PRO WATER RWANDA PLC v. MUNYABUHORO N’ABANDI

# PRO WATER RWANDA PLC v. MUNYABUHORO N’ABANDI

- Source: Amategeko - Section: Decisions (Judgements) - Date: 2025-05-23 - Case/document no.: RS/INJUST/RCOM 00009/2024/CA - Collection: Court of Appeal

## Text

## Page 1

PRO WATER RWANDA PLC v. MUNYABUHORO N’ABANDI [Rwanda URUKIKO RW’UBUJURIRE – RS/INJUST/RCOM 00009/2024/CA (Munyangeri, P.J.) 23 Gicurasi 2025] Amategeko agenga amasezerano – Inshingano zikomoka ku masezerano – Abagiranye amasezerano mu buryo bukurikije amategeko bagomba kuyubahiriza nta buriganya, naho uvuga ko atagifite inshingano zo kubahiriza ibiyakubiyemo akagaragaza icyazimukuyeho. Amategeko agenga imanza zasabiwe gusubirwamo ku mpamvu z’akarengane – Iyo Urukiko rubonye akarengane mu rubanza rwasabiwe gusubirwamo ku mpamvu z’akarengane, rutegeka ko ibyishyuwe harangizwa urwo rubanza rwasabiwe gusubirwamo ku mpamvu z’akarengane, bisubizwa nyirukubyishyura. Incamake y’ikibazo: Uru rubanza rwatangiriye mu Rukiko rw’Ubucuruzi, PRO WATER RWANDA Plc irega Munyamubuhoro n’umushinga RAB/SAIP irusaba kubategeka gufatanya kuyishyura amafaranga angana na miliyoni umunani n’ibihumbi magana ane (8,400,000 Frw) yakoresheje ku nyubako, inyungu zayo zingana n’ibihumbi magana arindwi na cumi na bine (714,000 Frw) zibariye ku gipimo cy’ibitsa cya 8.5%, amafaranga angana na miliyoni ebyiri (2,000,000 Frw) y’indishyi z’akababaro zo gushorwa mu manza ku maherere, ay’igihembo cya Avoka angana na miliyoni imwe (1,000,000 Frw),amafaranga ibihumbi magana atanu (500,000 Frw) y’ikurikiranarubanza no kuyisubiza amafaranga ibihumbi makumyabiri (20,000 Frw) y’ingwate y’amagarama. Ibi isaba ikaba ibikomora ku masezerano y’inkunga Munyabuhoro yari yaragiranye n’umushinga witwa SAIP/RAB ukorera mu Kigo gishizwe Iterambere ry’Ubuhinzi n’Ubworozi mu Rwanda (RAB), yo kumwubakira inyubako izakoreshwa mu mirimo y’ubuhinzi yitwa ‘’Greenhouse’’, ayo masezerano akaba yarateganyaga ko rwiyemezamirimo watsindiye isoko ryo kubaka Greenhouse ari GREEN HOUSE RWANDA Ltd, ariko we (Munyabuhoro) akaba yarishakiye Rwiyemezamirimo wo kumwubakira ariwe PRO WATER RWANDA Plc. Urukiko rw’Ubucuruzi rwaciye urubanza rwemeza ko ikirego PRO WATER RWANDA Ltd yareze umushinga SAIP/RAB yakireze udafite ububasha bwo kuregwa ndetse nta n’inyungu yemewe n’amategeko ifite yo kugitanga; ikirego PRO WATER RWANDA Ltd yareze umushinga SAIP/RAB cyatanzwe binyuranyije n’amategeko, kikaba kitakiriwe, ko Munyabuhoro atubahirije amasezerano yagiranye na PRO WATER RWANDA Plc, rumutegeka kuyishyura 8,400,000 Frw y’imirimo yo kumwubakira greenhouse, inyungu, n’indishyi zitandukanye. Munyabuhoro yajuririye mu Rukiko Rukuru rw’Ubucuruzi avuga ko anenga Urukiko rw’Ubucuruzi kuba rwarirengagije ko PRO WATER RWANDA Ltd mu kujya kubaka greenhouse, yabanje kubyumvikanaho na Green House Rwanda Ltd; uruhare rwe yarwishyuye Green House Rwanda Ltd yizeye ko izishyuza amafaranga asigaye ku mushinga SAIP/RAB yamuteyeho inkunga itazi ko Green House Rwanda Ltd nayo yahaye “sous traitance” PRO WATER RWANDA Plc, ndetse asaba urwo Rukiko kugobokesha RAB ndetse na Green House Rwanda Ltd. Urukiko Rukuru rw’Ubucuruzi rwaciye urubanza rwemeza ko ubujurire bufite ishingiro, ko Munyabuhoro atari we ugomba kuryozwa ubwishyu bwa greenhouse yubakiwe, ko ubwo bwishyu bwagombaga gusabwa umushinga wamuteye inkunga witwa SAIP/RAB, ko urubanza rwaciwe

## Page 2

n’Urukiko rw’Ubucuruzi ruhindutse, ko PRO WATER RWANDA Plc yishyura indishyi zingana na 500 000 Frw. PRO WATER RWANDA Plc yandikiye Perezida w’Urukiko rw’Ubujurire asaba gusubirishamo urwo rubanza ku mpamvu z’akarengane, na we abikorera raporo, yandikira Perezida w’Urukiko rw’Ikirenga asaba ko urwo rubanz rusubirwamo ku mpamvu z’akarengane, yemeza ko rusubirwamo, rwohererezwa Urukiko rw’Ubujurire kugirango ruruburanishe. Mu rubanza rusubirwamo ku mpamvu z’akarengane, PRO WATER RWANDA Plc mu miburanire yayo ivuga ko akarengane gashingiye ku kuba Urukiko Rukuru rw’Ubucuruzi rwarirengagije ibikubiye mu masezerano n’uruhande rutayubahirije, ko yagiranye na Munyabuhoro amasezerano yo kumwubakira green house ku mafaranga 8.400 000 Frw ariko akaba atubahirije ayo masezerano ndetse Urukiko Rukuru rw’Ubucuruzi rukaba rwaremeje ko atari Munyabuhoro wari kuregwa ahubwo hari kuregwa RAB, asaba kugenerwa amafaranga atandukanye. Ku ruhande rw’abaregwa, Munyabuhoro yireguye avugako Urukiko rwaciye urubanza rusubirwamo ku mpamvu rwasesenguye neza ibimenyetso byose byatanzwe n’ababuranyi, avuga ko indishyi urega asaba atazihabwa ahubwo ariwe wazigenerwa. Yongeraho kandi ko PRO WATER RWANDA Plc yakwishyuza GREEN HOUSE RWANDA Ltd kuko yakunze kuvuga ko ariyo yayihaye akazi ko kugemura no kumwubakira Greenhouse RAB ivuga ko hakurikijwe imiterere y’amasezerano y’inkunga, ubwishyu bugenewe GREEN HOUSE RWANDA Ltd, ko iyi sosiyete ibaye yarakoresheje PRO WATER RWANDA Plc byaba byarakozwe mu buryo bunyuranyije n’amategeko, ko kandi amasezerano akwiye guhabwa agaciro ari ayabaye hagati ya Munyabuhoro na GREEN HOUSE RWANDA Ltd kuko yabereye n’imbere ya Noteri. GREEN HOUSE RWANDA Ltd nayo yagobokeshejwe, yo ivuga ko yagiranye na PRO WATER RWANDA Plc amasezerano yo kubaka greenhouse yagombaga kubakira Munyabuhoro kandi ko yayishyuye cash, ko rero andi masezerano yaba ifitanye na Munyabuhoro itayazi. Ivugako ko yishyuye gusa itabasha kubona ikimenyetso cy’ubwishyu Incamake y’icyemezo: 1. Abagiranye amasezerano mu buryo bukurikije amategeko bagomba kuyubahiriza nta buriganya, naho uvuga ko atagifite inshingano zo kubahiriza ibiyakubiyemo akagaragaza icyazimukuyeho. 2. Iyo Urukiko rubonye akarengane mu rubanza rwasabiwe gusubirwamo ku mpamvu z’akarengane, rutegeka ko ibyishyuwe harangizwa urwo rubanza rwasabiwe gusubirwamo ku mpamvu z’akarengane, bisubizwa nyirukubyishyura. Ikirego gifite ishingiro. Amategeko yashingiweho: Itegeko N˚ 45/2011 ryo ku wa 25/11/2011 rigenga amasezerano, Ingingo ya 64, Itegeko N˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, Ingingo ya 111 Imanza zifashishijwe:

## Page 3

RS/INJUST/RC 00011/2022/CA; Me Nsabimana Jean Damascēne vs Musabyimana Martin n’abandi rwaciwe n’Urukiko rw’Ubujurire ku wa 29/09/2023. Urubanza I. IMITERERE Y’URUBANZA [1] Munyabuhoro Jean Bosco yagiranye amasezerano y’inkunga n’umushinga witwa SAIP/RAB ukorera mu Kigo gishizwe Iterambere ry’Ubuhinzi n’Ubworozi mu Rwanda (RAB), yo kumwubakira inyubako izakoreshwa mu mirimo y’ubuhinzi yitwa ‘’Greenhouse’’, maze ashyiraho rwiyemezamirimo wo kumwubakira iyo nyubako witwa PRO WATER Ltd ubu yahindutse PRO WATER RWANDA Plc. MUNYABUHORO Jean Bosco avuga ko imirimo yo kubaka irangiye yandikiye umushinga RAB/SAIP awusaba kwishyura PRO WATER RWANDA Plc ariko ukanga kuyishyura ngo kuko mu masezerano y’inkunga impande zombi zagiranye zumvikanye kuri rwiyemezamirimo watsindiye isoko ryo kuzamwubakira iyo greenhouse witwa Green House Rwanda Ltd. [2] PRO WATER RWANDA Plc ibonye ko MUNYABUHORO Jean Bosco yananiwe kuyishyura, yamureze hamwe n’umushinga RAB/SAIP mu Rukiko rw’Ubucuruzi, irusaba kubategeka gufatanya kuyishyura amafaranga angana na miliyoni umunani n’ibihumbi magana ane (8,400,000 Frw) yakoresheje ku nyubako, inyungu zayo zingana n’ibihumbi magana arindwi na cumi na bine (714,000 Frw) zibariye ku gipimo cy’ibitsa cya 8.5%, amafaranga angana na miliyoni ebyiri (2,000,000 Frw) y’indishyi z’akababaro zo gushorwa mu manza ku maherere, ay’igihembo cya Avoka angana na miliyoni imwe (1,000,000 Frw),amafaranga ibihumbi magana atanu (500,000 Frw) y’ikurikiranarubanza no kuyisubiza amafaranga ibihumbi makumyabiri (20,000 Frw) y’ingwate y’amagarama. [3] Mu rubanza RCOM 01523/2022/TC rwaciwe n’Urukiko rw’Ubucuruzi ku wa 26/05/2023, urwo Rukiko rushingiye ku ngingo ya 3, iya 83 (4), iya 111 z’itegeko N˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ku ngingo ya 64, iya 137 (4˚) n’iya 144 z’itegeko N˚ 45/2011 ryo ku wa 25/11/2011 rigenga amasezerano, rwemeje ko: - ikirego PRO WATER RWANDA Ltd yareze umushinga SAIP/RAB yakireze udafite ububasha bwo kuregwa ndetse nta n’inyungu yemewe n’amategeko ifite yo kugitanga; - ikirego PRO WATER RWANDA Ltd yareze umushinga SAIP/RAB cyatanzwe binyuranyije n’amategeko, kikaba kitakiriwe; - MUNYABUHORO Jean Bosco atubahirije amasezerano yagiranye na PRO WATER RWANDA Ltd ku wa 11/01/2021 yo kumwubakira greenhouse nawe akayishyura amafaranga miliyoni umunani n’ibihumbi magana ane (8,400,000 Frw) kuri konti 4004200200823 iri muri Equity Bank/Nyarugenge; - MUNYABUHORO Jean Bosco yishyura PRO WATER RWANDA Ltd amafaranga miliyoni umunani n’ibihumbi magana ane (8,400,000 Frw) y’imirimo yo kumwubakira greenhouse, kumuha inyungu z’ayo mafaranga zingana n’ibihumbi magana arindwi na

## Page 4

cumi na bine (714,000 Frw), igihembo cya Avoka kingana n’amafaranga miliyoni imwe (1,000,000 Frw), amafaranga ibihumbi magana abiri (200,000 Frw) y’ikurikiranarubanza, n’amafaranga ibihumbi makumyabiri (20,000 Frw) y’ingwate y’amagarama, yose hamwe akaba amafaranga miliyoni icumi n’ibihumbi magana atatu na mirongo itatu na bine (10,334,000 Frw). [4] MUNYABUHORO Jean Bosco yajuririye urwo rubanza mu Rukiko Rukuru rw’Ubucuruzi, anenga Urukiko rw’Ubucuruzi kuba: - rwarirengagije ko PRO WATER RWANDA Ltd mu kujya kubaka greenhouse, yabanje kubyumvikanaho na Geen House Rwanda Ltd; - uruhare rwe yarwishyuye Green House Rwanda Ltd yizeye ko izishyuza amafaranga asigaye ku mushinga SAIP/RAB yamuteyeho inkunga itazi ko Green House Rwanda Ltd nayo yahaye “sous traitance” PRO WATER RWANDA Plc. [5] MUNYABUHORO Jean Bosco yasabye ko RWANDA AGRICULTURAL BOARD (RAB) igobokeshwa mu rubanza kugira ngo isobanure icyo yashingiyeho yishyura Green House Rwanda Ltd, ngo kubera ko ari yo yari ifite amafaranga yo kubaka greenhouse kandi ko impapuro zishyuza zatanzwe na PRO WATER RWANDA Plc ariko ntiyishyurwe. Yasabye kandi ko Green House Rwanda Ltd nayo ihatirwa kugoboka mu rubanza kugira ngo nibigaragara ko yishyuwe kandi itaragombaga kwishyurwa, izasabwe gusubiza amafaranga yishyuwe, asubizwe ugomba kwishyurwa. Yasabye kandi Urukiko gusuzuma ukwiye kwishyurwa agaciro k’imirimo yo kubaka greenhouse hagati ya PRO WATER RWANDA Plc na Green House Rwanda Ltd, kubera ko umurimo umwe utakwishyurwa inshuro ebyiri, ngo icyo kibazo akaba ari cyo urukiko rwasuzumye hamwe n’ikirebana n’indishyi ababuranyi basabye. [6] GREEN HOUSE RWANDA Ltd yireguye ivuga ko yatsindiye isoko ryo kubakira MUNYABUHORO Jean Bosco ″greenhouse,” ikayigura muri PRO WATER RWANDA Plc, kandi ko kuyigura byagombaga kujyana no kuyubaka, ikabikora ndetse ikishyurwa, bityo ko kuba Urukiko rw’Ubucuruzi rwarategetse ko ntacyo igomba kubazwa bifite ishingiro. [7] PRO WATER RWANDA Plc yireguye ivuga ko icyemezo Urukiko rw’Ubucuruzi rwafashe mu rubanza RCOM 01523/2022/TC nta nenge gifite, bityo ko kigomba kugumaho, ngo kuko MUNYABUHORO Jean Bosco adahakana amasezerano y’ubwubatsi bwa greenhouse bagiranye, aho impande zombi zumvikanye imirimo igomba gukorwa ikayikora, yarangira bakayimurikira umuterankunga we SAIP/RAB na we akabishima, ariko hakishyurwa utarayigizemo uruhare, kandi nta kimenyetso cyerekana ko uyu yari afite aho ahuriye n'uwakoze iyo mirimo. Yasoje isaba indishyi. [8] RWANDA AGRICULTURAL BOARD (RAB) yireguye ivuga ko nta bujurire bwatanzwe ku cyemezo cy'Urukiko mu rubanza RCOM 01523/2022/TC cyo kutakira ikirego PRO WATER RWANDA Plc yari yareze umushinga SAIP ukorera muri RAB, kandi ko icyo cyemezo cyabaye itegeko, ku buryo uretse kugaragaza ko gihari no gusaba ko cyubahirizwa, nta kindi uwo mushinga cyangwa RAB bavuga ku bibazo bisuzumwa mu rubanza RCOMA 00331/2023/HCC, kandi ko idakwiye gufatwa nk’igobokeshwa kuko yari umuburanyi mu rubanza RCOM 01523/2022/TC rwajuririwe.

## Page 5

[9] Mu rubanza RCOMA 00331/2023/HCC rwaciwe n’Urukiko Rukuru rw’Ubucuruzi ku wa 20/06/2024, urwo Rukiko rushingiye ku ngingo ya 65 y’itegeko N˚ 45/2011 ryo ku wa 25/11/2011 rigenga amasezerano, rwemeje ko: - ubujurire bwa MUNYABUHORO Jean Bosco, bufite ishingiro; - Munyabuhoro Jean Bosco atari we ugomba kuryozwa ubwishyu bwa greenhouse yubakiwe, ko ubwo bwishyu bwagombaga gusabwa umushinga wamuteye inkunga witwa SAIP/RAB; - urubanza RCOM 01523/2022/TC rwaciwe n’Urukiko rw’Ubucuruzi ku wa 26/05/2023 ruteshwa agaciro ku bireba Munyabuhoro Jean Bosco; - PRO WATER RWANDA Plc iha Munyabuhoro Jean Bosco amafaranga ibihumbi magana atanu (500,000 Frw) akubiyemo indishyi z’ibyo yatanze kuri urwo rubanza, no kumusubiza igarama yishyuye atanga ikirego. [10] PRO WATER RWANDA Plc yandikiye Perezida w’Urukiko rw’Ubujurire isaba ko urubanza RCOMA 00331/2023/HCC rwaciwe n’Urukiko Rukuru rw’Ubucuruzi ku wa 20/06/2024 rusubirishwamo ku mpamvu z’akarengane, uyu abikorera raporo Perezida w’Urukiko rw’Ikirenga, maze mu cyemezo n˚ 244/CJ/2024 cyo ku wa 19/11/2024, yemeza ko rusubirwamo ku mpamvu z’akarengane, rukazaburanishwa n’Urukiko rw’Ubujurire. Urwo rubanza rwanditswe kuri RS/INJUST/RCOM 00008//2024/CA, maze nyuma y’imihango ntegurarubanza yose, hemezwa ko ruzaburanishwa ku wa 03/03/2025. [11] Uwo munsi ababuranyi bose baritabye, PRO WATER RWANDA Plc ihagarariwe na Me MUTABAZI Jackson, MUNYABUHORO Jean Bosco yunganiwe na Me NYIRABASINGA Hélēne, RWANDA AGRICULTURAL BOARD ihagarariwe na Me HABUMUREMYI Prosper, Green House Rwanda Ltd ihagarariwe na Me NKUBITO Aimable. [12] Mu myanzuro no mu miburanire, uhagarariye PRO WATER RWANDA Ltd yavuze ko akarengane gashingiye ku kuba Urukiko Rukuru rw’Ubucuruzi rwarirengagije ibikubiye mu masezerano n’uruhande rutayubahjirije. Yasoje asaba guhabwa amafaranga anyuranye. [13] Munyabuhoro Jean Bosco n’umwunganira bireguye bavuga ko mu rubanza RCOMA 00331/2023/HCC, Urukiko Rukuru rw’Ubucuruzi rwasesenguye ibimenyetso byose ababuranyi barushyikirije kandi ko byagaragajwe kuva ku gika cya 10 kugeza ku cya 12 by’urubanza rusubirishwamo ku mpamvu z’akarengane. Ku birebana n’indishyi PRO WATER RWANDA Plc isaba, bavuze ko nta shingiro zikwiye guhabwa, ko ahubwo ari yo yategekwa guha Munyabuhoro Jean Bosco amafaranga y’ikurikiranarubanza n’igihembo cya Avoka. [14] Uhagarariye RAB yireguye avuga ko nta karengane PRO WATER RWANDA Plc yagiriwe mu rubanza rwaciwe n’Urukiko Rukuru rw’Ubucuruzi kandi ko ku biyireba urubanza rwaciwe n’Urukiko rw’Ubucuruzi rwamaze kuba itegeko. Yavuze ko umushinga SAIP/RAB wamaze kwishyura Green House Rwanda Ltd, PRO WATER RWANDA Plc ikaba idakwiye kuburana amafaranga aturuka muri RAB kandi atari yo iri mu masezerano y’inkunga yo kubaka greenhouse. Ku ndishyi PRO WATER RWANDA Plc isaba, yavuze ko nta shingiro zikwiye guhabwa.

## Page 6

[15] Uhagarariye GREEN HOUSE RWANDA Ltd avuga ko sosiyete ahagarariye idakwiye gukomeza gusiragizwa mu manza, kuko PRO WATER RWANDA Plc yivugiye ko iregera amasezerano yagiranye n’umushinga SAIP/RAB na MUNYABUHORO Jean Bosco, naho yo ikaba yaragiranye na MUNYABUHORO Jean Bosco amasezerano yo kumwubakira green house, hanyuma mu kuyubaka igakoresha PRO WATER RWANDA Plc ku mpamvu y’uko ari yo yayigurishije iyo green house kandi ko kugurisha green house bijyana no kuyubaka, ikaba yaranayishyuye iyo mirimo yakoze. [16] Nyuma y’izo mpaka, Urukiko rurasanga rugomba gusuzuma ibibazo bikurikira: a. Kumenya uwubakiye Munyabuhoro Jean Bosco ″green house″ n’ugomba kwishyura uwayubatse; b. Ibyerekeye amafaranga anyuranye ababuranyi basaba

II. ISESENGURA RY’IBIBAZO BIGIZE URUBANZA

1. Kumenya uwubakiye Munyabuhoro Jean Bosco ″green house″ n’ugomba kwishyura uwayubatse; [17] Uhagarariye PRO WATER RWANDA Plc avuga ko ku wa 11/01/2021 sosiyete ahagarariye yagiranye na Munyabuhoro Jean Bosco amasezerano yo kumwubakira “green house”, yo gukoreramo imirimo y’ubuhinzi ku nkunga y’umushinga SAIP/RAB, ku mafaranga miliyoni umunani n’ibihumbi magana ane (8,400,000 Frw), ko nyuma yo kwakira imirimo by’agateganyo, yagombaga kwishyura 90% y’igiciro cyose, asigaye ikazayishyurwa imirimo irangiye, ariko Munyabuhoro Jean Bosco akaba atarayubahirije. [18] Akomeza avuga ko akarengane sosiyete ahagarariye yagiriwe mu rubanza RCOMA 00331/2023/HCC, gashingiye ku kuba Urukiko Rukuru rw’Ubucuruzi rwaravuze ko itagombaga kurega Munyabuhoro Jean Bosco, ko ahubwo hagombaga kuregwa RAB, rwirengagije ko mu rwego rwa mbere yari yarezwe, Urukiko rubanza rukavuga ko hagombaga kuregwa Munyabuhoro Jean Bosco kuko amasezerano yabaye hagati ye na PRO WATER RWANDA Plc. Avuga ko iyo Urukiko rusanga RAB ari yo yagombaga kuregwa, rwagombaga kuyitegeka kwishyura uwo mwenda ukomoka ku kutubahiriza amasezerano, kutabifata gutyo akaba asanga hatarubahirijwe ingingo ya 64 y’itegeko N° 45/2011 ryo ku wa 25/11/2011 rigenga amasezerano, kandi ko kuba Munyabuhoro Jean Bosco yemera amasezerano, Urukiko rutagombaga kuvuga ko atari kuregwa, naho RAB ikaba yaraarezwe kubera ko ari yo yari ifitiye Munyabuhoro Jean Bosco ubwishyu, hashingiwe ku ngingo ya 113 y’itegeko N˚ 45/2011 ryo ku wa 25/11/2011 rigenga amasezerano. [19] Yavuze kandi ko Urukiko Rukuru rw’Ubucuruzi rwirengagije ibimenyetso bigizwe n’amasezerano yo ku wa 11/01/2021 yabaye hagati ya PRO WATER RWANDA Plc na Munyabuhoro Jean Bosco, inyandiko yo ku wa 15/10/2021 yo kwakira imirimo yakozwe na PRO WATER RWANDA Plc by’agateganyo, yakiriwe na Munyabuhoro Jean Bosco ubwe n’abakozi b’umushinga SAIP/RAB, ibaruwa yo ku wa 19/10/2021 Munyabuhoro Jean Bosco yandikiye umushinga SAIP/RAB awusaba kwishyura PRO WATER RWANDA Plc amafaranga angana na miliyoni indwi n’ibihumbi magana abiri na mirongo ine na bitanu (7,245,000 Frw) ahwanye na

## Page 7

90% by’imirimo yari imaze gukorwa. Yavuze ko nta cyo sosiyete ahagarariye ibaza GREEN HOUSE RWANDA Ltd kuko nta masezerano bigeze bagirana kandi ko nta we ukora imirimo ya “sous traitance” ku kigero cya 100%. [20] Ku bijyanye no kuba uhagarariye GREEN HOUSE RWANDA Ltd avuga ko sosiyete ahagarariye yagiranye amasezerano na PRO WATER RWANDA Plc kandi ko buri ruhande rwayashyize mu bikorwa, uhagarariye PRO WATER RWANDA Plc avuga ko nta kimenyetso kigaragaza ko izo sosiyete zombi zigeze zigirana amasezerano ndetse nta n’ikigaragaza ko GREEN HOUSE RWANDA Ltd yishyuye cash. Yasabye uru Rukiko gusesengura ibimenyetso byatanzwe, rukemeza uruhande rukwiye kwishyura ko ari we we asanga Munyabuhoro Jean Bosco ari we ugomba kwishyura sosiyete ahagarariye. [21] Munyabuhoro Jean Bosco n’umwunganira bireguye bavuga ko amasezerano yo ku wa 11/01/2021 PRO WATER RWANDA Plc ivuga ko bagiranye atari azi ibiyakubiyemo kubera ko yashyize umukono ku rupapuro rwa nyuma atabanje gusoma ibikubiye mu zibanza kuko bari bamubwiye ko ari impapuro zo kwishyuza RAB, kandi ko itavuga ko hari amasezerano avuguruye mu gihe itagaragaza ayabanziriza. Bavuga ko mu masezerano Munyabuhoro Jean Bosco yagiranye na SAIP/RAB, yagombaga yari afite uruhare rwo kwishyura rungana n’amafaranga ibihumbi magana atatu na mirongo itanu (350,000 Frw), akaba yarubahirije inshingano ze kuko ku wa 07/12/2020 yishyuye GREEN HOUSE RWANDA Ltd urwo ruhare rwe, kuko ari yo yari yaregukanye isoko ryo kubaka green house. Bavuga ko kuba PRO WATER RWANDA Plc yaramurikiye by’agateganyo imirimo Munyabuhoro Jean Bosco na SAIP/RAB, ari uko yari izi ko SAIP/RAB ari yo igomba kwishyura umushinga, ko iyo iba izi ko ari Munyabihoro Jean Bosco ugomba kuyishyura, itaba yarahamagaje SAIP/RAB muri uwo muhango. [22] Bakomeza bavuga ko PRO WATER RWANDA Plc idashaka kugaragaza ubwumvikane yagiranye na GREEN HOUSE RWANDA Ltd nyamara ubwo iyi yireguraga mu Rukiko Rukuru rw’Ubucuruzi, yaravuze ko yahaye PRO WATER RWANDA Plc akazi ko kugemura no kubaka (supplying and installation) green house, kandi ko yabikoze ikanayihemba, bikaba bishimangira ko niba hari ibyo PRO WATER RWANDA Plc yishyuza, ikwiye kubyishyuza GREEN HOUSE RWANDA Ltd. [23] Uhagarariye RAB yireguye avuga ko Munyabuhoro Jean Bosco yagobokesheje ikigo ahagarariye mu rwego rw‘ubujurire. Yasobanuye ko ku wa 08/12/2020 habaye amasezerano y’inkunga hagati ya RAB na Munyabuhoro Jean Bosco, ingingo ya 7 yayo ikaba iteganya ko uzubaka green house ari GREEN HOUSE RWANDA Ltd, ko rero Munyabuhoro Jean Bosco abaye yarishakiye umwubatsi yaba yarishe ibiteganywa n’iyo ngingo, kuko ku wa 07/12/2020 habaye amasezerano hagati ye na GREEN HOUSE RWANDA Ltd. Yavuze kandi ko Munyabuhoro Jean Bosco yamaze kwishyura uruhare rwe. [24] Yakomeje avuga ko Munyabuhoro Jean Bosco amaze kwishyura uruhare rwe, hakurikiyeho kubaka, ko rero bishoboka ko muri icyo gihe ari bwo PRO WATER RWANDA Plc yabyinjiyemo, ko ariko RAB itayizi kuko uwo izi mu masezerano ari GREEN HOUSE RWANDA Ltd, kandi ko nyuma yo kumurika imirimo by’agateganyo, PRO WATER RWANDA Plc yaje kwishyuza RAB ibona ntiyizi, bituma ku wa 03/02/2022 habaho undi muhango wo kumurika imirimo by’agateganyo ukozwe hashingiwe ku masezerano hagati ya Munyabuhoro Jean Bosco,

## Page 8

GREEN HOUSE RWANDA Ltd na RAB, banatanga impapuro zishyuza, noneho RAB ibona ko ingingo ya 85 y’itegeko rigenga amasoko ya Leta irebana na ″sous traitance″ yubahirijwe. [25] Yavuze ko kuba RAB yarakiriye imirimo by’agateganyo imuritswe na PRO WATER RWANDA Plc atari byo biha iyo sosiyete uburenganzira bwo kumenyekana mu rwego rw’amategeko kandi itazwi mu masezerano, kuko ku wa 28/04/2022 Munyabuhoro Jean Bosco yishyurije GREEN HOUSE RWANDA Ltd, RAB iramwishyura, ko ikirego cyageze mu rukiko ku wa 28/09/2022 yararangije kwishyura kandi ko RAB yishyuye GREEN HOUSE RWANDA Ltd hagendewe ku masezerano yabaye hagati ya Munyabuhoro Jean Bosco, GREEN HOUSE RWANDA Ltd na RAB, ku nyandiko zishyuza n’izakiriye imirimo by’agateganyo. [26] Yasoje avuga ko akurikije imiterere y’amasezerano y’inkunga, ubwishyu bugenewe GREEN HOUSE RWANDA Ltd, ko iyi sosiyete ibaye yarakoresheje PRO WATER RWANDA Plc byaba byarakozwe mu buryo bunyuranyije n’amategeko, kubera ko nta ″sous traitance″ yo ku rugero rwa 100% ishoboka, umuterankunga atabanje kubyemera, ko mu gihe haba harabaye kugongana kw’amasezerano hagati ya Munyabuhoro Jean Bosco na GREEN HOUSE RWANDA Ltd n’aya Munyabuhoro Jean Bosco na PRO WATER RWANDA Plc, n’ubundi amasezerano yabaye hagati ya Munyabuhoro Jean Bosco na GREEN HOUSE RWANDA Ltd ari yo yahabwa agaciro kuko yakorewe imbere ya Noteri. [27] Uhagarariye GREEN HOUSE RWANDA Ltd avuga ko sosiyete ahagarariye yagiranye na PRO WATER RWANDA Plc amasezerano yo kubaka green house yagombaga kubakira Munyabuhoro Jean Bosco kandi ko yayishyuye, ko rero andi masezerano yaba ifitanye na Munyabuhoro Jean Bosco GREEN HOUSE RWANDA Ltd itayazi. Yavuze ko ubuyobozi bwa GREEN HOUSE RWANDA Ltd bwamubwiye ko bwishyuye PRO WATER RWANDA Plc hakoreshejwe cash, ko ariko itashoboye kumuha ikimenyetso cy’ubwo bwishyu. Uko Urukiko rubibona [28] Impaka kuri iyi ngingo zishingiye ku kumenya uwubakiye Munyabuhoro Jean Bosco ″green house″ n’ugomba kwishyura uwayubatse. [29] Ingingo ya 64 y’itegeko N˚ 45/2011 ryo ku wa 25/11/2011 rigenga amasezerano iteganya ko″ Amasezerano akozwe ku buryo bukurikije amategeko aba itegeko ku bayagiranye. Ashobora guseswa ari uko babyumvikanyeho cyangwa ku mpamvu zemewe n’amategeko. Agomba kubahirizwa nta buriganya.” [30] Ingingo ya 4, igika cya mbere y’itegeko N˚ 062/2024 ryo ku wa 20/06/2024 rigenga ibimenyetso iteganya ibikurikira: “Urega cyangwa utanze ikibazo agaragaza ikimenyetso cy’ibyo aregera cyangwa asaba. Uwiregura agaragaza ikimenyetso gishyigikira ukwiregura kwe. Icyakora ukemura ikibazo ashobora gutegeka umuburanyi cyangwa umwe mu bafitanye ikibazo cyangwa undi muntu gutanga cyangwa kwerekana ikimenyetso afite.” [31] Ingingo ya 12, igika cya 2 y’itegeko N˚ 22/2018 ryo ku wa 29/04/2028 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko “uvuga ko atagitegetswe gukora icyo yategekwaga gukora cyagaragajwe n’ibimenyetso

## Page 9

agomba kugaragaza impamvu zakimukuyeho. Iyo abiburiye ibimenyetso, uwo baburana aramutsinda”. [32] Izi ngingo z’amategeko zifatiwe hamwe zumvikanisha ko abagiranye amasezerano mu buryo bukurikije amategeko bagomba kuyubahiriza nta buriganya, uvuga ko atagifite inshingano zo kubahiriza ibiyakubiyemo akagaragaza icyazimukuyeho. [33] Dosiye y’urubanza irimo inyandiko y’amasezerano yo ku wa 08/12/2020 yabaye hagati y’Ikigo gishinzwe Iterambere ry’Ubuhinzi n’Ubworozi mu Rwanda (RAB) binyuze mu mushinga wo kwagura ubuhinzi burambye n’ubwihaze mu biribwa (SAIP) n’umufatanyabikorwa witwa MUNYABUHORO Jean Bosco. Ingingo ya 5 y’ayo masezerano iteganya ko uruhare rw’umufatanyabikorwa ari amafaranga ibihumbi magana cyenda na mirongo irindwi (970,000 Frw), inkunga nyunganizi y’umuterankunga ikangana n’amafaranga miliyoni umunani, ibihumbi mirongo itandatu n’icyenda na magana atanu na mirongo itatu (8,069,530 Frw), naho ingingo ya 7 (3) yayo igateganya ko inkunga nyunganizi yishyurwa uwakoze igikorwa cyangwa uwatanze igikoresho cyaguzwe, ikaba inyuzwa kuri konti ya GREEN HOUSE RWANDA Ltd. [34] Hari kandi amasezerano yo ku wa 07/12/2020 yabaye hagati ya Munyabuhoro Jean Bosco na GREEN HOUSE RWANDA Ltd agamije kubakira Munyabuhoro Jean Bosco inzu yo guhingamo (green house), hakaba haragaragajwe ko kuri iyo tariki, Munyabuhoro Jean Bosco yishyuye GREEN HOUSE RWANDA Ltd amafaranga ibihumbi magana abiri na mirongo icyenda (290,000 Frw), ku wa 08/12/2021 yongera kwishyura amafaranga ibihumbi mirongo itandatu (60,000 Frw), yose hamwe aba amafaranga ibihumbi magana atatu na mirongo itanu (350,000 Frw) nk’uruhare rwe muri uwo mushinga. [35] Ku wa 11/01/2021, Munyabuhoro Jean Bosco yagiranye na PRO WATER RWANDA Plc amasezerano yo kumwubakira greenhouse yahawe umutwe wiswe”Amasezerano avuguruye yo kugemura ibikoresho no kubaka greenhouse” (Supply and installation of greenhouse). Muri ayo masezerano, impande zombi zumvikanye ko agaciro ka greenhouse ari amafaranga miliyoni umunani n’ibihumbi magana ane (8,400,000 Frw). Ku wa 15/10/2020 habaye umuhango wo kwakira by’agateganyo greenhouse, witabiriwe na Munyabuhoro Jean Bosco, RAB/SAIP na PRO WATER RWANDA Plc. [36] Ku wa 19/10/2021, Munyabuhoro Jean Bosco yandikiye umuhuzabikorwa w’umushinga SPIU SAIP-SAPMP/RAB amusaba kwishyura PRO WATER RWANDA Ltd amafaranga miliyoni indwi n’ibihumbi magana abiri na mirongo ine na bitanu (7,245,000 Frw) ahwanye na 90% y’inyunganizi mu buhinzi yamwemereye yo kubaka greenhouse havuyemo uruhare rwe, akanyuzwa kuri konti n˚4004200200823 iri muri Equity Bank yafunguwe mu mazina ya PRO WATER RWANDA Ltd. Kuri uwo munsi, PRO WATER RWANDA Plc nayo yandikiye ubuyobozi bw’umushinga RAB/SAIP yishyuza amafaranga y’imirimo yakoze, aho yagaragaje ko uruhare rwa nyir’umushinga rungana n’amafaranga ibihumbi magana atatu na mirongo itanu (350,000 Frw), inyunganizi y’umushinga ikangana n’amafaranga miliyoni indwi n’ibihumbi magana abiri na mirongo ine na bitanu (7,245,000Frw). Ku wa 28/04/2022, RAB yishyuye GREEN HOUSE RWANDA Ltd amafaranga angana na miliyoni indwi, ibihumbi magana abiri na mirongo itandatu na bibiri na magana atanu na mirongo irindwi n’arindwi (7,262,577 Frw) ajyanye n’imirimo yo kubakira Munyabuhoro Jean Bosco greenhouse (Supply and installation of greenhouse in matching grant to Munyabuhoro Jean Bosco Invest-Greenhouse Rwanda Ltd).

## Page 10

[37] Mu gika cya 12 cy’urubanza rusubirwamo ku mpamvu z’akarengane, Urukiko Rukuru rw’Ubucuruzi rushingiye ku nyandiko yo ku wa 15/10/2021 imurika by’agateganyo imirimo, ku nyemezabuguzi (factures) PRO WATER RWANDA Plc yakoreye umushinga RAB/SAIP ku wa 29/10/2021 no ku ibaruwa Munyabuhoro Jean Bosco yandikiye umushinga awusaba kwishyura PRO WATER RWANDA Plc, rwavuze ko rusanga PRO WATER RWANDA Plc yari izi neza ko umushinga RAB/SAIP ari wo ugomba kwishyura imirimo yakozwe, mu gika cya 13 cy’urubanza, rwanzura ko Munyabuhoro Jean Bosco atagombaga gutegekwa kwishyura PRO WATER RWANDA Plc. [38] Urukiko rw’Ubujurire rurasanga amasezerano yo kubaka greenhouse yabaye hagati ya Munyabuhoro Jean Bosco, umushinga RAB/SAIP na GREEN HOUSE RWANDA Ltd yarashyizwe mu bikorwa, ariko nk’uko impande zose zibyumvikanaho, GREEN HOUSE RWANDA Ltd yari yatsindiye isoko ryo kubaka iyo greenhouse nta bwo ari yo yayubatse, ahubwo yubatswe na PRO WATER RWANDA Plc, hagendewe ku masezerano Munyabuhoro Jean Bosco yagiranye nayo ku wa 11/01/2022. [39] Urukiko rw’Ubujurire rurasanga amasezerano Munyabuhoro Jean Bosco yagiranye na PRO WATER RWANDA Plc, yarakozwe hirengagijwe ingingo ya 64 y’itegeko N˚ 45/2011 ryo ku wa 25/11/2011 rigenga amasezerano iteganya ko″ Amasezerano agomba kuba akozwe ku buryo bukurikije amategeko, kuko aya masezerano yahinduye ibyateganywaga n’amasezerano yo kubakira Munyabuhoro Jean Bosco greenhouse yabaye hagati ya Munyabuhoro Jean Bosco n’umushinga RAB/SAIP hakemezwa ko GREEN HOUSE RWANDA Ltd yatsindiye isoko rya Leta ryo kubaka iyo greenhouse ari yo izishyurwa amafaranga azanyuzwa kuri konti yayo iri muri Equity Bank. [40] Urukiko rurasanga kandi mu gihe Munyabuhoro Jean Bosco yari azi neza ko isoko ryo kubaka greenhouse ryari ryaratsindiwe na GREEN HOUSE RWANDA Ltd kandi azi neza ko uruhare runini rw’ubwishyu buzava kuri SAIP/RAB nk’umushinga uzamutera inkunga ushamikiye ku kigo cya Leta, naho we agatanga uruhare ruto ndetse urwo ruhare rwe yaramaze kuruha GREEN HOUSE RWANDA Ltd atari guhindukira ngo akorane na PRO WATER RWANDA Plc, andi masezerano yo kubaka na none ya greenhouse ahinduye ibyumvikanyweho, mu masezerano yagiranye n’umushinga RAB/SAIP na GREEN HOUSE RWANDA Ltd, kuko byaba bidakurikije amategeko agenga amasoko atangwa n’umushinga wa Leta RAB/SAIP. [41] Urukiko rurasanga, kuba kuva mu nkiko zabanje ndetse n’imbere y’uru Rukiko GREEN HOUSE RWANDA Ltd yiyemerera ko umushinga wa Leta RAB/SAIP wayishyuye amafaranga y’imirimo yakozwe hubakwa greenhouse kandi koko ku wa 28/04/2022, RAB yarishyuye GREEN HOUSE RWANDA Ltd amafaranga angana na miliyoni indwi, ibihumbi magana abiri na mirongo itandatu na bibiri na magana atanu na mirongo irindwi n’arindwi (7,262,577 Frw) ajyanye n’imirimo yo kubakira Munyabuhoro Jean Bosco greenhouse (Supply and installation of greenhouse in matching grant to Munyabuhoro Jean Bosco Invest-Greenhouse Rwanda Ltd), ariko ikaba yarubatswe na PRO WATER RWANDA Plc nkuko ababuranyi bose babyemeranyaho, igomba kuyishyura amafaranga y’inkunga yagenewe kubakira Munyabuhoro Jean Bosco greenhouse kuko nta kigaragaza ko yayishyuye, cyane ko no mu iburanisha imbere y’uru Rukiko yasabwe kugaragaza ko yayishyuye ntibishobore.

## Page 11

[42] Ku bijyanye no kuba GREEN HOUSE RWANDA Ltd ivuga ko ari yo yahaye PRO WATER RWANDA Plc inshingano yari ifite mu masezerano yagiranye na Munyabuhoro Jean Bosco kandi ko yayishyuye ikiguzi cy’imirimo yakoze, uru Rukiko rurasanga kuvuga ko yayishyuye ikiguzi nta shingiro bifite kuko nta kimenyetso ibigaragariza uretse kubivuga gusa, kuko kuvuga ko yishyuye byo bidashoboka ko yaba yarishyuye ngo hanyuma ibure ikimenyetso gifatika yishyuriyeho PRO WATER RWANDA Plc. [43] Hashingiwe ku biteganywa n’amategeko ndetse n’ibisobanuro bitanzwe, Urukiko rw’Ubujurire rurasanga GREEN HOUSE RWANDA Ltd igomba kwishyura PRO WATER RWANDA Plc amafaranga angana na miliyoni indwi, ibihumbi magana abiri na mirongo itandatu na bibiri na magana atanu na mirongo irindwi n’arindwi (7,262,577 Frw) ajyanye n’imirimo yo kubakira Munyabuhoro Jean Bosco greenhouse (Supply and installation of greenhouse in matching grant to Munyabuhoro Jean Bosco Invest-Greenhouse Rwanda Ltd), RAB yayishyuye kandi mu by’ukuri atari yo yayubatse.

2. Ibyerekeye amafaranga anyuranye ababuranyi basaba [44] Uhagarariye PRO WATER RWANDA Plc asaba ko Munyabuhoro Jean Bosco ayishyura amafaranga miliyoni icumi, ibihumbi magana atatu na mirongo itatu na bine (10,334,000 Frw) yategetswe mu rubanza RCOM 01523/2022/TC rwaciwe n’Urukiko rw’ubucuruzi ku wa 26/05/2023, inyungu zingana n’amafaranga ibihumbi magana inani na cumi na bine (814,000 Frw) zibariye ku gipimo cy’ibitsa cya BNR kingana na 9.7 % by’umwenda wose mu gihe cy’umwaka umwe ushize urubanza rumaze kuvugwa ruciwe, amafaranga ibihumbi magana inani na mirongo ine (840,000 Frw) yo mu rubanza RCOMA 00331/2023/HCC rusubirishwamo ku mpamvu z’akarengane, akubiyemo amafaranga ibihumbi magana atanu (500.000Frw) y’igihembo cya Avoka, amafaranga ibihumbi mirongo ine y’igarama (40,000 Frw) yategetswe kwishyura n’amafaranga ibihumbi magana atatu (300,000 Frw) yishyuwe umuhesha w’inkiko, amafaranga angana na miliyoni ebyiri (2,000,000 Frw) y’indishyi z’akababaro zo gushorwa mu manza ku maherere, amafaranga miliyoni imwe (1,000,000 Frw) y’igihembo cya Avoka n’amafaranga ibihumbi magana atanu (500,000Frw) y’ikurikiranarubanza, yose hamwe akaba angana n’amafaranga miliyoni cumi n’eshanu n’ibihumbi magana ane na mirongo inani n’umunani (15,488,000 Frw). Ku mafaranga Munyabuhoro Jean Bosco asaba, avuga ko nta shingiro afite kubera ko ari we watumye sosiyete ahagarariye irengana. [45] Munyabuhoro Jean Bosco n’umwunganira bavuga ko amafaranga PRO WATER RWANDA Plc isaba nta shingiro akwiye guhabwa kubera ko ari yo yishoye mu manza. Basaba ahubwo uru Rukiko gutegeka PRO WATER RWANDA Plc kumuha amafaranga miliyoni imwe (1,000,000 Frw) y’ikurikiranarubanza, amafaranga ibihumbi magana atanu (500,000 Frw) y’igihembo cya Avoka kuri uru rwego, kubera ko ayo yatsindiye mu rubanza rusubirwamo ku mpamvu z’akarengane yamaze kuyahabwa. Uko Urukiko rubibona [46] Ingingo ya 111 y’itegeko n˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibikurikira:” Ikirego cy’amafaranga y’ikurikiranarubanza ni ikirego gishamikiye ku kirego cy’iremezo kigamije

## Page 12

kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishwa rimwe n’ikirego cy’iremezo. Gishobora kandi kwakirwa kikaburanishwa n’iyo ikirego cy’iremezo cyaba kitakiriwe”. [47] Ku bijyanye n’amafaranga y’indishyi zo gushorwa mu manza PRO WATER RWANDA Plc na Munyabuhoro Jean Bosco basaba hagati yabo, Urukiko rurasanga nta n’umwe ugomba kuzihabwa kubera ko batagaragaza ishingiro ryazo. [48] Ku bijyanye n’inyungu PRO WATER RWANDA Plc isaba, Urukiko rurasanga iki kibazo kitagomba kwakirwa ngo gisuzumwe kuko kitigeze gisuzumwa mu rubanza rusubirishwamo ku mpamvu z’akarengane ngo ibe yaragaragaje iyo ngingo nk’impamvu yo gusaba gusubirishamo ku mpamvu z’akarengane urubanza RCOMA 00331/2023/HCC. [49] Ku bijyanye n’ibihumbi magana inani na mirongo ine (840,000 Frw) PRO WATER RWANDA Plc isaba ko Munyabuhoro Jean Bosco ayisubiza kuko yayatanze harangizwa urubanza rusubirishwamo ku mpamvu z’akarengane, Uru Rukiko rurasanga kuba hagaragajwe ko ikirego cya PRO WATER RWANDA Plc cyo gusubirishamo ku mpamvu z’akarengane urubanza RCOMA 00331/2023/HCC gifite ishingiro, Munyabuhoro Jean Bosco nawe akaba yiyemerera ko yishyuwe amafaranga y’ibyagiye ku rubanza yari yagenewe n’Urukiko Rukuru rw’Ubucuruzi, agomba gusubiza PRO WATER RWANDA Plc ibihumbi magana atanu na mirongo ine (540,000 Frw), naho amafaranga ibihumbi magana atatu (300, 000 Frw) ivuga ko yishyuye umuhesha w’inkiko warangije urubanza ikiba itagomba kuyahabwa kubera ko nta kimenyetso yagaragaje. Ibi kandi ni nako byemejwe mu rubanza RS/INJUST/RC 00011/2022/CA rwaciwe n’Urukiko rw’Ubujurire ku wa 29/09/2023 haburana Me Nsabimana Jean Damascēne na Musabyimana Martin n’abandi. Muri urwo rubanza Me Nsabimana Jean Damascēne yasubirishagamo urubanza ku mpamvu z’akarengane biza kugaragara ko karimo koko kandi rwaramaze kurangizwa, Urukiko rutegeka abaregwa gufatanya kumusubiza amafaranga yabishyuye no gufatanya kumwishyura amafaranga yishyuye umuhesha w’inkiko warangije urwo rubanza1. [50] Uru Rukiko rurasanga GREEN HOUSE RWANDA Ltd igomba guha PRO WATER RWANDA Plc amafaranga y’ikurikiranarubanza n’igihembo cya Avoka agenwe mu bushishozi bwarwo kuko ayo isaba ari menshi. Bityo GREEN HOUSE RWANDA Ltd ikaba igomba guha PRO WATER RWANDA Plc amafaranga ibihumbi magana atatu (300,000 Frw) y’ikurikiranarubanza n’amafaranga ibihumbi magana atanu (500,000 Frw) y’igihembo cya Avoka kuri uru rwego.

III. ICYEMEZO CY’URUKIKO [51] Rwemeje ko ikirego cya PRO WATER RWANDA Plc cyo gusubirishamo ku mpamvu z’akarengane urubanza RCOMA 00331/2023/HCC, gifite ishingiro. [52] Rwemeje ko urubanza RCOMA 00331/2023/HCC rwaciwe n’Urukiko Rukuru rw’Ubucuruzi ku wa 20/06/2024, ruhindutse.

1 Reba urubanza N˚RS/INJUST/RC 00011/2022/CA rwo ku wa 29/09/2023, igika cya 43.

## Page 13

[53] Rutegetse GREEN HOUSE RWANDA Ltd guha PRO WATER RWANDA Plc amafaranga angana na miliyoni indwi, ibihumbi magana abiri na mirongo itandatu na bibiri na magana atanu na mirongo irindwi n’arindwi (7,262,577 Frw) ajyanye n’imirimo yo kubakira Munyabuhoro Jean Bosco greenhouse (Supply and installation of greenhouse in matching grant to Munyabuhoro Jean Bosco Invest-Greenhouse Rwanda Ltd). [54] Rutegetse GREEN HOUSE RWANDA Ltd guha PRO WATER RWANDA Plc amafaranga ibihumbi magana abiri (200,000 Frw) y’ikurikiranarubanza n’amafaranga ibihumbi magana atanu (500,000 Frw) y’igihembo cya Avoka kuri uru rwego. [55] Rutegetse Munyabuhoro Jean Bosco gusubiza PRO WATER RWANDA Plc amafaranga ibihumbi magana atanu na mirongo ine (540,000 Frw) yatanze harangizwa urubanza rusubirishwamo ku mpamvu z’akarengane. [56] Ruvuze ko amafaranga y’amagarama y’urubanza, aherera ku Isanduku ya Leta.