UBUSHINJACYAHA v. NTAMBARA

UBUSHINJACYAHA v. NTAMBARA

- Source: Amategeko - Section: Decisions (Judgements) - Date: 2025-05-27 - Case/document no.: RPAA 00470/2024/CA - Collection: Court of Appeal

Text

Page 1

UBUSHINJACYAHA v. NTAMBARA [Rwanda URUKIKO RW’UBUJURIRE – RPAA 00470/2024/CA (Rutazana, P.J.,) 27 Gicurasi 2025] Amategeko agenga imiburanishirize y’imanza nshinjabyaha – Icyaha cyo gucuruza ibiyobyabwenge byo mu bwoko bw’urumogi – Ukureka ubujurire – Uwajuriye ashobora kureka ikirego cye cy’ubujurire aho urubanza rwaba rugeze hose, rupfa gusa kuba rutarapfundikirwa burundu, maze hakagumaho imikirize y’urubanza rwajuririwe. Incamake y’ikibazo: Ntambara Jean Bosco yafatanywe ibiro 20 by’urumogi, maze yemera ko ari urwe, ahita ashyikirizwa inzego z’ikurikiranacyaha. Iperereza rirangiye, Ubushinjacyaha bwamureze mu Rukiko Rwisumbuye rwa Musanze bumukurikiranyeho icyaha cyo gucuruza ibiyobyabwenge, busaba ko kimuhamya agahanishwa igifungo cya burundu n'ihazabu ingana na 30.000.000Frw. Uregwa yaburanye yemera icyaha anagisabira imbabazi. Urukiko Rwisumbuye rwa Musanze rwemeje ko Ntambara Jean Bosco ahamwa n’icyaha ashinjwa cyo gucuruza ibiyobyabwenge, maze rumuhanisha igifungo cy’imyaka 15 n’ihazabu ingana na 3.750.000Frw, rushingiye ku mvugo ze mu Bugenzacyaha aho yemeye icyaha agasobanura uko yagikoze, imvugo z’abatangabuhamya batandukanye. Ntambara yajuriye mu Rukiko Rukuru, Urugereko rwa Musanze asaba kugabanyirizwa igihano kandi kigasubikwa kuko yemera icyaha akanagisabira imbabazi. Uhagarariye Ubushinjacyaha avuga ko ubujurire bwa Ntambara Jean Bosco nta shingiro bufite kuko

ibyo asaba yabihawe. Urukiko Rukuru, Urugereko rwa Musanze rwemeje ko igihano Ntambara Jean Bosco yahanishijwe kigabanywa kuko ari ubwa mbere akurikiranyweho icyaha mu nkiko, rumuhanisha igifungo cy’imyaka 10 n’ihazabu ingana na 3.750.000Frw. Ntambara yongeye kujurira mu Rukiko rw’Ubujurire, avuga ko asaba kongera kugabanyirizwa igihano, ariko ageze mu iburanisha we n’umwunganira babwira Urukiko ko aretse ubujurire bwe; uhagarariye Ubushinjacyaha avuga ko nta kindi yabivugaho. Urukiko rurasuzuma ikibazo cyo kumenya niba ukureka ubujurire gukozwe na Ntambara Jean Bosco gukwiriye kwemerwa. Incamake y’icyemezo: Uwajuriye ashobora kureka ikirego cye cy’ubujurire aho urubanza rwaba rugeze hose, rupfa gusa kuba rutarapfundikirwa burundu, maze hakagumaho imikirize y’urubanza rwajuririwe. Ukureka ubujurire kwakozwe n’uregwa kwaremewe. Amategeko yashingiweho: Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, ingingo ya 189.

Page 2

Nta manza zifashishijwe.

Urubanza

I. IMITERERE Y’URUBANZA [1] Mu rukerera rwo ku wa 15/09/2023, mu Mudugudu wa Kamatengu, Akagari ka Ruconsho, Umurenge wa Rwerere, Akarere ka Burera, Ntambara Jean Bosco yafatanywe ibiro 20 by’urumogi yemera ko ari urwe, ahita ashyikirizwa inzego z’ikurikiranacyaha. [2] Iperereza rirangiye, Ubushinjacyaha bwamureze mu Rukiko Rwisumbuye rwa Musanze bumukurikiranyeho icyaha cyo gucuruza ibiyobyabwenge, busaba ko kimuhamya agahanishwa igifungo cya burundu n'ihazabu ingana na 30.000.000 FRW. Ntambara Jean Bosco yaburanye yemera icyaha anagisabira imbabazi. [3] Mu rubanza RP 00903/2023/TGI/MUS rwaciwe Urukiko Rwisumbuye rwa Musanze ku wa 14/12/2023 rwemeje ko Ntambara Jean Bosco ahamwa n’icyaha ashinjwa cyo gucuruza ibiyobyabwenge, rumuhanisha igifungo cy’imyaka 15 n’ihazabu ingana na 3.750.000Frw, rushingiye ku mvugo ze mu Bugenzacyaha aho yemeye icyaha agasobanura uko yagikoze, imvugo z’abatangabuhamya barimo Hirwa Jean Pierre na Sinaruhamagaye Jean Claude bamufashe, n’inyandiko mvugo y’ifatira ry’ibiro 20 by’urumogi. [4] Ntambara Jean Bosco yajuriye mu Rukiko Rukuru, Urugereko rwa Musanze asaba kugabanyirizwa igihano kandi kigasubikwa kuko yemera icyaha akanagisabira imbabazi, hagarariye Ubushinjacyaha avuga ko ubujurire bwa Ntambara Jean Bosco nta shingiro bufite kuko ibyo asaba yabihawe. [5] Mu rubanza RPA 00013/2024/HC/MUS rwaciwe n’Urukiko Rukuru, Urugereko rwa Musanze ku wa

27/05/2024 rwemeje ko igihano Ntambara Jean Bosco yahanishijwe kigabanywa kuko ari ubwa mbere akurikiranyweho icyaha mu nkiko, rumuhanisha igifungo cy’imyaka 10 n’ihazabu ingana na 3.750.000 Frw. [6] Ntambara Jean Bosco yongeye kujurira mu Rukiko rw’Ubujurire, urubanza ruhabwa RPAA 00470/2024/CA, ruburanishwa mu ruhame ku wa 08/05/2025 yunganiwe na Me Munyansanga Gisèle, naho Ubushinjacyaha buhagarariwe na Sibomana Stanislas, Umushinjacyaha ku rwego rw’igihugu. [7] Mu bujurire bwe Ntambara Jean Bosco yavugaga ko asaba kugabanyirizwa igihano, ageze mu iburanisha we n’umwunganira babwira Urukiko ko aretse ubujurire bwe; uhagarariye Ubushinjacyaha avuga ko nta kindi yabivugaho.

[8] Urukiko rurasuzuma niba ukureka ubujurire gukozwe na Ntambara Jean Bosco gukwiriye kwemerwa.

Page 3

II. ISESENGURA RY’IKIBAZO KIGIZE URUBANZA Kumenya niba ukureka ubujurire gukozwe na Ntambara Jean Bosco gukwiriye kwemerwa [9] Ntambara Jean Bosco n’umwunganira bavuga ko yahisemo kureka ubujurire yari yakoze asaba kugabanyirizwa igihano cy’igifungo cy’imyaka 10 n’ihazabu ingana na 3.750.000Frw yahanishijwe mu rubanza RPA 00013/2024/HC/MUS rwaciwe n’Urukiko Rukuru, Urugereko rwa Musanze ku wa 27/05/2024. [10] Uhagarariye Ubushinjacyaha avuga ko nta kindi yavuga kuri ubwo busabe bwa Ntambara Jean Bosco.

UKO URUKIKO RUBIBONA [11] Impaka kuri iyi ngingo zishingiye ku kumenya niba Ntambara Jean Bosco yakwemererwa kureka ubujurire yari yakoze. [12] Ingingo ya 189 y’Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha iteganya ko uwajuriye ashobora kureka ikirego cye cy’ubujurire aho urubanza rwaba rugeze hose, rupfa gusa kuba rutarapfundikirwa burundu (igika cya 1); kandi ko muri icyo gihe Urukiko rwajuririwe ruca urubanza rwemeza ko hagumyeho imikirize y’urubanza rwajuririwe (igika cya 4). [13] Hashingiwe ku biteganywa muri iyo ngingo, Urukiko rw’Ubujurire rurasanga Ntambara Jean Bosco yemerewe kureka ubujurire bw’urubanza RPA 00013/2024/HC/MUS yari yakoze, bityo rero hakaba hagumyeho ibyemejwe muri urwo rubanza. III. ICYEMEZO CY’URUKIKO [14] Rwemeje ukureka ubujurire kwakozwe na Ntambara Jean Bosco kwemewe. [15] Rwemeje ko urubanza RPA 00013/2024/HC/MUS rwaciwe n’Urukiko Rukuru, Urugereko rwa Musanze ku wa 27/05/2024 rudahindutse. [16] Rwemeje ko igihano cy’igifungo cy’imyaka icumi (10) n’ihazabu ingana n’amafaranga y’u Rwanda miliyoni eshatu n’ibihumbi magana arindwi na mirongo itanu (3.750.000 Frw) Ntambara Jean Bosco yahanishijwe kigumyeho. [17] Rutegetse ko Ntambara Jean Bosco asonewe amagarama y’urubanza kuko aburana afunze.