, uburanira Mutebi avuga ko yerekanye ibimenyetso by’uko imyitwarire ya Mukagasaza atari myiza ariko ararenga avuga ko abana

## Page 6

bazabana na nyina bakazihitiramo aho baba bamaze kuba bakuru, akaba yarirengagije ingingo ya 9 y’itegeko n 27/2001 ryo kuwa 28/04/2001 ryerekeye uburenganzira bw’umwana n’uburyo bwo kumurinda ihohoterwa. [19] Me Mbonyimpaye Elias avuga ko imitungo igomba kugabanywa yatangiwe ibyemezo byemewe, maze umucamanza abishingiraho awugabanya ku buryo busobanutse. Avuga kandi ko kuba ababurana barabyaranye abana bagera kuri barindwi, bakaba barafashe icyemezo cy’umutungo bari kumwe, n’abatangabuhamya babajijwe mu iperereza ryakozwe n’Urukiko Rwisumbuye rwa Gasabo bakaba baremeje ko bashakanye amazu ya Kacyiru, bigaragaza ko imitungo yose iburanwa bayishakanye. [20] Ku bijyanye n’inzu y’i Bugande, Me Mbonyimpaye avuga ko urukiko rwagendeye ku nyandiko zatanzwe n’abayobozi ba Uganda zemeza ko iyo nzu ari iya Mutebi. Kubirebana n’uko yaba yarayifatanyije n’undi muntu, Me Mbonyimpaye avuga ko Mutebi yivuguruza kuko mu Rukiko Rwisumbuye rwa Gasabo yemeraga ko bayigabana na Mukagasaza kubera ko bafatanyije kuyigura, ageze mu Rukiko Rukuru avuga ko ayifatanyije n’undi muntu, none mu Rukiko rw’Ikirenga akaba avuga ko ari iy’undi mugore yashakiye Uganda. [21] Kubyerekeranye n’uko expertise yakozwe n’utabifitiye ububasha, avuga ko nta shingiro bifite kubera ko uwayikoze yemewe mu Rwanda kandi akaba ari kimwe mu bihugu bigize Umuryango w’ibihugu by’Afurika y’Iburasirazuba nabyo yakoreramo nta nkomyi. [22] Ku bijyanye n’ugomba gucunga abana, avuga ko Mutebi yari yarataye umugore n’abana akaba aricyo cyatumye umucamanza atamushinga kubarera, ariko ko atanagize uwo abahererezaho, ko ahubwo yavuze ko bamaze gukura bazihitiramo aho bagomba kuba. [23] Me Mbonimpaye asaba ko Mutebi yacibwa amafaranga 5.000.000 frw y’indishyi z’akababaro, 1.000.000 y’ikurikiranarubanza, na 500.000 y’igihembo cy’avoka. Uko Urukiko rubibona [24] Ku byerekeranye n’imitungo igomba kugabanywa Mutebi Hamisi na Mukagasaza, Urukiko rurasanga abatangabuhamya Sebera Assoumani na Ngirente Milton babajijwe n’Urukiko Rwisumbuye rwa Gasabo baremeje ko Mutebi Hamisi na Mukagasaza bashakanye amazu ane ari Kacyiru, ikibanza kiri Mont Kigali, Iduka riri ku Muhima, iyi mitungo yose ikaba igomba kugabanywa ku buryo bungana. Ibyo Mutebi Hamisi avuga ko ayo mazu yubatswe batarabana bikaba nta gaciro byahabwa. [25] Ku bijyanye n’inzu iri Lyatonde- Uganda, Urukiko rurasanga mu Rukiko Rwisumbuye Mutebi Hamisi yaremeye ko bayigabana na Mukagasaza, bivuze ko nawe yemeraga ko uwo mutungo bawushakanye, ibyo avuga ko bayisangiye n’undi muntu bikaba bitahabwa agaciro, bityo iyo nzu nayo ikaba igomba kubarwa mu mutungo ugomba kugabanywa. [26] Ku bijyanye na expertise Mutebi Hamisi avuga ko igomba gukorwa ku mitungo yose ngo kuko iya mbere yaba yarakozwe n’utabifitiye ububasha, Urukiko rurasanga yaba Mutebi cyangwa Mukagasaza ntawe usaba ko ibyo bashakanye bigurishwa ngo bagabane ikiguzi cyabyo, ahubwo ikigamijwe ari ru.

## Page 7

[27] Urukiko rurasanga nk’uko Urukiko Rukuru rwabyemeje, Mutebi Hamisi agomba kugumana inzu iri Lyantonde-Uganda n’ikibanza kiri Mont Kigali, Mukagasaza Amina akagumana inzu iri Kacyiru n’Iduka riri ku Muhima. [28] Ku bijyanye n’ibyo Mutebi Hamisi avuga ko annexes zitagomba guhabwa abana kuko byaba ari ukumuzungura akiriho, Urukiko rurasanga nta zungura ryigeze ritegekwa mu manza zabanje, ahubwo icyabaye ari ukugena ibitunga abana. [29] Ku bijyanye n’ugomba gucunga abana, Urukiko rurasanga rudashobora kugira icyemezo rubifataho kubera ko ataricyo kibazo cyaregewe muri uru rubanza. [30] Ku byerekeye indishyi z’akababaro za 5.000.000 frw Mukagasaza asaba, Urukiko rurasanga ntazo yahabwa kuko nta bimenyetso abitangira mu gihe yemerewe kugabana na Mutebi imitungo bashakanye. [31] Ku birebana na 1.000.000 frw y’ikurikiranarubanza na 500.000 frw y’igihembo cya avoka Mukagasaza yaka, Urukiko rusanga yaragize ibyo atakaza kuri uru rubanza arukurikira kandi anaruburanirwa na avoka, ariko kuko ayo asaba ari ikirenga, akaba agenewe 300.000 frw mu bushishozi bwarwo akubiyemo ay’ikurikiranarubanza n’igihembo cya avoka. III. ICYEMEZO CY’URUKIKO [32] Rwemeje ko ubujurire bwa Mutebi Hamisi nta shingiro bufite. [33] Rwemeje ko urubanza Nº RCA 0328/10/HC/KIG rwaciwe n’Urukiko Rukuru kuwa 17/11/2011 ruhindutse gusa ku byerekeye ugomba kubana n’abana bitaregewe mu rubanza kuva ku rwego rwa mbere. [34] Rutegetse Mutebi Hamisi gutanga amagarama y’urubanza angana na 29.700 frw, atayatanga ku bushake agakurwa mu bye ku ngufu za Leta.