UBUSHINJACYAHA vs NIYOMWUNGERI

# UBUSHINJACYAHA vs NIYOMWUNGERI

- Source: Amategeko - Section: Decisions (Judgements) - Date: 2025-01-31 - Case/document no.: RPAA 00473/2021/CA - Collection: Court of Appeal

## Text

## Page 1

UBUSHINJACYAHA vs NIYOMWUNGERI [Rwanda URUKIKO RW’UBUJURIRE – RPAA 00473/2021/CA (Rukundakuvuga P.J.) 31 Mutarama 2025] Amategeko yerekeye imanza nshinjabyaha – Imirongo mu manza – Umurongo wari uriho ntushobora gukurikizwa mu gihe itegeko wari ushingiyeho ryavuyeho cyangwa ryahinduwe, icyo gihe hashingirwa ku ngingo y’itegeko ryayihinduye. Incamake y’ikibazo: Uru rubanza rwatangiriye mu Rukiko Rwisumbuye rwa Gicumbi, Ubushinjacyaha bukurikiranye Ruzindana ku cyaha cyo gucuruza no kunywa urumogi nyuma yuko hakozwe "operation" mu rwego rwo kurwanya ibiyobyabwenge, hashingiwe ku makuru bahawe n’abaturage. Muri iyo gahunda, mu nzu Ruzindana yabanagamo n’uwitwa Ngiruwonsanga, bahasanze ½ kg cy’urumogi. Urwo Rukiko rwaciye urubanza rwemeza ko uregwa ahamwa icyaha cyo gucuruza ibiyobyabwenge byo mu bwoko bw’urumogi, rumuhanisha igihano cy’igifungo cy’imyaka 25 n’ihazabu ya 20.000.000 Frw. Uregwa ntiyanyuzwe n’imikirize y’urubanza ajuririra Urukiko Rukuru, avuga ko yahamijwe icyaha nta bimenyetso simusiga, kandi ko urumogi rwafashwe rwari urwa Ngiruwonsanga babanaga, bigeze igihe cy’iburanisha, yemeye icyaha, asobanura aho yakuye urumogi n’uburyo yarucuruzaga, asaba kugabanyirizwa igihano. Urwo Rukiko narwo rwaciye urubanza ntirwaha agaciro ukwemera icyaha kwe kuko kwakozwe gukererewe. Ariko, rushingiye ku murongo uvuga ko nta cyabuza Urukiko kugabanyiriza igihano uregwa, hagamijwe gutanga igihano gihwanye n’uburemere bw’icyaha, rwamugabanyirije igihano, rumuhanisha igifungo cy’imyaka cumi n’itanu (15 ans) n’ihazabu y’amafaranga y’u Rwanda miliyoni eshanu (5.000.000 Frw), kuri iyo zahabu rutegeka ko yishyura amafaranga ibihumbi magana atanu (500.000 Frw); naho 4.500.000 Frw arasubikwa mu gihe cy’umwaka umwe (1). Uregwa nanone yajuririye Urukiko Rw’Ubujurire, avuga ko yahanishijwe igihano kiremereye kandi yaraburanye yemera icyaha akanagisabira imbabazi, ko hari impamvu zari gushingirwaho akagabanyirizwa igihano kugeza munsi y’igihano gito giteganywa n’itegeko, kandi ko ibi bishoboka hakurikijwe ingano y’ibiyobyabwenge yafatanywe, asaba kandi kugabanyirizwa igihano kikanasubikwa kubera uburwayi afite. Ubushinjacyaha bwo buburana buvuga ko ubujurire nta shingiro bufite, ko igihano cy’igifungo cy’imyaka cumi n’itanu (15ans) n’ihazabu ya miliyoni eshanu (5.000.000Frw) irimo miliyoni enye n’ibihumbi magana atanu (4.500.000 Frw) asubitse mu gihe cy’umwaka yahanishijwe ari cyo gito gishoboka ku cyaha yahamijwe. Incamake y’icyemezo: Umurongo wari uriho ntushobora gukurikizwa mu gihe itegeko wari ushingiyeho ryavuyeho cyangwa ryahinduwe, icyo gihe hashingirwa ku ngingo y’itegeko ryayihinduye. Amategeko yashingiwe: Ingingo ya 2 y'Itegeko Nº 59/2023 ryo ku wa 04/12/2023 rihindura ingingo ya 60 y’itegeko Nº 68/2018 ryo ku wa 30/08/2018 riteganya ibyaha n’ibihano muri rusange. Ingingo ya 11 y’Itegeko Nº 69/2019 ryo ku wa 08/11/2019, ihindura ingingo ya 263 y’Itegeko Nº 68/2018 ryo ku wa 30/08/2018 riteganya ibyaha n'ibihano muri rusange Imanza zifashishijwe: Ubushinjacyaha vs Twagirumukiza Innocent Réponse, RPAA 00367/2020/CA rwaciwe n’Urukiko Rw’Ubujurire ku wa 22/12/2023. Ubushinjacyaha vs. Bimenyimana, RPAA 00048/2020/CA rwaciwe n’Urukiko rw’Ubujurire ku wa 26/05/2022.

## Page 2

Ubujurire nta shingiro bufite. Urubanza I. IMITERERE Y’URUBANZA [1] Ku wa 15/11/2018, NIYOMWUNGERI Théophile, yaketsweho, gusambanya umwana witwa G.A.1 w’imyaka irindwi (7) y’amavuko, bimenyekana ari uko umwana abwiye ababyeyi be ko yamusambanyirije muri salon iwabo, nijoro bajimije amatara nyina atarataha. Nyuma yo gukora iperereza, Ubushinjacyaha bwamuregeye Urukiko Rwisumbuye rwa Gasabo, busaba ko icyaha cyo gusambanya umwana cyamuhama, agahanishwa igifungo cya burundu. NIYOMWUNGERI Theophile, yaburanye ahakana icyaha, avuga ko igipangu bavuga ko yasambanyirijwemo umwana atakigezemo, kandi atari no guta akazi ke asanzwe akora k’izamu ku rusengero rwa ADEPR. [2] Mu rubanza nºRP 00034/2019/TGI/GSBO, rwaciwe ku wa 24/04/2019, Urukiko Rwisumbuye rwa Gasabo rushingiye ku mvugo za NIYOMWUNGERI Theophile yemera icyaha mu Bugenzacyaha, imvugo z’abatangabuhamya, ndetse n’imvugo z’umwana wasambanyijwe, rwemeje ko NIYOMWUNGERI Théophile, ahamwa n’icyaha cyo gusambanya umwana, rumuhanisha igifungo cya burundu. [3] NIYOMWUNGERI Theophile, yajuririye Urukiko Rukuru, avuga ko Urukiko Rwisumbuye rwamuhamije icyaha rushingiye ku mvugo zakozwe mu buryo bunyuranyije n’amategeko, ko yemeye icyaha kubera iyicarubozo yakorewe, kandi ko Urukiko rwirengagije ikimenyetso cya kamarampaka kimushinjura cya raporo ya muganga. [4] Mu rubanza NºRPA 00964/2019/HC/KIG, rwaciwe ku wa 15/02/2021, Urukiko Rukuru, rwasanze impamvu z’ubujurire za NIYOMWUNGERI Theophile zidafite ishingiro, kuko ibimenyetso byashingiweho birimo kuba yaremeye icyaha mu Bugenzacyaha, imvugo z’abatangabuhamya, ndetse n’imvugo z’umwana wasambanyijwe bihamya nta gushidikanya ko yakoze icyaha cyo gusambanya umwana; raporo ya muganga ikaba atari ikimenyetso cya kamarampaka ahubwo ari ngombwa kwita no ku bindi bimenyetso biyunganira. Rwemeza ko urubanza rwajuririwe rudahindutse. [5] NIYOMWUNGERI Théophile, yajuririye Urukiko rw’Ubujurire, ubujurire bwandikwa kuri nº RPAA 00473/2023/CA. Iburanisha mu ruhame rishyirwa ku wa 15 Mutarama 2025, uwo munsi ugeze NIYOMWUNGERI Theophile yunganiwe na Me KAGABO Théoneste naho Ubushinjacyaha buhagarariwe na PN NINAHAZWA Roselyne, Umushinjacyaha ku rwego rw’Igihugu. [6] NIYOMWUNGERI Theophile mu bujurire yatanze ku wa 12/03/2021 nta myanzuro y’ubujurire yashyize muri system ariko yanditse ahagenewe ikiregerwa (Ground of Claim) ko atishimiye imikirize y’urubanza NºRPA 00964/2019/HC/KIG rwaciwe ku wa 15/02/2021 kuko Umucamanza yirengagije ikimenyetso cya kamarampaka kimushinjura kigizwe na raporo ya muganga, asobanura iyo raporo ya muganga igaragaza ko uwo mwana atigeze asambanywa. Ku wa 03/05/2021 nibwo muri dosiye ye hashyizwemo umwanzuro yashyikirije ubuyobozi bwa Gereza ku wa 29/04/2021. Muri uwo mwanzuro anenga ko itariki bavuga ko yakoreyeho icyaha ishidikanywaho, kuko bamurega ko yasambanyije uwo mwana inshuro ebyiri nyamara hakagaragazwa itariki imwe. Avuga kandi ko ukwemera icyaha yakoreye mu Bugenzacyaha kutashingirwaho kuko yacyemejwe n’inkoni. Asaba Urukiko gushingira kuri raporo ya muganga igaraza ko umwana atasambanyijwe maze rukamugira umwere. [7] Ubushinjacyaha bwasabye ko impamvu z’ubujurire zikubiye mu mwanzuro watanzwe nyuma y’igihe cy’iminsi 30 giteganywa n’amategeko, zitakwakirwa ngo zisuzumwe.

## Page 3

[8] Muri uru rubanza harabanza gusuzumwa ikibazo kijyanye no kumenya niba impamvu z’ubujurire zatanzwe na NIYOMWUNGERI Theophile zasuzumwa habone gusuzumwa ibindi bibazo. II. ISESENGURWA RY’IBIBAZO BIGIZE URUBANZA a. kumenya niba impamvu z’ubujurire zatanzwe na NIYOMWUNGERI Theophile zasuzumwa. [9] Mu iburanisha ry’uru rubanza, Ubushinjacyaha bwatanze inzitizi yo kutakira ubujurire. Buvuga ko NIYOMWUNGERI Théophile yatanze ubujurire ku wa 12/03/2021 ajuririra urubanza rwaciwe n’Urukiko Rukuru ku wa 15/02/2021, ko ariko kuri uwo munsi atagaragaje impamvu z’ubujurire bwe, kuko atashyize muri sisitemu inyandiko igaragaza ibyo anenga urubanza rujuririrwa, ahubwo yashyizemo gusa kopi y’icyemezo cyafashwe n’Urukiko Rukuru. [10] Ubushinjacyaha bushingiye kuri ibi, bugaragaza ko mu gihe nta myanzuro y’ubujurire yatanzwe mu buryo no mu gihe giteganywa n’amategeko, bikwiye gufatwa ko ubujurire bwe butemewe. Buvuga ko impamvu z’ubujurire yazigaragaje nyuma y’igihe cyateganyijwe, binyuze mu mwanzuro watanzwe ku wa 29/04/2021, bityo busaba ko ubujurire bwe butakirwa. [11] Ibyo Ubushinjacyaha bubishingira ku ngingo ya 183, y’itegeko Nº027/2019 ryo ku wa 19/09/2019 ryerekeye imiburanishirize y’imanza z’inshinjabyaha, bukagaragaza ko NIYOMWUNGERI Théophile n’umwunganira batakwemererwa kunenga urubanza rwose kuko buri kimenyetso cyashingiweho gifite agaciro kacyo mu rubanza, bityo ko inenge zigaragara mu myanzuro y’inyongera zatanzwe impitagihe, zikaba zidashobora kuba mu mbibe z’icyajuririwe. [12] NIYOMWUNGERI Théophile n’umwunganzi we Me KAGABO Théoneste bavuga ko ubwo yajuririga ku wa 12/03/2021 muri ground of claim muri system yagaragaje icyo ajuririra n’icyo atishimiye mu rubanza rujurirwa, agaragaza ko umucamanza yirengagije ikimenyetso cya kamarampaka kimushinjura kigizwe na raporo ya muganga igaragaza ko umwana atasambanyijwe, avuga ko ibyo ari nabyo basobanuye mu mwanzuro w’inyongera mu buryo burambuye. UKO URUKIKO RUBIBONA [13] Impaka kuri iki kibazo zishingiye ku kumenya niba, NIYOMWUNGERI Théophile mu bujurire bwe ataragaragaje icyo anenga urubanza rujuririrwa ku buryo ubujurire bwe butakwakirwa, cyangwa niba zimwe mu ngingo z’ubujurire bwe zidakwiye kwakirwa. [14] Ikibazo cyo kumenya agaciro k’ingingo z’ubujurire zatanzwe impitagihe cyacyemuwe mu manza zitandukanye muri uru Rukiko, uruherutse akaba ari Urubanza nº RPA 00017/2023/CA, rwaciwe n’Urukiko rw’Ubujurire ku wa 20/12/2024, haburana Ubushinjacyaha na MUGABO Eric Gasongo (igika cya 19). Muri urwo rubanza, uru Rukiko rwemeje ko ingingo z’ubujurire zakirwa ari izatanzwe mu gihe cy’iminsi 30 ibarwa uhereye igihe urubanza rwashyiriwe muri iecms, rushingiye ku ngingo ya 181 nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha. Naho ku ngingo z’ubujurire zashyizwemo nyuma y’icyo gihe, rwemeza ko zidashobora kwakirwa ngo zisuzumwe. [15] Urubanza NIYOMWUNGERI Theophile ajuririra rwaciwe ku wa, ku wa 15/02/2021, atanga ikirego cy’ubujurire muri system ya iecms ku wa 12/03/2021, asobanura muri Ground of Claim ko atishimiye imikirize y’urubanza NºRPA 00964/2019/HC/KIG, kuko Umucamanza yirengagije ikimenyetso cya kamarampaka kimushinjura, avuga ko aregwa icyaha cyo gusambanya umwana nyamara raporo ya muganga ikaba igaragaza ko umwana atigeze asambanywa.

## Page 4

[16] Ku wa 03/05/2021 muri dosiye hashyizwemo umwanzuro ukubiyemo impamvu z’ubujurire wanditswe ku wa 29/04/2021, ushyikirizwa ubuyobozi bw’Igororero NIYOMWUNGERI Theophile afungiwemo. Muri uwo mwanzuro anenga ko itariki bavuga ko yakoreyeho icyaha ishidikanywaho, ko bamurega ko yasambanyije uwo mwana inshuro ebyiri ariko itariki igaragazwa ikaba ari imwe. Avuga ko ukwemera icyaha kwe mu Bugenzacyaha kutashingirwaho kuko yacyemejwe n’inkoni, ndetse ko raporo ya muganga yaragaragaje ko umwana atasambanyijwe, yirengagijwe. Asaba Urukiko kumugira umwere. [17] Nk’uko bigaragara rero, ingingo yagaragajwe nk’impamvu y’ubujurire mu gihe cyemewe n’amategeko ni iyerekeye ikibazo cyo kumenya niba Urukiko Rukuru rwarirengagije raporo ya muganga igaragaza ko umwana atasambanyijwe kandi ari cyo kimenyetso kamarampaka kigaragaza ko umwana atasambanyijwe; akaba ari nayo ngingo igiye gusuzumwa mu bika bikurikira. Kumenya niba Urukiko rwarirengagije raporo ya muganga igaragaza ko umwana atasambanyijwe. [18] NIYOMWUNGERI Theophile n’umwunganizi we, Me KAGABO Theoneste bavuga ko yahamijwe icyaha cyo gusambanya umwana nyamara raporo ya muganga igaragaza ko umwana atigeze asambanywa. Bemeza ko ibimenyetso byakoreshejwe mu kumuhamya icyaha bikemangwa, cyane ko iyo raporo igaragaza ko umwana nta kibazo afite, byerekana ko icyaha kitakozwe. Bavuga ko inkiko zahinduye ibivugwa n’abamurega zikavuga ko yakoze ishimishamubiri no kureba ubwambure bw’umwana kandi nyamara aregwa gusambanya. Uretse n’ibyo ariko, basobanura ko bitumvikana ukuntu umuntu yareba ubusa bw’umwana mu mwijima kuko bavuga ko icyaha cyakozwe amatara ajimije. [19] Banenga kandi urukiko kuba rwarahaye agaciro ubuhamya bw’umunyerondo uri mubamufashe bamugiriye urugomo bakamukubita, bagasobanura ko ibyo binyuranyije n’amategeko, bityo ko ubuhamya bwe butagombaga kwitabwaho mu gihe raporo ya muganga yemeza ko umwana atasambanyijwe. Ikindi bavuga ko kitagombaga gushingirwaho ni ukwemera icyaha NIYOMWUNGERI Théophile yakoreye mu Bugenzacyaha, kuko yemeye icyaha atinya gukubitwa n’abamuhatiraga kucyemera. Ku bw’ibyo byose, bagasaba ko yagirwa umwere, kuko nta bimenyetso bifatika bimuhamya icyaha. [20] Ubushinjacyaha buvuga ko raporo ya muganga avuga yasuzumwe n’Urukiko Rukuru, rwemeza ko itamushinjura kuko atari yo kimenyetso cyonyine cyatanzwe. Buvuga ko hari ibindi bimenyetso byashingiweho, birimo kuba yaremeye icyaha mu Bugenzacyaha, imvugo z’abatangabuhamya, ndetse n’imvugo z’umwana wasambanyijwe. Bugaragaza kandi ko raporo ya muganga atari kamara, kuko gusambanya umwana bidasaba kuba igitsina cyinjiye mu cy’umwana. Bityo, kuba iyo raporo itagaragaza ibimenyetso ko umwana yasambanyijwe, ntibivuze ko icyaha kitakozwe, hashingiwe ku buryo amategeko asobanura icyaha cyo gusambanya umwana. Ku bw’ibyo, Ubushinjacyaha buvuga ko iyo mpamvu y’ubujurire nta shingiro ifite, bugasaba ko imikirize y’urubanza rwajuririwe igumaho. UKO URUKIKO RUBIBONA [21] Impaka kuri iki kibazo zishingiye ku kumenya niba kuba raporo ya muganga itagaragaza ko umwana yasambanyijwe, byatuma hemezwa ko nta cyaha cyo gusambanya umwana cyabayeho. [22] Ibirebana no kuba raporo ya muganga itagaragaza ko umwana yasambanyijwe, Urukiko rw’Ikirenga rwabitanzeho umurongo mu rubanza Nº RS/INJUST/RP 00003/2019/SC rwaciwe ku wa 28/01/2022 habura Ubushinjacyaha na NIYONSABA Eric, (igika cya 23). Muri urwo rubanza Urukiko rw’Ikirenga rwasobanuye ko kuba umwana yasanganwa akarangabusugi kazima, bitavanaho ko hari ibikorwa yakorewe hagamijwe kwishimisha. Naho mu rubanza NºRPAA 00113/2024/CA rwaciwe n’Urukiko rw’Ubujurire ku wa 29/11/2024, haburana Ubushinjacyaha na RWAKIBIBI Théophile, igika cya 32, Urukiko rwasobanuye ko: “raporo ya Muganga ari ikimenyetso kigomba gusuzumwa hamwe n’ibindi”.

## Page 5

[23] Nk’uko bigaragara, izi manza zombi zigaragaza ko guhamwa n’icyaha cyo gusambanya umwana bitagombera kuba hari ikimenyetso cy’ihuzabitsina kigaragara ku gitsina cy’umwana wahohotewe; ahubwo hitabwa no ku bimenyetso byose bigaragaza kugerageza igikorwa cyose cy’ishimishamubiri ku mubiri w’umwana nk’uko biteganywa mu ngingo ya 133,3o y’itegeko N068/2018 ryo ku wa 30/08/2018 riteganya ibyaha n’ibihano muri rusange2. [24] Raporo ya muganga wasuzumye G.A, igaragaza ko umwana agifite akarangabusugi kazima, nta n’ikigaragaza ko yasambanyijwe, ndetse nta n’uburwayi bwandurira mu mibonano mpuzabitsina yasanganywe. Urukiko rw’Ubujurire rurasanga, nk’uko byasobanuwe mu bika bibanziriza iki, kuba umwana yarasanganwe akarangabusugi kazima ndetse na raporo ya muganga ikagaragaza ko imyanya ndangagitsina y’umwana itagaragaza ibimenyetso by’ihohoterwa, ubwabyo bidashobora kuba ikimenyetso gihagije cy’uko hatabayeho igikorwa cyo kumusambanya. Bityo, iyo raporo ya muganga ikaba igomba gusuzumirwa hamwe n’ibindi bimenyetso, Urukiko Rukuru rwashingiyeho. [25] Muri ibyo bimenyetso, harimo inyandikomvugo y’ibazwa rya nyina w’umwana wasambanyijwe, iry’umukozi wo mu rugo wakoraga iwabo w’umwana wasambanyijwe, ndetse n’iry’umunyerondo uri mu bashyikirije uregwa RIB. [26] Mu ibazwa rye, nyina w’umwana, yasobanuye ko ubwo yarimo ahana umwana we wari wibye amafaranga, yamubajije niba nta yandi makosa yigeze akora. Umwana yamusubije ko yasambanyijwe kabiri na NIYOMWUNGERI Théophile, avuga ko byaherukaga kubera iwabo muri salon bajimije amatara. Nyina w’umwana yabwiye RIB ko bahise bajya gushaka NIYOMWUNGERI Théophile, nawe abemerera ko koko yasambanyije uwo mwana mu kwezi kwa 11. Umukozi wo mu rugo nawe yagaragaje ko atamenye ko umwana yasambanyijwe, ariko ko hari umunsi NIYOMWUNGERI Théophile yaje muri urwo rugo, amusigana n’uwo mwana muri salon igihe yari agiye kuhagira uruhinja. Agarutse, yasanze bajimije amatara, ariko ntiyabitinzeho kuko yatekereje ko umwana ari we wabikoze kuko asanzwe akubagana. [27] NIYOMWUNGERI Theophile abazwa mu Bugenzacyaha, yemeye ko yasambanyije uwo umwana inshuro imwe mu kwezi kwa cumi na kumwe. Asobanura ko ubwo bari iwabo muri salon, yamusabye ko babikora umwana aramwemerera, aribwo bazimije amatara, amukuramo agakubutura yari yambaye, nawe akuramo atangira kumusambanya. Avuga ko byari uguhatiriza ariko ko yarangije. Abajijwe niba ntawundi muntu wari uhari avuga ko bari bonyine ariko haje kuza umukozi wabo agakeka ko yababonye. [28] Urukiko rushingiye kuri izi mvugo n’ubwo NIYOMWUNGERI Théophile yageze mu Bushinjacyaha ndetse no mu Nkiko agahakana icyaha avuga ko yacyemeye kubera igihunga cyo gukubitwa, imvugo ze zigaragaza ko hari ibyo yatanzeho ibisobanuro ku buryo busa n’ibyagaragajwe n’ubuhamya bw’umukozi wo mu rugo ndetse n’ibyo umwana yasobanuriye umubyeyi we. [29] Uru rukiko rukaba rusanga, gusa k’ubu buhamya n’ibisobanuro bya nyir’ubwite mu Bugenzacyaha atari ibintu byafatwa nk’impurirane isanzwe. Kuba ahubwo muganga yarasanze umwana nta bimenyetso bigaragaza ko yahohotewe bigaragara mu gitsina cye, kandi nyamara ubuhamya bwavuzwe n’imvugo za nyiri ubwite mu Bugenzacyaha bihuye, bigaragaza ko yamukozeho ibikorwa by’ishimishamubiri bitigeze bigira icyo bihungabanya ku gitsina cy’umwana, icyakabigaragaje kikaba cyasibanganye, cyane cyane ko yanajyanywe kwa muganga hashize igihe kinini uko gusambanywa kubaye. Kuba rero imyanya ndangatsina ye yaba itarangiritse cyangwa ibyamukorewe bikaba bidashoborakubonerwa ibimenyetso bya gihanga ubwabyo ntibitesha agaciro ibindi bimenyetso Urukiko Rukuru rwashingiye rumuhamya icyaha. [30] Urukiko rw’Ubujurire rurasanga, n’ubwo bigaragara ko NIYOMWUNGERI Theophile ahamwa n’icyaha cyo gusambanya umwana, mu rwego rwo gutanga ubutabera buboneye ku manza zifite imiterere isa, hari abandi baregwaga icyaha nk’iki kandi bari mu cyiciro kijya gusa n’icye, bahawe ibihano byoroheje ugereranyije n’icyo yahawe n’Urukiko Rukuru.

## Page 6

[31] Nko mu rubanza nºRPAA 00098/2023/CA rwaciwe ku wa 26/04/2024, haburana Ubushinjacyaha na TUGIRINSHUTI Alexis bahimba Kamugi, w’imyaka 27 wasambanyije umwana w’imyaka 8, yahanishijwe igifungo cy’imyaka cumi n’icyenda (19) rushingiye ku kuba ari ubwa mbere akurikiranyweho icyaha mu buryo buzwi3. Muri uru rubanza ho, NIYOMWUNGERI Theophile w’imyaka makumyabiri n’itandatu y’ubukure (26), yakoze icyaha cyo gusambanya umwana w’imyaka irindwi, akaba na we ari ubwa mbere akurikiranyweho icyaha mu buryo buzwi. [32] Mu rwego rwo gutanga ubutabera bungana ku manza zifite imiterere isa, hitawe ku itandukaniro riri ku myaka y’abana bahohotewe, uru Rukiko rusanga igihano agomba guhabwa kigomba kwegerana n’icyahawe TUGIRINSHUTI Alexis bahimba Kamugi ariko kikisumburaho gato kuko umwana NIYOMWUNGERI Theophile yasambanyije ari muto kurushaho. Bityo, NIYOMWUNGERI Théophile akaba agomba guhanishwa igifungo cy’imyaka makumyabiri (20), gisimbura igifungo cya burundu yahawe mu rubanza rujuririrwa III. ICYEMEZO CY’URUKIKO [33] Rwemeje ko ubujurire bwa NIYOMWUNGERI Theophile nta shingiro bufite; [34] Rwemeje ko urubanza NºRPA 00964/2019/HC/KIG, rwaciwe n’Urukiko Rukuru, ku wa 15/02/2021, ruhindutse gusa ku bijyanye n’ibihano NIYOMWUNGERI Theophile yahanishijwe; [35] Ruhanishije NIYOMWUNGERI Theophile igifungo cy’imyaka makumyabiri (20); [36] Rutegetse ko NIYOMWUNGERI Theophile asonewe gutanga amagarama y’urubanza kuko aburana afunze.