UBUSHINJACYAHA v. NIRINGIYIMANA

# UBUSHINJACYAHA v. NIRINGIYIMANA

- Source: Amategeko - Section: Decisions (Judgements) - Date: 2025-07-18 - Case/document no.: RPAA00889/2024/CA - Collection: Court of Appeal

## Text

## Page 1

UBUSHINJACYAHA v. NIRINGIYIMANA [Rwanda URUKIKO RW’UBUJURIRE – RPAA00889/2024/CA (Kaliwabo, P.J.) 18 Nyakanga 2025] Amategeko agenga ibimenyetso – Imanza nshinjacyaha – Ukwemera icyaha – Agaciro ko kwemera icyaha – Ushinjwa wemeye icyaha mu Bugenzacyaha cyangwa mu Bushinjacyaha kandi atagaragaza ko yacyemejwe ku gahato, imvugo ye ntishobora kuvanwaho no kuba ageze mu Rukiko agahindura imvugo ku bushake bwe. Incamake y’ikibazo: Niringiyimana yafatanwe ibiyobyabwenge byo mu bwoko bw'urumogi rungana n'udupfunyika 46, aregwa mu Rukiko Rwisumbuye rwa Ngoma Ubushinjacyaha bumukuirkiranyeho icyaha cyo gucuruza ibiyobyabwenge, busaba Urukiko ko yahamwa n’icyaha agahanishwa igifungo cya burundu n’ihazabu ya 30.000.000Frw. Niringiyimana yaburanye ahakana icyaha ashinjwa avuga ko urumogi yafatanwe rwari urwe rwo kunywa. Urukiko Rwisumbuye rwa Ngoma, rushingiye ku bimenyetso bitandukanye birimo imvugo y’Uregwa yo kwemera icyaha ubwo yabazwaga mu Bugenzacyaha no mu |Bushinjacyaha, hamwe n’imvugo z’abatangabuhamya, rwemeje ko Uregwa ahamwa n’icyaha cyo kugurisha ibiyobyabwenge, rumuhanisha igifungo cya burundu n’ihazabu ya 20.000.000Frw. Uregwa yajuririye bwa mbere mu Rukiko Rukuru, urugereko rwa Rwamagana, anenga Urukiko Rwisumbuye ko rwamuhamije icyaha cyo gucuruza ibiyobyabwenge, rwirengagije imiburanire igaragaza ko urumogi yafatanwe ari urwe rwo kunywa. Yasabye ko inyito y’icyaha ashinjwa ihinduka, agahanirwa icyaha cyo gufatanwa no kunywa ibiyobyabwenge. Ubushinjacyaha bwasubije buvuga ko, ubwo bujurire nta shingiro bifite, kuko kuba Uregwa yaremeye icyaha imbere y’Ubugenzacyaha n’imbere y’Ubushinjacyaha, akabihakana imbere y’Urukiko ntacyo byamumarira. Ubushinjacyaha bwamusabiye kuba yagabanyirizwa ibihano agahabwa ibihuje n’uburemere bw’icyaha yakoze bityo agahanishwa igifungo cy’imyaka 15 n’ihazabu ya 5.000.000Frw. Urukiko Rukuru rwaciye urubanza rwemeza ko Uregwa ahamwa n’icyaha cyo gucuruza ibiyobyabwenge byo mu bwoko bw’urumogi, kuko atabashije kuvuguruza ibimenyetso byashingiweho ahamwa n’icyaha, birimo n’imvugo ye yemera icyaha yakoreye imbere y’Ubugenzacyaha n’imbere y’Ubushinjacyaha. Urukiko Rukuru rwasanze ari ubwa mbere yari akurikianweho icyo cyaha kandi yarafatanwe ingano ntoya y’urumogi rumugabanyiriza ibihano, rumuhanisha igifungo cy’imyaka icumi n’itanu (15) n’ihazabu ya 5.000.000Frw. Uregwa yajuririye bwa kabiri muri uru Rukiko rw’Ubujurire agamije gusaba guhindurirwa inyito y’icyaha, agahanirwa icyaha cyo kunywa ibiyobyabwenge kuko aricyo yemera. Asobanura ko ubwo yafatwaga nta muguzi wabyo bamusanganye cyangwa amafaranga y’ikiguzi cyabyo, ko yaguze udupfunyika 46 tw’urumogi agamije kujya yinywera gahoro gahoro kuko hari muri covid -19 nta wemerewe kuva mu gace kamwe ajya mu kandi. Izo nizo mpamvu yashingiyeho asaba ko yahanirwa icyaha cyo gufatanwa no kunywa ibiyobyabwenge, dore ko yahamijwe icyaha cyo kubicuruza nta bimenyetso simusiga byashingiweho. Muri ubu bujurire, Ubushinjacyaha buvuga ko nta nenge iri mu bimenyetso byashingiweho mu guhanisha Uregwa icyaha cyo gucuruza ibiyobyabwenge kuko na we ubwe ari imbere y’Ubugenzacyaha n’Ubushinjacyaha yemeye ko aricyo cyaha yakoze, bigahura n’imvugo z’abatangabuhamya bamufatanye udupfunyika 46 tw’urumogi.

## Page 2

Incamake y’icyemezo: Ushinjwa wemeye icyaha mu Bugenzacyaha cyangwa mu Bushinjacyaha kandi atagaragaza ko yacyemejwe ku gahato, imvugo ye ntishobora kuvanwaho no kuba ageze mu Rukiko agahindura imvugo ku bushake bwe. Ubujurire nta shingiro bufite. Amategeko yashingiweho: Itegeko N° 062/2024 ryo ku wa 20/06/2024 rigenga ibimenyetso, ingingo ya 85. Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ingingo ya 2. Itegeko N° 69/2019 ryo kuwa 08/11/2019 rihindura Itegeko N° 68/2018 riteganya ibyaha n’ibihano muri rusange, ingingo ya 11. Itegeko No 68/2018 ryo kuwa 30/08/2018 riteganya ibyaha n’ibihano muri rusange, ingingo ya 49. Imanza zifashishijwe: RPA0010/06/CS-RPA0011/06/CS-RPA0012/06/CS, Ubushinjacyaha v. Sgt Ntaganira na Bagenzi be rwaciwe n’Urukiko rw’Ikirenga ku wa 18/07/2008. RPAA00048/2024/CA, Ubushinjacyaha na Ngamije, rwaciwe n’Urukiko rw’Ubujurire ku wa 25/04/2025. Urubanza I. IMITERERE Y’URUBANZA [1] Ku wa 08/04/2021 Niringiyimana alias Bishyimbo ari Mudugudu wa Kabarondo, mu Kagari ka Cyaba, mu Murenge wa Kabarondo, mu Karere ka Kayonza, yafatanwe ibiyobyabwenge byo mu bwoko bw'urumogi rungana n'udupfunyika 46. Nyuma y’iperereza, Ubushinjacyaha bwamuregeye Urukiko Rwisumbuye rwa Ngoma bumukurikiranyeho icyaha cyo gucuruza ibiyobyabwenge, bushingiye ku mvugo ushinjwa yagiriye imbare y’Ubugenzacyaha n’imbere y’Ubushinjacyaha, bushingiye no ku mvugo z’abatangabuhamya bamushinja, busaba ko yahanishwa gufungwa burundu no gutanga ihazabu y’amafaranga 30.000.000. Ushinjwa yaburanye ahakana icyaha cyo gucuruza ibiyobyabwenge, avuga ko ibyo yafatanwe ari ibye byo kunywa. [2] Mu rubanza RP00498/2021/TGI/NGOMA rwaciwe kuwa 18/05/2021, Urukiko Rwisumbuye rwa Ngoma, rushingiye ku mvugo yemera icyaha Niringiyimana yavugiye imbere y’ubugenzacyaha n’ubushinjacyaha, rushingiye ku mvugo z’abatangabuhamya bamushinja no ku nyandiko-mvugo y’ifatira yashyizeho umukono yemeza ko urumogi afatanwe ari urwe, rwemeje ko ahamwa n’icyaha cyo gucuruza ibiyobyabwenge byo mu bwoko bw’urumogi, rumuhanisha igifungo cya burundu n’ihazabu ya 20.000.000Frw. [3] Niringiyimana yajuririye Urukiko Rukuru, Urugereko rwa Rwamagana anenga ko Urukiko Rwisumbuye rwamuhamije icyaha cyo gucuruza ibiyobyabwenge by’urumogi rwirengagije imiburanire ye aho yarugaragarije ko urwo yafatanwe yari agamije kurunywa, asaba Urukiko kumuhindurira inyito y’icyaha agahanirwa gufatanwa no kunywa urumogi mu kigwi cyo kurucuruza. [4] Ubushinjacyaha bwasubije buvuga ko Ubujurire bwa Niringiyimana nta shingiro bufite kuko yafatanywe urumogi rwo gucuruza (46 boules) kandi ko yabyemereye imbere y’Ubugenzacyaha n’Ubushinjacyaha bityo kubihakana mu Rukiko bikaba ntacyo byamumarira. Bwasabye ko yagabanyirizwa ibihano agahabwa ibihuje n’uburemere bw’icyaha yakoze bityo agahanishwa igifungo cy’imyaka 15 n’ihazabu ya 5.000.000Frw.

## Page 3

[5] Mu rubanza RPA00694/2021/HC/RWG rwaciwe kuwa 25/7/2024, Urukiko Rukuru, Urugereko rwa Rwamagana rwasanze ubujurire bwa Niringiyimana nta shingiro bufite kuko adashobora kuvuguruza ibimenyetso byashingiweho ahamwa n’icyaha birimo n’imvugo ye yemera icyaha yakoreye imbere y’Ubugenzacyaha n’imbere y’Ubushinjacyaha, ko ariko kuba ari ubwa mbere akurikiranyweho icyaha, ndetse n’ingano y’urumogi yafatanywe ikaba itari nini ( 46 boules ), ibyo byamubera impamvu nyoroshyacyaha zashingirwaho maze akagabanyirizwa ibihano nk’uko bitaganywa n’ingingo ya 49 y’Itegeko No 68/2018 ryo kuwa 30/08/2018 riteganya ibyaha n’ibihano muri rusange, rumuhanisha igifungo cy’imyaka icumi n’itanu (15) n’ihazabu ya 5.000.000Frw. [6] Niringiyimana yajuririye Urukiko rw’Ubujurire kuri RPAA00889/2024/CA, ruburanishwa mu ruhame kuwa 10/7/2025 yunganiwe na Me Mulefu Alphonse naho Ubushinjacyaha buhagarariwe na Butera Oscar, Umushinjacyaha ku rwego rw’Igihugu. [7] Niringiyimana yajuriye agamije guhindurirwa inyito y’icyaha kugira ngo ahanirwe icyaha cyo gufatanwa no kunywa ibiyobyabwenge kuko aricyo yemera; naho Me Mulefu Alphonse avuga ko uwo yunganira yahamijwe icyaha cyo gucuruza ibiyobyabwenge nta bimenyetso bishingiweho, ko imvugo yakoreye mu nzego z’ikurikiranacyaha irimo kwivuguruza ku buryo itihagije nk’ikimenyetso kimushinja. [8] Ubushinjacyaha bwasubije buvuga ko nta nenge iri mu bimenyetso byashingiweho mu guhanira Niringiyimana icyaha cyo kugurisha ibiyobyabwenge, ko Urukiko rwasanze imvugo z’abatangabuhamya zihuza n’ukuri kw’ibyabaye bityo akaba agomba kugumishwa ku bihano yahawe. [9] Urukiko ruhereye kuri izo mpaka, rurasuzuma niba Urukiko rwakoze ikosa ryo kumuhanira icyaha cyo gucuruza ibiyobyabwenge nta bimenyetso bihagije bikimushinja no kumenya niba yahanirwa icyaha cyo gufatanwa no kunywa ibiyobyabwenge. II. ISESENGURA RY’IKIBAZO KIGIZE URUBANZA Kumenya niba Urukiko rwarakoze ikosa ryo guhanira Niringiyimana alias Bishyimbo icyaha cyo gucuruza ibiyobyabwenge mu mwanya w’icyaha cyo kubinywa [10] Niringiyimana yasobanuye ubujurire bwe avuga ko yahamijwe icyaha cyo gucuruza ibiyobyabwenge nyamara ibyo yafatanwe byari ibye byo kunywa, ko nta muguzi wabyo bamusanganye cyangwa amafaranga y’ikiguzi cyabyo, ko yaguze udupfunyika 46 tw’urumogi agamije kujya yinywera gahoro gahoro kuko hari muri covid -19 nta wemerewe kuva mu gace ajya mu kandi; asaba guhanirwa icyaha yemera cyo gufatanwa ibiyobyabwenge no kubinywa mu kigwi cyo kubicuruza yahamijwe nta bimenyetso simusiga byashingiweho. [11] Me Mulefu Alphonse umwunganira avuga ko kuva Niringiyimana yafatwa yasobanuye ko urumogi yafatanwe ari urwo kunywa, ko nta gikorwa Ubushinjacyaha bwagaragaje cy’uko uyu yari agambiriye kugurisha ibiyobyabwnege yafatanwe. Me Mulefu avuga ko Urukiko rwakoze ikosa ryo gufata bimwe mu bigize imvugo ya Niringiyimana mu Bushinjacyaha, ibyo bikaba binyuranye n’ingingo ya 85 y’Itegeko ryerekeye ibimenyetso, ko ushinjwa yivuguruje mu ibazwa rye, bityo Ubushinjacyaha bukaba bwaragombaga gushaka ibindi bimenyetso bishinja. Akomeza avuga ko imvugo z’abatangabuhamya Bihoyiki na Ntmunoza nta shingiro zagombye guhabwa kuko bagiye gufata Niringiyimana bamukekaho ubujura, ko ibijyanye n’urumogi babibwiwe n’ushinjwa ubwe nyamara bigaragara ko nawe ubwe yivuguruza ku mikoreshereze yabyo. [12] Me Mulefu yakomeje avuga ko ingano y’ibiyobyabwenge Niringiyimana yafatanwe (udupfunyika 46) itagomba kumvikana ko ari nini kuko urumogi rudapfunyikwa ku buryo bumwe.

## Page 4

Asoza asaba ko Niringiyimana yahindurirwa inyito y’icyaha agahanirwa gufatanwa no kunywa ibiyobyabwenge kuko aribyo bifitiwe ibimenyetso. [13] Ubushinjacyaha bwasubije buvuga ko nta nenge iri mu bimenyetso byashingiweho mu guhanira Niringiyimana icyaha cyo kugurisha ibiyobyabwenge, kuko ushinjwa yabyemeye mu Bugenzacyaha no mu Bushinjacyaha, ko nta kwivuguruza yagize kandi ibyo yemeye bikaba ari nabyo yashinjwe n’abatangabuhamya bamufatanye udupfunyika 46 tw’urumogi. UKO URUKIKO RUBIBONA [14] Urukiko rw’Ikirenga, mu rubanza RPA0010/06/CS rwaciwe n’Urukiko rw’Ikirenga ku wa 18/07/2008, rwatanze umurongo ko imvugo yemera icyaha ushinjwa yakoreye mu nzego zikurikirana icyaha idashobora guteshwa agaciro no kuba yisubiyeho mu Rukiko, mu gihe cyose umucamanza asanga ibyo yemeye bihuje n’ukuri kw’ibyabaye. [15] Ingingo ya 85 y’Itegeko N° 062/2024 ryo ku wa 20/06/2024 rigenga ibimenyetso igibwaho impaka, iteganya ko: 1) Ukwiyemerera k’umuburanyi cyangwa k’umwe mu bafitanye ikibazo gukorewe imbere y’urwego rufite ububasha bigira agaciro iyo hari imwe mu mpamvu zikurikira: a) uregwa asobanukiwe neza imiterere n’ingaruka byo kwemera ibyo aregwa; b) ukwemera kwakozwe ku bushake bw’uregwa; c) ukwemera ibyo aregwa gushyigikiwe n’ibindi bimenyetso. 2) Kuvana bimwe mu byo uwiyemerera yavuze ngo abe ari byo bihabwa agaciro bidafatiwe hamwe nk’uko yabivuze, ntibyemewe. 3) Umuburanyi cyangwa umwe mu bafitanye ikibazo wiyemereye ibyo aregwa mu buryo buvugwa mu gika cya (1) cy’iyi ngingo ntashobora kwisubiraho, keretse agaragaje ko yemejwe ku gahato, uburiganya cyangwa ko yibeshye ku cyabaye. Ntashobora kwisubiraho avuga ko yayobejwe no kwibeshya ku itegeko. [16] Mu guhuza umurongo wavuzwe haruguru n’ingingo ya 85 y’Itegeko N° 062/2024 ryavuzwe, birumvikana ko ushinjwa wemeye icyaha mu Bugenzacyaha cyangwa mu Bushinjacyaha kandi atagaragaza ko yacyemejwe ku gahato, imvugo ye ntishobora kuvanwaho no kuba ageze mu Rukiko agahindura imvugo ku bushake bwe. [17] Mu ibazwa rye ryo ku wa 09/04/2021, imbere y’Ubugenzacyaha, Niringiyimana yabajijwe niba yemera icyaha, asubiza ko acyemera, abajijwe icyaha yemera asubiza ko yemera ko yafashwe acuruza ibiyobyabwenge.1 Mu kibazo cya 5 n’icya 6, Niringiyimana yabajijwe aho avana ibiyobyabwenge, igiciro abiguraho n’igiciro abigurishaho, asubiza ko arurangura kwa Emmanuel Nshuti w’iNyamirama, akaba agura agapfunyika 1 ku mafaranga 100 naho we akakagurisha ku mafaranga 200. Mu kibazo cya 7, Niringiyimana yavuze ko amaze iminsi 2 acuruza ibiyobyabwenge, ko ubwa mbere yaranguye ibiyobyabwenge bya 1000Frw akabigurisha ku mafaranga 2.000 (Reba igisubizo cya 8). [18] Urukiko rurasanga ibivuzwe mu gika kibanziriza iki byerekana ko mu Bugenzacyaha Niringiyimana yasobanuye ku buryo burambuye kandi bwumvikana, uburyo yakoze icyaha cyo gucuruza ibiyobyabwenge, asoza abisabira imbabazi.

1Reba igisubizo cya 3 cy’inyandiko mvugo y’ibazwa rya Niringiyimana mu Bugenzacyaha.

## Page 5

[19] Urukiko rurasanga, hakurikijwe ibivugwa mu ngingo ya 85 y’Itegeko N° 062/2024 ryavuzwe haruguru, mu gace karyo ka (3), ibyo Niringiyimana yemereye mu Bugenzacyaha nta bubasha yari afite bwo kubihindura mu gihe atagaragaza ko yabyemeye ashyizweho agahato. Kuba yarageze mu Bushinjacyaha agahinduranya imvugo, aho yatangiye avuga ko atemera icyaha ashinjwa ariko yagera ku bibazo bikurikira icya 1 akavuga ko yemera icyaha cyo gucuruza ibiyobyabwenge (reba igisubizo cya 4 n’icya 10) ko kandi yafashwe amaze kugurisha ku rumogi yafatanwe (reba igisubizo cya 12), Urukiko rurasanga ibyo yavugiye mu Bushinjacyaha bidatesha agaciro ubuhamya yavugiye mu Bugenzacyaha kuko atari yemerewe guhindura imvugo atagaragaje agahato yashyizweho mu Bugenzacyaha ahubwo akaba yarabikoze ku bushake bwe bwo guhunga icyaha; nubwo ibyo yavuze ubwabyo bihamya ko yacuruje ibiyobyabwenge. [20] Urukiko rurasanga ubwunganizi butagaragaza inenge iboneka mu mvugo z’abatangabuhamya bashinja Niringiyimana kuko, kuba baragiye kumushaka kubera gukekwaho icyaha cyo kwiba nyamara bakamusangana ibiyobyabwenge nawe adahakana kandi ubwe akemera ko byari ibyo gucuruza, ntibyaba impamvu yo gutesha agaciro ubuhamya bwabo. Ku birebana n’ingano y’ibiyobyabwenge Niringiyimana yafatanwe [21] Kuba ubwunganizi buvuga ko udupfunyika 46 tw’urumogi ari ingano ntoya idashobora gucuruzwa, Urukiko rurasanga ntashingiro bifite kuko ushinjwa yiyemereye ko yafashwe amaze kurucuruzaho, ubwunganizi bukaba budashobora kwerekana ingano fatizo y’urumogi rucuruzwa. [22] Urukiko rurasanga, mu manza zitandukanye, uru Rukiko rwarahamije icyaha cyo gutunda no gucuruza ibiyobyabwenge abantu bafatanwe udupfunyika tw’urumogi tungana cyangwa turi hafi kungana n’utwo Niringiyimana yafatanwe (46 boules), rumwe mu manza ziheruka gucibwa akaba ari urubanza RPAA00048/2024/CA rwaciwe ku wa 25/04/2025 aho Ngamije Augustin wafatanwe udupfunyika 41 tw’urumogi yahamijwe icyaha cyo kugurisha ibiyobyabwenge bihambaye, ubwunganizi bukaba buterekana icyo bushingiraho bwemeza ko ari ingano ntoya yagenewe gukoreshwa n’umuntu ku giti cye. Ku birebana n’ibihano Niringiyimana yahanishijwe [23] Niringiyimana usaba guhamwa n’icyaha cyo gufatanwa ibiyobyabwenge, yasabye guhanishwa igifungo kitarenze imyaka 2, naho Ubushinjacyaha buvuga ko agomba kugumishwa ku gifungo cy’imyaka 15 n’ihazabu ya 5.000.000Frw kuko aribyo bihano bito ntarengwa ku cyaha cyo gucuruza ibiyobyabwenge yahamijwe. UKO URUKIKO RUBIBONA [24] Urukiko rurasanga ikibazo cy’inyito y’icyaha cyamaze gukemurwa mu gika kibanziriza iki, igabanyagihano Niringiyimana asaba rikaba rigomba kureberwa mu bihano bigenerwa umuntu wahamwe n’icyaha cyo kugurisha ibiyobyabwenge bihambaye nk’uko bigenwa mu ngingo ya 11 y’Itegeko N° 69/2019 ryo kuwa 08/11/2019 rihindura Itegeko N° 68/2018 riteganya ibyaha n’ibihano muri rusange iteganya ko umuntu uhamwe n’icyaha cyo gutunda cyangwa gucuruza ibiyobyabwenge bihambaye, ahanishwa igifungo cya burundu n’ihazabu itari munsi y’amafaranga 20.000.000 ariko itarenze amafaranga 30.000.000Frw. [25] Ingingo ya 2 (a) y’Itegeko Nº 059/2023 ryo ku wa 4/12/2023 rihindura Itegeko Nº 68/2018 ryo ku wa 30/8/2018 riteganya ibyaha n’ibihano muri rusange iteganya ko iyo umucamanza yemeje impamvu nyoroshyacyaha, ashobora kugabanya igihano ku buryo bukurikira: …(a) igifungo cya burundu gishobora kugabanywa ariko ntikijye munsi y’igihano cy’igifungo cy’imyaka 15; naho mu

## Page 6

gace ka (d) ikavuga ko ihazabu ishobora kugabanywa kugeza kuri ¼ cy’igihano cy’ihazabu ntoya yateganyirijwe icyaha cyakozwe. [26] Mu rubanza RPA00694/2021/HC/RWG, rwaciwe n’Urukiko Rukuru, Urugereko rwa Rwamagana kuwa 25/7/2024, Urukiko rwahamije Niringiyimana icyaha cyo kugurisha ibiyobyabwenge byo mu bwoko bw’urumogi (udupfunyika 46), mu kumuhana, rwemeza kumugabanyiriza ibihano kugeza ku gifungo cy’imyaka 15 n’ihazabu ya 5.000.000Frw, rubishingiye ku kuba ari ubwa mbere akurikiranwe mu butabera; ibi kandi rubishingira ku ngingo ya 2 y’Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange. [27] Kuba Urukiko Rukuru rwaragabanyirije igihano Niringiyimana kugeza ku gifungo cy’imyaka 15 n’ihazabu y’amafranga miliyoni eshanu (5.000.000), Urukiko rurasanga nta kosa rwakoze ndetse ibi bihano bikaba bidashobora kugabanywa biruseho kuko aribyo bihano bito bishoboka kuri iki cyaha ushinjwa yahamijwe. III. ICYEMEZO CY’URUKIKO [28] Rwemeje ko ubujurire bwa Niringiyimana alias Bishyimbo nta shingiro bufite. [29] Rwemeje ko imikirize y’urubanza RPA00694/2021/HC/RWG, rwaciwe n’Urukiko Rukuru, Urugereko rwa Rwamagana kuwa 25/07/2024 igumyeho mu ngingo zarwo zose. [30] Rwemeje ko Niringiyimana alias Bishyimbo ahamishwa ku gifungo cy’imyaka 15 n’ihazabu ya 5.000.000frw ku cyaha cyo kubika ibiyobyabwenge bihambaye byo mu bwoko bw’urumogi yahamijwe. [31] Rutegetse ko Niringiyimana alias Bishyimbo asonerwa amagarama y'urubanza kuko yaburanye afunzwe.