NYIRINGANGO VS JALI TRANSPORT LTD

NYIRINGANGO VS JALI TRANSPORT LTD

- Source: Amategeko - Section: Decisions (Judgements) - Date: 2024-12-10 - Case/document no.: RS/INJUST/RSOC 00002/2023/CA - Collection: Court of Appeal

Text

Page 1

NYIRINGANGO VS JALI TRANSPORT LTD [Rwanda URUKIKO RW’UBUJURIRE – RS/INJUST/RSOC 00002/2023/CA (Nyirandabaruta, P.J.) 10 Ukuboza 2024] Amategeko yerekeye imiburanishirize y’imanza Mbonezamubano – kureka Urubanza – Iyo urega aretse urubanza uregwa akabimwimerera nta cyabuza Urukiko kwemeza uko kureka urubanza. Incamake y’ikibazo: Uru rubanza rwatangiye Nyiringango arega Jali Transport Ltd mu Rukiko Rwisumbuye rwa Nyarugenge asaba indishyi zijyanye, n’integuza, insimburakiruhuko atahawe, gusubizwa amafaranga yakaswe ku mushahara, gutangirwa imisanzu y’ubwiteganyirize bw’abakozi muri RSSB anasaba gusubizwa amafaranga y’ikurikiranarubanza n’ay’igihembo cy’avoka, kuko yirukanwe mu kazi yakoraga k’ubushoferi n’icyo kigo mu buryo bunyuranyije n’aamtegeko. Urukiko mu rubanza RSOC00141/2020/TGI/NYGE, rwemeje ko ikirego cya Nyiringango nta shingiro gifite; rwemeza ko Jali Transport Ltd itigeze imwirukana mu buryo bunyuranyije n’amategeko; rutegeka Nyiringango kwishyura Jali Transport Ltd amafaranga y’igihembo cya Avoka. Nyiringango yajuririye urwo rubanza mu Rukiko Rukuru, asaba ko rusuzuma ibimenyetso byirengagijwe kandi bigaragaza ko yirukanwe mu buryo bunyuranyije n’amategeko, gusuzuma icyemezo cyafashwe ku mafaranga yakaswe ku mushahara, kuba harirengagijwe ibisobanuro n’amategeko mu gufata icyemezo ku mafaranga y’ubwiteganyirize bwa pension no gusuzuma indishyi yaciwe z’igihembo cya

avoka. Jali Transport Ltd yireguye kuri ubwo bujujrire ivuga ko atirukanwe binyuranyije n’amategeko. Urukiko Rukuru mu rubanza RSOCA00221/2021/HC/KIG, rwemeje ko ubujurire bwa Nyiringango nta shingiro bufite, ko ubujurire bwuririye ku bundi bwa Jali Transport Ltd bufite ishingiro kuri bimwe, ko imikirize y’urubanza rwajuririwe idahindutse, uretse ku byerekeye amafaranga y’igihembo cya avoka agomba gutangwa na Nyiringango kuri uru rwego. Nyiringango ntiyishimiye imikirize y’urwo rubanza, yandikira Perezida w’Urukiko rw’Ubujurire amusaba ko urubanza RSOCA00221/2021/HC/KIG, rusubirishwamo ku mpamvu z’akarengane. Nyuma yo gusuzuma ubusabe bwe, raporo yashyikirijwe Perezida w’Urukiko rw’Ikirenga, maze mu cyemezo No 034/CJ/2023 yemeza ko urubanza RSOCA0221/2021/HC/KIG, rusubirwamo ku mpamvu z’akarengane, rwohererezwa Urukiko rw’Ubujurire ngo abe ari rwo ruruburanisha. Mu nama ntegurarubanza, Nyiringango ntiyitabye ikorwa hashingiwe ku myanzuro yatanze. Mu gushyiraho itariki y’iburanisha mu mizi, Umwanditsi w’Urukiko yahamagaye Nyiringango undi umusubiza ko yaretse urubanza. Uhagarariye Jali Transport Ltd yandikiye Urukiko muri IECMS, avuga ko kuva Nyiringango yaragaragaje ko atagifite inyungu mu rubanza yari yasubirishijemo ku mpamvu z'akarengane,bisobanuye ko yaje gusanga nta karengane yagize; ko niba yaretse ikirego bidasaba icyo babivugaho, ariko ko nubwo yaba yaretse urubanza nabo bumva Urukiko rwabyemeza kuko Nyiringango yemeje ibyo bakabaye nabo basaba Urukiko. Urukiko mu rubanza RS/INJUST/RSOC 00002/2023/CA rwemeje ko rwemeye kureka urubanza kwa Nyiringango kuko nuwo baburana yabimwemereye.

Page 2

Incamake y’icyemezo: Kureka urubanza ni uburenganzira bw’umuburanyi. Bityo, iyo urega aretse urubanza uregwa akabimwimerera nta cyabuza Urukiko kwemeza uko kureka urubanza. Amategeko yashingiweho: Itegeko No 22/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, Ingingo ya 123, igika cya 1 Nta manza zifashishijwe. Urubanza. I. IMITERERE Y’URUBANZA [1] Nyiringango Anastase wakoreraga Jali Transport Ltd ari umushoferi utwara imodoka zitwara abagenzi mu buryo bwa rusange (transport en commun) yirukanywe mu kazi, arega Jali Transport Ltd mu izina ry’Umuyobozi wayo mu Rukiko Rwisumbuye rwa Nyarugenge avuga ko yirukanwe mu kazi mu buryo bunyuranyije n’amategeko, asaba indishyi zijyanye, integuza, insimburakiruhuko atahawe, gusubizwa amafaranga yakaswe ku mushahara, gutangirwa imisanzu y’ubwiteganyirize bw’abakozi muri RSSB anasaba gusubizwa amafaranga y’ikurikiranarubanza n’ay’igihembo cy’avoka. [2] Urukiko Rwisumbuye rwa Nyarugenge rwaciye urubanza RSOC00141/2020/TGI/NYGE ku wa 2/7/2021, rwemeza ko ikirego cya Nyiringango Anastase nta shingiro gifite; rwemeza kandi ko Jali Transport Ltd mu izina ry’umuyobozi wayo itigeze imwirukana mu buryo bunyuranyije n’amategeko; rutegeka Nyiringango Anastase kwishyura Jali Transport Ltd amafaranga y’igihembo cy’aba Avoka ibihumbi maganatanu (500.000Frw) kuri buri wese, yose hamwe akaba

1.000.000Frw. [3] Nyiringango Anastase yarujuririye urwo rubanza mu Rukiko Rukuru, asaba ko rusuzuma ibimenyetso byirengagijwe kandi bigaragaza ko yirukanwe mu buryo bunyuranyije n’amategeko, gusuzuma icyemezo cyafashwe ku mafaranga yakaswe ku mushahara, kuba harirengagijwe ibisobanuro n’amategeko mu gufata icyemezo ku mafaranga y’ubwiteganyirize bwa pension no gusuzuma indishyi yaciwe z’igihembo cya avoka. Jali Transport Ltd yireguye kuri ubwo bujujrire ivuga ko atirukanwe binyuranyije n’amategeko. [4] Urukiko Rukuru rwaciye urubanza RSOCA00221/2021/HC/KIG ku wa 07/07/2022, rwemeza ko ubujurire bwa Nyiringango Anastase nta shingiro bufite, ko ubujurire bwuririye ku bundi bwa Jali Transport Ltd bufite ishingiro kuri bimwe, ko imikirize y’urubanza rwajuririwe idahindutse, uretse ku byerekeye amafaranga y’igihembo cya avoka, rutegeka Nyiringango Anastase guha Jali Transport Ltd amafaranga ibihumbi Magana ane 400.000Frw y’igihembo cya avoka, yiyongera ku kyo yagenewe ku rweo rwa mbere. [5] Nyiringango Anastase na none ntiyishimiye imikirize y’urubanza, yandikira Perezida w’Urukiko rw’Ubujurire amusaba ko urubanza RSOCA00221/2021/HC/KIG rwaciwe n’Urukiko Rukuru ku wa 07/07/2022, rusubirishwamo ku mpamvu z’akarengane. Nyuma yo gusuzuma ubusabe bwe, raporo yashyikirijwe Perezida w’Urukiko rw’Ikirenga, maze mu cyemezo no 034/CJ/2023 cyo ku wa 29/03/2023, Perezida w’Urukiko rw’Ikirenga yemeza ko urubanza RSOCA0221/2021/HC/KIG, rwaciwe n’Urukiko

Page 3

Rukuru ku wa 07/07/2022 rusubirwamo ku mpamvu z’akarengane, rwohererezwa Urukiko rw’Ubujurire ngo abe ari rwo ruruburanisha, muri urwo Rukiko ruhabwa RS/INJUST/RSOC 00002/2023/CA. [6] Nyiringango Anastase yashyikirije uru Rukiko umwanzuro w’urubanza, Jali Transport nayo itanga uwayo yiregura, batumizwa mu nama ntegurarubanza ku wa 21/06/2024, hitaba Jali transport Ltd ihagarariwe na Me Sebukonoke Innocent naho Nyiringango Anastase ntiyitaba, Umwanditsi w’Urukiko wayiyoboraga avugisha Me Mukagasana Clotilde watanze umwanzuro wa Nyiringango Anastase kuri telephone 0788609759, amubwira ko atabasha guhuza n’umukiriya we ( Nyiringango Anastase) kandi ataranamwishyura, akaba atakomeza dosiye kuko atazi niba akiyifitemo inyungu. Inama ntegurarubanza yabaye Nyiringango adahari atanahagarariwe, hashingirwa ku myanzuro y’impande zombi, isojwe iburanisha rishyirwa ku wa 07/10/2024 saa tatu za mu gitondo. [7] Mbere y’uko iyo tariki igera, ku wa 01/10/2024, Ubwanditsi bw’Urukiko bwamenyesheje ababuranyi binyuze muri IECMS ko urubanza rwabo rutakiburanishijwe ku wa 07/10/2024, ko indi tariki bazayimenyeshwa. Nyuma kuwa 18/11/2024,14 :36, nk’uko bigaragara muri IECMS Umwanditsi w’Urukiko yavugishije Nyiringango Anastase kuri tel.0788661482, amubaza niba uru rubanza ruramutse ruburanishijwe ku wa 02/12/2024 hari icyo byamubangamiraho, asubiza ko atagikeneye kuburana, ko iby'imanza

atakibirimo. [8] Tariki 20/11/2024, 11:36, Me Shema Gakuba Charles, uhagarariye Jali Transport Ltd yandikiye Urukiko muri IECMS, avuga ko kuva Nyiringango Anastase yaragaragaje ko atagifite inyungu mu rubanza yari yasubirishijemo ku mpamvu z'akarengane akaba yisubiyeho bisobanuye ko yaje gusanga nta karengane yagize; ko niba yaretse ikirego bidasaba icyo babivugaho, ariko ko nubwo yaba yaretse urubanza nabo bumva Urukiko rwabyemeza kuko Nyiringango Anastase yemeje ibyo bakabaye nabo basaba Urukiko, bityo bakaba bumva Urukiko rwabimwemerera. Asaba kandi Urukiko ko rwafata icyemezo bitabaye ngombwa ko bitabira iburanisha. [9] Urubanza rwahamagawe mu iburanisha ryo ku wa 10/12/2024, rusanga nta muburanyi witabye kandi barahamagawe byubahirije amategeko, hasuzumwa niba Nyiringango Anastase yakwemererwa kureka urubanza, icyemezo gifatirwa mu ntebe. II. ISESENGURA RY’IKIBAZO KIGIZE URUBANZA [10] Nyiringango Anastase yahamagawe n’Umwanditsi w’Urukiko ku wa 18/11/2024, saa munan n’iminota mirongo itatu n’itandatu (14 :36), amubaza niba hari icyo byamubangamiraho urubanza ruramutse ruburanishijwe ku wa 02/12/2024, amusubiza ko atagikeneye kuburana, ko iby'imanza atakibirimo. [11] Me Shema Gakuba Charles uburanira Jali Transport Ltd abibonye atyo nawe ku wa 09/12/2024 yandika muri IECMS avuga ko kuva Nyiringango Anastase yaravuze atagifite inyungu mu rubanza bisobanuye ko yaretse urubanza, asaba Urukiko ko rwabifataho icyemezo.

UKO URUKIKO RUBIBONA [12] Ingingo ya 123, igika cya 1, y’Itegeko No 22/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi nk’uko ryahinduwe kugeza ubu, igira iti:

Page 4

“Kureka urubanza ni uburenganzira umuburanyi afite bwo kuvuga ko aretse urubanza yari yaregeye, uwo yaregaga akabyemera.” [13] Urukiko rushingiye kuri iyo ngingo, rurasanga Nyiringango Anastase yaragaragaje ko yaretse urubanza, kureka urubanza akaba ari uburenganzira bw’umuburanyi, kandi nk’uko itegeko ribiteganya, Jali Transport Ltd ikaba ibimwemera, bityo Nyiringango Anastase akaba yemerewe kureka rubanza kuko atagikeneye kuburana. III. ICYEMEZO CY’URUKIKO [14] Rwemeje ko Nyiringango Anastase aretse urubanza RS/INJUST/RSOC00002/2023/CA rwasubirishagamo ku mpamvu z'akarengane urubanza RSOCA00221/2021/HC/KIG rwaciwe n’Urukiko Rukuru kuwa 07/07/2022, bivuze ko urubanza RSOCA00221/2021/HC/KIG rugumye uko rwaciwe; [15] Rwemeje ko Nyiringango Anastase asonewe amagarama y’urubanza.