NK SPAREPARTS v. UNGUKA BANK PLC

# NK SPAREPARTS v. UNGUKA BANK PLC

- Source: Amategeko - Section: Decisions (Judgements) - Date: 2022-11-29 - Case/document no.: RCOMAA 00077/2022/CA - Collection: Court of Appeal

## Text

## Page 1

NK SPAREPARTS v. UNGUKA BANK PLC [Rwanda URUKIKO RW’UBUJURIRE – RCOMAA 00077/2022/CA (Kamere, P.J.) 29 Ugushyingo 2022] Amategeko agenga imiburanishirize y’imanza z’ubucuruzi – Ubujurire bwa Kabiri – Kutakira ubujurire – Gutsindwa kubera impamvu zimwe – Igisobanuro cy’impamvu zimwe – Mu gusesengura izo mpamvu hagomba kurebwa icyaburanwaga n’imitekerereze ya buri Rukiko (raisonnement juridique) mu kugaragaza impamvu zashingiweho, kugirango rugere ku cyemezo rwafashe, hitawe ku kureba niba ingingo zaburanweho ku rwego rwa mbere ari zo zagarutsweho mu bujurire kandi Inkiko zombi zazisubijeho mu buryo bumwe. Incamake y’ikibazo: NK SPARE PARTS Ltd ihagarariwe na Nkaka Mohammed yagiranye amasezerano y’inguzanyo na UNGUKA BANK Plc, aho UNGUKA BANK Plc yahaye NK SPARE PARTS Ltd inguzanyo ya 253.000.000 Frw mu byiciro bitatu, izo nguzanyo zari zigenewe kubaka, kugura machine no gukora installation y’umuriro mu ruganda rutunganya kawunga. Biturutse ku busabe bwa NK SPARE PARTS Ltd habayeho kuvugurura amasezerano, ku nguzanyo ya mbere hasigaye kwishyurwa 103.095.500 Frw impande zombi zemeranya ko hazajya hishyurwa 2.617.948 Frw mu gihe cy’amezi 60 ku nyungu ya 18%, naho ku nguzanyo ya kabiri hakaba hari hasigaye kwishyurwa 139.929.847 Frw, hemezwa ko hazajya hishyurwa 4.765.259 Frw buri kwezi mu gihe cy’amezi 39 ku nyungu ya 18%, bigatangira kubahirizwa kuva mu kwezi k’Ugushyingo 2017 ariko NK SPARE PARTS Ltd ikavuga ko n’ubwo UNGUKA BANK Plc yabyemeye itigeze yubahiriza ayo masezerano ndetse n’impinduka yemeye kuyakoraho. Nyuma yo kubona UNGUKA BANK Plc itubahirije amasezerano ndetse n’impinduka yemeye kuyakora, NK SPARE PARTS Ltd yareze UNGUKA BANK Plc mu Rukiko rw’Ubucuruzi ivuga ko itubahirije amasezerano zagiranye, inasaba kwemeza umwenda yari iyifitiye mbere yo guhabwa integuza ya nyuma, n’umwenda wasigaye nyuma ya cyamunara ku mitungo yagurishijwe. Uregwa yatanze inzitizi ebyiri z’indemyagihugu asaba ko zabanza gusuzumwa, inzitizi ya mbere y’uko umuntu Nkaka Muhammed yahaye uburenganzira bwo kuburanira no guhagararira Sosiyete NK SPARE PARTS Ltd, yashyizweho mu buryo budakurikije amategeko, agasaba ko uwo washyizweho atakwemererwa kuyihagararira; inzitizi ya kabiri yasabye urwo Rukiko ko ikirego kitakwakirwa ngo cyongere kuburanishwa, kuko amasezerano yaregewe yaburanweho, ndetse n’umwenda waregewe waburanweho ndetse habayeho kujurira nabwo baratsindwa. Urukiko rwakijije urwo rubanza maze rwemeza ko uburenganzira Nkaka Mohamed yahaye Byiringiro Emmanuel Clément kugira ngo amuhagararire mu rubanza bwatanzwe nabi, ko iyo nyandiko itakwemerwa kugira ngo Byiringiro Emmanuel Clément ahagararire Sosiyete yatanze ikirego ariko akaba atari yo yatanze uburenganzira, ahubwo bwaratanzwe na Nkaka Mohammed; rwemeza ko Umwenda NK SPARE PARTS isaba ko wemezwa, uzwi neza kandi waburanweho mu rubanza rwabaye hagati ya UNGUKA BANK Plc irega NK SPARE PARTS, Nkaka Mohammed na Kabibi Muhikira Rachel abishingizi ba NK SPARE PARTS, ko umubare w’amafaranga y’umwenda wasigaye nyuma ya Cyamunara na wo uzwi neza kandi waburanweho

## Page 2

mu rubanza rwabaye itegeko, ikirego nticyakirwa kuko Urukiko rutakongera kubifataho icyemezo ubwa kabiri kuko ibyaburanweho byabaye Itegeko. Urega ntiyishimiye imikirize y’urubanza ajurira mu Rukiko Rukuru rw’Ubucuruzi, arusaba gusuzuma ishingiro ry’icyashingiweho n’Urukiko rw’Ubucuruzi mu kwemeza ko ikirego cyabaye itegeko, no gusuzuma niba mu kwemeza ko ikirego kitagombaga kwakirwa kuko ibyo iregera byaburanweho mu Rukiko rw’Ubucuruzi, byaba byaragaragarijwe ibimenyetso ku buryo byakwemezwa ko ari ukuri. Urwo Rukiko rwemeje ko ubujurire nta shingiro bufite, rushingiye kukuba Urukiko rw’ubucuruzi rufata icyemezo rwashingiye ku kukuba mu manza zose zaburanwe haraburanwemo inguzanyo zimwe, ku masezerano amwe hagati y’ababuranyi bamwe n’abishingizi bamwe (n’ubwo hamwe bagiye bagaragara ntibagaragare ahandi) ndetse n’ingwate zimwe. Nyuma yo kutishimira imikirize y’urwo rubanza, yajuririye mu Rukiko rw’Ubujurire, anenga kuba Urukiko Rukuru rw’Ubucuruzi rwaranze kwakira ikirego rushingiye ku kuba ikiburanwa cyaburanwe kigafatwaho icyemezo, ari cyo cyagaruwe mu rundi rubanza, ko rwitiranyije imanza RCOM 02376/2019/TC n’urubanza RCOM 00092/2020/TC rukemeza ko ikiburanwa ari kimwe kandi ntaho zihuriye. Uregwa mbere yo kwiregura yatanze inzitizi y’iburabubasha bw’Urukiko rw’Ubujurire, avuga ko ubujurire butagomba kwakirwa kuko urega yatsinzwe ku mpamvu zimwe mu nkiko zombi zabanje ndetse yiregura mu rubanza mu mizi avugako nta kwitiranya imanza kwabayeho kuko muri izo manza zose ikiregerwa gishingiye ku masezerano y’iguriza n’umwenda wasigaye nyuma ya cyamunara. Urega yiregura kuri iyo nzitizi avuga ko nta shingiro ifite, kuko atatsinzwe hashingiwe ku mpamvu zimwe mu Nkiko zombi zabanje, ko mu Rukiko Rukuru rw’Ubucuruzi Umucamanza yanenze ko batazanye ibimenyetso by’urwo rubanza rutari rwagaciwe, ko rutabaye itegeko, naho mu Rukiko rw’Ubucuruzi akaba yari yavuze ko urukiko rutafata icyemezo ku rubanza rwaciwe n’Urukiko Rukuru rw’Ubucuruzi, avuga kandi ko ubujurire bwe buri mu bubasha bw’Urukiko rw’Ubujurire, kuko urubanza rujuririrwa rwaciwe n’Urukiko Rukuru rw’Ubucuruzi, no kuba ikiburanwa ari ukwica amasezerano y’inguzanyo afite agaciro ka 253.000.000 Frw. Incamake y’icyemezo: Ikibazo cyaburanishijwe n’Inkiko kigafatwaho icyemezo ndetse kikaba itegeko, umuburanyi ntashobora kongera kukiregera, n’Urukiko ntirushobora kucyakira nk’impamvu yo gutsindwa ku mpamvu z’imwe, kuko kwemera kucyacyira binyuranyije n’amategeko abuza kongera kuburanisha icyamaze gucibwaho urundi rubanza (non bis in idem). Ubujurire ntibwakiriwe. Amagarama y’urubanza ahwanye n’ibyarukozwemo. Amategeko yifashishijwe: Itegeko Nº 30/2018 ryo ku wa 02/06/2018 rigena ububasha bw’Inkiko, Ingingo ya 52. Imanza zifashishijwe:

## Page 3

Urubanza nº RC/INJUST/RCOM 00002/2020/SC; Road Solution Pavements Product v Mailco Ltd rwaciwe n’Urukiko rw’Ikirenga ku wa 25/09/2020, Urubanza RCOMAA 00043/2021/CA; HIGH END DEVELOPERS Ltd v MURERWA Annet, ODUOR EDGAR DICKSON OMALA OTIENO na RIGHT Ltd, Urubanza nº RCOMAA 00060/2022/CA; Nyamaswa Raphael v BPR Plc rwaciwe n’Urukiko rw’Ubujurire ku wa 28/07/2022, Urubanza nº RCOMAA 00012/2022/CA; BUFCOFFEE Ltd v TEUSCHER INVEST Ltd, yahindutse KIVUBELT COFFEE Ltd. Urubanza I. IMITERERE Y’URUBANZA [1] Mu mwaka wa 2016 n’uwa 2017, NK SPARE PARTS Ltd ihagarariwe na Nkaka Mohammed yagiranye amasezerano y’inguzanyo na UNGUKA BANK Plc, yahawe nº 112/2016, aho UNGUKA BANK Plc yahaye NK SPARE PARTS Ltd inguzanyo ya 253.000.000 Frw mu byiciro bitatu, icyiciro cya mbere gihwanye na 161.000.000 Frw ikiyiha ku wa 30/12/2016, akubiyemo 70.000.000 Frw yo kwishyura inguzanyo yo muri AB BANK RWANDA Plc, na 91.000.000 Frw agenewe kwishyura inguzanyo ya I & M BANK RWANDA, aho hagombaga kujya hishyurwa 4.729.374 Frw buri kwezi mu gihe cy’amezi 48, icya kabiri gihwanye 35.000.000 Frw ikiyiha ku wa 06/01/2017, naho icya gatatu gihwanye na 57.000.000 Frw ikiyiha ku wa 08/03/2017, inguzanyo yahawe mu cyiciro cya kabiri n’icya gatatu yose hamwe ingana na 92.000.000 Frw yari igenewe kubaka, kugura machine no gukora installation y’umuriro mu ruganda rutunganya kawunga, igomba kwishyurwa mu mezi 60, hagenda hishyurwa 2.336.195 Frw buri kwezi. Mu ngingo ya 11 y’ayo masezerano impande zombi zumvikanye ko ayo masezerano agomba gushyirwa mu bikorwa akimara gushyirwaho umukono. [2] Ku wa 19/10/2017, ku busabe bwa NK SPARE PARTS Ltd habayeho kuvugurura amasezerano, ku nguzanyo ya mbere hasigaye kwishyurwa 103.095.500 Frw impande zombi zemeranya ko hazajya hishyurwa 2.617.948 Frw mu gihe cy’amezi 60 ku nyungu ya 18%, naho ku nguzanyo ya kabiri hakaba hari hasigaye kwishyurwa 139.929.847 Frw, hemezwa ko hazajya hishyurwa 4.765.259 Frw buri kwezi mu gihe cy’amezi 39 ku nyungu ya 18%, bigatangira kubahirizwa kuva mu kwezi k’Ugushyingo 2017. NK SPARE PARTS Ltd ivuga ko n’ubwo UNGUKA BANK Plc yabyemeye itigeze yubahiriza ayo masezerano yo ku wa 21/12/2016 n’impinduka yemeye gukora ku wa 19/10/2017. [3] NK SPARE PARTS Ltd yareze UNGUKA BANK Plc mu Rukiko rw’Ubucuruzi, ikirego cyayo gihabwa RCOM 00092/2020/TC, ivuga ko itubahirije amasezerano zagiranye, inasaba kwemeza umwenda yari iyifitiye mbere yo guhabwa integuza ya nyuma yo ku wa 30/11/2017, n’umwenda wasigaye nyuma ya cyamunara ku mitungo yagurishijwe. [4] UNGUKA BANK Plc mbere yo kwiregura yatanze inzitizi ebyiri z’indemyagihugu, ku nzitizi ya mbere isaba ko uwitwa Byiringiro Emmanuel Clément wahawe uburenganzira na Nkaka Mohammed bwo guhagararira Sosiyete NK SPARE PARTS Ltd atakwemerwa kuko yashyizweho mu buryo budakurikije amategeko ngo kuko iyi Sosiyete ari yo yagombaga kubumuha, ishingiye ku ngingo ya 85 y’Itegeko nº 21/2012 ryo ku wa 14/06/2012 ryerekeye

## Page 4

imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi. Ku birebana n’inzitizi ya kabiri, UNGUKA BANK Plc yasabye ko ikirego cya NK SPARE PARTS Ltd kitakwakirwa, kuko amasezerano n’umwenda byaregewe byaburanweho mu rubanza RCOM 02376/2019/TC rwaciwe n’Urukiko rw’Ubucuruzi, rukaza kujuririrwa mu rubanza RCOMA 00133/2021/HCC. [5] Ku birebana n’urubanza mu mizi, UNGUKA BANK Plc yireguye ivuga ko mu ngingo ya 3, agace ka 3.2 y’amasezerano y’inguzanyo impande zombi zagiranye, zumvikanye ko inyungu zisanzwe ku nguzanyo zibarirwa kuri 18% ku mwaka, inyungu z’ubukerererwa zibarirwa kuri 4% ku kwezi ku mafaranga ari mu bukererwe, ko kandi Nkaka Muhammed na Kabibi Muhikira Rachel bishingiye iyo myenda ndetse batangaho ingwate y’inzu ifite UPI : 1/02/09/01/3159, UPI :1/02/12/02/2780 na UPI :1/02/12/02/2779. Isobanura ko nyuma yo kubona ko NK SPARE PARTS Ltd itishyura neza nk’uko yabyiyemeje mu masezerano zagiranye, yasabye Umwaditsi Mukuru muri RDB gushyiraho ushinzwe kugurisha ingwate (Receiver), hanyuma imitungo yari yatanzweho ingwate igatezwa cyamunara, umutungo ufite UPI: 1/02/12/02/2780 ugurishwa 75.000.000 Frw, naho ufite UPI:1/02/12/02/2779 ugurishwa 55.000.000 Frw, nyuma yo gukuramo ibyakoreshejwe muri cyamunara, UNGUKA BANK Plc ikishyurwa 122.440.769 Frw ahwanye 66.652.704 Frw + 55.788.064 Frw, ariko atashoboye kuvamo ubwishyu bwose bw’umwenda NK SPARE PARTS Ltd yari iyibereyemo. UNGUKA BANK Plc ivuga ko nyuma yo kubona ko ubwishyu bwose butabonetse, yatanze ikirego mu Rukiko rw’Ubucuruzi kuri nº RCOM 02376/2019/TC, isaba Urukiko kwemeza no gutegeka NK SPARE PARTS Ltd n’abishingizi bayo kwishyura umwenda wasigaye ungana na 125.372.420 Frw (80.086.391 Frw yo ku nguzanyo ya mbere na 45.286.029 Frw yo ku nguzanyo ya kabiri), umwenda remezo n’inyungu bibazwe kugeza ku wa 01/08/2019 kandi inyungu zisanzwe n’iz’ubukerererwe zigakomeza kubarwa kugeza urubanza ruciwe. Muri urwo rubanza Urukiko rw’Ubucuruzi rukaba rwarategetse NK SPARE PARTS Ltd kwishyura amafaranga angana na 125.372.420 Frw y’umwenda wasigaye utishyuwe nyuma yo kugurisha ingwate muri cyamunara, yaba itawishyuye, Nkaka Mohammed na Kabibi Muhikira Rachel bishingiye inguzanyo yahawe bakawishyura. Ko icyo cyemezo NK SPARE PARTS Ltd yakijuririye mu Rukiko Rukuru rw’Ubucuruzi, ubujurire bwayo ntibwakiriwe hashingiwe ku kuba itarubahirije ibihe byo kujurira. [6] NK SPARE PARTS Ltd yatanze nanone ikirego mu Rukiko rw’Ubucuruzi, irega UNGUKA BANK Plc ukwica amasezerano no kwemeza umwenda NK SPARE PARTS Ltd yari ifitiye UNGUKA BANK mbere yo guhabwa integuza ya nyuma yo ku wa 30/11/2017, n’umwenda wasigaye nyuma ya cyamunara ku mitungo yagurishijwe. Uhagarariye UNGUKA BANK, PLC yatanze inzitizi ebyiri z’indemyagihugu asaba ko zabanza gusuzumwa, inzitizi ya mbere y’uko umuntu Nkaka Muhammed yahaye uburenganzira bwo kuburanira no guhagararira Sosiyete NK SPARE PARTS Ltd, yashyizweho mu buryo budakurikije amategeko, agasaba ko uwo washyizweho na Nkaka Muhammed witwa Byiringiro Emmanuel Clément atakwemererwa guhagararira NK SPARE PARTS Ltd; inzitizi ya kabiri yasabye urwo Rukiko ko ikirego kitakwakirwa ngo cyongere kuburanishwa, kuko amasezerano yaregewe yaburanweho, ndetse n’umwenda waregewe waburanweho mu rubanza RCOM 02376/2019/TC rwakirijwe muri urwo Rukiko, rukajuririrwa mu rubanza RCOMA 00133/2021/HCC nabwo baratsindwa. [7] Urukiko rw’Ubucuruzi, rushingiye ku kuba rwarasanze procuration yo guhagararira NK SPARE PARTS Ltd yahawe Byiringiro Emmanuel Clément idakurikije amategeko, kuko

## Page 5

yayihawe n’umuntu ku giti cye kandi agomba guhagararira sosiyete, rushingiye kandi ku kuba rwarasanze umwenda uburanwa waraburanwe mu rubanza RCOM 02376/2019/TC rwabaye Itegeko, ku wa 30/03/2021 rwakijije urwo rubanza, maze rwemeza ko uburenganzira Nkaka Mohamed yahaye Byiringiro Emmanuel Clément kugira ngo amuhagararire mu rubanza bwatanzwe nabi, ko iyo nyandiko itakwemerwa kugira ngo Byiringiro Emmanuel Clément ahagararire Sosiyete yatanze ikirego ariko akaba atari yo yatanze uburenganzira (habayeho kwitiranya Sosiyete n’Umuyobozi wayo), ahubwo bwaratanzwe na Nkaka Mohammed. Rwemeza kandi ko Umwenda NK SPARE PARTS isaba ko wemezwa, uzwi neza kandi waburanweho mu rubanza RCOM 02376/2019/TC rwabaye hagati ya UNGUKA BANK Plc irega NK SPARE PARTS, Nkaka Mohammed na Kabibi Muhikira Rachel abishingizi ba NK SPARE PARTS, ko umubare w’amafaranga y’umwenda wasigaye nyuma ya Cyamunara na wo uzwi neza, kandi waburanweho mu rubanza RCOM 02376/2019/TC ubu rwabaye itegeko, ko ikirego RCOM 00092/2020/TC kitagomba kwakirwa ngo kiburanishwe mu mizi kuko ibyo NK SPARE PARTS Ltd iregera byaburanweho, rukaba rutakongera kubifataho icyemezo ubwa kabiri kuko ibyaburanweho byabaye Itegeko. Rutegeka NK SPARE PARTS Ltd guha UNGUKA BANK Plc indishyi z’ibyakozwe ku rubanza zihwanye na 700.000 Frw. [8] NK SPARE PARTS Ltd ntiyishimiye imikirize y’urubanza RCOM 00092/2021/TC, iyijuririra mu Rukiko Rukuru rw’Ubucuruzi, ubujurire bwayo buhabwa RCOMA 00337/2021/HCC, irusaba gusuzuma ishingiro ry’icyashingiweho n’Urukiko rw’Ubucuruzi mu kwemeza ko ikirego RCOM 02376/2019/TC cyabaye itegeko, no gusuzuma niba mu kwemeza ko ikirego RCOM 00092/2021/TC kitagombaga kwakirwa kuko ibyo iregera byaburanweho mu Rukiko rw’Ubucuruzi, byaba byaragaragarijwe ibimenyetso ku buryo byakwemezwa ko ari ukuri, inasaba igihembo cya Avoka n’amafaranga y’ikurikiranarubanza. Urukiko Rukuru rw’Ubucuruzi rwasuzumye ibibazo bijyanye no kumenya ishingiro ry’icyashingiweho n’Urukiko rw’Ubucuruzi mu kwemeza ko ikirego RCOM 02376/2019/TC cyabaye Itegeko hamwe no gusuzuma niba hari ibimenyetso bifite ishingiro bigaragaza ko ikirego RCOM 00092/2021/TC kitagombaga kwakira kuko ibyo kiregera byaburanyweho muri urwo Rukiko, ndetse n’ibyerekeye indishyi z’ikurikiranarubanza n'igihembo cya Avoka. [9] Urukiko Rukuru rw’Ubucuruzi rushingiye ku isesengura ryakozwe n’Urukiko rw’Ubucuruzi mu bika byarwo bya [9], [10], [15] na [16] by’urubanza RCOM 02376/2019/TC rwaciwe n’Urukiko rw’Ubucuruzi kuwa 11/12/2020, n’iryakozwe mu gika cya [10] cy’urubanza RCOMA 00133/2021/HCC rwaciwe n’Urukiko Rukuru rw’Ubucuruzi ku wa 10/12/2021, runashingiye ku byakozwe n’Urukiko rw’Ubucuruzi mu bika bya [10] na [12] by’urubanza RCOM 00092/2020/TC rwajuririwe, rusanga Urukiko rw’Ubucuruzi rwaragaragaje mu rubanza rwajuririwe, ishingiro ry’ibyo rwagendeyeho mu kwemeza ko ikirego RCOM 02376/2019/TC cyabaye itegeko (kuko cyashimangiwe na RCOMA 00133/2021/HCC), bityo ko kitagombaga kwakirwa, kuko muri izo manza zose, haburanwemo inguzanyo zimwe, ku masezerano amwe hagati y’ababuranyi bamwe n’abishingizi bamwe (n’ubwo hamwe bagiye bagaragara ntibagaragare ahandi) ndetse n’ingwate zimwe; hanashingiwe ku kuba ingingo ya 14 y’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, iteganya ko Urubanza rwaciwe ku rwego rwa nyuma ntirushobora kongera kuburanishwa bundi bushya ku mpamvu zimwe no ku kiburanwa kimwe hagati y’ababuranyi bamwe baburana ikirego kimwe. Rusanga ubujurire bwa NK SPARE PARTS Ltd budafite ishingiro. Rusanga kandi igomba guha UNGUKA BANK Plc indishyi z’igihembo cya Avoka n’ikurikiranarubanza.

## Page 6

[10] Ku wa 27/05/2022, Urukiko Rukuru rw’Ubucuruzi rwakijije urwo rubanza maze rwemeza ko ubujurire bwa NK SPARE PARTS Ltd nta shingiro bufite, ko imikirize y’urubanza RCOM 00092/2021/TC rwaciwe n’Urukiko rw’Ubucuruzi ku wa 30/03/2021 rwajuririwe idahindutse. Rutegeka NK SPARE PARTS Ltd guha UNGUKA BANK Plc amafaranga ibihumbi magana atanu (500.000 Frw) y’igihembo cya Avoka n’amafaranga ibihumbi magana abiri (200.000 Frw) y’ikurikiranarubanza, yose akaba ibihumbi magana arindwi (700.000 Frw) muri ubwo bujurire, yiyongera kuri 700.000 Frw yari yategetswe ku rwego rubanza. [11] Ku wa 25/06/2022, NK SPARE PARTS Ltd yajuririye urubanza RCOMA 00337/2021/HCC mu Rukiko rw’Ubujurire, ubujurire bwayo buhabwa RCOMAA 00077/2022/CA, inenga kuba Urukiko Rukuru rw’Ubucuruzi rwaranze kwakira ikirego cyayo rushingiye ku kuba ikiburanwa cyaburanwe mu rubanza RCOM 02376/2019/TC kigafatwaho icyemezo, ari cyo cyagaruwe mu rubanza RCOM 00092/2020/TC, ko rwitiranyije imanza RCOM 02376/2019/TC n’urubanza RCOM 00092/2020/TC rukemeza ko ikiburanwa ari kimwe kandi ntaho zihuriye. [12] UNGUKA BANK Plc mbere yo kwiregura itanga inzitizi y’iburabubasha bw’Urukiko rw’Ubujurire, ivuga ko ubujurire bwa NK SPARE PARTS Ltd butagomba kwakirwa kuko yatsinzwe ku mpamvu zimwe mu nkiko zombi zabanje. Ku birebana n’urubanza mu mizi, UNGUKA BANK Plc yireguye ivuga ko nta kwitiranya imanza kwabayeho, ko Inkiko zabanje zasuzumye icyaburanwe mu rubanza RCOM 02376/2019/TC zigasanga ari na cyo cyongeye kuregerwa mu rubanza RCOM 00092/2020/TC, kuko muri izo manza zose ikiregerwa gishingiye ku masezerano y’iguriza n’umwenda wasigaye nyuma ya cyamunara, kandi ko kugeza ubu NK SPARE PARTS Ltd itashoboye kugaragaza icyo inenga isesengura ryakozwe n’inkiko zabanje kugira ngo bibe byashingirwaho hemezwa ko habayeho kwitiranya imanza zavuzwe haruguru. [13] Iburanisha ry’urubanza ryashyizwe ku wa 07/11/2022, risubikwa ku mpamvu yumvikana y’Urukiko, ryimurirwa ku wa 23/11/2022. Uwo munsi urubanza ruburanishwa NK SPARE PARTS Ltd mu izina ry’umuyobozi wayo ihagarariwe n’umukozi wayo Byiringiro Emmanuel Clément wabiherewe ubutumwa, yunganiwe na Me Kamali Nyampatse Valence, naho UNGUKA BANK Plc ihagarariwe na Me Nkeza Sempundu Clément, hasuzumwa ibijyanye n’inzitizi yatanzwe n’uregwa usaba ko ikirego cya NK SPARE PARTS Ltd kitakwakirwa kuko nta bubasha Urukiko rufite bwo kukiburanisha. Hanasuzumwe kandi ikibazo cy’amafaranga yerekeranye n’ikurikiranarubanza ndetse n’igihembo cya Avoka mu gihe urubanza rwaba rurangiriye kuri iryo suzuma ry’iyi nzitizi. Nyuma y’uko ababuranyi bamenyesheje Urukiko ko ku bindi bitavugiwe mu iburanisha rwazashingira ku byavuzwe mu nyandikomvugo y’inama ntegurarubanza impande zombie zashyizeho umukono, Urukiko rwatangaje ko icyemezo cyarwo kizasomwa ku wa 29/11/2022. ISESENGURA RY’IBIBAZO BIGIZE URUBANZA Gusuzuma niba ubujurire bwatanzwe na NK SPARE PARTS Ltd butari mu bubasha  bw’uru Rukiko rw’Ubujurire kubera gutsindwa ku mpamvu zimwe mu nkiko zombi zabanje [14] Me Nkeza Sempundu Clément uhagarariye UNGUKA BANK Plc asobanura ko mu rubanza RCOM 00092/2021/TC, rwaciwe n’Urukiko rw’Ubucuruzi ku wa 30/03/2021 NK

## Page 7

SPARE PARTS Ltd yaregeye kwica amasezerano no kwemeza umwenda yari ifitiye UNGUKA BANK Plc mbere yo guhabwa integuza ya nyuma yo ku wa 30/11/2017, n’umwenda wasigaye nyuma ya cyamunara ku mitungo yagurishijwe, mu bibazo rwasuzumye hakaba harimo ikijyanye no kumenya niba ikirego cyerekeye umwenda UNGUKA BANK Plc yahaye N.K SPARE PARTS Ltd cyakwakirwa kandi uwo mwenda waraburanweho mu rubanza RCOM 02376/2019/TC Urukiko rukabifataho icyemezo, maze mu gika cya 10 cy’urubanza RCOM 00092/2021/TC, Urukiko rw’Ubucuruzi ruvuga ko kuba hari urubanza RCOM 02376/2019/TC, NK SPARE PARTS Ltd yarezwemo na UNGUKA BANK Plc rwaburanishirije, rwajuririwe mu Rukiko Rukuru rw’Ubucuruzi kuri RCOMA 00133/2021/HCC rwafashwemo icyemezo, rusanga umuburanyi wese wafatiwe icyemezo muri izo manza akagira ibyo atishimira, yabibariza muri urwo Rukiko rwajuririwe cyangwa akabijyana ku rwego Rwisumbuye ku rwo urubanza rwajuririweho, kuko icyo kibazo kitakongera gusuzumwa ku nshuro ya kabiri ku rwego rubanza, hasabwa gufata icyemezo kivuguruza icyafashwe n’Urukiko rurukuriye. Ko kandi mu gika cya 11 cy’urubanza RCOM 00092/2021/TC Urukiko rwasobanuye neza ko inzira zose NK SPARE PARTS Ltd yakoresha isaba kurenganurwa, yazisabira mu rwego rwafashe icyemezo ku rwego rwa nyuma cyangwa urwego rurukuriye. Ngo naho mu gika cya 12 cy’urwo rubanza Urukiko rw’Ubucuruzi rwavuze ko nyuma yo kubona ko ibyaregewe mu rubanza RCOM 02376/2019/TC bishingiye ku nguzanyo zimwe, amasezerano amwe, abishingizi bamwe n’ingwate zimwe byaburanweho mu rubanza rwaciwe ; rusanga ikirego urubanza rushingiyeho byaraburanweho bigafatwaho icyemezo, rutakongera kuburanisha imanza zisa ubwa kabiri ku rwego rumwe. Bityo ko icyo kirego kitagomba kwakirwa. [15] Asobanura ko mu rubanza RCOMA 00337/2021/HCC Urukiko Rukuru rw’Ubucuruzi rwasuzumye ikibazo kijyanye no kumenya niba mu kwemeza ko ikirego RCOM 00092/2021/TC kitagomba kwakira hashingiwe ku kuba ibyaburanwaga byari byaburanyweho mu rubanza RCOM 02376/2019/TC rwaciwe n’Urukiko rw’Ubucuruzi, rubona ko ikirego kitagombaga kwakirwa, kuko muri izo manza zose, haburanwemo inguzanyo zimwe, ku masezerano amwe, hagati y’ababuranyi bamwe n’abishingizi bamwe. Ko rero kuba Inkiko zombi zabanje zarahurije ku kwemeza ko ikirego cya NK SPARE PARTS Ltd kitagombaga kwakirwa, zishingiye ku kuba ibyo NK SPARE PARTS Ltd yaregeye mu rubanza RCOM 00092/2021/TC, birebana n’amasezerano y’inguzanyo, ari byo byaburanwe mu rubanza RCOM 02376/2019/TC hagati y’ababuranyi bamwe, ndetse n’abishingizi bamwe, bituma ubu bujurire bwayo butakirwa, hashingiwe ku ngingo ya 52 igika cya 3 y’Itegeko N°30/2018 ryo ku wa 02/06/2018 rigena ububasha bw’Inkiko, ku rubanza RCOMAA 00035/2020/CA rwaciwe n’Urukiko rw’Ubujurire ku wa 12/02/2021, ndetse no ku rubanza RS/INJUST/RCOM 00002/2020/SC rwaciwe n’Urukiko rw’Ikirenga ku wa 25/09/2020. [16] Mu gusoza asaba Urukiko rw’Ubujurire kwemeza ko ubujurire bwa NK SPARE PARTS Ltd butari mu bubasha bwarwo, kuko imitekerereze y’Inkiko zombi zabanje ari imwe nk’uko bigaragara mu gika cya 10 n’icya 12 by’urubanza RCOM 00092/2021/TC, aho ibyashingiweho ari bimwe n’ibyashingiweho mu gika cya 16 cy’urubanza RCOMA 00337/2021/HCC rujuririrwa, ibyo bikaba bisobanuye ko yatsinzwe ku mpamvu zimwe mu Nkiko zombi ; [17] Byiringiro Emmanuel Clément uhagarariye NK SPARE PARTS Ltd yiregura kuri iyi nzitizi avuga ko nta shingiro ifite, kuko NK SPARE PARTS Ltd itatsinzwe hashingiwe ku mpamvu zimwe mu Nkiko zombi zabanje, ko mu Rukiko Rukuru rw’Ubucuruzi, Umucamanza yanenze ko batazanye ibimenyetso by’urwo rubanza rutari rwagaciwe, ko rutabaye itegeko, naho

## Page 8

mu Rukiko rw’Ubucuruzi akaba yari yavuze ko urukiko rutafata icyemezo ku rubanza rwaciwe n’Urukiko Rukuru rw’Ubucuruzi. Byiringiro avuga kandi ko ukuri guhari ari uko NK SPARE PARTS Ltd ngo yishyuye amafaranga menshi ntiyagaragazwa, ko hagurishijwe ingwate impande zombi zitumvikanye ku ngano y’umwenda usigaye. [18] Me Kamali Nyampatse Valence yavuze ko ubujurire bwa NK SPARE PARTS Ltd buri mu bubasha bw’Urukiko rw’Ubujurire, kuko urubanza rujuririrwa rwaciwe n’Urukiko Rukuru rw’Ubucuruzi, no kuba ikiburanwa ari ukwica amasezerano y’inguzanyo afite agaciro ka 253.000.000 Frw. Asobanura ko mu gika cya 10 cy’urubanza RCOM 00092/2020/TC Urukiko rw’Ubucuruzi mu gufata icyemezo rwashingiye ku kuba ikirego cyatanzwe cyaraburanishijwe mu zindi manza bikaba bidashoboka ko ikirego cyafashweho icyemezo ku rwego rw’ubujurire cyakongera kuburanishwa ku rwego rubanza hasabwa gufata icyemezo kivuguruza icyemezo cyafashwe n’Urukiko rurukuriye nk’uko bigaragara mu gika 10 cy’urubanza RCOM 00092/2020/TC, ko kandi mu gika cya 12 cy’urubanza RCOM 02376/2018/TC, Urukiko rwavuze ko nyuma yo kubona ko ibyaregewe mu rubanza RCOM 02376/2019/TC bishingiye ku nguzanyo zimwe, amasezerano amwe, abishingizi bamwe n’ingwate zimwe byaburanweho mu rubanza rwaciwe, rusanga ikirego urubanza rushingiyeho cyaraburanweho kigafatwaho icyemezo, Urukiko rukaba rutakongera kuburanisha imanza zisa ubwa kabiri ku rwego rumwe, bityo ko icyo kirego kitagomba kwakirwa. [19] Avuga ko mu rubanza RCOMA 00337/2021/HCC, Urukiko Rukuru rw’Ubucuruzi mu gufata rwashingiye ku ngingo ya 12 y’Itegeko N°22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ku ngingo za 2, 3 na 4 z’Itegeko N°15/2004 ryo ku wa 12/06/2004 ryerekeye ibimenyetso mu manza n’itangwa ryabyo, no ku ngingo ya 14 y’Itegeko N°22/2018 ryo kuwa 29/04/2018 ryerekeye imiburashirize y’imanza z’imbonezamubano, iz’ubucuruzi, iz’umurimo n’iz’ubutegetsi. Bityo ko ngo kuba ibi bitandukanye n’ibyashingiweho n’Urukiko rw’Ubucuruzi bigaragara mu gika cya 11 n’icya 12 by’urubanza RCOM 00092/2020/TC, bigaragaza ko NK SPARE PARTS Ltd itatsinzwe ku mpamvu imwe mu nkiko zombi. UKO URUKIKO RUBIBONA [20] Ingingo ya 52, igika cya 2, y’Itegeko Nº 30/2018 ryo ku wa 02/06/2018 rigena ububasha bw’Inkiko iteganya ko Urukiko rw’Ubujurire ruburanisha mu rwego rw’ubujurire bwa kabiri imanza zaciwe n’Urukiko Rukuru, Urukiko Rukuru rw’Ubucuruzi, n’Urukiko Rukuru rwa Gisirikare iyo zujuje ibiteganywa n’iyo ngingo, ariko mu gika cya gatatu cyayo ikongeraho ibikurikira: Icyakora kandi ubujurire bwa kabiri ntibushora kwakirwa ku manza z’ababuranye bemera ibyo baregwa, cyangwa ku muburanyi watsinzwe mu Nkiko zombi hashingiwe ku mpamvu zimwe. [21] Ikibazo cyo kumenya niba impamvu zashingiweho na NK SPARE PARTS Ltd itsindwa ku rwego rwa mbere n’urwa kabiri ari zimwe kigomba gusuzumwa hasesengurwa mu buryo bw’igereranya imikirize y’urubanza kuri izo nzego zombi, ingingo z’ingenzi zasuzumwe na buri Rukiko n’impamvu buri Rukiko rwashingiyeho kugira ngo rugere ku cyemezo rwafashe. [22] Ku bijyanye n’ibisobanuro by’impamvu zimwe, Urukiko rurasanga nk’uko byagiye bisobanurwa mu zindi manza zaciwe, zumvikana nk’ibisobanuro buri Rukiko rwashingiyeho mu

## Page 9

gufata icyemezo cyarwo rugendeye ku byabaye no ku byo amategeko ateganya, kandi ni zo zishingirwaho mu kugaragariza no gusobanurira ababuranyi icyatumye Urukiko rufata icyemezo, akaba ari na zo ziherwaho ababuranyi basuzuma niba imiburanire yabo yarasesenguwe n’Urukiko, bitewe n’uko buri cyemezo cy’Urukiko kigomba kuba cyasobanuriwe impamvu1. [23] Urukiko rw’Ubujurire mu gusesengura izo mpamvu hagomba kurebwa icyaburanwaga n’imitekerereze ya buri Rukiko (raisonnement juridique) mu kugaragaza impamvu zashingiweho, kugira ngo rugere ku cyemezo rwafashe, hitawe ku kureba niba ingingo zaburanweho ku rwego rwa mbere ari zo zagarutsweho mu bujurire kandi ko Inkiko zombi zazisubijeho mu buryo bumwe. [24] Urukiko rw’Ubujurire rurasanga imikirize y’urubanza RCOM 00092/2020/TC rwaciwe n’Urukiko rw’Ubucuruzi ku wa 30/03/2021 igaragaza ko urwo Rukiko rwasesenguye ibibazo bibiri nk’inzitizi zari zatanzwe na UNGUKA BANK Plc, iya mbere ijyanye no kutemerera uwitwa Byiringiro Emmanuel Clément wahawe uburenganzira na Nkaka Mohammed guhagararira Sosiyete NK SPARE PARTS Ltd washyizweho mu buryo budakurikije amategeko. Kuri iki kibazo, bigaragara mu gika cya 6 n’icya 7 by’urwo rubanza ko NK SPARE PARTS Ltd yatsinzwe no kuba Urukiko rushingiye ku biteganywa n’ingingo ya 85 igika cya 3 y’Itegeko Nº 21/2012 ryo ku wa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, rwarasanze procuration yo guhagararira NK SPARE PARTS Ltd yahawe Byiringiro Emmanuel Clément idakurikije amategeko, kuko yayihawe n’umuntu ku giti cye kandi agomba guhagararira sosiyete. Icyo cyemezo kuri iyo nzitizi ntikiri mu byajuririwe na NK SPARE PARTS Ltd kuko ababuranyi bombi bumvikanye ku guhagararirwa mu rubanza na Byiringiro Emmanuel Clément. Iki kikaba rero kitari mu byagereranywa mu mikiririze y’urubanza ku nzego zombi zabanje. [25] Ku nzitizi ya kabiri, UNGUKA BANK Plc yasabye urwo Rukiko ko ikirego kitakwakirwa ngo cyongere kuburanishwa kuko amasezerano yaregewe yaburanweho, ndetse n’umwenda waregewe waburanweho mbere mu rundi rubanza RCOM 02376/2019/TC rwaciwe n’urwo Rukiko, rukajuririrwa mu Rukiko Rukuru rw’Ubucuruzi mu rubanza RCOMA 00133/2021/HCC, nabwo NK SPARE PARTS Ltd igatsindwa. Urukiko rumaze kubona ko izo manza zabayeho NK SPARE PARTS, igafatirwamo ibyemezo n’Urukiko Rukuru rw’Ubucuruzi, itakongera gutanga ikirego mu Rukiko ruri ku rwego rubanza irusaba gufata icyemezo kivuguruza icyafashwe n’Urukiko rurukuriye. Urukiko rwabonye kandi ko ibyaregewe mu rubanza rwasuzumaga bishingiye ku nguzanyo zimwe, amasezerano amwe, abishingizi bamwe 1 Reba mu gika cya 24 cy’ urubanza nº RC/INJUST/RCOM 00002/2020/SC rwaciwe n’Urukiko rw’Ikirenga ku wa 25/09/2020 haburana Road Solution Pavements Product Vs Mailco Ltd. Reba n’igika cya 21 mu rubanza RCOMAA 00043/2021/CA rwaciwe n’Urukiko rw’Ubujurire ku wa 29/12/2021 haburana HIGH END DEVELOPERS Ltd / MURERWA Annet, ODUOR EDGAR DICKSON OMALA OTIENO na RIGHT Ltd. Reba kandi igika cya 21 cy’urubanza nº RCOMAA 00060/2022/CA rwaciwe n’Urukiko rw’Ubujurire ku wa 28/07/2022 haburana Nyamaswa Raphael na BPR Plc. Reba nanone igika cya 17 cy’urubanza nº RCOMAA 00012/2022/CA rwaciwe n’Urukiko rw’Ubujurire ku wa 22/07/2022 haburana BUFCOFFEE Ltd na TEUSCHER INVEST Ltd, yahindutse KIVUBELT COFFEE Ltd.

## Page 10

n’ingwate zimwe byaburanweho mu rubanza RCOM 02376/2019/TC rwaciwe, rusanga ikirego urubanza rushingiyeho cyaraburanweho gifatwaho icyemezo, ku buryo rutaburanisha bwa kabiri ku rwego rumwe imanza zisa. Ibi bisobanuro bigaragara mu bika bya 10 -12 by’urubanza rwajuririwe. [26] Urukiko rw’Ubujurire rurasanga Urukiko Rukuru rw’Ubucuruzi mu mikirize yarwo mu gika cya 16 cy’urubanza RCOMA 00337/2021/HCC, rwaciwe n’Urukiko Rukuru rw’Ubucuruzi ku wa 27/05/2022 nyuma yo gusuzuma impamvu y’ubujurire yatanzwe na NK SPARE PARTS Ltd Gusuzuma ishingiro ry’icyashingiweho n’Urukiko rw’ubucuruzi mu kwemeza ko ikirego RCOM 02376/2019/TC cyabaye Itegeko hamwe no gusuzuma niba hari ibimenyetso bifite ishingiro bigaragaza ko ikirego RCOM 00092/2021/TC kitagombaga kwakira kuko ibyo kiregera byaburanyweho muri urwo Rukiko”. Urukiko rwashingiye ku bigaragara mu manza RCOM 02376/2019/TC rwaciwe n’Urukiko rw’Ubucuruzi ku wa 11/12/2020, cyane cyane mu bika byarwo bya [9], [10], [15] na [16]; urubanza RCOMA 00133/2021/HCC rwaciwe n’Urukiko Rukuru rw’Ubucuruzi ku wa 10/12/2021, cyane cyane mu gika cyarwo cya [29]; runashingiye ku mikirize y’urubanza rwajuririwe, mu bika byarwo bya [10] na cyane cyane [12]; rusanga Urukiko rw’Ubucuruzi rwagaragaje mu rubanza rwajuririwe, ishingiro ry’ibyo rwagendeyeho mu kwemeza ko ikirego RCOM 02376/2019/TC cyabaye Itegeko (Kuko cyashimangiwe na RCOMA 00133/2021/HCC), bityo ko kitagombaga kwakirwa. NK SPARE PARTS Ltd ikaba yaratsinzwe n’uko muri izo manza zose haburanwemo inguzanyo zimwe, ku masezerano amwe hagati y’ababuranyi bamwe n’abishingizi bamwe ndetse n’ingwate zimwe; hanashingiwe kandi ku kuba ingingo ya 14 y’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, iteganya urubanza rwaciwe ku rwego rwa nyuma rudashobora kongera kuburanishwa bundi bushya ku mpamvu zimwe no ku kiburanwa kimwe hagati y’ababuranyi bamwe baburana ikirego kimwe, maze rusanga iyo mpamvu y’ubujurire ya NK SPARE PARTS Ltd idafite ishingiro. [27] Nyuma y’isesengura n’igerereranya ry’impamvu zashingiweho n’Urukiko rw’Ubucuruzi ku rwego rwa mbere n’izashingiweho n’Urukiko Rukuru rw’Ubucuruzi ku rwego rw’ubujurire bwa mbere, Urukiko rw’Ubujurire rurasanga izo nkiko zombi zarasobanuye kimwe impamvu y’ugutsindwa kwa NK SPARE PARTS Ltd no kutakira ikirego cyayo, kuko zombi zasanze kwemera kucyacyira byari kuba byari kuba binyuranyije n’amategeko abuza kongera kuburanisha icyamaze gucibwaho urundi rubanza (non bis in idem). Uru Rukiko rukaba rusanga rero nzitizi y’iburabubasha bw’uru Rukiko yatanzwe na UNGUKA BANK Plc igomba guhabwa ishingiro, bityo ubujurire bwa kabiri bwatanzwe na NK SPARE PARTS Ltd muri uru Rukiko bukaba butagomba kwakirwa ngo busuzumwe hashingiwe ku byibukijwe haruguru biteganywa n’ingingo ya 52 igika cya 3 y’Itegeko Nº 30/2018 ryo ku wa 02/06/2018 rigena ububasha bw’Inkiko. Ibijyanye n’amafaranga y’indishyi, ikurikiranarubanza n’ay’igihembo cya  Avoka asabwa n’ababuranyi. [28] Me Nkeza Sempundu Clément uhagarariye UNGUKA BANK Plc asaba Urukiko gutegeka NK SPARE PART Ltd kuyisubiza 2.000.000 Frw y’igihembo cya Avoka mu bujurire na 600.000 Frw y'ikurikiranarubanza muri ubu bujurire bwa kabiri.

## Page 11

[29] NK SPARE PARTS Ltd ivuga ko aya mafaranga asabwa na UNGUKA BANK Plc nta shingiro afite, ko ayo bagenewe mu rubanza ku nzego zibanza ahagije, ariko ko Urukiko rubibonye ukundi rwayigenera gusa 500.000 Frw y’igihembo cya Avoka, naho ku bireba gukurikirana urubanza ntirengerezwe 50.000 Frw kuko barukurikiraniye kuri interineti batarenze Umujyi wa Kigali. UKO URUKIKO RUBIBONA [30] Ingingo ya 111 y’Itegeko N° 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibikurikira : Ikirego cy’amafaranga y’ikurikiranarubanza ni ikirego gishamikira ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishirizwa rimwe n’ikirego cy’iremezo. Gishobora kandi kwakirwa kikanaburanishwa n’iyo ikirego cy’iremezo cyaba kitakiriwe. [31] Hakurikijwe ibiteganywa n’iyi ngingo imaze kwibutswa haruguru no kuba ikirego cy’ubujurire bwa NK SPARE PARTS Ltd kitakiriwe nk’uko byasobanuwe haruguru, Urukiko rurasanga UNGUKA BANK Plc yarezwe muri ubu bujurire igomba kugenerwa amafaranga y’ikurikiranarubanza n’igihembo cya Avoka ariko kagenwa mu bushishozi bw’Urukiko rushingiye ku byo rubona uregwa akwiye kuba yararutanzeho habayeho gushyira mu gaciro. Bityo NK SPARE PARTS Ltd ikaba igomba kwishyura UNGUKA BANK Plc 500.000 Frw y’igihembo cya Avoka na 100.000 Frw y’ikurikiranarubanza kuri uru rwego. ICYEMEZO CY’URUKIKO [32] Rwemeje ko ubujurire bwatanzwe na NK SPARE PARTS Ltd butakiriwe kuko butari mu bubasha bw’Urukiko rw’Ubujurire ; [33] Rwemeje ko nta gihindutse ku mikirize y’urubanza RCOMA 00337/2021/HCC rwajuririwe ; [34] Rutegetse NK SPARE PARTS Ltd kwishyura UNGUKA BANK Plc 500.000 Frw y’igihembo cya Avoka na 100.000 Frw y’ikurikiranarubanza kuri uru rwego ; [35] Ruvuze ko amafaranga y’amagarama y’uru rubanza yatanzwe na NK SPARE PARTS Ltd ahwanye n’ibyarukozwemo.