UBUSHINJACYAHA v. NSHIMIYIMANA

# UBUSHINJACYAHA v. NSHIMIYIMANA

- Source: Amategeko - Section: Decisions (Judgements) - Date: 2025-10-24 - Case/document no.: RPAA01329/2024/CA - Collection: Court of Appeal

## Text

## Page 1

UBUSHINJACYAHA v. NSHIMIYIMANA [Rwanda URUKIKO RW’UBUJURIRE – RPAA01329/2024/CA (Mukandamage, J. P.) 24 Ukwakira 2025] Amategeko agenga ibimenyetso – Ibimenyetso mu manza nshinjabyaha – Mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye, ababuranyi bakaba barahawe uburyo bwo kuhaba ngo banyomozanye, kandi ko urukiko arirwo rwemeza ko ibyo bimenyetso bishobora kwemerwa. Incamake y’ikibazo: Nshimiyimana yarezwe n’Ubushinjacyaha mu Rukiko Rwisumbuye rwa Gasabo, bumukurikiranyeho icyaha cyo gusambanya umwana w’imyaka irindwi, bumusabira guhamwa n’icyaha maze agahanishwa igihano cy’igifungo cya burundu. Nshimiyimana yaburanye ahakana icyaha, avuga ko ubwo yatumaga uwo mwana yari mu muhanda nyabagendwa ategereje umukiriya abona uwo mwana aramukurikiye amusaba capati, ko rero atari kuryamisha umwana mu muhanda ngo amusambanye. Urukiko Rwisumbuye rwaciye urubanza rushingiye ku bimenyetso bitandukanye bigaragaza ko Uregwa yakoze icyaha ashinjwa, rwemeza ko ahamwa n’icyaha cyo gusambanya umwana, maze rumuhanisha igifungo cya burundu. Iki cyemezo Uregwa yakijuririye mu Rukiko Rukuru avuga ko yahamijwe icyaha atakoze, dore ko umwana aregwa gusambanya atamuzi, ko nyina w’umwana amubeshyera kubera amakimbirane bafitanye, ko na raporo ya muganga itagaragaza igihe umwana yasambanyirijwe, nawe akaba atarapimwe ngo hamenyekane niba ari we wamusambanyije, bityo asaba kugirwa umwere. Urukiko Rukuru rwakiriye ubujurire bw’Uregwa, rusanga ibimenyetso byashingiweho ku rwego rwa mbere bimuhamya icyaha ku buryo budashidikanywaho, ariko kubera ko ari ubwa mbere akurikiranwe mu butabera yagabanyirijwe igihano, ahanishwa imyaka 25 y’igifungo. Uregwa yongeye ajuririra muri uru Rukiko rw’Ubujurire avuga ko yahamijwe icyaha cyo gusambanya umwana hashingiwe ku bimenyetso bishidikanywaho, ko kandi hirengagijwe ibisobanuro yatanze. Avuga ko kuva yafatwa yagaragaje ko atigeze asambanya umwana, ahubwo ko yasanze uwo mwana aho yakiniraga n’abandi bana amutuma itabi amuha n’amafaranga yo kugura bomboaho nyina acururiza, kuko yangaga guhura na nyina w’umwana kubera ikibazo bafitanye. Akomeza avuga ko yemera ko yabonye umwana muri iryo joro bitaba ikimenyetso kigaragaza ko yamusambanyije, kuko kumubona no kumukoraho (kumusunika) amwiyama bitandukanye no kuba yamukoraho agamije kumusambanya. Uregwa yakomeje asobanura ko raporo ya muganga iteye gushidikanya, kubera ko yivuguruje mu byo yagaragaje, kuko ibyapimwe byose yavuze ko ari nta kibazo, ko akarangabusugi k’umwana katakozweho, ariko yanzura avuga ko hari ibimenyetso by’uko umwana yasambanyijwe, ndetse ko nawe atigeze apimwa ngo harebwe niba ibyabonetse ku mwana ari ibye. Ikindi ni uko Nyina w’umwana yavuze ko umwana yamugezeho arimo kurira amubwira ko ikigabo cyamusambanyije, cyashyize igipipi cye mu gapipi ke, ko kandi ari ubwa 4 asambanyijwe, hakaba hakwibazwa uburyo umwana asambanywa izo nshuro akarangabusugi kakaba kakiriho. Bityo, akaba asanga ibimenyetso bivugwa byose muri uru rubanza bitagomba guhabwa agaciro, kuko bigenekereje ndetse binashidikanywaho. Ubushinjacyaha bwasubije ubujurire bw’Uregwa buvuga ko butahabwa ishingiro, kuko ibimenyetso byashingiweho mu nkiko zabanje bimuhamya icyaha aregwa cyo gusambanya umwana. Busobanura ko urukiko rwasuzumye imvugo n’ibimenyetso rwashyikirijwe, rusanga ibyo bwatanze bifite ishingiro, naho ukwiregura k’Uregwa kudafite ishingiro, ko rero hatabaheyo kubyirengagiza. Ikindi ngo ni uko urukiko rutagendeye ku bisobanuro by’umwana gusa, ahubwo rwanashingiye ku bisobanuro by’Uregwa wemeye ko yari kumwe n’uwo mwana w’imyaka 7 mu masaha y’ijoro akamutuma itabi, akanamugurira bombo, n’ubuhamya bw’uwitwa Saïdi watabaye umwana agafata Uregwa amaze gukora icyaha.

## Page 2

Ubushibjacyaha buvuga kandi ko muganga wasuzumye umwana yagaragaje ko yangijwe ku gitsina, aho yakoresheje amagambo “small lacerations and redness”, ko rero icyaha kitareberwa ku karangabusugi gusa. Kubyo Uregwa avuga ko atapimwe ngo harebwe ko yakoze icyaha, ntabwo byari bikenewe kuko yagombaga kuba agaragaza icyo anenga raporo yagaragaje ko umwana yakorewe icyaha, iyo raporo kandi ikaba yaje yunganira ibindi bimenyetso byari byatanzwe. Incamake y’icyemezo: Mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye, ababuranyi bakaba barahawe uburyo bwo kuhaba ngo banyomozanye, kandi ko urukiko arirwo rwemeza ko ibyo bimenyetso bishobora kwemerwa. Ubujurire nta shingiro bufite. Amategeko yashingiweho: Itegeko Nº 059/2023 ryo ku wa 04/12/2023 rihindura itegeko Nº 68/2018 ro ku wa 30/08/2018 riteganya ibyaha n’ibihano muri rusange, ingingo ya 14. Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, ingingo ya 111. Itegeko N° 68/2018 ryo ku wa 30/08/2018 riteganya ibyaha n’ibihano muri rusange, nk’uko ryahinduwe kugeza ubu, ingingo ya 133. Itegeko N° 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, ingingo ya 119. Imanza zifashishijwe: RPA0010/06/CS - RPA0011/06/CS - RPA0012/06/CS, Ubushinjacyaha v. Sgt Ntaganira na bagenzi be rwaciwe n’Urukiko rw’Ikirenga ku wa 18/07/2008. RPAA00692/2021/CA, Ubushinjacyaha v. Ndayishimiye Jean Damascène rwaciwe n’Urukiko rw’Ubujurire ku wa 20/01/2023. Urubanza I. IMITERERE Y’URUBANZA [1] Nshimiyimana Jacques yacyetsweho ko mu ijoro ryo ku wa 12/11/2019 yasambanyije umwana witwa I. S. K. w’imyaka 7 y’amavuko, bivugwa ko yamutumye itabi na bombo aho ababyeyi b’uwo mwana bacururiza, abimugejejeho aramusambanya, maze uwitwa Saïdi wumvise umwana arimo kurira ajya kureba, Nshimiyimana Jacques amubonye ariruka, nawe amwirukaho aramufata amushyikiriza ababyeyi b’umwana. [2] Nyuma y’iperereza, Ubushinjacyaha bwareze Nshimiyimana Jacques mu Rukiko Rwisumbuye rwa Gasabo icyaha cyo gusambanya umwana, busaba ko ahamwa n’icyo cyaha agahanishwa igifungo cya burundu. [3] Nshimiyimana Jacques yaburanye ahakana icyaha, avuga ko ubwo yatumaga uwo mwana yari mu muhanda nyabagendwa ategereje umukiriya abona uwo mwana aramukurikiye amusaba capati, ko rero atari kuryamisha umwana mu muhanda ngo amusambanye. [4] Mu rubanza RP01663/2019/TGI/GSBO rwaciwe ku wa 27/11/2020, Urukiko Rwisumbuye rwa Gasabo rwasanze hari ibimenyetso bigaragaza ko Nshimiyimana Jacques yasambanyije umwana, harimo raporo ya Muganga igaragaza ko umwana yasambanyijwe, imvugo ze yemera ko yahuye n’umwana ari

## Page 3

nijoro kandi ko yamutumye itabi n’imvugo z’umutangabuhamya wumvise umwana arira akajya kureba yahagera umwana akamubwira ko Nshimiyimana Jacques amaze kumusambanya, maze rumuhanisha igifungo cya burundu. [5] Nshimiyimana Jacques yajuririye Urukiko Rukuru avuga ko yahamijwe icyaha atakoze, ko umwana aregwa gusambanya atamuzi, ko nyina w’umwana amubeshyera kubera amakimbirane bafitanye y’uko yanze kumusuka, ko nta kimenyetso kigaragaza niba umwana yarasambanyijwe mbere cyangwa nyuma y’uko amutuma muri butike, ko raporo ya Muganga itagaragaza igihe umwana yasambanyirijwe, nawe akaba atarapimwe ngo hamenyekane niba ari we wamusambanyije, asaba kugirwa umwere. Uhagarariye Ubushinjacyaha yavuze ko ibimenyetso bwatanze bimuhamya icyaha bihagije kandi atashoboye kubivuguruza, asaba ko igihano yahawe cyagumishwaho. [6] Mu rubanza RPA00144/2021/HC/KIG rwaciwe ku wa 12/11/2024, Urukiko Rukuru rwasanze ubujurire bwatanzwe na Nshimiyimana Jacques nta shingiro, kuko ibimenyetso byashingiweho ku rwego rwa mbere bimuhamya icyaha ku buryo budashidikanywaho, ariko kubera ko ari ubwa mbere akurikiranwe mu butabera yagabanyirijwe igihano, ahanishwa imyaka 25 y’igifungo. [7] Nshimiyimana Jacques yajuririye Urukiko rw’Ubujurire, urubanza ruhabwa RPAA01329/2024/CA. Iburanisha mu ruhame ryabaye ku wa 08/10/2025, Nshimiyimana Jacques yunganiwe na Me Musasangohe Illuminée, naho Ubushinjacyaha buhagarariwe na Habineza Jean Damascène, Umushinjacyaha ku rwego rw’Igihugu. [8] Mu myanzuro no mu miburanire, Nshimiyimana Jacques avuga ko yahamijwe icyaha cyo gusambanya umwana hashingiwe ku bimenyetso bishidikanywaho, ko kandi hirengagijwe ibisobanuro yatanze. Uhagarariye Ubushinjacyaha avuga ko ubujurire bwatanzwe na Nshimiyimana Jacques butahabwa ishingiro, kuko ibimenyetso byashingiweho mu nkiko zabanje bimuhamya icyaha aregwa cyo gusambanya umwana. [9] Muri uru rubanza harasuzumwa ikibazo cyo kumenya niba Nshimiyimana Jacques yarahamijwe icyaha cyo gusambanya umwana hashingiwe ku bimenyetso bishidikanywaho. II. ISESENGURWA RY’IKIBAZO KIGIZE URUBANZA Kumenya niba Nshimiyimana Jacques yarahamijwe icyaha cyo gusambanya umwana hashingiwe ku bimenyetso bishidikanywaho [10] Nshimiyimana Jacques na Me Musasangohe Illuminée umwunganira bavuga ko kuva yafatwa yagaragaje ko atigeze asambanya umwana, ahubwo ko yasanze uwo mwana aho yakiniraga n’abandi bana amutuma itabi amuha n’amafaranga yo kugura bombo aho nyina acururuza, kuko yangaga guhura na nyina w’umwana kubera ikibazo bafitanye. Bavuga ko umwana agarutse yashatse ko amugurira capati amukora mu mifuka ashaka kuvanamo amafranga yo kuyigura, hanyuma mu kugerageza kumwikuraho asunika umwana yikubita hasi atangira kurira, uwitwa Saïdi ahageze baherekeza uwo mwana bamushyira nyina, kuko yabonaga ko umwana ari mushya muri karitsiye. Bavuga na none ko kuba Nshimiyimana Jacques yemera ko yabonye umwana muri iryo joro bitaba ikimenyetso kigaragaza ko yamusambanyije, kuko kumubona no kumukoraho (kumusunika) amwiyama bitandukanye no kuba yamukoraho agamije kumusambanya. [11] Nshimiyimana Jacques na Me Musasangohe Illuminée umwunganira bavuga kandi ko mu guhuza ibyo yavugiye mu Bugenzacyaha n’ibyo umwana yavuze, bigaragara ko uyu mwana amenyereye kubeshya, aho yavuze ko ari umwana wo kwa Pasiteri kugira ngo agirirwe icyizere bamutume, kandi aho yari agiye kugurira ari kwa nyina umubyara, nyina nawe ubwe akaba yemeza ko umwana we ari umubeshyi, ariko ntibimubuze kumushyigikira mu binyoma bye. Bavuga na none ko nyina w’umwana

## Page 4

atigeze aterwa impungenge nuko umwana we w’imyaka 7 y’amavuko ari hanze saa mbili z’ijoro, bityo rero akaba ntacyari kumubuza kubeshya ko yasambanyijwe. [12] Nshimiyimana Jacques na Me Musasangohe Illuminée umwunganira bakomeza bavuga ko raporo ya Muganga iteye gushidikanya, kubera ko yivuguruje mu byo yagaragaje, kuko ibyapimwe byose yavuze ko ari nta kibazo (normal), ko akarangabusugi k’umwana katakozweho, ariko yanzura avuga ko hari ibimenyetso by’uko umwana yasambanyijwe. Bavuga na none ko Nshimiyimana Jacques atapimwe ngo harebwe niba ibyabonetse ku mwana ari ibye. Bavuga kandi ko ibyo iyo raporo ivuga bidahura n’ibyo Umulisa Vérène, nyina w’umwana, yavuze ko umwana yamugezeho arimo kurira amubwira ko ikigabo cyamusambanyije, cyashyize igipipi cye mu gapipi ke, ko kandi ari ubwa 4 asambanyijwe, hakaba hakwibazwa uburyo umwana asambanywa izo nshuro akarangabusugi kakaba kakiriho. [13] Nshimiyimana Jacques na Me Musasangohe Illuminée umwunganira basanga rero ibimenyetso bivugwa byose muri uru rubanza bitagomba guhabwa agaciro, kuko bigenekereje ndetse binashidikanywaho, ko rero hashingiwe ku ngingo ya 111 y’Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, Urukiko rw’Ubujurire rwabona ko ari umwere ku cyaha cyo gusambanya umwana akurikiranyweho. [14] Uhagarariye Ubushinjacyaha avuga ko ibyo Nshimiyimana Jacques avuga ko urubanza ajuririra rwaciwe mu buryo bugenekereje, hakirengagizwa ibisobanuro bye nta shingiro bifite, kuko urukiko rwasuzumye imvugo n’ibimenyetso rwashyikirijwe, rusanga ibyatanzwe n’Ubushinjacyaha bifite ishingiro, naho ukwiregura kwa Nshimiyimana Jacques kudafite ishingiro, ko rero hatabaheyo kubyirengagiza. [15] Uhagarariye Ubushinjacyaha avuga kandi ko ibyo Nshimiyimana Jacques n’umwunganira bavuga ko umwana I.S.K amenyereye kubeshya nta shingiro bifite, kuko urukiko rutagendeye ku bisobanuro by’umwana gusa, ahubwo rwanashingiye ku bisobanuro bya Nshimiyimana Jacques wemeye ko yari kumwe n’uwo mwana w’imyaka 7 mu masaha y’ijoro akamutuma itabi, akanamugurira bombo, n’ubuhamya bw’uwitwa Saïdi watabaye umwana akanafata uwari umaze gukora icyaha. Avuga kandi ko mu Rukiko Rukuru, Nshimiyimana Jacques yavuze ko nyina w’umwana yamubeshyeye kubera ikibazo cya 6.000 Frw yari amubereyemo, mu Bugenzacyaha avuga ko nta kibazo afitanye n’ababyeyi b’umwana, bigaragaza ko ari we utavugisha ukuri, kandi ko mu rubanza RPA0010/06/CS - RPA0011/06/CS - RPA0012/06/CS rwaciwe ku wa 18/07/2008, haburana Ubushinjacyaha, Sgt Ntaganira na bagenzi be, Urukiko rw’Ikirenga rwasobanuye ko Umucamanza ashobora gushingira ku mvugo zavugiwe mu nzego z’ikurikiranacyaha iyo asanze arizo zihuje n’ukuri kw’ibyabaye, kandi zifite ibindi bimenyetso bizunganira. [16] Kubijyanye n’uko raporo ya Muganga yivuguruza, Uhagarariye Ubushinacyaha avuga ko Muganga yasuzumye umwana agaragaza ko yangijwe ku gitsina, aho yakoresheje amagambo “small lacerations and redness”, ko rero icyaha kitareberwa ku karangabusugi gusa, kandi ibyo Muganga yabonye bihura n’ibitegenywa n’ingingo ya 14 y’Itegeko Nº 059/2023 ryo ku wa 04/12/2023 rihindura itegeko Nº 68/2018 ro ku wa 30/08/2018 riteganya ibyaha n’ibihano muri rusange isobanura ibikorwa bigize icyaha cyo gusambanya umwana. [17] Naho ku byo Nshimiyimana Jacques avuga ko atapimwe na Muganga ngo harebwe ko yakoze icyaha, Uhagarariye Ubushinjacyaha avuga ko yagombaga kuba agaragaza icyo anenga raporo yakorewe umwana yagaragaje ko icyaha cyakozwe, iyo raporo kandi ikaba yaraje yunganira ibindi bimenyetso byari byatanzwe, akaba asanga bitari bikenewe ko nawe ajyanwa gupimwa ngo hemezwe ko yakoze icyaha. [18] Kubijyanye n’uko raporo ya Muganga ivuguruzanya n’imvugo za nyina w’umwana, Uhagarariye Ubushinjacyaha avuga ko ataribyo, kuko umwana yabwiye nyina ko Nshimiyimana Jacques yamushyizemo igitsina, kandi raporo ikaba igaragaza ko mu gitsina cy’umwana hangiritse.

## Page 5

UKO URUKIKO RUBIBONA [19] Impaka muri uru rubanza zishingiye ku kumenya niba Nshimiyimana Jacques yarahamijwe icyaha cyo gusambanya umwana w’imyaka 7 y’amavuko hashingiwe ku bimenyetso bishidikanywaho. [20] Kubyerekeranye n’ibimenyetso mu manza n’itangwa ryabyo, mu rubanza RPAA00692/2021/CA rwaciwe n’Urukiko rw’Ubujurire ku wa 20/01/2023, haburana Ubushinjacyaha na Ndayishimiye Jean Damascène, hasesenguwe ingingo ya 119 y’Itegeko N° 15/2004 ryo ku wa 12/06/2004 ryerekeye ibimenyetso mu manza n’itangwa ryabyo1, harebwe cyane cyane ku mwihariko w’imanza nshinjabyaha, maze urukiko rusobanura ko mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye2, ababuranyi bakaba barahawe uburyo bwo kuhaba ngo banyomozanye, kandi ko urukiko arirwo rwemeza ko ibyo bimenyetso bishobora kwemerwa. Iri hame ryashingiweho mu zindi manza zakurikiyeho zaciwe n’uru rukiko, harimo n’urubanza RPAA01437/2024/CA rwaciwe ku wa 19/09/2025, haburana Ubushinjacyaha na Mugesera Damien. [21] Nk’uko bigaragara mu rubanza RPA00144/2021/HC/KIG rujuririrwa, Nshimiyimana Jacques yahamijwe icyaha cyo gusambanya umwana w’imyaka 7 y’amavuko hashingiwe ku bimenyetso bikurikira: a) imvugo ze mu Bugenzacyaha no mu Bushinjacyaha, aho yavuze ko yahuye n’umwana yasinze, acyeka ko ari uwo kwa Pasiteri kandi umwana amwemerera ko ariho iwabo, hanyuma amutuma isigara 2 anamubwira kwigurira bonbon ya 50 Frw, umwana azimuzaniye amusaba capati, amukoze mu mufuka mu kumwiyama aramusunika agwa hasi ahaguruka arira, umugabo wumvise umwana aza abasanga, umwana amubwira ko Nshimiyimana Jacques amusambanyije, bajyana iwabo w’umwana, bahageze asanga aho umwana yari yamubwiye ataha atariho, ahubwo ataha kuri ya boutique yaguriyeho itabi. Yavuze kandi ko ntacyo apfa n’iwabo w’umwana; b) imvugo za Umulisa Vérène, nyina w’umwana wahohotewe, wavuze ko umwana we yamusanze aho acururiza saa mbiri z’ijoro amubwira ko umumama baturanye amutumye itabi ararimuha, bigeze saa tatu z’ijoro umwana agaruka arimo kurira amubwira ko hari umugabo umufashe ku ngufu, asohotse asanga bamufashe, ahita ahamagara Mukiza ukuriye inkeragutabara. Avuga ko umwana yamubwiye ko yamubeshye uwamutumye itabi kuko yatinyaga ko amukubita, ko umugabo wamutumye itabi yamaze kurimuha akamubwira kumuherekeza amukatana mu gihuru amusomagura, amwambura imyenda, aramusambanya, umuturanyi witwa Saïdi yumvise umwana arimo kurira ajya kureba asanga bahagararanye, abaza Nshimiyimana Jacques impamvu umwana arira, amubwira ko amusuhuje akarira, ashatse kumucika aramufata; c) raporo yakozwe ku wa 13/11/2019 na Dr Benimana Eric wo ku bitaro bya Kacyiru igaragaza ko mu gitsina cy’umwana harimo udusharu kandi hatukuye, Muganga akanzura avuga ko umwana agaragaza ibimenyetso byo gusambanywa3. [22] Urukiko rw’Ubujurire rurasanga ibyo Nshimiyimana Jacques avuga ko Urukiko Rukuru rwirengagije imvugo ze ku buryo yahuye n’umwana nta shingiro bifite, kuko ibyo yasobanuye byahujwe n’ibindi bimenyetso byatanzwe n’Ubushinjacyaha byagarutsweho haruguru, Urukiko rusanga ahamwa n’icyaha aregwa cyo gusambanya umwana. [23] Ku birebana n’ibyo Nshimiyimana Jacques avuga ko kuba yarahuye n’umwana akamutuma atari ikimenyetso kigaragaza ko yamusambanyije, Urukiko rw’Ubujurire rurasanga atari cyo cyashingiweho cyonyine n’Urukiko Rukuru, ahubwo hanashingiwe ku byakurikiyeho nk’uko Umulisa Vérène abivuga

1 Iyo ngingo ihura n’ingingo ya 87 y’Itegeko Nº 062/2024 ryo ku wa 20/06/2024 rigenga ibimenyetso. 2 “Principe de la liberté de la preuve en matière pénale”. 3 “Labia majora: small lacerations & redness. Conclusion: features of sexual abuse”

## Page 6

ashingiye kubyo yabwiwe n’umwana ko yasambanyijwe n’ibyo yabwiwe na Saïdi wamufatiye mu cyuho yumvise umwana arira, bombi akabashyira nyina, ari nabyo byabaye intandaro yo kumufata, umwana akajyanwa kwa Muganga, uyu nawe agasanga umwana afite ibimenyetso by’uko yasambanyijwe. [24] Urukiko rw’Ubujurire rurasanga na none ibyo Nshimiyimana Jacques avuga ko raporo ya Muganga yivuguruza nta shingiro bifite, kuko mu ncamake y’isuzuma ryakorewe umwana, Muganga yagaragaje ko mu gitsina cye harimo udusharu kandi hatukuye, ibyo akaba aribyo yashingiye avuga ko umwana afite ibimenyetso byo gusambanywa. Kuba kandi Nshimiyimana Jacques atarapimwe, ntabwo byaba impamvu yatuma ibindi bimenyetso byatanzwe n’Ubushinjacyaha bidasuzumwa ngo bihabwe agaciro bikwiye, kuko n’iyo apimwa hari kuba habonetse ikimenyetso kiyongera ku bindi, bigasuzumirwa hamwe hagamijwe gushakisha ukuri ku cyaha aregwa. [25] Urukiko rw’Ubujurire rurasanga kandi ibyo Nshimiyimana Jacques avuga ko raporo ya Muganga igaragaza ko umwana agifite akarangabusugi ikaba ivuguruzanya n’imvugo za Umulisa Vérène nta shingiro bifite, kuko gusambanya umwana bitagaragazwa gusa n’uko akarangabusugi kangiritse, ahubwo ni ibikorwa bishingiye ku gitsina bikorewe umwana biteganywa n’ingingo ya 14 y’Itegeko Nº 59/2023 ryo ku wa 04/12/2023 ihindura ingingo ya 133 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange4. [26] Urukiko rw’Ubujurire rurasanga rero ibimenyetso byashingiweho n’Urukiko Rukuru mu guhamya Nshimiyimana Jacques icyaha cyo gusambanya umwana byuzuzanya kandi bidashidikanywaho, bityo ubujurire bwe bukaba nta shingiro bufite. [27] Urukiko rw’Ubujurire rurasanga, nubwo ubujurire bwa Nshimiyimana Jacques nta shingiro bufite, kandi akaba yarakoze icyaha cy’ubugome cyo gusambanya umwana w’imyaka 7 y’amavuko we afite imyaka 23 y’amavuko, ni ubwa mbere akurikiranwe mu butabera ku buryo buzwi, kandi icyo cyaha yagikoze akiri muto, ibyo bikaba byamubera impamvu nyoroshyacyaha yatuma igihano cy’igifungo cy’imyaka 25 yahawe kigabanywa. [28] Mu kugabanya igihano kandi, Urukiko rw’Ubujurire rurashingira ku zindi manza rwaciye, harimo n’urubanza RPAA00473/2021/CA rwaciwe ku wa 31/01/2025, haburana Ubushinjacyaha na Niyomwungeri Théophile wakoze icyaha cyo gusambanya umwana w’imyaka 7 y’amavuko, we afite imyaka 26 y’amavuko, maze hashingiwe ku mpamvu yuko ari ubwa mbere akurikiranwe mu butabera, agabanyirizwa igihano, ahanishwa igifungo cy’imyaka 20; ariko kuba Nshimiyimana Jacques we yarakoze icyaha ari muto kuri Niyomwungeri, yahanishwa igifungo cy’imyaka 18. [29] Urukiko rw’ubujurire rurasanga rero, ubujurire bwatanzwe na Nshimiyimana Jacques nta shingiro bufite, urubanza yajuririye rukaba rugomba guhinduka gusa kubirebana n’igihano. III. ICYEMEZO CY’URUKIKO [30] Rwemeje ko ubujurire bwatanzwe na Nshimyimana Jacques nta shingiro bufite. [31] Rwemeje ko urubanza RPA00144/2021/HC/KIG rwaciwe n’Urukiko Rukuru ku wa 12/11/2024 ruhindutse gusa kubijyanye n’igihano.

4 Ingingo ya 14 iteganya ko “(1) Umuntu ukorera ku mwana kimwe mu bikorwa bishingiye ku gitsina bikurikira, aba akoze icyaha: (a) gushyira igitsina cy’umuntu mu gitsina, mu kibuno cyangwa mu kanwa by’umwana; (b) gushyira urugingo urwo ari rwo rwose rw’umubiri w’umuntu mu gitsina cyangwa mu kibuno cy’umwana; (c) gukora ikindi gikorwa cyose ku mubiri w’umwana hagamijwe ishimishamubiri.

## Page 7

[32] Rutegetse ko Nshimiyimana Jacques ahanishijwe igifungo cy’imyaka 18 ku cyaha cyo gusambanya umwana w’imyaka 7 y’amavuko.