NZAMURAMBAHO vs NZAMURAMBAHO

# NZAMURAMBAHO vs NZAMURAMBAHO

- Source: Amategeko - Section: Decisions (Judgements) - Date: 2023-11-17 - Case/document no.: RC 00006/2023/CA - Collection: Court of Appeal

## Text

## Page 1

NZAMURAMBAHO vs NZAMURAMBAHO [Rwanda URUKIKO RW’UBUJURIRE – RCA00024/2023/HC/RWG (Munyangeri, P.J.) 17 Ugushyingo 2023] Amategeko agenga imiburanishirize y’imanza Mbonezamubano – Kureka ikirego – Ikirego kihutirwa – Umuburanyi usaba kureka ikirego cyihutirwa uwo baburana akabyemera, Urukiko rurabyemeza ariko uwabisabye akishyura ibyo uwo baburana yatakaje mu gukurikirana icyo kirego. Incamake y’ikibazo: Uru rubanza rukomoka ku kirego kihutirwa gishamikiye ku rubanza RCAA00031/2020/CA & CMB RCAA 00032/2020/CA cyatanzwe nabo mu muryango wa nzamurambaho bahagarariwe na Mwiseneza batanze mu Rukiko rw’Ubujurire barega bamwe mu bavandimwe babo hamwe na BPR BANK RWANDA Plc, basaba guhagarika cyamunara yatangijwe ku mitungo ya New Finest Traders Ltd iri mu kibanza n˚ UPI: 1/02/11/04/2101 n’imashini z’uruganda rwayo. Abarega bamenyesheje Urukiko ko nyuma yo kubona ko cyamunara basabaga guhagarika mu kirego cyihutirwa, yarangije gukorwa, baretse ikirego. Abaregwa bavuga ko abarega bakwemererwa kureka ikirego ariko bakishyura amafaranga y’ikurikiranarubanza n’igihembo cya Avoka babatangishije. Incamake y’icyemezo: Umuburanyi usaba kureka ikirego cyihutirwa uwo baburana akabyemera, Urukiko rurabyemeza ariko uwabisabye akishyura ibyo uwo baburana yatakaje mu gukurikirana icyo kirego. Bityo aho urubanza rwaba rugeze hose, usaba kureka ikirego cyihutirwa kuko impavu yatumye agitanga itakiriho, umuburanyi we akabyemera, Urukiko rurabyemeza ariko akishyura ibyo uwo baburana yatakaje akurikirana urubanza. Kureka ikirego kuremewe. Nta mategeko yashingiweho. Imanza zifashishijwe: Urubanza RCOM00005/2023/CA, WILD URBAN INTERNATIONAL DEVELOPMENT Ltd vs ENTREPRISE MUHAMYANKAKA Venuste, rwaciwe n’Urukiko rw’Ubujurire ku wa 12/07/202 Urubanza

## Page 2

IMITERERE Y’URUBANZA [1] NZAMURAMBAHO Jules, NZAMURAMBAHO Julien, NZAMURAMBAHO Juliette, NZAMURAMBAHO Junine na NZAMURAMBAHO Julie uhagarariwe na MWISENEZA Marie Laetitia batanze ikirego cyihutirwa gishamikiye ku rubanza n˚ RCAA 00031/2020/CA & CMB RCAA 00032/2020/CA, basaba guhagarika cyamunara yatangijwe ku mitungo ya New Finest Traders Ltd iri mu kibanza n˚ UPI: 1/02/11/04/2101 n’imashini z’uruganda rwayo, bakaba barega NZAMURAMBAHO Antoinette Daniella, NZAMURAMBAHO Ginette na NZAMURAMBAHO Teta Ghislaine. [2] Iburanisha ry’urubanza ryashyizwe ku wa 01/11/2023, uwo munsi ntirwaburanishwa kubera ko umucamanza wagombaga kuburanisha yari yagize ibyago, ryimuriwa ku wa 07/11/2023 uwo munsi ababuranyi baritaba, abarega bahagarariwe na Me NGIRUMPETSE Jean Marie Vianney, NZAMURAMBAHO Antoinette Daniella, NZAMURAMBAHO Ginette na NZAMURAMBAHO Teta Ghislaine bahagarariwe na Me NKANIKA Alimasi, BPR BANK RWANDA Plc ihagarariwe na Me MUGEMANYI Vedaste. [3] Uhagarariye abarega yamenyesheje Urukiko ko nyuma yo kubona ko cyamunara basabaga guhagarika yarangije gukorwa, abo ahagarariye baretse ikirego. Uhagarariye NZAMURAMBAHO Antoinette Daniella, NZAMURAMBAHO Ginette na NZAMURAMBAHO Teta Ghislaine n’uhagarariye BPR BANK RWANDA Plc bavuga ko abarega bakwemererwa kureka ikirego ariko bakishyura amafaranga y’ikurikiranarubanza n’igihembo cya Avoka babatangishije. [4] Nyuma y’izo mpaka, Urukiko rurasanga hagomba gusuzumwa ibibazo bikurikira: kumenya niba NZAMURAMBAHO Jules, NZAMURAMBAHO Julien, NZAMURAMBAHO Juliette, NZAMURAMBAHO Junine na NZAMURAMBAHO Julie uhagarariwe na MWISENEZA Marie Laetitia bakwemerera kureka ikirego kumenya niba amafaranga y’ikurikiranarubanza n’igihembo cya Avoka ababuranyi basaba afite ishingiro

## Page 3

II. ISESENGURA RY’IBIBAZO BIGIZE URUBANZA 1.Kumenya niba NZAMURAMBAHO Jules, NZAMURAMBAHO Julien, NZAMURAMBAHO Juliette, NZAMURAMBAHO Junine na NZAMURAMBAHO Julie uhagarariwe na MWISENEZA Marie Laetitia bakwemererwa kureka ikirego [5] Uhagarariye NZAMURAMBAHO Jules, NZAMURAMBAHO Julien, NZAMURAMBAHO Juliette, NZAMURAMBAHO Junine na NZAMURAMBAHO Julie uhagarariwe na MWISENEZA Marie Laetitia avuga ko abo ahagarariye baretse ikirego cyihutirwa bari batanze kubera ko icyo cyari gishingiyeho kitagihari. [6] Uhagarariye NZAMURAMBAHO Antoinette Daniella, NZAMURAMBAHO Ginette na NZAMURAMBAHO Teta Ghislaine n’uhagarariye BPR BANK RWANDA Plc bavuga ko ibyo abarega basabye babyemererwa. Uko Urukiko rubibona [7] Ibyerekeye kureka ikirego byafashweho umurongo n’uru Rukiko mu rubanza n˚ RCOM 00005/2023/CA rwaciwe n’Urukiko rw’Ubujurire ku wa 12/07/2023 haburana WILD URBAN INTERNATIONAL DEVELOPMENT Ltd na ENTREPRISE MUHAMYANKAKA Venuste, muri urwo rubanza, WILD URBAN INTERNATONAL DEVELOPMENT Ltd yari yareze isaba guhagarika cyamunara, ku munsi w’iburanisha ireka ikirego cyihutirwa yari yatanze ivuga ko cyamunara yarangije gukorwa. Muri uru rubanza naho urega yahisemo kureka ikirego cyihutirwa yari yatanze, mu mpamvu zabimuteye hakaba harimo iy’uko cyamunara yashakaga ko ihagarikwa yarangije gukorwa. [8] Kubera izo mpamvu, Urukiko rurasanga NZAMURAMBAHO Jules, NZAMURAMBAHO Julien, NZAMURAMBAHO Juliette, NZAMURAMBAHO Junine na NZAMURAMBAHO Julie uhagarariwe na MWISENEZA Marie Laetitia bagomba kwemererwa kureka ikirego cyihutirwa bari batanze mu rubanza n˚ RC 00006/2023/CA. 2.Kumenya niba amafaranga y’ikurikiranarubanza n’igihembo cya Avoka ababuranyi basaba afite ishingiro

## Page 4

[9] Uhagarariye NZAMURAMBAHO Antoinette Daniella, NZAMURAMBAHO Ginette na NZAMURAMBAHO Teta Ghislaine avuga ko abo ahagarariye basaba Urukiko gutegeka abarega kubishyura amafaranga miliyoni eshatu (3.000.000 Frw) y’igihembo cya Avoka n’amafaranga miliyoni imwe (1.000.000 Frw) y’ikurikiranarubanza. [10] Uhagarariye BPR BANK RWANDA Plc asaba Urukiko gutegeka abarega kuyishyura amafaranga miliyoni ebyiri (2.000.000 Frw) y’igihembo cya Avoka n’amafaranga ibihumbi magana atanu (500.000 Frw) y’ikurikiranarubanza. [11] Uhagarariye abarega avuga ko badakwiye gutegekwa kwishyura abaregwa amafaranga y’ibyo batakaje ku rubanza kubera ko mu gihe batangaga iki kirego cyihutirwa impamvu yacyo yari ihari, ariko urubanza ntirwahita ruburanishwa ku mpamvu zitabaturutseho, bituma impamvu yacyo iba itagihari, bakaba basanga nta ruhare babigizemo. Uko Urukiko rubibona [12] Ibyerekeye gutanga amafaranga y’ibyagiye ku rubanza mu gihe urega aretse ikirego byafashweho umurongo n’uru Rukiko mu rubanza n˚ RCOM 00005/2023/CA rwaciwe n’Urukiko rw’Ubujurire ku wa 12/07/2023 haburana WILD URBAN INTERNATIONAL DEVELOPMENT Ltd na ENTREPRISE MUHAMYANKAKA Venuste, muri urwo rubanza, WILD URBAN INTERNATONAL DEVELOPMENT Ltd yari yareze isaba guhagarika cyamunara, ku munsi w’iburanisha ireka ikirego cyihutirwa yari yatanze ivuga ko cyamunara yarangije gukorwa, yemererwa kureka ikirego ariko itegekwa kwishyura uwo yari yareze amafaranga y’ikurikiranarubanza n’igihembo cya Avoka. [13] Muri uru rubanza naho abarega bahisemo kureka ikirego cyihutirwa bari batanze ariko abaregwa basaba ko babishyura amafaranga y’ibyagiye ku rubanza.

## Page 5

[14] Kuba abarega baretse ikirego ubwabyo kandi bazi neza ko abarezwe hari ibyo batakaje bakurikirana uru rubanza, Urukiko rurasanga bagomba kubishyura amafaranga y’ibyo bakoresheje agenwe mu bushishozi bwarwo kubera ko ayo basabye ari menshi cyane kandi urubanza rugarukiye hafi, mu bushishozi bwarwo rero, rukaba rugeneye NZAMURAMBAHO Antoinette Daniella, NZAMURAMBAHO Ginette na NZAMURAMBAHO Teta Ghislaine amafaranga ibihumbi magana atanu (500.000 Frw) akubiyemo ay’ikurikiranarubanza n’igihembo cya Avoka, BPR BANK RWANDA Plc na yo ikaba igenewe amafaranga ibihumbi magana atanu (500.000 Frw) akubiyemo ay’ikurikiranarubanza n’igihembo ya Avoka. [15] Ku byerekeranye n’ibyo uhagarariye abarega avuga ko kuba nta ruhare bagize ngo ikirego cyihutirwa ntikiburanishwe ku gihe kugeze ubwo impamvu yacyo iba itagihari badakwiye gutanga amafaranga y’ibyagiye ku rubanza, Urukiko rurasanga kutayatanga kwaba ari ukuzana mu rubanza amarangamutima adafite icyo ashingiyeho mu rwego rw’amategeko kubera ko n’iyo uru rubanza ruba rwaraburanishijwe cyamunara itarakorwa, nta kigaragaza ko byanze bikunze ikirego cyatanzwe cyari guhabwa ishingiro. III. ICYEMEZO CY’URUKIKO [16] Rwemeje ukureka ikirego kwakozwe na NZAMURAMBAHO Jules, NZAMURAMBAHO Julien, NZAMURAMBAHO Juliette, NZAMURAMBAHO Junine na NZAMURAMBAHO Julie uhagarariwe na MWISENEZA Marie Laetitia. [17] Rutegetse NZAMURAMBAHO Jules, NZAMURAMBAHO Julien, NZAMURAMBAHO Juliette, NZAMURAMBAHO Junine na NZAMURAMBAHO Julie uhagarariwe na MWISENEZA Marie Laetitia gufatanya guha NZAMURAMBAHO Antoinette Daniella, NZAMURAMBAHO Ginette na NZAMURAMBAHO Teta Ghislaine amafarangaibihumbi magana atanu (500.000 Frw) akubiyemo ay’ikurikiranarubanza n’igihembo cya Avoka. [18] Rutegetse NZAMURAMBAHO Jules, NZAMURAMBAHO Julien, NZAMURAMBAHO Juliette, NZAMURAMBAHO Junine na NZAMURAMBAHO Julie uhagarariwe na MWISENEZA Marie Laetitia gufatanya guha BPR BANK RWANDA Plc amafaranga ibihumbi magana atanu (500.000 Frw) akubiyemo ay’ikurikiranarubanza n’igihembo cya Avoka.

## Page 6

[19] Ruvuze ko amafaranga y’ingwate y’amagarama yatanzwe na NZAMURAMBAHO Jules, NZAMURAMBAHO Julien, NZAMURAMBAHO Juliette, NZAMURAMBAHO Junine na NZAMURAMBAHO Julie uhagarariwe na MWISENEZA Marie Laetitia barega, ahwanye n’ibyakozwe mu rubanza.