UBUSHINJACYAHA v NDAGIJIMANA

# UBUSHINJACYAHA v NDAGIJIMANA

- Source: Amategeko - Section: Decisions (Judgements) - Date: 2024-12-20 - Case/document no.: RPAA 00489/2023/CA - Collection: Court of Appeal

## Text

## Page 1

URUBANZA Nº RPAA 00489/2023/CA URUPAPURO RWA| 1

URUKIKO RW’UBUJURIRE, RURI I KIGALI, RUBURANISHA IMANZA Z’INSHINJABYAHA, RUKIJIJE MU RUHAME URUBANZA Nº RPAA 00489/2023/CA NONE KU WA 20/12/2024 MU BURYO BUKURIKIRA: HABURANA: UBUSHINJACYAHA Na: NDAGIJIMANA Jean de Dieu, mwene BANYANGANDUSHA Celestin na MUKAMUNANA Consolee, wavutse 1994, mu Mudugudu wa Jali, Akagari ka Nyarutembe, Umurenge wa Rugera, Akarere ka Nyabihu, Intara y’Iburengerazuba, akaba ariho atuye, Umunyarwanda, Ingaragu. ICYAHA ASHINJWA: Gusambanya umwana, icyaha giteganywa kandi kigahanishwa n’ingingo ya 4 y’Itegeko nº 69/2019 ryo ku wa 08/11/2019 rihindura Itegeko nº 68/2018 ryo ku wa 30/08/2018 riteganya ibyaha n’ibihano muri rusange. IKIREGERWA: Kujuririra urubanza No RPA 00443/2021/HC/MUS rwaciwe n’Urukiko Rukuru, Urugereko rwa Musanze, ku wa 17/10/2023. I. IMITERERE Y’URUBANZA 1. Ubushinjacyaha bwareze NDAGIJIMANA Jean de Dieu buvuga ko yari amaze iminsi afite ikiraka yahawe n’ababyeyi bishyize hamwe batuye mu mudugudu wa Kintore, akagari ka Gakoro, umurenge wa Rugera, akarere ka Nyabihu, aho abo babyeyi bubatse ishuri kugira ngo abigishirize abana nabo bamuhembe. Bigeze ku wa 06/02/2020, ajya ku kazi ko kwigisha abana uko bisanzwe, asanga hamaze kuza umwana umwe mu bo yigishaga w’imyaka 11 y’amavuko, hashize akanya gato atuma uwo mwana ikayi y’imibare, umwana arayizana, amubaza icyo azamuhemba kuko amwigisha neza, ahita amwiyegereza azamura ikanzu ye amanura n’ikariso amushyiramo igitsina cye, yumvise haje abandi bana ahita amubwira ngo najye kwicara, bariga barangije barataha, uwo mwana ageze iwabo abibwira ababyeyi be.

## Page 2

URUBANZA Nº RPAA 00489/2023/CA URUPAPURO RWA| 2

2. Ababyeyi b’uwo mwana bamaze kubona ayo makuru, bihutiye kujya kubibaza NDAGIJIMANA Jean de Dieu, arabibemerera, ariko abasaba imbabazi n’ubwiyunge, ariko bo bahita bajya kubimenyesha umuyobozi w’umudugudu wabo, na we bajyana kubaza NDAGIJIMANA abemerera ko yabikoze, ariko ko ashaka ko biyunga, ababyeyi baranga, bajyana ikirego ku bugenzacyaha, NDAGIJIMANA Jean de Dieu arafatwa, akurikiranwaho icyaha cyo gusambanya umwana, ariko abwira Ubugenzacyaha ko atigeze asambanya uwo mwana. Nyuma dosiye yarakozwe iregerwa Urukiko Rwisumbuye rwa Rubavu. 3. NDAGIJIMANA Jean de Dieu, yaburanye mu Rukiko Rwisumbuye rwa Rubavu ahakana icyaha avuga ko yabeshyewe icyaha atakoze, ahubwo ari amakimbirane yagiranye n’ababyeyi b’uwo mwana n’umuyobozi w’umudugudu kubera ko amafaranga y’ishuri atangwa bakayakoresha nabi, akaba azizwa kuba yarifatanyije n’ababyeyi batumva iyo mikoreshereze y’ayo mafaranga iyo ngo ikaba ariyo mpamvu bahisemo kumubeshyera bagamije kumufungisha. 4. Mu rubanza No RP 00151/2020/TGI/RBV rwaciwe ku wa 19/03/2021, Urukiko Rwisumbuye rwa Rubavu rwemeje ko icyaha cyo gusambanya umwana NDAGIJIMANA Jean de Dieu, aregwa kimuhama, rumuhanisha igifungo cya burundu (Emprisonnement à perpetuité). Urwo Rukiko rwashingiye icyemezo cyarwo ku bimenyetso bigizwe n’ubuhamya bw’umwana wasambanyijwe, ubuhamya bw’umuyobozi w’umudugudu wa Kintore, Nduhuyabagabo Pierre na Raporo ya Muganga, rusanga byose hamwe ari ibimenyetso byemeza ko umwana yasambanyijwe, bifite ireme kandi bidashidikanywaho, ko kandi ibyo avuga ko ababyeyi b’uwo mwana bafitanye amakimbirane ashingiye ku mafaranga y’abanyamuryango b’ishuri yigishaho bitashingirwaho. 5. NDAGIJIMANA Jean de Dieu ntiyishimiye icyo cyemezo, maze akijuririra mu Rukiko Rukuru Urugereko rwa Musanze avuga ko icyaha acyemera kandi agisabira imbabazi, asaba no kugabanyirizwa igihano no guhabwa isubikagihano. 6. Ubushinjacyaha bwavuze ko kuba NDAGIJIMANA Jean de Dieu yarajuriye ahakana icyaha yagera mu iburanisha akaburana acyemera, hashingiwe no ku murongo watanzwe n’Urukiko rw’Ubujurire, ko kwemera icyaha bwa mbere mu bujurire bitagirira akamaro

## Page 3

URUBANZA Nº RPAA 00489/2023/CA URUPAPURO RWA| 3

ujurira kuko ari ingingo nshya aba azanye mu rubanza mu bujurire ahubwo Ubushinjacyaha busaba Urukiko gusuzuma niba yagabanyirizwa igihano hashingiwe ku kigero cy’imyaka ye, no kuba ari bwo bwa mbere akoze icyaha, kuko mu manza zitandukanye hemejwe ko ntacyabuza Urukiko kugabanyiriza ibihano uregwa kabone n’ubwo impamvu ze z'ubujurire nta shingiro zifite. 7. Mu rubanza No RPA 00443/2021/HC/MUS rwaciwe ku wa 17/10/2023, Urukiko Rukuru Urugereko rwa Musanze rwemeje ko ikirego cy’ubujurire rwashyikirijwe na NDAGIJIMANA Jean de Dieu gifite ishingiro kuri bimwe, rwemeje kandi ko imikirize y’urubanza No RP 00151/2020/TGI/RBV rwaciwe ku wa 19/03/2021 n’Urukiko Rwisumbuye rwa Rubavu ihindutse ku bijyanye n’igihano, ruhanisha NDAGIJIMANA Jean de Dieu gufungwa imyaka makumyabiri (20 ans). 8. Urukiko Rukuru Urugereko rwa Musanze, rwasanze ntacyo NDAGIJIMANA Jean de Dieu anenga urubanza yajuririye, ariko rumugabanyiriza igihano rushingiye ku biteganyijwe mu ngingo ya 491 y’Itegeko n⁰ 68/2018 ryo ku wa 30/08/2018 riteganya ibyaha n’ibihano muri rusange nk’uko ryujujwe kandi ryahinduwe kugeza ubu, no kuba NDAGIJIMANA Jean de Dieu ubwo yakoraga icyaha aregwa, yari afite imyaka 25 y’amavuko, akaba ari mu kigero cyo kwiteza imbere ku giti cye no guteza imbere igihugu cye, rusanga kumufunga burundu byaba ari ugushyira iherezo ku kuba hari icyo yazigezaho mu buzima bwe ndetse akagira n’ibyo amarira igihugu. 9. NDAGIJIMANA Jean de Dieu ntiyishimiye imikirize y’uru rubanza, yongera kujuririra mu Rukiko rw’Ubujurire, urubanza ruhabwa No RPAA 00489/2023/CA, ruburanishwa ku wa 03/12/2024, NDAGIJIMANA Jean de Dieu yitabye yunganiwe na Me KABAMI SEMUCYO Marie Claire, Ubushinjacyaha bwitabye buhagarariwe na PN NIYONKURU Françoise, Umushinjacyaha ku rwego rw’Igihugu. 10. Mu myanzuro ya NDAGIJIMANA Jean de Dieu na Me KABAMI SEMUCYO Mari Claire umwunganira, basaba Urukiko rw’Ubujurire kongera kumugabanyiriza igihano kuko icyo

1 Iyo ngingo iteganya ko Umucamanza atanga igihano akurikije uburemere bw'icyaha, ingaruka icyaha cyateye, impamvu zatumye agikora, uko uwagikoze yari asanzwe yitwara, imibereho ye bwite n’uburyo icyaha cyakozwemo.

## Page 4

URUBANZA Nº RPAA 00489/2023/CA URUPAPURO RWA| 4

yahawe n’Urukiko Rukuru Urugereko rwa Musanze ari kirekire kandi ko rutahaye agaciro impamvu nyoroshyacyaha zirimo kuba yaremeye icyaha kandi ari ubwa mbere akurikiranwe n’inkiko. 11. Ubushinjacyaha bwo buvuga ko ubujurire bwa NDAGIJIMANA Jean de Dieu nta shingiro bufite kuko yagabanyirijwe busaba Urukiko rw’Ubujurire kwemeza ko urubanza yajuririye rudahindutse mu ngingo zarwo zose. 12. Urukiko ruhereye kuri izi mpaka, rusanga ikibazo gikwiye gusuzumwa ari ikijyanye no kumenya niba hari impamvu nyoroshyacyaha zatuma NDAGIJIMANA Jean de Dieu yakongera kugabanyirizwa igihano. II. ISESENGURA RY’IKIBAZO KIGIZE URUBANZA  Kumenya niba hari impamvu nyoroshyacyaha zatuma NDAGIJIMANA Jean de Dieu yakongera kugabanyirizwa igihano yahanishijwe mu rubanza yajuririye 13. NDAGIJIMANA Jean de Dieu na Me KABAMI SEMUCYO Mari Claire umwunganira, bavuga ko yemeye icyaha kandi ko atigeze agora inzego z’iperereza n’iz’ubutabera, bakaba basanga ari impamvu nyoroshyacyaha, kandi icyaha yakoze ngo nta ngaruka cyateje kuburyo byatuma yibagirana mu muryango, ariko ngo Urukiko Rukuru Urugereko rwa Musanze rukaba rutarabihaye agaciro ngo rumugabanyirize igihano kubera ko igihano cy’imyaka makumyabiri yahawe kitatuma agororoka. 14. Ibyo bavuga ko babishingira ku ngingo za 49, 59 na 60 z’Itegeko nº 68/2018 ryo ku wa 30/08/2018 riteganya ibyaha n’ibihano muri rusange ryahinduwe n’Itegeko nº 059/2023 ryo ku wa 04/12/2023, kuko ngo izo ngingo zishimangira ihame ry’amategeko ryemerera umucamanza gushingira ku mibereho y’uwakoze icyaha mbere na nyuma yo kugikora, bityo zikaba zaragombaga gushingirwaho n’Urukiko Rukuru Urugereko rwa Musanze, NDAGIJIMANA Jean de Dieu agahabwa igihano gitoya. 15. NDAGIJIMANA Jean de Dieu na Me KABAMI SEMUCYO Mari Claire umwunganira kandi bavuga ko ngo bashingira no ku manza zitandukanye zaciwe n’Urukiko rw’Ikirenga

## Page 5

URUBANZA Nº RPAA 00489/2023/CA URUPAPURO RWA| 5

ndetse n’Urukiko rw’Ubujurire nk’ urubanza No RS/INCONST/RP 00003/2019/SC rwemeje ko kubuza umucamanza kujya munsi y’igihano gito giteganyijwe n’itegeko ari ukumubuza ubwigenge, urubanza No RPAA 00103/2022/CA haburana ubushinjacyaha v. INGABIRE Sylvestre, urubanza No RPAA 00032/2019/CA rwaciwe n’Urukiko rw’Ubujurire haburana Ubushinjacyaha v. NZAFASHWANIMANA Jean de Dieu, rukamuha igihano gito kiri munsi y’igiteganywa n’itegeko kuko ariyo mahame ateganywa n’ingingo ya 29 y’Itegeko Nshinga ry’u Rwanda, maze Urukiko rukaba rwazishingiraho rushingiye no ku mpamvu nyoroshyacyaha zagaragajwe haruguru, rukemeza ko ubujurire bwa NDAGIJIMANA Jean de Dieu bufite ishingiro rukamugabanyiriza igifungo kugera ku igifungo gito gishoboka cy’imyaka 5 nacyo akagisubikirwa kugira ngo abashe gusubira mu muryango. 16. NDAGIJIMANA Jean de Dieu, akaba asoza avuga ko yahakanye icyaha aregwa mu Rukiko Rwisumbuye rwa Rubavu kubera kutamenya akamaro ko kwirega ko kwemera icyaha, ariko ngo ubu mu Rukiko rw’Ubujurire akaba yemera icyaha agasaba imbabazi no kongera kugabanyirizwa ibihano yahawe. 17. Uburanira Ubushinjacyaha avuga ko kuba NDAGIJIMANA Jean de Dieu yarajuriye avuga ko Urukiko rutamugabanyirije ibihano kandi ataragoye inzego z’iperereza cyangwa z’umutekano, nta shingiro bifite kuko ibyo avuga ko atigeze agora inzego z’Ubutabarera atari ukuri, ahubwo ngo yarazgoye cyane kuko uretse kuba yarabyemereye umubyeyi w’umwana n’umuyobozi w‘Umudugudu ko icyaha yagikoze, ahandi hose yaragihakanye, aza kongera kubyemera aburana mu bujurire mu Rukiko Rukuru ibyo ngo bikaba bigaragaza ko yagiye akinisha inzego z’ubutabera. 18. Akomeza kandi avuga ko kuba NDAGIJIMANA Jean de Dieu avuga ko Urukiko Rukuru Urugereko rwa Musanze rutahaye agaciro impamvu nyoroshyacyaha yavugaga ngo rumugabanyirize ibihano, nabyo atari ukuri kuko n’ubwo yabanje kugora inzego z’ubutabera ariko rwarabyirengagije rumugabanyiriza ibihano rwita ku kuba hari impamvu nyoroshyacyaha ziteganywa n’ingingo ya 492 y’Itegeko nº 68/2018 ryo ku wa 30/08/2018 riteganya ibyaha n’ibihano muri rusange ryahinduwe n’Itegeko nº 059/2023 ryo ku wa

2 Ibidem

## Page 6

URUBANZA Nº RPAA 00489/2023/CA URUPAPURO RWA| 6

04/12/2023, zirimo kuba NDAGIJIMANA Jean de Dieu yarakoze icyaha akiri mu bihe byo kuba yakwiteza imbere ruhereye ku myaka yari afite igihe yakoraga icyaha. 19. Uhagarariye ubushinjacyaha avuga rero ko ibyo NDAGIJIMANA Jean de Dieu avuga ko ibihano yahanishijwe ari birebire akaba asaba guhabwa ibyatuma atangirika cyangwa ngo ateshuke mu mutwe, ari ukwikunda cyane, kuko atanatekereje ku mwana w’imyaka 11 yasambanyije uburyo nawe yamwangije mu mutwe. 20. Uburanira Ubushinjacyaha yongeraho ko ibivugwa na NDAGIJIMANA Jean de Dieu n’umwunganizi we ko Urukiko Rukuru rwashoboraga kumugabanyiriza ibihano kugeza ku myaka 5, ngo kuko yemeye icyaha ndetse anashingiye mu manza zitandukanye harimo RS/INCOST/SPEC 00003/2019/SC; RPAA 00103/2022/CA, haburana Ubushinjacyaha na INGABIRE Slyvestre, nta shingiro byahabwa kuko zakoreshwaga itegeko rishya ritarasohoka mu mwaka wa 2023, bityo ko iyo mirongo itagishingirwaho mu kugabanya ibihano iyo hemejwe ko harimo impamvu nyoroshyacyaha, ko ahubwo mu gihe zakwemezwa n’umucamanza hashingirwa ku ngingo ya 2 y’itegeko Nº 059/2023 ryo ku wa 04/12/2023 rihindura itegeko Nº 68/2018 ryo ku wa 30/08/2018 riteganya ibyaha n’ibihano muri rusange. 21. Uburanira Ubushinjacyaha, asoza asaba Urukiko rw’Ubujurire kwemeza ko Ubujurire bwa NDAGIJIMANA Jean de Dieu nta shingiro bifite, rukemeza ko urubanza rwajuririwe rudahindutse. UKO URUKIKO RUBIBONA 22. Impaka muri uru rubanza zishingiye ku kumenya niba NDAGIJIMANA Jean de Dieu ashobora kongera kugabanyirizwa igihano cy’imyaka 20 yahawe n’Urukiko Rukuru Urugereko rwa Musanze, kubera impamvu nyoroshyacyaha. 23. Mu gusuzuma ibijyanye no kongera kugabanyirizwaigihano nk’uko bisabwa na NDAGIJIMANA Jean de Dieu asaba hakwifashishwa ibyemejwe n’Urukiko rw’Ubujurire mu rubanza Nº RPAA 00406/2020/CA rwaciwe n’Urukiko rw’Ubujurire ku wa 22/10/2021, haburana Ubushinjacyaha na NAHAYO Ignace (igika cya 22), n’izindi zitandukanye zirimo n’urubanza Nº Urubanza Nº RPAA 00575/2021/CA, rwaciwe n’Urukiko

## Page 7

URUBANZA Nº RPAA 00489/2023/CA URUPAPURO RWA| 7

rw’Ubujurire ku wa 24/02/2023 haburana Ubushinjacyaha na MANIRAKIZA Sylvère (igika cya 17), zatanze umurongo uvuga ko tta cyabuza Urukiko rwajuririwe kongera kugabanya igihano mu gihe rusanga igihano cyatanzwe n’Urukiko rubanza kitaragabanyijwe mu buryo buhagije ubirebeye hamwe n’uburemere bw’icyaha cyakozwe”. 24. Dosiye igaragaza ko ku wa 17/02/2020, NDAGIJIMANA Jean de Dieu yabajijwe mu bugenzacyaha ahakana icyaha cyo gusambanya umwana ndetse n’igihe yabazwaga mu bushinjayaha ku wa 20/02/2020 nabwo yahakanye icyaha cyo gusambanya umwana akavuga ko ababyeyi b’umwana umushinja bafitanye amakimbirane, ndetse no mu Rukiko Rwisumbuye ariko ageze mu Rukiko Rukuru no muri uru Rukiko rw’Ubujurire avuga ko yemera icyaha. 25. Dossier igaragaza kandi ubuhamya bwatanzwe n’umwana wasambanyijwe wasobanuye ko NDAGIJIMANA Jean de Dieu yamusambanyije hakaba hari na raporo ya muganga yo ku wa 16/02/2020 igaragaza ko umwana yasambayijwe ndetse n’imvugo z’abatangabuhamya bamushinja hakaba n’icyemezo cy’amavuko kigaragaza ko uwo mwana wasambanyijwe yavutse ku wa 30/08/2009. 26. Urukiko Rukuru Urugereko rwa Musanze rwahamije NDAGIJIMANA Jean de Dieu icyaha cyo gusambanya umwana nyuma yo kubona ko ntacyo anenga urubanza yajuririye, kandi n’ubwo yemera icyaha atari itegeko ko yagabanyirizwa igihano, ariko rumugabanyiriza igihano yari yahawe cya burundu rumuhanisha igifungo cy’imyaka makumyabiri (20 ns), rushingiye ku mpamvu nyoroshyacyaha zirimo kuba ubwo NDAGIJIMANA Jean de Dieu yakoraga icyaha aregwa, yari afite imyaka 25 y’amavuko, akaba ari mu kigero cyo kwiteza imbere ku giti cye no guteza imbere igihugu cye, rusanga kumufunga burundu byaba ari ugushyira iherezo ku kuba hari icyo yazigezaho mu buzima bwe ndetse akagira n’ibyo amarira igihugu. 27. Ku byerekeye uru rubanza, Urukiko rw’Ubujurire rurasanga kuba NDAGIJIMANA Jean de Dieu n’umwunganizi we bavuga ko Urukiko Rukuru Urugereko rwa Musanze rutahaye agaciro impamvu nyoroshyacyaya ngo rumugabanyirize igihano, atari ukuri kuko izi mpamvu zitaweho nko kuba ari ubwa mbere NDAGIJIMANA Jean de Dieu akoze icyaha, no kuba ari mu myaka yo kwiteza imbere.

## Page 8

URUBANZA Nº RPAA 00489/2023/CA URUPAPURO RWA| 8

28. Urukiko rukaba rusanga kuba NDAGIJIMANA Jean de Dieu yarakoze icyaha cyo gusambanya umwana ufite imyaka 11, hakiyongeraho kuba yari umwarimu we ukwiye kubera abana yigisha urugero rw’imyitwarire myiza, nta kosa Urukiko Rukuru Urugereko rwa Musanze rwakoze mu kumuhanisha igifungo cy’imyaka 20 ans kuko gikwiranye n’uburemere bw’icyaha cyakozwe. 29. Urukiko rukaba rusanga kandi, hari izindi manza ruheruka guca ku bantu baregwa icyaha gisa n’icyo NDAGIJIMANA Jean de Dieu yahamijwe, muri zo hari nk’urubanza Nº RPAA 00527/2022/CA haburana Ubushinjacyaha na NSENGIYUMVA Emmanuel rwaciwe ku wa 22/02/2024. Muri urwo rubanza, Urukiko rw’Ubujurire rwagabanyirije NSENGIYUMVA Emmanuel igihano ku cyaha cyo gusambanya umwana w’imyaka 8, rushingiye ku kuba ari ubwa mbere akurikiranyweho icyaha mu buryo buzwi, rumuhanisha igifungo cy’imyaka cumi n’icyenda (19) gisimbura igifungo cya burundu yahanishijwe n’inkiko zibanza, hakaba n’urubanza N0 RPAA 00098/2023/CA haburana Ubushinjacyaha na TUGIRINSHUTI Alexis bahimba Kamugi nawe wahamijwe icyaha cyo gusambanya umwana w’imyaka 8 agahanishiwa igifungo cy’imyaka 19 kubera bwari ubwa mbere akoze icyaha. 30. Kubera izo mpamvu, mu rwego rwo gutanga ubutabera busa ku bibazo bisa, kuba ibyo NDAGIJIMANA Jean de Dieu akurikiranyweho bisa n’ibya NSENGIYUMVA Emmanuel na TUGIRINSHUTI Alexis, Urukiko rw’Ubujurire rusanga akwiye guhabwa igihano kiri mu kigero kimwe n’icya NSENGIYUMVA Emmanuel na TUGIRINSHUTI Alexis kuko nawe ari ubwa mbere akurikiranyweho icyaha mu Nkiko mu buryo buzwi, kandi akaba yari afite ikigero cy’imyaka ikiri mike ku buryo yahanwa ariko akabona igihe cyo kuzagaruka mu muryango nyarwanda, bityo NDAGIJIMANA Jean de Dieu akaba agomba guhanishwa igifungo cy’imyaka cumi n’icyenda (17) gisimbura igifungo cy’imyaka makumyabiri yahawe mu rubanza rujuririrwa. III. ICYEMEZO CY’URUKIKO 31. Rwemeye kwakira ubujurire bwatanzwe na NDAGIJIMANA Jean de Dieu;

## Page 9

URUBANZA Nº RPAA 00489/2023/CA URUPAPURO RWA| 9

32. Rwemeje ko urubanza No RPA 00443/2021/HC/MUS rwaciwe n’Urukiko Rukuru, Urugereko rwa Musanze, ku wa 17/10/2023, ruhindutse ku bijyanye n’igihano; 33. Rutegetse ko NDAGIJIMANA Jean de Dieu ahanishijwe igifungo cy’imyaka cumi n’irindwi (17 ans) aho kuba makumyabiri (20 ans) yahawe n’Urukiko mu rubanza rujuririrwa; 34. Rutegetse ko NDAGIJIMANA Jean de Dieu asonerwa amagarama y’urubanza kuko aburana afunzwe.

NI UKO RUKIJIJWE KANDI RUSOMEWE MU RUHAME NONE KU WA 20/12/2024

Sé Sé NDAHAYO Xavier NDAGIJIMANA Dominique UMUCAMANZA UMWANDITSI