UBUSHINJACYAHA v NDAGIJIMNA

# UBUSHINJACYAHA v NDAGIJIMNA

- Source: Amategeko - Section: Decisions (Judgements) - Date: 2025-10-30 - Case/document no.: RPAA 00101/2021/CA - Collection: Court of Appeal

## Text

## Page 1

UBUSHINJACYAHA v NDAGIJIMNA [Rwanda URUKIKO RW’UBUJURIRE – RPAA 00101/2021/CA (Kanyange, P.J.) 30 Ukwakira 2025] Amategeko agenga imanza z’inshinjabyaha – Ukwemera icyaha kudashidikanywaho – Ibimenyetso - Igihe cyose uregwa wari wemeye ibikorwa aregwa mu rwego rw’iperereza akabihakana mu Rukiko, si ngombwa ko Ubushinjacyaha bugomba byanze bikunze gushaka ibindi bimenyetso bishimangira uko kwemera icyaha kwe, kuko Umucamanza afite ishingano yo gusuzumana ubushishozi ibyo uregwa yemeye mu rwego rw’iperereza harebwe ibikorwa aregwa, igihe asanga uko kwemera kudashidikanywaho, akabiha agaciro ashingiye ku mutima nama we (intime conviction) incamake y’ikibazo: Ndagijimana w’imyaka 25 yaketsweho gusambanya umwana w’imyaka 9 wo mu rugo yakoreragamo, amakuru akaba yaramenyekanye ubwo yamusabaga kongera kumusambanya, uwo mwana abibwira umubyeyi we, na we abimenyesha ushinzwe umutekano mu mudugudu wabo. Ndagijimana yarafashwe, yemera ko yakinishije uwo mwana akamusoherera ku kaguru, aregwa mu Rukiko Rwisumbuye rwa Rubavu icyaha cyo gusambanya umwana. Urukiko rwasanze icyo cyaha kimuhama rushingiye k’ukwemera kwe, rumuhanisha igifungo cya burundu. Uregwa yajuririye icyo cyemezo mu Rukiko Rukuru mu myanzuro ye ajurira ahakana icyaha ariko mu iburanisha aza ku cyemera, urukiko rusanga nta kosa Urukiko Rwisumbuye rwakoze mu kumuhamya icyaha, rwemeza ko nta gihindutse ku mikirize yarwo. Uregwa yakomeje kujurira mu Rukiko rw’Ubujurire, hasuzumwa ikibazo cyo ku menya niba yarahamijwe icyaha hashingiwe ku kwemera kwe gusa nta bindi bimenyetso. Ndagijimana asobanura ko inkiko zabanje zamuhamije icyaha zishingiye ku kwemera kwe gusa kandi nta bindi bimenyetso biguherekeje kandi ‘’ukwemera icyaha konyine kudahagije ngo byemezwe ko ukuri kwabonetse’’, Ubushinjacyaha rero bukaba bugomba gutanga ibimenyetso byemeza nta shiti ko uregwa yakoze icyaha. Ubushinjacyaha buvuga ko n’ubwo urukiko rutasobanuye ibimenyetso rwavuze, bitavuze ko bidahari kuko hari abatangabuhamya barimo uwitwa Uwase Sifa na Habumugisha Arafati wari ushinzwe umutekano mu Mudugudu, bahuriza ku kuba barahurujwe na nyina w’umwana wasambanyijwe akababwira ko uwo mwana yamubwiye ko yasambanyijwe na Ndagijimana bityo rero ko ibivugwa n’uregwa nta shingiro bifte. Incamake y’icyemezo: 1. Igihe cyose uregwa wari wemeye ibikorwa aregwa mu rwego rw’iperereza akabihakana mu Rukiko, si ngombwa ko Ubushinjacyaha bugomba byanze bikunze gushaka ibindi bimenyetso bishimangira uko kwemera icyaha kwe, kuko Umucamanza afite ishingano yo gusuzumana ubushishozi ibyo uregwa yemeye mu rwego rw’iperereza harebwe ibikorwa aregwa, igihe asanga ukwo kwemera kudashidikanywaho, akabiha agaciro ashingiye ku mutima nama we (intime conviction).

## Page 2

2. N’ubwo ubujurire nta shingiro bwaba bufite, urukiko rushobora gusuzuma ibirebana n’igihano cyahawe uregwa. Ubujurire, nta shingiro bufite. Nta mategeko yashingiweho Imanza zifashishijwe RPAA 00224/2022/CA, Ubushinjacyaha na Rutayisire Aubin, rwaciwe n’Urukiko rw’Ubujurire ku wa 24/02/2023; RPAA 00480/2023/CA, Ubushinjacyaha na Twizeyimana Jean de Dieu, rwaciwe n’Urukiko rw’Ubujurire ku wa 26/02/2025; RPAA 00039/2021/CA, Ubushinjacyaha na Shakabatenda Jean de Dieu rwaciwe n’Urukiko rw’Ubujurire ku wa 02/07/2021. Urubanza I. IMITERERE Y’URUBANZA

[1] Umubyeyi w’umwana w’imyaka 9 wahawe izina rya U.B muri uru rubanza yatanze ikirego mu Bugenzacyaha avuga ko ku wa 19/03/2019 uwo mwana yasambanyijwe na Ndagijimna Jean Bosco wabakoreraga akazi ko mu rugo, uwo mwana abibabwira ku wa 21/03/2019 anababwira ko uwo munsi yashatse kongera kumusambanya, bituma Ndagijimna Jean Bosco atangira gukurikiranwa. [2] Nyuma y’iperereza, Ubushinjacyaha bwamureze mu Rukiko Rwisumbuye rwa Rubavu icyaha cyo gusambanya umwana, bushingiye ku kuba yaracyemeye, ku mvugo z’umwana yasambanyije n’iz’umubyeyi we, bumusabira guhanishwa igifungo cy'imyaka makumyabiri n’itanu (25). [3] Ndagijimna Jean Bosco yaburanye avuga ko ku nshuro ya mbere atasambanyije uwo mwana, ko ahubwo ku nshuro ya kabiri uwo mwana yaje amuryama iruhande aramukinisha bituma abishaka asohorera ku kaguru ke, avuga ko abisabira imbabazi akanagabanyirizwa igihano. [4] Mu rubanza NºRP 00164/2019/TGI/RBV rwaciwe ku wa 16/05/2019, Urukiko rwasanze Ndagijimna Jean Bosco ahamwa n’icyaha akurikiranweho, rushingiye ku kuba yaremeye ko yakinishije uwo mwana akamusohorera ku kaguru, bikaba bigize icyaha cyo gusambanya umwana kuko yari agamije ishimisha mubiri1, ko kuba icyemezo cya muganga kitagaragaza ko uwo mwana yasambanyijwe byatewe n’uko Ndagijimna atinjije igitsina cye mu gitsina cy’umwana nk’uko yabisobanuye mu Bushinjacyaha n’imbere y’Urukiko ko yashatse kwinjiza akabireka

1 Rwabishingiye ku ngingo ya 133 y’Itegeko Nº68/2018 ryo ku wa 30/08/2018 riteganya ibyaha n’ibihano muri rusange, iteganya ko: “Umuntu wese ukorera ku mwana kimwe mu bikorwa bishingiye ku gitsina bikurikira, aba akoze icyaha: 3º gukora ikindi gikorwa cyose ku mubiri w’umwana hagamijwe ishimishamubiri.

## Page 3

akamusohoreraho ku kaguru, kandi akaba yarajyanywe kwa muganga hashize iminsi ibiri amasohoro atakigaragara kubera gukaraba, rumuhanisha igifungo cya burundu. [5] Ndagijimna Jean Bosco yajuriye mu Urukiko Rukuru/Urugereko rwa Musanze ahakana icyaha, avuga ko yagihimbiwe na se w’umwana kugira ngo atamuhemba amafaranga yakoreye, naho mu nzego z’iperereza akaba yaremeye icyaha atakoze kubera inkoni yakubiswe, ko n’umwana bavuga ko yasambanyije atigeze abazwa ngo abe yaramushinje hakaba nta n’umutangabuhamya ubimushinja, raporo ya muganga nayo ikaba igaragaza ko umwana atasambanyijwe, ariko igihe cy’iburanisha arahindura yongera kwemera icyaha asaba kugabanyirizwa igihano. [6] Ubushinjacyaha bwavuze ko hagumaho imikirize y’urubanza rwajuririwe kuko Ndagijimna Jean Bosco yagiye ahinduranya imvugo kandi hari ibimenyetso bidashidikanywaho bimushinja icyaha akurikiranweho. [7] Mu rubanza NºRPA 00251/2019/HC/MUS rwaciwe ku wa 27/04/2020, Urukiko rwasanze ku rwego rwa mbere Ndagijimna Jean Bosco yarahamijwe icyaha cyo gusambanya umwana hashingiwe ku kuba yaracyemeye avuga ko atinjije igitsina mu cy’umwana ko ahubwo yamusohoreye ku kuguru, ibyo kandi bikaba bigize igikorwa cyo gusambanya umwana kuko yamukoreyeho igikorwa cy’ishimishamubiri nk’uko biteganywa n’ingingo ya 133 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ko no mu bujurire Ndagijimna yemeye icyaha anagisabira imbabazi n’ubwo yabanje kugihakana avuga ko yacyemejwe n’ubwoba. Rwasanze rero ahamwa n’icyaha cyo gusambanya umwana mu buryo budashidikanywaho, ko kandi nta kosa Urukiko rwa mbere rwakoze rumuhanisha igifungo cya burundu kuko aricyo giteganywa n’ingingo ya 133 y’Itegeko Nº 068/2018 ryo ku wa 30/08/2018, kuko iteganya igifungo cya burundu kidashobora kugabanywa, rwemeza rero ko akomeza guhanisha igifungo cya burundu. [8] Ndagijimna Jean Bosco yajuriye mu Rukiko rw’Ubujurire, urubanza ruhabwa Nº RPAA 00101/2021/CA, iburanisha ribera mu ruhame ku wa 09/09/2025 yunganiwe na Me Nsengiyumva François, Ubushinjacyaha buhagarariwe na Gakwerere Javan, Umushinjacyaha ku rwego rw’igihugu. [9] Mu myanzuro y’ubujurire no mu miburanire, Ndagijimna Jean Bosco n’umwunganira bavuga ko yajurijwe n’uko yahamijwe icyaha hashingiwe ku kwemera icyaha kwe kudashyigikiwe n’ibindi bimenyetso. [10] Uhagarariye Ubushinjacyaha yatanze inzitizi yo kutakira ubujurire bwa Ndagijimna Jean Bosco kuko bwatanzwe impitagihe, Naho ku birebana n’urubanza mu mizi, avuga ko impamvu ye y’ubujurire itahabwa agaciro, kuko mu kumuhamya icyaha hanashingiwe ku bindi bimenyetso bishimangira ukwemera kwe. [11] Ndagijimna n’umwunganira bavuga ko iyo nzitizi nta shingiro ifite kuko yajuriye akimenyeshwa urubanza kandi ko hari mu gihe cya covid-19. [12] Urukiko rwafashe icyemezo cyo kuburanisha ku nzitizi no ku mpamvu y’ubujurire bwa Ndagijimna Jean Bosco, ariko hakazabanza gusuzumwa inzitizi yatanzwe n’Ubushinjacyaha.

## Page 4

[13] Mu rubanza rubanziriza urundi rwaciwe ku wa 29/09/2025, Urukiko rwategetse Igororero rya Rubavu kurusobanurira mu nyandiko impamvu yatumye ibaruwa y’ubujurire Ndagijimna Jean Bosco yanditse ku wa 18/05/2020 yakirwa n’Ubuyobozi bwa gereza ku wa 02/06/2020. Byatumye urubanza rwongera kuburanishwa ku wa 24/10/2025 kugira ngo ababuranyi bagire icyo bavuga ku bisobanuro by’Ubuyobozi bw’Igororero rya Rubavu, Ndagijimna yunganiwe na Me Mukakabanda Athanasie naho Ubushinjacyaha buhagarariwe na Sibomana Stanislas, Umushinjacyaha ku rwego rw’Igihugu. [14] Muri iryo buranisha, ababuranyi basomewe ibaruwa y’Umuyobozi w’Igororero rya Rubavu, aho yasobanuye ko ibaruwa y’ubujurire ya Ndagijimna Jean Bosco yanditswe mu bitabo by’abajuriye ku wa 18/05/20202, yakirwa n’Ubuyobozi bw’Igororeo ku wa 19/05/2020, ariko ko yasinyweho ku wa 02/06/2020 bitewe n’uko ushinzwe amategeko yari muri guma mu rugo kubera icyorezo cya covid-19. [15] Uhagarariye Ubushinjacyaha yahise avuga ko hashingiwe ku byasobanuwe n’Ubuyobozi bw’Igororero Ndagijimna Jean Bosco abarizwamo, inziizi bari batanze bayiretse, kuko ibisobanuro byatanzwe bigaragaza ko Ndagijimna Jean Bosco yajuriye mu gihe giteganywa n’amategeko, Ndagijimna n’umwunganira bavuga ko ntacyo babivugaho, bityo ikibazo cyonyine kigomba gusuzumwa muri uru rubanza kikaba ari ikirebana n’uko Ndagijimna yahamijwe icyaha hashingiwe gusa ku kwemera icyaha kandi nta bindi bimenyetso bigushyigikira.

II. ISESENGURA RY’IKIBAZO KIGIZE URUBANZA

Kumenya niba Ndagijimna Jean Bosco yarahamijwe icyaha hashingiwe ku kwemera icyaha gusa kudashyigikiwe n’ibindi bimenyetso [16] Ndagijimna Jean Bosco n’umwunganira bavuga ko Urukiko rwemeje ko ahamwa n’icyaha cyo gusambanya umwana rushingiye ku kuba yaracyemeye kandi ko hari ibimenyetso bibishimangira, ariko usibye kubivuga, nta kimenyetso na kimwe rwagaragaje gishimangira uko kwemera, bivuze ko Urukiko narwo rwemeye ko iyo hataba ibindi bimenyetso bishimangira ukwemera kwe, atari guhanirwa icyaha yarezwe. [17] Bavuga kandi ko ibyo kuba hagomba kuba hari ibimenyetso bishimangira ukwemera k’uregwa byatanzweho umurongo n’Urukiko rw’Ikirenga mu rubanza Nº RPAAA 0057/15/CS rwaciwe ku wa 11/05/2018 haburana Ubushinjacyaha na Ndikubwayo n’urubanza Nº RPAA 00329/2021/CA rwaciwe n’Urukiko rw’Ubujurire ku wa 21/10/2022 haburana Ubushinjacyaha na Niyonkuru Amani, uwo murongo ukaba uvuga ko kwemera icyaha konyine kudahagije ngo byemezwe ko ukuri kwabonetse, ko uwo murongo wanakurikijwe mu zindi manza zirimo urubanza Nº RPAA 0055/2021/CA rwaciweku wa 13/10/2022 haburana Ubushinjabyaha na Niyonkuru Adrien, ko rero kuba nta bimenyetso Ubushinjacyaha bwagaragaje bishimangira ukwemera icyaha kwa Ndagijimna , ntaho Urukiko rwari guhera rwemeza ko hari ibindi bimenyetso bishimangira uko kwemera icyaha, kandi hashingiwe ku ngingo ya 152 y’Itegeko Nshinga, urubanza rwose rugomba kugaragaza impamvu rushingiyeho, n’ingingo ya 107

2 Yometse kuri iyo baruwa urupapuro rwo mu gitabo rugaragaza ko yakiriwe kuri iyo tariki

## Page 5

y’Itegeko ryerekeye imiburanishirize y’imanza z’inshinjabyaha ikaba iteganya ko Ubushinjacyaha bugomba gutanga ibimenyetso byemeza nta shiti ko uregwa yakoze icyaha. [18] Uhagarariye Ubushinjacyaha avuga ko iyo mpamvu y’ubujurire nta shingiro ifite, kuko n’ubwo Urukiko rutasobanuye ibindi bimenyetso bishimangira ukwemera icyaha Ndagijimna Jean Bosco yakoreye mu Bugenzacyaha, mu Bushinjacyaha no mu nkiko ku rwego rwa mbere no mu bujurire bwa mbere, bitavuze ko ibyo bimenyetso bidahari, kuko hari imvugo z’abatangabuhamya bitwa Uwase Sifa na Habumugisha Arafati wari ushinzwe umutekano mu Mudugudu, bahuriza ku kuba barahurujwe na nyina wa U.B akababwira ko uwo mwana yamubwiye ko yasambanyijwe na Ndagijimna Jean Bosco, ko kandi babimubajije akemera koko ko yamusambanyije. [19] Avuga kandi ko kuba Ndagijimna Jean Bosco yaremeye icyaha mu Bushinjacyaha agasobanura uko yagikoze, akavuga ko yasohoreye ku kuguru, akanabyemera aburana mu mizi ku rwego rwa mbere no mu bujurire, kugihakana kuri uru rwego atari byo byatesha agaciro ukwemera kwe nk’uko byatanzweho umurongo n’Urukiko rw’Ikirenga mu rubanza RPAA 0107/07/CS rwaciwe ku wa 11/09/2009. UKO URUKIKO RUBIBONA

[20] Impaka muri uru rubanza zishingiye ku kumenye niba Ndagijimna Jean Bosco yarahamijwe icyaha cyo gusambanya umwana hashingiwe ku kwemera icyaha [21] Ku birebana no kwemera icyaha, mu rubanza Nº RPAA 0057/15/CS rwaciwe ku wa 11/05/2018 haburana Ubushinjacyaha na Ndikubwayo, Urukiko rw’Ikirenga rwasobanuye ko kuba uregwa yemera icyaha byonyine atari ikimenyetso cyihagije kugira ngo byemezwe ko ukuri kwabonetse, ko ahubwo ari ikimenyetso mu bindi kigira akamaro iyo giherekejwe n’ibindi bimenyetso bihuje n’ikiburanwa. [22] Na none kandi, mu gusesengura icyo Urukiko rw’Ikirenga rwashatse ku birebana n’umurongo rwatanze mu rubanza Nº RPAA 0066/15/CS, uhura n’uwo mu rubanza rwavuzwe mu gika kibanziriza iki, Urukiko rw’Ubujurire, mu rubanza Nº RPAA 00224/2022/CA rwaciwe ku wa 24/02/20233, rwasobanuye ko Urukiko rw’Ikirenga rutashatse kuvuga ko igihe cyose uregwa wari wemeye ibikorwa aregwa mu rwego rw’iperereza akabihakana mu Rukiko, Ubushinjacyaha bugomba byanze bikunze gushaka ibindi bimenyetso bishimangira uko kwemera icyaha kwe, kuko Umucamanza afite ishingano yo gusuzumana ubushishozi ibyo uregwa yemeye mu rwego rw’iperereza harebwe ibikorwa aregwa, igihe asanga ukwo kwemera kudashidikanywaho, akabiha agaciro ashingiye ku mutima nama we (intime conviction)4. [23] Nk’uko dosiye ibigaragaza, Ndagijimna Jean Bosco abazwa mu Bugenzacyaha yavuze ko yemera ko yasambanyije U.B n’ubwo mu gusobanura imikorere y’icyo cyaha yavuze ko yari agiye kumusambanya ariko akabireka, ageze mu Bushinjacyaha nabwo avuga ko yemera icyaha

3 Haburana Ubushinjacyaha na Rutayisire Aubin (ibika bya 46-48) 4 Uwo murongo wakurikijwe mu zindi manza, harimo urubanza Nº RPAA 00480/2023/CA rwaciwe n’Urukiko rw’Ubujurire ku wa 26/02/2025 haburana Ubushinjacyaha na Twizeyimana Jean de Dieu (igika cya 18).

## Page 6

akurikiranweho, asobanura ko yashatse kwinjiza igitsina mu cy’uwo mwana ariko arabireka ahubwo amusohorera ku kuguru. [24] Usibye uko kwemera Ndagijimna Jean Bosco yakoreye mu nzego z’iperereza, no mu Rukiko Rwisumbuye rwa Rubavu yaburanye yemera icyaha, asobanura ko ku nshuro ya mbere atasambanyije U.B, ko ahubwo ku nshuro ya kabiri uwo mwana yaje amuryama iruhande aramukinisha bituma abishaka asohorera ku kaguru ke, asaba imbabazi no kugabanyirizwa ibihano. N’ubwo kandi Ndagijimna yajuriye mu Rukiko Rukuru ahakana icyaha, bigaragara ko yageze mu iburanisha yongera kucyemera, avuga ko uko Ubushinjacyaha bubivuga ari ko byagenze, asaba kugabanyirizwa igihano. [25] Urukiko rurasanga rero Ndagijimna ataremeye icyaha mu nzego z’iperereza honyine kuko no mu rukiko yakomeje kucyemera nk’uko byavuzwe haruguru, bituma Urukiko Rwisumbuye rwa Rubavu rushingira ku ngingo ya 110 y’Itegeko Nº 15/2004 ryo ku wa 12/06/2004 ryerekeye ibimenyetso mu manza ryakurikizwaga5, rusanga ukwemera icyaha yakoreye mu Rukiko kumutsindisha. [26] Urukiko rw’Ubujurire rurasanga rero usibye kuba ukwemera icyaha Ndagijimna yakoreye mu Rukiko kwaragombaga kumutsindisha hashingiwe ku ngingo yavuzwe haruguru, hanarebwe uburyo yagiye yemera kuva mu nzego z’iperereza ndetse mu Rukiko Rwisumbuye agasobanura neza uko yagikoze icyaha ashinjwa, bitari ngombwa ko haba ibindi bimenyetso bishyigikira uko kwemera kuko bigaragara ko ibyo yemeye bidashidikanywaho, bivuze rero ko nta kosa ryakozwe mu gushingira kubyo yemeye nk’ikimenyetso kimuhamya icyaha, bityo ubujurire bwe bukaba nta shingiro bufite. [27] Urukiko rurasanga ariko n’ubwo ubujurire bwe nta shingiro bufite, harebwa niba igihano yahawe gikwiranye n’uburemere bw’icyaha yakoze6. [28] Nk’uko imikirize y’urubanza rwajuririwe ibigaragaza, Urukiko Rukuru rwanze kugabanya igihano Ndagijimna yahanishijwe ku rwego rwa mbere, rubishingiye ku kuba icyaha cyamuhamye gihanishwa igifungo cya burundu kidashobora kugabanywa nk’uko biteganywa n’ingingo ya 133 y’Itegeko Nº 068/2028 ryo ku wa 30/08/2018 nk’uko ryahinduwe. [29] Urukiko rurasanga ariko harebwe igihe urubanza rujuririrwa rwaciriwe (27/4/2020), igika cy’ingingo ya 133 y’Itegeko Nº 068/2028 ryo ku wa 30/08/2018 cyateganyaga ko igifungo cya burundu kidashobora kugabanywa kubera impamvu nyoroshyacyaha, cyari cyarateshejwe agaciro n’Urukiko rw’Ikirenga mu rubanza Nº RS/INCONST/SPEC 00003/2019/SC rwaciwe ku wa 04/12/2019 ku kirego cyatanzwe na Kabasinga Florida, bitewe n’uko rwasanze kinyuranye

5 Iyo ngingo yateganyaga ko ‘’Ukwiyemerera mu rubanza ni amagambo umuburanyi cyangwa umuhagarariye avugira mu rukiko agira ibyo yemera. Ayo magambo atsindisha uwayavuze. Uwemeye atyo mu rukiko ntabwo ashobora kwisubiraho keretse bigaragaye ko yemejwe n’uko yagirirwaga nabi cyangwa ko yibeshye ku cyabaye. Ntashobora kwisubiraho avuga ko yayobejwe no kwibeshya ku mategeko’’. 6 Ibyo kuba urukiko rwasuzuma ibirebana n’igihano uregwa yahawe n’ubwo ubujurire bwe nta shingiro bufite, Urukiko rw’Ubujurire rwabitanzeho umurongo mu rubanza RPAA 00039/2021/CA rwaciwe 02/07/2021 haburana Ubushinjacyaha na Shakabatenda Jean de Dieu, wakurikijwe no mu manza zaciwe vuba, nk’urubanza Nº RPAA 00181/2024/CA, rwaciwe n’Urukiko rw’Ubujurire ku wa 25/04/2025 Ubushinjacyaha buburana na Twizerane Alphonse

## Page 7

n’Itegeko nshinga, bivuze ko Urukiko Rukuru rutari kuzitirwa n’iyo ngingo mu kutagabanyiriza Ndagijimna igifungo cya burundu yahanishijwe. [30] Urukiko rurasanga rero kuba ari ubwa mbere Ndagijimna Jean Bosco akurikiranweho icyaha mu buryo buzwi no kuba yarakoze icyaha akiva mu cyiciro cy’abana kuko yari afite imyaka 21, byashingirwaho akagabanyirizwa igihano agahabwa amahirwe yo gusubira muri sosiyete nyuma yo kugororwa, agahanishwa igifungo cy’imyaka 15 nk’icyahanishijwe Murwanashyaka André alias Hassan, wari ku kigero cya Ndagijimna kuko nawe yari afite imyaka 21 agasambanya umwana w’imyaka icumi (10), Urukiko rubyibwirije rukaba rwaramugabanyirije igihano rushingiye ku kuba ari ubwa mbere akurikiranweho icyaha mu buryo buzwi no kuba yaragikoze akiva mu bwana, bityo urubanza rwajuririwe rukaba ruhindutse ku byerekeye igihano Ndagijimna Jean Bosco yari yahanishijwe. III. ICYEMEZO CY’ URUKIKO

[31] Rwemeje ko ubujurire bwatanzwe na Ndagijimna Jean Bosco nta shingiro bufite; [32] Rwemeje ko urubanza NºRPA 00251/2019/HC/MUS rwaciwe n’Urukiko Rukuru/Urugereko rwa Musanze ku wa 27/04/2020, ruhindutse ku birebana n’igihano Ndagijimna Jean Bosco yari yahanishijwe; [33] Ruhanishije Ndagijimna Jean Bosco igifungo cy’imyaka cumi n’itanu (15).