NYANDWI v UZABAKIRIHO

# NYANDWI v UZABAKIRIHO

- Source: Amategeko - Section: Decisions (Judgements) - Date: 2023-11-03 - Case/document no.: RCA 00002/2023/HC/NYZ - Collection: High Court

## Text

## Page 1

NYANDWI v UZABAKIRIHO [Rwanda URUKIKO RUKURU - RCA 00002/2023/HC/NYZ (Badara, P.J.) 3 Ugushyingo 2023] Amategeko agenga imanza z’imbonezamubano – Amasezerano – Agaciro k’amasezerano y’ubugure bw’umutungo utimukanwa - Amasezerano y’ubugure bw’ubutaka yakozwe mu buryo bw’inyandikompamo niyo agira agaciro. Uwaguze hakozwe amasezerano mu buryo bw’inyandiko bwite, ubugure bwe buba ari imfabusa. Incamake y’ikibazo: Uru rubanza rwatangiriye mu Rukiko Rwisumbuye rwa Nyamagabe aho Nyandwi yaregaga Uzabakiriho ko baguze ubutaka burimo inzu hanyuma akanga kumukorera ihererekanya mutungo no kumusubiza ikiguzi cy’ubutaka bubura baguze bwaje gusangwa bwanditse kuri Mukateganya. Urukiko rwasanze ubutaka buburanwa bubaruye kuri Succession Sebazungu aho kuba kuri Uzabakiriho, rwemeza ko butagomba kwandikwa kuri Nyandwi. Urega yajuririye mu Rukiko Rukuru avuga ko Urukiko rwabanje rwirengagije ko nubwo ubutaka bwaguzwe bubaruye kuri succession Sebazungu ariko umuzungura wabo ari umwe akaba ariwe Nyandwi ko ibyo bihagije ko yari gusabwa gutegekwa gukora ihererekanyamutungo. Urukiko Rukuru, rwakiriye ubwo bujurire maze rusuzuma ikibazo cyo kumenya niba habaho ihererekanya ry'ubutaka hashingiwe ku masezerano y'ubugure yabaye hagati ya Uzabakiriho na Nyandwi no kumenya niba hasubizwa ikiguzi cy’ubutaka bubura kubwo baguze. Urega avuga ko urukiko rwirengagije ko akwiye gukorerwa ihererekanyamutungo kandi uwo baguze ariwe muzungura wenyine wa Sebazungu kuko ntawundi muntu wigeze atambamira icyo kirego bivuze ko Uzabakiriho ariwe wenyine ufite uburenganzira bwo kuzungura umubyeyi we. Akomeza asobanura ko uregwa agomba kumusubiza igice cy’ikiguzi kuko hari ubutaka baguze bikaza kugaragara ko ari ubw’undi muntu. Uregwa yiregura avuga ko atigeze yanga gukora ihererekanyamutungo kandi ko ubutaka yamugurishije buhari ahubwo ko we, nyuma y’uko baguze, yaje kurengerera ubutaka bw’undi muntu aramurega aratsindwa hanyuma ategekwa gukuraho inzu yari yubatse akaba ari byo byatumye amurega. Akomeza avuga ko nta gice cy’ikiguzi yamuha kuko ariwe warengereye akubaka mu butaka bw’abandi. Incamake y’icyemezo: Amasezerano y’ubugure bw’ubutaka yakozwe mu buryo bw’inyandikompamo niyo agira agaciro. Uwaguze hakozwe amasezerano mu buryo bw’inyandiko bwite, ubugure bwe buba ari imfabusa bityo, amasezerano y’ubugure bw’ubutaka yabaye hagati ya Uzabakiriho na Nyandwi nta gaciro afite kuko atakorewe imbere y’umukozi wabiherwe ububasha. Na none kandi ibyo Nyandwi asaba byo gusubizwa agaciro k’aho yambuwe nta shingiro bifite kuko nta burenganzira yari afite bwo gukorera ku mutungo utari we dore ko hari n’urubanza rugaragaza ko yarengereye. Ubujurire bwatanzwe nta shingiro bufite. Amategeko yashingiweho:

## Page 2

Iteka rya Minisitiri N° 002/2008 ryo ku wa 01/4/2008 rigena uburyo iyandikishwa ry’ubutaka rikorwa, ingingo ya 4. Amategeko yifashishijwe atagikoreshwa: Itegeko No 43/2013 ryo ku wa 16/06/2013 rigenga ubutaka mu Rwanda, ingingo ya 22. Imanza zifashishijwe: N˚ RS/INJUST/RC 00010/2019/SC, Twizerimana Théoneste na Manizabayo Kennedy n’Undi, rwaciwe n’Urukiko rw’Ikirenga, ku wa 25/09/2020. Urubanza IMITERERE Y’URUBANZA [1] Tariki ya 22/3/2013, Uzabakiriho Jean yagurishije Nyandwi François ubutaka burimo inzu bugaragazwa n’amasezerano y’ubukode burambye afite Nº 2897, ubwo butaka bukaba bwanditswe kuri Succession Sebazungu ihagarariwe na Uzabakiriho Jean. Nyuma y’uko Nyandwi François atsinzwe na Mukateganya Verene mu rubanza baburanaga, Nyandwi François avuga ko yamusenye inzu yubatse kuri ubwo butaka yari yaraguze na Uzabakiriho Jean, uyu Mukateganya Verene yamuragaga ko yamuurengereye mu kubaka. [2] Nyandwi François yatanze ikirego mu rukiko rwisumbuye rwa Nyamagabe asaba Urukiko ko rwategeka ihererekanya ry’ubutaka Nyandwi François yaguze na Uzabakiriho Jean no kumutegeka gusubiza ikiguzi cy’ubutaka bubura ku bwo baguze bwaje gusangwa bwanditswe kuri Mukateganya Verene n’agaciro k’inzu yahasenywe. [3] Uzabakiriho Jean avuga ko atigeze na rimwe yanga ko bakora ihererekanya, ahubwo we akimara kuregana na Mukateganya Verena, Nyandwi bamutegetse gusubiza aho yamurengereye ndetse no gusenya inzu yubatsemo, abonye bimukomeranye niko kumurega, nta kiguzi agomba kumusubiza cy’ubutaka bubura ngo bwagiye kwa Mukateganya kuko abashinzwe gupima ubutaka baje kubireba, basanga yararengereye yirengagije aho baguze dore ko hanagaragaraga ariko aharengaho ajya kurengera Mukateganya, nta ndishyi nimwe agomba guha Nyandwi François kuko ibi byose byamubayeho niwe wabyiteye ajya kurengera akajya kubaka ahatari ahe bakarinda bamusenyera kuko inzu baguze yariri neza muri icyo cyangombwa, ariko akirengaho ajya ahatari ahe. [4] Mu rubanza RC 00028/2022/TGI/NYBE rwaciwe kuwa 15/12/2022 n’urukiko rwisumbuye rwa Nyamagabe rwemeje ko ubutaka bufite UPI: 2/05/10/04/2897 Nyandwi François avuga yaguze na Uzabakiriho Jean bwanditswe kuri Succession Sebazungu aho kuba kuri uyu Uzabakiriho Jean wabugurishije. Rwemeje ko ubutaka bufite UPI: 2/05/10/04/2897 butandikwa kuri Nyandwi ndetse nta n’indishyi akwiye kimwe na Uzabakiriho Jean. [5] Mu gufata icyo cyemezo, urukiko rwasanze ubutaka Nyandwi François avuga yaguze na Uzabakiriho Jean bubaruye kuri UPI 2/05/10/04/2897 bukaba bwanditse kuri Succession Sebazungu 100%, yabuguze n’utari nyirabwo kuko uretse kuba ahagarariye nyirabwo ari we

## Page 3

Succession Sebazungu, amasezerano bagiranye ari bo areba nk’uko biteganywa n’ingingo ya 64 y’itegeko rigenga amasezerano, aya atareba Succession Sebazungu, bityo nta mpamvu urukiko rwarinda rusuzuma niba ihererekanya ry’ubutaka Nyandwi François yaguze na Uzabakiriho Jean rwakorwa kuko ubuvugwa ko bwaguzwe, uwabugurishije unabyemera ariko atari nyirabwo ndetse no kumutegeka gusubiza ikiguzi cyabwo ntacyo byashingiraho. [6] Nyandwi François yajuririye urukiko rukuru, urugereko rwa Nyanza, urubanza ruhabwa No RCA 00002/2023/HC/NYZ, ruburanishwa mu ruhame ku wa 4/10/2023, Nyandwi François aburanirwa na Habimana Leon naho Uzabakiriho Jean yiburanira. [7] Mu myanzuro y’ubujurire no mu miburanire, Nyandwi François avuga ko Urukiko rwirengagije ko ku cyangombwa cy'ubutaka buvugwa bigaragara neza ko Sebazungu yitabye Imana kandi umuzungura uhari ugomba kumuzungura ari Uzabakiriho Jean ruvuga ko ubutaka bwagurishijwe n'utari nyirabwo kandi yarabugizeho uburenganzira ubwo nyirabwo yamagara kwitaba imana cyane ko n'ubwo yaba atari nyirabwo urukiko rwari gutegeka ko uwabugurishije yakwirengera amakosa ye aho gutegeka ko Nyandwi atsinzwe kandi urukiko rubona amasezerano yakorewe kuri ubwo butaka nta n'undi muntu ubutambamira cyangwa ngo agaragaze ko ubwo butaka ari ubwe. Rwirengagiza kandi amazezerano yakozwe hagati ya Uzabakiriho Jean na Nyandwi François bituma batsindwa urubanza. Kuba rero baraguze ubutaka na Uzabakiriho Jean bufite UPI 2/05/10/04/2897 akomora ku mubyeyi we witabye Imana hashingiwe ku masezerano yo ku wa 22/05/2013 bikagaragara ko ubwo butaka ari ubwe. Kuba yaramuhaye icyangomwa cyabwo bwose bigaragara neza ko yari abufiteho uburenganzira hatategekwa ko yagurishije ubutaka butari ubwe kandi se umubyara yaritabye Imana ariwe muzungura uhari wabuzunguye anafite uburenganzira bwo kubugurisha. Nyandwi yatangiye kubukoreraho kuko yabwubatseho inzu y'ubucuruzi ifite imiryango 4, akajya amusaba ko hakorwa ihererekanya ry'ubutaka ariko akaba yarinangiye kugeza ubu. Aho hatwawe na Mukateganya Verene akaba ari naho hari hubatse ayo mazu y'ubucuruzi ya Nyandwi François yaje no gusenywa na Mukateganya Verene kuko yavugaga ko ubwo butaka yubatsemo ari ubwe, ko urukiko rwakemeza ko ubujurire bufite ishingiro rugategeka ihererekanya. [8] Nyandwi François akomeza avuga ko yashowe mu manza atari yiteguye byatumye Nyandwi yiyambaza inkiko ahatakariza amafaranga atandukanye agizwe na 500.000 Frw y'igihembo cy'Avocat, ibihumbi 20.000 Frw yatanzwe mu rukiko rwisumbuye, hakiyongeraho na none andi ibihumbi 500.000 yishyuwe mu bujurire ku gihembo cy'avoka ndetse n'igarama rya 40.000 Frw ku rwego rw'ubujurire. Uregwa kandi akababa akwiye kubitangira indishyi zingana n'ibihumbi 300.000 Frw yo kumutesha igihe cye ndetse n'indishyi z'akababaro zingana na 500.000. Nyandwi François akimara kugura ubu butaka yahise abukoreramo ibikorwa bitandukanye birimo kubwubakaho inzu nini y'imiryango ine (4) inzu y'ubucuruzi ariko ikaza gusenywa na Mukateganya Verena wemezako ahubatswe ari mukwe kandi Nyandwi François yarahaguze yijejwe ko ari he akwiye kubihererwa indishyi, akishyurwa izo nzu ze zasenywe, indishyi z'igihombo byamuteje ndetse agasubizwa amafaranga yishyuye umugenagaciro. [9] Uzabakiriho Jean yiregura avuga ko we atigeze na rimwe yanga ko bakora ihererekanya, ahubwo ko Nyandwi François we akimara kuregana na Mukateganya Verena bamusabye gusubiza aho yamurengereye ndetse no gusenya inzu yubatsemo, kandi amubuza yanga, abonye bimukomeranye nta n’icyangombwa cyari kinahari, bityo ntiyari bunabone icyo akoresha yubaka aho hantu bamubuzaga kubaka, niho havuye kurengera Leta na Mukateganya Verene bityo rero

## Page 4

ibi byakagombye kumubazwa kuko yanze ko bajya gukora ihererekanya ahubwo ajya kurengera abo bahanaga imbibi yitwaje ko yahaguze, nyamara aho yaguze harahari ndetse haragaragara no mu nyandiko y'ubugure metero baguze zirahari ni 8/10 n’ubu uwabishaka wese yaza akazibona ni ahantu hapimika, bityo arakomeza asaba ko yaza bakahakorera ihererekanya, atigeze amwangira na rimwe, nta ndishyi nimwe agomba guha Nyandwi François kuko ibi byose byamubayeho niwe wabyiteye ajya kurengera akajya kubaka mu kw’abandi bakarinda bamusenyera kuko inzu baguze yari iri neza muri icyo cyangombwa, ariko akirengaho ajya mu kw’abandi. Asaba ko ahubwo urukiko ariwe rwagenera indishyi zihwanye n'ibihumbi magana atanu (500,000frw) byo kumusiragiza mu nkiko. [10] Ibibazo bigiye gusuzumwa muri uru rubanza ni ibi bikurikira:

Kumenya niba habaho ihererekanya ry'ubutaka hashingiwe ku masezerano y'ubugure yo ku wa 22/05/2013 bukandikwa kuri Nyandwi François

Kumenya niba Uzabakiriho Jean yasubiza ikiguzi cy'ubutaka bubura kubwo baguze bwaje gusangwa bwanditswe kuri Mukateganya Velena.

Kumenya niba hari indishyi zatangwa muri uru rubanza. ISESENGURA RY’IBIBAZO BIGIZE URUBANZA

Kumenya niba habaho ihererekanya ry'ubutaka hashingiwe ku masezerano y'ubugure yo ku wa 22/05/2013 bukandikwa kuri Nyandwi François. [11] Nyandwi François avuga ko Urukiko rwirengagije ko ku cyangombwa cy'ubutaka buvugwa bigaragara neza ko Sebazungu yitabye Imana kandi umuzungura uhari ugomba kumuzungura ari Uzabakiriho Jean ruvuga ko ubutaka bwagurishijwe n'utari nyirabwo kandi yarabugizeho uburenganzira ubwo nyirabwo yamagara kwitaba Imana cyane ko n'ubwo yaba atari nyirabwo urukiko rwari gutegeka ko uwabugurishije yakwirengera amakosa ye aho gutegeka ko Nyandwi atsinzwe kandi urukiko rubona amasezerano yakorewe kuri ubwo butaka nta n'undi muntu ubutambamira cyangwa ngo agaragaze ko ubwo butaka ari ubwe. Rwirengagiza kandi amazezerano yakozwe hagati ya Uzabakiriho Jean na Nyandwi François bituma batsindwa urubanza. Kuba rero baraguze ubutaka na Uzabakiriho Jean bufite UPI 2/05/10/04/2897 akomora ku mubyeyi we witabye Imana hashingiwe ku masezerano yo ku wa 22/05/2013 bikagaragara ko ubwo butaka ari ubwe. Kuba yaramuhaye icyangomwa cyabwo bwose bigaragara neza ko yari abufiteho uburenganzira hatategekwa ko yagurishije ubutaka butari ubwe kandi se umubyara yaritabye Imana ariwe muzungura uhari wabuzunguye anafite uburenganzira bwo kubugurisha. Nyandwi yatangiye kubukoreraho kuko yabwubatseho inzu y'ubucuruzi ifite imiryango 4, akajya amusaba ko hakorwa ihererekanya ry'ubutaka ariko akaba yarinangiye kugeza ubu. [12] Uzabakiriho Jean yiregura avuga ko we atigeze na rimwe yanga ko bakora ihererekanya, ahubwo ko Nyandwi François we akimara kuregana na Mukateganya Verena bamusabye gusubiza aho yamurengereye ndetse no gusenya inzu yubatsemo, kandi amubuza yanga, abonye bimukomeranye nta n’icyangombwa cyari kinahari, bityo ntiyari bunabone icyo akoresha yubaka aho hantu bamubuzaga kubaka, niho havuye kurengera Leta na Mukateganya Verene bityo rero ibi byakagombye kumubazwa kuko yanze ko bajya gukora ihererekanya ahubwo ajya kurengera abo bahanaga imbibi yitwaje ko yahaguze, nyamara aho yaguze harahari ndetse haragaragara no mu nyandiko y'ubugure metero baguze zirahari ni 8/10 n’ubu uwabishaka wese yaza akazibona ni

## Page 5

ahantu hapimika, bityo arakomeza asaba ko yaza bakahakorera ihererekanya, atigeze amwangira na rimwe. UKO URUKIKO RUBIBONA [13] Kuri iki kibazo cyo kumenya niba ihererekanya ry'ubutaka ryakorwa hashingiwe ku amasezerano y'ubugure yo ku wa 22/05/2013 bukandikwa kuri Nyandwi François, umurongo wagenderwaho muri uru rubanza ni umurongo watanzwe n’Urukiko rw’Ikirenga mu rubanza N˚ RS/INJUST/RC 00010/2019/SC rwaciwe ku wa 25/09/2020, haburana Twizerimana Théoneste na Manizabayo Kennedy, hagobokeshwa Hafashimana Elias. Urwo Rukiko rw’Ikirenga rwasanze amasezerano y’ubugure bw’ubutaka yakozwe mu buryo bw’inyandikompamo niyo agira agaciro. Uwaguze hakozwe amasezerano mu buryo bw’inyandiko bwite, ubugure bwe buba ari imfabusa. [14] Urukiko rurasanga muri uru rubanza amasezerano y’ubugure yabaye hagati ya Nyandwi na Uzabakiriho yakozwe mu buryo bw’inyandiko bwite nyamara amasezerano y’ubugure agira agaciro ni amasezerano yabereye imbere ya noteri. Leta y’u Rwanda yashatse ko umuguzi n’ugurisha batajya bihererana bonyine ngo bakore amasezerano y’ubugure, maze itegeka ko bene ayo masezerano agomba kubahiriza imihango yihariye kugira ngo agire agaciro. Imihango yihariye amasezerano y’ubugure bw’ubutaka agomba kubahiriza, akaba ari uko agomba gukorerwa imbere ya Noteri. [15] Urukiko rurasanga kugeza ubu Nyandwi François nta burenganzira afite ku butaka avuga ko yaguze na Uzabakiriho Jean kuko inyandiko bwite yakoranye na Uzabakiriho Jean nta gaciro ifite kuko niba baramaze kurangiza imishyikirano yabo, bagomba kujya kwa noteri w’ubutaka kugirango ubwo butaka bumwandikweho. [16] Urukiko rurasanga ibisabwa na Nyandwi François ko Urukiko rwategeka ihererekanya ry’ubutaka Nyandwi François yaguze na Uzabakiriho Jean nta shingiro bifite kubera ko imihango yihariye amasezerano y’ubugure bw’ubutaka agomba kubahiriza atigeze yubahirizwa bityo ihererekanya ry’ubutaka rikaba ritashoboka, ko yakagombye kuba yararebye Uzabakiriho Jean bakajya kwa noteri bagakora ihererekanya ry’ubutaka aho kuzana ikibazo mu nkiko.

Kumenya niba Uzabakiriho Jean yasubiza ikiguzi cy'ubutaka bubura kubwo baguze bwaje gusangwa bwanditswe kuri Mukateganya Velena. [17] Nyandwi François avuga ko yaje gutungurwa n'uko igice cy'ubwo butaka cyaje gufatwa n'undi muntu witwa Mukateganya Verene. Aho hantu hatwawe na Mukateganya Verene akaba ari naho hari hubatse ayo mazu y'ubucuruzi ya Nyandwi François yaje no gusenywa na Mukateganya Verene kuko yavugaga ko ubwo butaka yubatsemo ari ubwe kandi Nyandwi François yarahaguze yijejwe ko ari he akwiye kubihererwa indishyi, akishyurwa izo nzu ze zasenywe, indishyi z'igihombo byamuteje ndetse agasubizwa amafaranga yishyuye umugenagaciro. [18] Uzabakiriho Jean avuga ko nta kiguzi agomba kumusubiza cy'ubutaka avuga bubura bwagiye kwa Mukateganya kuko abashinzwe gupima ubutaka baje kubireba, koko basanga yararengereye yubatse yirengagije aho baguze dore ko hanagaragaraga ariko aharengaho ajya kurengera Mukateganya. Asobanura ko nta ndishyi nimwe agomba guha Nyandwi François kuko ibi byose byamubayeho niwe wabyiteye ajya kurengera akajya kubaka mu kw’abandi bakarinda

## Page 6

bamusenyera kuko inzu baguze yari iri neza muri icyo cyangombwa, ariko akirengaho ajya mu kw’abandi. UKO URUKIKO RUBIBONA [19] Ingingo ya 22 y’itegeko No 43/2013 ryo kuwa 16/06/2013 rigenga ubutaka mu Rwanda ryakoreshwaga ubwo habaga ubugure iteganya ko ihererekanya ry’uburenganzira ku butaka iryo ari ryo ryose rikozwe n’uhagarariye umuryango rigomba kubanza kwemezwa n’abanditse bose ku mpapuro mpamo z’ubutaka. Umuntu udafite ububasha ahabwa n’amategeko bwo guhagararira inyungu ze, ahagararirwa n’uwabiherewe uburenganzira ku buryo bwemewe n’amategeko. Kwemeza ihererekanya ry’ubutaka kw’abagize umuryango bikorwa mu nyandiko nyakuri ishyirwaho umukono cyangwa igikumwe ikorewe imbere ya Noteri ushinzwe iby’ubutaka. [20] Ingingo ya 4 y’Iteka rya Minisitiri N° 002/2008 ryo ku wa 01/4/2008 rigena uburyo iyandikishwa ry’ubutaka rikorwa ivuga ko Umutungo bwite w’ubutaka n’ubukode burambye bw’ubutaka bigaragazwa ku buryo bwemewe n'amategeko n'icyemezo cy’iyandikisha ry’uburenganzira ku butaka gishingiye ku rupapuro rwemewe cyangwa rwatanzwe na Leta. [21] Urukiko rurasanga ibikorwa byakozwe na Nyandwi François ku bukata butamwanditseho nta gaciro byagira kuko byakozwe mu buryo budakurikije amategeko kandi hari urubanza RC 00120/2021/TB/KAD rwaciwe n’urukiko rw’ibanze rwa Kaduha rwemeje ko Nyandwi François yarengeye Mukateganya Verene akubaka ku butaka butari ubwe bituma Nyandwi François ategekwa gukuraho izo nzu ze. Ibi byerekana ko Uzabakiriho Jean atasubizwa ikiguzi cy’ubutaka mu gihe urukiko rwemeje ko habayeho uburengere bwakozwe na Nyandwi François hakiyongeraho ko yubatse ku butaka butamwanditseho.

Kumenya niba hari indishyi zatangwa muri uru rubanza. [22] Nyandwi Fracois avuga ko yashowe mu manza atari yiteguye byatumye Nyandwi yiyambaza inkiko ahatakariza amafaranga atandukanye agizwe na 500.000 Frw y'igihembo cy'Avocat, ibihumbi 20.000 Frw yatanzwe mu rukiko rwisumbuye, ko hakiyongeraho na none andi ibihumbi 500.000 yishyuwe mu bujurire ku gihembo cy'avoka ndetse n'igarama rya 40.000 Frw ku rwego rw'ubujurire. Uregwa kandi akababa akwiye kubitangira indishyi zingana n'ibihumbi 300.000 Frw yo kumutesha igihe cye ndetse n'indishyi z'akababaro zingana na 500.000. [23] Uzabakiriho Jean yiregura avuga ko nta ndishyi nimwe agomba guha Nyandwi François kuko ibi byose byamubayeho niwe wabyiteye ajya kurengera akajya kubaka mu kw’abandi bakarinda bamusenyera. Asaba ko ahubwo urukiko ariwe rwagenera indishyi zihwanye n'ibihumbi magana atanu (500,000 frw) byo kumusiragiza mu nkiko. [24] Urukiko rurasanga Uzabakiriho Jean ariwe wahabwa indishyi kubera ko yashowe mu manza zitari ngombwa kuko amategeko agenga ubutaka ateganya ko ubugure bw’ubutaka bubera imbere ya noteri bityo akaba yamuha amafranga y’ikurikirana rubanza angana n’ibimbi mirongo itanu (50 000 frw). ICYEMEZO CY’URUKIKO

## Page 7

[25] Rwemeje ko ubujurire bwatanzwe na Nyandwi François nta shingiro bufite; [26] Rwemeje ko imikirize y’urubanza RC 00028/2022/TGI/NYBE rwaciwe n’urukiko rwisumbuye rwa Nyamagabe idahindutse uretse ko hiyongereyeho amafranga y’ikurikiranarubanza angana n’ibihumbi mirongo itanu (50 000 frw) Nyandwi François agomba guha Uzabakiriho Jean. [27] Rutegetse ko ingwate y’amagarama yatanzwe na Nyandwi François ihwanye n’ibyakozwe muri uru rubanza.