NEW FORESTS RWANDA Ltd vs NIYO PLUS COMPANY Ltd

# NEW FORESTS RWANDA Ltd vs NIYO PLUS COMPANY Ltd

- Source: Amategeko - Section: Decisions (Judgements) - Date: 2022-01-18 - Case/document no.: RCOMAA00040/2021/CA - Collection: Court of Appeal

## Text

## Page 1

NEW FORESTS RWANDA Ltd vs NIYO PLUS COMPANY Ltd [Rwanda URUKIKO RW’UBUJURIRE – RCOMAA00040/2021/CA (Kamere, P.J.,) 18 Mutarama 2022] Amategeko agenga imiburanishirize y’imanza z’ubucuruzi – amasezerano y’ubwumvikane – Gusoza urubanza – Urukiko rwemeza ko amasezerano y’ubwumvikane asoje urubanza iyo abayakoranye biyemereye mbere y’urukiko gukemura impaka mu bwumvikane, n’iyo kandi aba akemuye ibibazo byose bari bafitanye – Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 9. Incamake y’ikibazo : Sosiyete Niyo Plus Company Ltd ivuga ko yagiranye na sosiyete New Forests Rwanda Ltd amasezerano y’ubwubatsi atandukanye, ariko ko nyuma yaho hageze ko iyishyura, ntiyahabwa igihembo cyuzuye nkuko bumvikanye mu masezerano kandi ivuga ko ku ruhande rwe yarubahirije inshingano, bigaragazwa n’icyemezo cy'iyakira ry'imirimo cyemeza ko yakozwe neza. Ivuga ko ibyo byatumye iyirega mu Rukiko rw’Ubucuruzi, irusaba kuyitegeka kuyishyura umwenda usigaye iyifitiye ushingiye ku masezerano y’ubwubatsi bakoranye. Urukiko rw’Ubucuruzi rwakijije urwo rubanza maze rwemeza ko ikirego cyatanzwe na Niyo Plus Company Ltd gifite ishingiro, maze rutegeka uwo baburana kuyishyura umwenda ungana na 90.092.925Frw akubiyemo umwenda remezo, indishyi, igihembo cy’inzobere hamwe n’igarama. New Forest Rwanda Ltd ntiyishimiye iyo mikirize y’urubanza, maze irujuririra mu Rukiko Rukuru rw’Ubucuruzi, irusaba gusuzuma niba Urukiko rubanza rutarakoze amakosa yo kwemerera Niyo Plus Company Ltd guhindura ikirego kandi yo itarabyemeye, kumenya niba hari factures zayo yashyikirijwe ntizishyure, isaba n’indishyi zitandukanye. Niyo Plus Company Ltd yatanze ubujurire bwuririye ku bundi isaba indishyi zitandukanye. Urukiko Rukuru rw’Ubucuruzi rwakijije urubanza, maze rwemeza ko ubujurire bwatanzwe na New Forests Rwanda (NFR) Ltd bufite ishingiro kuri bimwe, rwemeza kandi ko ikirego cy’inyongera cyatanzwe na Niyo Plus Company (NPC) Ltd kidakwiye kwakirwa ngo gisuzumwe muri urwo rubanza, New Forest Rwanda Ltd ntiyishimiye imikirize y’urubanza rwajuririwe, irujuririra mu Rukiko rw’Ubujurire. Mu iburanisha, Abavoka bari bahagarariye ababuranyi bombi bamenyesheje Urukiko ko bamaze kumvikana, barusobanurira ibikubiye mu masezerano y’ubwumvikane, maze basaba Urukiko ko ubwo bwumvikane bwasoza urubanza bari bafitanye muri uru Rukiko kandi ko ibyumvikanyweho byanamaze gushyirwa mu bikorwa. Incamake y’icyemezo : Urukiko rwemeza ko amasezerano y’ubwumvikane asoje urubanza iyo abayakoranye biyemereye mbere y’urukiko gukemura impaka mu bwumvikane, n’iyo kandi aba akemuye ibibazo byose bari bafitanye

## Page 2

Amasezerano y’ubwumvikanye asoje urubanza RCOMAA00040/2021/CA ku bibazo byaruburanwagamo byose; Amategeko yashingiweho: Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 9. Itegeko rigenga amasezerano Nta manza zifashishijwe. Urubanza I. IMITERERE Y’URUBANZA [1] Niyo PluS Company Ltd ivuga ko yagiranye na New Forests Rwanda Ltd amasezerano y’ubwubatsi atandukanye, hanyuma ikayikorera imirimo y’ubwubatsi ifite agaciro kangana na 429.638.213Frw, ariko ikayishyura amafaranga angana na 375.919.364Frw gusa hagasigara umwenda ungana na 53.718.849Frw kandi yarubahirije inshingano zayo nk’uko bigaragazwa n’icyemezo cy'iyakira ry'imirimo cyemeza ko yakozwe neza New Forests Rwanda Ltd yayihaye ku wa 21/09/2018. Ibyo byatumye Niyo Plus Company Ltd irega New Forests Rwanda Ltd mu Rukiko rw’Ubucuruzi, ikirego cyayo cyandikwa kuri RCOM000622/2019/TC, isaba Urukiko kuyitegeka kubahiriza amasezerano y'ubwubatsi impande zombi zagiranye ikishyura umwenda ungana na 53.718.849Frw iyifitiye. [2] Ku wa 26/11/2019 Urukiko rw’Ubucuruzi rwakijije urwo rubanza maze rwemeza ko ikirego cyatanzwe na Niyo Plus Company Ltd gifite ishingiro, rutegeka New Forest Rwanda Ltd kwishyura Niyo Plus Company Ltd umwenda ungana na 90.092.925Frw akubiyemo umwenda remezo, indishyi, igihembo cy’inzobere n’igarama. [3] New Forest Rwanda Ltd ntiyishimiye iyo mikirize y’urubanza, maze irujuririra mu Rukiko Rukuru rw’Ubucuruzi, ubujurire bwayo bwandikwa kuri RCOMA01058/2019/HCC, irusaba gusuzuma niba Urukiko rubanza rutarakoze amakosa yo kwemerera Niyo Plus Company Ltd guhindura ikirego kandi yo itarabyemeye, kumenya niba hari factures Niyo Plus Company Ltd yashyikirije New Forest Rwanda Ltd ntizishyure, isaba n’indishyi zitandukanye. [4] Niyo Plus Company Ltd yatanze ubujurire bwuririye ku bundi isaba indishyi zitandukanye. [5] Ku wa 07/05/2021 Urukiko Rukuru rw’Ubucuruzi rwakijije urwo rubanza maze rwemeza ko ubujurire bwatanzwe na New Forests Rwanda (NFR) Ltd bufite ishingiro kuri bimwe, ko ikirego cy’inyongera cyatanzwe na Niyo Plus Company (NPC) Ltd kidakwiye kwakirwa ngo gisuzumwe muri urwo rubanza, rutegeka ko umwenda New Forests Rwanda Ltd igomba kwishyura Niyo Plus Company Ltd ungana na 53.718.849Frw, rwemeza ko imikirize y’urubanza RCOM00622/2019/TC rwaciwe n’Urukiko rw’Ubucuruzi ku wa 26/11/2019 ihindutse kuri bimwe kandi rutegeka ko amagarama y’urubanza aherera ku Isanduku ya Leta.

## Page 3

[6] New Forest Rwanda Ltd ntiyishimiye imikirize y’urubanza RCOMA001058/2019/HC rwaciwe n’Urukiko Rukuru rw’Ubucuruzi ku wa 07/05/2021, maze ku wa 05/06/2021 irujuririra mu Rukiko rw’Ubujurire, ubujurire bwayo buhabwa RCOMAA00040/2021/CA. [7] Iburanisha mu ruhame ry’urubanza ryashyizwe ku wa 03/12/2020, New Forests Rwanda Ltd (Ultimate Forests Company Ltd) ihagarariwe na Me Abijuru Emmanuel na Me Umurerwa Jeanne Marie Christine naho Niyo Plus Company Ltd ihagarariwe n’Umuyobozi wayo Niyomwungeri Pierre yunganiwe na Me Mugemanyi Védaste, Urukiko rwemeza ko ku wa 08/12/2021 ruzabanza gukora iperereza ku kiburanwa giherereya i Nyanza mu Ntara y’Amajyepfo, kugira ngo Urukiko rurebe imirimo yahakozwe ishingiye ku masezerano impande zombi zagiranye kandi uwo munsi iperereza rikaba ryarakozwe ababuranyi bombi bahari. Urukiko rwemeza ko iburanisha rizakomeza ku wa 17/12/2021. [8] Ku wa 17/12/2021 Urukiko ruhamagaje ababuranyi, rusanga New Forests Rwanda Ltd (Ultimate Forests Company Ltd) ihagarariwe na Rindiro Jean Chrysostome Umuyobozi Mukuru wayo yunganiwe na Me Abijuru Emmanuel afatanyije na Me Umurerwa Jeanne Marie Christine, naho Niyo Plus Company Ltd (NPC Ltd) ihagarariwe n’Umuyobozi wayo Niyomwungeri Pierre yunganiwe na Me Mugemanyi Védaste, nabwo urubanza rurasubikwa, rushyirwa ku wa 18/01/2022, kugira ngo ababuranyi bagerageze gukemura ikibazo bafitanye mu nzira y’ubwumvikane. [9] Mu iburanisha mu ruhame ryabaye ku wa 18/01/2022, Abavoka bahagarariye ababuranyi bombi, bamenyesheje Urukiko ko bamaze kumvikana, barusobanurira ibikubiye mu masezerano y’ubwumvikane yo ku wa 17/12/2021, maze basaba Urukiko ko ubwo bwumvikane bwasoza urubanza bari bafitanye muri uru Rukiko kandi ko ibyumvikanyweho byanamaze gushyirwa mu bikorwa ku wa 07/01/2022. II. IKIBAZO KIGIZE URU RUBANZA N’ISESENGURA RYACYO Kumenya agaciro k’amasezerano y’ubwumvikane bwabaye hagati ya Ultimate Forests Company Ltd na Niyo Plus Company Ltd [10] Ingingo ya 9, igika cya gatatu, y’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, iteganya ibikurikira : "Umucamanza ashobora gushishikariza ababuranyi gukoresha ubwunzi iyo abona ko ari bwo buryo buboneye mu kurangiza impaka. Ashobora kubunga ubwe cyangwa akabohereza mu bwunzi, agasubika urubanza mu gihe ubwunzi burimo gukorwa". [11] Ingingo ya 64 y’Itegeko Nº 45/2011 ryo ku wa 25/11/2011 rigenga amasezerano, iteganya ibikurikira: “Amasezerano akozwe ku buryo bukurikije amategeko aba itegeko ku bayagiranye”. [12] Nk’uko byasobanuwe haruguru, ababuranyi bemereye Urukiko ko bakemura impaka mu bwumvikane, Urukiko rusubika urubanza mu gihe bwarimo bukorwa, nk’uko biteganywa n’ingingo ya 9, igika cya 3, y’Itegeko Nº 22/2018 ryo ku wa 29/04/2018 yibukijwe haruguru.

## Page 4

[13] Mu iburanisha mu ruhame ribaye ku wa 18/01/2022, Abavoka bahagarariye ababuranyi, bamenyesheje Urukiko ko bamaze kumvikana, barusobanurira ibikubiye mu masezerano y’ubwumvikane yo ku wa 17/12/2021, bavuga ko banishyuranye ku wa 07/01/2022, maze basaba Urukiko ko ubwo bwumvikane bwasoza urubanza bari bafitanye muri uru Rukiko; [14] Ku byerekeye amasezerano y’ubwumvikane yo ku wa 17/12/2021 yemejwe n’impande zombi imbere y’uru Rukiko kuri uwo munsi, Urukiko rurasanga yarakemuye ibibazo byose ababuranyi bari bafitanye akaba rero agomba gusoza urubanza RCOMAA00040/2021/CA nk’uko impande zombi zabisezeranye hashingiwe ku biteganywa n’ingingo ya 64 y’Itegeko Nº 45/2011 ryo ku wa 25/11/2011 rigenga amasezerano yibukijwe haruguru. III. ICYEMEZO CY’URUKIKO [15] Rwemeje ko amasezerano y’ubwumvikane yo ku wa 17/12/2021 hagati ya Ultimate Forests Company Ltd (yahoze ari New Forests Rwanda Ltd) na Niyo Plus Company Ltd (NPC Ltd) asoje urubanza RCOMAA00040/2021/CA ku bibazo byaruburanwagamo byose; [16] Ruvuze ko amagarama y’uru rubanza yatanzwe na New Forests Rwanda Ltd ubu isigaye yitwa Ultimate Forests Company Ltd (UFCL) ahwanye n’ibyarukozwemo.