UBUSHINJACYAHA v. NTEZIRIZAZA

# UBUSHINJACYAHA v. NTEZIRIZAZA

- Source: Amategeko - Section: Decisions (Judgements) - Date: 2023-10-20 - Case/document no.: RPAA 00004/2023/CA - Collection: Court of Appeal

## Text

## Page 1

UBUSHINJACYAHA v. NTEZIRIZAZA [Rwanda URUKIKO RW’UBUJURIRE – RPAA 00004/2023/CA (Kanyange, P.J.) 20 Ukwakira 2023] Amategeko agenga imanza nshinjabyaha – Icyaha cyo gusambanya umwana – Inyito y’icyaha – Kuba harebwe ibikorwa bidashidikanywaho by’intangiriro y’icyaha uregwa yari amaze gukora bigaragaza ko yari afite umugambi wo gusambanya umwana, ibyo bikorwa bigize ubwinjiracyaha mu cyaha cyo gusambanya umwana, aho kuba ibikorwa ku mubiri w’umwana bigamije ishimishamubiri. Incamake y’ikibazo: Uru rubanza rwatangiriye mu Rukiko Rwisumbuye rwa Gasabo icyaha cyo gusambanya umwana, buvuga ko yasambanyije umwana w’umugore we ubwo uyu yari agiye gushaka umuti yagaruka agasanga baryamanye. Urwo Rukiko rwaciye urubanza rwemeza ko ahamwa n’icyaha cyo gusambanya umwana, rumuhanisha igifungo cya burundu. Uregwa yajuririye Urukiko Rukuru avuga ko Urukiko rubanza rwirengagije ko arengana kuko afungiwe icyaha kitabayeho, ko umwana aregwa gusambanya yaguriwe amandazi kugira ngo amushinje. Urwo rukiko narwo rwaciye urubanza rwemeza ko nta gihindutse ku mikirize y’urubanza rwajuririwe. Uregwa nanone yajuririye Urukiko Rw’Ubujurire avuga ko Urukiko rwashingiye ku buhamya bwivuguruza bagaragaza ko nko mu nyandikomvugo y’ibazwa rya nyina w’umwana hari aho igaragaza ko yabafashe ataramusambanya, kandi ko atari azi ko yamugirira nabi, ko asanga usibye kuba imvugo ya nyina w’umwana yumvikanisha ko atasanze umugabo we aryamanye n’uwo mwana, itanamushinja. Ubushinjacyaha bwo bwaburanye buvuga ko imvugo ya nyina w’umwana idashidikanywaho, ko ubwo yari avuye gushaka umuti yasanze umugabo we aryamanye n’umwana we yamaze kumukuramo ikabutura naho we yafunguye imashini y’ipantaro. Bunavugako nyuma yo gukora icyaha yihishe kandi ko adahakana ko yafatiwe aho yari yihishe, bivuze ko hari icyo yikekaga. Incamake y’icyemezo: Kuba harebwe ibikorwa bidashidikanywaho by’intangiriro y’icyaha uregwa yari amaze gukora bigaragaza ko yari afite umugambi wo gusambanya umwana, ibyo bikorwa bigize ubwinjiracyaha mu cyaha cyo gusambanya umwana, aho kuba ibikorwa ku mubiri w’umwana bigamije ishimishamubiri. Bityo ibikorwa uregwa yakoze bigize ubwinjiracyaha mu cyaha cyo gusambanya umwana akaba ari nabyo agomba guhanirwa kuko Urukiko Rukuru rutasobanuye igikorwa uregwa yakoreye ku mubiri w’umwana agamije ishimishamubiri. Urubanza ruhindutse ku birebana n’inyito y’icyaha hamwe n’igihano. Amategeko yashingiweho: Itegeko N° 68/2018 ryo ku wa 30/08/2018 riteganya ibyaha n’ibihano muri rusange, Ingingo ya 21, 49 n’iya 133.

## Page 2

Itegeko N° 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, Ingingo ya 4. Imanza zifashishijwe: RS/INJUST/Pen 00004/2017/CS, Ubushinjacyaha vs Mukaruyange rwaciwe n’Urukiko rw’Ikirenga ku wa 23/02/2018. RPAA 00266/2022/CA, Ubushinjacyaha vs Rutembesa rwaciwe n’urukiko rw’Ubujurire ku wa 12/05/2023 RPAA 00460/2021/CA, Ubushinjacyaha vs Manishime rwaciwe n’urukiko rw’Ubujurire ku wa 27/04/2023. Urubanza I. IMITERERE Y’URUBANZA [1] Ku wa 15/05/2019, Ntezirizaza Boniface yaketswe ko yasambanyije umwana w’umugore we w’imyaka itandatu (6), ubwo uyu mugore yari agiye gushaka umuti yagaruka akavuga ko yasanze umugabo we aryamanye n’uwo mwana, yakuyemo ikabutura naho umugabo yafunguye imashini y’ipantaro, ahita ahunga ajya iwabo, aho agarukiye atangira gukurikiranwa. [2] Iperereza rirangiye, Ubushinjacyaha bwamureze mu Rukiko Rwisumbuye rwa Gasabo icyaha cyo gusambanya umwana, buvuga ko yasambanyije umwana w’umugore we ubwo uyu yari agiye gushaka umuti yagaruka agasanga baryamanye, abajije uwo mwana ibyo barimo amubwira ko Ntezirizaza Boniface yamubwiye ngo bakore amafuti. [3] Ntezirizaza Boniface yaburanye ahakana icyaha, avuga ko umugore we amushinja ibyo atabonye kuko atari ahari. [4] Urukiko rwaciye urubanza no RP 00924/2019/TGI/GASBO ku wa 30/11/2019, rusanga hari ibimenyetso byemeza ko Ntezirizaza Boniface yakoze icyaha akurikiranyweho birimo abatangabuhamya bamubonye hamwe n’ibyo yiyemereye, maze rwemeza ko ahamwa n’icyaha cyo gusambanya umwana, rumuhanisha igifungo cya burundu. [5] Ntezirizaza Boniface yajuriye mu Rukiko Rukuru avuga ko Urukiko rwa mbere rwirengagije ko arengana kuko afungiwe icyaha kitabayeho, ko umwana aregwa gusambanya yaguriwe amandazi kugira ngo amushinje. [6] Uhagarariye Ubushinjacyaha yireguye avuga ubujurire bwa Ntezirizaza Boniface butagomba guhabwa agaciro, kuko atabasha kuvuguruza ibimenyetso byashingiweho ku rwego rwa mbere kandi ko umwana ataguririwe ngo amubeshyere ahubwo yavuze ibyamubayeho. [7] Urukiko rwaciye urubanza no RPA 01912/2019/HC/KIG ku wa 30/06/2022, rusanga ibivugwa na Ntezirizaza Boniface nta shingiro bufite, kuko nyina w’umwana yasobanuye uburyo

## Page 3

yagiye gushaka umuti yagaruka agasanga aryamanye n’umwana we, abajije uwo mwana amubwira ko yamubwiye ngo bakore amafuti; ko hari n’umutangabuhamya witwa Yabakurije Thérèse ari nawe watumye icyaha kimenyekana, wavuze uko byagenze abibwira abaturage bari mu mugoroba w’ababyeyi. Rwasanze kandi imvugo y’umwana wasambanyijwe ishimangirwa n’iya nyina wabaguye gitumo, ko ndetse nyina ataguririye uwo mwana kugira ngo ashinje umugabo we kuko ahubwo yari yamuhishiriye amara iminsi yihishe. Rwemeje rero ko ubujurire bwa Ntezirizaza Boniface nta shingiro bufite, rugumishaho imikirize y’urubanza rwari rwajuririwe. [8] Ntezirizaza Boniface yatanze ubujurire bwa kabiri mu Rukiko rw’Ubujurire, urubanza rwandikwa kuri no RPAA 00004/2023/CA, ruhabwa itariki yo kuburanishwa yo ku wa 03/10/2023, uwo munsi ruburanishwa yunganirwa na Me Mukwende Milimo Olivier, Ubushinjacyaha buhagarariwe na Uwanziga Lydia, Umushinjacyaha ku rwego rw’Igihugu. [9] Mu myanzuro y’ubujurire no mu miburanire, Ntezirizaza Boniface n’umwunganira bavuga ko Urukiko Rukuru rwamuhamije icyaha rushingiye ku bimenyetso bishidikanywaho bigizwe n’imvugo ya nyina w’umwana hamwe n’ubuhamya bwa Yabakurije Thérèse. Harasuzumwa kandi ikibazo Urukiko rwibajije cy’inyito yahawe icyaha Ntezirizaza Boniface yakoze. [10] Uhagarariye Ubushinjacyaha avuga ko iyo mpamvu y’ubujurire nta shingiro ifite, kuko nyina w’umwana yasobanuye ko yasanze uwo mwana aryamanye n’umugabo we, naho Yabakurije Thérèse akaba yaravuze ibyo yabwiwe na nyina w’umwana. [11] Ibibazo bigomba gusuzumwa muri uru rubanza ni ukumenya niba Urukiko Rukuru rwarashingiye ku bimenyetso bishidikanywaho bigizwe n’ubuhamya bwa nyina w’umwana Ntezirizaza Boniface aregwa gusambanya, hamwe n’ubuhamya bwa Yabakurije Thérèse, no kumenya inyito y’icyaha Ntezirizaza Boniface yakoze. II. ISESENGURA RY’IBIBAO BIGIZE URUBANZA Kumenya niba Urukiko Rukuru rwarashingiye ku bimenyetso bishidikanywaho. [12] Ntezirizaza Boniface n’umwunganira bavuga ko yahamijwe icyaha cyo gusambanya umwana hashingiwe ku bimenyetso bishidikanywaho bigizwe n’ubuhamya bwa nyina w’ uwo mwana n’ubwa Yabakurije Thérèse. [13] Basobanura ko mu nyandikomvugo ya nyina w’umwana mu Bugenzacyaha, yavuze yo yasanze uwo mwana yamaze kumanura ikabutura naho umugabo we aryamye yafunguye imashini y’ipantaro, akubise uwo mwana amubwira ko Ntezirizaza Boniface yamubwiye ngo bakore amafuti, ko muri iyo yandikomvugo yongera akavuga ko yabafashe ataramusambanya, anavuga ko icyamubwiye ko yari ataramusambanya ari uko yagiye gushaka umuti agahita agaruka ako kanya, ko ndetse atari azi ko yamugirira nabi. Basanga rero, usibye kuba iyo mvugo yumvikanisha ko atasanze umugabo we aryamanye n’uwo mwana, itanamushinja. [14] Bavuga kandi ko Urukiko rwashingiye ku buhamya bwa Yabakurije Thérèse kandi bushidianywaho, bitewe n’uko ntacyo azi ku birebana n’icyaha Ntezirizaza Boniface ashinjwa ahubwo yavuze ibyo yabwiwe n’uwitwa Béata.

## Page 4

[15] Uhagarariye Ubushinjacyaha avuga ko impamvu y’ubujurire bwa Ntezirizaza Boniface nta shingiro ifite, kuko imvugo ya nyina w’umwana idashidikanywaho bitewe n’uko yavuze ibyo yabonye, ko ubwo yari avuye gushaka umuti yasanze umugabo we aryamanye n’umwana we yamaze kumukuramo ikabutura naho we yafunguye imashini y’ipantaro, abajije uwo mwana ibyo barimo amubwira ko Ntezirizaza Boniface yamubwiye ngo bakore amafuti, uyu abyumvise ahita ajya iwabo muri Ngenda agaruka ku wa 09/06/2019 aba aribwo afatwa, ko rero nyina w’umwana yavuze ibyo yiboneye. [16] Avuga kandi ko n’ubuhamya bwa Yabakurije Thérèse budashidikanywaho, kuko yavuze ko ubwo bari mu mugoroba w’ababyeyi, uwitwa Béata yababwiye ko hari umugabo wasambanyije umwana w’umugore we ko kandi yari amaze igihe atari mu rugo ariko ko noneho yamubonye avuye mu bwiherero, bahita bajyayo ariko umugore ababwira ko adahari, binjiye bamusanga aho yihishe, bivuze rero ko kuba umugore we yaramuhishiriye ariko Béata akabivuga ari naho Yabakurije Thérèse yabivanye, nta cyari gutuma ubuhamya bwe budashingirwaho, cyane cyane ko Ntezirizaza Boniface adahakana ko yafatiwe aho yari yihishe, bivuze ko hari icyo yikekaga. UKO URUKIKO RUBIBONA [17] Ingingo ya 4 y’Itegeko Nº 15/2004 ryo ku wa 12/06/2004 ryerekee ibimenyetso mu manza n’itangwa ryabyo, iteganya ko : “Urukiko ruca urubanza rwaregewe hakurikijwe ibimenyetso bihuje na kamere y’ikiburanwa’’. [18] Imikirize y’urubanza rwajuririwe igaragaza ko mu byashingiweho mu guhamya icyaha Ntezirizaza Boniface harimo imvugo ya nyina w’umwana wasambanyijwe, aho Urukiko Rukuru rwasobanuye ko yavuye gushaka umuti agasanga umugabo we ari mu mashuka n’umwana, abajije uwo mwana icyo bakoraga avuga ko yamubwiye ngo bakore amafuti. [19] Urukiko rurasanga iyo mvugo ubwayo nta gushidikanya kuyigaragaramo, kuko icyo yumvikanisha ari uko yasanze Ntezirizaza Boniface aryamanye n’umwana, uwo mwana yamanuye ikabutura naho umugabo we yafunguye imashini y’ipantaro, ikanumvikanisha icyo Ntezirizaza Boniface yari agamije, kuko kuba umwana yaravuze ko yamubwiye ngo bakore amafuti, nta kindi bisobanuye uretse kumusambanya harebwe uko nyina yavuze ko yabansanze. Urukiko rurasanga rero, kuba yarongeye akavuga ko yasanze ataramusambanya, atari byo byatuma imvugo ye ishidikanywaho, kuko yavuze ibyo yabonye, akaba rero atari kuvuga ko yasanze amusambanya kandi atarabibonye. [20] Urukiko rurasanga kandi kuvuga ko imvugo ya nyina w’umwana itamushinja nabyo nta shingiro bifite, kuko imushinja ku birebana n’ibyo yabonye byo kuba yarasanze aryamanye n’umwana, uyu yamanuye ikabutura naho Ntezirizaza Boniface yafunguye imashini y’ipantaro, iyi mvugo kandi ikaba ihura n’ibyo umwana yasobanuye, kuko nawe yavuze ko Ntezirizaza Boniface yamubwiye ngo akuremo ikabutura bagahita baryamana, ko nyina yaje agasanga biyoroshe ishuka. [21] Ku bivugwa na Ntezirizaza Boniface ko ubuhamya bwa Yabakurije Thérèse bwashingiweho nabwo bushidikanywaho ngo kuko atazi uko icyaha cyakozwe ahubwo yavuze ibyo yabwiwe na Béata, Urukiko rurasanga nabyo nta shingiro bifite, kuko Urukiko rutashingiye

## Page 5

kuri ubwo buhamya nk’ubw’umuntu wabonye icyaha gikorwa, ahubwo nk’ubw’uwatumye kimenyekana, kuko yavuze ko ubwo bari mu mugoroba w’ababyeyi, uwitwa Béata yababwiye ko Ntezirizaza Boniface yasambanyije umwana w’umugore we ko kandi yari amaze igihe atari mu rugo ariko ko yamubonye ava mu bwiherero, ari nabwo bagiye kumushaka bagasanga yihishe ahantu yari yaracukuye (…). [22] Urukiko rurasanga kandi ibyo Yabakurije Thérèse yavuze ko yumvanye Béata, bihura n’ibyo nyina w’umwana yasobanuye, kuko nawe yavuze ko nyuma yo gusanga Ntezirizaza Boniface n’umwana baryamanye, umwana akavuga ko yamubwiye ngo bakore amafuti, yarahise ahunga ajya iwabo agaruka ku wa 09/06/2019 ari nabwo bamufashe, bivuze rero ko ibyo Yabakurije Thérèse yumvanye Béata ari ukuri. [23] Urukiko rurasanga rero impamvu y’ubujurire bwa Ntezirizaza Boniface igamije kugaragaza ko hashingiwe ku mvugo ya nyina w’umwana no ku buhamya bwa Yabakurije Thérèse kandi bishidikanywaho, nta shingiro ifite, ahubwo ibyo bimenyetso bihuje n’igikorwa yakoze nk’uko biteganywa n’ingingo ya 4 y’Itegeko nº 15/2004 ryo ku wa 12/06/2004 ryavuzwe haruguru. Ku birebana n’inyito y’icyaha Ntezirizaza Boniface yakoze [24] Ku kibazo Urukiko rwibajije cy’inyito y’icyaha Ntezirizaza Boniface yakoze, uhagarariye Ubushinjacyaha yavuze ko kuba yarabwiye umwana ngo yiyambure ikabutura nawe agafungura imashini y’ipantaro, bigomba gufatwa ko yakoze igikorwa cy’ishimishamubiri, naho Ntezirizaza Boniface n’umwunganira bavuga ko yarezwe hashingiwe ku ngingo ya 133 y’Itegeko no 68/2018 ryo ku wa 30/08/2018 riteganya ibyaha n’ibihano muri rusange, ko rero hagombye guhuzwa igikorwa cyo kumanura imashini y’ipantaro n’icyaha yarezwe. UKO URUKIKO RUBIBONA [25] Ingingo ya 21, igika cya mbere, y’itegeko no 68/2018 ryo ku wa 30/08/2018 riteganya ibyaha n’ibihano muri rusange nk’uko ryahinduwe kugeza ubu, iteganya ko : ‘’Ubwinjiracyaha buhanirwa iyo umugambi wo gukorwa icyaha wagaragajwe n’igikorwa kimwe cyangwa byinshi biboneka, bidashidikanywa by’intangiriro y’icyaha biganisha ku ikorwa ryacyo, nyuma bigahagarikwa, bikabuzwa kugera ku cyifuzo cyangwa bikazitirwa n’impamvu zidakomoka ku bushake bwa nyir’ugukora icyaha’’. [26] Ku birebana n’igikorwa cyo gusambanya umwana, ingingo ya 133, igika cya mbere, y’itegeko no 68/2018 ryo ku wa 30/08/2018 ryavuzwe haruguru, iteganya ko : ‘’ Umuntu wese ukorera ku mwana kimwe mu bikorwa bishigiye ku gitsina bikurikira, aba akoze icyaha: 1º gushyira igitsina mu gitsina, mu kibuno cyangwa mu kanwa k’umwana; 2º gushyira urugingo urwo arirwo rwose rw’umubiri w’umuntu mu gitsina cyangwa mu kibuno cy’umwana; 3º gukora ikindi gikorwa cyose ku mubiri w’umwana hagamijwe ishimishamubiri. (…)’’

## Page 6

[27] Ikibazo cyo kumenya niba inyito y’icyaha yahinduka ku rwego rw’ubujurire, cyatanzweho umurongo mu rubanza RS/INJUST/Pen 00004/2017/CS rwaciwe nUrukiko rw’Ikirenga ku wa 23/02/20181, wanakurikijwe mu zindi manza zaciwe vuba harimo urubanza nº RPAA 00266/2022/CA rwaciwe n’urukiko rw’Ubujurire ku wa 12/05/20232, uwo murongo ukaba uvuga ko guhindura inyito y’icyaha ari uburenganzira n’inshingano umucamanza afite mu gihe cyose asanga ibikorwa uregwa akurikiranyweho bidahuye n’inyito byahawe n’inkiko zabanje, hakurikijwe ihame ry’uko umucamanza aregerwa ibikorwa bigize icyaha, ko ataregerwa inyito yacyo. [28] Ku birebana n’inyito yahawe igikorwa cyakozwe na Ntezirizaza Boniface, bigaragara ko ku rwego rwa mbere, Urukiko rwavuze gusa ko ahamwa n’icyaha cyo gusambanya umwana giteganywa n’ingingo ya 133 y’Itegeko no 68/2018 ryo ku wa 30/08/2018 riteganya ibyaha n’ibihano muri rusange, rukaba ariko rutaragaragaje niba igikorwa yakoze gihura n’agace runaka k’iyo ngingo, naho mu bujurire bwa mbere, Urukiko Rukuru ruvuga ko igikorwa cyo kwambura umwana akamwinjiza mu mashuka nawe akamanura imashini y’ipantaro agasaba umwana ngo bakore amafuti, ari igikorwa cy’ishimishamubiri n’ubwo atinjjije igitsina mu cy’umwana bitewe n’uko nyina yabaguye gitumo. [29] Urukiko rw’Ubujurire rurasanga ariko hashingiwe ku bivugwa mu ngingo ya 133, agace ka 3º y’Itegeko No 68/2018 ryo ku wa 30/08/2018 ryavuzwe haruguru, Urukiko Rukuru rutarasobanuye igikorwa Ntezirizaza Boniface yakoreye ku mubiri w’umwana agamije ishimishamubiri, cyane cyane ko na raporo ya munganga nta kintu yigeze igaragaza cyaba cyakorewe ku mubiri w’umwana, ahubwo harebwe ibyo yari amaze gukora byo kuryamana n’umwana akamubwira kuvanamo ikabutura nawe akamanura imashini y’ipantaro, umwana akavuga ko yamubwiye ngo bakore amafuti, bihura n’ibiteganywa n’ingingo ya 21 yavuzwe haruguru, kuko byumvikanisha ko Ntezirizaza Boniface yari afite umugambi wo gusambanya uwo mwana ugaragazwa n’ibikorwa yari amaze gukora bidashidikanywaho by’intangiriro y’icyaha, bikaba byarahagaritswe na nyina w’umwana wahise ahagera, bivuze rero ko ibikorwa yakoze bigize ubwinjiracyaha mu cyaha cyo gusambanya umwana, bityo akaba yaragombaga guhanwa hashingiwe ku biteganywa n’iyo ngingo ya 21, igika cya 3, y’Itegeko no 68/2018 ryo ku wa 30/08/2018 ryavuzwe haruguru3, iteganya igifungo cy’imyaka makumyabiri n’itanu (25). [30] Urukiko rurasanga ariko hashingiwe ku ngingo ya 49 y’Itegeko no 68/2018 ryo ku wa 30/08/2018 ryavuzwe haruguru4, kuba ari ubwa mbere Ntezirizaza Boniface akurikiranywe mu nkiko mu buryo buzwi no kuba nta ngaruka zikomeye icyaha cyateje, byamubera impamvu nyoroshyacyaha agahabwa igihano gikwiranye n’uburemere bw’igikorwa yakoze. [31] Urukiko rurasanga hari izindi manza ruheruka guca ku bantu bahamijwe icyaha nk’icyo Ntezirizaza Boniface yakoze, nk’urubanza nº RPAA 00460/2021/CA rwaciwe ku wa 27/04/2023 haburana Ubushinjacyaha na Manishime Moïse wahamijwe ubwinjiracyaha mu cyaha cyo 1 Haburana Ubushinjacyaha na Mukaruyange Athanasi 2 Haburana Ubushinjacyaha na Rutembesa Abudulkalim 3 ‘’Ubwinjiracyaha bw’icyaha cy’ubugome cyangwa icyaha gikomeye buhanishwa kimwe cya kabiri (1/2) cy’igihano giteganyirijwe icyo cyaha. Ku cyaha gihanishwa igifungo cya burundu, ubwinjiracyaha buhanishwa igifungo kingana n’imyaka makumyabiri n’itanu (25)’’. 4 Iyo ngingo iteganya ko: Umucamanza atanga igihano akurikije uburemere bw’icyaha, ingaruka icyaha cyeteye, impamvu zatumye agikora, uko uwagikoze yari asanzwe yitwara, imibereho ye bwite n’uburyo icyaha cyakozwemo’’.

## Page 7

gusambanya umwana w’imyaka ine (4), Urukiko rushingira ku mpamvu nyoroshyacyaha zirimo kuba ari ubwa mbere akurikiranywe mu butabera mu buryo buzwi no kuba icyaha nta ngaruka zikomeye cyagize ku mwana, maze rumugabanyiriza igihano rumuhanisha igifungo cy’imyaka cumi n’itanu (15), bityo mu rwego rwo gutanga ubutabera busa ku bibazo bisa, hashingiwe ku mpamvu nyoroshyacyaha zavuzwe mu gika kibanziriza iki, Ntezirizaza Boniface nawe uhamwa n’ubwinjiracyaha mu cyaha cyo gusambanya umwana uri mu kigero kijya kuba kimwe n’icy’uwo Manishimwe Moïse yari agiye gusambanya, bahanwa mu buryo bumwe, ni ukuvuga igufungo cy’imyaka cumi n’itanu (15), kugira ngo asobanukirwe uburemere bw’icyaha yakoze ariko anahabwe amahirwe yo kwikosora, bityo urubanza rwajuririwe rukaba ruhindutse ku birenaba n’inyito y’icyaha hamwe n’igihano. III. ICYEMEZO CY’URUKIKO [32] Rwemeje ko ubujurire bwatanzwe na Ntezirizaza Boniface nta shingiro bufite; [33] Rwemeje ko imikirize y’urubanza no RPA 01912/2019/HC/KIG rwaciwe n’Urukiko Rukuru ku wa 30/06/2022, ihindutse ku birebana n’inyito y’icyaha hamwe n’igihano; [34] Rwemeje ko Ntezirizaza Boniface ahamwa n’ubwinjiracyaha mu cyaha cyo gusambanya umwana; [35] Rumuhanishije igifungo cy’imyaka cumi n’itanu (15); [36] Rutegetse ko Ntezirizaza Boniface asonewe gutanga amagarama y’urubanza kuko aburana afunzwe.