UBUSHINJACYAHA v. NIYIZURUGERO

# UBUSHINJACYAHA v. NIYIZURUGERO

- Source: Amategeko - Section: Decisions (Judgements) - Date: 2025-04-17 - Case/document no.: RPAA 00796/2024/CA - Collection: Court of Appeal

## Text

## Page 1

UBUSHINJACYAHA v. NIYIZURUGERO

[Rwanda URUKIKO RW’UBUJURIRE – RPAA 00796/2024/CA (Umugwaneza, P.J.,) 17 Mata 2025] Amategeko agenga ibyaha n’ibihano – Icyaha cyo gutunda ibiyobyabwenge byo mu bwoko bw’urumogi – Gusaba kongera kugabanyirizwa ibihano – Igihano cy’igifungo cy’imyaka cumi n’itanu (15) n’ihazabu y’amafaranga y’u Rwanda ingana na miliyoni eshanu (5.000.000Frw), ntigishobora kugabanywa kuko aricyo gito gishoboka ku cyaha cyo gutunda ibiyobyabwenge byo mu bwoko bw’urumogi mu gihe hari impamvu nyoroshyacyaha. Amategeko agenga ibyaha n’ibihano – Isubikagihano – Isubikagihano ntiritangwa iyo ugisaba yahanishijwe igifungo kirengeje imyaka itanu(5). Incamake y’ikibazo: Niyizurugero Steven na Nsengimana Pascal bafatanwe ibiro bitatu (3kg) by’urumogi maze bashyikirizwa Ubugenzacyaha, abari bafatanyije kurucuruza aribo Ndagijimana na Manishimwe bakaba bagishakishwa. Nyuma y’iperereza, Ubushinjacyaha bwabakurikiranyeho icyaha cyo gucuruza ibiyobyabwenge byo mu bwoko bw’urumogi, bubaregera Urukiko Rwisumbuye rwa Ngoma, busaba ko cyabahama, bakagihanirwa. Niyizurugero Steven yaburanye yemera icyaha, akaba abisabira imbabazi, ariko Nsengimana Pascal yaburanye ahakana icyaha, asaba kurenganurwa. Urukiko Rwisumbuye rwa Ngoma rushingiye ku bimenyetso bitandukanye, rwahamije Niyizurugero Steven icyaha cyo gutunda ibiyobyabwenge byo mu bwoko bw’urumogi, rumuhanisha igifungo cy’imyaka makumyabiri n’itanu (25 ans), n’ihazabu ya milioni makumyabiri n’enye n’ibihumbi magana atanu (24.500. 000Frw). Rwemeza kandi ko Nsengimana Pascal ahamwa no kuba icyitso ku cyaha cyo gutunda ikiyobyabwenge cy’urumogi, maze rumuhanisha igifungo cy’imyaka makumyabiri n’itanu (25 ans) n’ihazabu ya milioni makumyabiri n’icyenda n’ibihumbi magana atanu (29.500.000Frw). Niyizurugero Steven na Nsengimana Pascal, bajuririye Urukiko Rukuru, Urugereko rwa Rwamagana, Niyizurugero Steven asaba kugabanyirizwa igihano no kugisubikirwa. Nsengimana Pascal ahakana icyaha avuga ko abeshyerwa na Niyizurugero Steven, asaba kurenganurwa. Urukiko Rukuru, Urugereko rwa Rwamagana, rwasanze Niyizurugero Steven akwiriye kugabanyirizwa igihano mu rwego rwo guhuza igihano n’uburemere bw’icyaha ndetse no kubera impamvu nyoroshyacyaha z’uko aho yanyuze hose yemeye icyaha, akaba ari ubwa mbere akurikiranywe mu buryo buzwi mu butabera, bityo rumugabanyiriza igihano, ahanishwa igifungo cy’imyaka cumi n’itanu (15) n’ihazabu ya milioni eshanu (5.000.000Frw). Kuri Nsengimana Pascal, urukiko rusanga nta kimenyetso kidashidikanywaho kimuhamya gucuruza urumogi bityo ko yagirwa umwere, maze rwemeza ko adahamwa n’icyaha cyo gucuruza

## Page 2

ibiyobyabwenge, bityo akaba akigizweho umwere, rwemeza ko ahita arekurwa urubanza rukimara gusomwa. Niyizurugero Steven yajuririye Urukiko rw’Ubujurire, avuga ko Urukiko rutaritaye ku mpamvu nyoroshyacyaha yazigaragarije, asaba kongera kugabanyirizwa ibihano agahabwa bito bishoboka ku buryo yahanishwa igifungo kiri munsi y’imyaka cumi n’itanu (15) asaba no gukurirwaho ihazabu rya milioni eshanu (5.000.000Frw) kubera impamvu nyoroshyacyaha. Ubushinjacyaha buvuga ko impamvu ze z’ubujurire zidafite ishingiro kuko igihano yawe aricyo gito giteganywa n’amategeko. Incamake y’icyemezo: 1.Igihano cy’igifungo cy’imyaka cumi n’itanu (15) n’ihazabu y’amafaranga y’u Rwanda ingana na miliyoni eshanu (5.000.000Frw), ntigishobora kugabanywa kuko aricyo gito gishoboka ku cyaha cyo gutunda ibiyobyabwenge byo mu bwoko bw’urumogi mu gihe hari impamvu nyoroshyacyaha. 2.Isubikagihano ntiritangwa iyo ugisaba yahanishijwe igifungo kirengeje imyaka itanu(5).

Ubujurire nta shingiro bufite.

Amategeko yashingiweho: Itegeko N° 059/2023 ryo ku wa 04/12/2023 rihindura Itegeko N° 68/2018 ryo ku wa 30/08/2018 riteganya ibyaha n’ibihano muri rusange, ingingo ya 2 niya 3. Imanza zifashishijwe: Urubanza RPAA 00364/2024/CA, rw’ Ubushinjacyaha na Harorimana Abel, rwaciwe n’Urukiko rw’Ubujurire ku wa 21/01/2025; Urubanza RPAA 00441/2024/CA, rw’ Ubushinjacyaha na Niyombabazi Anitha, rwaciwe n’Urukiko rw’Ubujurire ku wa 24/01/2025. Urubanza I. IMITERERE Y’URUBANZA [1] Ku itariki ya 11/02/2021, Niyizurugero Steven yafatanwe ibiro bitatu (3kg) by’urumogi ubwo yari akuwe mu modoka ya COASTER, asobanura ko yaruhawe n’abitwa Nsengimana Pascal, Ndagijimana na Manishimwe kugira ngo arushyire uwitwa Uwaritatse i Kabarondo. Niyizurugero Steven na Nsengimana Pascal bashyikirijwe Ubugenzacyaha, Ndagijimana na Manishimwe bakaba bagishakishwa.

## Page 3

[2] Nyuma y’iperereza, Ubushinjacyaha bwabakurikiranyeho icyaha cyo gucuruza ibiyobyabwenge byo mu bwoko bw’urumogi, bubaregera Urukiko Rwisumbuye rwa Ngoma, busaba ko cyabahama, bakagihanirwa. [3] Niyizurugero Steven yaburanye yemera icyaha, avuga ko yahawe akazi na Nsengimana Pascal, amuha ibiro bitatu by’urumogi, ari kumwe na Ndagijimana n’uwitwa Manishimwe, bakaba bari bumuhembe amafaranga ibihumbi makumyabiri na kimwe (21.000Frw), buri wese akamuha ibihumbi birindwi (7.000Frw), bamubwira ko hari umuntu ushaka urumogi, arujyanye, ageze mu nzira afatwa na polisi. Asobanura ko yemeye ako kazi abitewe n’ubukene, akaba abisabira imbabazi. [4] Nsengimana Pascal yaburanye ahakana icyaha, asobanura ko abasirikare n’abapolisi hamwe na Gitifu w’Umurenge bari muri Opération, baza murugo aho aba bahasanga umuhungu babana, we akaba atari yaharaye, barahasaka ntibahabona urumogi, babaza uwo muhungu aho ari arahabarangira naho baje barahamusanga bamushyiramo amapingu, bahasaka ntibahabona urumogi. Akomeza avuga ko Niyizurugero amubeshyera kuko afitanye amakimbirane na nyina. Asaba kurenganurwa. [5] Mu rubanza RP 00237/2021/TGI/NGOMA, rwaciwe ku wa 23/03/2021, Urukiko Rwisumbuye rwa Ngoma, rwasanze hari ibimenyetso byemeza ko Niyizurugero Steven, yakoze icyaha cyo gutunda ibiyobyabwenge byo mu bwoko bw’urumogi hakurikijwe ibikorwa yakoze. Ibyo bimenyetso bikaba bigizwe na: Imvugo ze yemera icyaha akanagisabira imbabazi ari mubugenzacyaha, mubushinjacyaha no mu Rukiko;  Raporo yo ku wa 11/02/2021 yakozwe na polisi igaragaza uko Niyizurugero Steven yafatanwe ibiro bitatu (3Kg) by’urumogi; Inyandiko mvugo y’ifatira, Niyizurugero Steven yashyizeho umukono yemera ko urumogi ibiro bitatu yafatanwe ari urwe; Ifoto imugaragaza ari kumwe na Nsengimana Pascal bafite urumogi yafatanwe ibiro 3. Kuri Nsengimana Pascal, Urukiko rwasanze hari ibimenyetso bimuhamya kuba icyitso ku cyaha cyo gutunda ibiyobyawenge hakurikijwe ibikorwa yakoze, ibimenyetso bikaba bigizwe no kuba ashinjwa na Niyizurugero Steven kuba yaramuhaye urumogi ari kumwe na Ndagijimana na Manishimwe ngo arushyire uwitwa Uwaritatse anamwemerera igihembo, imvugo z’abatangabuhamya bamushinja ndetse n’inyandiko mvugo y’ifatira igaragaza urumogi Niyizurugero Steven yafatanwe hamwe na foto bafashwe bafite urumogi ibiro bitatu (3Kg). Urukiko rushingiye kuri ibyo bimenyetso, rwahamije Niyizurugero Steven icyaha cyo gutunda ibiyobyabwenge byo mu bwoko bw’urumogi, rumuhanisha igifungo cy’imyaka makumyabiri n’itanu (25 ans), n’ihazabu ya milioni makumyabiri n’enye n’ibihumbi magana atanu (24.500. 000Frw). Rwemeza ko Nsengimana Pascal ahamwa no kuba icyitso ku cyaha cyo gutunda ikiyobyabwenge cy’urumogi. Rumuhanisha igifungo cy’imyaka makumyabiri n’itanu (25 ans) n’ihazabu ya milioni makumyabiri n’icyenda n’ibihumbi magana atanu (29.500.000Frw).

## Page 4

[6] Niyizurugero Steven na Nsengimana Pascal, bajuririye Urukiko Rukuru, Urugereko rwa Rwamagana, Niyizurugero Steven asaba kugabanyirizwa igihano no kugisubikirwa. Nsengimana Pascal ahakana icyaha avuga ko abeshyerwa na Niyizurugero Steven, asaba kurenganurwa. [7] Ubushinjacyaha buvuga ko Niyizurugero Steven yagabanyirizwa igihano kuko yemera icyaha neza, agasobanura uko yagikoze, bityo akaba yahabwa igifungo cy’imyaka 15 n’ihazabu ya 5.000.000 hashingiwe ku ngingo ya 2 agace ka b na d y’itegeko rishya riteganya ibyaha n’ibihano muri rusange. Kuri Nsengimana Pascal, busanga icyaha kimuhama, akaba atashoboye kuvuguruza ibimenyetso byamuhamije icyaha birimo ubuhamya bwa Niyizurugero Steven na raporo y’inzego z’ibanze. [8] Mu rubanza RPA 00702/2021/HC/RWG rwaciwe ku wa 25/07/2024, Urukiko Rukuru, Urugereko rwa Rwamagana, rwasanze Niyizurugero Steven akwiriye kugabanyirizwa igihano mu rwego rwo guhuza igihano n’uburemere bw’icyaha ndetse no kubera impamvu nyoroshyacyaha z’uko aho yanyuze hose yemeye icyaha, akaba ari ubwa mbere akurikiranywe mu buryo buzwi mu butabera, rushingira kumurongo watanzwe mu rubanza RPA 00060/2021/CA, rwaciwe ku wa 04/04/2022, haburana Ubushinjacyaha na Nsabimana Callixte alias Sankara na bagenzi be ndetse no ku ngingo ya 2 y’itegeko N 059/2023 ryo ku wa 04/12/2023 rihindura Itegeko N 68/2018 ryo ku wa 30/08/2018 riteganya ibyaha n’ibihano muri rusange, rumugabanyiriza igihano. Kuri Nsengimana Pascal, rusanga nta kimenyetso kidashidikanywaho kimuhamya gucuruza urumogi bityo ko yagirwa umwere. Rwemeza ko imikiriza y’urubanza rwajuririwe ihindutse, ruhanisha Niyizurugero Steven igihano cy’igifungo cy’imyaka cumi n’itanu (15) n’ihazabu ya milioni eshanu (5.000.000Frw). Rutegeka ko Nsengimana Pascal adahamwa n’icyaha cyo gucuruza ibiyobyabwenge, akaba akigizweho umwere. Rwemeza ko Nsengimana Pascal ahita arekurwa urubanza rukimara gusomwa. [9] Niyizurugero Steven yajuririye Urukiko rw’Ubujurire, urubanza ruhabwa RPAA 00796/2024/CA, ruburanishwa mu ruhame ku wa 03/04/2025, Niyizurugero Steven yunganiwe na Me Uwimabera Béata, Ubushinjacyaha buhagarariwe na Ninahazwa Roselyne, Umushinjacyaha ku rwego rw’igihugu. [10] Niyizurugero Steven, asaba kugabanyirizwa ibihano no kubisubikirwa, avuga ko yahawe ibiremereye, Urukiko rukaba rutaritaye ku mpamvu nyoroshyacyaha yazigaragarije, akaba afite abana batanu, babiri muribo bafite ubumuga kandi ariwe ubareberera kuko nyina atishoboye. Asaba guhabwa ibihano bito bishoboka no gukurirwaho ihazabu rya milioni eshanu (5.000.000Frw), asobanura ko adafite aho yazikura. [11] Me Uwimabera Béata, umwunganira, avuga ko ubwo yasuraga Niyizurugero Steven mu igororero, yamusobanuriye ko abona nta mpamvu anenga icyemezo cy’Urukiko Rukuru kuko ibihano yahawe bikurikije ibiteganywa n’amategeko. [12] Ubushinjacyaha buvuga ko impamvu ze z’ubujurire zidafite ishingiro kuko igihano yawe aricyo gito giteganywa n’amategeko. Asaba ko hagumishwaho imikirize y’urubanza rwajuririwe. [13] Hakurikijwe izo mpaka, muri uru rubanza harasuzumwa ikibazo cyo kumenya niba Niyizurugero Steven akwiriye kugabanyirizwa ibihano no kubisubikirwa.

## Page 5

II. ISESENGURA RY’IKIBAZO KIGIZE URUBANZA Kumenya niba Niyuzurugero Steven akwiriye kugabanyirizwa ibihano no kubisubikirwa [14] Niyizurugero Steven avuga ko yahawe ibihano biremereye, Urukiko rukaba rutaritaye kukuba yemeye icyaha atagoranye kandi ko urumogi yafatanwe rwari rutaragira uwo rwangiriza, akaba ari ubwa mbere yari yakoze icyaha ndetse no kuba asanganywe imyitwarire myiza. Asaba kugabanyirizwa ibihano agahabwa bito, no kugira ibyo asubikirwa kuko afite abana batanu, babiri muribo bafite ubumuga kandi akaba ariwe ubareberera kuko nyina atishoboye. Asaba no gukurirwaho ihazabu ya milioni eshanu (5.000.000Frw) yaciwe, asobanura ko adafite aho azikura. [15] Me Uwimabera Béata, umwunganira, avuga ko ubwo yasuraga Niyizurugero Steven mu igororero, yamusobanuriye ko abona nta mpamvu anenga icyemezo cy’Urukiko Rukuru kuko ibihano yahawe bikurikije ibiteganwa mu ngingo ya 2 agace ka a n’aka d, y’Itegeko N° 059/2023, ryo ku wa 04/12/2023 rihindura Itegeko N°68/2018 ryo ku wa 30/08/2018 riteganya ibyaha n’ibihano muri rusange, akaba aribyo bihano bito biteganyirijwe icyaha cyakozwe. [16] Ubushinjacyaha buvuga ko, ku bijyanye no kongera kugabanyirizwa igihano Niyizurugero asaba, busanga nta kosa rikenewe gukosorwa murubanza RPA 00702/2021/HC/RWG rwaciwe n’Urukiko Rukuru, Urugereko rwa Rwamagana ku wa 25/07/2022, kuko igifungo cy’imyaka 15 n’ihazabu ya 5.000.000Frw yahanishijwe aricyo gihano gito gishoboka giteganywa n’ingingo ya 2, agace ka (a) na (d), y’itegeko N ° 059/2023 ryo ku wa 04/12/2023 riteganya ibyaha n’ibihano muri rusange. [17] Ubushinjacyaha, bukomeza busobanura ko igihano Niyizurugero yahawe, kidashobora kujya munsi y’imyaka 15 nkuko byatanzweho umurongo murubanza RPAA 00538/2024/CA, rwaciwe ku wa 21/01/2025, haburana Ubushinjacyaha na Cyuzuzo Jean Claude. Asaba Urukiko rw’Ubujurire kwemeza ko urubanza rwajuririwe rugumanye agaciro karwo. UKO URUKIKO RUBIBONA Impaka kuri iyi ngingo zishingiye kukumenya niba Niyizurugero Steven akwiriye kugabanyirizwa igihano kuri uru rwego, ku buryo yahanishwa igifungo kiri munsi y’imyaka cumi n’itanu (15) no kugisubikirwa, ndetse no gukurirwaho ihazabu ya milioni eshanu (5.000.000Frw) yahanishijwe kubera impamvu nyoroshyacyaha. [18] Ingingo ya 11, igika cya gatatu, y’Itegeko N° 69/2019 ryo ku wa 08/11/2019 ihindura ingingo ya 263 y’Itegeko N° 68/2018, ryo ku wa 30/08/2018, riteganya ibyaha n’ibihano muri rusange, iteganya ko “Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranyije n’amategeko, aba akoze icyaha. Iyo abihamijwe n’Urukiko ahanishwa: 1o igifungo cya burundu n’ihazabu y’amafaranga y’u Rwanda arenze milioni makumyabiri(20.000.000Frw) ariko atarenze milioni mirongo itatu(30.000.000Frw) ku byerekeye ibiyobyabwenge bihambaye…”. [19] Ku birebana no kugabanya igihano mu gihe hari impamvu nyoroshyacyaha, ingingo ya 2 y’Itegeko N° 059/2023 ryo ku wa 04/12/2023 rihindura Itegeko N° 68/2018 ryo ku wa 30/08/2018 riteganya ibyaha n’ibihano muri rusange, iteganya ko: “Iyo umucamanza yemeje impamvu

## Page 6

nyoroshyacyaha, ashobora kugabanya igihano ku buryo bukurikira: …; (a) igifungo cya burundu gishobora kugabanywa ariko ntikijye munsi y’igihano cy’igifungo cy’imyaka 15, … (d) igihano cy’ihazabu gishobora kugabanywa kugeza kuri kimwe cya kane cy’igihano cy’ihazabu gito giteganyirijwe icyaha cyakozwe.” [20] Ikibazo cyo kumenya niba Urukiko rushobora kugabanya igihano kikajya munsi y’igifungo cy’imyaka 15 mu gihe hari impamvu nyoroshyacyaha ku cyaha gihanishwa igifungo cya burundu, Urukiko rw’Ubujurire rushingiye ku ngingo ya 2 y’Itegeko N° 059/2023 ryo ku wa 04/12/2023 rihindura Itegeko N° 68/2018 ryo ku wa 30/08/2018 riteganya ibyaha n’ibihano muri rusange, rwabitanzeho umurongo mu manza zitandukanye rwaciye ku bantu bahamwe n’ibyaha birimo gucuruza, kubika no gutunda ibiyobyabwenge byo mu bwoko bw’urumogi biteganywa n’ingingo ya 263, igika cya gatatu y’itegeko N 68/2018, ryo ku wa 30/08/2018, riteganya ibyaha n’ibihano muri rusange nkuko ryahinduwe kugeza ubu, aho rwemeje ko abo bantu badashobora kugabanyirizwa igihano ku buryo kijya munsi y’igifungo cy’imyaka cumi n’itanu (15) n’ihazabu ya milioni eshanu (5.000.000Frw)1.Mu manza ziheruka gukurikiza uwo murongo harimo urubanza RPAA 00333/2024/CA, rwaciwe n’Urukiko rw’Ubujurire ku wa 28/01/2025, haburana Ubushinjacyaha na Ngirinshuti Emmanuel2. [21] Nk’uko bigaragara mu gika cya 73, Urukiko Rukuru, Urugereko rwa Rwamagana, rushingiye ku mpamvu nyoroshyacyaha z’uko ari ubwa mbere Niyizurugero Steven akurikiranywe mu buryo buzwi mu butabera no kuba yaburanye yemera icyaha aho yabajijwe hose, rushingiye ku ngingo ya 2 y’Itegeko N° 059/2023 ryo ku wa 04/12/2023 rihindura Itegeko N° 68/2018 ryo ku wa 30/08/2018 riteganya ibyaha n’ibihano muri rusange, rwamugabanyirije igihano, rumuhanisha igifungo cy’imyaka cumi n’itanu (15) n’ihazabu y’amafaranga y’u Rwanda miliyoni eshanu (5.000.000 Frw) aho kuba igifungo cy’imyaka makumyabiri n’itanu (25) n’ihazabu y’amafaranga y’u Rwanda ingana na milioni makumyabiri n’enye n’ibihumbi magana atanu(24.500.000Frw) yahanishijwe n’Urukiko Rwisumbuye. [22] Urukiko rw’Ubujurire rurasanga hashingiwe ku ngingo ya 2 agace ka (a) n’aka (d) y’Itegeko N° 059/2023 ryo ku wa 04/12/2023 ryavuzwe haruguru ndetse no ku murongo wagarutsweho mu gika cya 20, igihano Niyizurugero Steven yahanishijwe n’Urukiko Rukuru, Urugereko rwa Rwamagana, cy’igifungo cy’imyaka cumi n’itanu (15) n’ihazabu y’amafaranga y’u Rwanda ingana na miliyoni eshanu (5.000.000Frw), kidashobora kugabanywa kuko aricyo gito gishoboka ku cyaha yahamijwe cyo gutunda ibiyobyabwenge byo mu bwoko bw’urumogi mu gihe hari impamvu nyoroshyacyaha, kandi akaba yaragihawe hashingiwe ku mpamvu nyoroshyacyaha zagaragajwe mu gika cya 21. [23] Naho ku busabe bwa Niyizurugero Steven, ko yakurirwaho ihazabu ya milioni eshanu (5.000.000Frw) yahanishijwe, asobanura ko adafite aho yazikura, rusanga nta shingiro bifite

1 Reba igika cya 15 cy’urubanza RPAA 00364/2024/CA, rwaciwe n’Urukiko rw’Ubujurire ku wa 21/01/2025, haburana Ubushinjacyaha na Harorimana Abel, igika cya 17 cy’urubanza RPAA 00441/2024/CA, rwaciwe n’Urukiko rw’Ubujurire ku wa 24/01/2025, haburana Ubushinjacyaha na Niyombabazi Anitha, n’izindi.

2 Reba igika cyarwo cya 15.

3 Reba urubanza RPA 00702/2021/HC/RWG.

## Page 7

hashingiwe kubiteganywa mu ngingo ya 2, agace ka (d) y’Itegeko N° 059/2023 ryagarutsweho haruguru ndetse n’umurongo wavuzwe mugika cya 20. [24] Hashingiwe kubimaze kuvugwa byose, Urukiko rw’Ubujurire rurasanga igihano cy’igifungo cy’imyaka cumi n’itanu (15) n’ihazabu y’amafaranga y’u Rwanda ingana na milioni eshanu(5.000.000Frw) Urukiko Rukuru, Urugereko rwa Rwamagana rwahanishije Niyizurugero Steven ku cyaha cyo gutunda ibiyobyabwenge byo mu bwoko bw’urumogi kidashobora kugabanywa ku buryo cyajya munsi y’imyaka 15 kuko aricyo gito giteganwa n’itegeko ku cyaha yahamijwe mugihe hari impamvu nyoroshyacyaha nkuko byasobanuwe haruguru, bityo kikaba kigomba kugumaho. [25] Ku bijyanye n’isubikagihano ryasabwe na Niyizurugero Steven, Urukiko rw’ubujurire rusanga adakwiriye kurihabwa hashingiwe ku ngingo ya 34, agace ka (1) y’Itegeko N° 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, kuko igifungo yahanishijwe kirengeje imyaka itanu(5). III.ICYEMEZO CY’URUKIKO [26] Rwemeje ko ubujurire bwatanzwe na Niyizurugero Steven nta shingiro bufite; [27] Rwemeje ko urubanza RPA 00702/2021/HC/RWG, rwaciwe n’Urukiko Rukuru, Urugereko rwa Rwamagana ku wa 25/07/2024, rudahindutse mu ngingo zarwo zose; [28] Rwemeje ko Niyizurugero Steven, akomeza guhanishwa igifungo cy’imyaka cumi n’itanu (15) n’ihazabu y’amafaranga y’u Rwanda, miliyoni eshanu (5.000.000 Frw) yahanishijwe n’Urukiko Rukuru, Urugereko rwa Rwamagana; [29] Rutegetse ko Niyizurugero Steven asonewe gutanga amagarama y’urubanza kuko aburana afunze.

4 Iteganya ko “Iyo uwakatiwe nta kindi gihano cy’igifungo kirenga amezi 6 yahanishijwe mbere, urukiko rukoresheje icyemezo gisobanura impamvu, rushobora gutegeka gusubika irangiza ry’igihano cyose cyangwa igice cy’igihano cy’iremezo cyangwa cy’ingereka, iyo igihano cy’iremezo cy’igifungo umuntu yakatiwe kitarenze imyaka 5”.