NTAKIRUTIMANA v KAZAROHO N’UNDI

# NTAKIRUTIMANA v KAZAROHO N’UNDI

- Source: Amategeko - Section: Decisions (Judgements) - Date: 2023-03-17 - Case/document no.: RCAA 00011/2021/CA - Collection: Court of Appeal

## Text

## Page 1

NTAKIRUTIMANA v KAZAROHO N’UNDI [Rwanda URUKIKO RW’UBUJURIRE – RCAA 00011/2021/CA (Nyrandabaruta, P.J.) 17 Werurwe 2023] Itegeko rikumira kandi rihana ihohoterwa iryo ari ryo ryose rishingiye ku gitsina – ababana nk’umugabo n’umugore batarasezeranye – amasezerano – Amasezerano y’ubugure bw’umutungo yakozwe numwe mu bashakanye mu buryo bw’uburiganya, atamenyesheje uwo bashakanye cyangwa uwo babanaga nk’umugabo n’umugore ateshwa gaciro hamwe n’ibyangombwa by’umutungo byabonetse biyashingiyeho. Bityo, iyo mitungo igomba kubarirwa mu mitungo basangiye igihe umwe agiye kongera gushaka. Itegeko rikumira kandi rihana ihohoterwa iryo ari ryo ryose rishingiye ku gitsina – ababana nk’umugabo n’umugore batarasezeranye – kugabana umutungoc – Mu gihe ababanaga nk’umugabo n’umugore batarashyingiranywe bahagaritse kubana, kugirango bagabane umutungo bagomba kuba bawufitanye cyangwa barawushakanye bityo, amagambo “bawufitanye” cyangwa “barawushakanye” ntavuze ko buri wese agomba kugaragaza ingano (quantité) y’ibyo yakoze kugira ngo umutungo ubeho cyangwa ngo yerekane ibyo yawushyizeho kugirango wiyongere agaciro, ahubwo uwo mutungo ugomba kuba warabonetse muri cya gihe kidashidikanywaho bombi babanaga kuko icya ngombwa ari uko muri iyo mibanire buri wese aba afite ibyakora mu guteza imbere urugo. Itegeko rigenga Amasezerano – uburiganya – Iyo uburiganya bugaragajwe ibintu bisubira uko byari bimeze mbere yo gukora amasezerano. Incamake y’ikibazo: Uru rubanza rwatangiye Kayirangwa arega Kazaroho mu Rukiko Rwisumbuye rwa Ngoma asaba ko bagabana imitungo itandukanye bashakanye ubwo babanaga nk’umugabo n’umugore nubwo batasezeranye, bakabyarana abana babiri, ariko Kazaroho akaza gusezerana n’undi mugore witwa Ntakirutimana iyo mitungo batayigabanye. Urukiko mu rubanza RC00025/2019/TGI/NGOMA rwaciwe n’Urukiko Rwisumbuye rwa Ngoma rwemeje ko ikirego cya Kayirangwa gifite ishingiro kuri bimwe, rwemeza ko imwe mu mitungo iburanwa igabanywa hagati ya Kazaroho na Kayirangwa ariko indi batagaragarije ibimenyetso ko ari iyabo ikagumana abo yanditseho. Ntakirutimana na Kazaroho ntibishimiye imikirize y’Urubanza barujuririra mu Rukiko Rukuru, Urugereko rwa Rwamagana banagobokesha Ntakirutimana Elisephan, Uwizeye, Uwingabire na Banki Nkuru Yurwanda (BNR). Ntakirutimana Jeannette yajuriye avuga ko hari imitungo imwanditseho ariko ikaba yarashyizwe muyo Kazaroho na Kayirangwa bagomba kugabana. Kazaroho nawe ajurira avuga ko hari umutungo yari asangiye na Nyirandimubenshi, wari umugore we bakaba baratandukanye, ndetse n’indi mitungo yanditse kuri Ntakirutimana Jeannette yambuwe.

## Page 2

Urukiko Rukuru, Urugereko rwa Rwamagana rwaciye urubanza RCA00041/2020/HC/RWG - CMB RCA 00043/2020/HC/RWG rwemeza ko ubujurire bwa Kazaroho na Ntakirutimana nta shingiro bufite, ko ubujurire bwa Kayirangwa bwuririye kubwa Kazaroho na Ntakirutimana nta shingiro bufite, rwemeza ko urubanza rujuririrwa ruhamanye agaciro karwo. Ntakirutimana na Kazaroho ntibishimiye imikirize y’urwo rubanza, barujuririra mu Rukiko rw’Ubujurire, ubujurire bwabo buhabwa RCAA 00011/2021/CA. Ntakirutimana Jeannette, yajuriye avuga ko Urukiko Rukuru, Urugereko rwa Rwamagana rwategetse ko Kazaroho na Kayirangwa bagabana imitungo ye ntaho rushingiye kandi rwirengagiza amategeko n’ibimenyetso yarugaragarije. Kazaroho nawe yajuriye avuga ko Urukiko Rukuru, Urugereko rwa Rwamagana rwagaragarijwe inenge yuko Urukiko Rwisumbuye rwa Ngoma rwaburanishije ku kitararegewe ariko ntirwabifataho icyemezo, ahubwo rwemeza ko Kazaroho na Kayirangwa bagabana imitungo kandi nabo batagaragaza uburyo bayihahanye. Kayirangwa yatanze ubujurire bwuririye ku bundi asaba Urukiko rw’Ubujurire gutegaka Unguka Bank Ltd gutanga amakuru kuri compte 10400628450017 ya Karama Business Park Ltd, ndetse no gutegeka ko we na Kazaroho bagabana ikiguzi cyavuye mu modoka bari basangiye. Ku bijyanye no Kumenya nibahari imitungo bwite ya Ntakirutimana Jeanette ku buryo Urukiko Rukuru rutagombaga kuyishyira muyo Kazaroho na Kayirangwa bagomba kugabana, Urukiko mu rubanza RCAA00011/2021/CA rwemeje ko amasezerano y’ubugure yakozwe kuri uwo mutungo Ntakirutimana Jeanette yita uwe yakozwe mu buriganya ndetse ari nayo yashingiweho hatangwa ibyangombwa , nta cybuza Urukiko gutegeka ko iyo mitungo Kayirangwa na Kazaroho bayigabana, kuko amasezerano arebana nuwo mutungo Urukiko rwasanze abagurishije barayagiranye na Kazaroho nubwo banditse mu buriganya ko uguze ari Ntakirutimana Jeannette hamwe agashyiraho umukono mu mwanya we kandi nta butumwa yamuhaye ahandi akamusinyisha (cyangwa akamusinyira), agamije kurigisa umutungo asangiye na Kayirangwa. Ku bijyanye no Kumenya niba Urukiko Rukuru Urugereko rwa Rwamagana rwararenze imbibi z’ikiburanwa rukaburanisha ku kitaregewe, Urukiko rwemeje ko kuba hari amasezerano Urukiko Rukuru, rwasanze yarakozwe mu buriganya, agaherwaho hatangwa ibyangombwa, ariko amasezerano kimwe n’ibyo byangombwa ntibishingirweho nk’ibimenyetso bigaragaza nyir’umutungo, ndetse bigateshwa agaciro, ntibyakwitwa ko Urukiko Rukuru Urugereko rwa Rwamagana rwarenze imbibi z’ikiburanwa, kuko uburiganya bwakoreshejwe mu kubona ibyangombwa ku mutungo, uwabukoresheje atabwitwaza avuga ko uwo mutungo umwanditseho ari uwe. Bityo, rwemeza ko ubujurire bwa Kazaroho kuri iyi ngingo nta shingiro bufite. Ku bijyanye no Kumenya niba Unguka Bank Ltd igomba gutegekwa gutanga amakuru kuri compte 10400628450017 ya Karama Business Park Ltd, Urukiko rwemeje ko gutegeka Unguka Bank Ltd gutanga amakuru kuri compte ya Karama Business Park, ntacyo byamarira Urukiko mu icibwa ry’uru rubanza, ku mpamvu y’uko Karama Business Park yanditse kuri Ntakirutimana Jeannette, kandi umwenda ukaba warahawe Karama Business Park ahagarariye, ndetse abagurishije uwo mutungo aribo Ntakirutimana Elizephani na Uwizeye bakaba bemeza ko bagurishije kandi bishyuwe na Ntakirutimana Jeannette.

## Page 3

Ku bijyanye no Kumenya niba Kazaroho na Kayirangwa bagomba kugabana amafaranga y’ikiguzi cy’imodoka RAVA 4, Urukiko rwemeje ko kuba Kayirangwa nta nenge agaragaza mu rubanza yajuririye ku cyemezo cyafashwe ku byerekeye imodoka, ku bijyanye n’agahato avuga ko yashyizweho asinyana n’uwari umugabo we Kazaroho amasezerno y’ubwumvikane kuri iyo modoka, ntacyo rwahindura kuri icyo cyemezo, bityo rwemeza ko imodoka RAVA 4 ifite itagomba kugaruka mu mitungo igomba kugabanwa kuko ibyayo byakemuwe mu mwumvikane. Ku bijyanye no Gusuzuma niba hari igihombo Kazaroho yateje Kayirangwa ku buryo yabitangira indishyi Urukiko rw’Ubujurire rwemeje ko ahabwa amafaranga yagragarije ibimenyetso yakoresheje asana umutungo uburanwa hanyuma ngo Kazaroho akabisenya, ariko rwemeza ko ay’ubukode atayahabwa kuko atabasha kugaragaza uwakodeshaga iyo nzu kandi nayo avuga ko yari kuzayikodesha Urukiko rwemeje ko bitafatwaho ukuri, kuko inyungu umuntu aregera zigomba kuba ari iz’ako kanya, zavutse kandi zishingiye ku kintu kiriho. Ku bijyanye n’indishyi zitandukanye zasabwe muri uru rubanza, Urukiko rwemeje ko indishyi z’akababaro, iz’ikurikiranarubanza n’igihembo cya Avoka Kazaroho yaka atazihabwa kuko atsindwa n’urubanza. Urukiko rwemeje ko Ntakirutimana Jeannette atasubizwa amafaranga yatanze hakorwa igereranya ry’imikono kuko atsindwa n’urubanza Urukiko rwemeje ko Kayirangwa atahabwa amafaranga y’ikurikiranarubanza kuko nawe ubujurire bwe bwuririye ku bundi yabutsinzwe ariko rutegeka ko ahabwa ay’igihembo cya Avoka kuko hari ibyo yatakaje kubera ubujurire bwa Ntakirutimana Jeannette na Kazaroho. Rwemeje ko indishyi Uwizeye yaka adakwiye kuzihabwa, kuko yasabye izijyanye n’ikurikiranarubanza n’igihembo cya Avoka, ariko muri dosiye nta kigaragaza ko yigeze akurikirana urubanza, cyangwa se ngo ashake Avoka umuburanira, kuko uru rubanza rwaburanishijwe adahari kandi atitabiriye n’inama ntegurarubanza. Kubijyanye n’indishyi Ntakirutimana Elizephan yasabye Kayirangwa, Kazaroho na Ntakirutimana Urukiko rwemeje ko agenewe kuri uru rwego izingana ay’igihembo cya Avoka nay’ikurikiranarubanza agomba guhabwa na Kazaroho, na Ntakirutimana bafatanyije bamugobokesheje mu rubanza. Urukiko rwemeje kandi ko indishyi z’ikurikiranarubanza n’igihembo cya Avoka zasabwe na Uwingabire agomba guhabwa amafaranga y’igihembo cya Avoka na y’ikurikiranarubanza agomba guhabwa na Ntakirutimana Jeannette afatanyije na Kazaroho amugobokesheje mu rubanza. Incamake y’icyemezo: 1. Amasezerano y’ubugure bw’umutungo yakozwe numwe mu bashakanye mu buryo bw’uburiganya, atamenyesheje uwo bashakanye cyangwa uwo babanaga nk’umugabo n’umugore ateshwa gaciro hamwe n’ibyangombwa by’umutungo byabonetse biyashingiyeho. Bityo, iyo mitungo igomba kubarirwa mu mitungo basangiye igihe umwe agiye kongera gushaka.

## Page 4

2. Raporo y’abahanga ntabwo umucamanza ategetswe kuyishingiraho mu gihe atemeranywa nayo. Bityo raporo y’umuhanga ku nyandiko igibwaho impaka, igaragaza ko imikono iriho ifitanye isano n’iri ku nyandiko zitagibwaho impaka ntibivuze ko ar’ukuri koko. 3. Mu gihe ababanaga nk’umugabo n’umugore batarashyingiranywe bahagaritse kubana, kugirango bagabane umutungo bagomba kuba bawufitanye cyangwa barawushakanye bityo, amagambo “bawufitanye” cyangwa “barawushakanye” ntavuze ko buri wese agomba kugaragaza ingano (quantité) y’ibyo yakoze kugira ngo umutungo ubeho cyangwa ngo yerekane ibyo yawushyizeho kugirango wiyongere agaciro, ahubwo uwo mutungo ugomba kuba warabonetse muri cya gihe kidashidikanywaho bombi babanaga kuko icya ngombwa ari uko muri iyo mibanire buri wese aba afite ibyakora mu guteza imbere urugo . 4. Iyo uburiganya bugaragajwe ibintu bisubira uko byari bimeze. Bityo ntibyakwitwa ko Urukiko rwarenze imbibi z’ikiburanwa mu gihe rutesheje agaciro amasezerano arimo uburiganya ndetse n’ibyangombwa ku mutungo biyashingiyeho, kuko uwabukoresheje atabwitwaza avuga ko uwo mutungo umwanditseho, nubwo icyaregewe ku ikubitiro ari ukugaruza umutungo usangiwe. 5. Inyungu umuntu aregera zigomba kuba ari iz’ako kanya, zavutse kandi zishingiye ku kintu kiriho, zidashingira ku kugenekereza kw’ibizakorwa cyangwa inyungu umuntu atekereza kuzabona. Bityo ntabwo umuntu yaregera amafaranga y’ubukode kandi atagaragaza amasezerano y’ubukode cyangwa se uwakodeshaga. Ubujurire nta shingiro bufite. Amategeko yashingiweho: y’Itegeko N°59/2008 ryo kuwa 10/09/2008 rikumira kandi rihana ihohoterwa iryo ari ryo ryose rishingiye ku gitsina, Ingingo ya 39 Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, Ingingo ya 12,110,111 Itegeko N° 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, Ingingo 3, 98 Imanza zifasishijwe. Urubanza RCAA 0018/13/CS, rwaciwe n’urukiko rw’Ikirenga ku wa 24/12/2014, haburana HARERIMANA Emmanuel na SEBUKAYIRE, igika cya 20-22. urupapurorwa .6-7. Uruabnza RS/INJUST/RC00004/2018/SC rwaciwe ku wa 21/01/2020 n’Urukiko rw’Ikirenga, haburana NICYABERA na MUKAGATARE, igika cya 22. Urubanza RCAA00051/2018/CA, rwaciwe n’Urukikorw’Ubujurire ku wa 04/10/2019, haburana KAYIGUMIRE Emmanuel n’abandi na KAYUMBA Christopher n’abandi, ibika bya 34 na 35. Urupapuro rwa.9-10.

## Page 5

Urubanza RCAA0014/15/CS , rwaciwe n’Urukikorw’Ikirenga ku wa 01/12/2017 haburana MUTONI K. Jackline na NIWENSHUTI Aloys n’undi. Inyandiko z’abahanga zifashishijwe: Jean Vicent et Serge Guinchard, Procédure civile 24é ed. Dalloz, Paris, 1996, P.98 Urubanza I. IMITERERE Y’URUBANZA [1] Kayirangwa Denyse yabanye na Kazaroho Jean Bosco nk’umugabo n’umugore mu buryo budakurikije amategeko kuva mu mwaka wa 2012 kugeza kuwa 21/03/2017, muri icyo gihe bashakanye imitungo itandukanye ndetse babyarana n’abana 2 aribo : Iraguha Ganza Brian na Irakoze Ganza Benson. Kuwa 22/06/2017 Kazaroho Jean Bosco yaje gushyingiranwa na Ntakirutimana Jeannette mu buryo bukurikije amategeko, akaba ariwe babana kugeza ubu. [2] Mbere y’uko Kazaroho Jean Bosco ashakana na Ntakirutimana Jeannette, hari imitungo yari yarashakanye na Kayirangwa Denyse batabanje kugabana: ubaruye kuri UPI 2/06/09/04/1033, uri mu Mudugudu wa Ruhuha, Akagari ka Munini, Umurenge wa Ruhango, Intara y'Amajyepfo; - ikibanza gifite UPI 2/01/05/01/903 giherereye mu ntara y’Amajyepfo, Akarere ka Nyanza, Umurenge wa Kigoma, Akagali ka Butansida, ariko bikavugwa ko ari umutungo bwite Ntakirutimana Jeannette yaguze na Mulisa Evode, akawucishamo 2 kugira ngo atandukanye igice cyo guturamo n’icyo gukoreramo ubucuruzi (UPI:2/01/05/01/8464 na UPI:2/01/05/01/8465); - Inzu ifite UPI 5/01/10/05/340 iri mu Mudugudu wa Gatuza, akagali ka Nyarukombe, Umurenge wa Muyumbu, Akarere ka Rwamagana; - inzu iri mu kibanza gifite UPI 1/02/04/01/73, iherereye mu Mudugudu w’Amajyambere, Akagali ka Musezero Umurenge wa Gisozi, Akarere Ka Gasabo. [3] Mu rubanza RC00025/2019/TGI/NGOMA rwaciwe n’Urukiko Rwisumbuye rwa Ngoma ku wa 03/08/2020, rwemeje ko ikirego cya Kayirangwa Denyse gifite ishingiro kuri bimwe, ko imitungo afitanye na Kazaroho Jean Bosco bagabana ari iyi ikurikira: umutungo ubaruye kuri UPI 5/01/10/05/345 uherereye mu Mudugudu wa Gatuza, Akagari ka Nyarukombe Umurenge wa Muyumbu, Akarere ka Rwamagana, ufite agaciro ka 30.436.398Frw; umutungo ubaruye kuri UPI 5/01/10/05/340 uherereye mu Mudugudu wa Gatuza, Akagari ka Nyarukombe Umurenge wa Muyumbu, Akarere ka Rwamagana, ufite agaciro ka 3.119.840Frw; umutungo ubaruye kuri UPI 5/01/10/05/4918 uherereye mu Mudugudu wa Gatuza, Akagari ka Nyarukombe Umurenge wa Muyumbu, Akarere ka Rwamagana, ufite agaciro ka 3.971.460Frw n’ umutungo ubaruye UPI 2/01/05/01/903, uherereye mu ntara y’Amajyepfo, Akarere ka Nyanza, Umurenge wa Kigoma, Akagali ka Butansida ufite agaciro ka 54.803.004Frw; rwemeje ko umutungo ubaruye kuri UPI 1/02/04/01/73, uherereye mu Mudugudu w’Amajyambere, Akagari ka Musezero, Umurenge wa Gisozi, Akarere ka Gasabo, wanditse kuri Uwizeye Marie Rose utari mu mitungo Kazaroho Jean Bosco afitanye na Kayirangwa Denyse. [4] Rwemeje ko imitungo Kazaroho Jean Bosco afitanye na Kayirangwa Denyse igabanwa mu buryo bukurikira: umutungo ubaruye kuri UPI 5/01/10/05/345, uherereye mu Mudugudu wa

## Page 6

Gatuza, Akagari ka Nyarukombe Umurenge wa Muyumbu, Akarere ka Rwamagana ufite agaciro ka 30.436.398Frw, umutungo ubaruye kuri UPI 5/01/10/05/340 uherereye mu Mudugudu wa Gatuza, Akagari ka Nyarukombe, Umurenge wa Muyumbu, Akarere ka Rwamagana, ufite agaciro ka 3.119.840Frw, kimwe n’umutungo ubaruye kuri UPI 5/01/10/05/4918 nawo uherereye aho hantu havuzwe, ufite agaciro ka 3.971.460Frw, iyo mitungo yose ifite agaciro ka 37.527.698Frw: yegukanwa na Kayirangwa Denyse ikanamwandikwaho. [5] Rwemeje ko, umutungo ubaruye kuri UPI: 2/01/05/01/903, uherereye mu Ntara y’Amajyepfo, Akarere ka Nyanza, Umurenge wa Kigoma, Akagali ka Butansida, ufite agaciro ka 54.803.004Frw wegukanwa na Kazaroho Jean Bosco, ukamwandikwaho, agasubiza Kayirangwa Denyse ikinyuranyo cya 8.637.653Frw. [6] Rwategetse Kazaroho Jean Bosco guha Kayirangwa Denyse indishyi z’ igihombo yamuteje zingana n’amafaranga ibihumbi magana atanu na mirongo irindwi n’ icyenda n’amafaranga magana abiri na mirongo ine (579.240Frw) hiyongereyeho amafaranga miliyoni umunani n’ibihumbi magana atandatu na mirongo itatu na birindwi n’amafaranga magana atandatu mirongo itanu n’atatu (8.637.653Frw) y’ikinyuranyo ku mitungo yagabanywe, yose hamwe akaba miliyoni icyenda n’ibihumbi magana abiri na cumi na bitandatu n’amafaranga magana inani na mirongo cyenda n’atatu (9.216.893FRW). [7] Rwategetse Kazaroho Jean Bosco na Ntakirutimana Jeanette gusubiza Uwingabire Brigitte amafaranga miliyoni eshatu n’ibihumbi magana cyenda (3.900.000Frw) y’ ikiguzi cy’ ubutaka bubaruye kuri UPI: 5/01/10/05/340 yamuhaye, akayamusubiza uru rubanza rumaze kuba itegeko. Rwategetse Kazaroho Jean Bosco na Ntakirutimana Jeannette gufatanya gutanga amagarama y’ urubanza, buri wese agatanga ½ cyayo angana n’ibihumbi icumi agasubizwa Kayirangwa Denyse yatanzeho ingwate arega. [8] Ntakirutimana Jeanette na Kazaroho Jean Bosco ntibishimiye imikirize y’Urubanza barujuririra mu Rukiko Rukuru, Urugereko rwa Rwamagana ndetse banagobokesha Ntakirutimana Elisephan, Uwizeye Marie Rose, Uwingabire Brigitte na Banki Nkuru Yurwanda (BNR). [9] Ntakirutimana Jeannette yajuriye avuga ko hari imitungo imwanditseho ariko ikaba yarashyizwe muyo Kazaroho Jean Bosco na Kayirangwa Denyse bagomba kugabana. Kazaroho Jean Bosco nawe ajurira avuga ko hari umutungo yari asangiye na Nyirandimubenshi Patricie, wari umugore we bakaba baratandukanye, ufite UPI: 2/06/09/04/1033, uherereye mu Ntara y’Amajyepfo, Akarere ka Ruhango, mu Murenge wa Ruhango, ndetse n’indi mitungo yanditse kuri Ntakirutimana Jeannette yambuwe. [10] Urukiko Rukuru, Urugereko rwa Rwamagana rwaciye urubanza RCA00041/2020/HC/RWG - CMB RCA00043/2020/HC/RWG ku wa 17/05/2021, rwemeza ko ubujurire bwa Kazaroho Jean Bosco na Ntakirutimana Jeanette nta shingiro bufite, ko ubujurire bwa Kayirangwa Denyse bwuririye kubwa Kazaroho Jean Bosco na Ntakirutimana Jeanette nta shingiro bufite, ko urubanza RC00025/2019/TGI/NGOMA rwaciwe n’Urukiko Rwisumbuye rwa Ngoma ku wa 03/08/2020, ruhamanye agaciro karwo. Rutegeka ko Kazaroho Jean Bosco na Ntakirutimana Jeanette bagomba gusubiza Uwingabire Brigitte 750.000Frw y’igihembo cya Avoka no gusubiza BNR 750.000Frw y’igihembo cya Avoka.

## Page 7

[11] Mugufata icyemezo Urukiko Rukuru, Urugereko rwa Rwamagana rwashingiye kuri ibi bikurkira: Ku bujurire bwa Kazaroho Jean Bosco bugamije kugaragaza ko Urukiko Rwisumbuye rwa Ngoma rwaburanishije ku kitararegewe ndetse rukagifataho icyemezo, Urukiko Rukuru rwasanze, icyo Urukiko Rwisumbuye rwa Ngoma rwari rushinzwe, rushingiye ku makuru n’ibimenyetso byatanzwe n’uwareze mu rwego rwa mbere, ari gushakisha uburyo iriya mitungo yageze mu maboko ya Ntakirutimana Jeannette, ndetse ko rwafashe n’igihe cyo kuvugana no kubaza abavugwa ko baba baragurishije iyo mitungo Ntakirutimana Jeannette, ariko bakaba baragiye berekana ko imwe muri iyo mitungo ari Kazaroho Jean Bosco wayiguraga akibana na Kayirangwa Denyse, akayandikaho Ntakirutimana Jeannette nk’uko Urukiko Rwisumbuye rwabigaragaje; ko kuvuga ko Urukiko Rwisumbuye rwa Ngoma rwaburanishije ikitararegewe atari byo, kuko icyaregewe nk’uko byakomojweho kwari ukugabana imitungo yagaragajwe hagati y’impande zombi, ko gushakisha iyo mitungo no kwemeza ko abayitunze bayibonye mu buryo bw’uburiganya butubahirije itegeko, byari mu nshingano y’Urukiko. Ku bujurire bwatanzwe na Ntakirutimana Jeannette bw’uko Urukiko Rwisumbuye rwemeje ko amasezerano y’ubugure kuri imwe mu mitungo ye ateshejwe agaciro, ko hari ikibazo cy’amategeko, Urukiko rwasanze kuvuga ko mu rwego rwa mbere Urukiko Rwisumbuye rutubahirije amategeko mu kwemeza ko amasezerano y’ubugure ateshejwe agaciro, mu gihe abayagiranye nta kibazo bayafiteho bitarasabwe n’abatayagizemo uruhare nta shingiro byahabwa kuko mu manza nk’izi igisuzumwa ari uburyo bwemewe cyangwa bukurikije amategeko ufite umutungo utimukanwa yawubonyemo, kandi byagarajwe ko nta cyerekana ko ari Ntakirutimana Jeannette wari wawuguze ku buryo ari nawe wari ufite uburenganzira n’ububasha bwa kuwugurisha. Ko rero nta cyari gutuma ayo masezerano adateshwa agaciro, kuko atubahirije amategeko kimwe n’ibindi byemezo byose byafashwe bishingiye kuri ayo masezerano. Ku bijyanye nuko Urukiko rwemeje ko imwe mu mitungo ya Ntakirutimana Jeannette ari iya Kazaroho na Kayirangwa ntaho rushingiye, Urukiko rwasanze ibyo Ntakirutimana Jeannette avuga nta shingiro byahabwa kuko Urukiko Rwisumbuye rwa Ngoma rwerekanye aho rwashingiye rwemeza ko hari imitungo imwanditseho kandi ari iya Kazaroho Jean Bosco na Kayirangwa Denyse, cyane ko urwo Rukiko rwagaragaje ko ku mutungo UPI :2/01/05/01/903 Mulisa Evode yasobanuriye urwo Rukiko ko uwo baguze ari Kazaroho Jean Bosco kuko ariwe wamwishyuye ikiguzi amubwira ko ahagarariye Ntakirutimana Jeannette yise mushiki we banditse ku masezerano akaba ari nawe (Kazaroho) washyize umukono ku izina rya Ntakirutimana Jeannette, ko ntaho yahera avuga ko Urukiko ntacyo rwashingiyeho. Ku bujurire bwuririye ku bundi bwatanzwe na Kayirangwa Denyse avuga ko Umutungo ubaruye kuri UPI: 1/02/04/01/73 uri mu Mudugudu w'Amajyambere, Akagali ka Musezero, Umurenge wa Gisozi, Akarere ka Gasabo, imodoka RAVA 4 ifite plaque RAB 845 P, byagombaga kujya mu mitungo yagombaga kugabana na Kazaroho Jean Bosco, Urukiko Rukuru rwasanze nta shingiro bufite, kuko nta bimenyetso agaragaza byerekana ko umutungo ubaruye kuri UPI: 1/02/04/01/73 yari awusangiye na Kazaroho Jean Bosco ku

## Page 8

buryo bagombaga kuwugabana, ko nta n’uruhare akwiye kugira ku modoka RAVA 4, ifite Plaque RAB 845 P, kuko imvugo ye y’uko yatewe ubwoba agashyira umukono ku masezerano (yagiranye na Kazaroho Jean Bosco y’ubwumvikane kuri iyo modoka) atabigaragarije ibimenyetso, ko rero nta gihindutse kubyemejwe n’Urukiko Rwisumbuye rwa Ngoma. [12] Ntakirutimana Jeannette na Kazaroho Jean Bosco ntibishimiye imikirize y’urwo rubanza, ku wa 16/06/2021 barujuririra mu Rukiko rw’Ubujurire, ubujurire bwabo buhabwa RCAA00011/2021/CA,

na

RCAA00012/2021/CA,

ariko

ruburanishirizwa

kuri RCAA00011/2021/CA. [13] Ntakirutimana Jeannette, yajuriye avuga ko Urukiko Rukuru, Urugereko rwa Rwamagana rwategetse ko Kazaroho Jean Bosco na Kayirangwa Denyse bagabana imitungo ye ntaho rushingiye kandi rwirengagiza amategeko N’ibimenyetso yarugaragarije. [14] Kazaroho Jean Bosco nawe yajuriye avuga ko Urukiko Rukuru, Urugereko rwa Rwamagana rwagaragarijwe inenge yuko Urukiko Rwisumbuye rwa Ngoma rwaburanishije ku kitaregewe ariko ntirubifateho icyemezo, ahubwo rwemeza ko Kazaroho Jean Bosco na Kayirangwa Denyse bagabana imitungo kandi nabo batagaragaza uburyo bayihahanye. [15] Kayirangwa Denyse yatanze ubujurire bwuririye ku bundi asaba Urukiko rw’Ubujurire gutegaka Unguka Bank Ltd gutanga amakuru kuri compte 10400628450017 ya Karama Business Park Ltd, ndetse no gutegeka ko we na Kazaroho Jean Bosco bagabana ikiguzi cyavuye mu modoka RAVA 4 ifite plaque RAB 845 P nk’uko bigaragazwa na Raporo yo kuwa 21/03/2017 yakorewe ku murenge wa Muyumbu. [16] Urubanza rwaburanishirijwe mu ruhame ku wa 05/09/2022, Ntakirutimana Jeannette ahagarariwe na Me Karega Blaise Pascal, Kazaroho Jean Bosco ahagarariwe na Me Sadi Jashi , Kayirangwa Denyse yunganiwe na Me Hagenimana Polycarpe, Ntakirutimana Elisephan yunganiwe na Me Minani Sempiga Jean d’Amour, Uwingabire Brigitte ahagarariwe na Me Nsabimana Jean Baptiste, Banki Nkuru y’Urwanda (BNR) ihagarariwe na Me Ndahiro Kibogo Pascal, naho Uwizeye Marie Rose atitabye, inteko ifatira icyemezo mu ntebe cy’uko urubanza ruburanishwa Uwizeye Marie Rose adahari kuko bigaragara ko yamenyeshejwe umunsi urubanza ruzaburanishirizwaho, ariko ntiyitabe nta n’impamvu yatanze. [17] Iburanisha ryarapfundikiwe ababuranyi bamenyeshwa ko urubanza ruzasomwa kuwa 28/09/2022, ariko isomwa rigenda ryimurwa bitewe n’impamvu zitandukanye. Kuwa 21/10/2022 ubwo Urukiko rwiherereraga ngo rufate icyemezo,rwasanze ari ngombwa kongera gupfundura iburanisha kugira ngo ababuranyi bagire icyo bavuga kuri bimwe mu bimenyetso biri muri dosiye byatanzwe na Ntakirutimana Jeannette na Kazaroho Jean Bosco, kandi aba bombi nabo bakazaba bahari, rwemeza kandi ko ababuranyi bagira icyo bavuga ku mutungo ubaruye kuri UPI: 2/01/05/01/903 wagabanyijwemo kabiri (UPI 2/01/05/01/8464 na UPI 2/01/05/01/8465) kuko umutungo UPI 2/01/05/01/8464 uri mu bugwate bwa banki washyizwemo na Ntakirutimana Jeannette. Rwasanze kandi ari ngombwa ko ku munsi iburanisha ry'uru rubanza rizongera gufungurirwaho, Kazaroho Jean Bosco na Ntakirutimana Jeannette bazaza bitwaje inyandiko z'umwimerere z'ibimenyetso byose baburanisha muri uru rubanza.

## Page 9

[18] Iburanisha ryimuriwe ku wa 31/10/2022, uwo munsi ugeze ababuranyi bitaba Urukiko bahagarariwe abandi bunganiwe nka mbere, ariko Kazaroho Jean Bosco atitabye Urukiko nk’uko yabisabwe, Me Sadi Jashi umuhagarariye avuga ko baherukana imbonankubone ubwo yamuhaga urubanza mu Rukiko Rukuru, ko ubundi bavugana kuri telephone, ko ari no muri ubwo buryo yamusabye kumuhagararira; Ntakirutimana Jeannette avuga ko umugabo we Kazaroho Jean Bosco baherukana mu Ukuboza 2019, ko yigeze gufungwa nyuma agafungurwa by’agateganyo ariko agategekwa kujya ajya kwitaba, ko umunsi umwe yavuye mu rugo agiye kwitaba Ubushinjacyaha ntagaruke, ko bavugana kuri telephone gusa. [19] Muri iryo buranisha hasuzumwe ikibazo cy’ibimenyetso by’umwimerere ababuranyi bategetswe kwitaba bashyikirije Urukiko. Rukiko rwasanze ari ngombwa ko hashyirwaho umuhanga wo gusuzuma niba Ntakirutimana Jeannette ari we washyize umukono ku mazeserano y’ubugure bw’umutungo ubaruye kuri UPI: 2/01/05/01/903 uherereye mu Butantsinda, mu Murenge wa Ngoma, Akarere ka Nyanza yiswe “Kugurisha ikibanza”, bigakorwa hifashishijwe iyo nyandiko, inyandiko iriho umukono wa Ntakirutimana Jeannette yashyiriyeho umukono imbere y’Urukiko n’izindi nyandiko (z’umwimerere ziriho umukono wa Ntakirutimana Jeannette zitagibwaho impaka), iburanisha rirasubikwa, ababuranyi bakazahamagarwa kuburana ari uko inyandiko y’umuhanga yabonetse. [20] Mu cyemezo cyo ku wa 16/01/2023, gitegeka kugenzura inyandiko y’umuburanyi, Urukiko rwahaye Rwanda Forensic Labaratory inshingano yo gusuzuma umukono ugibwaho impaka ugaragara imbere y’amazina ya Ntakirutimana Jeannette ku nyandiko y’ubugure bw’ikibanza wiswe Q, ukagereranywa n’imikono ye itagibwaho impaka yiswe N1, N2, N3, N4, N5, N6, N7 na N8 n’imikono yasinyiye imbere y’Urukiko yo ku wa 31/10/2022 yiswe S1, S2, na S3, raporo igashyikirizwa uru Rukiko bitarenze ku wa 02/02/2023. [21] Raporo y’isuzuma ry’imikono yakozwe na Rwanda Forensic Laboratory ku wa 25/01/2023, yashyizwe muri dosiye ku za 01/02/2023, ababuranyi bahamagarwa mu iburanisha ryo ku wa 09/02/2023 kugira ngo bagire icyo bayivugaho, ruburanishwa ababuranyi bunganiwe abandi bahagarariwe nka mbere usibye Uwizeye Marie Rose utajya yitabira urubanza Urukiko rugafata icyemezo ko ruburanishwa adahari, buri wese mu bahari ahabwa umwanya wo kugira icyo avuga ku gisubizo cyatanzwe na Rwanda Forensic Laboratory, iburanisha rirapfundikirwa, bamenyeshwa ko urubanza ruzasomwa ku wa 27/02/2023, ariko ruza gusomwa ku wa 17/02/2023. [22] Hashingiwe kuri izo mpaka, Urukiko rwasanze hakwiye gusuzumwa ibibazo bikurkira: Kumenya niba umutungo ubaruye kuri UPI 5/01/10/05/340 n’ubaruye kuri UPI 2/01/05/01/903 ari imitungo bwite ya Ntakirutimana Jeanette ku buryo Urukiko Rukuru rutagombaga kuyishyira muyo Kazaroho Jean Bosco na Kayirangwa Denyse bagombaga kugabana Kumenya niba Urukiko Rukuru Urugereko rwa Rwamagana rwararenze imbibi z’ikiburanwa rugaca urubanza ku kitaregewe Kumenya niba Unguka Bank Ltd igomba gutegekwa gutanga amakuru kuri compte 10400628450017 ya Karama Business Park Ltd.

## Page 10

Kumenya niba Urukiko rugomba gutegeka ko Kazaroho Jean Bosco na Kayirangwa Denyse bagabana amafaranga y’ikiguzi cy’imodoka RAVA 4 ifite plaque RAB 845 P. Gusuzuma ibyerekeye amafaranga y’ikurikiranarubanza n’igihembo cya Avoka ndetse n’indishyi bisabwa n’ababuranyi muri uru rubanza. II. IBIBAZO BIGIZE URUBANZA N’ISESENGURA RYABYO A. Ubujurire bwa NTAKIRUTIMANA Jeannette Kumenya niba umutungo ubaruye kuri UPI 5/01/10/05/340 n’ubaruye kuri UPI 2/01/05/01/903 ari imitungo bwite ya NTAKIRUTIMANA Jeanette ku buryo Urukiko Rukuru rutagombaga kuyishyira muyo KAZAROHO Jean Bosco na KAYIRANGWA Denyse bagomba kugabana [23] Me Karega Blaise Pascal, uhagarariye Ntakirutimana Jeannette, avuga ko Kayirangwa Denyse atanga ikirego yashingiye ku ngingo ya 39 y’Itegeko Nº 59/2008 ryo kuwa 10/9/2008 rikumira kandi rihana ihohoterwa iryo ariryo ryose rishingiye ku gitsina, ariko ko mu mitungo asaba ko agabana na Kazaroho Jean Bosco harimo n’imitungo bwite ya Ntakirutimana Jeannette, avuga ko nayo bagomba kuyigabana kandi nta bimenyetso agaragaza by’uko nayo ari iyabo. [24] Avuga ko iyo mitungo ya Ntakirutimana Jeannette ari umutungo ugizwe n’ubutaka n’amazu abiri arimo imwe yo gukoreramo n’indi yo guturamo, ubaruye kuri UPI 2/01/05/01/903, uherereye mu Karere ka Nyanza, Ntakirutimana Jannette yaguze n’uwitwa Mulisa Evode, n’umutungo ufite UPI: 5/01/10/05/340 uri mu Karere ka Rwamagana, mu Murenge wa Muyumbu, yaguze n’uwitwa Nyiramana Lucie, ugizwe n’ikibanza kirimo inzu na faundation. [25] Me Karega Blaise Pascal avuga ko iyo mitungo yose Urukiko Rukuru rwategetse ko ijya muyo Kayirangwa Denyse na Kazaroho Jean Bosco bagomba kugabana rugendeye ku mvugo z’abatangabuhamya, rukirengagiza amasezerano y’ubugure n’ibyangombwa byatanzwe n’ikigo gishinzwe imicungire n’imikoreshereze y’ubutaka mu Rwanda, Ntakirutimana Jeannette yarugaragarije, byerekana ko iyo mitungo iburanwa ari iye. [26] Nyuma y’aho Urukiko rutegekeye ko Ntakirutimana Jeannette na Kazaroho Jean Bosco ubwabo bitabira iburanisha bitwaje inyandiko z’umwimerere w’ibimenyetso baburanisha, Ntakirutimana Jeannette yitabiriye iburanisha ryo ku wa 31/10/2022, avuga ko hari ibyo yazanye n’ibindi atabonye; ko inyandiko z’umwimerere z’ubutaka bubaruye kuri UPI: 5/01/10/05/340 ntazo afite, ko Mukamana Lucie wabumugurishije yabuhererekanyije na Uwingabire Brigitte waje nawe kubugurisha akaba ari nawe ufite ibyangombwa by’umwimerere, ko kuri uwo mutungo yaburanishije photocopie gusa. Avuga kandi ko uwo mutungo ugurwa atari ahari yari i Musanze, ko yatumye umugabo we Kazaroho Jean Bosco kubimukurikiranira amuha procuration ariko ko nayo yayibuze, ko iyo umugabo we ahaba yari kuyerekana. [27] Kubyo Kayirangwa Denise avuga ko atumva uburyo Ntakirutimana Jeannette yari gutuma umugabo we Kazaroho Jean Bosco kumusinyira, Ntakirutimana Jeannette avuga ko n’ubwo yashyingiranywe na Kazaroho Jean Bosco muri 2017, nawe yari yarabanye na Kazaroho Jean

## Page 11

Bosco kuva mbere mw’ibanga ryabo bombi, nk’uko yabanye na Kayirangwa, ndetse ko bari barabyaranye. [28] Me Karega Blaise Pascal umwunganira avuga ko iyo uwo yunganira ataba yaratanze procuration Notaire atari kwemera ihererekanya ry’umutungo, ko n’ibyo abo baburana basaba ko hakorwa igereranya ry’imikono ku nyandiko zirebana n’umutungo ubaruye kuri UPI: 5/01/10/05/340 bidakenewe kuko Ntakirutimana Jeannette yemereye Urukiko ko atari we wazishyizeho umukono. Naho ku mutungo ubaruye kuri UPI 2/01/05/01/903, uherereye mu Ntara y’Amajyepfo, Akarere ka Nyanza, Umurenge wa Kigoma, Akagali ka Butansida, avuga ko byavugwaga ko atari uwa Ntakirutimana Jeannette ndetse ko atariwe wawuguze, ariko ko igereranya ry’imikono ryagaragaje ko umukono uri ku masezerano y’ubugure bw’ikibanza yo kuwa 07/06/2016 ari uwe, ko rero uwo mutungo ari uwe kuko ari we wawuguze, ko uruhande rwa Kayirangwa Denyse ari bo basabye ko iyo nyandiko ipimwa, ko rero Urukiko rwakwemeza ko iyo nzu iri mu Butansinda ari iya Ntakirutimana Jeannette naho iy’i Kabuga ikaba iya Uwingabiye Brigitte, asaba ko Ntakirutimana Jeannette asubizwa amafaranga yatanzwe muri iryo pimwa. [29] Kayirangwa Denyse yiregura avuga ko imvugo ya Ntakirutimana Jeannette nta shingiro ifite, kuko imitungo yose yashakanye na Kazaroho Jean Bosco yayigaragaje mu manza zabanje, ko atumva ikindi Ntakirutimana Jeannette wajuriye yifuza kugaragarizwa, na cyane ko imwe mu mitungo iburanwa we na Kazaroho Jean Bosco bemeranya ko bayihahanye, naho kuyo batemeranyaho, Urukiko rwakoze iperereza rukagera aho iherereye ukuri kukajya ahagaragara, rugashingira ku bimenyetso rwashyikirijwe no ku mategeko. Avuga ko kuba buri wese mu baburanyi afite inshingano zo gutanga ibimenyetso bihamya ukuri kw'ibyo avuga, we yagaragaje inkomoko y’imitungo iburanwa, kuko nk’umutungo ufite UPI 5/01/10/05/340 uri ku Muyumbu we na Kazaroho Jean Bosco bawuguze na Nyiramana Lucie hari n’umuhungu we witwa Rusine Jean Claude, ariko nyuma Kazaroho Jean Bosco akora uburiganya bw’ inyandiko z’ubugure, avuga ko ari uwa Ntakirutimana Jeannette, uyu akawiyandikishaho bigatuma awugurisha uwitwa Uwingabire Brigitte. [30] Ku byo Ntakirutimana Jeannette avuga ko Kazaroho Jean Bosco yamuhagarariye agura umutungo ubaruye kuri UPI 5/01/10/05/340, Kayirangwa Denise avuga ko nta kuntu Ntakirutimana Jeannette yari gutuma Kazaroho Jean Bosco kuko yari akiri umugabo we (umugabo wa Kayirangwa Denyse), kandi uwo mutungo bawuguze bakibana mu mwaka wa 2016, ko kandi igihe Kazaroho yabaniye na Ntakirutimana Jeannete kizwi (igihe basezeraniye). [31] Kayirangwa Denyse avuga ku mutungo ufite UPI 2/01/05/01/903 uri mu Majyepfo mu Karere ka Nyanza, ko bawuguze na Mulisa Evode, uyu nawe mu ibazwa rye akaba yaremeje ko yawugurishije Kazaroho Jean Bosco, kandi ko nubundi Kazaroho Jean Bosco yaguraga uwo mutungo ashaka kuwuhisha, ko ariyo mpamvu abagurishije uwo mutungo bavuze ko yababwiye ko awugurira mushiki we, ko bitumvikana ukuntu uwo yahindutse umugore we. [32] Me Hagenimana Polycarpe wunganira Kayirangwa Denyse, avuga ko ibyo uhagarariye Ntakirutimana Jeannette avuga atari byo, kuko mbere yo gufata icyemezo Urukiko rwakoze iperereza ku mitungo UPI: 5/01/10/05/340 na UPI 2/01/05/01/903, rugashingira ku bimenyetso rwiboneye, ko rero rutirengagije ibimenyetso nk’uko abo baburana babivuga.

## Page 12

[33] Me Hagenimana Polycarpe avuga ko imikono iri ku nyandiko z’ubutaka bubaruye kuri UPI: 5/01/10/05/340 idahuye n’uwa Ntakirutimana Jeannete kandi ko iperereza ryakozwe n’Urukiko Rukuru ryagaragaje ko uwagurishije avuga ko haguze Kazaroho Jean Bosco, byerekana ko umutungo wagurishijwe wari uwa Kazaroho Jean Bosco na Kayirangwa Denise. [34] Ku bijyanye n’umutungo ufite UPI 2/01/05/01/903, Me Hagenimana Polycarpe avuga ko asanga raporo y’umuhanga (Rwanda Forensic Laboratory), Urukiko rutayishingiraho kandi ko rudategetswe kugendera ku cyemezo cy' umuhanga uwo ari we wese, ahubwo rushingira ku bushishozi bwarwo (ingingo ya 1081 y’itegeko n° 15/2004 ryerekeye ibimenyetso mu manza n’itangwa ryabyo), ko urukiko rwabona ko umutungo wo mu Butantsinda waguzwe na Kazaroho Jean Bosco abana na Kayirangwadenyse nk' uko byemejwe n' abamugurishije, rugategeka ko bawugabana. [35] Me Sadi Jashi, uhagarariye Kazaroho Jean Bosco, avuga ko ku birebana n’umutungo ubaruye kuri UPI 2/01/05/01/903, harebwa ikimenyetso cya raporo y’abahanga igahabwa agaciro muri uru rubanza, ku bindi, kuri iyi ngingo yasabye ko harebwa ibyo yavugiye mu nama ntegurarubanza ariko nk’uko inyandikomvugo y’Inama ntegurarubanza ibigaragaza, ntacyo yavuze kuri iyi ngingo. [36] Me Ndahiro Kibogo Joseph uhagarariye BNR, avuga ko umutungo wo mu Butansinda ntacyo bawuvugaho kuko utabareba ku wo ahagarariye nta kibazo awufiteho. [37] Me Nsabimana Jean Baptiste, uhagarariye Uwingabiye Brigitte avuga ko umutugo uri ku Muyumbu ubaruye kuri nº UPI: 5/01/10/05/340 Uwingabiye Brigitte yawuguze na Ntakirutimana Jeannette, ko yawugumana kuko awufitiye ibimenyetso, cyane ko bigaragara ko uwawumugurishije nawe yari yarawuguze na Nyiramana Lucie. Avuga kandi ko n’ubwo umutungo wo mu Butantsinda utabareba, raporo yakozwe na Rwanda Forencic Laboratory ikemura impaka kuri uwo mutungo, ko icyo kimenyetso cyafatwa nk’ikimenyetso mvaho gikemura impaka kuri uwo mutungo. [38] Ntakirutimana Elizephani, avuga ko iyi mpamvu y’ubujurire nta shingiro ifite kuko amategeko yubahirijwe. [39] Me Minani Sempinga Jean d’Amour wunganira Ntakirutimana Elizephan, avuga ko ntacyo avuga kuri iyi ngingo kuko itabareba. UKO URUKIKO RUBIBONA [40] Ipfundo ry’ikibazo kuri iyi ngingo y’ubujurire, ni ukumenya niba koko umutungo ubaruye kuri UPI 5/01/10/05/340 n’ubaruye kuri UPI 2/01/05/01/903 ari imitungo bwite ya Ntakirutimana Jeanette ku buryo Urukiko Rukuru rutagombaga kuyishyira muyo Kazaroho Jean Bosco na Kayirangwa Denyse bagomba kugabana. 1 Ibimenyetso bicukumbuwe no gusesengura urubanza ni ibimenyetso bitacukumbuwe n’amategeko, bicukumburwa n’ubwenge n’ubushishozi bw’abacamanza. Abacamanza bagomba kwemera gusa ibyo bimenyetso iyo bikomeye, bisobanuye kandi bihuje

## Page 13

[41] Ingingo ya 39 y’Itegeko N°59/2008 ryo kuwa 10/09/2008 rikumira kandi rihana ihohoterwa iryo ari ryo ryose rishingiye ku gitsina, iteganya ko: ”Ababanaga nk’umugore n’umugabo batashyingiranywe mu buryo buteganywa n’amategeko, bashyingirwa hakurikije ihame ry’ubushyingiranywe bw’umugabo umwe n’umugore umwe. Mu gihe umwe mu barebwa n’ibivugwa mu gika kibanziriza iki, yabanaga n’abagore cyangwa n’abagabo benshi, abanza kugabana ku buryo bungana na buri wese mu bo babanaga, umutungo bari bafitanye cyangwa bahahanye mbere y’uko ashyingirwa” … [42] Ingingo ya 12 y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, iteganya ko: “urega agomba kugaragaza ibimenyetso by’ibyo aregera. Iyo abibuze, uwarezwe aratsinda” (...). [43] Ingingo 3 y’itegeko N° 15/2004 ryo ku wa 12/06/2004 ryerekeye ibimenyetso mu manza n’itangwa ryabyo iteganya ko “Buri muburanyi agomba kugaragaza ukuri kw’ibyo aburana”. [44] Ku byerekeranye n’umutungo ufite UPI: 5/01/10/05/340, uherereye mu Ntara y’Iburasirazuba, Akarere ka Rwamagana, Umurenge wa Muyumbu, mu gika cya 46-49 cy’urubanza RCA00041/2020/HC/RWG-CMB RCA00043/2020/HC/RWG rujuririrwa, Urukiko Rukuru rwasanze amateka y’uwo mutungo agaragaza ko wahoze ari uwa Zaninka Vestine waje kuwugurisha Nyiramana Lycie, uyu nawe awugurisha kuwa 20/03/2016, ku nyandiko y’ubugure handikwa ko uguze ari Ntakirutimana Jeannette, ariko mu gusesengura umukono w’uwaguze witwa Ntakirutimana Jeannette, rusanga uwo mukono utandukanye cyane n’umukono asanzwe akoresha nk’uko biri mu nyandiko ziri muri dosiye, cyane cyane uri ku masezerano y’ubugure yo kuwa 31/12/2017 Ntakirutimana Jeannette yagiranye na Uwingabire Brigite, rusanga ahubwo umukono ugaragara ku masezerano y’ubugure bw’umutungo ubaruye kuri UPI: 5/01/10/05/340, usa neza n’umukono wa Kazaroho Jean Bosco ugaragara aho yagiye asinya hatandukanye nk’uko bigaragara mu bimenyetso bitandukanye biri muri dosiye, kandi rusanga yaba mu rwego rwa mbere ndetse no mu rwego rw’ubujurire ntaho Ntakirutimana Jeannette yigeze agaragaza ko yahaye ubutumwa Kazaroho Jean Bosco bwo kumugurira buriya butaka. [45] Dosiye y’urubanza igaragaza amasezerano y’ubugure yo ku wa 20/03/2016, yerekana ko Nyiramana Lucie agurishije Ntakirutimana Jeannette umutungo ubaruye kuri UPI: 5/01/10/05/340; kopi y’amasezerano y’ubukode burambye N0 340/RWA/MUY yo ku wa 13/04/2016, Ntakirutimana Jeannette yagiranye na Leta y’u Rwanda, Ikigo cy’Igihugu Gishinzwe Imicungire n’Imikoreshereze y’ubutaka, yerekana ko uwo mutungo ari uwe 100%, yashyizweho umukono na Ntakirutimana Jeannette (uko bigaragara) na Muvara Potin, Umubitsi w’impapurompamo z’ubutaka wungirije. Muri dosiye hari kandi kopi y’amasezerano y’ihererekanya ry’ubutaka Nyiramana Lucie yagiranye na Ntakirutimana Jeannette yo ku wa 22/03/2016, bombi bayashyiraho umukono. Muri dosiye hari kandi amasezerano y’ubugure bw’imodoka Kazaroho Jean Bosco yagiranye na Ntwali Jean Paul ku wa 21/06/2016, umukono wa Kazaroho Jean Bosco uri kuri ayo masezerano y’ubugure bw’imodoka ukaba ari nawo uri imbere y’amazina ya Ntakirutimana Jeannette mu nyandiko zavuzwe muri iki gika (mu masezerano yagiranye na Nyiramana Lucie y’ubugure bw’umutungo ubaruye kuri UPI: 5/01/10/05/340 n’inyandiko z’ihererekanya ry’uwo mutungo). Uwo mukono niwo kandi ugaragara imbere y’amazina ya Kazaroho Jean Bosco mu mazeserano y’ubwumvikane Kazaroho Jean Bosco yagiranye n’umugore we Kayirangwa Denise ku byerekeye imodoka RAV 4, RAB 845P bari bafitanye.

## Page 14

[46] Dosiye igaragaza na none ko icyemezo cyo gusana cyatanzwe kuri uwo mutungo, cyahawe Kazaroho Jean Bosco ku wa 25/04/2017. Igaragaza kandi ubuhamya bwatanzwe na Hagenimana Antoine, wavuze ko yari asanzwe ahabwa akazi na Kazaroho Jean Bosco kandi ko ariwe wamuhaye akazi ko gusakara inzu ya Kayirangwa Denyse yo ku Muyumbu, bakaba bari bumvikanye ko azajya amuha amafaranga nawe akihembera abakozi. [47] Nk’uko byagaragajwe haruguru, mu miburanire ye imbere y’uru Rukiko, Ntakirutimana Jeannette yemereye Urukiko ko atigeze ashyira umukono ku masezerano y ‘ubugure bw’umutungo ubaruye kuri UPI: 5/01/10/05/340, ko uwo mutungo ugurwa atari ahari yari Musanze, ko Kazaroho Jean Bosco ari we washyize umukono kuri ayo masezerano y’ubugure amuhagarariye, ndetse ko ari nawe wakurikiranye ibijyanye n’ihererekanya ryawo kwa Noteri no muri serivisi z’ubutaka kuko ngo yari yamuhaye ubutumwa (procuration), ariko ubwo Ntakirutimana Jeannette na Kazaroho Jean Bosco bategekwaga n’Urukiko kurwitaba ubwabo kandi bitwaje inyandiko z’umwimerere z’ibimenyetso baburanisha muri uru rubanza, nta n’umwe yaba Ntakirutimana Jeannette cyangwa umugabo we Kazaroho Jean de Dieu wagaragaje ubwo butumwa, habe na kopi yabwo. [48] Urukiko rw’Ubujurire rushingiye ko igihe umutungo ubaruye kuri UPI: 5/01/10/05/340 wagurwaga Kazaroho Jean Bosco yabanaga na Kayirangwa Denise nk’umugore n’umugabo, ababagurishije ubwo butaka ubwabo bakaba bahamya ko Kazaroho ariwe wabuguze ariko yajya gusinya akandikaho amazina ya Ntakirutimana Jeannette batabanaga nk’umugore n’umugabo kuko babanye bamaze gushyingiranwa muri Kamena 2017, kuba Ntakirutimana Jeannette uvuga ko yari yamuhaye ububasha bwo kumuhagararira nta kimenyetso abitangira ndetse na Avoka uhagarariye Kazaroho Jean Bosco akaba avuga ko ubwo butumwa ntabwo azi, detse Kazaroho Jean Bosco akaba atarasinye nk’uwatumwe ahubwo yarasinye nk’aho ari we Ntakirutimana Jeannette, bigaragaza ko uwaguze ubutaka buriho umutungo uburanwa ufite UPI: 5/01/10/05/340 ari Kazaroho Jean Bosco atari Ntakirutimana Jeannette, ko ahubwo yanditse ho amazina ya Ntakirutimana Jeannette ashaka kuriganya umugore we Kayirangwa Denyse bawufatanyije kuko ibimenyetso byagaragajwe haruguru byerekana ko uwo mutungo wabonetse bombi babana nk’umugore n’umugabo (batashyingiranywe byemewe n’amategeko) kandi bombi bafatanya gushaka ibitunga urugo rwabo n’ibiruteza imbere. [49] Rushingiye kuri ibyo bisobanuro, rurasanga rero nta kigaragaza ko umutungo ubaruye kuri UPI: 5/01/10/05/340 ari uwa Ntakirutimana Jeannette, ibyo avuga ko washyizwe mu mitungo Kazaroho Jean Bosco na Kayirangwa Denise bagomba kugabana kandi ari uwe bikaba nta shingiro bifite, ubujurire bwe kuri iyi ngingo bukaba nta shingiro bufite. [50] Ku byerekeye umutungo ubaruye kuri UPI 2/01/05/01/903, uherereye mu Ntara y’Amajyepfo, Akarere ka Nyanza, Umurenge wa Kigoma, Akagali ka Butansida, mu rubanza rujuririrwa, igika cya [60], Urukiko Rukuru rwasanze ibyo Ntakirutimana Jeannette avuga ko uwo mutungo ari uwe ku giti cye, utagombaga kujya mu mitungo Kazaroho Jean Bosco yagabanye na Kayiranga Denyse nta shingiro byahabwa kuko Urukiko Rwisumbuye rwa Ngoma rwerekanye aho rwashingiye rwemeza ko hari imitungo imwanditseho nyamara ari iya Kazaroho Jean Bosco na Kayirangwa Denyse, runavuga ko kuri uwo mutungo ufite UPI :2/01/05/01/903, Mulisa Evode yasobanuriye urwo Rukiko ko uwo baguze ari Kazaroho Jean Bosco, akaba ari nawe wamwishyuye ikiguzi cyawo amubwira ko ahaguriye Ntakirutimana Jeannette yise mushiki we, uyu akaba ari nawe banditse ku masezerano, Kazaroho Jean Bosco akaba ari nawe washyize umukono imbere

## Page 15

y’izina rya Ntakirutimana Jeannette, arangije amusaba kumushakira icyangombwa cyo kubaka aho hantu, aragisaba gitangwa mu izina rye (izina rya Mulisa Evode), ko batigeze babona Ntakirutimana Jeannette uwo munsi ko uwo babonye ari Kazaroho Jean Bosco waguze agatanga n’ ikiguzi akaba ari nawe washyize umukono ku nyandiko y’ubugure, rwanzura ko Ntakirutimana Jeannette atavuga ko ntaho Urukiko rwashingiye rufata icyemezo. [51] Dosiye igaragaza amasezerano yo ku wa 07/06/2016 yo kugurisha ikibanza yakozwe hagati ya Mulisa Evode na Ntakirutimana Jeannette, aho Mulisa Evode agira ati “ Njyewe Mulisa Evode ngurishije ikibanza cyanjye kiri mu Mudugudu wa Karama, nkigurishije Ntakirutimana Jeannette ampaye amafaranga 1.100.000Frw, abatangabuhamya bakaba Musoni Valens, Kalisa Gerve, Niyongira Weraris, Kanani Afordis, Mutesi Leo Fidel na Irankunda. [52] Mu iperereza Urukiko Rwisumbuye rwa Ngoma rwakoze ku wa 28/07/2020 mu Kagari ka Butansinda, Umurenge wa Kigoma mu Karere ka Nyanza, Intara y’Amajyepfo, k’umutungo ubaruye kuri UPI 2/01/05/01/903, uwitwa Nzamwita Jean Damascène wayoboraga Umudugudu wa Karama ( aho uwo mutungo uri), yabwiye Urukiko ko umutungo UPI 2/01/05/01/903 wabanje kugurwa na Jerome, nawe ahagurisha Mulisa Evode, uyu nawe waje kuhagurisha Kazaroho Jean Bosco, kandi ko Kazaroho Jean Bosco ariwe wahubatse, akajya amuha n’amafaranga yo kurihirira abatishoboye abishyurira mutual de sante), kugira ngo babashe gukomeza kuharindira umutekano, ko nyuma yo kuhubaka aribwo yahazanye uwitwa Ntakirutimana Jeannette. Uwitwa Musoni Valens (uri no mu bashyize umukono ku mazeserano y’ubugure) yabwiye Urukiko ko aho hantu haguzwe na Kazaroho Jean Bosco, ko nta mugore wari uhari ntawe yigeze ahabona. Uwitwa Karamage Sylvestre nawe yavuze ko isambu iburanwa ya Butansinda yaguzwe na Kazaroho Jean Bosco ayiguze na Mulisa Evode, naho Mulisa Evode akavuga ko isambu ye yayigurishije Kazaroho Jean Bosco, nyuma akaza kumwereka Ntakirutimana Jeannette avuga ko ari mushiki we ko ariwe ahaguriye, akaba arinawe (Mulisa Evode) washatse icyangombwa cyo kubaka mu izina rya Kazaroho Jean Bosco. [53] Raporo yo kuwa 25/01/202023 yakozwe na Rwanda Forencic Laboratory yari igamije kugaragaza niba umukono wa Ntakirutimana Jeannette uri ku nyandiko y’amasezerano y’ubugure bw’ikibanza yo ku wa 07/06/2016 wagibwagaho impaka muri uru rubanza uhuye n’uri ku zindi nyandiko Ntakirutimana Jeannette yashyizeho imikono itagibwaho impaka, igaragaza ko igereranya ryakozwe ku mukono wa Ntakirutimana Jeannette uri ku masezerano yo kuwa 07/06/2016 y’ubugure bw’ikibanza hagagati ya Mulisa Evode na Ntakirutimana Jeannette, buherereye mu Mudugudu wa Karama, Akagari ka Ngoma Umurenge wa Butantsinda,Akarere ka Nyanza, Intara y’Amajyepfo, ufitanye isano n’imikono ye (Ntakirutimana Jeannette) itagibwaho impaka. [54] Ku bijyanye n’umutungo ubaruye kuri UPI 2/01/05/01/903, uherereye ahavuzwe haruguru, Urukiko rw’Ubujurire rurasanga ababajijwe bose baragaragaje ko uwo mutungo waguzwe na Kazaroho ku wa 07/06/2016, akibana na Kayirangwa Denise nk’umugore n’umugabo ndetse akaba ari nawe wahubatse nk’uko bamwe mu batangabuhamya babajijwe babyemeje, n’ubwo yanditse ku masezerano ko uguze ari Ntakirutimana Jeannette yitaga mushiki we icyo gihe. Rurasanga kuba Kazaroho Jean Bosco yaba ari we washyize umukono kuri ayo masezerano mu mwanya wa Ntakirutimana Jeannette, cyangwa yaba yarayamushyiriye akaba ari we uyasinya, dore ko na raporo ya Rwanda Forencic Laboratory idahamya ko umukono uri ku masezerano ari uwa Ntakirutimana Jeannette kuko ivuga ko ufitanye isano n’uwe, ntacyo bihindura ku kuba uwo mutungo waraguzwe

## Page 16

na Kazaroho Jean Bosco mu gihe yabanaga na Kayirangwa Denise nk’umugore n’umugabo, akaba ahubwo yarasinyishije Ntakirutimana Jeannette mu rwego rwo gushaka kuwuriganya umugore we Kayirangwa Denise nk’uko byagaragajwe haruguru, bituma Ntakirutimana Jeannette awibaruzaho 100% ndetse awucishamo ibibaza bibiri (2) nk’uko nabyo byerekanywe, uwo mutungo nawo ukaba waragombaga gushyirwa mu mitungo bagomba kugabana kuko wabonetse bakibana nk’umugore n’umugabo. [55] Urukiko rw’Ubujurire rurasanga Urukiko Rukuru rutarirengagije ibimenyetso bigizwe n’amasezerano y’ubugure yakozwe kuri uwo mutungo ndetse n’ibyemezo byatanzwe kuri wo nk’uko Ntakirutimana Jeannette abivuga, ahubwo nk’uko byagaragajwe haruguru, rwasanze ayo masezerano y’ubugure bw’uwo mutungo yarakozwe mu buriganya nk’uko byari byanagaragajwe n’Urukiko Rwisumbuye rwa Ngoma rwasanze ari ngombwa kwikorera iperereza rukagera aho imitungo iburanwa iherereye, nyuma yo kubaza abatangabuhamya batandukanye bazi ibyayo, bakemeza ko iyo mitungo yagiye igurwa na Kazaroho Jean Bosco, (kuko Ntakirutimana Jeannette yari akiri umunyeshuri), ariko akayandika kuri Ntakirutmana Jeannette agamije kuvutsa Kayirangwa Denyse uburenganzira yari ayifiteho, nyuma y’ibyo bikorwa byo kuyimwandikaho bagahita bashyingiranwa muri Kamena 2017 bakabana; rusanga nta kindi Urukiko Rukuru rwari kwemeza, uretse kwemeza ko imitungo iburanwa Kazaroho Jean Bosco yayishakanye na Kayirangwa Denyse no gutegeka ko ijya mu mitungo bagomba kugabana. [56] Urukiko rurasanga raporo y’umuhanga ivugwa muri uru rubanza itari ikimenyetso kimara impaka kuri bose nk’uko uhagarariye Uwingabiye Brigitte abivuga, kuko rudategetswe kuyikurikiza mu gihe inyuranyije n’ibyiyumviro by’umucamanza2. [57] Urukiko rw’Ubujurire rurasanga kandi mu gihe hari hagaragajwe ko amasezerano yavuzwe haruguru y’ubugure bw’umutungo ufite UPI: 5/01/10/05/340 n’ay’ubugure bw’umutungo UPI :2/01/05/01/903 yagiye akorwa mu buriganya ndetse agaherwaho hatangwa ibyangombwa3, nta cyari kubuza Urukiko gutegeka ko iyo mitungo Kayirangwa Denyse na Kazaroho Jean Bosco bayigabana, nyuma yo kubona ko nta masezerano y’ubugure Ntakirutimana Jeannete yigeze agirana na Nyiramana Lucie ku mutungo ufite UPI 5/01/10/05/340, nta n’amasezerano Ntakirutimana Jeannette yagiranye na Mulisa Evode ku mutungo ufite UPI 2/01/05/01/903, ko ahubwo ayo masezerano yombi, abagurishije bayagiranye na Kazaroho Jean Bosco wanditse mu buriganya ko uguze ari Ntakirutimana Jeannette hamwe agashyiraho umukono mu mwanya we kandi nta butumwa yamuhaye Ahandi akamusinyisha (cyangwa akamusinyira), agamije kurigisa umutungo 2Ingingoya 98 y’Itegeko Nº 15/2004 ryoku wa 12/06/2004, ryerekeye ibimenyetsomu manza n ‘itangwa ryabyo: “Urukiko ntirukurikiza byanze bikunze ibitekerezo by’abahanga mu gihe binyuranye n’imyumvire y’abacamanza”. 3Reba urubanza n°RC 00025/2019/TGI/NGOMA rwaciwe ku wa n’Urukiko Rwisumbuye rwa Ngoma, kuva ku gika cya 24-36, ahabajijwe abatangabuhamya bazi neza iby’umutungo uburanwa, bakagaragaza ko iyo mitungo yagiye igurwa na KAZAROHO Jean Bosco, ariko k’ubw’ururiganya akandikwaho NTAKIRUTIMANA Jeannete, bigatuma amasezerano yakozwe kuri iyo mitungoateshwa agaciro. Reba na none imanza n° RCA 00041/2020/HC/RWG - CMB RCA 00043/2020/HC/RWG zaciwe n’Urukiko Rukuru, ku gika cya 47-53 ndetse n’igika cya 60 aho rwasobanuye ko imitungo iburanwa yagiye igurwa na KAZAROHO Jean Bosco arikoagakora amasezeranomu izina rya NTAKIRUTIMANA Jean Bosco.

## Page 17

asangiye na Kayirangwa Denyse, ayo masezerano y’uburiganya akaba ariyo Ntakirutimana Jeannette yifashisha ashaka kwerekana ko ariwe waguze iyo mitungo kandi atari byo, ubujurire bwa Ntakirutimana Jeannette kuri iyi ngingo bukaba mu by’ukuri ntabwabayeho. B.Ubujurire bwa KAZAROHO Jean de Dieu Kumenya niba Urukiko Rukuru Urugereko rwa Rwamagana rwararenze imbibi z’ikiburanwa rukaburanisha ku kitaregewe [58] Me Sadi Jashi uhagarariye Kazaroho Jean Bosco, avuga ko uwo ahagarariye yagaragarije Urukiko ikirego cyatanzwe na Kayirangwa Denyse, aho yasabaga Urukiko gutegeka ko bagabana ibibanza byubatswemo amazu, imodoka ya RAV 4 n’indishyi mbonezamusaruro zikomoka ku bukode bw’inzu kuva muri Kamena 2017; ko mu gukurikirana urubanza yagaragaje imitungo ya Ntakirutimana Jeannette n’umutungo wa Nyirandimubenshi Patricie, maze Urukiko rukagobokesha Ntakirutimana Jeannette n’abo bakoranye amasezerano mu kugura no kugurisha, ariko ko mu kuburanisha urwo rubanza rwarenze imbibi z’icyaregewe, rukaburanisha ibijyanye n’amasezerano y’ubugure bw’imitungo ya Ntakirutimana Jeannette. Avuga ko mu isesengurampamvu Urukiko Rukuru rwashingiye ku ngingo ya 104 n’iya 108 z’Itegeko ry’ibimenyetso, rugaragaza ko hakoreshwa uburyo bucukumbuye, mu kugaragaza ikiburanwa kitazwi cyo kumenya imitungo Kazaroho Jean Bosco na Kayirangwa Denyse batemeranywaho nk’uko bigaragara kuri paji ya 9 igika cya 30, ko Urukiko rutasuzumye ikibazo rwagaragarijwe, ahubwo rukagaragaza ibindi byagombaga gusuzumwa kandi bitari mu kirego, kandi ingingo ya 10 y’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko "Umucamanza aca urubanza ku cyasabwe cyose kandi kuri icyo cyonyine", ko umucamanza atagombaga guca urubanza kucyo ataregewe, ndetse ko uretse n’ibyo, nta bushobozi Kayirangwa Denyse yari afite bwo kugura iyo mitungo, kuko Kazaroho Jean Bosco ari we wakoraga muri projet undi nta kazi afite. [59] Me Sadi Jashi yakomeje avuga ko mu myaka Kazaroho Jean Bosco na Kayirangwa Denyse bamaze babana nk’umugabo n’umugore hari imitungo bahahanye mu bushobozi bari bafite kuko buzwi, ariko Kayirangwa Denyse mu gusaba kugabana imitungo bashakanye, yashyizemo n’imitungo itunzwe n’abandi Urukiko rukemeza ko ari Kayirangwa Denyse na Kazaroho Jean Bosco kandi nabo ubwabo batagaragaza uburyo babonye iyo mitungo, bigaragaza akarengane uwo ahagarariye yagize. Avuga kandi ko nubwo ubushobozi bari bafite butabemereraga kugira iyo mitungo, hari n’ibindi bimenyetso bibigaragaza, kuko mu bibazo by’amakimbirane bagiye bagirana, Kayirangwa Denyse atigeze agaragaza ko hari imitungo Kazaroho Jean Bosco yatwaye ahandi, ariyo mpamvu hakwiye gushingirwa ku ngingo ya 39 y’Itegeko rikumira kandi rihana ihohoterwa iryo ari ryo ryose rishingiye ku gitsina, harebwa imitungo Kayirangwa Denyse yashakanye na Kazaroho Jean Bosco akaba ariyo bagabana. [60] Kayirangwa Denyse, avuga ko iyi ngingo y’ubujurire bwa Kazaroho Jean Bosco nta shingiro ifite, kubera ko Urukiko rwaciye urubanza ku cyaregewe kijyanye no kugabana umutungo, kandi ko yawugaragaje ukagabanwa; ko ku bijyanye n’imitungo bari batunze, bari bafite uburyo bwo kuyigura kuko Kazaroho Jean Bosco yakoraga, nawe akamutwara ku kazi yagaruka akajyana

## Page 18

mu modoka abagenzi ndetse rimwe na rimwe akayizanamo imyaka yaguze mu isoko ndetse n’Urukiko rukaba rwarikoreye iperereza rugasanga ibyo avuga ari ukuri. [61] Me Hagenimana Polycarpe wunganira Kayirangwa Denyse avuga ko ibyo uhagarariye Kazaroho Jean Bosco avuga nta shingiro bifite, kuko atagaragaza amategeko Urukiko Rukuru rwirengagije, ngo rufate icyemezo kukitaregewe. [62] Me Karega Blaise Pascal, uhagarariye Ntakirutimana Jeannette avuga ko mu rubanza rujuririrwa Ntakirutimana Jeannette yagaragarije Urukiko ko yabonye imitungo iburanwa ayiguze, ko kandi abo bayiguze nta bibazo bafite ku masezerano bagiranye, akanarugaragariza ko Kayiragwa Denyse nta burenganzira afite bwo gusaba ko amasezerano atagizemo uruhare aseswa hashingiwe ku ngingo ya 113 y’Itegeko rigenga amasezerano, ariko ko Urukiko rwabyirengagije, akaba ari yo mpamvu asaba ko byakosorwa, hashingiwe ku ngingo ya 44 no ku ngingo ya 113 y’Itegeko ry’amasezerano ryavuzwe haruguru. [63] Me Nsabimana Jean Baptiste uhagarariye Uwingabire Brigitte, avuga ko nubwo uyu yari yarishimiye imikirize y'urubanza RCA00041/2020/HC/RWG, CMB RCA 00043/2020/HC/RWG rujuririrwa, Urukiko rwazareba niba impamvu Urukiko Rukuru rwashingiyeho rufata icyemezo zigaragara kuva ku gika cya 47 kugeza ku cya 50, igenzurwa ry'imyandikire y'imikono iri ku mpapuro rikorwa n'amaso cyangwa binyura mu nzira yo kuyipimisha mu rwego rubifitiye ububasha. Avuga ko mu rubanza harimo abagore 3 babanye na Kazaroho Jean Bosco mu bihe bitandukanye, ko icyari kurebwa cyari ugushingira ku ngingo ya 39 y’Itegeko N°59/2008 ryo kuwa 10/09/2008 rikumira kandi rihana ihohoterwa iryo ari ryo ryose rishingiye ku gitsina, harebwa umutungo Kazaroho Jean Bosco yabanyemo na buri mugore, bityo amasezerano Ntakirutimana Jeannette yagiranye na Uwingabire Brigitte ku mutungo UPI : 5/01/10/05/340 ntateshwe agaciro, kuko umutungo utakagombye kwamburwa Ntakirutimana Jeannette wabanye na Kazaroho Jean Bosco mu buryo bwemewe n’amategeko ngo uhabwe Kayirangwa Denyse babanye mu buryo budakurikije amategeko. [64] Me Ndahiro Kibogo Joseph uhagarariye BNR, avuga ko Urukiko Rukuru, Urugereko rwa Rwamagana rwasobanuye inenge iri mu masezerano Ntakirutimana Jeannette ashingiraho nk’uko bigaragara mu gika cya 47, icya 48, n’icya 54, aho rwashimangiye ishingiro ry’imitungo iburanwa, maze mu gika cya 60 rukemeza ko itagomba kuba iye. Ko rero rwaciye urubanza ku cyaregewe ndetse kuri cyo cyonyine, rukanaburanisha mu mizi hubahirijwe amategeko, nk’uko biteganywa n’ingingo ya 10 n’iya 72 z’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi. UKO URUKIKO RUBIBONA [65] Impaka kuri iyi ngingo y’ubujurire, zishingiye ku kumenya niba Urukiko Rukuru rwararenze imbibi z’ikiburanwa rugaca urubanza ku kitaregewe, no kumenya niba kuba Kayirangwa Denyse nta kazi gahemberwa umushahara yari afite bimuvutsa uburenganzira ku mitungo umugabo we Kazaroho Jean Bosco yahashye babana nk’umugore n’umugabo.

## Page 19

[66] Ingingo ya 10 y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, iteganya ko: «Umucamanza aca urubanza ku cyasabwe cyose kandi kuri icyo cyonyine». [67] Mu rubanza RCAA0018/13/CS, rwaciwe n’Urukiko rw’Ikirenga ku wa 24/12/2014 haburana Harerimana Emmanuel na Sebukayire, baburana ikibanza, urwo Rukiko mu gika cya 20- 22 rwerekanye ko gutunga ubutaka bidahagije, ahubwo ko mu gihe bugibwaho impaka, ugomba kwerekana inkomoko yabwo ndetse ko mu gihe bigaragaye ko ubufite yabubonye mu buryo bw’uburiganya, ntacyatuma icyangombwa cyabutanzweho kidateshwa agaciro4. [68] Mu rubanza RS/INJUST/RC00004/2018/SC rwaciwe n’Urukiko rw’Ikirenga haburana Nicyabera na Mukagatare, urwo Rukiko rwemeje ko “Uwakwiyandikishaho ubutaka aterekanye ko yabubonye muri bumwe mu buryo buteganyijwe n’itegeko, aba abikoze mu buryo bunyuranyije n’amategeko, ibyangombwa yahabwa, ubwabyo akaba atari byo bituma abugiraho uburenganzira, kubera ko bishobora guteshwa agaciro hagize ugaragaza ko ubwo butaka ari we nyirabwo5”. [69] Mu rubanza RCAA00051/2018/CA, rwaciwe n’Urukiko rw’Ubujurire ku wa 04/10/2019, haburana Kayigumire Emmanuel n’abandi na Kayumba Christopher n’abandi, Urukiko rwasanze abavuga ko baguze ubutaka buburanwa kandi ko babuguze n’ababufitiye ibyangombwa by’ubutaka, bitahabwa ishingiro kuko batagaragaza ko abo babuguze babukomora kuri nyirabwo ndetse ko kuba ibibanza barabishakiye ibyangombwa bitangwa n’ubuyobozi, hatakwemezwa ko ubutaka bwa Kanamugire Tharcisse ari ubwabo hashingiwe kuri ibyo byangombwa, batabashije kugaragaza uburyo babukomora kuri nyirabwo6. [70] Nk’uko byibukijwe haruguru, Urukiko Rukuru, Urugereko rwa Rwamagana rwemeje ko ubujurire bwa Kazaroho Jean Bosco na Ntakirutimana Jeanette nta shingiro bufite, rwemeza ko ubujurire bwa Kayirangwa Denyse bwuririye ku bujurire bwabo nabwo nta shingiro bufite, ko urubanza RC00025/2019/TGI/NGOMA rwaciwe n’Urukiko Rwisumbuye rwa Ngoma ku wa 03/08/2020 ruhamanye agaciro karwo, uru narwo rukaba rwari rwemeje ko imitungo iburanwa igabanywa mu buryo bungana hagati ya Kazaroho Jean Bosco na Kayirangwa Denyse cyane ko rwari rwamaze kugaragaza ko umutungo ufite UPI 2/01/05/01/903 uherereye mu Butansinda n’undi ufite UPI 5/01/10/05/340 uherereye ku Muyumbu, Kazaroho Jean Bosco yayandikishije kuri Ntakirutimana Jeannette akoresheje uburiganya. [71] Dosiye igaragaza ko Kayirangwa Denyse atanga ikirego mu Rukiko Rwisumbuye rwa Ngoma, yarusabaga gutegeka ko agabana n’umugabo we Kazaroho Jean Bosco umutungo bashakanye ugizwe n’imitungo itimukanwa ibaruye kuri UPI zikurikira: UPI 5/01/10/05/345 cyagabanyijwemo kabiri kivamo UPI 5/01/10/05/5963 na UPI 5/01/10/05/5964; UPI 4Reba urubanza Nº RCAA 0018/13/CS, rwaciwe n’urukiko rw’Ikirenga ku wa 24/12/2014, haburana Harerimana Emmanuel na SEBUKAYIRE, igika cya 20-22. urupapurorwa .6-7. 5 Reba urubanza n° RS/INJUST/RC00004/2018/SC rwaciwe ku wa 21/01/2020 n’Urukiko rw’Ikirenga, haburana NICYABERA na MUKAGATARE, igika cya 22. 6Urubanza nº RCAA 00051/2018/CA, rwaciwe n’Urukikorw’Ubujurire ku wa 04/10/2019, haburana KAYIGUMIRE Emmanuel n’abandi na KAYUMBA Christopher n’abandi, ibika bya 34 na 35. Urupapuro rwa.9-10.

## Page 20

5/01/10/05/4918; UPI 2/06/09/04/1033; UPI 2/01/05/01/903 wagabanyijwemo kabiri ukavamo UPI 2/01/05/01/8464 na UPI 2/01/05/01/8465;UPI 5/01/10/05/340 na UPI 1/02/04/01/73, nk’uko wagaragajwe mu “Ikiburanwa”, iyo mitungo ikaba iri mu turere, imirenge, utugari n’imidugudu bitandukanye mu Gihugu cy’u Rwanda. Kuri iyo mitungo itimukanwa hakiyongeraho imodoka RAVA 4 ifite Plaque RAB 845 P, asaba n’indishyi mbonezamusaruro zihwanye na miliyoni umunani (8. 000. 000Frw) z’amafaranga yari kuvana ku nzu yagombaga gukodeshwa kuva muri Kanama 2017. [72] Dosiye igaragaza ko Ntakirutimana Jeannette kimwe na Kazaroho Jean Bosco bajuririye Urukiko Rukuru, Urugereko rwa Rwamagana bavuga ko Urukiko Rwisumbuye rwa Ngoma, rwaciye urubanza ku cyo rutaregewe kuko rwasheshe amasezerano y’ubugure Kayirangwa Denyse ataregeye ndetse atagizemo uruhare, rugatesha agaciro n’ibyangombwa byawutanzweho. Ibi kandi ni nako uhagarariye Uwingabire Brigitte abibona. [73] Urukiko Rukuru, Urugereko rwa Rwamagana, mu gika cya 33 cy’urubanza rujuririrwa rwasanze icyaregewe kwari ukugabana imitungo yari yagaragajwe hagati y’impande zombi, bityo ko gushakisha iyo mitungo no kwemeza ko abayitunze bayibonye mu buryo bw’uburiganya butubahirije itegeko, byari mu nshingano y’Urukiko. Mu gika cya 34 rwasanze bidahagije ko uwabonye umutungo yitsitsa gusa ko yawuguze cyangwa afite icyangombwa cy’ubutaka, umwandisteho, ahubwo ko nyuma y’ibyo yagombye no kwerekana ko umutungo yaguze umwanditseho yawuguze na nyirawo nawe wawubonye mu buryo bukurikije amategeko. Rusanga aribyo Urukiko Rwisumbuye rwa Ngoma rwasesenguye rugera naho iyo mitungo iherereye, rwibariza abatangabuhamya batandukanye. [74] Urukiko rw’Ubujurire rusanga nk’uko byemejwe mu manza zavuzwe haruguru, zaciwe n’Urukiko rw’Ikirenga ndetse n’uru Rukiko, kimwe n’ibisobanuro byatanzwe n’Urukiko Rukuru, mu gihe haburanwa umutungo utimukanwa (ikibanza, isambu, inzu,…), ndetse hari n’ibyemezo/ibyangombwa byerekana nyirabwo ubufite, ariko urukiko rugasanga abawufite barawubonye mu buryo budakurikije amategeko, nta cyabuza ko ibyo byemezo/ibyangombwa biteshwa agaciro, kuko igishingirwaho hemezwa ko ufite umutugo ariwe nyirawo, ari inkomoko yawo n’uburyo yawubonyemo aho kwitsitsa ku byangombwa uvuga ko ari nyir’umutungo afite. [75] Urukiko rurasanga kuba byagaragajwe ko ibyo inyandiko z’icyiswe amasezerano y’ubugure Ntakirutimana Jeannette yagiranye na Nyiramana Leocadie ndetse n’ayo yagiranye na Mulisa Evode zihamya binyuranyije n’ukuri, kuko nta masezerano Ntakirutimana Jeannette yagiranye nabo ahubwo uwaguze ari Kazaroho Jean Bosco mu gihe yari akibana n’umugore we Kayirangwa Denyse, ariko ku bw’uburiganya akandika ku nyandiko z’ubugure ko uguze ari Ntakirutimana Jeannette yateganyaga kubana nawe, niyo Urukiko Rukuru rutazitesha agaciro ntacyo byamarira Ntakirutimana Jeannette na Kazaroho Jean Bosco baziburanisha, kuko byagaragaye ko zitavugisha ukuri, bivuze ko Urukiko Rukuru, Urugereko rwa Rwamagana, kimwe n’Urukiko Rwisumbuye rwa Ngoma, n’ubundi zitagombaga kuzishingiraho nk’ibimenyetso byerekana ko umutungo uburanwa waguzwe na Ntakirutimana Jeannete, kuko ibyo zihamya binyuranyije n’ukuri, akaba yarazifashishije kugira ngo yiyandikisheho iyo mitungo akoresheje uburiganya yari aziranyeho na Kazaroho Jean Bosco.

## Page 21

[76] Urukiko rusanga n’ubwo bitari ngombwa ko Urukiko Rukuru, Urugereko rwa Rwamagana (ndetse n’Urukiko Rwisumbuye rwa Ngoma) zikoresha amagambo avuga ko “amasezerano ateshejwe agaciro”, ntacyo byahindura ku cyemezo rwafashe cyo gutesha agaciro ibyangombwa by’ubutaka byahawe Ntakirutimana Jeanette hakoreshejwe uburiganya ku mitungo ibaruye kuri UPI 2/01/05/01/903 wagabanyijwemo kabiri ukavamo UPI 2/01/05/01/8464 na UPI 2/01/05/01/8465, uherereye mu Ntara y’Amajyepfo, Akarere ka Nyanza, umurenge wa Kigoma, akagali ka Butansida n’umutungo ubaruye kuri UPI: 5/01/10/05/340 uherereye mu mudugudu wa Gatuza,Umurenge wa Muyumbu, Akarere ka Rwamagana, kuko yanditswe kuri Ntakirutimana Jeannette mu buryo budakurikije amategeko ikaba itagomba kumwegurirwa. [77] Urukiko rurasanga kuba icyaburanwaga muri uru rubanza ari umutungo utimukanwa, ariko bigaragara ko umwe mu baburanyi k’ubw’uburiganya awita uwe, nta cyari kubuza Urukiko gutesha agaciro ibyangombwa biwukomokaho. [78] Kubyo uhagarariye Kazaroho Jean Bosco avuga ko Kayirangwa Denyse atari kugira uburenganzira kuri iyo mitungo kuko atasezeranye na Kazaroho Jean Bosco ndetse nta n’akazi yari afite, Urukiko rw’Ikirenga mu rubanza RCAA0014/15/CS, rwaciwe ku wa 01/12/2017, haburana Mutoni K. Jacqueline na Niwenshuti Aloys, rwasanze “mu gihe ababanaga nk’umugabo n’umugore batarashyingiranywe bahagaritse kubana, kugirango bagabane umutungo n’uko bagomba kuba bawufitanye cyangwa barawushakanye”, amagambo “bawufitanye” cyangwa “barawushakanye” akaba atavuga ko buri wese agomba kugaragaza ingano (quantité) y’ibyo yakoze kugira ngo umutungo ubeho cyangwa ngo yerekane ibyo yawushyizeho kugirango wiyongere agaciro, ahubwo uwo mutungo ugomba kuba warabonetse muri cya gihe kidashidikanywaho bombi babanaga kuko icya ngombwa ari uko muri iyo mibanire buri wese aba afite ibyakora mu guteza imbere urugo7. Byumvikanisha ko kubirebana n’uru rubanza, niyo haba hari imitungo Kazaroho Jean Bosco yaba yarabonye abana na Kayirangwa Denyse nk’umugore n’umugabo, ariko uyu nta kazi afite kamuhesha umushahara ugenwe ku buryo buzwi bitabuza Kayirangwa Denyse kuyigiraho uburenganzira mu gihe Kazaroho Jean Bosco yaba ashatse kujya gushyingiranwa n’undi mugore. [79] Hashingiwe ku bisobanuro bimaze gutangwa haruguru, Urukiko rw’Ubujurire rurasanga kuba hari amasezerano Urukiko Rukuru, Urugereko rwa Rwamagana rwasanze yarakozwe mu buriganya, ndetse agaherwaho hatangwa ibyangombwa, ariko amasezerano kimwe n’ibyo byangombwa ntibishingirweho nk’ibimenyetso bigaragaza nyir’umutungo, ndetse bigateshwa agaciro, bitakwitwa ko Urukiko Rukuru Urugereko rwa Rwamagana rwarenze imbibi z’ikiburanwa rukaburanisha ku kitararegewe, kuko uburiganya bwakoreshejwe mu kubona ibyangombwa ku mutungo, uwabukoresheje atabwitwaza avuga ko uwo mutungo umwanditseho ari uwe, bityo ubujurire bwa Kazaroho Jean Bosco kuri iyi ngingo bukaba nta shingiro bufite. C. Ubujurire bwuririye ku bundi bwa KAYIRANGWA Denyse Kumenya niba UNGUKA BANK Ltd igomba gutegekwa gutanga amakuru kuri compte 10400628450017 ya Karama Business Park Ltd. 7 Reba urubanza RCAA0014/15/CS , rwaciwe n’Urukikorw’Ikirenga ku wa 01/12/2017 haburana MUTONI K. Jackline na NIWENSHUTI Aloys n’undi.

## Page 22

[80] Kayirangwa Denyse yatanze ubujurire bwuririye ku bundi asaba ko umutungo ubaruye kuri UPI : 1/02/04/01/73 uri mu Mudugudu w'Amajyambere, Akagali ka Musezero, Umurenge wa Gisozi, Akarere ka Gasabo, ugizwe n’ubutaka burimo inzu ebyiri Kazaroho Jean Bosco yandikishijeho Ntakirutimana Jeanette agamije kuwumuriganya, kandi yarawuguze n'uwitwa Ntakirutimana Elizephan, Urukiko rwategeka Unguka Bank Plc gutanga amakuru kuri compte no 10400628450017 ya Karama Business Park Ltd kugira ngo ukuri kujye ahagaragara nk’uko n’Urukiko Rwisumbuye rwa Ngoma rwari rwabisabye mu ibaruwa yo kuwa 15/07/2020, ko hagagagazwa ba nyiri compte ndetse na ba signataires, igihe yafunguriwe, itariki umwenda wa Miliyoni 17 zirenga uvugwa washyiriwe kuri iyo konti, ndetse na historique ihera igihe sosiyete Karama Business Park Ltd yashingiwe kugera ku wa 25/08/2017. [81] Avuga ko baguze icyo kibanza na Ntakirutimana Elizephan bakabanza kumuha 2.500.000Frw ku mafaranga yavaga mu bucuruzi bwa Karama Business, Ntakirutimana Jeannette akaba ariwe wasabye inguzanyo ariko yitwaje Karama Business, Kayirangwa Denyse yari afatanyije na Kazaroho Jean Bosco. [82] Me Nsabimana Jean Baptiste avuga ko Kayirangwa Denyse atakagombye gusaba Urukiko kumushakira amakuru, kuko mu manza mbonezamubano urubanza ari urw’ababuranyi. [83] Me Ndahiro Kibogo Joseph, avuga ko iyi ngingo ariyo itumye bagera muri uru Rukiko, ko asanga icyemezo cy’Urukiko Rukuru kigaragara mu gika cya 75 cy’urubanza RCA00041/2020/HC/RWG-CMB RCA 00043/2020/HC/RWG kigumishaho icyemezo cyafashwe n’Urukiko Rwisumbuye rwa Ngoma mu rubanza RC00025/2019/TGI/NGOMA cyemeza ko umutungo ubaruye kuri UPI 1/02/04/01/73 utari mu mitungo Kazaroho Jean Bosco na Kayirangwa Denyse bagomba kugabana gifite ishingiro, kuko Kayirangwa Denyse atashoboye kugaragaza ko mu gihe uwo mutungo wagurwaga yabanaga na Kazaroho Jean Bosco, cyangwa ngo agaragaze ko amafaranga baguze uwo mutungo akomoka mu mutungo yari afitanye na Kazaroho Jean Bosco, kandi afite inshingano yo kugaragaza ukuri kw’ibyo aburana, nk’uko bitegenwa n’ingungo ya 3 y’Itegeko nº 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, ko rero kuba ataratanze ibimenyetso atari guhindukira ngo asabe Urukiko Rukuru kubimushakira. [84] Ntakirutimana Elizephani avuga ko umutungo ubaruye kuri UPI: 1/02/04/01/73 yawuguze hanyuma akaza kuwugurisha Ntakirutimana Jeannette, ariko mu gihe batarakora ihererekanya (mutation) akamutiza icyagombwa akacyifashisha yaka amafaranga muri Unguka Bank, ariko ko yaje kunanirwa kwishyura maze akawugurisha Uwizeye Marie Rose, n’ubundi batarawuhererekanya,kuko wari ukimwaditseho akaba ari we wawuhererekanyije na Uwizeye Marie Rose, ko kandi yahagurishije Kazaroho Jean Bosco na Kayirangwa Denyse baratandukanye, uwo mutungo ukaba ari uwa Uwizeye Marie Rose, kuko nta hantu na hamwe Kayirangwa Denyse agaragaza ko Ntakirutimana Jeannette yawugurishije ari uwe na Kazaroho Jean Bosco. [85] Me Minani Sempinga Jean d’Amour, avuga ko nta hantu na hamwe Ntakirutimana Elizephan yigeze agurisha Kazaroho Jean Bosco uwo mutungo, kandi ko Kayirangwa Denyse nta kimenyetso atanga kibigaragaza, nyamara hari ikimenyetso cy’Ikigo cy’Igihugu gishinzwe imicungire n’imikoreshereze y’ubutaka, cyerekana ko umutumgo wanditse kuri Ntakirutimana Jeannette.

## Page 23

[86] Me Sadi Jashi, avuga ko nta kimenyetso Kayirangwa Denyse agaragaza cyerekana ko uwo mutungo yawushakanye na Kazaroho Jean Bosco, ko yemeranya n’icyemezo cyafashwe n’Urukiko Rukuru, kuri iyi ngingo. UKO URUKIKO RUBIBONA [87] Ingingo ya 12 y’Itegeko No 22/2018 ryo ku wa 29/04/2018 ryavuzwe haruguru, iteganya ko : « urega agomba kugaragaza ibimenyetso by’ibyo aregera. Iyo abibuze, uwarezwe aratsinda » (...) naho ingingo 3 y’Itegeko N° 15/2004 ryo ku wa 12/06/2004 ryavuzwe haruguru, iteganya ko « buri muburanyi agomba kugaragaza ukuri kw’ibyo aburana ». [88] Kayirangwa Denyse asaba Urukiko gutegeka Unguka Bank Ltd gutanga amakuru kuri compte 10400628450017 ya Karama Business Park Ltd, kugira ngo hagaragare niba konti Ntakirutimana Jeannette yakiyeho inguzanyo atayifatanyije na Kazaroho Jean Bosco igihe yakaga inguzanyo yaguze umutungo ubaruye kuri UPI 1/02/04/01/73, uherereye mu Mudugudu w’Amajyambere, Akagali ka Musezero, Umurenge wa Gisozi, Akarere ka Gasabo, ubu wanditswe kuri Uwizeye Marie Rose, n’igihe iyo nguzanyo yayiherewe kugira ngo harebwe niba icyo gihe atari akibana na Kazaroho Jean Bosco nk’umugabo n’umugore, ku buryo uwo mutungo uri muyo bagomba kugabana ariko Kazaroho Jean Bosco akaba yarawandikishije kuri Ntakirutimana Jeannette, yirengagije ko wavuye mu bucuruzi bari bafite bwanditse kuri Karama Business Park Ltd. [89] Mu rubanza rujurirwa (igika cya [73]), Urukiko Rukuru, Urugereko rwa Rwamagana rwasanze ibyo Kayirangwa Denyse n’umwunganira bavuga ko uwo mutungo we n’uwahoze ari umugabo we Kazaroho Jean Bosco bawuguze na Ntakirutimana Elizephani nta bimenyetso yabigaragarije cyangwa ngo yerekane n’undi waba ubizi bahagura ngo Urukiko rube rwamubaza, ko kuvuga ko amasezerano y’ubugure Kazaroho Jean Bosco yaba yarayamwibye, Urukiko rwasanze ntaho rwashingira rwemeza koko ko ibyo avuga ari ukuri, cyane ko iyo biza kuba aribyo ntacyari kumubuza kwegera inzego zibinshinzwe ibyo bikiba zigakora iperereza, ku buryo uyu munsi yashoboraga no kwerekana ko byibuze hari icyakozwe kuri icyo kibazo, rwanzura ko kuba ntacyo yakoze ari uko azi neza ko nta byabayeho, ko rero nta kosa Urukiko Rwisumbuye rwa Ngoma rwakoze rikwiriye gukosorwa8. 8Mu rwego rwa mbere, mu rubanza RC00025/2019/TGI/NGOMA rwaciwe n’Urukiko Rwisumbuye rwa Ngoma, mu gika cya 47, rwasanze uwo mutungo uri mu kibanza gifite UPI 1/02/04/01/73, uherereye mu Mudugudu w’Amajyambere, Akagalika Musezero, Umurenge wa Gisozi, Akarere ka Gasabo, wanditsweho UWIZEYE Marie Rose uhafitiye ibyangombwa, yawishakiye kuko yahaguze tariki 5/5/2017 agujije amafaranga muri Banki Nkuru y’u Rwanda, ahagura na NTAKIRUTIMANA Elisephan na UWAMARIYA Delphine bari banditse kuri uwo mutungobakaba bari barahagurishije NTAKIRUTIMANA Jeanette wabishyuye akoresheje amafaranga y’ inguzanyo yari ahawe na Unguka Bank nk’ uko bigaragazwa n’ ayo masezerano anyuranye bashyikirije Urukiko; ibyo Kayirangwa akaba atabashije kubivuguruza. Rwasanze nta kindi kimenyetso KAYIRANGWA Denyse yigeze agaragariza Urukiko cy’ uko aho haguzwe mu mutungo bari bafitanye na Kazaroho mbere yuko bahisemo guhagarika ukubana kwabo nk’ umugore n’ umugabo, uretse kuvuga gusa ko Kazaroho yahatuye baramaze gutandukana, byongeye ko, icyo gihe Kazaroho atari akibana na Kayirangwa, na none nomu iperereza Urukiko rwikoreye kuri umwe mububatse aho hantu witwa Katabogama akaba yarabwiye Urukiko ko nta narimwe yigeze abona Kayirangwa Denyse mu gihe cyose bubaka iyonzu.

## Page 24

[90] Muri dosiye hagaragara amasezerano ya burundu yo ku wa 24/08/2017, yakozwe hagati ya Ntakirutimana Jeannette na Ntakirutimana Elizephan na Uwamaliya Delphine, y’ubugure bw’ikibanza gifite UPI 1/02/04/01/73, giherereye mu Mudugudu w’Amajyambere, Akagali ka Musezero, Umurenge wa Gisozi, Akarere ka Gasabo mu Mujyi wa Kigali, yerekana ko Ntakirutimana Elizephan na Uwamaliya Delphine bagurishije Ntakirutimana Jeannette ikibanza kivuzwe haruguru kuri 20.000.000Frw n’inyemezabwishyu abagurishije icyo kibanza bahaye uwaguze, bemera ko bakiriye ayo mafaranga. Hari kandi amasezerano y’iguriza yo ku wa 16/08/2017 hagati ya Karama Business Park ihagarariwe na Ntakirutimana Jeannette na Unguka Bank Ltd, agaragaza ko Ntakirutimana Jeannette yahawe inguzanyo ya 29.300.000Frw mu bice bitandukanye, ndetse n’icyemezo cya RDB kigaragaza ko Karama Business Park ari iy’uwitwa Ntakirutimana Jeannette. [91] Urukiko rurasanga gutegeka Unguka Bank Ltd gutanga amakuru kuri compte ya Karama Business Park, ntacyo byamarira Urukiko mu icibwa ry’uru rubanza, ku mpamvu y’uko Karama Business Park yanditse kuri Ntakirutimana Jeannette, kandi umwenda ukaba warahawe Karama Business Park ahagarariye, ndetse abagurishije uwo mutungo bakaba bemeza ko aguze kandi bishyuwe na Ntakirutimana Jeannette nk ‘uko bigaragazwa n’inyemeza bwishyu. Ikindi kandi, bigaragara ko amasezerano y’ubugure bw’uwo mutungo yakozwe Kayirangwa Denyse atakibana na Kazaroho Jean de Dieu, ku buryo hakekwa ko uwo mutumgo yaba yarawandikishije kuri Ntakirutimana Jeannette mu buriganya. [92] Urukiko rurasanga imvugo yuko Kazaroho Jean Bosco yaba yaramwibye amasezerano, nayo itahabwa agaciro, kuko nta bimenyetso agaragaza biyishyigikira, kandi ariwe ugomba kugaragaza ibimenyetso by’ibyo aburana, nk’uko ingingo ya 3 y’Itegeko N° 15/2004 ryo ku wa 12/06/2004 ryavuzwe haruguru ibiteganya. [93] Urukiko rurasanga nk’uko byasobanuwe n’Urukiko Rukuru, rwemeza ko nta kimenyetso na kimwe Kayirangwa Denyse yerekana cy’uko uwo mutugo yari awuhuriyeho na Kazaroho Jean Bosco, nta mpamvu Urukiko rubona, yatuma Unguka Bank Ltd itegekwa kwerekana uko umutungo wa Karama Business Park wari uhagaze igihe umutungo uburanwa wagurwaga, kuko nta sano igaragara hagati ya Kazaroho Jean Bosco n’uyu mutungo uburanwa, bityo ubujurire bwuririye ku bundi bwatanzwe na Kayirangwa Denyse kuri iyi ngingo, bukaba nta shingiro bufite. Kumenya niba KAZAROHO Jean Bosco na KAYIRANGWA Denyse bagomba kugabana amafaranga y’ikiguzi cy’imodoka RAVA 4 ifite plaque RAB 845P [94] Kayirangwa Denyse asaba ko imodoka RAVA 4 ifite plaque RAB 845 P ishyirwa mu bigabanwa, kuko nk’uko bigaragazwa na Raporo yo kuwa 21/03/2017 yakorewe ku Murenge wa Muyumbu, byari byavuzwe ko yagurishwa hakishyurwa umwenda wa Banki amafaranga asigaye bakayagabana babifashijwemo n’Ubuyobozi bw’Umurenge, ariko akaba yaragurishije iyo modoka akishyura KCB, ariko amafaranga asagutse ntayazane ngo bayagabane, nk’uko bari babyumvikanyeho. [95] Me Sadi Jashi uhagarariye Kazaroho Jean Bosco, avuga ko imodoka ivugwa yagurishijwe amafaranga avuyemo akishyurwa KCB ariko umwenda nturangire kuko hasigayemo umwenda

## Page 25

ugera kuri 2.066.482 Frw, asaba ko harebwa amasezerano yo kugurisha imodoka yo ku wa 27/04/2017, ko iyo modoka yagurishijwe Kazaroho Jean Bosco miliyoni enye (4.000.000Frw). [96] Me Nsabimana Jean Baptiste avuga ko muri kopi y’urubanza bigaragara ko iyo modoka yagurishijwe hishyurwa umwenda wa KCB ko niba Kayirangwa Denyse atabyemera yagaragaza umwenda uko wanganaga n’ikiguzi cy’imodoka, bakagabana asigaye. [97] Iyi ngingo abandi baburanyi ntacyo bayivuzeho kuko itabareba. UKO URUKIKO RUBIBONA [98] Ingingo ya 12 y’Itegeko No 22/2018 ryo ku wa 29/04/2018 ryavuzwe haruguru, iteganya ko: “urega agomba kugaragaza ibimenyetso by’ibyo aregera. Iyo abibuze, uwarezwe aratsinda” (...). [99] Ingingo 3 y’itegeko N° 15/2004 ryo ku wa 12/06/2004 ryavuzwe haruguru, “iteganya ko buri muburanyi agomba kugaragaza ukuri kw’ibyo aburana”. [100] Ku kibazo cy’imodoka RAVA 4 ifite plaque RAB 845 P, Kazaroho Jean Bosco yari afitanye na Kayirangwa Denyse, Urukiko Rukuru, Urugereko rwa Rwamagana rwasanze ibyo Kayirangwa Denyse avuga ko Kazaroho Jean Bosco yaje akamutera ubwoba akamusinyisha ko ayitwaye, ntaho Urukiko rwahera rwemeza ko byabayeho koko, kuko nta nahamwe Kayirangwa Denyse yerekana ko yaba yaratanze icyo kibazo cyane ko kiganisha ku iterabwoba, kuba rero umuntu yashyirwaho iterebwoba ariko ntagire inzego zibishinzwe abibwira, byakomeza gufatwa nk’amagambo adafitiye ibimenyetso, bityo ko nta gikwiye gukosorwa mu byemejwe n’Urukiko Rwisumbuye rwa Ngoma9. [101] Dosiye igaragaza raporo yakozwe n’Ubuyobozi bw’Umurenge wa Muyumbu ku 21/03/2017, Kayirangwa Denyse na Kazaroho Jean Bosco bakayishyiraho umukono, igaragaza ko abasuzumaga ikibazo cyabo, bemeje ko imodoka RAVA 4 ifite plaque RAB 845 P, izagurishwa amafaranga avuyemo akishyurwa umwenda bari babereyemo KCB, asigaye bakayagabana ku buryo bungana. [102] Dosiye igaragaza kandi amasezerano y’ubwumvikane yo ku wa 27/04/2017, aho Kayirangwa Denyse yumvikanye ko Kazaroho Jean Bosco ko uyu atwaye imodoka RAVA 4 ifite plaque RAB 845 P, kugira ngo igurishwe, amafaranga azavamo akishyurwa umwenda Kazaroho Jean Bosco abereyemo KCB ungana na 3.569.403Frw hatabariwemo inyungu za 8% y’ubwishyu bukozwe mbere, ko kandi nyuma yo kugurisha imodoka umwenda uzaba usigaye, Kazaroho Jean Bosco azishakira abura kugira ngo ikibazo cy’umwenda kirangire Kayirangwa Denyse atabajijwe ubundi bwishyu. [103] Urukiko rurasanga kuri iyi ngingo ye y’ubujurire Kayirangwa Denyse nta nenge agaragaza ku mikirize y’Urukiko Rukuru, ahubwo asubiramo imiburanire ye nk’uko yari imeze muri urwo 9Mu rubanza RC 00025/2019/TGI/NGOMA , Urukiko Rwisumbuye rwa Ngoma rwari rwemeje mu gika cyarwo cya 23 ko imodoka RAVA 4ifite Plaque RAB 845 P KAZAROHO Jean Bosco yavuze ko ngo yagurishijwe ngo hishyurwe umwenda wa KCB, uretsekouwo mwenda ngo utigeze ushiramo kugeza taliki ya 07/06 /2019 umwenda wa KCB wari 2.066.482 Frw, Urukikorusanga nk’ uko Kazaroho na Kayirangwa babyumvikanyeho bakabikorera inyandikoku wa 27/04/2017, bavuga ko, iyo modoka izagurishwa ikishyurwa umwenda bafitiye Bank bigakorwa na Kazaroho, iyo modoka ikaba itagomba kugaruka mu mitungo igomba kugabanwa kuko ifite icyo bayigeneye.

## Page 26

Rukiko, ntahakana ko Kazaroho Jean Bosco yari afitiye umwenda KCB, cyangwa ngo ahakane ko bari bumvikanye ko imodoka RAVA 4 ifite plaque RAB 845 P, izagurishwa amafaranga avuyemo akishyurwa umwenda bari babereyemo KCB, nta nubwo yabashije kugaragaza uburyo yashyizweho agahato avuga yashyizweho asinya amasezerano y’ubwumvikane. [104] Urukiko rusanga kuba Kayirangwa Denyse nta nenge agaragaza mu rubanza yajuririye ku cyemezo cyafashwe ku byerekeye imodoka, cyane cyane ku bijyanye n’agahato avuga ko yashyizweho asinyana n’uwari umugabo we Kazaroho Jean Bosco amasezerno y’ubwumvikane yavuzwe haruguru, kuko ari yo Urukiko Rukuru rwashingiyeho rwemeza ko nta kigomba gukosorwa ku byemejwe n’Urukiko Rwisumbuye rwa Ngoma, uru Rukiko narwo ntacyo ruhindura kuri icyo cyemezo, bivuze ko nk’uko byemejwe n’ Urukiko Rwisumbuye rwa Ngoma bigashimangirwa n’Urukiko Rukuru Urugereko rwa Rwamagana, imodoka RAVA 4 ifite plaque RAB 845 P itagomba kugaruka mu mitungo igomba kugabanwa kuko ibyayo byakemuwe mu mwumvikane bagiranye ku wa 27/04/2017. Gusuzuma niba hari igihombo Kazaroho Jean Bosco yateje Kayirangwa Denyse ku buryo yabitangira indishyi [105] Kayirangwa Denyse asaba ko yagenerwa indishyi zikomoka ku gihombo yatejwe na Kazaroho Jean Bosco yari yasabye mu rubanza rujuririrwa ariko zose ntazihabwe, n’izindi ndishyi zingana na miliyoni ebyiri n’ibihumbi magana abiri na makumyabiri (2.220.000Frw) y’ikiguzi cy’ubukode bw’inzu yari yubatse, aho yari yarabonye n’uyikodesha bakagirana amasezerano wagombaga kujya amwishyura 60.000Frw ku kwezi, ariko Kazaroho Jean Bosco akaza akahasenya akayamuvutsa. Avuga kandi ko izo ndishyi zigomba kubarwa guhera umunsi amasezerano y’ubukode yabereye kugera ku munsi yireguriyeho bihwanye n’amezi 37 ndetse zigakomeza kubarwa kugeza urubanza rurangiye. [106] Me Sadi Jashi uhagarariye Kazaroho Jean Bosco, avuga ko indishyi Kayirangwa Denyse asaba nta shingiro zifite, ko izo yagenewe arizo zikwiye kugumaho. [107] Me Nsabimana Jean Baptiste uhagarariye Uwingabire Birigitte kimwe n’abandi baburanyi, bavuze ko ntacyo bavuga kuri iyi ngingo. UKO URUKIKO RUBIBONA [108] Ku byerekeye indishyi Kayirangwa Denyse asaba zikomoka ku gihombo, Urukiko Rukuru, Urugereko rwa Rwamagana, rwasanze nk’uko byashingiweho mu rwego rwa mbere ku ndishyi Kayirangwa Denyse asaba, hari inyandiko itanga uburengazira bwo gusana n° 42/2017 yatanzwe kuwa 25/4/2017, inyemeza buguzi zitandukanye Kayirangwa Denyse yashyikirije Urukiko agaragaza ibikorwa yakoze ku nzu agamije kuyongerera agaciro no kugira ngo ayibyaze umusaruro bigasenywa na Kazaroho Jean Bosco, ibyo bikorwa bikaba byarakozwe ku gaciro ka 579.240Frw akaba ariyo yagenewe10, ay’ubukode akaba atarayahawe kuko bitari gushoboka ko ahabwa 10Mu rubanza n° RC 00025/2019/TGI/NGOMA , igika cya 54-55, Urukiko Rwisumbuye rwa Ngoma, rwasanze nk’ uko inyandiko itanga uburengazira bwo gusana No 42/2017 yatanzwe kuwa 25/4/2017 , inyemeza agaciro n’inyemeza buguzi zitandukanye KAYIRANGWA yashyikirije Urukiko agaragaza ibikorwa yakoze ku nzu agamije kongera agaciro no kugirangoabyaze umusaruro iyo nzubigasenywa na KAZAROHO, ibyo bikorwa bye byogusenya bikaba

## Page 27

amafaranga y’ubukode kandi arimo gusana, rwanzura ko nta kosa ryo gukosora ryakozwe ku rwego rwa mbere. [109] Urukiko rw’Ubujurire rurasanga nk’uko byemejwe n’Urukiko Rukuru, amafaranga Kayirangwa Denyse agomba guhabwa ari ayo yagaragarije ibimenyetso, bishingiye ku nyemeza bwishyu y’ibikoresho yari amaze gushyira kuri iyo nzu ayisana angana na 579.240Frw, naho ayo asaba y’ubukode angana na (2.220.000Frw), akaba atayahabwa, kuko atabasha kugaragaza uwakodeshaga iyo nzu, noneho ngo abe yaravukijwe ubukode n’ibikorwa byo gusenya urukuta kuri iyo nzu byakozwe na Kazaroho Jean Bosco, kuvuga ko yagombaga kuyikodesha 60.000Frw buri kwezi ntibyafatwaho ukuri, kuko inyungu umuntu aregera zigomba kuba ari iz’ako kanya, zavutse kandi zishingiye ku kintu kiriho, zidashingira ku kugenekereza kw’ibizakorwa cyangwa inyungu umuntu atekereza kuzabona11, akaba rero amafaranga y’ubukode yateganyaga kuzabona iyo adasenyerwa atayahabwa, bityo akaba nta n’ikigomba guhinduka ku byemejwe n’Urukiko Rukuru, kuri iyi ngingo. D. Gusuzuma ibijyanye n’indishyi zasabwe n’ababuranyi muri uru rubanza Izasabwe na Uwingabire Brigitte [110] Me Nsabimana Jean Baptiste uhagarariye Uwingabire Birigitte ashingiye ku ngingo ya 110 n’iya 111 z’Itegeko Nº 22/2018 ryo ku wa 29/04/2018, ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, asaba Urukiko rw’Ubujurire gutegeka uzatsindwa uru rubanza uwo ariwe wese, kumuha 2.000.000Frw y'ikurikiranarubanza n'igihembo cya Avoka yiyongera ku yo yahawe mu rubanza rujuririrwa. [111] Kayirangwa Denyse avuga ko adakwiye guha Uwingabire Birigitte indishyi asaba, kuko atari we wamushoye muri izi manza, ko uwazimushoyemo ari we ukwiye kuzimuha. Izasabwe na Uwizeye Marie Rose [112] Uwizeye Marie Rose asaba Urukiko rw’Ubujurire gutegeka ko ahabwa 500.000Frw y’igihembo cya Avoka na 300.000Frw y’ikurikiranarubanza. [113] Kayirangwa Denyse avuga ko indishyi Uwizeye Marie Rose asaba nta shingiro zifite, ko yazihabwa n’uwamuzanye mu manza. Izasabwe na Kayirangwa Denyse [114] Me Hagenimana Polycarpe wunganira Kayirangwa Denyse, asaba Urukiko rw’Ubujurire gutegeka Kazaroho Jean Bosco na Ntakirutimana Jeannette kumusubiza 500,000Frw y’igihembo cy’Avoka yishyuye mu bujurire na 300.000Frw yakoresheje akurikirana urubanza yashowemo byarateje KAYIRANGWA igihombo, rurasanga ibikorwa bya KAZAROHO byogusenya byateje KAYIRANGWA igihombo, agomba kubyishyura 79.240 Frw nk’ uko yasabwe y’ ibikoreshono gusana inzu n’urukuta inshuro 2. 11 L’intérêt doit être né et actuel … le fondement et portée de cette exigence est que le rôle dujuge est de trancher des ʺ litiges deja nés. C’est la raison pour la quelle on impose au demandeur de faire valoir un interet né et actuel, un intérêt simplement éventuel ne suffirait pas Jean Vicent et Serge Guinchard, Procédure civile 24é ed. Dalloz, Paris, 1996, ˮ P.98

## Page 28

n'abajuriye kandi bazi ukuri kwose ahubwo bagamije kumusiragiza mu manza no kumutera igihombo, kandi rukemeza ko indishyi abajuriye basaba nta shingiro zifite. [115] Me Karega Blaise Pascal uhagarariye Ntakirutimana Jeannette avuga ko indishyi Kayirangwa Denyse yaka nta shingiro zifite kuko nta mutungo wa Kazaroho Jean Bosco na Ntakirutimana Jeannette agaragaza ko afiteho uruhare. Asaba ahubwo gusubizwa 186.480Frw yishyuye kugira ngo hakorwe igereranya ry’imikono ryategetswe n’Urukiko [116] Me Sadi Jashi uhagarariye Kazaroho Jean Bosco avuga ko indishyi Kayirangwa Denyse asaba nta shingiro zifite. Izasabwe na Kazaroho Jean Bosco [117] Me Sadi Jashi asaba Urukiko gutegeka Kayiranwa Denyse guha uwo ahagarariye1.000.000Frw y’indishyi z’akababaro na 1.000.000Frw y’igihembo cya Avoka ku nzego zose harimo n’uru. [118] Me Hagenimana Polycarpe, avuga ko indishyi Kazaroho Jean Bosco asaba adakwiye kuzihabwa, kuko ariwe wabashoye mu manza kandi azi ukuri. Izasabwe na Ntakirutimana Elizephan [119] Ntakirutimana Elizephani asaba Urukiko rw’Ubujurire gutegeka Kayirangwa Denyse, Kazaroho Jean Bosco na Ntakirutimana Jeannette kumwishyura 1.500.0000Frw y’ikurikiranarubanza yo ku nzego eshatu, ni ukuvuga 500.000Frw kuri buri rwego, no kumuha 500.000Frw y’igihembo cya Avoka muri ubu bujurire, yose hamwe akaba 2.000.000Frw. [120] Me Hagenimana Polycarpe avuga ko indishyi Ntakirutimnana Elizephan asaba nta shingiro zifte, kuko Kayirangwa Denyse atari we wamuzanye mu rubanza. [121] Me Karega Blaise Pascal uhagarariye Ntakirutimana Jeannette avuga ko indishyi basabwe nta shingiro zifite, kuko Ntakirutimnana Elizephan atagaragaza ikosa yakorewe na Ntakirutimana Jeannette muri iki kibazo. UKO URUKIKO RUBIBONA [122] Urukiko rurasanga indishyi z’akababaro, iz’ikurikiranarubanza n’igihembo cya Avoka Kazaroho Jean Bosco yaka atazihabwa kuko atsindwa n’urubanza. [123] Urukiko rusanga Ntakirutimana Jeannette atasubizwa amafaranga yatanze hakorwa igereranya ry’imikono kuko atsindwa n’urubanza [124] Rusanze 300.000Frw y’ikurikiranarubanza na 500.000Frw y’igihembo cya Avoka Kayirangwa Denyse yaka atayahabwa yose kuko nawe ubujurire bwe bwuririye ku bundi yabutsinzwe akaba cyokora yahabwa 500.000Frw y’igihembo cya Avoka gusa kuko hari ibyo yatakaje kubera ubujurire bwa Ntakirutimana Jeannette na Kazaroho Jean Bosco.

## Page 29

[125] Rusanze indishyi Uwizeye Marie Rose yaka adakwiye kuzihabwa, kuko yasabye izijyanye n’ikurikiranarubanza n’igihembo cya Avoka, ariko muri dosiye nta kigaragaza ko yigeze akurikirana urubanza, cyangwa se ngo ashake Avoka umuburanira, kuko uru rubanza rwaburanishijwe adahari kandi atitabiriye n’inama ntegurarubanza. [126] Kubijyanye n’indishyi Ntakirutimana Elizephan yasabye Kayirangwa Denyse, Kazaroho Jean Bosco na Ntakirutimana Jeannette zingana na 1.500.0000Frw y’ikurikiranarubanza yo ku nzego eshatu, na 500.000Frw y’igihembo cya Avoka kuri uru rwego, Urukiko rurasanga izo ndishyi yasabye zikabije kuba nyinshi, akaba agenewe kuri uru rwego izingana na 500.000Frw y’igihembo cya Avoka na 200.000Frw y’ikurikiranarubanza agomba guhabwa na Kazaroho Jean Bosco, na Ntakirutimana Jeannette bafatanyije bamugobokesheje mu rubanza. [127] Urukiko rusanga indishyi z’ikurikiranarubanza n’igihembo cya Avoka zasabwe na Uwingabire Brigitte zingana na 2.000.000Frw zikabije kuba nyinshi akaba agenewe izingana na 500.000Frw y’igihembo cya Avoka na 200.000Frw y’ikurikiranarubanza agomba guhabwa na Ntakirutimana Jeannette afatanyije na Kazaroho Jean Bosco bamugobokesheje mu rubanza. III. ICYEMEZO CY’URUKIKO [128] Rwemeje ko ubujurire bwa Ntakirutimana Jeannette n’ubwa Kazaroho Jean Bosco nta shingiro bufite ; [129] Rwemeje ko ubujurire bwuririye ku bundi bwa Kayirangwa Denyse nta shingiro bufite ; [130] Rwemeje ko nta gihindutse ku mikirize y’urubanza RCA00041/2020/HC/RWG - CMB RCA 00043/2020/HC/RWG rwaciwe n’Urukiko Rukuru, Urugereko rwa Rwamagana ku wa 17/05/2021, uretse indishyi z’ikurikiranarubanza n’igihembo cya Avoka zasobanuwe haruguru ; [131] Rutegetse Ntakirutimana Jeannette na Kazaroho Jean Bosco gufatanya kwishyura Kayirangwa Denyse 700.000Frw akubiyemo ay’igihembo cya Avoka n’ay’ ikurikiranarubanza ; [132] Rutegetse Ntakirutimana Jeannette na Kazaroho Jean Bosco gufatanya kwishyura Ntakirutimana Elizephan 700.000Frw akubiyemo ay’igihembo cya Avoka n’ay’ikurikiranarubanza no gufatanya kwishyura Uwingabire Brigitte700.000Frw akubiyemo ay’igihembo cya Avoka n’ay’ikurikiranarubanza ; [133] Rwemeje ko amafaranga y’ingwate y’amagarama yatanzwe, ahwanye n’imirimo yakozwe muri uru rubanza.