MVUYEKURE v. UBUSHINJACYAHA

# MVUYEKURE v. UBUSHINJACYAHA

- Source: Amategeko - Section: Decisions (Judgements) - Date: 2025-12-30 - Case/document no.: RPAA 00025/2025/CA - Collection: Court of Appeal

## Text

## Page 1

MVUYEKURE v. UBUSHINJACYAHA [Rwanda URUKIKO RW’UBUJURIRE – RPAA 00025/2025/CA (Mukandamage, P.J.,) 30 Ukuboza 2025] Amategeko agenga ibyaha n’ibihano – Icyaha cyo gusambanya umwana cyakurikiwe no kubana nawe nk’umugabo cyangwa umugore – Ibihano – Icyaha cyo gusambanya umwana, cyakurikiwe no kubana nawe nk’umugabo cyangwa umugore, gihanishwa igifungo cya burundu, ariko haba habonetse impamvu nyoroshyacyaha zemejwe n’umucamanza, igihano kikaba cyagabanywa ku buryo kitajya munsi y’igifungo cy’imyaka 15. Incamake y’ikibazo: Mukamugarura Claudine yareze Mvuyekure Jean Pierre mu Bugenzacyaha avuga yasambanyije umwana we witwa I. H.1 w’imyaka 15 y’amavuko, babana nk’umugabo n’umugore. Nyuma y’iperereza, Ubushinjacyaha bwareze Mvuyekure mu Rukiko Rwisumbuye rwa Ngoma icyaha cyo gusambanya umwana, byakurikiwe no kubana nk’umugabo n’umugore, busaba ko ahamwa n’icyo cyaha agahanishwa igifungo cy’imyaka 25. Uregwa yaburanye ahakana icyaha, afungwa, asaba kurenganurwa. Rubishingiye ku bimenyetso bitandukanye, Urukiko Rwisumbuye rwa Ngoma rwasanze Mvuyekure ahamwa n’icyaha cyo gusambanya umwana, maze rumuhanisha igifungo cy’imyaka 25. Mvuyekure yajuririye Urukiko Rukuru, Urugereko rwaRwamagana yemera icyaha yari yahakanye ku rwego rwa mbere, avugako bari bamushutse, asaba ko yagabanyirizwa igihano. Uhagarariye Ubushinjacyaha yavuze ko kuba Mvuyekure asaba kugabanyirizwa igihano yabihabwa, maze agahanishwa igifungo cy’imyaka 13. Urukiko Rukuru, Urugereko rwa Rwamagana, rushingiye ku mpamvu yuko aribwo bwa mbere Mvuyekure akurikiranwe mu butabera, rwamugabanyirije igihano, maze rukamuhanisha igifungo cy’imyaka 15. Mvuyekure yajuririye Urukiko rw’Ubujurire, avuga ko atagabanyirijwe igihano ku buryo buhagije, kandi ko rutasuzumye neza ubujurire bwe ngo ruhuze impamvu nyoroshyacyaha, bityo asaba ko cyakongera kugabanywa. Uhagarariye Ubushinjacyaha avuga ko Mvuyekure yagabanyirijwe igihano ku buryo buhagije, kuko Urukiko Rwisumbuye rwa Ngoma rwari rwamuhanishije igifungo cy’imyaka 25 aho kuba igifungo cya burundu giteganyirizwa icyaha yakoze, Urukiko Rukuru, Urugereko rwa Rwamagana yajuririye narwo rumugabanyiriza igihano rumuhanisha igifungo cy’imyaka 15. Uhagarariye Ubushinjacyaha avuga kandi ko Mvuyekure Jean Pierre n’umwunganizi we batabasha kugaragaza niba urukiko rwabanje rwaba rwarakoresheje nabi itegeko cyangwa ubushishozi bwarwo mu gutanga icyo gihano, kuko kongera kumugabanyiriza igihano bishoboka

## Page 2

gusa igihe igihano yahawe kitajyanye n’uburemere bw’icyaha ndetse n’ingaruka zacyo, bityo asaba ko urubanza rwajuririwe rwagumana agaciro mu ngingo zarwo zose. Incamake y’icyemezo: Icyaha cyo gusambanya umwana, cyakurikiwe no kubana nawe nk’umugabo cyangwa umugore, gihanishwa igifungo cya burundu, ariko haba habonetse impamvu nyoroshyacyaha zemejwe n’umucamanza, igihano kikaba cyagabanywa ku buryo kitajya munsi y’igifungo cy’imyaka 15. Ubujurire nta shingiro bufite.

Amategeko yashingiweho: Imanza zifashishijwe: Urubanza RPAA 00054/2024/CA, rw’Ubushinjacyaha na Bikorimana, rwaciwe n’Urukiko rw’Ubujurire ku wa 19/12/2024; Urubanza RPAA 00325/2024/CA, rw’Ubushinjacyaha buburana na Sibomana Rafiki, rwaciwe n’Urukiko rw’Ubujurire ku wa 16/05/2025.

Urubanza I. IMITERERE Y’URUBANZA [1] Mukamugarura Claudine yareze Mvuyekure Jean Pierre muBugenzacyaha avuga ko ku wa 27/03/2021 yasambanyije umwana wewitwa I. H. w’imyaka 15 y’amavuko, babana nk’umugabo n’umugore. [2] Nyuma y’iperereza, Ubushinjacyaha bwareze Mvuyekure Jean Pierremu Rukiko Rwisumbuye rwa Ngoma icyaha cyo gusambanya umwana, byakurikiwe no kubana nk’umugabo n’umugore, busaba ko ahamwa n’icyo cyaha agahanishwa igifungo cy’imyaka 25. [3] Mvuyekure Jean Pierre yaburanye ahakana icyaha, avuga koumwana yamusuye aho yogosheraga, komite y’Umudugudu iraza irabafungirana, bamubwira ko agomba kubana nawe niba adashaka ko afungwa, maze asaba kurenganurwa. [4] Mu rubanza RP 00824/2021/TGI/NGOMA rwaciwe ku wa 23/07/2021, Urukiko Rwisumbuye rwa Ngoma rwasanze Mvuyekure Jean Pierre ahamwa n’icyaha cyo gusambanya umwana, rumuhanisha igifungo cy’imyaka 25, rushingiye ku bimenyetso bikurikira: a) Imvugo ze mu iperereza; b) Imvugo z’umwana umushinja; c) Imvugo za Mukamugarura Claudine umushinja n’ubuhamyabwa Murekatete Henriette; d) Raporo ya Muganga igaragaza ko umukobwa atwite;

## Page 3

e) Inyandiko mvugo y’ibyabaye (PV de constat). [5] Mvuyekure Jean Pierre yajuririye Urukiko Rukuru, Urugereko rwaRwamagana yemera icyaha yari yahakanye ku rwego rwa mbere, avugako bari bamushutse, asaba ko yagabanyirizwa igihano. Uhagarariye Ubushinjacyaha yavuze ko kuba Mvuyekure Jean Pierre asaba Amazina arahinwe kubera kamere y’icyaha n’imyaka y’uwahohotewe kugabanyirizwa igihano yabihabwa, maze agahanishwa igifungo cy’imyaka 13. [6] Mu rubanza RPAA 01028/2021/HC/RWG rwaciwe ku wa 23/12/2024,Urukiko Rukuru, Urugereko rwa Rwamagana, rushingiye ku mpamvu yuko aribwo bwa mbere Mvuyekure Jean Pierre akurikiranwe mu butabera, rwamugabanyirije igihano rumuhanisha igifungo cy’imyaka 15. [7] Mvuyekure Jean Pierre yajuririye Urukiko rw’Ubujurire, urubanza ruhabwa RPAA 00025/2025/CA. Iburanisha mu ruhame ryabaye ku wa 01/12/2025, Mvuyekure Jean Pierre yunganiwe na Me Uwimabera Béata, naho Ubushinjacyaha buhagarariwe na Sibomana Stanislas, Umushinjacyaha ku rwego rw’Igihugu. [8] Mu myanzuro no mu miburanire, Mvuyekure Jean Pierre avuga ko atagabanyirijwe igihano ku buryo buhagije, agasaba ko cyakongera kugabanywa. Uhagarariye Ubushinjacyaha avuga ko igihano Mvuyekure Jean Pierre yahawe kitakongera kugabanywa, kuko cyagabanyijwe ku buryo buhagije. [9] Muri uru rubanza harasuzumwa niba igihano Mvuyekure Jen Pierre yahawe n’Urukiko Rukuru, Urugereko rwa Rwamagana cyakongera kugabanywa. II. ISESENGURWA RY’IKIBAZO KIGIZE URUBANZA Kumenya niba igihano Mvuyekure Jen Pierre yahawe n’Urukiko Rukuru, Urugereko rwa Rwamagana cyakongera kugabanywa [10] Mvuyekure Jean Pierre na Me Uwimabera Béata bavuga ko Urukiko Rukuru, Urugereko rwa Rwamagana rutamugabanyirije igihano ku buryo buhagije, ko rutasuzumye neza ubujurire bwe ngo ruhuze impamvu nyoroshyacyaha n’ingingo ya 49 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange n’urubanza RS/INCONST/SPEC 00003/2019/CS rwaciwe n’Urukiko rw’Ikirenga ku wa 04/12/2019, haburana Kabasinga Florida na Leta y’u Rwanda, aho rwemeje ko akamaro k’igihano katareberwa gusa ku buremere bw’icyaha cyakozwe, ko mu guhana hajya harebwa icyo igihano cyamarira ugihawe. [11] Uhagarariye Ubushinjacyaha avuga ko Mvuyekure Jean Pierre yagabanyirijwe igihano ku buryo buhagije, kuko Urukiko Rwisumbuye rwa Ngoma rwari rwamuhanishije igifungo cy’imyaka 25 aho kuba igifungo cya burundu giteganyirizwa icyaha yakoze, Urukiko Rukuru, Urugereko rwa Rwamagana yajuririye narwo rumugabanyiriza igihano rumuhanisha igifungo cy’imyaka 15, hashingiwe ku biteganywa n’ingingo ya 2, agace ka (a), y’Itegeko Nº 059/2023 ryo ku wa 04/12/2023 ihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange. [12] Uhagarariye Ubushinjacyaha avuga kandi ko Mvuyekure Jean Pierren’umwunganizi we batabasha kugaragaza niba urukiko rwabanje rwaba rwarakoresheje nabi itegeko cyangwa

## Page 4

ubushishozi bwarwo mu gutanga icyo gihano, kuko kongera kumugabanyiriza igihano bishoboka gusa igihe igihano yahawe kitajyanye n’uburemere bw’icyaha ndetse n’ingaruka zacyo hakurikijwe ibiteganywa n’ingingo ya 49 y’Itegeko Nº 68/2018 ryo ku wa 30/8/2018 riteganya ibyaha n’ibihano muri rusange. [13] Uhagarariye Ubushinjacyaha avuga na none ko ikibazo cyo kumenya igihano gito gishobora guhabwa uwasambanyije umwana bigakurikirwa no kumugira umugabo cyangwa umugore mu gihe hari impamvu nyoroshyacyaha cyatanzweho umurongo n’Urukiko rw’Ubujurire mu manza zitandukanye, harimo n’urubanza RPAA 00835/2024/CA, rwaciwe ku wa 17/04/2025, haburana Ubushinjacyaha na Ndagijimana Emile, uvuga ko icyaha cyo gusambanya umwana, cyakurikiwe no kubana nawe nk’umugabo cyangwa umugore, gihanishwa igifungo cya burundu, ariko haba habonetse impamvu nyoroshyacyaha zemejwe n’umucamanza, igihano kikaba cyagabanywa ku buryo kitajya munsi y’igifungo cy’imyaka 15, bityo na Mvuyekure Jean Pierre wahanishijwe igihano cy’igifungo cy’imyaka 15 akaba atagomba kongera kugabanyirizwa, kuko ntaho urukiko rwabihera. [14] Uhagarariye Ubushinjacyaha avuga ko rero hashingiwe ku ngingo ya 183, agace ka 5 n’aka 6, y’Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, Mvuyekure Jean Pierre nta nenge cyangwa amakosa agaragaza byakozwe mu rubanza RPA 01028/2021/HC/RWG rwaciwe n’Urukiko Rukuru, Urugereko rwa Rwamagana, kuko ibyo asaba byasuzumwe n’inkiko zabanje kandi bihabwa ishingiro. Asaba ko urubanza rwajuririwe rwagumana agaciro mu ngingo zarwo zose. UKO URUKIKO RUBIBONA [15] Impaka muri uru rubanza zishingiye ku kumenya niba igihano cy’igifungo cy’imyaka 15 Mvuyekure Jean Pierre yahawe n’Urukiko Rukuru, Urugereko rwa Rwamagana ku cyaha cyo gusambanya umwana w’imyaka 15 y’amavuko byakurikiwe no kubana nk’umugabo n’umugore, cyakongera kugabanywa. [16] Mu rubanza RPAA 00054/2024/CA rwaciwe n’Urukiko rw’Ubujurire ku wa 19/12/2024, haburana Ubushinjacyaha na Bikorimana Jean Paul hasobanuwe ko icyaha cyo gusambanya umwana, cyakurikiwe no kubana nawe nk’umugabo cyangwa umugore, gihanishwa igifungo cya burundu, ariko haba habonetse impamvu nyoroshyacyaha zemejwe n’umucamanza, igihano kikaba cyagabanywa ku buryo kitajya munsi y’igifungo cy’imyaka 15. Uyu murongo wagiye ukurukizwa mu manza zitandukanye zaciwe n’uru rukiko, harimo urubanza RPAA 00325/2024/CA, rwaciwe n’Urukiko rw’Ubujurire ku wa 16/05/2025, Ubushinjacyaha buburana na Sibomana Rafiki. [17] Nk’uko bigaragara mu manza zabanje, Mvuyekure Jean Pierre yaburanye ku rwego rwa mbere ahakana icyaha cyo gusambanya umwana akabana nawe nk’umugabo n’umugore, Urukiko Rwisumbuye rwa Ngoma rumuhamya icyo cyaha rumuhanisha igifungo cy’imyaka 25.Mu bujurire, Mvuyekure Jean Pierre yemeye icyaha asaba kugabanyirizwa igihano, Urukiko Rukuru, Urugereko rwa Rwamagana rusanga kwemera icyaha mu bujurire ntacyo byamumarira, ariko kubera ko ari ubwa mbere yari akurikiranwe mu butabera ku buryo buzwi, yahanishijwe igifungo cy’imyaka 15.

## Page 5

[18] Urukiko rw’Ubujurire rurasanga igihano cy’imyaka 15 y’igifungo Mvuyekure Jean Pierre yahawe n’Urukiko Rukuru, Urugereko rwa Rwamagana kitakongera kugabanywa, kuko aricyo gito giteganywa n’amategeko ku cyaha yahamijwe cyo gusambanya umwana w’imyaka 15 y’amavuko akaba nawe nk’umugabo n’umugore mu gihe hari impamvu nyoroshyacyaha zahawe ishingiro. [19] Urukiko rw’Ubujurire rurasanga rero, ubujurire bwatanzwe na Mvuyekure Jean Pierre bugamije kugabanyisha igihano yahawe nta shingiro bufite, urubanza yajuririye rukaba rugomba kugumana agaciro mu ngingo zarwo zose. III. ICYEMEZO CY’URUKIKO [20] Rwemeje ko ubujurire bwatanzwe na Mvuyekure Jean Pierre nta shingiro bufite; [21] Rwemeje ko urubanza RPA 01028/2021/HC/RWG rwaciwe n’Urukiko Rukuru, Urugereko rwa Rwamagana ku wa 23/12/2024 rudahindutse; [22] Rutegetse ko igihano cy’igifungo cy’imyaka 15 Mvuyekure Jean Pierre yahawe ku cyaha cyo gusambanya umwana w’imyaka 15 y’amavuko, akabana nawe nk’umugabo n’umugore kigumyeho.