UBUSHINJACYAHA v. NYIRAMINANI

# UBUSHINJACYAHA v. NYIRAMINANI

- Source: Amategeko - Section: Decisions (Judgements) - Date: 2024-12-16 - Case/document no.: RPAA00106/2024/CA - Collection: Court of Appeal

## Text

## Page 1

UBUSHINJACYAHA v. NYIRAMINANI [Rwanda URUKIKO RW’UBUJURIRE – RPAA00106/2024/CA (Mukamurenzi, P.J.) 16 Ukuboza 2024] Amategeko agenga imanza nshinjabyaha – Igabanyagihano – Kugabanyirizwa igihano mu bujurire – Uregwa ntiyongera kugabanyirizwa igihano mu gihe mu rubanza rujuririrwa yagabanyirijwe ku buryo buhagije, agahanishwa igihano gihuje uburemere n’icyaha yakoze. Incamake y’ikibazo: Nyiraminani yafatanywe udupfunyika tw’urumogi 300, akorwaho iperereza rirangiye Ubushinjacyaha bwamuregeye Urukiko Rwisumbuye rwa Gasabo akurikiranyweho icyaha cyo gucuruza urumogi. Ubushinjacyaha bwamureze bumusabira guhamwa n’icyaha cyo gucuruza ibiyobyabwenge byo mu bwoko bw’urumogi, no guhanishwa igihano cyo gufungwa burundu n’ihazabu y’amafaranga miliyoni makumyabiri. Nyiraminani yaburanye ahakana icyaha ariko Urukiko rushingiye ku bimenyetso bitandukanye birimo kwemera icyaha mu bugenzacyaha, imvugo z’abatangabuhamya hamwe n’inyandikomvugo y’ifatira ry’urumogi yafatanwe yanashyizeho umukono, rumuhamya icyo cyaha ashinjwa maze rumuhanisha igihano cy’igifungo cy’imyaka makumyabiri n’itanu n’ihazabu ya miliyoni makumyabiri. Urukiko rwanategetse ko urumogi rwafatiriwe rutwikwa, amafaranga yafatiriwe (ayo bamusanganye ubwo yafatwagwa na Police) agashyirwa mu isanduku ya Leta. Nyiraminani yajuririye Urukiko Rukuru asaba kugabanyirizwa igihano n’ubwo yemeye icyaha mu gihe kiburanisha. Ubushinjacyaha bwo bwasabye ko ubujurire bwe butahabwa ishingiro kuko mu myanzuro ye ahakana icyaha yakoze ariko akakemera mu iburanishwa bityo, igihano yahawe kikagumaho. Urukiko Rukuru, rushingiye ku manza zaciwe mbere n’inkiko nkuru, rwaciye urubanza rwemeza ko Nyiraminani agabanyirijwe igihano kuko ari ubwa mbere akoze icyaha, rumuhanisha igihano cy’igifungo cy’imyaka cumi n’irindwi n’ihazabu ya miliyoni eshanu. Uregwa yajuririye urwo rubanza rwaciwe n’Urukiko Rukuru muri uru Rukiko rw’Ubujurire avuga ko atigeze agabanyirizwa ibihano uko bikwiye kandi hari abandi bahanishijwe igifungo cy’imyaka itanu, akaba asanga nta gufata ababuranyi kimwe kwabayeho. Bityo, akaba asaba uru Rukiko kumugabanyiriza igihano rushingiye ku mpamvu nyoroshyacyaha, agahabwa igihano gito kijyanye n’uburemere bw’icyaha yakoze kugirango asange abana be bato yasize, dore ko yishoye mu biyobyabwenge ashaka ikibatunga. Ubushinjacyaha buvuga ko ibyo Uregwa avuga nta shingiro bikwiye guhabwa, kuko yagabanyirijwe bihagije igihano yari yahawe ku rwego rwa mbere cyo gufungwa imyaka makumyabiri n’itanu, cyagabanyijwe n’Urukiko Rukuru agahanishwa igifungo cy’imyaka cumi n’irindwi n’ihazabu ya miliyoni eshanu. Icyo gihano yagihawe n’Urukiko rushingiye ku buremere bw’icyaha yakoze, bityo akaba atakongera kugabanyirizwa. Incamake y’icyemezo: Uregwa ntiyongera kugabanyirizwa igihano mu gihe mu rubanza rujuririrwa yagabanyirijwe ku buryo buhagije agahanishwa igihano gihuje uburemere n’icyaha yakoze. Ubujurire nta shingiro bufite. Amategeko yashingiweho: Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ingingo ya 2. Itegeko Nº 69/2019 ryo ku wa 08/11/1019 riteganya ibyaha n’ibihano muri rusange, ingingo ya 11. Itegeko Nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 49, 60 n’iya 263.

## Page 2

Imanza zifashishijwe: RPA0249/13/CS, Ubushinjacyaha na Nteziryayo Emmanuel, rwaciwe ku wa 25 Ugushyingo 2016. RPA0129/10/CS, Ubushinjacyaha na Mpitabakana, rwaciwe n’Urukiko rw’Ikirenga ku wa 07/03/2014. RPAA00470/2023/CA, Ubushinjacyaha na Nzabonimpa Alphonse rwaciwe n’Urukiko rw’Ubujurire ku wa 20/09/2024. RPAA00497/2022/CA, Ubushinjacyaha na Dukundane rwaciwe n’Urukiko rw’Ubujurire ku wa 27/6/2024. RPAA00535/2022/CA, Ubushinjacyaha na Rukundo Christian rwaciwe n’Urukiko rw’Ubujurire ku wa 20/10/2023. RPAA00224/2022/CA, Ubushinjacyaha na Rutayisire Aubin rwaciwe n’Urukiko rw’Ubujurire ku wa 24/02/2023. RPAARPAA 00099/2021/CA, Ubushinjacyaha na Mwenedata Jacques rwaciwe n’Urukiko rw’Ubujurire ku wa 23/09/2022. RPAA00194/2021/CA Ubushinjacyaha na Ndayishimiye Emmanuel alias Shema, rwaciwe n’Urukiko rw’Ubujurire ku wa 22/07/2022. RPAA00048/2020/CA, Ubushinjacyaha na Bimenyimana, rwaciwe n’Urukiko rw’Ubujurire ku wa 26/05/2022. Urubanza I. IMITERERE Y’URUBANZA [1] Abapolisi bakorera mu ishami rya Polisi y’igihugu rishinzwe kurwanya ibiyobyabwenge bahawe amakuru ko Nyiraminani Josée acuruza urumogi. Ku wa 06/06/2020 bajya kumushaka aho atuye mu Mudugudu wa Hanika, Akagari ka Nyamabuye, Umurenge wa Gatsata, mu Karere ka Gasabo, bamuhamagara kuri telefoni bigize abaguzi, bamubwira ko bashaka kugura udupfunyika 200 tw’urumogi, abemerera ko adufite, maze abasaba kujya ku bigega mu Gatsata akahabasanga. Yaje kubareba afite envelope irimo udupfunyika 300 tw’urumogi, bahita bamufata, bamubajije impamvu yazanye udupfunyika 300, ababwira ko utundi 100 ari utwo kugurisha abandi; banamusangaye amafaranga 68.000Frw. [2] Iperereza rirangiye, Ubushinjacyaha bwamuregeye Urukiko Rwisumbuye rwa Gasabo bumukurikiranyeho icyaha cyo gucuruza ibiyobyabwenge byo mu bwoko bw’urumogi, busaba ko kimuhama agahanishwa igifungo cya burundu n’ihazabu ya miliyoni makumyabiri (20), udupfunyika 300 tw'urumogi rwafatiriwe rugatwikwa n’amafaranga ibihumbi mirongo itandatu n’umunani (68.000Frw) agashyirwa mu isanduku ya Leta. [3] Nyiraminani Josée yaburanye ahakana icyaha, avuga ko iyo envelope bavuga ari iy’umukecuru bagombaga guhurira ku bigega amuzaniye umuti w’amahumane, ko bamaze guhura, hahise haza abagabo babiri bakababaza nyirayo abari bahari bose bagahakana ko batamuzi, barebyemo basangamo urumogi, we ababwira ko avuye ku kazi, kandi ko atazi uko urumogi rusa. [4] Mu rubanza RP00788/2020/TGI/GSBO rwaciwe ku wa 10/08/2020, Urukiko Rwisumbuye rwa Gasabo rwasanze hari ibimenyetso bihamya ko Nyiraminani Josée yakoze icyaha akurikiranyweho bikurikira: - kuba Nyiraminani Josée yaremeye icyaha mu bugenzacyaha; - imvugo z’abatangabuhamya bamufashe; - inyandiko mvugo y’ifatira ry’urumogi yafatanwe yanashyizeho umukono.

## Page 3

Urukiko rushingiye kuri ibyo bimenyetso, rwemeje ko Nyiraminani Josée ahamwa n’icyaha cyo gucuruza ibiyobyabwenge byo mu bwoko bw’urumogi, rumuhanisha igifungo cy’imyaka makumyabiri n’itanu (25) n’ihazabu ya miliyoni makumyabiri (20.000.000Frw). Urukiko rwanategetse ko urumogi rwafatiriwe rutwikwa, amafaranga yafatiriwe agashyirwa mu isanduku ya Leta. [5] Nyiraminani Josée ntiyishimiye imikirize y’urubanza, ajurira mu Rukiko Rukuru avuga ko yahamijwe icyaha cyo gucuruza ibiyobyawenge by’urumogi atakoze, ariko nyuma aza gutanga indi myanzuro y’inyongera yemera icyaha, asaba kugabanyirizwa igihano, akomeza kucyemera no mu iburanisha, anasaba kugabanyirizwa igihano. Uhagarariye Ubushinjacyaha yavuze ko ubujurire bwa Nyiraminani Josée butahabwa ishingiro, ko n’ubwo yemeye icyaha mu iburanisha, mu myanzuro ye itanga ubujurire yagihakanye, asaba ko igihano yahanishijwe kigumaho. [6] Mu rubanza RPA01009/2020/HC/KIG rwaciwe ku wa 23/01/2023, Urukiko Rukuru rushingiye ku murongo watanzwe n’Urukiko rw’Ubujurire mu rubanza RPAA00194/2021/CA rwaciwe ku wa 22/07/2022, haburana Ubushinjacyaha na Ndayishimiye Emmanuel alias Shema, ku kuba ari ubwa mbere Nyiraminani Josée akurikiranwe mu butabera, ndetse no ku biteganywa n’ingingo ya 2 y’Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, rwamugabanyirije igihano, rumuhanisha igifungo cy’imyaka 17 n’ihazabu ya miliyoni eshanu (5.000.000Frw). [7] Nyiraminani Josée yajuririye na none Urukiko rw’Ubujurire, urubanza ruhabwa RPAA00106/2024/CA, ruburanishwa mu ruhame ku itariki ya 02/12/2024, Nyiraminani Josée, yunganiwe na Me Fatikaramu Jean Pierre naho Ubushinjacyaha buhagarariwe na Bunyoye Grâce, Umushinjacyaha ku rwego rw’Igihugu. [8] Mu mwanzuro w’ubujurire ndetse no mu miburanire ye, Nyiraminani Josée n’umwunganira basaba ko yagabanyirizwa ibihano kubera ko atagabanyirijwe uko bikwiye, kuko yahanishijwe igifungo cy’imyaka 17 kandi hari abandi Urukiko Rukuru rwagabanyirije igihano rubahanisha igifungo cy’imyaka itanu (5), ko asanga hatarabayeho gufata ababuranyi kimwe, kuko Urukiko rutahaye agaciro imanza yagaragaje rwari gushingiraho nawe rukamugabanyiriza. Banasaba ko Urukiko rwashingira ku mpamvu nyoroshyacyaha akagabanyirizwa igihano, agahabwa igihano gito kijyanye n’uburemere bw’icyaha yakoze kugira ngo abashe gusanga abana bato yasize, kandi ko yishoye mu bucuruzi bw’iyobyabwenge ashaka ikibatunga. [9] Uhagarariye Ubushinjacyaha avuga ko ibyo Nyiraminani Josée asaba nta shingiro bikwiye guhabwa, kuko ku rwego rwa mbere yari yahanishijwe igifungo cy’imyaka 25, ku rwego rwa kabiri aragabanyirizwa ahanishwa igifungo cy’imyaka 17, ko rero atakongera kugabanyirizwa igihano kuko yagabanyirijwe bihagije, kandi igihano yahawe kikaba kijyanye n’uburemere bw’icyaha yakoze. [10] Impaka mu rubanza zigaragaza ko ikibazo kigomba gusuzumwa ari icyo kumenya niba Nyiraminani Josée yakongera kugabanyirizwa igihano. II. ISESENGURA RY’IKIBAZO KIGIZE URUBANZA 1. Kumenya niba Nyiraminani Josée yakongera kugabanyirizwa igihano [11] Nyiraminani Josée n’umwunganira bavuga ko icyo banenga urubanza rujuririrwa ari uko yaburanye yemera icyaha ariko agahabwa igihano cy’igifungo cy’imyaka 17 kiri hejuru y’igiteganywa n’itegeko riteganya ibyaha n’ibihano muri rusanga nk’uko ryavuguruwe kugeza ubu, runirengagiza imanza zaciwe n’Urukiko Rukuru yagaragaje mu mwanzuro w’inyongera zahanishije abaregwa igifungo cy’imyaka 5, kandi zari gushingirwaho nawe akagabanyirizwa igihano kugeza ku myaka 5.

## Page 4

[12] Basaba ko hashingirwa ku biteganwa n’ingingo ya 49 y’Itegeko Nº68/2018 ryo ku wa 30/08/2018 riteganya ibyaha n’ibihano muri rusange, akagabanyirizwa igihano hashingiwe ku mirongo yatanzwe n’uru Rukiko nk’uwatanzwe mu rubanza RPAA00224/2022/CA rwaciwe n’Urukiko rw’Ubujurire haburana Ubushinjacyaha na Rutayisire Aubin rwaciwe ku wa 24/02/2023, uyu akaba yaragabanyirijwe igihano kugera ku myaka 3 n’amezi 6 n’urubanza RPAA00535/2022/CA rwaciwe ku wa 20/10/2023 haburana Ubushinjacyaha na Rukundo Christian. ko nawe yagabanyirizwa igihano kuko yishoye mu icuruza ry’urumogi mu gihe cya Covid 19 agira ngo ashakishe ibitunga abana bato afite, ubu bakaba badafite kirera kuko bagiye bafatwa n’imiryango n’inshuti. [13] Uhagarariye Ubushinjacyaha avuga ko ku rwego rwa mbere Nyiraminani Josée yagabanyirijwe igihano, ahanishwa igifungo cy’imyaka 25, igihano cyongeye kugabanywa ku rwego rwa kabiri, ahanishwa igifungo cy’imyaka 17, ko rero harebwe umurongo watanzwe mu rubanza RPA0129/10/CS rwaciwe n’Urukiko rw’Ikirenga ku wa 07/03/2014, haburana Ubushinjacyaha na Mpitabakana, uvuga ko uregwa atongera kugabanyirizwa ibihano, iyo mu bujurire Urukiko rusanga yarabigabanyirijwe bihagije, harebwe uburemere bw’icyaha n’uburyo icyaha cyakozwemo, basanga nawe atakongera kugabanyirizwa igihano kuko yagabanyirijwe bihagije kandi igihano yahawe kikaba kijyanye n’uburemere bw’icyaha yakoze. [14] Akomeza avuga ko ku birebana n’imanza bavuga ko Urukiko Rukuru rutashingiyeho ngo rumugabanyirize igihano ahanishwe igifungo cy’imyaka 5, nta gaciro bikwiye guhabwa kuko izo manza zari zishingiye ku Itegeko ryavuyeho, kandi kuba umurongo ushingiye ku itegeko ryavuyeho utongera gukurikizwa, byatanzweho umurongo n’Urukiko rw’Ubujurire mu rubanza RPAA00048/2020/CA Bimenyimana Jean Paul, mu rubanza RPAA00387/2020/CA, haburana Rusanganwa Sylvestre n’Ubushinjacyaha ndetse no mu rubanza RPAA00006/2023/CA haburana ubushinjacyaha na Bahati Emmanuel, aho Urukiko rwagaragaje ko umurongo wari uriho udashobora gukurikizwa mu gihe itegeko wari ushingiyeho ryavuyeho. UKO URUKIKO RUBIBONA [15] Impaka zishingiye ku kumenya niba Nyirahabimana Josée yagabanyirizwa ibihano ngo kuko Urukiko Rukuru rutahaye agaciro imirongo yagaragaje yari gushingirwaho n’Urukiko rukamuhanisha igifungo cy’imyaka itanu (5). [16] Ingingo ya 263 igika cya 3 1o y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange yahinduwe n’ingingo ya 11 y’Itegeko Nº 69/2019 ryo ku wa 08/11/1019 iteganya ko ko uwakoze icyaha cyo kugurisha ibiyobyabwenge byo mu bwoko bw’urumogi ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000Frw) ariko atarenze miliyoni mirongo itatu (30.000.000 Frw) ku byerekeye ibiyobyabwenge bihambaye. [17] Ku byerekeye kugabanya igihano mu gihe hari impamvu nyoroshyacyaha, ingingo ya 2 y’Itegeko N° 59/2023 ryo ku wa 04/12/2023 rihindura ingingo ya 60 y’Itegeko N° 68/2018 ryo ku wa 30/08/2018 riteganya ibyaha n’ibihano muri rusange, iteganya ko iyo umucamanza yemeje impamvu nyoroshyacyaha, ashobora kugabanya igihano ku buryo bukurikira: (a) igifungo cya burundu gishobora kugabanywa ariko ntikijye munsi y’igihano cy’igifungo cy’imyaka 15; (…). (d) igihano cy’ihazabu gishobora kugabanywa kugeza kuri kimwe cya kane cy’igihano cy’ihazabu gito giteganyirijwe icyaha cyakozwe. [18] Ikibazo cyo kutongera kugabanyirizwa igihano mu bujurire iyo Urukiko rusanze cyaragabanyijwe ku buryo buhagije cyatanzweho umurongo n’Urukiko rw’Ikirenga mu rubanza RPA0249/13/CS rwaciwe ku wa 25 Ugushyingo 2016 haburana Ubushinjacyaha na Nteziryayo Emmanuel1. Muri urwo rubanza

1Reba igika cya 14 cy’ urwo rubanza.

## Page 5

Urukiko rw’Ikirenga rwasobanuye ko uregwa adakwiye kwemererwa kugabanyirizwa igihano mu gihe yagabanyirijwe igihano bihagije ku rwego rwa mbere agahabwa igihano gikwiranye n’uburemere bw’icyaha yakoze. [19] Ibyerekeye kudashingira ku mirongo yagiyeho mbere y’uko itegeko rihinduka, byatanzweho umurongo n’uru Rukiko mu rubanza RPAA00048/2020/CA haburana Ubushinjacyaha na Biminyimana Jean Paul2. Muri urwo rubanza Urukiko rw’Ubujurire rwasobanuye ko umurongo wari uriho udashobora gukurikizwa mu gihe itegeko wari ushingiyeho ryavuyeho cyangwa ryahinduwe. Uyu murongo wagendeweho mu manza zitandukanye zaciwe n’uru Rukiko, mu ziheruka harimo nk’Urubanza RPAA00470/2023/CA rwaciwe ku wa 20/09/2024 haburana Ubushinjacyaha na Nzabonimpa Alphonse3. [20] Nk’uko bigaragara mu gika cya 11, 12 n’icya 13, Urukiko Rukuru rwasanze mu myanzuro y’ubujurire Nyiraminani Josée yatanze mu bihe by’ubujurire yarahakanaga icyaha, rusanga rutagomba gusuzuma ibijyanye n’igabanyagihano yasabye mu myanzuro y’inyongera. Rwasobanuye ko n’ubwo impamvu ze z’ubujurire nta shingiro zifite, yagabanyirizwa igihano cy’igifungo cy’imyaka 25 n’ihazabu ya 20.000.000Frw, agahanishwa igihano ikijyanye n’uburemere bw’icyaha kuko ari ubwa mbere akurikiranywe mu butabera ariko hakanitabwa ku kuba yarafatanwe ingano nini y’urumogi boules 300. Rushingiye ku ngingo ya 2 y’Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 ryavuzwe, ruhanisha Nyiraminani Josée igifungo cy’imyaka 17 n’ihazabu ingana na 5.000.000Frw. [21] Urukiko rw’Ubujurire rusanga ibyo Nyiraminani Josée avuga ko Urukiko rwirengagije imanza yarugaragarije zahanishije abaregwa igifungo cy’imyaka 5 nta shingiro bifite, kuko, nk’uko Urukiko Rukuru rwabisobanuye, Nyiraminani Josée ajurira mu gihe giteganywa n’amategeko yahakanaga icyaha asaba kugirwa umwere, mu mwanzuro yatanze nyuma y’ibihe by’ubujurire, asaba kugabanyirizwa igihano, ndetse agaragaza n’imanza zashingirwaho. Ingingo yo kugabanyirizwa igihano ikaba itarasuzumwe n’Urukiko Rukuru rugendeye ku murongo wafashwe n’Urukiko rw’ubujurire mu rubanza RPAA00099/2021/CA rwaciwe ku wa 23/09/2022 haburana Ubushinjacyaha na Mwenedata Jacques y’uko ingingo iyo ariyo yose y’ubujurire itanzwe nyuma y’ibihe ntarengwa byo kujurira, uretse iyuzuza cyangwa isobanura iyatanzwe mu bihe byemewe byo kujurira itakirwa. [22] Urukiko rw’Ubujurire rusanga ibyo Nyiraminani Josée n’umwunganira basaba ko yagabanyirizwa igihano kugera ku gifungo cy’imyaka 5, nabyo nta shingiro bifite, kuko umurongo ugaragara mu rubanza RPAA00224/2022/CA rwaciwe n’Urukiko rw’Ubujurire ku wa 24/02/2023 haburana Ubushinjacyaha na Rutayisire Aubin rwahanishije uyu igifungo cy’imyaka 3 n’amezi 6 n’urubanza RPAA 00535/2022/CA rwaciwe ku wa 20/10/2023 haburana Ubushinjacyaha na Rukundo Christian, rwahanishije uyu igifungo cy’imyaka 5 bashingiraho babisaba, wari ushingiye ku ngingo ya 60 y’Itegeko N° 68/2018 ryo ku wa 30/08/2018 riteganya ibyaha n’ibihano muri rusange nk’uko ryahinduwe n’Itegeko Nº 69/2019 ryo ku wa 08/11/2019, uyu murongo ukaba warahinduwe n’ingingo ya 2 y’Itegeko N° 059/2023 ryo ku wa 04/12/2023, kandi nk’uko byasobanuwe mu rubanza RPAA00048/2020/CA rwaciwe ku wa 26/05/2022, haburana Ubushinjacyaha na Bimenyimana Jean Paul, uwo murongo ukaba udashobora gukurikizwa mu gihe itegeko wari ushingiyeho ryahinduwe. [23] Urukiko rw’Ubujurire runasanga ibyo avuga ko igihano cy’igifungo cy’imyaka 17 n’ihazabu ya 5.000.000Frw yahanishijwe kiri hejuru y’igiteganywa n’itegeko, nabyo nta shingiro kuko yagabanyirijwe, ahabwa igihano kiri mu mbibi z’igiteganywa n’itegeko harebwe ko icyaha yahamijwe gihanishwa igifungo cya burundu n’ihazabu itari munsi ya 20.000.000 ariko cyagabanywa nti kijye munsi y’igifungo

2Reba igika cyarwo cya 26 cy’urubanza RPAA00048/2020/CA rwaciwe n’Urukiko rw’Ubujurire ku wa 26/05/2022 haburana Ubushinjacyaha na Bimenyimana. 3Reba igika cya 20 cy’urwo rubanza

## Page 6

cy’imyaka 15 n’ihazabu ya 5.000.000 nk’uko biteganywa n’ ingingo ya 2 y’Itegeko N° 059/2023 ryo ku wa 04/12/2023 ryavuzwe haruguru. [24] Mu manza ziheruka gucibwa n’uru Rukiko zirimo abaregwa bakurikiranyweho ibijya gusa n’ibyo Nyiraminani Josée akurikiranyweho, bahanishijwe ibihano biri mu kigero kimwe n’ibyo yahanishijwe, nk’urubanza RPAA00497/2022/CA rwaciwe ku wa 27/6/2024 haburana Ubushinjacyaha na Dukundane James. Muri urwo rubanza Dukundane James yahanishijwe igihano cy’igifungo cy’imyaka 17 n’ihazabu ya 5.000.000Frw aho kuba igifungo cy’imyaka 25 n’ihazabu ya 20.001.000Frw kubera guhamwa n’icyaha cyo gutunda no gucuruza ibiyobyawenge byo mu bwoko bw’urumogi bingana n’inusu (½ kg) yafatanwe. [25] Urukiko rugasanga rero nta kosa riri mu rubanza rwaciwe n’Urukiko Rukuru rwahanishije Nyiraminani Josée igifungo cy’imyaka 17 n’ihazabu ya 5.000.000Frw kubera gufatanwa urumogi rungana n’udupfunyika 300 yari agiye kugurisha, kuko ibyo bihano bihura n’ibitangwa mu manza zaciwe n’uru Rukiko ku bantu bafatanwe ingano nini y’urumogi, akaba rero atakwemererwa kugabanyirizwa igihano kuko yagabanyirijwe bihagije, ahabwa igihano gihuje uburemere n’icyaha yakoze. Bityo urubanza no RPA01009/2020/HC/KIG, rwaciwe n’Urukiko Rukuru, ku wa 23/01/2023 rukaba rugumanye agaciro mu ngingo zarwo zose. III. ICYEMEZO CY’URUKIKO [26] Rwemeje ko ubujurire bwa Nyiramana Josée nta shingiro bufite. [27] Rwemeje ko urubanza RPA01009/2020/HC/KIG rwaciwe n’Urukiko Rukuru ku wa 23/01/2023 rudahindutse. [28] Rwemeje ko igihano cy’igifungo cy’imyaka cumi n’irindwi (17) n’ihazabu ya miliyoni eshanu (5.000.000) yahanishijwe mu rubanza rujuririrwa kidahindutse. [29] Ruvuze ko amafaranga y’amagarama y’urubanza aherera ku Isanduku ya Leta, kubera ko Nyiramana Josée afunze akaba asonewe kuyatanga.