UBUSHINJACYAHA vs NTAMUGABUMWE

# UBUSHINJACYAHA vs NTAMUGABUMWE

- Source: Amategeko - Section: Decisions (Judgements) - Date: 2025-05-23 - Case/document no.: RPAA01014/2024/CA - Collection: Court of Appeal

## Text

## Page 1

UBUSHINJACYAHA vs NTAMUGABUMWE [Rwanda URUKIKO RW’UBUJURIRE – RPAA01014/2024/CA (Kanyange, P.J.) 23 Gicurasi 2025] Amategeko agenga ibimenyetso – ibimenyetso mu manza nshinjabyaha – ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale) ababuranyi bakaba barahawe uburyo bwo kuhaba ngo banyomozanye, kandi ko Urukiko arirwo rwemeza ko ibyo bimenyetso bishobora kwemerwa Incamake y’ikibazo: Uru rubanza rwatangiye Ubushinjacyaha burega Ntamugabumwe mu Rukiko Rwisumbuye rwa Rusizi icyaha cyo gusambanya umwana witwa M.A, w’imyaka cumi n’itanu (15). Bumusabira ko icyaha kimuhama agahanishwa igifungo cy’imyaka makumyabiri n’itanu (25). Ntamugabumwe yaburanye ahakana icyaha, avuga ko bamubeshyera kubera urubanza yaburanye mu bunzi na se w’uwo mwana aramutsinda, kandi ko uwo munsi bavuga ko yasambanyije uwo mwana batigeze bahura kuko yari mu nama. Urukiko mu rubanza RP00359/2020/TGI/RSZ, rushingiye ku mvugo z’abatangabuhamya, kuri raporo ya muganga igaragaza ko M.A afite ibimenyetso byo gusambanywa no ku miburanire y’uregwa kuko mu bugenzacyaha yemeye ko yahuye na M.A ariko mu Rukiko arabihakana, rwemeje ko Ntamugabumwe ahamwa n’icyaha cyo usambanya umwana rumuhanisha igifungo cy’imyaka makumyabiri (20) kuko ari ubwambere akurikiranyweho icyaha. Rwasanze kandi ibyo Ntamugabumwe avuga ko yabeshyewe se wa M.A kubera urubanza baburanye bitahabwa agaciro kuko nta bimenyetso abitangira. Ntamugabumwe yajuririye urwo rubanza mu Rukiko Rukuru, Urugereko rwa Rusizi, avuga ko yahamijwe icyaha atakoze hirengagijwe ubuhamya bumushinjura bw’abo bari kumwe mu nama, ko hakorwa iperereza, kandi ko hirengagijwe na raporo ya muganga ndetse n’amakimbirane afitanye na se wa M.A. Ubushinjacyaha bwasubije ko ubujurire bwa Ntamugabumwe nta shingiro bufite, kuko ibimenyetso byashingiweho mu kumuhamya icyaha byuzuzanya kandi akaba atarabashije kubivuguruza, buvuga kandi ko iperereza asaba nta mpamvu yaryo kuko ibimenyetso byagezweho bihagije mu kugaragaza ukuri. Urukiko mu rubanza RPA00212/2021/HC/RSZ, rushingiye ku mvugo z’abatangabuhamya, kuri raporo ya muganga igaragaza ko M.A. yari afite ibimenyetso bigaragaza ko yasambanyijwe, rwemeje ko Ntamugabumwe ahamwa n’icyaha cyo gusambanya umwana, icyakora rwongera kumugabanyiriza gihano kugirango kijyane n’uburemere bw’icyaha rumuhanisha igifungo cy’imyaka cumi n’itanu (15). Rwasanze kandi iperereza Ntamugabumwe asaba atari ngombwa kuko abatangabuhamya avuga ko babazwa badashobora kuvuguruza ibimenyetso bimushinja icyaha aregwa. Ntamugabumwe yatanze ubujurire bwa kabiri mu Rukiko rw’Ubujurire, anenga urubanza rwajuririwe ashingiye ku kuba yarahamijwe icyaha cyo gusambanya umwana nta bimenyetso bidashidikanywaho bishingiweho, hanirengagizwa amakimbirane yari afitanye n’umuryango w’uwo mwana. Ubushinjacyaha buvuga ko impamvu z’ubujurire za Ntamugabumwe nta shingiro zifite, kuko ibimenyetso byashingiweho mu kumuhamya icyaha atabivuguruza, naho amakimbirane avuga akaba atayagaragariza ibimenyetso Urukiko mu rubanza RPAA00460/2023/CA, rwemeje ko ubujurire bwa Ntamugabumwe nta shingiro bufite kuko atabasha kuvuguruza ibimenyetso bimuhamya icyaha. Rwavuze ko hagumyeho imikirize y’urubanza rujuririrwa.

## Page 2

Incamake y’icyemezo: Mu manza nshinjabyaha, ibimenyetso byose bishobora gushingirwaho mu gihe bigaragaza ukurikw’ibyabaye (principe de la liberté de la preuve en matière pénale) ababuranyi bakaba barahawe uburyo bwo kuhaba ngo banyomozanye, kandi ko Urukiko arirwo rwemeza ko ibyo bimenyetso bishobora kwemerwa. Amategeko yashingiweho: Itegeko Nº062/2024 ryo ku wa 20/06/2024 rigenga ibimenyetso, Ingingo ya 87 Imanza zifashishijwe: Urubanza RPAA 00692/2021/CA, haburana Ubushinjacyaha na Ndayishimiye Jean Damascène rwaciwe n’Urukiko rw’Ubujurire ku wa 20/01/2023, Urubanza. I. IMITERERE Y’URUBANZA [1] Ntamugabumwe Simon yaketsweho gusambanya umwana w’umukobwa w’imyaka cumi n’itanu (15) y’amavuko wahawe izina rya M.A. mu manza zabanje, wavuze ko ku wa 23/09/2020 mu masaha y’umugoroba yaherekeje mugenzi we witwa Nyiramimani Jeanette, basanga Ntamugabumwe Simon ku murima we w’ibisheke, barabimusaba ababwira ko n’abibaha bareka akabasambanya, bagira ubwoba bariruka, Nyiraminani Jeanette arabasiga, Ntamugabumwe Simon afata M.A. aramutega aragwa amukuramo ikariso aramusambanya, ababwira ko nibabivuga azabatemagura, bimenyekanaku wa 25/09/2020 bivuzwe na Nyiraminani Jeanette, maze Ntamugabumwe Simon atangira gukurikiranwa. [2] Nyuma y’iperereza Ubushinjacyaha bwamureze mu Rukiko Rwisumbuye rwa Rusizi icyaha cyo gusambanya umwana, bushingiye ku bimenyetso birimo kuba yaremeye ko uwo munsi yabonanye na M.A. ku murima w’ibisheke, imvugo za M.A., iza Nyiraminani Jeanette na raporo ya muganga, bumusabira guhanishwa igifungo cy’imyaka makumyabiri n’itanu (25). [3] Ntamugabumwe Simon yaburanye ahakana icyaha, avuga ko bamubeshyera kubera urubanza yaburanye mu bunzi na se w’uwo mwana aramutsinda bamuca amafaranga ibihumbi mirongo inani na bine (84.000Frw), kandi ko uwo munsi bavuga ko yasambanyije uwo mwana batigeze bahura kuko yari mu nama y'impuzamashyirahamwe. [4] Mu rubanza RP00359/2020/TGI/RSZ rwaciwe ku wa 26/05/2021, Urukiko rwasanze Ntamugabumwe Simon ahamwa n’icyaha akurikiranweho kubera impamvu zikurikira : Kuba M.A. yaravuze ko amusambanya nta mwenda w’imbere yari yambaye kandi nawe abajijwe yemera ko ntawo yari yambaye ; Kuba Ntamugabumwe Simon abazwa mu Bugenzacyaha yaremeye ko yahuye n’abo bana akabaha igisheke bakagisangira nyamara mu Rukiko akavuga ko atigeze ababona uwo munsi ngo kuko yari yagiye mu nama ; Kuba Nyiraminani Jeanette wari kumwe na M.A yaremeje ko Ntamugabumwe Simon yabirutseho we akamusiga agatura hasi M.A. akamujya hejuru akamusambanya ; Kuba raporo ya muganga igaragaza ko umwana yari afite ibimenyetso byo gusambanywa.; Rwasanze ibyo Ntamugabumwe Simon avuga ko yabeshyewe kubera urubanza yaburanye na se wa M.A. bitahabwa agaciro kuko nta bimenyetso abigaragariza, kandi ko binariho bitavanaho ubuhamya bw’uwamubonye akora icyaha n’ibyo yivugiye abazwa, ariko rushingira

## Page 3

ku kuba ari ubwa mbere akurikiranweho icyaha rumugabanyiriza igihano, rumuhanisha igifungo cy’imyaka makumyabiri (20). [5] Ntamugabumwe Simon yajuririye urwo rubanza mu Rukiko Rukuru, Urugereko rwa Rusizi, avuga ko yahamijwe icyaha atakoze hirengagijwe ubuhamya bumushinjura bw’abo bari kumwe mu nama, ko hakorwa iperereza abo batangabuhamya bakabazwa, kandi ko hirengagijwe ibisobanuro yatanze hamwe na raporo ya muganga, hanirengagizwa ko yari afitanye amakimbirane na se wa M.A. ashingiye ku rubanza baburanye akamutsinda. [6] Ubushinjacyaha bwasubije ko ubujurire bwa Ntamugabumwe Simon nta shingiro bufite, kuko ibimenyetso byashingiweho mu kumuhamya icyaha byuzuzanya kandi akaba atarabashije kubivuguruza, naho iperereza asaba nta mpamvu yaryo kuko ibimenyetso byagezweho bihagije mu kugaragaza ukuri. [7] Urukiko rwaciye urubanza RPA00212/2021/HC/RSZ ku wa 26/10/2023, narwo rusanga hari ibimenyetso bimuhamya icyaha bigizwe : N’imvugo za M.A. wasobanuye ko Ntamugabumwe Simon amusambanya nta mwenda w’imbere yari yambaye kandi nawe akaba yarabyemeye, ko rero nta bundi buryo uwo mwana yari kubimenyamo atari igihe yamusambanyaga ; Ubuhamya bwa Nyiraminani Jeannette wari kumwe na M.A. nawe wemeje ko Ntamugabumwe Simon yabirukankanye we akamusiga agafata M.A. akamusambanya ; Raporo ya muganga igaragaza ko M.A. yari afite ibimenyetso bigaragaza ko yasambanyijwe ; Rwasanze iperereza Ntamugabumwe Simon asaba atari ngombwa kuko abatangabuhamya avuga ko babazwa badashobora kuvuguruza ibimenyetso bifatika byagaragajwe byemeza nta shiti ko yakoze icyaha akurikiranweho, ariko ko yagabanyirizwa igihano kuko kitagabanyijwe mu buryo buhagije ubirebeye hamwe n’uburemere bw’icyaha, rumuhanisha igifungo cy’imyaka cumi n’itanu (15). [8] Ntamugabumwe Simon yatanze ubujurire bwa kabiri mu Rukiko rw’Ubujurire, urubanza rwandikwa kuri RPAA00460/2023/CA, ruburanishwa ku wa 06/05/2025, yunganiwe na Me Ndwaniye Pierre Claver, Ubushinjacyaha buhagarariwe na Uwizeye Jean Marie, Umushinjacyaha ku rwego rw’Igihugu. [9] Mu myanzuro y’ubujurire no mu miburanire, Ntamugabumwe Simon n’umwunganira banenga urubanza rwajuririwe bashingiye ku kuba yarahamijwe icyaha cyo gusambanya umwana nta bimenyetso bidashidikanywaho bishingiweho, hanirengagizwa amakimbirane yari afitanye n’umuryango w’uwo mwana. [10] Uhagarariye Ubushinjacyaha avuga ko izo mpamvu nta shingiro zifite, kuko ibimenyetso byashingiweho mu kumuhamya icyaha bifite ireme ahubwo akaba atabasha kubivuguruza, naho amakimbirane avuga akaba atayagaragariza ibimenyetso. [11] Ikibazo kigomba gusuzumwa muri uru rubanza ni ukumenya niba ibimenyetso byashingiweho bidahamya ko Ntamugabumwe Simon yarasambanyije M.A no kumenya niba Urukiko rwarirengagije amakimbirane yari afitanye n’umuryango w’uwo mwana. II. ISESENGURA RY’IBIBAZO BIRI MU RUBANZA

## Page 4

Kumenya niba ibimenyetso byashingiweho bidahamya ko Ntamugabumwe Simon yasambanyije M.A no kumenya niba Urukiko rwarirengagije amakimbirane yari afitanye n’umuryango w’uwo mwana. [12] Ntamugabumwe Simon n’umwunganira bavuga ko mu byashingiweho hemezwa ko yasambanyije M.A harimo raporo ya muganga kandi itemeza ko yamusambanyije, kuko isobanura neza ko nta bimenyetso bigaragaza gusambanywa muganga yamubonyeho, bityo ko Urukiko rwayisesengura rushingiye ku ngingo ya 6 y’Itegeko N°062/2024 ryo ku wa 20/06/2024 rigenga ibimenyetso ivuga ko urwego rwashyikirijwe ikimenyetso arirwo rugisesengura, rugashingira no ku ngingo ya 109 y’itegeko N°027/2019 ryo ku wa 19/09/2019 ryerekeye imiburanishirize y’imanza z’inshinjabyaha1, ivuga ko Urukiko arirwo rusesengura ibimenyetso rukabigereranya n’ireme ry’ikiburanwa. [13] Bavuga ko kandi impamvu y’uko Ntamugabumwe Simon atari yambaye umwenda w’imbere atari ikimenyetso kimushinja, kuko kutawambara biterwa n’uko arwara igicuri akanga kuwangiza kuko iyo aguye hasi ata ibitabapfu, ko kandi umunsi bavuga ko yasambanyije M.A yari yagiye mu ishyirahamwe afatwa n’ubwo burwayi yitura hasi, abamuteruye babona atambaye umwenda w’imbere, bikaba bishoboka ko bagiye babivuga bikagera kuri uwo mwana akaba ariho yamenyeye ko nta mwenda w’imbere yari yambaye, ko kandi atari gusambanya uwo mwana kuko batageze mu murima ahubwo bari bari ku muhanda hafi y’urusengero rw’Abapantekoti hari n’abakobwa baje gukubura kuri urwo rusengero. [14] Na none kandi ngo Urukiko rwirengagije amakimbirane Ntamugabumwe Simon yagiranye n’umuryango w’uwo mwana ashingiye ku isambu ye n’amafaranga ibihumbi mirongo inani na bine (84.000Frw) yabatsindiye mu bunzi mu manza bagiye baburana. [15] Uhagarariye Ubushinjacyaha avuga ko izo mpamvu nta shingiro zifite, kuko raporo ya muganga yagaragaje ko M.A yasanganwe ibimenyetso by’uko yasambanyijwe (the above results are suggestive of previous sexual intercourse), ko rero kuba umuhanga ubisobanukiwe yaramusanzeho ibyo bimenyetso, nta bushobozi Ntamugabumwe Simon afite bwo kunenga iyo raporo kuko we atari umuhanga, kandi ko kuba muganga avuga ko atari ubwa mbere asambanyijwe, bitavanaho n’ibyo yakorewe na Ntamugabumwe kuko raporo yagaragaje ko yakoze imibonano mpuzabitsina, kandi ko mu kumuhamya icyaha hatashingiwe gusa kuri icyo kimenyetso kuko hari n’ibindi birimo imvugo z’uwo mwana n’iz’umutangabuhamya. [16] Avuga kandi ko M.A. yavuze ko ubwo Ntamugabumwe Simon yamusambanyaga yabonye nta mwenda w’imbere yambaye, bisobanuye ko yavuze ibyo yabonye kuko atari kurebera inyuma ngo umenye ko atawambaye, kandi nawe akaba ariko yabyemeye ubwo yabazwaga mu Bugenzacyaha, ko rero nta bundi buryo M.A. yari kumenya ko atawambaye uretse kuba yarabibonye arimo kumusambanya, naho ibyo avuga ko yabimenyeye ku bamubonye yaguye kubera igicuri bikaba bitahabwa agaciro kuko nta kibigaragaza, ko kandi atari kugwa ngo yongere ajye kurinda ibisheke, ndetse n’uburwayi avuga akaba atarabugaragarije ibimenyetso, mu gihe imvugo za M.A zishyigikirwa n’ubuhamya bwa Nyiraminani Jeanette wavuze ko Ntamugabumwe yabirukankanye we akamusiga. [17] Ku birebana n’amakimbirane Ntamugabumwe avuga ko afitanye n’umuryango wa M.A, uhagarariye Ubushinjacyaha avuga ko uretse kubivuga gusa nta kimenyetso abigaragariza haba mu nkiko za mbere cyangwa imbere y’uru Rukiko, ko rero bigaragara ko atashoboye kuvuguruza ibimenyetso byashingiweho n’Urukiko rumuhamya icyaha nk’uko biteganywa n’ingingo ya 107 igika

1Iyo ngingo iteganya ko: “Urukiko rubisabwe n’ubushinjacyaha cyangwa n’ababuranyi cyangwa se rubyibwirije, rushobora gutegeka gutanga ikimenyetso cyose rusanze ari cyo cyamara impaka. Mu iburanisha, urukiko rushobora kwishakira ibimenyetso bitagezweho n’ubushinjacyaha, urega, ushinjwa cyangwa ababahagarariye”.

## Page 5

cya 3 y’Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha2, hakaba rero hagomba kugumaho imikirize y’urubanza rwajuririwe. UKO URUKIKO RUBIBONA [18] Impaka ziri muri uru rubanza zishingiye ku kumenya niba ibimenyetso byashingiweho bidahamya ko Ntamugabumwe Simon yasambanyije M.A no kumenya niba Urukiko rwarirengagije amakimbirane yari afitanye n’umuryango w’uwo mwana. [19] Ku byerekeye ibimenyetso mu manza n’itangwa ryabyo, byasesenguwe mu rubanza RPAA00692/2021/CA rwaciwe n’Urukiko rw’Ubujurire ku wa 20/01/2023, haburana Ubushinjacyaha na Ndayishimiye Jean Damascène, Urukiko rusobanura ko mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale) ababuranyi bakaba barahawe uburyo bwo kuhaba ngo banyomozanye, kandi ko Urukiko arirwo rwemeza ko ibyo bimenyetso bishobora kwemerwa. N’ubwo uyu murongo ushingiye ku isesengura ry’ingingo ya 119 y’Itegeko Nº 15/2004 ryo ku wa 12/06/2004 ryerekeye ibimenyetso mu manza n’itangwa ryabyo ryakurikizwaga urwo rubanza rucibwa, ibyateganywaga n’iyo ngingo bihura n’ubundi n’ibiteganywa n’ingingo ya 87 y’Itegeko Nº062/2024 ryo ku wa 20/06/2024 rigenga ibimenyetso rikurikizwa ubu3. [20] Imikirize y’urubanza rwajuririwe igaragaza ko mu kwemeza ko hagumaho icyemezo cyafashwe ku rwego rwa mbere, Urukiko Rukuru rwabishingiye ku kuba Ntamugabumwe Simon ataravuguruje ibimenyetso byashingiweho kuri urwo rwego bigizwe n’imvugo za M.A. wasobanuye ko Ntamugabumwe Simon amusambanya nta mwenda w’imbere yari yambaye, uyu nawe akaba yaremeye ko uwo munsi ntawo yari yambaye koko, kandi ko nta bundi buryo uwo mwana yari kubimenya; ubuhamya bwa Nyiraminani Jeannette wari kumwe na M.A. akemeza ko Ntamugabumwe Simon yabirukankanye we akamusiga agafata M.A. akamusambanya, na raporo ya muganga igaragaza ko uwo mwana yari afite ibimenyetso bigaragaza ko yasambanyijwe. [21] Mu kunenga imikirize y’urubanza yajuririye, Ntamugabumwe Simon abishingira ku kuba harashingiwe kuri raporo ya muganga kandi itagaragaza ko M.A yasambanyijwe, ko kuba atambara umwenda w’imbere bitaba ikimenyetso kimushinja, kandi ko hirengagijwe amakimbirane yari afitanye n’umuryango w’uwo mwana. [22] Ku bijyanye na raporo ya muganga, igaragaza ko muganga wasuzumye M.A. ku wa 26/09/2020 yemeje ko yari yakarabye yanahinduye imyenda, mu mwanzuro avuga ko ibisubizo by’ibizamini byapimwe4 byerekana ko umwana yakoze imibonano mpuzabitsina5. [23] Urukiko rw’Ubujurire rurasanga ibyo Ntamugabumwe Simon n’umwunganira bavuga ko raporo ya muganga itagombaga gushingirwaho ngo kuko itagaragaza ko M.A yasambanyijwe bitahabwa agaciro, kuko nk’uko iyo raporo ibigaragaza muganga yavuze ko isuzuma ryagaragaje ko yakoze imibonano mpuzabitsina. Byongeye kandi, iyo raporo siyo yonyine yashingiweho ahubwo yahujwe n’ibindi bimenyetso, birimo imvugo z’uwo mwana wasobanuye ko ubwo yari kumwe na mugenzi we basanze Ntamugabumwe Simon ku murima w’ibisheke bye, ashaka kubasambanya

2 Ivuga ko iyo icyaha cyabonewe ibimenyetso bikigaragaza, ugikurikiranyweho cyangwa umwunganira ashobora kwerekana impamvu zose yireguza, zerekana ko ikirego kitakwemerwa, zihamya ko icyo aregwa atari icyaha cyangwa se ko ari umwere n’izindi mpamvu zose zivuguruza izimuhamya icyo cyaha. 3Iyo ngingo ivuga ko mu rubanza nshinjabyaha ikimenyetso gishingira ku mpamvu zose z’ibyabaye n’ibyemejwe n’amategeko, ababuranyi bapfa kuba barahawe umwanya wo kubijyaho impaka. 4 Bigaragara ko ibizamini muganga yakoze yagiye yandika non, none, Negative na Normal, naho kuri discharge na hymen yandika V. 5 The above results are suggestive of previous sexual intercourse.

## Page 6

bariruka arabirukankana we aramufata aramusambanya, naho mugenzi we aramucika, anavuga ko ubwo yamusambanyaga nta mwenda w’imbere yari yambaye kandi bigahura n’uko uyu yiyemereye ko uwo munsi ntawo yari yambaye koko, hakaba kandi n’imvugo za Nyiraminani Jeanette wavuze ko ubwo yabirukankanaga we yamucitse agasigarana M.A., ageze imbere abona amuri hejuru arimo kumusambanya, uko gusambanywa rero abo bombi bavuze kukaba guhura n’ibyo raporo ya muganga yagaragaje. [24] Naho ku bivugwa na Ntamugabumwe Simon ko kuba M.A. yaravuze ko nta mwenda w’imbere yari yambaye bitaba ikimenyetso cy’uko yamusambanyije, Urukiko rw’Ubujurire rurasanga iyo miburanire nta shingiro ifite, kuko Urukiko Rukuru rwasobanuye ko nta bundi buryo umwana yari kumenya ko Ntamugabumwe Simon nta mwenda w’imbere yari yambaye uwo munsi uretse kuba yarabibonye arimo kumusambanya, kandi akaba atarabashije kubivuguruza, ahubwo nawe abazwa yemeye ko uwo munsi ntawo yari yambaye. Harebwe kandi ibisobanuro yagiye atanga ku mpamvu atari yambaye umwenda w’imbere, bigaragara ko mu Bugenzacyaha yabanje kuvuga ko ntawo agira ubundi avuga ko uwo afite yari yawumeshe, mu gihe imbere y’uru Rukiko yavuze ko atawambaraga kubera uburwayi bw’igicuri kugirango atawangiza kuko iyo yagwaga yataga ibitabapfu, Urukiko rugasanga uko kugenda ahinduranya imvugo kugaragaza gushaka guhunga icyaha, naho ibyo Ntamugabumwe Simon avuga ko M.A yaba yarabibwiwe n’abamuteruye yituye hasi kubera igicuri nabyo bikaba nta shingiro bifite, kuko nta kimenyetso abigaragariza. [25] Ku birebana n’uko hirengagijwe amakimbirane Ntamugabumwe Simon yari afitanye n’umuryango wa M.A., bigaragara ko koko iyi ngingo ntacyo Urukiko Rukuru rwayivuzeho, ariko kandi icyo kibazo akaba yarakiburanishije ku rwego rwa mbere Urukiko Rwisumbuye rusanga ibyo avuga bitahabwa agaciro kuko nta bimenyetso abigaragariza, kandi ko binariho bitavanaho ubuhamya bw’uwamubonye akora icyaha n’ibyo yivugiye abazwa, bityo n’ubwo ntacyo Urukiko Rukuru rwabivuzeho, Ntamugabumwe Simon atagaragaza icyo yanengaga ibisobanuro Urukiko rwa mbere rwatanze cyangwa ngo agaragaze ko yari yabonye ibimenyetso by’imanza avuga ko zateye amakimbirane, kuko no mu iburanisha imbere y’uru Rukiko yasabwe gushyira muri dosiye imanza avuga ko yaburanye n’umuryango wa M.A. ariko kugeza urubanza rusomwa akaba ntazo yagaragaje, usibye ko n’iyo ayo makimbirane aza kuba ahari, atatesha agaciro ibimenyetso byashingiweho bimuhamya icyaha akurikiranweho [26] Ku bivugwa na Ntamugabumwe Simon n’umwunganira ko atashoboraga gusambanya uwo mwana ngo kuko bamusanze ku muhanda, kandi ko hari hafi y’urusengero rw’Abapantekoti hari n’abantu bari kuri urwo rusengero, Urukiko rw’Ubujurire rurasanga iyo miburanire itamushinjura kuko uretse kubivuga gusa nta kimenyetso abitangira, ngo agaragaze abantu bari bahari abo aribo, ikindi ni uko abo bana bagaragaje ko batari kuvuza induru kuko batinyaga ko yabatema, byongeye kandi akaba yaragiye ahinduranya imvugo aho mu Bugenzacyaha yemeye ko abo bana bamusanze kuri uwo murima w’ibisheke ariko ageze mu Rukiko Rwisumbuye arabihakana avuga ko batigeze bahura, bigaragaza rero ko ibyo agenda yireguza bitakwizerwa kuko bitagaragaza ukuri kw’ibyabaye. [27] Hashingiwe ku byagaragajwe, Urukiko rw’Ubujurire rurasanga ibimenyetso byashingiweho bihagije mu kwemeza ko Ntamugabumwe Simon yakoze icyaha akurikiranweho kuko bigaragaza ukuri kw’ibyabaye, bityo hakaba hagumyeho imikirize y’urubanza rwajuririwe. III. ICYEMEZO CY’URUKIKO [28] Rwemeje ko ubujurire bwa Ntamugabumwe Simon nta shingiro bufite ;

## Page 7

[29] Rwemeje ko hagumyeho imikirize y’urubanza RPA00212/2021/HC/RSZ rwaciwe n’Urukiko Rukuru, Urugereko rwa Rusizi ku wa 26/10/2023 rwamuhanishije igifungo cy’imyaka cumi n’itanu (15). [30] Rutegetse ko amagarama y’urubanza aherera ku Isanduku ya Leta kuko Ntamugabumwe Simon yajuriye afunze, akaba asonewe kuyatanga.