NDAYAMBAJE v. KIGALI CEMENT COMPANY Ltd n’undi

# NDAYAMBAJE v. KIGALI CEMENT COMPANY Ltd n’undi

- Source: Amategeko - Section: Decisions (Judgements) - Date: 2015-03-13 - Case/document no.: RCOM A 0572/14/HCC - Collection: Commercial High Court

## Text

## Page 1

NDAYAMBAJE v. KIGALI CEMENT COMPANY Ltd n’undi [Rwanda URUKIKO RUKURU RW’UBUCURUZI – RCOM A 0572/14/HCC (Rwanyindo, P.J.) 13 Werurwe 2015] Amategeko agenga imanza z’ubucuruzi – Amasezerano yo kugura imigabane muri sosiyete – Igurisha ry’imigabane ry’umunyamigabane yari afite muri sosiyeti bitamenyeshejwe uberewemo imyenda – Iyo uberewemo umwenda atari cyangwa atashyizwe mu masezerano y’ihana myenda, ayo masezerano n’iryo vugururwa riba ryabaye ntibimugiraho ingaruka. Amategeko agenga imiburanishirize y’imanza z’ubucuruzi – Gutambamira urubanza – Itambama rikozwe n’uwagurishije imibane muri sosiyeti – Iyo uwagurishije imigabane muri sosiyeti atambamiye urubanza ruvugwamo abo yayigurishije, ikirego cye nticyakirwa kuko aba nta masezerano cyangwa inyungu biba bihumuza n’urwo rubanza. Incamake y’ikibazo: Ndayambaje yatanze ikirego gitambamira urubanza rwaciwe n’Urukiko Rukuru rw’Ubucuruzi aho REIC Ltd yasabaga Urukiko gutegeka KCC Ltd kuyisubiza imigabane yayo bikubifitiyeho n’indishyi. Avuga ko yari umunyamigabane muri KCC Ltd, muri 2011 sosiyeti yitwa ARM Ltd nayo yaje kugura imigabane muri KCC Ltd ye yose ariko bumvikana ko imyenda yose izaryozwa KCC Ltd mu gihe ikomoka mbere 2011 izishyurwa nawe ubwe. Yavuze ko afite inyungu ko kurutambamira kuko abona hari byinshi byirengagijwe mu rwego rw’amategeko. KCC Ltd yavuze imyenda yose yajya ibazwa Ndayambaje kuko ariwe wari umuyobozi wayo n’ubwo atariwe wasinye amasezerano. REIC Ltd yaburanaga na KCC Ltd mu rubanza rutambamira, ivuga ko Ndayambaje na KCC Ltd ari abantu babiri batandukanye ko kandi Ndayambaje atakiri umunyamigabane wa KCC Ltd kuko yagurishije imigabane ye yose ARM Ltd; akaba rero ngo nt nyungu afite yo gutambamira urubanza. REIC Ltd yasoje isaba amafaranga y’ikurikirana rubanza n’igihembo cya avoka. Incamake y’icyemezo; 1. Nta nahamwe hagaragara mu masezerano yo muri 2011 ko Ndayambaje yiyemeje kuzaryozwa imyenda yose ya KCC ltd. Niyo kandi biza kugenda gutyo, ayo masezerano yari kugira agaciro iyo REIC Ltd ibyemera Ikirego cya Ndayambaje ntikigomba kwakirwa kuko nta nyungu afite yo gutambamira urubanza. Ikirego nticyakiriwe; Uwajuriye ategetswe kwishura REIC amafaranga y’ikurikirana rubanza n’igihembo cya avoka.

## Page 2

Amategeko yashingiweho: Itegeko no 45/2011 ryo kuwa 25/11/2011 rigenga amasezerano, ingingo ya 121 igika cya 3. Inyandiko z’abahanga zakoreshejwe: Serge Braudo (Conseiller honoraire à la Cour d’Appel de Versailles) et Alexis Baumann (Avocat au Barreau de Paris), Dictionnaire Juridique, Définition de la cession, Disponible sur : http://www.dictionnaire-juridique.com/definition/cession.php. Nta manza zifashishijwe. Urubanza I. IMITERERE Y’URUBANZA [1] Urubanza rutambamirwa na Ndayambaje Jean Damascène n’urubanza rwaburanishijwe mu rwego rw’ubujurire aho REIC Ltd yajuriraga urubanza RCOM 1381/13/TC/NYGE rwatangiwe na REIC Ltd yasabaga Urukiko gutegeka KCC Ltd kuyisubiza imigabane yayo ingana na 144,699 USD ndetse n’izindi ndishyi. [2] Muri urwo rubanza rutambamirwa, Urukiko rwemeje ko KCC Ltd igomba kwishyura REIC Ltd 217,049 USD zihwanye na 144,699 USD z’imigabane yayo hiyongereyeho 1,5% yayo nk’uko babyumvikanyweho mu masezerano (144,699 X 1,5% = 217,049 USD). [3] Ndayambaje Jean Damascène yatanze ikirego cyo gutambamira urubanza rwavuzwe haruguru avuga ko yari umunyamigabane muri KCC Ltd ufite ubwiganze bw’imigabane, ko mu mwaka wa 2011, sosiyete yitwa Anti River Mining Company Ltd (ARM) nayo yaje kugura imigabane muri KCC Ltd, igirana amasezerano yihariye ko ifata ubuyobozi bwa KCC Ltd (Management agreement), ko ku wa 04/03/2014, ARM Ltd yaguze imigabane ye yose (Ndayambaje Jean Damascène) ariko bumvikana ko imyenda izaryozwa KCC Ltd yose ikomoka ku bikorwa byayo mbere ya 2011 izishyurwa na Ndayambaje Jean Damascène. [4] Ndayambaje Jean Damascène avuga ko ku wa 22/09/2014 yamenyeshejwe na KCC Ltd ko hari urubanza KCC Ltd yatsinzwemo, isabwa kwishyura REIC Ltd 217,049 USD, akaba ariyo mpamvu yahise atambamira urwo rubanza akirumenya kuko arufitemo inyungu kandi abona hari byinshi byirengagijwe mu rwego rw’amategeko, akaba asaba ko byakongerwa bigasuzumwa. [5] KCC Ltd yireguye ivuga ko kubera guhora mu manza ziturutse ku wahoze ari Umuyobozi Mukuru wayo Bwana Ndayambaje Jean Damascène, ikaba isanga ko Urukiko rukwiriye gutegeka ko imyenda yose yemeye ko ariwe yajya icibwa aho gucibwa KCC Ltd kabone nubwo ariyo yasinye amasezerano. [6] KCC Ltd ivuga ko bigaragara mu mwanzuro wa Ndayambaje Jean Damascène utambama urubanza ko yiyemerera we ubwe ko ku itariki ya 04/03/2014 ARM Ltd yaguze imigabane ye yose yo muri KCC Ltd, bumvikana ko imyenda yose izaryozwa KCC Ltd ikomoka ku bikorwa bya KCC Ltd mbere yo mu mwaka wa 2011, izishyurwa na Ndayambaje Jean Damascène.

## Page 3

[7] REIC Ltd yiregura ivuga ko urubanza rutambamirwa rwarebaga REIC Ltd na KCC Ltd kandi rwaramaze gushyirwa mu bikorwa kuko KCC Ltd yishyuye amafaranga yose yategetswe kwishyura muri urwo rubanza. [8] Ivuga kandi ko mu rubanza rutambamirwa haburanaga REIC Ltd na KCC Ltd kandi bikaba bitandukanye na Ndayambaje Jean Damascène kuko ari bantu babiri batandukanye. Ivuga ko ikindi ari uko Ndayambaje Jean Damascène yivugira mu myanzuro ye ko yagurishije ARM Ltd imigabane yose yo muri KCC Ltd, bityo akaba atakiri umunyamigabane. [9] REIC Ltd irasaba kwishyurwa amafaranga y’ikurikiranarubanza n’igihembo cy’Avoka yakoresheje bingana na Frw 3.000.000. [10] Ibibazo bisuzumwa muri uru rubanza n’ibikurikira: - Kumenya niba Ndayamabaje Jean Damascène afite inyungu yo gutambamira urubanza RCOMA 0251/14/HCC ndetse niba ikirego cye gishobora kwakira. - Kumenya niba REIC Ltd igomba guhabwa amafaranga y’ikurikiranarubanza n’igihembo cy’Avoka isaba bingana na Frw 3.000.000. II. ISESENGURA RY’IBIBAZO BIGIZE URUBANZA A Kumenya niba Ndayamabaje Jean Damascène afite inyungu yo gutambamira urubanza R.COM A 0251/14/HCC ndetse niba ikirego cye gishobora kwakirwa. [11] Ndayambaje Jean Damascène yatanze ikirego cyo gutambamira urubanza RCOMA 0251/14/HCC ku mpamvu y’uko abifityiyemo inyungu kuko ariwe ugomba kwishyura umwenda KCC Ltd yategetswe kwishyura kubera ko habaye amasezerano hagati ya KCC Ltd na ARM River Mining Ltd (ARM Ltd) aho ARM Ltd yaguze imigabane ye yose ndetse we yiyemereye kuzaryozwa imyenda yose ya KCC Ltd izaba yaturutse ku bikorwa byakozwe mbere y’ayo masezerano yakozwe muri 2011. [12] KCC Ltd nayo yiregura ivuga ko kubera guhora mu manza ziturutse ku wahoze ari Umuyobozi Mukuru wayo Bwana Ndayambaje Jean Damascène, ikaba isanga ko Urukiko rukwiriye gutegeka ko imyenda yose yemeye ko ariwe yajya icibwa aho gucibwa KCC Ltd kabone nubwo ariyo yasinye amasezerano. Ivuga kandi ko bigaragara mu mwanzuro wa Ndayambaje Jean Damascène utambama urubanza ko yiyemerera we ubwe ko ku itariki ya 04/03/2014 ARM Ltd yaguze imigabane ye yose yo muri KCC Ltd, bumvikana ko imyenda yose izaryozwa KCC Ltd ikomoka ku bikorwa bya KCC Ltd mbere yo mu mwaka wa 2011, izishyurwa na Ndayambaje Jean Damascène. [13] REIC Ltd yiregura ivuga ko urubanza rutambamirwa rwarebaga REIC Ltd na KCC Ltd kandi rwaramaze gushyirwa mu bikorwa kuko KCC Ltd yishyuye amafaranga yose yategetswe kwishyura muri urwo rubanza, bityo nta nyungu Ndayambaje Jean Damascène afite yo gutambamira urubanza cyane cyane ko NDAYAMBAJE Jean Damascène yivugira mu myanzuro ye ko yagurishije ARM Ltd imigabane yose yo muri KCC Ltd, akaba rero atakiri umunyamigabane.

## Page 4

[14] Urukiko rusanze ko usibye ko nta hantu na hamwe hagaragara mu masezerano yo ku wa 03/11/2011 aho Ndayambaje Jean Damascène yiyemereye kuzaryozwa imyenda yose ya KCC Ltd ikomoka ku bikorwa bya mbere ya 2011 ariko kandi iyo biba kuba gutyo, ayo masezerano yari kugira agaciro gusa iyo REIC Ltd nyirimyenda yari kuba yabyemeye nk’uko biteganywa n’ingingo ya 121, igika cya 3, y’Itegeko rigena amasezerano (2011) igira iti: «Uretse iyo ugenewe inshingano abyemeye ukundi, ari uguha undi muntu inshingano zo gukora ibisabwa, ari amasezerano yo kwishingira inshingano ziyarimo ntibikuraho inshingano cyangwa uburyozwe by’ufite inshingano». [15] Rusanze ko ibivugwa mu ngingo ya 121 yavuzwe haruguru bihuhe n’ibivugwa n’abahanga mu mategeko nka Me Serge Braudo uvuga ati: «La cession de dettes a pour effet de produire une novation par changement de débiteur. A condition que le créancier ait été partie à l'acte, la cession de dettes libère le débiteur initial de ses obligations. Il devient créancier du cessionnaire. Tel est le cas dans lequel le débiteur a vendu son fonds de commerce à un tiers et que l'acte de cession a prévu la transmission des dettes et des créances à l'acquéreur. Mais si le créancier n'a pas été partie à l'acte, la convention ne lui est pas opposable et la novation ne se produit pas. En d'autres termes, en cas de non exécution de ses obligations par l'acquéreur du fonds, le vendeur reste tenu des conséquences de la défaillance de l'acheteur (1ère chambre civile, 30 avril 2009, pourvoi : 08-11093, BICC n°709 du 15 octobre 2009 et Legifrance)1» [16] Rusanze kandi ko REIC Ltd yivugira ko yamaze kwishyurwa na KCC Ltd umwenda wose nk’uko byategetswe mu rubanza Ndayambaje Jean Damascène ashaka gutambamira, bityo Urukiko rukaba rusanga ko nta nyungu Ndayambaje Jean Damascène afite yo gutambamira urubanza rwamaze kurangizwa. [17] Kubera izo mpamvu zose zasobanuwe, Urukiko rukaba rusanga ko ikirego cya Ndayambaje Jean Damascène kitagomba kwakirwa kubera ko nta nyungu afite yo gutambamira urubanza rwamaze kurangizwa. B. Kumenya niba REIC Ltd igomba guhabwa amafaranga y’ikurikiranarubanza n’igihembo cy’Avoka isaba bingana na Frw 3.000.000. [18] REIC Ltd irasaba Frw 3.000.000 y’ikurikiranarubanza n’igihembo cy’Avoka. [19] Urukiko rusanze ko REIC Ltd igomba guhabwa amafaranga y’ikurikiranarubanza n’igihembo cy’Avoka kuko n’amafaranga yakoresheje mu rubanza bitari ngombwa, bityo ikaba igomba kuyasubizwa n’uwatanze ikirego bitari ngombwa ariwe Ndayambaje Jean Damascène. [20] Rusanze ariko ko Frw 3000.000 isaba ari ikirenga hakurikijwe imiterere y’urubanza, bityo rukaba ruyigeneye mu bushishozi n’ubwitonzi bwarwo Frw 600.000 y’ikurikiranarubanza n’igihembo cy’Avoka. III. ICYEMEZO CY’URUKIKO 1 Définition de la cession dans le Dictionnaire Juridique de Serge Braudo (Conseiller honoraire à la Cour d’Appel de Versailles) et Alexis Baumann (Avocat au Barreau de Paris). Disponible sur : http://www.dictionnaire-juridique.com/definition/cession.php

## Page 5

[21] Rwemeje kutakira ngo rusuzume ikirego cya Ndayambaje Jean Damascène kubera ko nta nyungu afite yo gutambamira urubanza rwamaze kurangizwa. [22] Rutegetse Ndayambaje Jean Damascène kwishyura Rwanda Enterprise Investment Company Ltd Frw 600.000 y’ikurikiranarubanza n’igihembo cy’Avoka. [23] Ruvuze ko rwasomwe bitinze kubera ko Umucamanza yari mu kiruhuko cy’uburwayi kuva ku wa 12/02/2015 kugeza ku wa 02/03/2015.