UBUSHINJACYAHA v. NDACYAYISENGA

# UBUSHINJACYAHA v. NDACYAYISENGA

- Source: Amategeko - Section: Decisions (Judgements) - Date: 2025-09-29 - Case/document no.: RPAA01308/2024/CA - Collection: Court of Appeal

## Text

## Page 1

UBUSHINJACYAHA v. NDACYAYISENGA [Rwanda URUKIKO RW’UBUJURIRE – RPAA01308/2024/CA (Umugwaneza, J. P.) 29 Nzeri 2025] Amategeko agenga imanza nshinjabyaha – Igabanyagihano – Igihano cy’igufungo cya burundu – Igihe hari impamvu nyoroshyacyaha zemejwe n’umucamanza igihano cy’igifungo cya burundu gishobora kugabanywa, ariko ntikijye munsi y’igifungo cy’imyaka cumi n’itanu (15), n’ihazabu iteganyijwe ishobora kugabanywa ariko ntijye munsi ya kimwe cya kane cy’ihazabu nto iteganyirijwe icyaha cyakozwe. Incamake y’ikibazo: Ndacyayisenga yafatanywe litiro 6 za kanyanga n’udupfunyika 688 tw’urumogi arimo kubigurisha hamwe na 10000Frw yari amaze kugurisha kanyanga, aregwa n’Ubushinjacyaha mu Rukiko Rwisumbuye rwa Ngoma, icyaha cyo gucuruza ibiyobyabwenge na kanyanga. Ndacyayisenga yaburanye yemera icyaha, avuga naho akura ibyo biyobyabwenge. Urukiko Rwisumbuye rwamuhamije icyaha cyo gufatanwa no kugurisha ibiyobyabwenge bihambaye byo mu bwoko bw’urumogi n’ibiyobyabwenge byoroheje byo mu bwoko bwa kanyanga, ahanishwa igifungo cy’imyaka 20 no gutanga ihazabu ya 20.000.000Frw. Uregwa yajuririye mu Rukiko Rukuru, urugereko rwa Rwamagana, asaba kugabanyirizwa no gusubikirwa igihano. Nyuma yatanze umwanzuru w’inyongera avuga ko icyaha yemera aricyo gufatanwa kanyanga ingana na litilo 0.5 yari avuye kugura ngo ayinywe, abajijwe aho ayikuye ajya kuherekana n’ibwo bahasanze udupfunyika 688 tw’urumogi ndetse n’ibishashe 4 bya kanyanga, ko n’amafaranga bavuga ko bamufatanye atari aye. Bityo, asaba ko yahindurirwa inyito y’icyaha ashinjwa ikaba gufatanwa ibiyobyabwenge byo mu bwoko bwa kanya, kuko kanyanga yemera ko yafatanwe yayiguze agamije kuyinywa. Ubushinjacyaha bwagaragaje ko Uregwa yatanze uwo mwanzuro w’inyongera igihe cy’ubujurire cyararenze kandi ingingo yawo y’ubujurire ikaba ihabanye n’iyatanzwe mu gihe cyo kujurira, bityo ikaba idakwiriye gusuzumwa. Buvuga ko ibyo asaba byo kugabanyirizwa igihano atagomba kubihabwa, kuko hakurikijwe uburemere bw’icyaha yakoze n’ingaruka zacyo yagabanyirijwe bihagije, cyane cyane ko bigaragara ko yisubiyeho agahakana icyaha nkana kandi yaragikoze, byerekana ko n’ubundi ntacyo yemera. Urukiko Rukuru rwaciye urubanza rwemeza ko ingingo y’ubujurire yatanzwe mu mwanzuro w’inyongera itasuzumwa kuko yatanzwe nyuma y’igihe giteganywa n’amategeko, kandi ikaba ituzuza iyatanzwe mbere mu gihe giteganywa n’amategeko. Urukiko Rukuru rwasanze akwiriye kugabanyirizwa igihano, kuko ku rwego rwa mbere yemeye icyaha aregwa ndetse akaba nta kindi cyaha kizwi yahaniwe, ahanishwa igifungo cy’imyaka 15 n’ihazabu y’amafaranga y’u Rwanda 5.000.000Frw. Icyo cyemezo Uregwa yakijuririye muri uru Rukiko rw’Ubujurire avuga ko atagabanyirijwe igihano bihagije kandi hari impamvu nyoroshyacyaha zashoboraga gushingirwaho kikagabanywa, akaba akomeje gutakamba asaba ko icyo gihano cyagabanywa agahanishwa igihano gito gishoboka byaba ngombwa kikanasubikwa. Asobanura ko izo mpamvu nyoroshyacyaha zirimo kuba yemera icyaha mu buryo budashidikanywaho, kuba icyaha yakoze nta ngaruka mbi cyateje kuko yafashwe nta muntu aragurisha ibiyobyabwenge ngo bimwangize, kuba icyaha yaragikoze abitewe n’ubushomeri n’ubukene, kuba icyaha yakoze cyaragize ingaruka ku iterambere rye no kumuryango we kandi akaba akeneye kwiteza imbere, kuba ubu yaramaze kugororoka no kumva ububi bw’icyaha yakoze. Muri uru rubanza, Ubushinjacyaha buvuga ko mu bujurire bwa mbere Uregwa yagabanyirijwe igihano ahanishwa igifungo cy’imyaka 15 n’ihazabu ya 5.000.000Frw ari nacyo gihano gito giteganywa n’amategeko, ko harebwe uburemere bw’icyaha cyakozwe atakongera kugabanyirizwa igihano kuko yahanishijwe igihano gito giteganywa n’amategeko kikaba kidashobora kugibwa munsi nk’uko byatanzweho umurongo n’uru Rukiko mu manza zitandukanye rwaciye.

## Page 2

Incamake y’icyemezo: Igihe hari impamvu nyoroshyacyaha zemejwe n’umucamanza igihano cy’igifungo cya burundu gishobora kugabanywa, ariko ntikijye munsi y’igifungo cy’imyaka cumi n’itanu (15), n’ihazabu iteganyijwe ishobora kugabanywa ariko ntijye munsi ya kimwe cya kane cy’ihazabu nto iteganyirijwe icyaha cyakozwe. Ubujurire nta shingiro bufite. Amagarama aherera ku isanduku ya Leta. Amategeko yashingiweho: Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ingingo ya 2 n’iya 3. Itegeko N° 69/2019 ryo ku wa 08/11/2019 rihindura Itegeko N° 68/2018 ryo ku wa 30/08/2018 riteganya ibyaha n’ibihano muri rusange, ingingo ya 11. Itegeko N° 68/2028 ryo ku wa 30/08/2018 riteganya ibyaha n’ibihano muri rusange, ingingo ya 60. Imanza zifashishijwe: RS/INCONST/SPEC00003/2019/CS, Kabasinga Florida na Leta y’u Rwanda, rwaciwe n’Urukiko rw’Ikirenga ku wa 04/12/2019. RPAA01312/2024/CA, Ubushinjacyaha na Ugwaneza Sylvestre, rwaciwe n’Urukiko rw’Ubujurire ku wa 18/07/2025. RPAA00048/2020/CA, Ubushinjacyaha na Bimenyimana Jean Paul, rwaciwe n’Urukiko rw’Ubujurire ku wa 26/05/2022. RPAA00752/2024/CA, Ubushinjacyaha na Nsekanabo Augustin, rwaciwe n’Urukiko rw’Ubujurire ku wa 27/03/2025. RPAA00538/2024/CA, Ubushinjacyaha na Cyuzuzo Jean Claude, rwaciwe n’Urukiko rw’Ikirenga ku itariki ya 21/01/2025. Urubanza I. IMITERERE Y’URUBANZA [1] Ku itariki ya 19/05/2022, Ndacyayisenga Ismaёl yafatiwe mu Mudugudu wa Murambi, Akagari ka Nyarubuye, Umurenge wa Fumbwe, Akarere ka Rwamagana, afite litiro 6 za kanyanga n’udupfunyika 688 tw’urumogi arimo kubigurisha, afatanwa n’amafaranga 10.000Frw yari amaze kugurisha kanyanga. Amaze gufatwa yahise ashyikirizwa Ubugenzacyaha, atangira gukurikiranwa. [2] Ubushinjacyaha bwamureze mu Rukiko Rwisumbuye rwa Ngoma, icyaha cyo gufatanwa no kugurisha ibiyobyabwenge byo mu bwoko bw’urumogi na kanyanga, aburana acyemera avuga ko urumogi na kanyanga yafatanwe yari yabihawe na Nkurikiyimana Claude kugira ngo ajye kubicuruza. [3] Mu rubanza RP00666/2022/TGI/NGOMA rwaciwe ku wa 10/06/2022, Urukiko Rwisumbuye rwa Ngoma rushingiye ku kwemera icyaha kwa Ndacyayisenga Ismaёl, imvugo z’abatangabuhamya bamushinja n’inyandikomvugo y’ifatira igaragaza ko yafatanwe udupfunyika 688 tw’urumogi, litiro 6 za kanyanga n’amafaranga 10.000Frw yari amaze kugurisha kanyanga, rwamuhamije icyaha cyo gufatanwa no kugurisha ibiyobyabwenge bihambaye byo mu bwoko bw’urumogi n’ibiyobyabwenge byoroheje byo mu bwoko bwa kanyanga, ahanishwa igifungo cy’imyaka 20 no gutanga ihazabu ya 20.000.000Frw. [4] Ndacyayisenga Ismaёl yajuririye Urukiko Rukuru, Urugereko rwa Rwamagana asaba kugabanyirizwa no gusubikirwa igihano. Nyuma yo kujurira, Ndacyayisenga Ismaёl yatanze umwanzuro w’inyongera avuga ko icyo yemera ari uko yafatanwe kanyanga ingana na 0,5L yari avuye kugura

## Page 3

kugirango azayinywe, amaze gufatwa bamubaza aho ayikuye, ajya kuherekana maze bahasanga urumogi rungana n’udupfunyika 688 ndetse n’ibishashe 4 bya kanyanga, ko n’amafaranga bavuga ko bamufatanye atari aye; asaba ko inyito y’icyaha aregwa yahinduka kikaba gufatanwa ibiyobyabwenge byo mu bwoko bwa kanya, kuko kanyanga yemera ko yafatanwe yayiguze agamije kuyinywa. [5] Ubushinjacyaha bwavuze ko ingingo y’ubujurire Ndacyayisenga Ismaёl yatanze mu mwanzuro w’inyongera idakwiriye gusuzumwa kuko yatanzwe igihe cy’ubujurire cyararenze kandi ikaba ihabanye n’iyatanzwe mu gihe cyo kujurira. Naho ku bijyanye no kugabanyirizwa igihano, buvuga ko igihano Ndacyayisenga Ismaël yahanishijwe kitakongera kugabanywa kuko hakurikijwe uburemere bw’icyaha yakoze n’ingaruka zacyo yagabanirijwe bihagije, cyane cyane ko bigaragara ko yisubiyeho agahakana icyaha nkana kandi yaragikoze, byerekana ko n’ubundi ntacyo yemera. [6] Mu rubanza RPA01105/2022/HC/RWG rwaciwe ku wa 30/10/2024, Urukiko Rukuru, Urugereko rwa Rwamagana rwasanze ingingo y’ubujurire yatanzwe mu mwanzuro w’inyongera itagomba kwakirwa ngo isuzumwe kuko yatanzwe nyuma y’igihe cyo kujurira giteganywa n’amategeko kandi ikaba ituzuza iyatanzwe mu gihe giteganywa n’amategeko. Ku bijyanye no kugabanyirizwa igihano, Urukiko rwasanze Ndacyayisenga Ismaёl akwiriye kugabanyirizwa igihano kuko ku rwego rwa mbere yemeye icyaha aregwa ndetse akaba nta kindi cyaha kizwi yahaniwe, ahanishwa igifu cy’imyaka 15 n’ihazabu y’amafaranga y’u Rwanda 5.000.000Frw. [7] Ndacyayisenga Ismaël yajuririye Urukiko rw’Ubujurire, urubanza ruhabwa N° RPAA01308/2024/CA, ruburanishwa mu ruhame ku wa 05/09/2025, yunganiwe na Me Gashayija Mathieu, Ubushinjacyaha buhagarariwe na Butera Oscar, Umushinjacyaha ku rwego rw’Igihugu. Iburanisha ry’urubanza ryarapfundikiwe, isomwa rishyirwa ku wa 19/09/2025, ariko uwo munsi ntirwasomwa bitewe n’uko Umucamanza waruburanishije yari mu butumwa bw’akazi, rwimurirwa ku wa 29/09/2025, ari nawo munsi rusomweho. [8] Mu myanzuro y’ubujurire no mu miburanire yabo, Ndacyayisenga Ismaël n’umwungara bavuga ko Ndacyayisenga Ismaël atagabanyirijwe igihano bihagije kandi hari impamvu nyoroshyacyaha zashoboraga gushingirwaho kikagabanywa, akaba akomeje gutakamba asaba ko icyo gihano cyagabanywa agahanishwa igihano gito gishoboka byaba ngombwa kikanasubikwa. [9] Ubushinjacyaha buvuga ko Ndacyayisenga Ismaël atakongera kugabanyirizwa igihano kuko yagabanyirijwe kugeza ku gihano gito giteganywa n’amategeko, kikaba kidashobora kugibwa munsi, kandi ko igihano yahanishijwe kidashobora gusubikwa kuko kirenze igifungo cy’imyaka itanu. [10] Hakurikijwe izo mpaka, muri uru rubanza harasuzumwa ibibazo bikurikira: a. kumenya niba Ndacyayisenga Ismaël yakongera kugabanyirizwa igihano; b. kumenya niba Ndacyayisenga Ismaël yasubikirwa igihano. II. ISESENGURA RY’IBIBAZO BIGIZE URUBANZA A. Kumenya niba Ndacyayisenga Ismaël yakongera kugabanyirizwa igihano [11] Ndacyayisenge Ismaël n’umwunganira bavuga ko atagabanyirijwe igihano bihagije kandi hari impamvu nyoroshyacyaha zashoboraga gushingirwaho kikagabanywa ku buryo buhagije, zirimo: kuba yemera icyaha mu buryo budashidikanywaho; kuba icyaha yakoze nta ngaruka mbi cyateje kuko yafashwe nta muntu aragurisha ibiyobyabwenge ngo bimwangize; kuba icyaha yaragikoze abitewe n’ubushomeri n’ubukene byatumye ashukwa na Nkurikiyimana Claude amuha akazi ko kujya kumucururiza ibiyobyabwenge; kuba icyaha yakoze cyaragize ingaruka ku iterambere rye no kumuryango we kandi akaba akeneye kwiteza imbere; kuba ubu yaramaze kugororoka no kumva ububi bw’icyaha yakoze.

## Page 4

Basaba ko izo mpamvu nyoroshyacyaha zashingirwa igihano Ndacyayisenga Ismaël yahanishijwe kikagabanywa ku buryo buhagije. [12] Ndacyayisenga Ismaël n’umwunganira bavuga ko babona igihano cyo gufungwa imyaka 15 Ndacyayisenga Ismaël yahanishijwe ari kirekire cyane hagereranyijwe n’imyaka afite ubu igera kuri 32, kuko yazakirangiza atagishobora kugira icyo yimarira, kandi nk’uko byemejwe n’Urukiko rw’Ikirenga mu rubanza RS/INCONST/SPEC00003/2019/CS rwaciwe ku wa 04/12/2019 haburana Kabasinga Florida na Leta y’u Rwanda mu gika cya 26 – 46, gutanga ibihano biremereye ataribwo buryo bwonyine bwatuma uwahanwe agororoka, mu gutanga igihano ntiharebwa gusa uburemere bw’icyaha ahubwo hitabwa no ku nyungu z’uwakoze icyaha, Umucamanza afite uburenganzira bwo kugabanya igihano kugeza munsi y’igihano gito giteganywa n’Itegeko. Basaba ko hashingiwe ku byemejwe muri urwo rubanza, basaba ko igihano Ndacyayisenga Ismaël yahanishijwe n’Urukiko rubanza cyagabanywa kugeza munsi y’igihano gito giteganyirijwe icyaha kimuhama kugira ngo abe yajya kwiyubaka. [13] Ubushinjacyaha buvuga ko, mu bujurire bwa mbere Ndacyayisenga Ismaël yagabanyirijwe igihano ahanishwa igifungo cy’imyaka 15 n’ihazabu ya 5.000.000Frw ari nacyo gihano gito giteganywa n’amategeko, ko harebwe uburemere bw’icyaha cyakozwe n’ibiteganywa n’ingingo ya 2 y’Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange1, atakongera kugabanyirizwa igihano kuko yahanishijwe igihano gito giteganywa n’amategeko kikaba kidashobora kugibwa munsi nk’uko byatanzweho umurongo n’Urukiko rw’Ubujurire mu manza zitandukanye, harimo urubanza RPAA00538/2024/CA rwaciwe ku itariki ya 21/01/2025 haburana Ubushinjacyaha na Cyuzuzo Jean Claude, mu gika cya 11 na 12. UKO URUKIKO RUBIBONA [14] Ikibazo kiri muri iyi ngingo, ni ukumenya niba igihano cy’igifungo cy’imyaka 15 n’ihazabu ya 5.000.000Frw Ndacyayisenga Ismaël yahanishijwe kubera icyaha cyo gufatanwa no kugurisha ibiyobyabwenge bihambaye byo mu bwoko bw’urumogi n’ibiyobyabwenge byoroheje byo mu bwoko bwa kanyanga, gishobora kongera kugabanywa. [15] Ikibazo kijyanye no kumenya igihano gito gishobora guhabwa umuburanyi wahamijwe icyaha gihanishwa igifungo cya burundu mu gihe hari impamvu nyoroshyacyaha, cyatanzweho umurongo n’Urukiko rw’Ubujurire mu manza zitandukanye, harimo urubanza RPAA00752/2024/CA2 n’urubanza RPAA01312/2024/CA3. Muri izo manza, Urukiko rwemeje ko igihe hari impamvu nyoroshyacyaha zemejwe n’umucamanza igihano cy’igifungo cya burundu gishobora kugabanywa ariko ntikijye munsi y’igifungo cy’imyaka cumi n’itanu (15), ko n’ihazabu iteganyijwe ishobora kugabanywa ariko ntijye munsi ya kimwe cya kane cy’ihazabu nto iteganyirijwe icyaha cyakozwe. [16] Nk’uko dosiye y’uru rubanza ibigaragaza, mu niko zibanza, Ndacyayisenga Ismaël yahamijwe icyaha cyo gufatanwa no kugurisha ibiyobyabwenge bihambaye byo mu bwoko bw’urumogi, gihanishwa igifungo cya burundu n’ihazabu y’amafaranga y’u Rwanda arenze miliyoni 20.000.000Frw ariko atarenze miliyoni 30.000.000Frw, n’ibiyobyabwenge byoroheje byo mu bwoko bwa kanyanga, gihanishwa igifungo kitari munsi y’imyaka 7 ariko kitarenze imyaka 10 n’ihazabu y’amafaranga y’u Rwanda atari munsi ya miliyoni 5.000.000Frw ariko atageze kuri miliyoni 10.000.000Frw, maze agabanyirizwa igihano

1 Iteganya ko iyo umucamanza yemeje impamvu nyoroshyacyaha, ashobora kugabanya igihano ku buryo bukurikira: (a) igifungo cya burundu gishobora kugabanywa ariko ntikijye munsi y’igihano cy’igifungo cy’imyaka 15, (…); (d) igihano cy’ihazabu gishobora kugabanywa kugeza kuri kimwe cya kane cy’igihano cy’ihazabu gito giteganyirijwe icyaha cyakozwe. 2 Reba igika cya 19 cy’urubanza N° RPAA 00752/2024/CA rwaciwe n’Urukiko rw’Ubujurire ku wa 27/03/2025, haburana Ubushinjacyaha na NSEKANABO Augustin. 3

## Page 5

kubera impamvu nyoroshyacyaha zirimo kuba ku rwego rwa mbere yaremeye icyaha aregwa no kuba nta kindi cyaha kizwi yahaniwe, ahanishwa igifu cy’imyaka 15 n’ihazabu ingana na 5.000.000Frw. [17] Ndacyayisenga Ismaël yajuririye uru Rukiko asaba ko yakongera kugabanyirizwa igihano kugeza munsi y’igihano gito giteganyirijwe icyaha yakoze. [18] Hashingiwe ku murongo watanzwe mu manza zibukijwe mu gika 15 cy’uru rubanza, Urukiko rw’Ubujurire rurasanga igihano cy’igifungo cy’imyaka 15 n’ihazabu ya 5.000.000Frw Ndacyayisenga Ismaël yahanishijwe n’Urukiko Rukuru, Urugereko rwa Rwamagana kitakongera kugabanywa kuko cyagabanyijwe bihagije kandi kikaba aricyo gihano gito ntarengwa giteganyijwe ku cyaha kimuhama cyo gufatanwa no kugurisha ibiyobyabwenge bihambaye byo mubwoko bw’urumogi, kikaba kidashobora kugibwa munsi. [19] Ku birebana n’urubanza RS/INCONST/SPEC00003/2019/CS, Ndacyayisenga Ismaël n’umwunganira basaba ko rwashingirwaho akagabanyirizwa igihano kugeza munsi y’igihano gito giteganyirijwe icyaha kimuhama, Urukiko rw’Ubujurire rurasanga urwo rubanza rutashingirwaho kuko umurongo warufashwemo w’uko Itegeko ribuza Umucamanza kugabanya igihano igihe hari impamvu nyoroshyacyaha cyangwa ribimwerera ariko ntabe yajya munsi y’igihano gito giteganyirijwe icyaha aburanisha ritagomba gukurikizwa kuko riba riba ribangamiye ubwigenge bw’Umucamanza kandi rinanyuranye n’amahame yo gutanga ubutabera buboneye ndetse n’Itegeko Nshinga rya repubulika y’u Rwanda, wafashwe hashingiwe ku ngingo ya 60 y’Itegeko N° 68/2028 ryo ku wa 30/08/2018 riteganya ibyaha n’ibihano muri rusange, iyo ngingo ikaba yarahinduwe n’Ingingo ya 2 y’Itegeko N° 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, kandi umuro wari uriho ukaba udashora gukurikizwa mu gihe Itegeko wari ushingiyeho ryavuyeho cyangwa ryahinduwe nk’uko byemejwe n’Urukiko rw’Ubujurire mu rubanza RPAA00048/2020/CA rwaciwe ku wa 26/05/2022 haburana Ubushinjacyaha na Bimenyimana Jean Paul. [20] Hashingiwe ku bisobanuro bimeze gutangwa, Urukiko rw’Ubujurire rurasanga Ndacyayisenga Ismaël adakwiriye kongera kugabanyirizwa igihano kuko yagabanyijwe mu buryo bugahije agahanishwa igihano gikwiranye n’uburemere bw’icyaha yakoze kandi kikaba aricyo gihano gito giteganywa n’amategeko ku buryo kidashobora kugibwa munsi. B. Kumenya niba Ndacyayisenga Ismaël yasubikirwa igihano [21] Ndacyayisenga Ismaël n’umwunganira, basaba ko yasubikirwa ibihano kugirango abe yajya kwiyubaka. Ubushinjacyaha buvuga ko Ndacyayisenga Ismaël adashobora gusubikirwa igihano, kuko yahanishijwe igifungo kirenze imyaka 5. UKO URUKIKO RUBIBONA [22] Ingingo ya 3, agace ka (1) y’Itegeko N° 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange ivuga ko iyo uwakatiwe nta kindi gihano cy’igifungo kirenga amezi 6 yahanishijwe mbere, urukiko rukoresheje icyemezo gisobanura impamvu, rushobora gutegeka gusubika irangiza ry’igihano cyose cyangwa igice cy’igihano cy’iremezo cyangwa cy’ingereka, iyo igihano cy’iremezo cy’igifungo umuntu yakatiwe kitarenze imyaka 5. [23] Urukiko rw’Ubujurire rurasanga Ndacyayisenga Ismaël adashobora gusubikirwa igihano kuko yahanishijwe igihano cy’iremezo kirenze igifungo cy’imyaka 5. III. ICYEMEZO CY’URUKIKO [24] Rwemeje ko ubujurire bwatanzwe na Ndacyayisenga Ismaël budafite ishingiro.

## Page 6

[25] Rwemeje ko urubanza RPA01105/2022/HC/RWG rwaciwe n’Urukiko Rukuru, Urugereko rwa Rwamagana ku wa 30/10/2024, rudahindutse. [26] Rwemeje ko igihano cy’igifungo cy’imyaka 15 n’ihaza ya 5.000.000 Frw Ndacyayisenga Ismaël yahanishijwe muri urwo rubanza kidahindutse. [27] Rutegetse ko Ndacyayisenga Ismaël asonewe gutanga amagarama ry’urubanza kuko yajuriye afunze.