UBUSHINJACYAHA v. NDIKUBWIMANA

# UBUSHINJACYAHA v. NDIKUBWIMANA

- Source: Amategeko - Section: Decisions (Judgements) - Date: 2025-11-27 - Case/document no.: RPAA00140/2023/CA - Collection: Court of Appeal

## Text

## Page 1

UBUSHINJACYAHA v. NDIKUBWIMANA [Rwanda URUKIKO RW’UBUJURIRE – RPAA00140/2023/CA (Ndahayo, P.J.,) 27 Ugushyingo 2025] Amategeko agenga imiburanishirize y’imanza nshinjabyaha – Ibyaha byo gukubita cyangwa gukomeretsa ku bushake n’ubujura bukoreshejwe intwaro – Ibimenyetso – Kugira ngo Umucamanza afate icyemezo gihamya icyaha, agomba kuba afite ibimenyetso bihamya nta gushidikanya (preuves à conviction au-delà de tout doute raisonnable) ko ushinjwa ariwe wakoze icyaha, Umucamanza niwe ugomba gusesengurana ubushishozi uruhurirane rw’ibimenyetso, agahamya ushinjwa icyaha mu gihe gusa asanga nta wundi mwanzuro wagerwaho n’isesengura yakoze uretse iryo gusanisha uwakoze icyaha n’icyaha cyakozwe. Incamake y’ikibazo: Uwitwa Musabyiana Jeanette avuga ko yatewe mw’ijoro n’uwitwa Ndikubwimana Vedaste alias Gasenda ashaka kwiba muri boutique ye, maze aramutema, bituma hakorwa iperereza n’inzego zibishinjwe. Ubushinjacyaha bushingiye ku bimenyetso bitandukanye, bwareze Ndikubwimana Vedaste mu Rukiko Rwisumbuye rwa Musanze bumukurikiranyeho ibyaha byo gukubita cyangwa gukomeretsa ku bushake n’ubujura bukoreshejwe intwaro. Uregwa yaburanye ahakana ibyaha aregwa, bityo asaba kurenganurwa. Urukiko Rwisumbuye rwa Musanze rushingiye ku bimenyetso bitandukanye no ku mvugo z’abatangabuhamya, rwemeje ko Ndikubwimana ahamwa n’icyaha cy’Ubujura bukoresheje intwaro hamwe n’icyaha cyo gukubita no gukomeretsa ku bushake, maze rumuhanisha igihano cy’igifungo cy’imyaka cumi n’itanu (15) n’ihazabu y’amafaranga y’u Rwanda angana na miliyoni zirindwi (7.000.000 Frw). Ndikubwimana ntiyishimiye icyo cyemezo cy’Urukiko Rwisumbuye, maze ajuririra mu Rukiko Rukuru, Urugereko rwa Musanze avuga ko icyatumye ajurira ari uko yahamijwe icyaha hashingiwe ku bimenyetso bidahagije, bityo asaba ko uru Rukiko rwemeza ko ari umwere. Uburanira Ubushinjacyaha avuga ko busanga impamvu z’ubujurire za Ndikubwimana alias Gasenda nta shingiro zifite kuko hari ibimenyetso byuzuzanya byemeza nta gushidikanya ko ari mu bibye kwa Musabyimana Jeannette bakanamukomeretsa. Urukiko Rukuru Urugereko rwa Musanze rwemeje ko imikirize y’urubanza rwaciwe n’Urukiko Rwisumbuye rwa Musanze igumyeho, bityo ko n’igihano uregwa yahawe cyo gufungwa imyaka cumi n’itanu (15) kigumyeho kuko atabashije kuvuguruza imvugo z’abatangabuhamya. Ndikubwimana Vedaste alias Gasenda ntiyanyuzwe na none, maze ajuririra mu Rukiko rw’Ubujurire, we n’umwunganira barusaba ko hazakorwa iperereza aho icyaha cyabereye kuko ntacyo we yakoze kugirango uregwa ahabwe ubutabera; bavuga ko batemera raporo y’inzego z’ibanze; basaba kandi uru Rukiko kwishakira ibimenyetso bitagezweho n’ubushinjacyaha. Uregwa asoza imiburanire ye asaba uru Rukiko gushingira icyemezo cyarwo ku murogo watanzwe n’Urukiko rw’Ubujurire wumvikanisha ko igihe hari ugushidikanya bigomba kurengera ushinjwa;

## Page 2

avuga kandi ko ibimenyetso byatanzwe bitagaragaza imikorere y’icyaha k’uregwa, bityo ko ibi byose bikwiye guteshwa agaciro, maze Urukiko rukemeza ko ari umwere kuko nta cyaha yakoze. Uburanira Ubushinjacyaha avuga ko busanga nta mpamvu yo kujya aho icyaha cyabereye nkuko uregwa abisaba kuko hakozwe iperereza rihagije, hakabazwa abantu bahagije, bityo busaba Urukiko rw’Ubujurire kwakira ubujurire bw’uregwa kuko bwakozwe mu buryo no mu nzira byemewe n’amategeko ariko rukemeza ko nta shingiro bufite; bityo ko urubanza yajuririye rudahindutse mu ngingo zarwo zose. Urukiko rw’Ubujurire ruhereye kuri izi mpaka, rusanga ikibazo kigomba gusuzumwa ari ukumenya niba Ndikubwimana Vedaste alias Gasenda yarahamijwe icyaha nta bimenyetso bidashidikanywaho bishingiweho. Urukiko rw’Ubujurire rusanga nta gushidikanya ko Ndikubwimana Vedaste alias Gasenda ariwe wakoze ibi byaha aregwa, bityo hakaba hagomba kumugamo imikirize y’urubanza rwaciwe n’Urukiko Rukuru Urugereko rwa Musanze, maze n’igihano yahawe cyo gufungwa imyaka cumi n’itanu (15) n’ihazabu y’amafaranga y’u Rwanda angana na miliyoni zirindwi (7.000.000 Frw) kigumyeho. Incamake y’icyemezo: Kugira ngo Umucamanza afate icyemezo gihamya icyaha, agomba kuba afite ibimenyetso bihamya nta gushidikanya (preuves à conviction au-delà de tout doute raisonnable) ko ushinjwa ariwe wakoze icyaha, Umucamanza niwe ugomba gusesengurana ubushishozi uruhurirane rw’ibimenyetso, agahamya ushinjwa icyaha mu gihe gusa asanga nta wundi mwanzuro wagerwaho n’isesengura yakoze uretse iryo gusanisha uwakoze icyaha n’icyaha cyakozwe. Ubujurire nta shingiro bufite. Amategeko yashingiweho. Imanza zifashishijwe: Urubanza RPAA 00737/2021/CA, rw’ Ubushinjacyaha na Uwayisaba Habimana, rwaciwe n’Urukiko rw’Ubujurire ku wa 16/12/2022. Urubanza I. IMITERERE Y’URUBANZA [1] Mw’ijoro ryo ku wa 28/11/2020, uwitwa Musabyimana Jeanette yari yaraye muri boutique ye iherereye mu mudugudu wa Kabyaza, akagari ka Mbatabata,umurenge wa Kamubuga akarere ka Gakenke, bigeze nijoro aryamye ari mu bitotsi, abona urumuri mu cyumba, yitegereje abona ari umuntu urimo gufata ibicuruzwa byari ahongaho muri boutique aho yari yapfumuye aje kubyiba, uwo muntu abonye ko Musabyimana Jeanette amubonye amanika umuhoro ashaka kumutema mu mutwe undi atega ibiganza byombi nawe ahita abitema aramukomeretsa ku buryo bubabaje. Musabyimana Jeanette yabonye amaze gutemwa amaraso adudubiza avuza induru cyane

## Page 3

abaturage bahita batabara ariko uwo muntu wari umuteye yahise asohoka aca muri wa mwobo yari yacukuye ku nzu arasohoka ajya hanze. Musabyimana Jeanette yabonye ko mu bantu bahageze batabaye harimo na Ndikubwimana Vedaste kandi ariwe yabonye wari wamuteye akamutema ari nayo mpamvu yahereweho uwo Ndikubwimana Vedaste akekwa maze Ubushinjacyaha bushingiye ku bimenyetso birimo abatangabuhamya, raporo ya muganga n’iy’inzego z’ibanze, bumurega mu Rukiko Rwisumbuye rwa Musanze, bumukurikiranyeho ibyaha byo gukubita cyangwa gukomeretsa ku bushake n’ubujura bukoreshejwe intwaro. [2] Ndikubwimana Vedatse yaburanye avuga ko ibyaha aregwa atabyemera,ko atariwe watemye Musabyimana Jeannette ko ndetse atariwe wapfumuye iyo boutique, avuga ko amaraso bamusanzeho ku biganza yamugiyeho ubwo yapfukaga Musabyimana Jeannette aho abajura bari bamaze kumutema, asoza asaba kurenganurwa. [3] Mu rubanza RP 00025/2021/TGI/MUS rwaciwe ku wa 14/10/2021, Urukiko Rwisumbuye rwa Musanze rwemeje ko Ndikubwimana Vedatse ahamwa n’icyaha cy’Ubujura bukoresheje intwaro n’icyaha cyo gukubita no gukomeretsa ku bushake, rumuhanisha igihano cy’igifungo cy’imyaka cumi n’itanu (15) n’ihazabu y’amafaranga y’u Rwanda angana na miliyoni zirindwi (7.000.000 Frw). [4] Urukiko Rwisumbuye rwa Musanze rwashingiye icyemezo cyarwo ku kuba rusanga n’ubwo uregwa ahakana ibyaha aregwa ariko ashinjwa na Musabyimana Jeannette yahohoteye aho avuga ko yiboneye Ndikubwimana Vedatse muri iryo joro amuhagaze hejuru ndetse na mbere y'uko amutema baravuganye kandi asanzwe amuzi akaba ataramwitiranyije n'undi muntu, no kuba hari imvugo z’abatangabuhamya bamushinja barimo;Nkiranuye Silas, Nsanzumuremyi Theobald na Murenzi Ephrem basobanuye ko bumvise umuntu arimo gutabaza bakajyayo bahagera bagasanga Musabyimana Jeannette yatemwe ku biganza byombi banahasanga Ndikubwimana Vedatse bamufashe basanga yuzuyeho ibitaka ku myenda anafite amaraso mu biganza, bamubaza ukuntu ari ahongaho muri iryo joro abasubiza ko yumvise induru aza gutabara. Abari aho bamubaza ukuntu yumvise induru kuko bari bazi ko iwabo ari kure maze ngo abura icyo asubiza. [5] Ndikubwimana Vedatse ntiyishimiye icyo cyemezo cy’UrukikoRwisumbuye, ajuririra mu Rukiko Rukuru, Urugereko rwa Musanze avuga ko icyatumye ajurira ari uko yahamijwe icyaha hashingiwe ku bimenyetso bidahagije, asaba ko hemezwa ko ari umwere. [6] Uburanira Ubushinjacyaha avuga ko Ubushinjacyaha busanga impamvuz’ubujurire za Ndikubwimana Vedaste alias Gasenda nta shingiro zifite, kuko Urukiko rwasobanuye ibimenyetso byuzuzanya byemeza nta gushidikanya ko Ndikubwimana Theoneste ari mu bibye kwa Musabyimana Jeannette bakanamukomeretsa, nk’uko bigaragara mu gika cya 12 cy’urubanza rujuririrwa. [7] Mu rubanza RPA 00931/2021/HC/MUS rwaciwe ku wa 16/02/2023, Urukiko Rukuru Urugereko rwa Musanze rwemeje ko imikirize y’urubanza RP 00025/2021/TGI/MUS rwaciwe ku wa 14/10/2021 n’Urukiko Rwisumbuye rwa Musanze igumyeho, bityo ko igihano Ndikubwimana Vedaste alias Gasenda yahawe cyo gufungwa imyaka cumi n’itanu n’ihazabu ya miliyoni zirindwi (7.000.000 Frw) kigumyeho.

## Page 4

[8] Urukiko Rukuru Urugereko rwa Musanze rwashingiye icyemezo cyarwo ku kuba Ndikubwimana Vedaste alias Gasenda atarabashije kuvuguruza ibyasobanuwe n’abatangabuhamya ndetse na raporo yakozwe ku wa 28/11/2021 n’ubuyobozi bw’umudugudu wa Kabyaza, kandi ikaba imushinja rusanga ingingo z’ubujurire za Ndikubwimana Vedaste nta shingiro zifite. [9] Ndikubwimana Vedaste alias Gasenda na none ntiyanyuzwe n’imikirizey’urwo rubanza, ajuririra mu Rukiko rw’Ubujurire, urubanza ruhabwa RPAA00140/2023/CA, ruburanishwa ku wa 04/11/2025, Ndikubwimana Vedaste alias Gasenda yunganiwe na Me Dukundane Anastase, Ubushinjacyaha buhagarariwe na Niyonkuru Francoise. [10] Mu myanzuro ya Ndikubwimana Vedaste alias Gasenda na Me Dukundane Anastase umwunganira bavuga ko basaba urukiko rw’ubujurire ko hazakorwa iperereza aho icyaha cyabereye kuko ntacyo we yakoze, cyane ko nta bimenyetso by’abahanga byigeze bishakwa ngo bigaragare ko bimuhuza n’icyaha. Na none kandi bavuga ko hari abatangabuhamya bagakwiye kuba barabajijwe nyamara ngo ntibabajijwe n’ubushinjacyaha kandi aribo bafite ukuri nyako. Basaba Urukiko rw’ubujurire ko rwazabiha agaciro kugira ngo ahabwe ubutabera buboneye. [11] Uburanira Ubushinjacyaha avuga ko Ubushinjacyaha busaba Urukikorw’Ubujurire kwakira ubujurire bwa Ndikubwimana Vedaste kuko bwakozwe mu buryo no mu nzira byemewe n’amategeko, no kwemeza ko nta shingiro bufite, rukemeza kandi ko urubanza yajuririye rudahindutse mu ngingo zarwo zose. [12] Urukiko rw’Ubujurire ruhereye kuri izi mpaka, rusanga ikibazo kigombagusuzumwa ari ukumenya niba Ndikubwimana Vedaste alias Gasenda yarahamijwe icyaha nta bimenyetso bidashidikanywaho bishingiweho. II. IKIBAZO KIGIZE URUBANZA N’ISESENGURA RYACYO Kumenya niba Ndikubwimana Vedaste alias Gasenda yarahamijwe icyaha nta bimenyetso bidashidikanywaho bishingiweho [13] Ndikubwimana Vedaste alias Gasenda n’umwunganira bavuga ko yahamijwe ibyaha kandi ntabyo yakoze, ndetse rwirengagiza ubusabe bwe bwo kujya kongera kubaza ahakorewe icyaha kugira ngo habazwe abatangabuhamya batabajijwe kuko aribo bagomba kugaragaza ukuri nyako hakaboneka ibimenyetso bifatika bitarimo gushidikanya. Basobanura ko ubwo yari yagiye gushaka ibyo kurya ku kabari, we n’abo bari kumwe barimo: Uwiringiyimana, Solange umudamu we, Nyiransabimana Mariane, Tumukunde, Nzamwitakuze Gaudence bumvise induru bose baragenda bajya kureba basanga Musabyimana Jeannette yatemwe avirirana, Ndikubwimana afata agatambaro atangira kumupfuka, ariko abandi bajenyuma bakererewe ngo nibo bamubonanye amaraso bituma bakeka ko ariwe wabikoze ariko bamubeshyera. Akaba asaba ko abo batangabuhamyababazwa kuko ibyo bavuze bitari muri dosiye, ibyo rero ngo bikaba bigaragaza ukubogama. [14] Bongeraho kandi ko na raporo y’inzego z’ibanze batayemera kuko yakozwe ku wa 22/11/2020, icyaha cyarakozwe ku wa 18/11/2020 kandi nta buyobozi bw’akagari bwayisinyeho, basaba ko iyi raporo itahabwa agaciro kuko bigaragara ko ifite inenge aho yanditswe n’abantu bari

## Page 5

aho, kandi mudugudu atayobora wenyine. Ikindi kandi iyo biba ari ukuri ko ari Ndikubwimana Vedaste alias Gasenda wakoze iki cyaha yitwaje intwaro, yari kuhafatirwa, ikindi iyaba yaracukuye inzu atari kuba ari aho, ahubwo yari kwiruka agahunga bakamufata arimo agenda, kandi nta bimenyetso by’abahanga byashatswe. [15] Bakomeza bavuga ko ibivugwa n’abaje nyuma ko bamusanzeho ibitaka babeshya ntabyabayeho. Ibyo bavuga bakaba babishingira ku ngingo ya 109 y’ Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha ivugako, Urukiko rubisabwe n’ubushinjacyaha cyangwa n’ababuranyi cyangwa se rubyibwirije, rushobora gutegeka gutanga ikimenyetso cyose rusanze ari cyo cyamara impaka kandi ko mw’iburanisha, urukiko rushobora kwishakira ibimenyetso bitagezweho n’ubushinjacyaha, urega ushinjwa cyangwa ababahagarariye. [16] Bashingira kandi ku murongo watanzwe mu rubanza RPAA00737/2021/CA rwaciwe n’Urukiko rw’Ubujurire ku wa 16 Gashyantare 2022, haburana Ubushinjacyaha v. Uwayisaba, urukiko rwafashemo umurongo uvugako Umucamanza agomba gusesengurana ubushishozi uruhurirane rw’ibimenyetso, agahamya ushinjwa icyaha mu gihe gusa asanga nta wundi mwanzuro wagerwaho n’isesengura yakoze uretse iryo gusanisha uwakoze icyaha n’icyaha cyakozwe. Bityo, bakavuga ko ibimenyetso bicukumbuye harimo no kujya aho icyaha cyabereye kubaza abatangabuhamya kugirango Ndikubwimana Vedaste ahabwe ubutabera. [17] Ndikubwimana Vedaste alias Gasenda n’umwunganira bongeraho kandi ko bashingira ku byavuzwe n’abahanga mu mategeko mpana byaha Henri-D.Bosly et Damien Vandermeersch mu gitabo cyabo “Droit de la Procédure Pénale” bahuriza ku ihame ry’uko umucamanza agomba gusuzumana ubushishozi uruhurirane rw’ibimenyetso, agahamya ushinjwa icyaha mu gihe gusa asanga nta wundi mwanzuro wagerwaho n’isesengura yakoze uretse iryo gusanisha uwakoze icyaha n’icyaha cyakozwe.1 Bityo, bakaba basanga ibyashingiweho atari ibimenyetso byashatswe mu buryo bucukumbuye, akaba arinayo mpamvu uregwa yatanze ikifuzo cy’uko hakorwa iperereza ryimbitserikabera ahavugwa ko hakorewe icyaha kugira ngo hamenyekane ukuri ariko icyifuzo cye nticyakirwa. [18] Basoza imiburanire yabo bashingira ku murogo watanzwe n’urukiko rw’ubujurire mu rubanza RPAA 00078/2021/CA wumvikanisha ko igihe hari ugushidikanya bigomba kurengera ushinjwa, babishingiraho bavuga ko kuba uregwa yarasabye ko hakorwa iperereza bakajya ahavugwa ko habereye icyaha ariko ntibikorwe ndetse n’ibimenyetso byatanzwe bikaba bitagaragaza imikorere y’icyaha k’uregwa, basanga urukiko rukwiye kubitesha agaciro, rukemeza ko ari umwere, akarenganurwa kuko nta cyaha yakoze.

1 Henri -D. Bosly et Damien Vandermeersch, Droit de la Procédure Pénale, 2è éd., La Charte, 2001, Bruxelles, Pp92-930. “Le juge ne peut déclarer un prévenu coupable que s’il a acquis l’intime conviction de sa culpabilité audelà de tout doute raisonnable sur la base d’éléments de preuve qui lui ont été régulièrement produits et soumis à la contradiction et qu’il apprécie souverainement. (...) Certes, la jurisprudence n’interdit pas au juge de tirer une preuve d’un ensemble d’éléments convergents, meme si ces éléments pris isolément ne fournissent pas une certitude suffisante. Mais encore faut-il s’assurer que ce résultat n’est atteint qu’au terme d’un raisonnement rigoureux basé sur la logique du raisonnable.En tout état de cause, le juge ne peut déclarer une personne coupable que s’il considère que la preuve de sa culpabilité a été rapportée au-delà de tout doute raisonnable.

## Page 6

[19] Uburanira Ubushinjacyaha avuga ko Ubushinjacyaha busanga ibyo Ndikubwimana Vedaste n’umwunganira bavuga nta shingiro bifite, kuko iperereza rihagije ryakozwe, abantu bahagije bakaba nabo barabajijwe, ndetse nabo yavuze bari bari kumwe mu kabari barabajijwe kandi byagarutsweho mu gika cya 9 cy’urubanza rujuririrwa aho Urukiko rwabisobanuye neza, bityo rero ngo nta mpamvu yo kujya aho icyaha cyabereye. [20] Ku bijyanye n’inyandiko bavuga ko zitari muri dosiye, Ubushinjacyaha buvuga ko busanga atari ukuri kuko zirimo, atanga urugero rw’inyandiko ya Nyiransabimana aho agaragaza ko irimo kandi ko yari yanarezwe, ariko baza gusanga uyu Ndikubwimana Vedaste ariwe ukekwa kuko bamusanganye ibitaka, akaba yarabisobanuye ku kibazo cya 4 abazwa muri RIB, akaba yarashubije ko yasohotse mu kabari 20h:30 akajya iwabo Ndikubwimana akamusigana n’abandi mu kabari, kandi ko atigeze asohokana nawe, ahubwo ngo yageze kwa Musabyimana atabaye asanga yatemwe ndetse Ndikubwimana afite amaraso n’ibitaka, gusa akaba ataramenye niba ariwe watemye Musabyimana. Ubushinjacyaha rero buvuga ko ibyo Ndikubwimana avuga ko bazanye batabaye kandi ko inyandikomvugo ye yabuze atari ukuri. [21] Uburanira Ubushinjacyaha asobanura kandi ko abo Ndikubwimana Vedaste n’umwunganira basaba urukiko ko bajya kubazwa, nta shingiro byahabwa kuko ababajijwe bose baje bavuga imvugo zimwe kuko bamusanganye amaraso n’ibitaka ku ngofero y’umupira yari yambaye,bisobanuye ko byamugiyeho acukura, kandi ntacyo agaragaza cyatuma bamubeshyera, bityo rero ngo Ndikubwimana akaba atabasha kuvuguruza imvugo z’abatangabuhamya na raporo y’ubuyobozi, bigaragara ko ariwe wakoze iki cyaha. [22] Uburanira Ubushinjacyaha avuga ko Ubushinjacyaha busanga izi mpamvu z’ubujurire ze zose nta shingiro zifite, uretse kuba Ndikubwimana ahakana icyaha gusa, ntatange ibimenyetso bivuguruza ibyo Urukiko rwashingiyeho rumuhamya icyaha, bityo rero akaba asanga nta gikwiye guhinduka ku mikirize y’uru rubanza nk’uko biteganywa mu ngingo ya 107 igika cya 3 y’Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha nk’uko ryahinduwe kugeza ubu. UKO URUKIKO RUBIBONA [23] Impaka muri uru rubanza zushingiye ku kumenya niba Ndikubwimana Vedaste alias Gasenda yarahamijwe icyaha nta bimenyetso bidashidikanywaho bishingiweho. [24] Mu gusesengura iki kibazo hashingiwe ku byemejwe ku bijyanye n’umuburanyi uvuga ko yahamijwe icyaha nta bimenyetso bihagije byatanzwe, nk’uko byatanzweho umurongo mu rubanza RPAA 00737/2021/CA rwaciwe n’Urukiko rw’Ubujurire ku wa 16/12/2022, haburana Ubushinjacyaha na Uwayisaba Habimana Antoine (igika cya 16-17), aho Urukiko rw’Ubujurire rwasobanuye ko kugira ngo Umucamanza afate icyemezo gihamya icyaha, agomba kuba afite ibimenyetso bihamya nta gushidikanya (preuves à conviction au-delà de tout doute raisonnable) ko ushinjwa ariwe wakoze icyaha, kandi ko Umucamanza agomba gusesengurana ubushishozi uruhurirane rw’ibimenyetso, agahamya ushinjwa icyaha mu gihe gusa asanga nta wundi mwanzuro wagerwaho n’isesengura yakoze uretse iryo gusanisha uwakoze icyaha n’icyaha cyakozwe.

## Page 7

[25] Dosiye igaragaza ibazawa rya Musabyimana Jeannette ubwo yabazwaga mu bugenzacyaha ku wa 28/11/2020, akaba yarasobanuye ko yari yaraye muri boutique ye bigeze saa saba zijoro abona urumuri mu nzu arebye abona Ndikubwimana Vedaste Alias Gasenda arimo guterura amakarito amubwira ko atamusiga ari muzima kugira ngo atazamurega, nibwo rero ngo Ndikubwimana Vedaste yazamuye umuhoro agiye kumutema mu mutwe Musabyimana Jeannette atega ibiganza arabitema ndetse avuza induru Ndikubwimana ahita asohoka aciye muri wa mwobo yacukuye. [26] Dosiye igaragaza kandi ibazwa rya Ndikubwimana Vedaste abazwa mu bugenzacyaha ku wa 23/12/2020, yahakanye icyaha aregwa asobanura ko yari mu kabari ka Uwiringiyimana bumva induru basohoka bajya gutabara bari kumwe na nyirakabari, Tumukunde na Nzamwitakuze, Nyiransabimana na Solange bahageze basanga boutique yatobowe Musabyimana avirirana amaraso mu biganza, ahita afata agatambaro aramupfuka, akaba ahakana ko atigeze amwiba ngo anamuteme. [27] Dosiye igaragaza ko abatangabuhamya babajijwe mu bugenzacyaha ku wa 04/12/2020 aribo Nkiranuye Silas, Nyiransabimana Mariane, Nsanzumuremyi Theobald na Murengezi Ephrem bose bahurije ku kuba barasobanuye ko muri iryo joro bumvise umuntu arimo gutabaza bajyayo bahageze basanga Musabyimana Jeanette yatemwe ku biganza byombi banasanga Ndikubwimana Vedaste alias Gasenda bamufashe yuzuyeho ibitaka ku myenda anafite amaraso mu biganza, bamubaza ukuntu ari ahongaho muri iryo joro abasubiza ko yumvise induru aza gutabara, ariko ko atabashije gusobanura kandi iwabo ari kure. [28] Dosiye igaragaza na none raporo ya muganga iragaragaza ko Musabyimana Jeannette yari afite ibikomere ku kiganza cy'ibumoso n'icy'iburyo hakaba na raporo y'ubuyobozi bw'inzego z'ibanze nayo ivuga ko Musabyimana Jeannette yatewe mu ijoro rya taliki ya 28/11/2020 bamutoborera inzu acururizamo, abaturage bamutabara bakahasanga Ndikubwimana Vedaste alias Gasenda bakamusangana amaraso mu biganza, n'itaka rimwuzuye ku myenda.Urukiko rurasanga kuba Ndikubwimana Vedaste alias Gasenda n’umwunganira bavuga ko Urukiko Rukuru rwashingiye ku bimenyetso bidahagije kandi bishidikanywaho mu kumuhamya icyaha, bagasaba ko yagirwa umwere, nta shingiro bifite kubera ko nk’uko bimaze kugaragazwa haruguru, ibimenyetso byose byagaragajwe birimo imvugo z’abatangabuhamya, imvugo z’urega, raporo y’inzego z’ibanze na raporo ya muganga, uregwa n’umwunganira ntabwo bagaragaza icyashingirwaho mu kwemeza ko ibyo bimenyetso byose bitashoboraga kugaragaza ukuri, uretse gusa kuba bavuga ko hari ababajijwe ariko inyandiko zabo ntizishyirwe muri dosiye ariko ibyo bikaba nta bimenyetso byabitangiwe byatuma Urukiko rwemeza ko hari umutangabuhamya wagaragaje ibishobora kuvuguruza ibyo abandi batangabuhamya babajijwe bavuze. [29] Urukiko ahubwo rurasanga abatangabuhamya babajijwe aribo Nkiranuye Silas, Nyiransabimana Mariane, Nsanzumuremyi Theobald na Murengezi Ephrem bahuriza ku kuba barumvise umuntu arimo gutabaza bakajyayo bahagera bagasanga Musabyimana Jeannette yatemwe ku biganza byombi banahasanga Ndikubwimana Vedatse bamufashe basanga yuzuyeho ibitaka ku myenda anafite amaraso mu biganza, bamubaza ukuntu ari ahongaho muri iryo joro abasubiza ko yumvise induru aza gutabara, abari aho nonone bamubaza ukuntu yumvise induru kuko bari bazi ko iwabo ari kure maze ngo ntiyagira icyo asubiza.

## Page 8

[30] Kuba Ndikubwimana avuga ko amaraso yari afite ku biganza yemera ko ari aya Musabyimana ariko akavuga ko ngo yamugiyeho ubwo yari aje gutabarana n’abandi agatangira kumupfuka, Urukiko rurasanga ntacyo rwaheraho mu kwemeza ko Ndikubwimana koko yakoze icyo gikorwa cyo gupfuka Musabyimana akaba aribyo byatumye amaraso ya Musabyimana amujyaho, mu gihe abantu nawe yemeza ko bari kumwe batabaye nta n’umwe uvuga ko yabibonye cyangwa ngo abe yarabyumvise,ibyo bikiyongeraho ko na Musabyimana atabyemeza ahubwo akavuga ko ari Ndikubwimana wamutemye ubwo yari aje kumwiba ibikoresho byari muri boutique ye kandi akaba yemeza ko asanzwe amuzi atashoboraga kumwibeshyaho. [31] Uru Rukiko kandi rurasanga ibivugwa na Ndikubwimana Vedaste alias Gasenda n’umwunganira, ko raporo y’inzego z’ibanze itagomba gushingirwaho kubera ko itemejwe n’ubuyobozi bw’akagari, bityo ikaba igomba guteshwa agaciro, nabyo nta shingiro byahabwa kubera ko nk’uko bigaragara muri dosiye iyi raporo yanditswe ku wa 28/11/2020, bikaba bigaragara ko yashyizweho umukono na kashe by’Akagari ka Mbatabata, ibivugwa n’uregwa n’umwunganira rero bikaba atari ukuri, iyi raporo ikabaigomba kugumana agaciro kayo kuko yaje ishimangira ibyabaye byanasobanuwe n’abari bahari batabaye. [32] Ku bijyanye n’iperereza risabwa n’umuburanyi mu kubisuzuma hashingirwa ku byemejwe n’Urukiko rw’Ikirenga rwatanze umurongo mu rubanza RPAA 010/09/CS, rwaciwe ku wa 09/03/2012 haburana Ubushinjacyaha na Nzajyibwami Emmanuel (igika cya 9), aho rwasobanuye ko Urukiko rudategetswe gukora iperereza cyangwa se kubaza abatangabuhamya igihe cyose bisabwe n’umuburanyi iyo rwumva ibimenyetso rwashyikirijwe bihagije kandi n’ababuranyi bahawe umwanya wo kubyisobanuraho. [33] Urukiko rurasanga kuba Ndikubwimana Vedaste alias Gasenda n’umwunganira bavuga ko urukiko rwabaza abandi batangabuhamya barimo Uwiringiyimana, Solange, Nyiransabimana Mariane, Tumukunde,Nzamwitakuze Gaudence kandi bakaba banavuga ko abo batangabuhamya babajijwe ariko ngo ibyo bavuze bikaba bitari muri dosiye,bagasaba Urukiko kujya kongera kubaza, nta shingiro byahabwa kuko bigaragara ko habajijwe abatangabuhamya batandukanye bose bagahuriza ku mvugo imwe bamushinja kuba yaraje afite amaraso mu ntoki n’ibitaka ku myenda yari yambaye kandi ntakigaragaza ko babarijwe hamwe, bityo uru Rukiko rukaba rusanga atari ngombwa kongera kujya kubaza abanda batangabuhamya cyangwa gukora irindi perereza. [34] Hashingiwe ku bimaze gusobanurwa byose rero, uru Rukiko rurasanga nta gushidikanya ko Ndikubwimana Vedaste alias Gasenda ariwe wakoze ibi byaha aregwa, bityo akaba nta makosa yakozwe n’Urukiko Rukuru mu kubimuhamya, n’ubujurire bwe bukaba nta shingoro bufite, hakaba hagomba kumugamo imikirize y’urubanza RPA 00931/2021/HC/MUS rwaciwe ku wa 16/02/2023, Urukiko Rukuru Urugereko rwa Musanze. III. ICYEMEZO CY’URUKIKO [35] Rwemeje ko ubujurire bwatanzwe na Ndikubwimana Vedaste alias Gasenda nta shingiro bufite; [36] Rwemeje ko imikirize y’urubanza RPA 00931/2021/HC/MUS rwaciwe ku wa 16/02/2023, Urukiko Rukuru Urugereko rwa Musanze, idahindutse;

## Page 9

[37] Rutegetse ko Ndikubwimana Vedaste alias Gasenda akomezaguhanishwa igifungo cy’imyaka cumi n’itanu (15) n’ihazabu y’amafaranga y’u Rwanda angana na miliyoni zirindwi (7.000.000 Frw).