UBUSHINJACYAHA v NTIRANDEKURA

# UBUSHINJACYAHA v NTIRANDEKURA

- Source: Amategeko - Section: Decisions (Judgements) - Date: 2024-12-20 - Case/document no.: RPAA 00258/2024/CA - Collection: Court of Appeal

## Text

## Page 1

UBUSHINJACYAHA v NTIRANDEKURA [Rwanda URUKIKO RW’UBUJURIRE - RPAA 00258/2024/CA (Rugabirwa, P.J.) 20 Ukuboza 2024] Amategeko agenga imanza z’inshinjabyaha – Umugambi wo kwica – Gutandukanya umugambi wo kwica n’umugambi wo gukubita no gukomeretsa - Mu kumenya niba uwakubise undi ku bushake yari afite umugambi wo kumwica cyangwa niba yari agamije gusa kumukubita cyangwa kumukomeretsa bisuzumirwa mu cyakoreshejwe (intwaro ishobora kwica) mu kumukubita no ku gice cy’umubiri cyakubiswe (mu cyico). Amategeko agenga imanza z’inshinjabyaha - Ukwemera icyaha - Ukwemera icyaha kugira agaciro – Ukwemera icyaha kugira agaciro ni ugukozwe byibura mbere y’uko iburanisha ku rwego rwa mbere ripfundikirwa, kudashidikanywaho, kandi uwemera agaragaza ko yumva uburemere bw’ibikorwa yemera n’ingaruka zabyo, abyicuza, abisabira imbabazi no kuba yiteguye gusubiza ibyo yangije uko abitegerejweho. Amategeko agenga imanza z’inshinjabyaha – Igabanya gihano – Kutongera kugabanyirizwa igihano - Uregwa ntabwo yongera kugabanyirizwa ibihano, iyo mu bujurire Urukiko rusanze yarabigabanyirijwe bihagije, harebwe uburemere bw’icyaha n’uburyo icyaha cyakozwemo. Incamake y’ikibazo: Ku wa 07/07/2020 mu gihe cya saa tatu z’ijoro Ntirandekura yategeye mu nzira umuvandimwe we Sebanani aramutemagura akoresheje umuhoro amuziza ko hari amafaranga ye yanze kumwishyura, amusiga aho ari intere azi ko yapfuye, aza gutabarwa na mushiki wabo witwa Nyiransengiyumva n’Abanyerondo bamujyana kwa muganga. Ubushinjacyaha bwareze Ntirandekura mu Rukiko Rwisumbuye rwa Karongi rumushinja icyaha cy’ubwinjiracyaha cy’ubwicanyi ariko we aburana ahakana icyo cyaha. Urukiko rushingiye ku mvugo z’abatangabuhamya ndetse na raporo ya muganga rwahamije uregwa icyaha cy’ubwinjiracyaha bw’ubwicanyi rumuhanisha igifungo cy’imyaka 25. Uregwa yajuririye icyo cyemezo mu Rukiko Rukuru ahakana icyaha cy’ubwinjiracyaha bw’ubwicanyi yahamijwe, ko ahubwo akwiye guhamwa n’icyaha cyo gukubita no gukomeretsa ku bushake. Urwo rukiko rwasanze Ntirandekura ahamwa n’icyaha cy’ubwinjiracyaha bw’ubwicanyi ariko kuko mbere yemeye icyaha agifatwa nubwo nyuma yaho yaje guhakana, no kuba uwo yatemye atarapfuye kandi akaba afite amahirwe menshi yo gukira, ndetse no kuba ari ubwa mbere akurikiranyweho icyaha, byamubera impamvu nyoroshyacyaha ituma agabanyirizwa ibihano, rumuhanisha igifungo cy’imyaka cumi n’itanu (15). Ntirandekura yajuririye icyo cyemezo mu Rukiko rw’Ubujurire asaba ko yahindurirwa inyito y’icyaha ashinjwa kikaba gukubita no gukomeretsa aho kuba ubwinjiracyaha bw’icyaha cy’ubwicanyi. Urukiko rwasuzumye ikibazo cyo kumenya niba Urukiko Rukuru rwarakoze ikosa ryo guhamya Ntirandekura icyaha cy’ubwinjiracyaha bw’ubwicanyi, no kumenya niba yagabanyirizwa igihano kubera ko yemera icyaha akanagisabira imbabazi. Uregwa asobanura ko yemera ko yakubise umuvandimwe akamukomeretsa ko nta mugambi wo kumwica yari afite ko ahubwo yakoze icyaha cyo gukubita no gukomeretsa biturutse ku businzi no ku mafaranga umuvandimwe yari amurimo yanze kumwishyura bituma batongana, ajya mu rugo kuzana umupanga awumutemesha mu mutwe inshuro 3 n’inshuro 5 ku kaboko.

## Page 2

Ubushinjacyaha buvuga ko icyaha uregwa yakoze ari ubwinjiracyaha bw’ubwicanyi kuko yatemuaguye Sebanani mu mutwe agamije kumwica akamusiga azi ko yapfuye. Incamake y’icyemezo: 1. Mu kumenya niba uwakubise undi ku bushake yari afite umugambi wo kumwica cyangwa niba yari agamije gusa kumukubita cyangwa kumukomeretsa bisuzumirwa mu cyakoreshejwe (intwaro ishobora kwica) mu kumukubita no ku gice cy’umubiri cyakubiswe (mu cyico). 2. Ukwemera icyaha kugira agaciro ni ugukozwe byibura mbere y’uko iburanisha ku rwego rwa mbere ripfundikirwa, kudashidikanywaho, kandi uwemera agaragaza ko yumva uburemere bw’ibikorwa yemera n’ingaruka zabyo, abyicuza, abisabira imbabazi no kuba yiteguye gusubiza ibyo yangije uko abitegerejweho. 3. Uregwa ntabwo yongera kugabanyirizwa ibihano, iyo mu bujurire Urukiko rusanze yarabigabanyirijwe bihagije, harebwe uburemere bw’icyaha n’uburyo icyaha cyakozwemo. Ubujurire nta shingiro bufite. Amategeko yashingiweho: Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ingingo ya 21; Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ingingo ya 2. Imanza zifashishijwe: RPAA 0110/10/CS, Ubushinjacyaha na Uwamurengeye rwaciwe n’Urukiko rw’Ikirenga ku wa 31/01/2014; RPA 00060/2021/CA, Ubushinjacyaha na Nsabimana Callixte alias Sankara n’abandi rwaciwe n’Urukiko rw’Ubujurire ku wa 04/04/2022; RPAA 00610/2022/CA, Ubushinjacyaha na Nahimana Christophe, rwaciwe n’Urukiko rw’Ubujurire ku wa 25/09/2024; RPAA 00424/2022/CA, Ubushinjacyaha na Ngiruwonsanga Ibrahim, rwaciwe n’Urukiko rw’Ubujurire ku wa 25/09/2024. Urubanza I. IMITERERE Y’URUBANZA [1] Ubushinjacyaha bwakurikiranyeho Ntirandekura Josué alias Kaduruvayo icyaha cy’ubwinjiracyaha bw’ubwicanyi kubera ko ku wa 07/07/2020 mu gihe cya saa tatu z’ijoro (21h00) yategeye mu nzira umuvandimwe we Sebanani Jonathan, aramutemagura akoresheje umuhoro amuziza ko hari amafaranga ye yanze kumwishyura, amusiga aho ari intere azi ko yapfuye, aza gutabarwa na mushiki wabo Nyiransengiyumva Hélène n’Abanyerondo bamujyana kwa muganga. Ntirandekura Josué alias Kaduruvayo yaburanye ahakana icyaha.

## Page 3

[2] Urukiko Rwisumbuye rwa Karongi rwaregewe rushingiye ku mvugo ze n’iz’abatangabuhamya batandukanye bamushinja barimo mushiki we Nyiransengiyumva Hélène wari kumwe na musaza we Sebanani Jonathan igihe yatemwaga no kuri raporo ya muganga igaragaza ko Sebanani Jonathan yatemagujwe imihoro myinshi mu mutwe no ku maboko, rwaciye urubanza nº RP 00320/2020/TGI/KNG ku wa 27/01/2022, rwemeza ko Ntirandekura Josué alias Kaduruvayo ahamwa n’icyaha cy’ubwinjiracyaha bw’ubwicanyi, rumuhanisha igifungo cy’imyaka 25. [3] Ntirandekura Josué alias Kaduruvayo yajuririye urwo rubanza mu Rukiko Rukuru, Urugereko rwa Rusizi, ahakana icyaha cy’ubwinjiracyaha bw’ubwicanyi yahamijwe, ko ahubwo akwiye guhamwa n’icyaha cyo gukubita no gukomeretsa ku bushake kuko yemera ko yakomerekeje umuvandimwe we, asaba kugabanyirizwa ibihano ndetse akanabisubikirwa. [4] Uhagarariye Ubuhinjacyaha avuga ko Ntirandekura Josué alias Kaduruvayo atakoze icyaha cyo gukubita no gukomeretsa ku bushake, ko ahubwo yakoze icyaha cy’ubwinjiracyaha bw’ubwicanyi yemereye mu Bugenzacyaha no mu Bushinjacyaha nk’uko yanagihamijwe ku rwego rwa mbere. [5] Urukiko Rukuru rwasanze Ntirandekura Josué alias Kaduruvayo ahamwa n’icyaha cy’ubwinjiracya mu bwicanyi, aho kuba icyaha cyo gukubita no gukomeretsa ku bushake, kuko nta bimenyetso yatanze bivuguruza ibyashingiweho n’Urukiko rwabanje mu kumuhamya icyaha ashinjwa. Rusanga ariko kuba yaremeye icyaha agifatwa nubwo nyuma yaho yaje guhuzagurika, no kuba uwo yatemye atarapfuye kandi akaba afite amahirwe menshi yo gukira, ndetse no kuba ari ubwa mbere akurikiranyweho icyaha, byamubera impamvu nyoroshyacyaha ituma agabanyirizwa ibihano, ruca urubanza Nº RPA 00038/2022/HC/RSZ ku wa 19/03/2024, rwemeza ko urubanza rwajuririwe ruhindutse ku bijyanye n’ibihano, rumuhanisha igifungo cy’imyaka cumi n’itanu (15). [6] Ntirandekura Josué alias Kaduruvayo yajuririye na none urwo rubanza mu Rukiko rw’Ubujurire, ubujurire bwe buhabwa Nº RPAA 00258/2024/CA, urubanza ruburanishwa mu ruhame ku wa 10/12/2024, Ntirandekura Josué alias Kaduruvayo yunganiwe na Me Ruturwa Rumande Esron, naho Ubushinjacyaha buhagarariwe na Ntawangundi Béatrice, Umushinjacyaha ku rwego rw’Igihugu. [7] Mu mwanzuro w’ubujurire no mu miburanire ye, Ntirandekura Josué alias Kaduruvayo n’umwunganira bavuga ko akwiye guhindurirwa inyito y’icyaha agahamwa n’icyaha cyo gukubita no gukomeretsa ku bushake, aho kuba icyaha cy’ubwinjiracyaha mu bwicanyi kubera ko nta mugambi yari afite wo kwica umuvandimwe we, asaba ko yagabanyirizwa ibihano ndetse bigasubikwa kuko yemera icyaha cyo gukomeretsa umuvandimwe we, akanagisabira imbabazi. [8] Uhagarariye Ubushinjacyaha avuga ko Ntirandekura Josué alias Kaduruvayo atagabanyirizwa ibihano kubera ko atemera icyaha cy’ubwinjiracyaha bw’ubwicanyi yakoze kandi yaracyemereye mu Nzego z’iperereza, bityo ko atahamwa icyaha cyo gukubita no gukomeretsa ku bushake nk’uko abivuga, ko ahubwo hakwiye kugumaho igifungo cy’imyaka 15 yahawe mbere. [9] Urukiko ruhereye kuri izo mpaka, rurasanga ikibazo gikwiye gusuzumwa muri uru rubanza ari icyo kumenya niba Urukiko Rukuru rwarakoze ikosa ryo guhamya Ntirandekura Josué alias

## Page 4

Kaduruvayo icyaha cy’ubwinjiracyaha bw’ubwicanyi, no kumenya niba yagabanyirizwa igihano kubera ko yemera icyaha akanagisabira imbabazi. II.ISESENGURA RY’IKIBAZO KIGIZE URUBANZA Kumenya niba Urukiko Rukuru rwarakoze ikosa ryo guhamya Ntirandekura Josué icyaha cy’ubwinjiracyaha bw’ubwicanyi, no kumenya yagabanyirizwa igihano kubera ko yemera icyaha akanagisabira imbabazi. A. Ku birebana n’inyito y’icyaha [10] Ntirandekura Josué alias Kaduruvayo n’umwunganira bavuga ko atakoze icyaha cy’ubwinjiracyaha bw’ubwicanyi nk’uko byemejwe n’Urukiko Rukuru kubera ko atigeze agira umugambi wo kwica umuvandimwe we Sebanani Jonathan, kuko atari kumwica kandi yari kumwe na mushiki wabo, ko ahubwo yakoze icyaha cyo gukubita no gukomeretsa biturutse ku businzi no ku mafaranga umuvandimwe yari amurimo yanze kumwishyura bituma batongana, barafatana, baragundagurana, mukuru we amukubita igiti bituma arakara, ajya mu rugo kuzana umupanga awumutemesha mu mutwe ishuro 3 n’inshuro 5 ku kaboko. [11] Uhagarariye Ubushinjacyaha avuga ko Ntirandekura Josué alias Kaduruvayo atakoze icyaha cyo gukubita no gukomeretsa ku bushake nk’uko abivuga, ko ahubwo yakoze icyaha cy’ubwinjiracyaha bw’ubwicanyi nk’uko yagihamijwe n’Urukiko Rukuru, kuko yafashe umupanga (intwaro yica) awutemesha mukuru we mu mutwe (mu cyico) inshuro 3 n’inshuro 5 ku kaboko, ariko ko kuba Sebanani Jonathan atarapfupfe byatewe n’uko mushiki we Nyiransengiyumva Hélène barikumwe icyo gihe yamutabarije, bakajya no kuvuza uwahohotewe kwa muganga. UKO URUKIKO RUBIBONA [12] Ikibazo cyo kumenya niba uwakubise undi ku bushake yari afite umugambi wo kumwica cyangwa niba yari agamije gusa kumukubita cyangwa kumukomeretsa bisuzumirwa mu cyakoreshejwe (intwaro ishobora kwica) mu kumukubita no ku gice cy’umubiri cyakubiswe (mu cyico) nk’uko cyatanzweho umurongo n’Urukiko rw’Ikirenga mu rubanza Nº RPAA 0110/10/CS rwaciwe ku wa 31/01/2014 haburana Ubushinjacyaha na Uwamurengeye. Uyu murongo ninawo wagiye ushingirwaho mu zindi manza zaciwe n’uru Rukiko nk’urubanza Nº RPAA 00494/2024/CA rwaciwe n’Urukiko rw’Ubujurire ku wa 25/09/2024 haburana Ubushinjacyaha buburana na Ntawiheba Jean de Dieu bahimba Afande Gaturi (igika cya 14). [13] Urukiko rw’Ubujurire rurasanga, kuba Ntirandekura Josué alias Kaduruvayo yarafashe umuhoro (intwaro gakondo yica) akawutemesha Sebanani Jonathan mu mutwe (mu cyico) inshuro 3 n’inshuro 5 ku maboko, bigaragara ko yari afite ubushake bwo kumwica, ariko akaba atarageze ku mugambi we bitewe n’uko mushiki we Nyiransengiyumva Hélène bari kumwe icyo gihe yamutabarije bituma Ntirandekura Josué alias Kaduruvayo ahunga atamwishe binatuma abaturage batabara uwahohotewe banamujya kwa muganga, bivuze ko Ntirandekura Josué alias Kaduruvayo yakoze icyaha cy’ubwinjiracyaha bw’ubwicanyi nk’uko byemejwe n’Urukiko Rukuru, nk’uko

## Page 5

byanatanzweho umurongo mu rubanza Nº RPAA 0110/10/CS rwavuzwe haruguru, aho kuba icyaha cyo gukubita no gukomeretsa ku bushake nk’uko abivuga. B. Ku birebana n’igabanyagihano [14] Ntirandekura Josué alias Kaduruvayo n’umwunganira bavuga ko akwiye kugabanyiririzwa ibihano kubera ko yemeye icyaha cyo gukubita no gukomeretsa akanagisabira imbabazi, no kuba ari ubwa mbere aguye mu cyaha, ndetse akanasubikirwa ibihano, kuko akiri muto (afite imyaka 24) kugira ngo asubire mu muryango nyarwanda anafatanye n’abandi kurwubaka kubera ko yagororotse, no kuba nta ngaruka zikomeye umuvandimwe yatewe n’icyaha yamukoreye, agahanishwa igifungo kiri hagati y’amezi atandatu (6) n’umwaka umwe (1). [15] Uhagarariye Ubushinjacyaha avuga ko Ntirandekura Josué alias Kaduruvayo atagabanyirizwa ibihano kubera ko atemera icyaha cy’ubwinjiracyaha bw’ubwicanyi yahamijwe n’Urukiko Rukuru hashingiwe ku bimenyetso atavuguruje, kuko yafashe umupanga (intwaro yica) akawutemesha mukuru we mu mutwe (mu cyico) inshuro 3 n’inshuro 5 ku maboko ariko kuba Sebanani Jonathan atarapfupfe byatewe n’uko yatabarijwe na mushiki we Nyiransengiyumva Hélène barikumwe icyo gihe, bajya kumuvuza kwa muganga, bityo ko uregwa atahamwa icyaha cyo gukubita no gukomeretsa ku bushake nk’uko abivuga. UKO URUKIKO RUBIBONA [16] Ingingo ya 21, igika cya 2, y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, iteganya ko “Ubwinjiracyaha burahanirwa n’ubwo icyari kigambiriwe kitashoboraga kugerwaho bitewe n’impamvu nyir’ugukora icyaha atashoboye kumenya”. Naho igika cya 3 cy’iyo ngingo kigateganya ko “Ubwinjiracyaha bw’icyaha cy’ubugome cyangwa icyaha gikomeye buhanishwa kimwe cya kabiri (1/2) cy’igihano giteganyirijwe icyo cyaha. Ku cyaha gihanishwa igifungo cya burundu, ubwinjiracyaha buhanishwa igihano cy’igifungo kingana n’imyaka makumyabiri n’itanu (25)”. [17] Naho ingingo ya 2 y’Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, igateganya ko: “Iyo umucamanza yemeje impamvu nyoroshyacyaha, ashobora kugabanya igihano ku buryo bukurikira: (b) igifungo kimara igihe kizwi kiva ku mezi 6 kuzamura gishobora kugabanywa, ariko ntikijye munsi ya kimwe cya kabiri cy’igihano gito giteganyirijwe icyaha cyakozwe”. [18] Nk’uko byatanzweho umurongo mu rubanza Nº RPA 00060/2021/CA rwaciwe n’Urukiko rw’Ubujurire 04/04/2022 haburana Ubushinjacyaha na Nsabimana Callixte alias Sankara na bagenzi be, “ukwemera icyaha kugira agaciro gashobora gutuma uregwa agabanyirizwa igihano iyo gukozwe byibura mbere y’uko iburanisha ku rwego rwa mbere ripfundikirwa, kudashidikanywaho, kuba uwemera agaragaza ko yumva uburemere bw’ibikorwa yemera n’ingaruka zabyo, abyicuza, abisabira imbabazi no kuba yiteguye gusubiza ibyo yangije uko abitegerejweho”. Uyu murongo ninawo wagiye ushingirwaho mu zindi manza zaciwe n’uru Rukiko nk’urubanza Nº RPAA 00610/2022/CA rwaciwe n’uru Rukiko ku wa 25/09/2024 Ubushinjacyaha buburana na Nahimana Christophe (igika cya 11).

## Page 6

[19] Naho ikibazo cy’uko uregwa atongera kugabanyirizwa ibihano, iyo mu bujurire Urukiko rusanga yarabigabanyirijwe bihagije, harebwe uburemere bw’icyaha n’uburyo icyaha cyakozwemo, cyatanzweho umurongo mu rubanza Nº RPA 0129/10/CS rwaciwe n’Urukiko rw’Ikirenga ku wa 7/03/2014, haburana Ubushinjacyaha na Mpitabakana, hatanzwe umurongo w’uko uregwa atoyongera kugabanyirizwa ibihano, iyo mu bujurire Urukiko rusanga yarabigabanyirijwe bihagije, harebwe uburemere bw’icyaha n’uburyo icyaha cyakozwemo. Uyu murongo ninawo wagiye ushingirwaho mu zindi manza zaciwe n’uru Rukiko nk’urubanza Nº RPAA 00424/2022/CA rwaciwe n’Urukiko rw’Ubujurire ku wa 25/09/2024 haburana Ubushinjacyaha na Ngiruwonsanga Ibrahim (igika cya 18). [20] Naho ikibazo cy’uko uregwa atagabanyirizwa ibihano kubera ubugome bukabije yakoranye icyaha cyatanzweho umurongo n’Urukiko rw’Ikirenga mu manza nyinshi rwaciye zirimo urubanza Nº RPAA 0021/14/CS - Nº RPAA 0022/14/CS rwaciwe ku wa 13/10/2017, haburana Ubushinjacyaha na Uzabakiriho Bernard na Ntabanganyimana Félicien, aho rwasobanuye ko n’ubwo Ntabanganyimana Félicien yemera icyaha aregwa, ariko ko atagabanyirizwa ibihano mu gihe yakoranye icyaha ubugome bukabije1. [21] Nk’uko bigaragarira mu gika cya 8 cy’urubanza Nº RP 00320/2020/TGI/KNG rwaciwe n’Urukiko Rwisumbuye ku wa 27/01/2022, ndetse no mu bika bya 6,8 na 10 by’urubanza Nº RPA 00038/2022/HC/RSZ rujuririrwa, Ntirandekura Josué alias Kaduruvayo atigeze yemera icyaha icyaha cy’ubwinjiracyaha bw’ubwicanyi, ahubwo yemeye icyaha cyo gukubita no gukomeretsa kuva ku rwego rwa mbere kugera muri uru Rukiko. [22] Hashingiwe ku murongo watanzwe mu rubanza Nº RPA 00060/2021/CA rwaciwe ku wa 04/04/2022 rwavuzwe haruguru, Urukiko rw’Ubujurire rurasanga, Ntirandekura Josué alias Kaduruvayo atakongera kugabanyirizwa igihano hashingiwe ku mpamvu nyoroshyacyaha ijyanye n’uko yemera icyaha akanagisabira imbabazi, kuko atigeze yemera icyaha cy’ubwinjiracyaha bw’ubwicanyi yakoze ngo anagisabire imbabazi, anacyicuze kuva ku rwego rwa mbere kugera muri uru Rukiko nk’uko byatanzweho umurongo muri urwo rubanza. [23] Hashingiwe ku murongo watanzwe mu rubanza Nº RPAA 0021/14/CS - Nº RPAA 0022/14/CS rwaciwe ku wa 13/10/2017 rwavuzwe haruguru, Urukiko rw’Ubujurire rurasanga indi mpamvu ituma Ntirandekura Josué alias Kaduruvayo atakongera kugabanyirizwa igihano, ari ukubera ubugome bukabije yakoranye icyaha aregwa ubwo yatemaguraga umuvandimwe we Sebanani Jonathan akoresheje umupanga (intwaro yica) akawumutemesha mu mutwe (mu cyico) inshuro eshstu (3) zose, ndetse n’izindi nshuro eshanu (5) zose ku kaboko ku buryo igufa ryako ryavunitse bigatuma ikiganza cye cy’iburyo kidakora neza nk’uko bigaragazwa na muri raporo ya muganga (amputation partielle de la main droite dȗ au choc hypovolémique), bigaragara rero ko igifungo cy’imyaka cumi n’itanu (15) yahawe n’Urukiko Rukuru aricyo kigomba kugumaho harebwe uburemere bw’icyaha aregwa yakoranye ubugome bukabije nk’uko byasobanuwe haruguru.

1 Urukiko rw’Ikirenga rwasobanuye ko uwo murongo ari nawo wafashwe mu rubanza N° RPA 0047/11/CS rw’Ubushinjacyaha na Nshutirakiza Narcisse rwaciwe ku itariki ya 27/03/2015, aho uregwa yaburanye yemera icyaha, ariko Urukiko rukanga kumugabanyiriza igihano kubera ubugome n’agashinyaguro yakoresheje mu kwica umugore we amutemaguye ibice bitandukanye by’umubiri.

## Page 7

[24] Ku bijyanye n’isubikabihano risabwa na Ntirandekura Josué alias Kaduruvayo, Urukiko rw’Ubujurire rurasanga atahabwa isubikabihano asaba mu gihe ahanishijwe igifungo kirenze imyaka 5 kubera impamvu zasobanuwe haruguru nk’uko biteganywa n’ingingo ya 3 y’Itegeko nº 059/2023 ryo ku wa 04/12/2023 ryavuzwe haruguru2. [25] Hashingiwe ku bisobanuwe haruguru, Urukiko rw’Ubujurire rurasanga rero, kuba nta nenge Ntirandekura Josué alias Kaduruvayo zigaragara mu rubanza rujuririrwa, imikirize yarwo igomba kugumaho, bityo ubujurire bwe nta shingiro bufite. III. ICYEMEZO CY’URUKIKO [26] Rwemeje ko ubujurire bwa Ntirandekura Josué alias Kaduruvayo nta shingiro bufite. [27] Ruvuze ko imikirize y’urubanza N° RPA 00038/2022/HC/RSZ rwaciwe n’Urukiko Rukuru, Urugereko rwa Rusizi, ku wa 19/03/2024, idahindutse, ko igifungo cy’imyaka cumi n’itanu (15) Ntirandekura Kaduruvayo yahanishijwe n’urwo Rukiko kigumyeho. [28] Rutegetse ko amagarama y’urubanza aherera ku Isanduku ya Leta.

2 Ingingo ya 3 y’Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, iteganya ko: (1) “Iyo uwakatiwe nta kindi gihano cy’igifungo kirenga amezi 6 yahanishijwe mbere, urukiko rukoresheje icyemezo gisobanura impamvu, rushobora gutegeka gusubika irangiza ry’igihano cyose cyangwa igice cy’igihano cy’iremezo cyangwa cy’ingereka, iyo igihano cy’iremezo cy’igifungo umuntu yakatiwe kitarenze imyaka 5”