NTABONSANGANYWE VS MUKAKARAMAGE N’ABANDI

# NTABONSANGANYWE VS MUKAKARAMAGE N’ABANDI

- Source: Amategeko - Section: Decisions (Judgements) - Date: 2023-09-22 - Case/document no.: RCAA 00011/2022/CA - Collection: Court of Appeal

## Text

## Page 1

NTABONSANGANYWE VS MUKAKARAMAGE N’ABANDI. [Rwanda URUKIKO RUKURU RW’UBUJURIRE – RCAA 00011/2022/CA (Munyangeri, P.J.) 22 Nzeli 2023] Amategeko yerekeye imiburanishirize y’imanza mbonezamubano – kureka urubanza – Urega aretse urubanza uwo baburana akabimwemerera, nta cyabuza ko yemererwa n’Urukiko kurureka. Amategeko yerekeye imiburanishirize y’imanza mbonezamubano – kureka urubanza – ibibazo bisuzumwa iyo habaye kureka urubanza cyangwa ikirego – guhwanya imyenda – Gusuzuma imyenda ababuranyi bafitanye hagati yabo, nti biri mu bibazo bisuzumwa mu gihe habaye kureka urubanza. Incamake y’ikibazo: uru runanza rwatangiye Mukakaramage arega Ntabonsanganywe Habimana na Ntabonsanganywe Pierre mu Rukiko Rwisumbuye rwa Nyarugenge, asaba kubategeka kugarura umutungo w’umuryango ugizwe n’isambu n’amazu bigaruriye ndetse Ntabonsanganywe Habimana agurisha igice cyawo Muvunyi nawe wareze asaba ko abamugurishije bamukorera “morcelement” y’ubutaka bwubatseho inzu bamugurishije biri ku cyangombwa UPI: 1/01/01/01/472, kandi ko iyo nzu itakorwaho. Muhirwa yagobotse mu rubanza ku bushake. Ntabonsanganywe Habimana yireguye avuga ko Ntabonsanganywe Casimir (ise) yabahaye igice kimwe cy’ubwo butaka nk’impano, na ho 1/3 cyabwo barakimugurira. Ntabonsanganywe Pierre we yireguye avuga ko yemera ko yubatse ku butaka bw’ababyeyi be ariko ko yabikoze kuko yabonaga budakoreshwa, asaba umubyeyi we kuhamurekera kubera ko ahakeneye. Muhirwa yasobanuye ko hari inzu yaguze iri mu isambu iburanwa kandi ko Ntabonsanganywe Habimana yayimugurishije afite “procuration” yahawe na se uba mu mahanga. Urukiko nyuma yo guhuza izo manza zombi, mu rubanza RC00717/2016/TGI/NYGE CMB RC00272/2017/TGI/NYGE, rwemeje ko ikirego cya Mukakaramage gifite ishingiro kuri bimwe; ko ubutaka Ntabonsanganywe Pierre na Ntabonsanganywe Habimana ari ubwa Mukakaramage kandi ko bukwiye gusubira mu maboko y’umuryango; rutegeka ko Ntabonsanganywe Pierre na Ntabonsanganywe Habimana, buri wese akura inyubako mu kibanza yigabije. Rwemeza kandi ko ubutaka Muvunyi na Muhirwa baguze, buguma mu maboko yabo kandi bukabandikwaho. Rutegeka Ntabonsanganywe Habimanana Ntabonsanganywe Pierre bategetswe gufatanya guha Mukakaramage indishyi zitandukanye. Mukakaramage yajuririye urwo rubanza mu Rukiko Rukuru, avuga ko Urukiko rubanza rwemeje ko Muvunyi na Muhirwa bagumana umutungo baguze, nyamara ngo rwaremeje ko bawuguze n’utari nyirawo. Ntabonsanganywe Habimana yatanze inzitizi zitandukanye zijyanye no kutakira ikirego cyatanzwe na Mukakaramage, Urukiko ruzisumye rusanga nta shingiro zifite. Mu rubanza mu mizi Urukiko rwemeje mu rubanza RCA00207/2019/HC/KIG rwemeje ko, Ubujurire bwatanzwe na Mukakaramage bufite ishingiro; rwemeje ko Muhirwa, Muvunyi baguranye umutima mwiza batazi ko Ntabonsanganywe abagurisha umutungo utari uwe nta n’ububasha abifitiye; bityo rwemeza ko iyo mitungo bayigumana, rutegeka Ntabonsanganywe Habimana umubyeyi we Mukakaramage indishyi. Ntabonsanganywe Habima yajuririye urwo rubanza mu Rukiko rw’Ubujurire, barusaba gusuzuma niba ubutaka buburanwa bufite agaciro karengeje 75.000.000, niba Ntabonsanganywe Casimir yari afite uburenganzira bwo gukoresha icyo ashaka ubutaka bwari bumubaruyeho mu 1980 atabajije uwo bashakanye, hashingiwe ku mategeko yariho icyo gihe; niba nyuma yo kuzuza ibikubiye mu masezerano y’ubugure bagiranye na Ntabonsanganywe Habimana, Muvunyi na Muhirwa bakorerwa

## Page 2

ihererekanyamutungo;niba Ntabonsanganywe Pierre yasubiza Ntabonsanganywe Habimana ubutaka yubatsemo. Ntabonsanganywe Habimana yaje kumenyesha ubwanditsi bw’Urukiko n’abo baburana ko baretse urubanza, nabo baza kubyemera ariko bagira ibyo basaba, Uhagarariye Muhirwa asaba ko uwo ahagarariye yakorerwa ihererekanyamutungo ndetse hakabaho guhwanya imyenda ku birebana n’amafaranga yishyuzwa n’ayo yagiye atsindira mu zindi manza, anasaba indishyi. Urukiko rw’Ubujurire mu rubanza RCAA00011/2022/CA rwemeje ko kureka urubanza kwemewe, rwemeza ko guhwanya imyenda muri uru rubanza bitasuzumwa, rwemeza kandi ko abaretse urubanza bagomba guha amafaranga y’ibyagiye ku rubanza abo baregaga, atangwa mu bushishozi bw’Urukiko rushingiye aho urubanza rwari rugeze. Incamake y’icyemezo: 1. Urega uretse urubanza uwo baburana akabimwemerera, nta cyabuza ko yemererwa n’Urukiko kurureka. Bityo, uretse urubanza nta cyabuza uwo yaregaga kugira ibyo asaba bijyanye nibyo yatakaje akurikirana urubanza. 2. Gusuzuma imyenda ababuranyi bafitanye hagati yabo, nti biri mu bibazo bisuzumwa mu gihe habaye kureka urubanza. Bityo, nta hwanya ry’imyenda rikwiye gusuzumirwa mu rubanza urega yaretse n’uregwa akabyemera. Kureka urubanza kuremewe. Amategeko yashingiweho: Nta mategeko yashingiweho Imanza zifashishijwe: Urubanza RC00003/2021/CA, RUBERINTWARI Léandre vs HABIMANA Issa Selemani na TUGINAMA Amina, rwaciwe n’Urukiko rw’Ubujurire ku wa 4/02/2022 Urubanza RCOM 00005/2023/CA WILD URBAN INTERNATIONAL DEVELOPMENT Ltd vs ENTREPRISE MUHAMYANKAKA Venuste Ltd rwaciwe n’Urukiko rw’Ubujurire ku wa 12/07/2023. Urubanza I. IMITERERE Y’URUBANZA [1] Ntabonsanganywe Habimana Gabriel n’umuvandimwe we Ntabonsanganywe Pierre bafashe umutungo w’ababyeyi babo Ntabonsanganywe Casimir n’umugore we Mukakaramage Drocella ugizwe n’isambu irimo amazu, barabikodesha amafaranga bakuyemo bakayikubira. Uwitwa Muvunyi Jean Claude we yagurishijwe na Ntabonsanganywe Habimana Gabriel afatanyije n’umugore we Mukamuganga Cécile igice cy’isambu iburanwa. Mukakaramage Drocella yareze Ntabonsanganywe Habimana Gabriel na Ntabonsanganywe Pierre mu Rukiko Rwisumbuye rwa Nyarugenge, asaba kubategeka kugarura uwo mutungo w’umuryango, ikirego cyandikwa kuri RC00717/2016/TGI/NYGE, na ho Muvunyi Jean Claude arega Ntabonsanganywe Habimana Gabriel na Mukamuganga Cécile, asaba Urukiko kubategeka kumukorera “morcelement” y’ubutaka bwubatseho inzu bamugurishije biri ku cyangombwa nº UPI: 1/01/01/01/472, kandi ko iyo nzu itakorwaho kuko yayiguze mu buryo bukurikije amategeko, gutegeka ikigo cy’ubutaka kubumwandikaho, n’indishyi, ikirego cye cyandikwa kuri RC00272/2017/TGI/NYGE, izo manza zombi zarahujwe, ziburanishirizwa kuri

## Page 3

RC00717/2016/TGI/NYGE CMB RC00272/2017/TGI/NYGE. Muhirwa Venuste yagobotse mu rubanza ku bushake. [2] Ntabonsanganywe Habimana Gabriel n’umugore we Mukamuganga Cécile bireguye bavuga ko ku wa 12/07/1981, Ntabonsanganywe Casimir yabahaye igice kimwe cy’ubwo butaka nk’impano, na ho 1/3 cyabwo barakimugurira. [3] Ntabonsanganywe Pierre yireguye avuga ko yemera ko yubatse ku butaka bw’ababyeyi be kandi ko yabikoze kuko yabonaga budakoreshwa, agasaba umubyeyi we kuhamurekera kubera ko ahakeneye. [4] Muvunyi Jean Claude yasobanuye ko Ntabonsanganywe Habimana Gabriel afatanyije n’umugore we Mukamuganga Cécile, bamugurishije igice cy’isambu iburanwa kirimo n’inzu, agasaba ko bitakorwaho. [5] Muhirwa Venuste yasobanuye ko hari inzu yaguze iri mu isambu iburanwa kandi ko Ntabonsanganywe Habimana Gabriel yayimugurishije afite “procuration” yahawe na se uba mu mahanga, yariho kashi ya Minisiteri y’Ububanyi n’Amahanga. [6] Mu rubanza RC00717/2016/TGI/NYGE CMB RC 00272/2017/TGI/NYGE rwaciwe n’Urukiko Rwisumbuye rwa Nyarugenge ku wa 29/03/2019, urwo Rukiko rushingiye ku ngingo ya 6 y’Itegeko N˚27/2016 ryo ku wa 08/07/2016 rigenga imicungire y’umutungo w’abashyingiranywe, impano n’izungura, no ku ngingo ya 10 y’Itegeko N˚22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, rwemeje ko : Ikirego rwashyikirijwe na Mukakaramage Drocella gifite ishingiro kuri bimwe ; Ubutaka Ntabonsanganywe Pierre na Ntabonsanganywe Habimana Gabriel bubatsemo buri mu cyahoze ari parcelle n˚1085 ubu bukaba bwarabaruwe kuri UPI : 1/01/01/01/472 bwanditse kuri Ntabonsanganywe Habimana Gabriel na Mukamuganga Cécile ari ubwa Mukakaramage Drocella n’umugabo we kandi ko bukwiye gusubira mu maboko Y’umuryango ; Ntabonsanganywe Pierre na Ntabonsanganywe Habimana Gabriel bava mu butaka bw’ababyeyi bigabije, buri wese mu kibanza yigabije agakuramo inyubako yashyizemo mu gihe cyose nta bundi bwumvikane bubayeho hagati ye na ba nyir’ubutaka ; Ubutaka Muvunyi Jean Claude na Muhirwa Venuste baguze buri mu kibanza cyavuzwe haruguru, buguma mu maboko yabo kandi bukabandikwaho mu gihe cyose ubugure bwabo butarateshwa agaciro ; Ntabonsanganywe Habimana Gabriel, Mukamuganga Cécile na Ntabonsanganywe Pierre bategetswe gufatanya guha Mukakaramage Drocella indishyi z’akababaro, igihembo cya Avoka, ikurikiranarubanza n’ingwate y’amagarama yatanze arega, byose hamwe bingana n’amafaranga y’u Rwanda ibihumbi magana atandatu na mirongo itanu (650.000Frw). [7] Mukakaramage Drocella yajuririye urwo rubanza mu Rukiko Rukuru, avuga ko Urukiko rubanza rwemeje ko Muvunyi Jean Claude na Muhirwa Venuste bagumana umutungo baguze, nyamara rwaremeje ko bawuguze n’utari nyirawo. [8] Mbere yo kwinjira mu mizi y’urubanza, Ntabonsanganywe Habimana Gabriel yatanze inzitizi yo kutakira ikirego cyatanzwe na Mukakaramage Drocella ngo kuko arangwa no gutera urujijo ku cyo aregera rimwe akavuga ko aregera kugaruza umutungo w’umuryango, ubundi akavuga ko aregera umutungo we bwite, ko ari umutungo asangiye n’umugabo we Ntabonsanganywe Casimir, kandi ko mu byo aregera harimo igice cy’umutungo Ntabonsanganywe Habimana Gabriel yahawe na se nk’impano ikindi akakimugurisha, akaba yarabimenyeshejwe. Avuga kandi ko ikirego kitagombaga kwakirwa

## Page 4

kuko avuga ko asaba kugaruza umutungo w’umuryango nyamara umuryango utaramuhaye ububasha bwo kugitanga. [9] Mukakaramage Drocella yireguye kuri iyi nzitizi avuga ko nta shingiro ifite, kubera ko umutungo w’umuryango ashaka kugaruza ari uwe n’umugabo we, akaba yari afite uburenganzira bwo kuwukurikirana bitabaye ngombwa ko bombi batanga ikirego, kandi ko kuba wanditse kuri Ntabonsanganywe Casimir wenyine bitavuze ko bawusangiye kuko ari umugore we wemewe n’amategeko. [10] Urukiko Rukuru rwafashe icyemezo ku nzitizi ruvuga ko nta shingiro ifite kuko kuba ababuranyi bose bemeranya ko umutungo uburanwa ukomoka kuri Ntabonsanganywe Casimir washakanye na Mukakaramage Drocella mu buryo bwemewe n’amategeko, Mukakaramage Drocella yari afite ububasha n’inyungu zo kuwuregera, na ho ku birebana no kuba Ntabonsanganywe Habimana Gabriel yaravugaga ko Mukakaramage Drocella yari azi neza ko hari ubutaka yahaweho impano ubundi akabugura, byasuzumwa mu mizi y’urubanza. [11] Mu rubanza RCA00207/2019/HC/KIG rwaciwe n’Urukiko Rukuru ku wa 24/03/2022, urwo Rukiko rushingiye ku ngingo ya 46 y’Itegeko N˚22/99 ryo ku wa 12/11/1999 ryuzuza igitabo cya mbere cy’urwunge rw’amategeko mbonezamubano kandi rishyiraho igice cya gatanu cyerekeye imicungire y’umutungo w’abashingiranywe, impano n’izungura no ku nyandiko z’abahanga mu matageko, rwemeje ko : Ubujurire bwatanzwe na Mukakaramage Drocella bufite ishingiro ; Ku rwego rwa mbere Urukiko rutagaragaje ingaruka z’icyemezo rwafashe cy’uko Ntabonsanganywe Habimana Gabriel yagurishije umutungo wa Mukakaramage Drocella mu buriganya ; Muhirwa Venuste, Muvunyi Jean Claude na Mukamuganga Cécile baguranye umutima mwiza batazi ko Ntabonsanganywe Habimana Gabriel abagurisha umutungo utari uwe nta n’ububasha abifitiye ; Mukakaramage Drocella abishatse yakurikirana Ntabonsanganywe Habimana Gabriel akamwishyuza ikiguzi cy’imitungo ye yagurishije ; Ntabonsanganywe Pierre avanwe muri uru rubanza, indishyi yategetswe guha umubyeyi we Mukakaramage Drocella ku rwego rwa mbere akaba azihanaguweho ; Imitungo ivugwa muri uru rubanza Muhirwa Venuste, Muvunyi Jean Claude na Mukamuganga Cécile ibandikwaho ; Ntabonsanganywe Habimana Gabriel aha umubyeyi we Mukakaramage Drocella ibihumbi magana arindwi (700.000Frw) akubiyemo indishyi z’ibyo yatanze ku rubanza rw’ubujurire, no kumusubiza amagarama yose yishyuye atanga ikirego ku rwego rwa mbere no ku rwego rw’ubujurire. [12] Ntabonsanganywe Habimana Gabriel na Mukamuganga Cécile bajuririye urwo rubanza mu Rukiko rw’Ubujurire, ikirego cyandikwa kuri RCAA00011/2022/CA, barusaba gusuzuma ibikurikira : Niba ubutaka buburanwa bufite agaciro karengeje miliyoni mirongo irindwi n’eshanu (75.000.000Frw) ; Niba Ntabonsanganywe Casimir yari afite uburenganzira bwo gukoresha icyo ashaka ubutaka bwari bumubaruyeho mu 1980 atabajije uwo bashakanye, hashingiwe ku mategeko yariho icyo gihe ;

## Page 5

Niba nyuma yo kuzuza ibikubiye mu masezerano y’ubugure bagiranye na Ntabonsanganywe Habimana Gabriel, Muvunyi Jean Claude na Muhirwa Venuste bakorerwa ihererekanyamutungo ; Niba Ntabonsanganywe Pierre yasubiza Ntabonsanganywe Habimana Gabriel ubutaka yubatsemo. [13] Urubanza rwaburanishijwe mu ruhame ku wa 04/09/2023, Ntabonsanganywe Habimana Gabriel na Mukamuganga Cécile bahagarariwe na Me Munyantwari Wellars, abazungura ba Mukamuganga Drocella ari bo Ntabonsanganywe Raphael, Ntabonsanganywe Marc, Nzeyimana Jean, Ndahimana Baptiste, Uwimana Immaculée, Nsanzimana Issa Matthieu na Ntabonsanganywe Luc bahagarariwe na Me Mukamazimpaka Hilarie, Ntabonsanganywe Pierre ahagarariwe na Me Ngutegure Belancile, Muvunyi Jean Claude na Muhirwa Venuste bahagarariwe na Me Musonera Alexis. [14] Mu myanzuro no mu miburanire, uhagarariye Ntabonsanganywe Habimana Gabriel na Mukamugema Cécile yamenyesheje ubwanditsi bw’Urukiko n’abo baburana ko baretse urubanza, uhagarariye Ntabonsanganywe Raphael, Ntabonsanganywe Marc, Nzeyimana Jean, Ndahimana Baptiste, Uwimana Immaculée, Nsanzimana Issa Matthieu na Ntabonsanganywe Luc, abangira kureka urubanza mu myanzuro, ku munsi w’iburanisha avuga ko asubiye ku magambo yavugiye mu nama ntegurarubanza yo ku wa 17/07/2023 arebana n’iyi ngingo, abemerera kureka urubanza, hakagibwa impaka ku ngaruka zo kurureka. [15] Uhagarariye Ntabonsanganywe Pierre avuga ko yemera ko abajuriye bareka urubanza, ariko bakagira ibyo baha uwo ahagarariye. [16] Uhagarariye Muhirwa Venuste asaba ko uwo ahagarariye yakorerwa ihererekanyamutungo ndetse hakabaho guhwanya imyenda ku birebana n’amafaranga yishyuzwa n’ayo yagiye atsindira mu zindi manza. Asoza asaba indishyi. [17] Urukiko rushingiye kuri izo mpaka, rusanga hakwiye gusuzumwa ibibazo bikurikira : Kumenya niba Ntabonsanganywe Habimana Gabriel na Mukamuganga Cécile bakwemerera kureka urubanza RCAA00011/2022/CA ; Kumenya niba habaho guhwanya imyenda ; Ibyerekeye indishyi, amafaranga y’ikurikiranarubanza n’igihembo cya Avoka II. ISESENGURA RY’IBIBAZO BIGIZE URUBANZA 1.Kumenya niba NTABONSANGANYWE Habimana Gabriel na MUKAMUGANGA Cécile bakwemererwa kureka urubanza n˚ Rcaa 00011/2022/CA [18] Mu myanzuro no mu miburanire, uhagarariye Ntabonsanganywe Habimana Gabriel na Mukamuganga Cécile yamenyesheje Urukiko n’abaregwa ko abajuriye baretse urubanza RCAA00011/2022/CA. [19] Uhagarariye Ntabonsanganywe Raphael, Ntabonsanganywe Marc, Nzeyimana Jean, Ndahimana Baptiste, Uwimana Immaculée, Nsanzimana Issa Matthieu na Ntabonsanganywe Luc mu myanzuro ye yari yangiye abajuriye kureka urubanza, ku munsi w’iburanisha arabemerera. [20] Uhagarariye Ntabonsanganywe Pierre yemera ko abajuriye bareka urubanza, hagasuzumwa ingaruka zo kurureka.

## Page 6

[21] Uhagarariye Muvunyi Jean Claude na Muhirwa Venuste avuga ko abo ahagarariye bemerera abajuriye kureka urubanza, hagasuzumwa ibirebana n’indishyi no guhwanya imyenda. Uko Urukiko rubibona [22] Impaka kuri iyi ngingo zishingiye ku kumenya niba abajuriye bemerewe kureka urubanza baregeye Urukiko. [23] Ibyerekeye kuba urega yareka urubanza, byafashweho umurongo n’uru Rukiko mu rubanza n˚ RC00003/2021/CA, Ruberintwari Léandre yaburanaga na Habimana Issa Selemani na Tuginama Amina, rwaciwe n’Urukiko rw’Ubujurire ku wa 04/02/2022. [24] Urukiko rw’Ubujurire rwasobanuye ko kuba urega aretse urubanza uwo baburana akabimwemerera, nta cyabuza ko yemererwa kurureka. [25] Urukiko rurasanga rero kuba Ntabonsanganywe Habimana Gabriel na Mukamuganga Cécile barahisemo kureka urubanza bari baruregeye, abaregwa bakabyemera, hagomba kwemezwa ko bemerewe kureka urubanza RCAA00011/2022/CA. 2.Kumenya niba habaho guhwanya imyenda [26] Uhagarariye Muvunyi Jean Claude na MUHIRWA Venuste asaba ko mu mafaranga miliyoni icumi (10.000.000 Frw) Muhirwa Venuste asigaje kwishyura, havanwamo miliyoni esheshatu n’ibihumbi ijana na mirongo itanu (6.150.000Frw) yatsindiye mu Nkiko zabanje, kongeraho miliyoni ebyiri n’ibihumbi ijana na mirongo itandatu na bitanu (2.165.000Frw) y’ibirarane by’imisoro yishyuriye icyo kibanza muri RRA, yose hamwe akaba miliyoni umunani n’ibihumbi magana atatu na cumi na bitanu (8.315.000Frw), hakiyongeraho indishyi zingana na miliyoni imwe n’ibihumbi magana atandatu (1.600.000 Frw), akaba miliyoni icyenda n’ibihumbi magana cyenda na cumi na bitanu (9.915.000Frw) kandi ko yemera ko guhwanya imyenda bireba Ntabonsanganywe Habimana Gabriel kubera ko ari we wamugurishije. [27] Uhagarariye Ntabonsanganywe Raphael, Ntabonsanganywe Marc, Nzeyimana Jean, Ndahimana Baptiste, Uwimana Immaculée, Nsanzimana Issa Matthieu na Ntabonsanganywe Luc avuga ko amafaranga angana na miliyoni icumi (10.000.000Frw) Muhirwa Venuste agomba kuyaha abazungura ba Mukakaramage Drocella, akaba nta buryo yayazana mu kibazo cyo guhwanya imyenda mu gihe imanza avuga atigeze aziburana na Mukakaramage Drocella. Avuga kandi ko adakwiye gusaba gusubizwa amafaranga y’umusoro yishyuye kuko yagombaga kuwutanga hashingiwe ko aba muri ubwo butaka kuva mu mwaka wa 2012. [28] Uhagarariye Ntabonsanganywe Pierre avuga ko amafaranga Muhirwa Venuste yatsindiye mu manza yaburanye na Ntabonsanganywe Habimana Gabriel nta ho ahuriye na miliyoni icumi (10.000.000Frw) agomba kwishyura abazungura ba Mukakaramage Drocella ku buryo yasaba guhwanya imyenda, kandi ko uwo ahagarariye na we yishyuye miliyoni ebyiri n’ibihumbi ijana na mirongo itandatu (2.160.000Frw) y’ibirarane by’imisoro y’ubutaka, aharanira ko budatezwa cyamunara, ko rero Muhirwa Venuste atishyuye umusoro wenyine. [29] Uhagarariye Muvunyi Jean Claude na Muhirwa Venuste avuga ko abo ahagarariye bakorerwa ihererekanyamutungo, abasaba amafaranga Urukiko rukayabagenera mu bushishozi bwarwo bamaze kuyatangira ibimenyetso kubera ko basaba umurengera. Uko Urukiko rubibona

## Page 7

[30] Ku byerekeye amafaranga acibwa umuburanyi uretse urubanza cyangwa ikirego, byafashweho umurongo n’uru Rukiko mu rubanza RCOM00005/2023/CA WILD Urban International Development Ltd yaburanaga na Entreprise Muhamyankaka Venuste Ltd rwaciwe n’Urukiko rw’Ubujurire ku wa 12/07/2023, aho rwasobanuye ko mu gihe habaye kureka urubanza cyangwa ikirego, umuburanyi yishyurwa amagarama, amafaranga y’igihembo cya Avoka n’andi yaba yarakoresheje akurikirana urubanza. [31] Urukiko rurasanga nta hwanya ry’imyenda rikwiye gusuzumirwa muri uru rubanza, kubera ko gusuzuma imyenda ababuranyi bafitanye hagati yabo, bitari mu bibazo bisuzumwa mu gihe habaye kureka urubanza. 3. Ku byerekeye indishyi, amafaranga y’ikurikiranarubanza n’igihembo cya Avoka [32] Uhagarariye Ntabonsanganywe Raphael, Ntabonsanganywe Marc, Nzeyimana Jean, Ndahimana Baptiste, Uwimana Immaculée, Nsanzimana Issa Matthieu na Ntabonsanganywe Luc asaba ko abari bajuriye bishyura abo ahagarariye indishyi zingana na miliyoni indwi (7.000.000Frw) kubera kubasiragiza mu manza, na miliyoni imwe (1.000.000Frw) y’igihembo cya Avoka kuri uru rwego. [33] Uhagarariye Ntabonsanganywe Pierre avuga ko kuba abari bajuriye barareze uwo ahagarariye kandi yaravanywe mu rubanza mu rwego rw’ubujurire kubera ko yari yarumvikanye n’umubyeyi we, bakwiye kumuha miliyoni imwe y’igihembo cya Avoka (1.000.000Frw) kandi ko yishyuye miliyoni ebyiri n’ibihumbi ijana na mirongo itandatu na bitanu (2.165.000Frw) y’imisoro ku butaka, akaba yifuza ko Muhirwa Venuste afatanyije n’abazungura ba Mukakaramage Drocella bayamusubiza. [34] Uhagarariye Muhirwa Venuste na Muvunyi Jean Claude asaba ko Muhirwa Venuste ahabwa miliyoni imwe (1.000.000 Frw) y’igihembo cya Avoka, na ho Muvunyi Jean Claude agahabwa miliyoni imwe (1.000.000Frw) y’igihembo cya Avoka n’ibihumbi magana atandatu (600.000Frw) y’ikurikiranarubanza. [35] Uhagarariye Ntabonsanganywe Habimana Gabriel na Mukamuganga Cécile avuga ko indishyi abazungura ba Mukakaramage Drocella basaba batazihabwa, ko Ntabonsanganywe Pierre na we nta zo yahabwa kubera ko yazanywe mu rubanza nk’uwari usanzwe ari umuburanyi, Muhirwa Venuste nyuma yo kugaragaza amasezerano yagiranye na Avoka, akaba yahabwa ibihumbi magana atanu (500.000Frw) y’igihembo cya Avoka. Uko Urukiko rubibona [36] Ikibazo cy’amafaranga y’ibyagiye ku rubanza mu gihe uwari wareze aretse ikirego cyangwa urubanza cyafashweho umurongo n’uru Rukiko mu rubanza RCOM0005/2023/CA rwavuzwe haruguru, aho rwasobanuye ko iyo bigenze bityo, uretse urubanza cyangwa ikirego ashobora gucibwa amafaranga y’amagarama, igihembo cya Avoka n’andi yose. [37] Urukiko rurasanga rero abaregwa basabye amafaranga y’ikurikiranarubanza n’igihembo cya Avoka bagomba kuyahabwa n’abari bajuriye baretse urubanza, ariko rukurikije aho urubanza rugarukiye, rusanga abayifuza barimo gusaba umurengera, mu bushishozi bwarwo rukaba rugeneye Ntabonsanganywe Raphael, Ntabonsanganywe Marc, Nzeyimana Jean, Ndahimana Baptiste, Uwimana Immaculée, Nsanzimana Issa Matthieu, Ntabonsanganywe Luc, Ntabonsanganywe Pierre, Muvunyi Jean Claude na Muhirwa Venuste, buri wese ibihumbi magana atanu (500.000Frw) akubiyemo amafaranga y’ikurikiranarubanza n’igihembo cya Avoka. III. ICYEMEZO CY’URUKIKO

## Page 8

[38] Rwemeje ukureka urubanza RCAA00011/2022/CA kwakozwe na Ntabonsanganywe Habimana Gabriel na Mukamuganga Cécile. [39] Rutegetse Ntabonsanganywe Habimana Gabriel na Mukamuganga Cécile gufatanya kwishyura Ntabonsanganywe Raphael, Ntabonsanganywe Marc, Nzeyimana Jean, Ndahimana Baptiste, Uwimana Immaculée, Nsanzimana Issa Matthieu, Ntabonsanganywe Luc, Ntabonsanganywe Pierre, Muvunyi Jean Claude na Muhirwa Venuste, buri wese ibihumbi magana atanu (500.000Frw) akubiyemo amafaranga y’ikurikiranarubanza n’igihembo cya Avoka arebana n’uru rubanza. [40] Ruvuze ko amafaranga y’ingwate y’amagarama yatanzwe na Ntabonsanganywe Habimana Gabriel na Mukamuganga Cécile bajurira, ahwanye n’ibyakozwe mu rubanza.