UBUSHINJACYAHA vs NSABIMANA

# UBUSHINJACYAHA vs NSABIMANA

- Source: Amategeko - Section: Decisions (Judgements) - Date: 2025-01-27 - Case/document no.: RPAA 00401/2024/CA - Collection: Court of Appeal

## Text

## Page 1

UBUSHINJACYAHA vs NSABIMANA [Rwanda URUKIKO RW’UBUJURIRE – RPAA 00401/2024/CA (Tugireyezu P.J.) 27 Mutarama 2025] Amategeko yerekeye imanza nshinjabyaha – Kugabanya igihano – Mu gihe abaregwa bagabanyirijwe igihano bihagije ku rwego rwa mbere ntibakwiye kongera kugabanyirizwa igihano ku rwego rw’ubujurire. Incamake y’ikibazo: Uru rubanza rwatangiriye mu Rukiko Rwisumbuye rwa Karongi Ubushinjacyaha bukurikiranye uregwa ku cyaha cyo gucuruza ibiyobyabwenge byo mu bwoko bw’urumogi, nyuma yuko Polisi ihagaritse imodoka ya Kivu Belt ya coaster ifite purake RAC 712P yari ivuye Rubavu yerekeza Karongi, hagasakwa abagenzi bari bayirimo, uregwa abonye bageze ku gikapu cye aragita ariruka, bamwirukaho baramufata mu gikapu cye basangamo urumogi udupfunyika magana atanu (boules 500). Urwo Rukiko rwaciye urubanza rwemeza ko uregwa ahamwa n’icyaha cyo gutunda ibiyobyabwenge byo mu bwoko bw’urumogi, ariko rushingiye ku kuba ari ubwa mbere ahamwe n’icyaha, rumugabanyiriza igihano maze rumuhanisha igifungo cy’imyaka makumyabiri n’itanu (25 ans) n’ihazabu ingana na 20.000.000 Frw. Uregwa yajuririye Urukiko Rukuru, Urugereko rwa Rusizi asaba kumugabanyiriza ibihano bikanasubikwa kuko atigeze arushya urukiko, ko mbere yari yaburanye agaragaza ko icyaha yakoze ari icy’uko yafatanwe urumogi rwo guha amatungo, ariko ko ubu yemera icyaha cy’uko yarufatanwe arimo gukorera amafaranga ashakisha ubuzima kubera ikibazo cy’ubukene yari afite ndetse afatiranwa ku bw’ubwenge bucye yabigizemo. Urwo Rukiko narwo rwaciye urubanza rusanga akwiye kugabanyirizwa igihano, maze rumuhanisha igifungo cy’imyaka icumi n’itanu (15 ans) n’ihazabu ingana na miliyoni eshanu (5.000.000 Frw) Uregwa yarongeye ajurira noneho mu Rukiko rw’Ubujurire, avuga ko Urukiko Rukuru rutamugabanyirije igihano ku buryo buhagije kandi yaraburanye yemera icyaha akanagisabira imbabazi, asaba uru Rukiko kongera kumugabanyiriza igihano ndetse kikajya munsi y’igihano gito giteganywa n’itegeko, avuga ko hakwifashishwa umurongo watanzwe n’Urukiko rw’Ubujurire mu RPAA 00448/2021/CA aho uregwa yari akurikiranywe ku cyaha cyo gucuruza ibiyobyabwenge byo mu bwoko bw’urumogi yahanishijwe igihano cy’igifungo cy’imyaka itanu. Ubushinjacyaha bwo buburana buvuga ko impamvu z’ubujurire nta shingiro zifite, ko igihano cy’igifungo cy’imyaka 15 n’ihazabu ya 5.000.000 Frw yahanishijwe ari cyo gito giteganywa n’amategeko hashingiwe ku biteganywa n’ingingo ya 2 y’Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange ndetse ko icyo gihano ari gito ukurikije uburemere bw’icyaha yakoze. Incamake y’icyemezo: 1. Mu gihe abaregwa bagabanyirijwe igihano bihagije ku rwego rwa mbere ntibakwiye kongera kugabanyirizwa igihano ku rwego rw’ubujurire. 2. Igihano gishobora kugabanywa kugera kuri ½ si igihano uwahamwe n’icyaha yahawe, ahubwo ni igihano giteganyirizwa icyaha yahamijwe, maze mu gihe icyo cyaha yahamijwe umushingamategeko yagiteganyirijwe igihano kimara igihe kizwi umucamanza akaba yaganya ariko ntajye munsi ya ½ cy’igihano gito, bityo rero kuba uregwa yarahamijwe icyaha gihanishwa igifungo cya burundu byumvikana ko atarebwa n’ibiteganywa mu ngingo ya 2, agace ka b, y’itegeko Nº 059/2023 ryo ku wa 04/12/2023 rihindura itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ahubwo we arebwa n’ibivugwa muri iyo ngingo ya 2, agace ka a, aho ashobora kugabanyirizwa ariko igifungo ntikijye munsi y’imyaka 15. Amategeko yakoreshejwe:

## Page 2

Ingingo ya 2, igika cya a na d, y’itegeko Nº 059/2023 ryo ku wa 04/12/2023 rihindura itegeko nº 68/2018 ryo ku wa 30/08/2018 riteganya ibyaha n’ibihano muri rusange. Imanza zifashishijwe: Ubushinjacyaha vs. Havugimana Innocent, RPAA 0085/09/CS rwaciwe n’Urukiko rw’Ikirenga ku wa 17/06/2011. Ubushinjacyaha vs. Nsabimana Alias Sankara n’abandi, RPA 00060/2021/CA rwaciwe n’Urukiko rw’Ubujurire ku wa 04/04/2022. Ubushinjacyaha vs. Bimenyimana, RPAA 00048/2020/CA rwaciwe n’Urukiko rw’Ubujurire ku wa 26/05/2022. Ubujurire nta shingiro bufite.

Urubanza I. IMITERERE Y’URUBANZA [1] Ku wa 26/01/2020 nko mu gihe cya saa ine (10h00’), Polisi yahagaritse imodoka ya Kivu Belt ya coaster ifite purake RAC 712P yari ivuye Rubavu yerekeza Karongi, igeze kuri hotel Nyiramacibiri muri Rutsiro, mu gihe bari gusaka abagenzi bari bayirimo, Nsabimana Yves yabonye bageze ku gikapu cye aragita ariruka, bamwirukaho baramufata mu gikapu cye basangamo urumogi udupfunyika magana atanu (boules 500), amaze gufatwa yemera ko amaze ukwezi kumwe acuruza urumogi, ahita ashyikirizwa inzego z’Iperereza. [2] Iperereza rirangiye, Ubushinjacyaha bwatanze ikirego mu Rukiko Rwisumbuye rwa Karongi bukurikiranyeho Nsabimana Yves icyaha cyo gucuruza ibiyobyabwenge byo mu bwoko bw’urumogi, bunasaba ko yahamwa n’icyo cyaha, agahanishwa igihano cy’igifungo cya burundu n’ihazabu ya miliyoni 15. [3] Nsabimana Yves yaburanye ahakana icyaha aregwa cyo gucuruza urumogi, yemera ko yafatanwe urumogi udupfunyika 500 arukuye i Rubavu agaragaza ko rwari urumogi rwo kunywa. [4] Mu rubanza no RP 00089/2020/TGI/KNG rwaciwe ku wa 29/11/2021, Urukiko Rwisumbuye rwa Karongi rwasanze hari ibimenyetso byemeza ko uregwa yakoze icyaha, birimo: - Kuba Nsabimana Yves agifatwa yariyemereye ko urumogi yafatanwe udupfunyika 500 yari arukuye Rubavu arutwaye i Karongi ashaka kujya arunywa; - Inyandiko y’ifatira yo ku wa 27/01/2020 yashyizeho umukono yemera ko urwo rumogi ariwe warufatanwe; - Imvugo z’abatangabuhamya barimo Nkuriyingoma Bosco na Sinumvayino Alphonse bemeza ko Nsabimana Yves yafatanwe ibiyobyabwenge byo mu bwoko bw’urumogi; Urukiko rushingiye kuri ibyo bimenyetso, rwemeje ko Nsabimana Yves ahamwa n’icyaha cyo gutunda ibiyobyabwenge byo mu bwoko bw’urumogi, ariko rushingiye ku kuba ari ubwa mbere Nsabimana Yves ahamwe n’icyaha, rumugabanyiriza igihano maze rumuhanisha igifungo cy’imyaka makumyabiri n’itanu (25 ans) n’ihazabu ingana na 20.000.000 Frw.

## Page 3

[5] Nsabimana Yves ntiyishimiye imikirize y’urubanza, ajuririra mu Rukiko Rukuru, urugereko rwa Rusizi avuga ko mbere yari yaburanye agaragaza ko icyaha yakoze ari icy’uko yafatanwe urumogi rwo guha amatungo, ariko ko ubu yemera icyaha cy’uko yarufatanwe arimo gukorera amafaranga ashakisha ubuzima kubera ikibazo cy’ubukene yari afite ndetse afatiranwa ku bw’ubwenge bucye yabigizemo, asaba Urukiko Rukuru kumugabanyiriza ibihano bikanasubikwa kuko atigeze arushya urukiko.

[6] Uhagarariye Ubushinjacyaha yaburanye avuga ko n’ubwo mbere Nsabimana Yves yaburanye ahakana icyaha ariko ko ubu acyemera, ko rero yakongera akagabanyirizwa maze agahanishwa igifungo cy’imyaka 20 n'ihazabu ya 10.000.000 Frw kuko bule 500 z’urumogi ari nyinshi harebwe abo iki kiyobyabwenge cyari kwangiza. [7] Mu rubanza no RPA 00262/2022/HC/RSZ, rwaciwe ku wa 09/05/2024, Urukiko Rukuru, Urugereko rwa Rusizi rwasanze Nsabimana Yves akwiye kugabanyirizwa igihano, maze rumuhanisha igifungo cy’imyaka icumi n’itanu (15 ans) n’ihazabu ingana na miliyoni eshanu (5.000.000 Frw). [8] Nsabimana Yves ntiyishimiye imikirize y’urwo rubanza, ajuririra mu Rukiko rw’Ubujurire, urubanza ruhabwa nº RPAA 00401/2024/CA, iburanishwa rishyirwa ku wa 07/01/2025, Nsabimana Yves yunganiwe na Me Rusagara Innocent naho Ubushinjacyaha buhagarariwe na Uwizeye Jean Marie, Umushinjacyaha ku rwego rw’igihugu. [9] Mu mwanzuro w’ubujurire no mu miburanire yabo, Nsabimana Yves n’umwunganira bavuga ko Urukiko Rukuru rutamugabanyirije igihano ku buryo buhagije kandi yaraburanye yemera icyaha akanagisabira imbabazi. Basaba uru Rukiko kongera kumugabanyiriza igihano ndetse kikajya munsi y’igihano gito giteganywa n’itegeko hashingiwe ku ngingo ya 2 y’Itegeko nº 059/2023 ryo ku wa 04/12/2023 04/12/2023 rihindura ingingo ya 60 y’ Itegeko nº 68/2018 ryo ku wa 30/08/2018 30/08/2018 30/08/2018 riteganya ibyaha n’ibihano muri rusange ivuga ko “Iyo umucamanza yemeje impamvu nyoroshyacyaha, ashobora kugabanya igihano ku buryo bukurikira (b) igifungo kimara igihe kizwi kiva ku mezi 6 kuzamura gishobora kugabanywa, ariko ntikijye munsi ya kimwe cya kabiri cy’igihano gito giteganyirijwe icyaha cyakozwe, ko hakwifashishwa umurongo watanzwe n’Urukiko rw’Ubujurire aho mu rubanza Nº RPAA 00448/2021/CA rwaciwe ku wa 20/10/2023 Ubushinjacyaha bukurikisranyeho Nzaramba Jean Baptiste icyaha cyo gucuruza ibiyobyabwenge byo mu bwoko bw’urumogi maze Urukiko rwemeza impamvu nyoroshyacyaha maze rumuhanisha igihano cy’imyaka 5 n’ihazabu ya 2.000.000 Frw, aho kuba imyaka 20 n’ihazabu ya 20.000.000 Frw yahanishijwe n’urukiko rubanza. [10] Uhagarariye Ubushinjacyaha avuga ko impamvu z’ubujurire za Nsabimana Yves n’umwunganira zigamije gusaba kongera kugabanyirizwa igihano nta shingiro zikwiye guhabwa kuko igihano cy’igifungo cy’imyaka 15 n’ihazabu ya 5.000.000 Frw yahanishijwe ari cyo gito giteganywa n’amategeko hashingiwe ku biteganywa n’ingingo ya 2 y’Itegeko nº 059/2023 ryo ku wa 04/12/2023 rihindura Itegeko nº 68/2018 ryo ku wa 30/08/2018 riteganya ibyaha n’ibihano muri rusange ndetse ko icyo gihano ari gito ukurikije uburemere bw’icyaha yakoze cyo gutunda no gucuruza ingano itubutse y’ibiyobyabwenge byo mu bwoko bw’urumogi aho yafatanwe boules 500 z’urumogi. [11] Uhagarariye Ubushinjacyaha asaba Urukiko ko icyo gihano cy’igifungo cy’imyaka 15 y’igifungo Nsabimana Yves yahawe kitahinduka nk’uko byemejwe mu zindi manza zahanishije abandi bakoze ibyaha nk’ibye harimo n’icyo gihano nyine cyagenewe uwiwa Manirakiza Charles, mu rubanza no RPAA 00630/2021/CA rwaciwe n’Urukiko rw’ubujurire ku wa 24/03/2023 n’uwitwa Safari Callixte, mu rubanza no RPAA 00739/2021/CA rwaciwe ku wa 24/03/2023 wari wafatanwe boules 500 z’urumogi. [12] Urukiko ruhereye kuri izo mpaka, rurasanga ikibazo gikwiye gusuzumwa muri uru rubanza ari: Kumenya niba Nsabimana Yves yakongera kugabanyirizwa igihano.

## Page 4

II. ISESENGURA RY’IKIBAZO KIGIZE URUBANZA  Kumenya niba Nsabimana Yves yakongera kugabanyirizwa igihano. [13] Nsabimana Yves n’umwunganira bavuga ko Urukiko Rukuru rutamugabanyirije igihano ku buryo buhagije kandi yaraburanye yemera icyaha akanagisabira imbabazi. Basaba uru Rukiko kongera kumugabanyiriza igihano ndetse kikajya munsi y’igihano gito giteganywa n’itegeko hashingiwe ku ngingo ya 2 y’Itegeko nº 059/2023 ryo ku wa 04/12/2023 04/12/2023 rihindura ingingo ya 60 y’ Itegeko nº 68/2018 ryo ku wa 30/08/2018 riteganya ibyaha n’ibihano muri rusange ivuga ko “Iyo umucamanza yemeje impamvu nyoroshyacyaha, ashobora kugabanya igihano ku buryo bukurikira (b) igifungo kimara igihe kizwi kiva ku mezi 6 kuzamura gishobora kugabanywa, ariko ntikijye munsi ya kimwe cya kabiri cy’igihano gito giteganyirijwe icyaha cyakozwe, ko hakwifashishwa umurongo watanzwe n’Urukiko rw’Ubujurire aho mu rubanza Nº RPAA 00448/2021/CA rwaciwe ku wa 20/10/2023 ubushinjacyaha bukurikiranyeho Nzaramba Jean Baptiste icyaha cyo gucuruza ibiyobyabwenge byo mu bwoko bw’urumogi aho Urukiko rwemeje impamvu nyoroshyacyaha maze rumuhanisha igihano cy’imyaka 5 n’ihazabu ya 2.000.000 Frw aho kuba imyaka 20 n’ihazabu ya 20.000.000 Frw yahanishijwe n’urukiko rubanza. [14] Uhagarariye Ubushinjacyaha avuga ko impamvu z’ubujurire za Nsabimana Yves n’umwunganira zigamije gusaba kongera kugabanyirizwa igihano nta shingiro zikwiye guhabwa kuko igihano cy’igifungo cy’imyaka 15 n’ihazabu ya 5.000.000 Frw yahanishijwe ari cyo gito giteganywa n’amategeko hashingiwe ku biteganywa n’ingingo ya 2 y’Itegeko nº 059/2023 ryo ku wa 04/12/2023 rihindura Itegeko nº 68/2018 ryo ku wa 30/08/2018 riteganya ibyaha n’ibihano muri rusange ndetse ko icyo gihano ari gito ukurikije uburemere bw’icyaha yakoze cyo gutunda no gucuruza ingano itubutse y’ibiyobyabwenge byo mu bwoko bw’urumogi aho yafatanwe boules 500 z’urumogi. [15] Uhagarariye Ubushinjacyaha asaba Urukiko ko icyo gihano cy’igifungo cy’imyaka 15 y’igifungo Nsabimana Yves yahawe kitahinduka nk’uko byemejwe mu zindi manza zahanishije abandi bakoze ibyaha nk’ibye harimo n’icyo gihano nyine cyagenewe uwiwa Manirakiza Charles, mu rubanza no RPAA 00630/2021/CA rwaciwe n’Urukiko rw’ubujurire ku wa 24/03/2023 n’uwitwa Safari Callixte, mu rubanza no RPAA 00739/2021/CA rwaciwe ku wa 24/03/2023 wari wafatanwe boules 500 z’urumogi. UKO URUKIKO RUBIBONA [16] Hakurikijwe ibivugwa n’ababuranyi, Urukiko rurasanga impaka muri uru rubanza zishingiye ku kumenya niba Nsabimana Yves atakongera kugabanyirizwa igihano kuko yagabanyirijwe bihagije. [17] Ikibazo cyo kumenya niba uregwa atakongera kugabanyirizwa kuko yagabanyirijwe bihagije cyafashweho umurongo n’Urukiko rw’Ikirenga1, mu rubanza no RPAA 0085/09/CS rwaciwe ku wa 17/06/2011, haburana Ubushunjacyaha na Havugimana Innocent, igika cya 6, ndetse n’uru Rukiko2 aho izo nkiko zasobanuye ko abaregwa badakwiye kongera kugabanyirizwa igihano hashingiwe ku kuba baragabanyirijwe igihano bihagije ku rwego rwa mbere. [18] Dosiye igaragaza ko Nsabimana Yves yafatanwe udupfunyika tw’urumogi magana atanu (500), kuva agifatwa yemeye icyaha cyo gutunda urumogi anagisabira imbabazi ku buryo budashidikanywaho. Nk’uko bigaragara mu rubanza no RPA 00262/2022/HC/RSZ rwaciwe ku wa 09/05/2024, Urukiko Rukuru,

1 Reba urubanza no RPAA 0085/09/CS rwaciwe n’Urukiko rw’Ikirenga ku wa 17/06/2011, haburana Ubushunjacyaha na Havugimana Innocent, igika cya 6 2 Reba urubanza N° RPA 00060/2021/CA rwaciwe n’Urukiko rw’Ubujurire haburana Ubushinjacyaha na Rusesabagina Paul na bagenzi be, urupapuro rwa 91, igika cya 264

## Page 5

Urugereko rwa Rusizi rwasanze Nsabimana Yves akwiye kugabanyirizwa igihano, maze rumuhanisha igifungo cy’imyaka cumi n’itanu (15 ans) n’ihazabu ingana na miliyoni eshanu (5.000.000 Frw). [19] Dosiye igaragaza kandi ko nyuma y’uko urubanza rujuririrwa rwacibwaga, hari harasohotse itegeko nº 059/2023 ryo ku wa 04/12/2023 rihindura itegeko nº 68/2018 ryo ku wa 30/08/2018 riteganya ibyaha n’ibihano muri rusange, aho mu ngingo yaryo ya 2 (a) iteganya ko iyo umucamanza yemeje impamvu nyoroshyacyaha, ashobora kugabanya igihano cy’igifungo cya burundu ariko ntikijye munsi y’igihano cy’igifungo cy’imyaka 15 naho (d) ikavuga ko igihano cy’ihazabu gishobora kugabanywa kugeza kuri kimwe cya kane cy’igihano cy’ihazabu gito giteganyirijwe icyaha cyakozwe. [20] Urukiko rw’Ubujurire rurasanga, kuba Nsabimana Yves yaragabanyirijwe igihano n’Urukiko Rukuru rukamuvana ku gihano cy’igifungo cy’imyaka makumyabiri n’itanu (25 ans) n’ihazabu ingana na 20.000.000 Frw yari yahawe n’Urukiko Rwisumbuye rukamuhanisha igihano cy’igifungo cy’imyaka 15 n’ihazabu ingana na 5.000.000 Frw, icyo gihano yahawe n’Urukiko Rukuru gikwiriye ugereranije n’uburemere bw’icyaha yahamijwe cyo gutunda ibiyobyabwenge byo mu bwoko bw’urumogi, aho yafatanwe udupfunyika tw’urumogi magana atanu (500) kuko, hashingiwe ku biteganywa mu ngingo ya 2, igika cya (a) na (d), y’itegeko nº 059/2023 ryo ku wa 04/12/2023 rihindura itegeko nº 68/2018 ryo ku wa 30/08/2018 riteganya ibyaha n’ibihano muri rusange rivuzwe mu gika kibanziriza iki, icyo gihano aricyo gito gishoboka giteganyirizwa icyaha yahamijwe mu gihe hari impamvu nyoroshyacyaha. Ibyo byumvikanisha rero ko yagabanyirijwe ku buryo buhagije, bityo icyo gihano kikaba kidashobora kongera kugabanywa. [21] Ku birebana n’ibivugwa na Nsabimana Yves n’umwunganira ko yagabanyiriza igihano kikajya munsi y’igiteganywa n’amategeko hashingiwe ku ngingo ya 2, agace ka b, y’itegeko Nº 059/2023 ryo ku wa 04/12/2023 rihindura itegeko nº 68/2018 ryo ku wa 30/08/2018 riteganya ibyaha n’ibihano muri rusange riteganya ko iyo umucamanza yemeje impamvu nyoroshyacyaha, ashobora kugabanya igifungo kimara igihe kizwi kiva ku mezi 6 kuzamura gishobora kugabanywa, ariko ntikijye munsi ya kimwe cya kabiri cy’igihano gito giteganyirijwe icyaha cyakozwe ndetse ko hakwifashishwa umurongo watanzwe n’Urukiko rw’Ubujurire aho mu rubanza Nº RPAA 00448/2021/CA rwaciwe ku wa 20/10/2023 aho ubushinjacyaha bwari bukurikiranyeho Nzaramba Jean Baptiste icyaha cyo gucuruza ibiyobyabwenge byo mu bwoko bw’urumogi aho Urukiko rwemeje impamvu nyoroshyacyaha maze ahanishwa igihano cy’imyaka 5 n’ihazabu ya 2000,000 Frw aho kuba imyaka 20 n’ihazabu ya 20,000,000 Frw. Urukiko rw’Ubujurire rurasanga iyo miburanire nta shingiro yahabwa kuko hakurikijwe ibiteganywa mu ngingo ya 2, agace ka b, y’itegeko nº 059/2023 ryo ku wa 04/12/2023 rihindura itegeko nº 68/2018 ryo ku wa 30/08/2018 riteganya ibyaha n’ibihano muri rusange yitsitsaho bigaragara ko igihano kivugwa gishobora kugabanywa kugera kuri ½ atari igihano uwahamwe n’icyaha yahawe, ahubwo ari igihano giteganyirizwa icyaha yahamijwe, maze mu gihe icyo cyaha yahamijwe umushingamategeko yagiteganyirijwe igihano kimara igihe kizwi umucamanza akaba yaganya ariko ntajye munsi ya ½ cy’igihano gito, bityo rero kuba Nsabimana Yves yarahamijwe icyaha gihanishwa igifungo cya burundu byumvikana ko atarebwa n’ibiteganywa n’ibivugwa mu ngingo ya 2, agace ka b, y’itegeko ryavuzwe haruguru, ahubwo we arebwa n’ibivugwa muri iyo ngingo ya 2, agace ka a, aho ashobora kugabanyirizwa ariko igifungo ntikijye munsi y’imyaka 15. [22] Ku birebana n’urubanza nº RPAA 00448/2021/CA rwaciwe ku wa 20/10/2023 haburana Ubushinjacyaha na Nzaramba Jean Baptiste uregwa n’umwunganira basaba ko urukiko rwashingiraho mu gutanga igihano kiri munsi y’icyo itegeko riteganya nk’uko byakozwe muri urwo rubanza, Urukiko rw’Ubujurire rurasanga urwo rubanza rutakwifashishwa nk’uko babisaba kuko uwo murongo bitsitsaho wagiyeho hashingiwe ku itegeko ryo muri 2018 ryavuyeho/ryahinduwe ryemereraga umucamanza kugabanya kugera munsi y’igihano gito giteganywa n’Itegeko kandi nyamara mu gihe uru rubanza rwacibwaga mu Rukiko Rukuru hari hariho Itegeko nº 059/2023 ryo ku wa 04/12/2023 rihindura itegeko nº 68/2018 ryo ku wa 30/08/2018 riteganya ibyaha n’ibihano muri rusange ribuza umucamanza kugabanya igihano ngo kive kuri burundu kijye munsi y’igihano cy’imyaka 15, bityo rero uwo murongo wari warafashwe n’Inkiko wemereraga umucamanza kugabanya kugera munsi y’igihano gito giteganywa

## Page 6

n’Itegeko ukaba utashingirwaho ahubwo hagomba kurebwa ibiteganywa n’itegko nk’uko byemejwe mu rubanza nº RPAA 00048/2020/CA rwaciwe ku wa 26/05/2022 aho Urukiko rw’Ubujurire rwagaragaje ko umurongo wari uriho udashobora gukurikizwa mu gihe unyuranyije n’itegeko rishya3. [23] Hashingiwe ku byasobanuwe haruguru n’ibiteganywa n’ingingo ya 2, igika cya a na d, y’itegeko nº 059/2023 ryo ku wa 04/12/2023 rihindura itegeko nº 68/2018 ryo ku wa 30/08/2018 riteganya ibyaha n’ibihano muri rusange, Urukiko rw’Ubujurire rurasanga igihano cy’igifungo cy’imyaka cumi n’itanu (15) n’ihazabu ya 5.000.000 Frw Nsabimana Yves yahanishijwe n’Urukiko Rukuru, aricyo gihano gito giteganywa n’itegeko ashobora guhabwa mu gihe agabanyirijwe, bityo uru Rukiko rukaba rudashobora kujya munsi yacyo kuko yagabanyirijwe bihagije. III. ICYEMEZO CY’URUKIKO [24] Rwemeje ko ubujurire bwa Nsabimana Yves nta shingiro bufite; [25] Rwemeje ko imikirize y’urubanza n˚ RPA 00262/2022/HC/RSZ, rwaciwe n’Urukiko Rukuru, Urugereko rwa Rusizi ku wa 09/05/2024 idahindutse mu ngingo zarwo zose; [26] Rwemeje ko igihano cy’igifungo cy’imyaka cumi n’itanu (15) n’ihazabu ya miliyoni eshanu (5.000.000 Frw) Nsabimana Yves yahanishijwe mbere kigumyeho; [27] Ruvuze ko Nsabimana Yves asonewe amagarama y'urubanza kuko aburana afunze.

3 Reba igika cyarwo cya 26 cy’urubanza RPAA 00048/2020/CA rwaciwe n’Urukiko rw’Ubujurire ku wa 26/05/2022 haburana Ubushinjacyaha na Bimenyimana