PYRAMIDE MINERALS SUPPLY Ltd N’UNDI v. RADIANT N’UNDI

# PYRAMIDE MINERALS SUPPLY Ltd N’UNDI v. RADIANT N’UNDI

- Source: Amategeko - Section: Decisions (Judgements) - Date: 2024-09-19 - Case/document no.: RCOMAA00018/2024/CA - Collection: Court of Appeal

## Text

## Page 1

PYRAMIDE MINERALS SUPPLY Ltd N’UNDI v. RADIANT N’UNDI [Rwanda URUKIKO RW’UBUJURIRE – RCOMAA00018/2024/CA (Ngagi, J. P.) 19 Nzeri 2024] Amategeko agenga ububasha bw’inkiko – Ubujurire bwa kabiri – Inzitizi y’iburabubasha – Gutsindwa mu nkiko zombi zabanje hashingiwe ku mpamvu zimwe – Mu gusuzuma niba umuburanyi yaratsinzwe mu nkiko zombi zabanje ku mpamvu zimwe, harebwa icyaburanwaga n’imitekerereze ya buri rukiko (raisonnement juridique) mu kugaragaza impamvu zashingiweho, kugira ngo rugere ku cyemezo rwafashe, hitawe ku kureba niba ingingo zaburanywe mbere ari zo zagarutsweho mu bujurire kandi ko inkiko zombi zazishubijeho mu buryo bumwe. Amategeko agenga ububasha bw’inkiko – Ubujurire bwa kabiri – Inzitizi y’iburabubasha – Gutsindwa mu nkiko zombi zabanje hashingiwe ku mpamvu zimwe – Impamvu zimwe – Mu gusuzuma ko impamvu zashingiweho umuburanyi atsindwa mu nkiko zombi ari zimwe, hatarebwa niba ibimenyetso ababuranyi batanze ku rwego rwa mbere ari byo byatanzwe no mu rwego rw’ubujurire, cyangwa ko zakoresheje amagambo amwe, ahubwo harebwa niba inkiko zombi zarashubije ku buryo bumwe ingingo zirebana n’ikiburanwa. Incamake y’ikibazo: Pyramide Minerals Supply Ltd yatsindiye isoko ryo gukora umuhanda, ryiswe “Travaux de maintenance périodique de la route en terre Mukunguri-Rugobagoba” ryatanzwe n’Akarere ka Kamonyi, maze itanga ingwate zitandukanye zo kurikora harimo iyatanzwe na Radiant Insurance Company yo kurangiza neza imirimo. Akarere ka Kamonyi kasheshe aya masezerano maze gasaba Radiant kuyishyura ayo mafaranga y’ingwa irayishyura, ariko irega mu Rukiko rw’Ubucuruzi Pyramide Minerals Supply Ltd ngo iyisubize ayo mafaranga yayitangiye hamwe n’inyungu zayo. Pyramide Minerals Supply Ltd yireguye ivuga ko itishyuye ayo mafaranga kubera ko Radiant yayibuje kubera urubanza rujyanye no gusesa amasezerano mu buryo bunyuranyije n’amategeko yari ifatanye n’Akarere ka Kamonyi. Urukiko rw’Ubucuruzi rwaciye urubanza rwemeza ko ikirego cya Pyramide Minerals Supply Ltd kijyanye n’inzitizi yo kutakira ikirego kidafite ishingiro, ko icya Radiant gifite ishingiro, kiyitegeka kuyishyura ayo mafaranga ari ku ngwate yo kurangiza neza imirimo hamwe n’inyungu zayo ndetse n’izindi ndishyi zitandukanye. Iki cyemezo cyatumye Pyramide Minerals Supply Ltd ijurira mu Rukiko Rukuru rw’Ubucuruzi ivuga ko inzitizi yatanze itahawe ishingiro, kandi ikirego cya Radiant kitaragombaga kwakirwa kuko yari kubanza kubahiriza inzira y’ubwumvikane nkuko byari biri mu masezerano bagiranye. Ikindi ni uko ayo mafaranga y’ingwate atagombaga guhabwa Akarere ka Kamonyi kuko ari ko kakoze amakosa. Radiant Insurance Company Ltd nayo yarajuriye isaba indishyi zijyanye n’ubwo bujurire, isaba ko harebwa ko Gafaranga nk’umwishingizi wa Pyramide Minelars Supply Ltd bafatanya kuyishyura no kureba niba inyungu z’ubukererwe zakomeza kubarwa kugeza igihe yishyuriwe. Ubujurire bwombi bwarahujwe buburanishirizwa hamwe, maze mu rubanza RCOMA00015/2023/HCC & Cmb RCOMA00020/2023/HCC Urukiko Rukuru rw’Ubucuruzi ruca urubanza rwemeza ko ubujurire bwa Pyramide Minelars Supply Ltd ari bwo bwonyine bufite ishingiro, ko urubanza rwajuririwe ruhindutse kuri bimwe. Pyramide Minelars Supply Ltd n’umwishingizi wayo Gafaranga bajuririye uru Rukiko rw’Ubujurire, habanza gususzumwa inzitizi y’iburabusha bw’uru Rukiko, itanzwe n’Abaregwa aribo Radiant Insurance Company Ltd n’Akarere ka Kamonyi, bavuga ko Abarega batsinzwe mu nkiko zombi zabanje hashingiwe ku mpamvu zimwe. Basobanura ko Urukiko rw’Ubucuruzi n’Urukiko Rukuru rw’Ubucuruzi zasesenguye inzitizi ijyanye no kubanza gucyemura ikibazo mu bwumvikane, zose

## Page 2

zemeza ko nta shingiro ifite. Bakomeza bavuga ko, Urukiko rw’Ubucuruzi rwasesenguye ikibazo cya kabiri cyari mu rubanza kijyanye no kumenya niba Radiant yasubizwa ingwate yishyuye Akarere ka Kamonyi, maze rwemeza ko igomba kuyasubizwa na Pyramide Minerals Supply Ltd kuko itubahirije amasezerano y’ingwate zari zaragiranye. Ibyo ni byo byagarutsweho mu rubanza rujuririrwa, aho Urukiko Rukuru rw’Ubucuruzi na rwo rwemeje ko Radiant, igomba gusubizwa ayo mafaranga y’ingwate na Pyramide Minerals Supply Ltd ifatanyije n’umwishingizi wayo Gafaranga kuko batubahirije amasezerano. Ikindi ni uko izo Nkiko zombi zabanje, zemeje ko batanga n’inyungu z’ayo mafaranga nk’ingaruka zo kutubahiriza amasezerano y’ingwate. Bityo, Abaregwa bakaba basaba uru Rukiko rw’Ubujurire kwemeza ko ubu bujurire butakwakirwa kuko butari mu bubasha bwarwo. Abarega bireguye bavuga ko batatsinzwe mu nkiko zombi hashingiwe ku mpamvu zimwe kubera ko ikibazo kijyanye n’inzitizi, Urukiko rw’Ubucuruzi butagihaye ishingiro rushingiye ku kuba ubwumvikane bavugaga butari buhuye n’ubuteganywa mu bukemurampaka cyangwa mu bwunzi, mu gihe Urukiko Rukuru rw’Ubucuruzi rwakoporoye iby’urwo Rukiko rwabanje, maze rwemeza ko nta shingiro iyo nzitizi ifite. Bakomeza bavuga ko ku kibazo kijyanye no kugarurira amafaranga y’ingwate yatanzwe na Radiant, Urukiko rw’Ubucuruzi rwashingiye ku kuba hari amasezerano yakozwe agomba kubahirizwa hagati yazo zombi, naho Urukiko Rukuru rw’Ubucuruzi rusuzuma iki kibazo mu buryo butandukanye, kuko mu cyemezo cyarwo rwashyizemo undi muburanyi rugira ibyo rumutegeka, kandi ku rwego rubanza ntacyo yari yategetswe. Bityo, ibi bikaba bigaragaza ko impamvu zashingiweho batsindwa bitashoboka ko ziba zimwe kandi inkiko zombi zarategetse ibintu bibiri (2) bitandukanye. Bavuga kandi ko hari ikibazo cyasuzumwe mu rubanza rujuririrwa kitazusumwe n’Urukiko rw’Ubucuruzi kijyanye no kumenya niba uwari warezwe akaba n’umwishingizi wa yo ataragombaga gutegekwa gufatanya na yo kwishyura Radiant Insurance Company Ltd. Basoza bavuga ko iyi mpamvu yonyine yihagije mu kwemeza ko uru Rukiko rw’Ubujurire rufite ububasha bwo kuburanisha ubujurire bwabo. Incamake y’icyemezo: 1. Mu gusuzuma niba umuburanyi yaratsinzwe mu nkiko zombi zabanje ku mpamvu zimwe, harebwa icyaburanwaga n’imitekerereze ya buri rukiko (raisonnement juridique) mu kugaragaza impamvu zashingiweho, kugira ngo rugere ku cyemezo rwafashe, hitawe ku kureba niba ingingo zaburanywe mbere ari zo zagarutsweho mu bujurire kandi ko inkiko zombi zazishubijeho mu buryo bumwe. 2. Mu gusuzuma ko impamvu zashingiweho umuburanyi atsindwa mu nkiko zombi ari zimwe, hatarebwa niba ibimenyetso ababuranyi batanze ku rwego rwa mbere ari byo byatanzwe no mu rwego rw’ubujurire, cyangwa ko zakoresheje amagambo amwe, ahubwo harebwa niba inkiko zombi zarashubije ku buryo bumwe ingingo zirebana n’ikiburanwa. Inzitizi y’iburabubasha bw’Urukiko rw’Ubujurire, ifite ishingiro. Ubujurire ntibwakiriwe kuko butari mu bubasha bw’Urukiko rw’Ubujurire. Amagarama aherera ku isanduku ya Leta. Amategeko yashingiweho: Itegeko N°30/2018 ryo ku wa 02/06/2018 rigena ububasha bw’inkiko, ingingo ya 52. Itegeko N°22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 111. Itegeko No 45/2011 ryo ku wa 25/11/2011 rigenga amasezerano, ingingo ya 9, 64, 80, 144 n’iya 147. Imanza zifashishijwe: RS/INJUST/RC00007/2020/SC, Twagirayezu Alice n’abandi v. Twagirayezu Albert na Umumaranyota Agnès, rwaciwe n’Urukiko rw’Ikirenga ku wa 25/06/2021.

## Page 3

RS/INJUST/RCOM00002/2020/SC, Road Solutions Pavement Products v. MAIL CO Ltd, rwaciwe n’urukiko rw’Ikirenga ku wa 29/9/2020. RS/INJUST/RCOM00003/2020/SC, SANLAM Assurance Générales Plc v. University of rwanda (UR), rwaciwe n’Urukiko rw’Ikirenga ku wa 27/11/2020. RCOMAA0048/16/CS, RRA v. SODAR Ltd, rwaciwe n’Urukiko rw’Ikirenga ku wa 19/05/2017. RCOMAA00061/2022/CA, Maxwell Ltd na Mpagazehe Robert v. Rwanda Public Procurement Authority (RPPA). Urubanza I. IMITERERE Y’URUBANZA [1] Akarere ka Kamonyi katanze isoko ryiswe “Travaux de maintenance périodique de la route en terre Mukunguri-Rugobagoba” ritsindirwa na sosiyete yitwa Pyramide Mineral Supply Ltd. Mu gukora iryo soko, Pyramide Mineral Supply Ltd Ltd nk’uko biteganywa n’amategeko yatanze ingwate zitandukanye harimo ingwate yo kurangiza imirimo neza (garantie de bonne exécution) yahawe na Radiant Insurance Company Ltd nk’uko bigaragazwa n’inyandiko yiswe “garantie de bonne exécution nord 001RC0B1706088/4447” yakozwe ku wa 14/07/2017, kandi kuri uwo munsi Gafaranga Ismael nk’Umuyobozi Mukuru wayo yasinyiye kuba umwishingizi wayo mu nyandiko yiswe “acte de cautionnement solidaire et indivisible”. Nyuma y’uko ayo masezerano y’isoko aseshwe, Akarere ka Kamonyi kasabye Radiant Insurance Company Ltd gutanga amafaranga y’ingwate, hanyuma irayatanga. [2] Radiant Insurance Company Ltd yareze Pyramide Mineral Supply Ltd mu Rukiko rw’Ubucuruzi isaba gusubizwa amafaranga y’ingwate yo kurangiza neza imirimo yayishyuriye angana na miliyoni ijana na mirongo inane n’icyenda n’ibihumbi magana ane na magana arindwi na mirongo itanu n’umunani (189.400.758Frw), kuko itashoboye kubahiriza amasezerano y’iryo soko, inasaba inyungu zitandukanye, amafaranga y’igihembo cya Avoka n’ay’ikurikiranarubanza. [3] Pyramide Mineral Supply Ltd yireguye ivuga ko hagombaga kubanza kubaho ubwumvikane hagati y’impande zombi mbere yo kuregera Urukiko kuko ari byo bumvikanye mu masezerano. Ivuga kandi ko itari kwishyura Radiant Insurance Company Ltd ayo mafaranga, kuko yayibujije kuyatanga biturutse ku rubanza Pyramide Mineral Supply Ltd yari ifitanye n’Akarere ka Kamonyi kuko kasheshe amasezerano mu buryo bunyuranyije n’amategeko. [4] Mu rubanza RCOM 00556/2022/TC rwaciwe n’Urukiko rw’Ubucuruzi ku wa 16/12/2022, rwemeje ko inzitizi yatanzwe na Pyramide Mineral Supply Ltd idafite ishingiro, ko ikirego cyatanzwe na Radiant Insurance Company Ltd gifite ishingiro kuri byose. Rutegeka Pyramide Mineral Supply Ltd ihagarariwe na Gafaranga Ismael kwishyura Radiant Insurance Company 189.400.758Frw ari ku ngwate yo kurangiza imirimo neza (garantie de bonne exécution) yayishyuriye mu Karere ka Kamonyi, hamwe n’inyungu z’ubukererwe zingana na 39.774.159Frw. Ruyitegeka kwishyura Radiant Insurance Company Ltd 500,000Frw y’igihembo cya Avoka, no kwishyura Akarere ka Kamonyi 200.000Frw y’ikurikiranarubanza, ikanasubiza Radiant Insurance Company 20,000Frw y’ingwate y’igarama yatanze irega. [5] Pyramide Minarals Supply Ltd yajuririye Urukiko Rukuru rw’Ubucuruzi, ivuga ko Urukiko rw’Ubucuruzi: - rwanze guha ishingiro inzitizi yayo ivuga ko ikirego cya Radiant Insurance Company Ltd kitari kwakirwa, kuko itabanje kubahiriza inzira y’ubwumvikane;

## Page 4

- rwayitegetse kugarura mafaranga y’ingwate yahawe Akarere ka Kamonyi kandi ari ko kakoze amakosa, gutanga inyungu zikomoka ku ngwate yasubijwe Akarere ka Kamonyi kandi nta shingiro zifite, no kuba zitakomeza kubarwa kuko umwenda zishingirwaho atari uwa banki, no gutanga indishyi zinyuranye zikubiyemo amafaranga y’igihembo cya Avoka n’ay’ikurikiranarubanza n’andi agenda ku rubanza, bityo isaba ko yakurwaho. Isoza isaba miliyoni ebyeri (2,000,000Frw) y’ibyagiye ku rubanza. [6] Radiant Insurance Company Ltd na yo yarajuriye, isaba Urukiko kumenya niba Gafaranga Ismael nk’uwari warezwe akaba n’umwishingizi wayo ataragombaga gutegekwa gufatanya na yo kuyishyura, kumenya niba inyungu z’ubukererwe yagenerwa zakomeza kubarwa kugeza igihe Pyramide Mineral Supply Ltd cyangwa umwishingizi wayo bazayishyurira, kumenya niba RADIANT Insurance Company Ltd yaragombaga kugenerwa igihembo cya Avoka, no kumenya niba Urukiko rwaragombaga kuyigenera amafaranga ibihumbi mirongo itandatu (60.000Frw) yishyuye Umuhesha w’ inkiko. Isoza isaba indishyi zitandukanye zo kuri urwo rwego. Izo manza zombi zahurijwe hamwe mu rubanza RCOMA00015/2023/HCC & Cmb RCOMA00020/2023/HCC kugira ngo ziburanishirizwe mu rubanza rumwe.

[7] Mu rubanza RCOMA00015/2023/HCC & Cmb RCOMA00020/2023/HCC rwaciwe n’Urukiko Rukuru rw’Ubucuruzi ku wa 07/02/2024, rwemeje ko: - ubujurire rwashyikirijwe na Radiant Insurance Company Ltd nta shingiro bufite; - ubujurire rwashyikirijwe na Pyramide Mineral Supply Ltd bufite ishingiro; - imikirize y’urubanza RCOM00556/2022/TC rwaciwe ku wa 16/12/2022 n’Urukiko rw’Ubucuruzi ihindutse kuri bimwe; - Pyramide Mineral Supply Ltd ifatanya na Gafaranga Ismael kwishyura Radiant Insurance Company Ltd 189.400.758Frw y’ingwate yo kurangiza imirimo neza yishyuwe Akarere ka Kamonyi. Aya mafaranga akaba agaragara mu gika cya 40 cy’urubanza rujuririrwa; - Pyramide Mineral Supply Ltd ifatanya na Gafaranga Ismael kwishyura Radiant Insurance Company Ltd 79.382.948Frw y’inyungu z’ubukererwe; - Pyramide Mineral Supply Ltd tdifatanya na Gafaranga Ismael kwishyura RADIANT Insurance Company Ltd 500.000Frw y’igihembo cya Avoka ku rwego rw’ubujurire; - Pyramide Mineral Supply Ltd ifatanya na Gafaranga Ismael kwishyura Radiant Insurance Company Ltd ibihumbi magana atanu (500.000Frw) y’igihembo cya Avoka yo ku rwego rwa mbere. Aya mafaranga akaba agaragara mu gika 41 cy’urubanza rujuririrwa; - Pyramide Mineral Supply Ltd ifatanya na Gafaranga Ismael kwishyura Akarere ka Kamonyi amafaranga y’ikurikiranarubanza angana na 200.000Frw, agaragara mu gika cya 42 cy’urubanza rujuririrwa; - Pyramide Mineral Supply Ltd ifatanya na Gafaranga Ismael kwishyura Radiant Insurance Company Ltd 40.000Frw y’igaragama yatanze ijuririra (reba urubanza CMB RCOMA00020/2023/HCC); - Pyramide Mineral Supply Ltd isubiza Radiant Insurance Company Ltd amafaranga y’amagarama y’uru rubanza angana na 20.000Frw yatanze irega yemejwe mu gika cya 43 cy’urubanza rujuririrwa;

## Page 5

- ingwate y’amagarama yatanzwe na Pyramide Mineral Supply Ltd mu kujurira ihwanye n’ibyakozwe mu rubanza. [8] Pyramide Mineral Supply Ltd n’umwishingizi wayo Gafaranga Ismael bajuririye uru Rukiko, ubujurire bwabo bwandikwa kuri RCOMAA00018/2024/CA. Urubanza rwaburanishijwe mu ruhame ku wa 04/09/2024, Pyramide Mineral Supply Ltd na Gafaranga Ismael bahagarariwe na Me Nzabihimana Jean Claude afatanije na Me Nkiranuye Gratien, Radiant Insurance Company Ltd ihagarariwe na Me Nyirangirimana Asterie, naho Akarere ka Kamonyi gahagarariwe na Me Umwali Claire; hasuzumwa inzitizi y’iburabubasha bw’uru Rukiko yatanzwe n’abaregwa ishingiye ku kuba abajuriye baratsinzwe mu nkiko zombi za banje hashingiwe ku mpamvu zimwe. II. IBIBAZO BIGIZE URUBANZA N’ISESENGURA RYABYO 1. Kumenya niba Pyramide Mineral Supply Ltd na Gafaranga Ismael baratsinzwe mu nkiko zombi hashingiwe ku mpamvu zimwe ku buryo ubujurire bwabo bwaba butari mu bubasha bw’uru Rukiko [9] Uhagarariye Radiant Insurance Company Ltd hamwe n’uhagaraririye Akarere ka Kamonyi, bashingiye ku ngingo ya 52, igika cya 3, y’Itegeko N°30/2018 ryo ku wa 02/06/2018 rigena ububasha bw’inkiko iteganya ko ubujurire bwa kabiri budashobora kwakirwa ku muburanyi watsinzwe mu nkiko zombi hashingiwe ku mpamvu zimwe bavuga ko Urukiko rw’Ubujurire rudafite ububasha bwo kuburanisha ubujurire bwa kabiri bwa Pyramide Mineral Supply Ltd na Gafaranga Ismael, kuko batsinzwe mu nkiko zombi zabanje hashingiwe ku mpamvu zimwe. [10] Basobanura ko ku kibazo cya mbere kijyanye no kumenyana niba haragombaga kubanza kubaho ubwumvikane mbere yo kurega, inkiko zombi zemeje ko iyo nzitizi nta shingiro ifite nk’uko bigaragara mu gika cya 10 cy’urubanza rwaciwe n’Urukiko rw’Ubucuruzi RCOM00556/2022/TC ndetse no mu bika bya 17 na 18 by’urubanza rwaciwe n’Urukiko Rukuru rw’Ubucuruzi RCOMA00015/2023/HCC & Cmb RCOMA00020/2023/HCC. [11] Basobanura kandi ko ku kibazo cya kabiri cyasuzumwe kijyanye no kumenya niba Radiant yasubizwa ingwate yishyuriye Akarere ka Kamonyi, Urukiko rw’Ubucuruzi rwagisesenguye mu bika bya 17-23 by’urubanza RCOM00556/2022/TC rwaciwe ku wa 16/12/2022, rusanga Pyramide Mineral Supply Ltd itarubahirije amasezerano y'ingwate yagiranye na Radiant Insurance Company Ltd mu izina ry'Umuyobozi wayo (Contrat de cautionnement solidaire RD001RC0B1706088), maze rushingiye ku ngingo ya 64, iya 80 n’iya 147 z'Itegeko rigenga amasezerano, rwemeza ko Pyramide Mineral Supply Ltd ihagarariwe na Gafaranga Ismael iyishyura 189.400.758Frw; ko ibyo ari nabyo byagarutsweho mu bika bya 26-32 by’urubanza RCOMA00015/2023/HCC & Cmb RCOMA00020/2023/HCC, aho Urukiko Rukuru rw’Ubucuruzi na rwo rwasanze Pyramide Mineral Supply ltd na Gafaranga Ismael batsindwa no kuba batarubahirije amasezerano bagiranye na Radiant Insurance Company Ltd, maze rubategeka kugarura 189.400.758Frw. [12] Bakomeza basobanura ko ikibazo cya gatatu cyasuzumwe ari ikijyanye n’inyungu, kibaba ari ingaruka, ko kandi inkiko zombi zemeje ko inyungu zitangwa kuko Pyramide Mineral Supply Ltd itubahije amasezerano. Bityo ko basaba Urukiko rw'Ubujurire kwemeza ko ubujurire bwa kabiri bwa Pyramide Mineral Supply Ltd na Gafaranga Ismael butakiriwe, kuko batsinzwe mu Nkiko zombi zabanje hashingiwe ku mpamvu zimwe. [13] Abaharariye Pyramide Mineral Supply Ltd na Gafaranga Ismael biregura kuri iyi nzitizi bavuga ko nta shingiro ifite, kuko Pyramide Mineral Supply Ltd na Gafaranga Ismael batatsinzwe hashingiwe ku mpamvu z’imwe mu nkiko zabanje.

## Page 6

[14] Basobanura ko kukibazo cya mbere cyasuzumwe n’inkiko zombi kijyanye n’inzitizi yo kutakira ikirego cya Radiant Insurance Company Ltd kubera kugitanga mu buryo bunyuranije n’amategeko, mu gika cya 10 cy’urubanza RCOM00556/2022/TC/2022/TC, Urukiko rw’Ubucuruzi rwemeje ko inzitizi nta shingoro ifite rushingiye ko ubwo bwumvikane ntaho buhuriye n’ubuteganywa mu bukemurampaka cyangwa mu bwunzi bwateganijwe n’Itegeko no ku rubanza RCOMAA0012/13/CS rwaciwe n’Urukiko rw’Ikirenga ku wa 13/06/2014, naho Urukiko Rukuru rw’Ubucuruzi rwo rukaba rwarakoporoye gusa ibyashingiweho n’Urukiko rw’Ubucuruzi, bityo ko kuri iyi ngingo abajuriye batatsinzwe hashingiwe ku mpamvu zimwe mu nkiko zombi zabanje, kuko Urukiko Rukuru rw’Ubucuruzi rutagaragaje impamvu rwashingiyeho, cyane ko mu rubanza No RS/INJUST/RCOM00002/2020/SC rwa Road Solutions Pavement Products na MAILCO Ltd, Urukiko rw’Ikirenga rwasobanuye ko buri Rukiko rugomba kugaragaza impamvu rwashingiyeho rufata icyemezo. [15] Basobanura kandi ko ku birebana no kuba Pyramide Mineral Supply Ltd itari ikwiye gutegekwa kugarura ingwate, Urukiko rw’Ubucuruzi rwashingiye ku kuba hari amasezerano yakozwe agomba kubahirizwa hagati yayo na Radiant Insurance Company Ltd, nk’uko bigaragara mu gika cyarwo cya 38, naho Urukiko Rukuru rw’Ubucuruzi rusuzuma iki kibazo mu buryo butandukanye n’ubwo Urukiko rw’Ubucuruzi rwagisuzumyemo, kuko mu cyemezo cyarwo rwashyizemo undi muburanyi rukagira ibyo rumutegeka, kandi ku rwego rubanza ntacyo yari yategetswe. Ibyo bikaba bivuze ko impamvu zashingiweho atsindwa bitashoboka ko ziba zimwe kandi inkiko zombi zarategetse ibintu bibiri (2) bitandukanye, nk’uko bigaragara mu gika cya 64 cy’urubanza RCOMA00015/2023/HCC & Cmb RCOMA00020/2023/HCC. Bityo ko icyo Urukiko Rukuru rw’Ubucuruzi rwashingiyeho kugirango Gafaranga ategekwe gufatanya na Pyramide kwishyurana gitandukanye n’icyo Urukiko rw’Ubucuruzi rwashingiyeho kuko rwo ntacyo rwategetse Gafaranga. [16] Bakomeza basobanura ko hari ingingo yasuzumwe n’Urukiko Rukuru rw’Ubucuruzi gusa, itigeze isuzumwe n’Urukiko rw’ubucuruzi ijyanye no kumenya niba Gafaranga Ismael nk’uwari warezwe akaba n’umwishingizi wa Pyramide Mineral Supply Ltd ataragombaga gutegekwa gufatanya na yo kwishyura RADIANT Insurance Company Ltd, nk’uko bigaragara mu bika bya 38 - 43 by’urubanza RCOMA00015/2023/HCC & Cmb RCOMA00020/2023/HCC, ko rero iyi mpamvu yihagije mu kwemeza ko Urukiko rw’Ubujurire rufite ububasha bwo kuburanisha ubujurire bwa Pyramide Mineral Supply Ltd na Gafaranga Ismael. [17] Basoza bavuga ko Pyramide Mineral Supply Ltd na Gafaranga Ismael batatsinzwe hashingiwe ku mpamvu zimwe mu nkiko zabanje, kuko mu Rukiko Rukuru rw’Ubucuruzi Gafaranga Ismael yategetswe kwishyura afatanyije na Pyramide Mineral Supply Ltd, kandi mu gika cya 62 cy’urubanza RCOMA00015/2023/HCC & Cmb RCOMA00020/2023/HCC, Urukiko Rukuru rw’Ubucuruzi rwavuze ko ubujurire bwa Pyramide Mineral Supply Ltd bufite ishingiro, ariko rukarenga rukayitegeka kwishyura, kandi mu rubanza RCOM00556/2022/TC yari yaratsinzwe, ibi na byo bikaba bigaragaza ububasha bw’Urukiko rw’Ubujurire, kuko ari rwo rugomba gukosora ayo makosa yakozwe n’Urukiko Rukuru rw’Ubucuruzi. UKO URUKIKO RUBIBONA [18] Impaka kuri iyi ngingo zishingiye ku kumenya niba Pyramide Mineral Supply Ltd na Gafaranga Ismael baratsinzwe mu nkiko zombi zabanje hashingiwe ku mpamvu zimwe, byaramuka bigaragaye ko yatsinzwe hashingiwe ku mpamvu zimwe mu nkiko zombi ubujurire bwabo ntibwakirwe kuko buba butari mu bubasha bw’uru Rukiko.

## Page 7

[19] Ingingo ya 52, igika cya 3, y’Itegeko Nº 30/2018 ryo ku wa 02/06/2018 rigena ububasha bw’inkiko, iteganya ibikurikira: icyakora kandi ubujurire bwa kabiri ntibushobora kwakirwa ku manza z’ababuranye bemera ibyo baregwa, cyangwa ku muburanyi watsinzwe mu nkiko zombi hashingiwe ku mpamvu zimwe. [20] Ku bijyanye n’ibisobanuro by’impamvu zimwe, Urukiko rurasanga nk’uko byafashweho umurongo mu zindi manza zaciwe n’Urukiko rw’Ikirenga, mu gusuzuma niba umuburanyi yaratsinzwe mu nkiko zombi zabanje ku mpamvu zimwe, harebwa icyaburanwaga n’imitekerereze ya buri rukiko (raisonnement juridique) mu kugaragaza impamvu zashingiweho, kugira ngo rugere ku cyemezo rwafashe, hitawe ku kureba niba ingingo zaburanywe mbere ari zo zagarutsweho mu bujurire kandi ko inkiko zombi zazishubijeho mu buryo bumwe1. Ibi kandi binumvikanisha ko ibyaburanwe mu rwego rwa mbere ari nabyo ubusanzwe bigomba kuburanwa mu rwego rw’ubujurire hashingiwe ku ihame risanzwe mu micire y’imanza rivuga ko umucamanza wo mu rwego rwa mbere yita ku igenzura ry’ibimenyetso n’amategeko ugereranyije n’ikiburanwa, naho umucamanza wo mu rwego rw’ubujurire akibanda cyane cyane ku kugenzura niba amategeko ku rwego rwa mbere yarubahirijwe uko bikwiye hakurikijwe ibisobanuro n’ibimenyetso byari byatanzwe muri urwo rubanza, byaba ngombwa agakosora aho bikenewe2. [21] Na none mu rubanza RCOMAA0048/16/CS rwaciwe n’Urukiko rw’Ikirenga ku wa 19/05/2017, haburana RRA na SODAR Ltd3, urwo Rukiko rwasobanuye ko mu gusuzuma ko impamvu zashingiweho umuburanyi atsindwa mu nkiko zombi ari zimwe, hatarebwa niba ibimenyetso ababuranyi batanze ku rwego rwa mbere ari byo byatanzwe no mu rwego rw’ubujurire, cyangwa ko zakoresheje amagambo amwe, ahubwo harebwa niba inkiko zombi zarashubije ku buryo bumwe ingingo zirebana n’ikiburanwa. [22] Nk’uko bigaragara mu rubanza RCOM00556/2022/TC rwaciwe n’Urukiko rw’Ubucuruzi ku wa 16/12/2022, Urukiko rwasuzumye ibibazo bikurikira: kumenya niba ababuranyi bagomba kubanza guca mu bwumvikane, niba Radiant Insurance Company Ltd igomba gusubizwa amafaranga y’ingwate yishyuriye Pyramide Mineral Supply Ltd iregera hamwe n’ikijyanye n’ishingiro ry’inyungu/indishyi z’ubukererwe. [23] Mu rubanza RCOMA00015/20213/HCC & Cmb RCOMA00020/2023/HCC, rwaciwe n’Urukiko Rukuru rw’Ubucuruzi ku wa 07/02/2024, urwo Rukiko rwasuzumye ingingo z’ubujurire zikurikira ku ruhande rwa Pyramide Mineral Supply Ltd: kumenya niba ikirego cyatanzwe na Radiant Insurance Company Ltd kitari kwakirwa kuko hatabanje inzira y’ubwumvikane; kumenya niba Pyramide Minerals Supply ltd itari gutegekwa kugarura amafaranga y’ingwate Radiant Insurance Company Ltd yahaye Akarere ka Kamonyi bitewe nuko haba hari amakosa yakozwe n’Akarere; no kumenya niba Pyramide Minerals Supply Ltd itari gutegekwa kwishyura inyungu zikomoka ku ngwate yasubijwe Akarere. Naho ku ruhande rwa Radiant Insurance Company Ltd nubwo byo bidasuzumwa muri uru rubanza, kuko itabijuririye muri uru Rukiko, kwari ukumenya niba Gafaranga nk’uwari yarezwe akaba n’umwishingizi wa Pyramide Minerals Supply Ltd ataragombaga gutegekwa gufatanya nayo kwishyura Radiant Insurance Company Ltd no kumenya niba inyungu z’ubukererwe zakomeza kubarwa kugeza igihe Pyramide Minerals Supply Ltd cyangwa umwishingizi wayo baziyemereza kwishyura Radiant Insurance Company Ltd. [24] Mu rwego rwo kumenya niba Pyramide Minerals Supply Ltd yaratsinzwe mu nkiko zombi hashingiwe ku mpamvu zimwe, haritabwa ku bibazo by‘ingenzi inkiko zombi zasuzumye, kuko nta

1 Reba urubanza RS/INJUST/RCOM00002/2020/SC rwaciwe ku wa 29/9/2020 haburana Road Solutions Pavement Products na MAIL CO Ltd. 2 Reba igika cya 23 cy’urubanza RS/INJUST/RCOM00003/2020/SC rwaciwe n’Urukiko rw’Ikirenga ku wa 27/11/2020, haburana SANLAM Assurance Générales Plc na University of Rwanda (UR). 3Reba igika cya 18 cy’urwo rubanza.

## Page 8

buryo ibibazo zitigeze zihuriraho mu isuzuma byajya mu igereranya. Ibibazo by’ingenzi inkiko zahuriyeho harimo icyo kumenya niba ikirego cyatanzwe na Radiant Insurance Company Ltd kitari kwakirwa kuko hatabanje inzira y’ubwumvikane; kumenya niba Radiant Insurance Company Ltd igomba gusubizwa amafaranga y’ingwate yishyuriye Pyramide Mineral Supply Ltd iregera; no kumenya niba Pyramide Mineral Supply Ltd itari gutegekwa kwishyura inyungu zikomoka ku ngwate yasubijwe Akarere. [25] Ku kibazo cyo kumenya niba ikirego cyatanzwe na Radiant Insurance Company Ltd kitari kwakirwa kuko hatabanje inzira y’ubwumvikane, Urukiko rw’Ubucuruzi rwasanze nyuma y’aho Radiant Insurance Company Ltd yandikiye Pyramide Minerals Supply Ltd amabaruwa abiri iyimenyesha ko Akarere ka Kamonyi kabishyuje amafaranga yatanzeho ubwishingizi angana na 189.400.758Frw ibasaba kwishyura ntibyagira icyo bitanga, Urukiko rwasanze hakurikijwe izo baruwa zose no kuba ntacyo Pyramide Minerals Supply Ltd yakoze ngo igaragaze ubushake bwo gukemura iki kibazo mu bwumvikane, ubwumvikane buvugwa mu ngingo ya 12 y’amasezerano y’ubwishingizi yo kwishingira iyo mirimo (contrat d’assurance caution bonne fin) hagati ya Radiant Insurance Company Ltd na Pyramide Minerals Supply Ltd bwari bwananiranye, Radiant Insurance Company Ltd nta kindi yari gukora uretse kuregera Urukiko rubifitiye ububasha. Urukiko rwasanze kandi ubwumvikane buteganywa mu ngingo 12 y’amasezerano yavuzwe ntaho buhuriye n’ubuteganywa mu bukemurampaka cyangwa mu bwunzi bwateganijwe n’itegeko, kuko uruhande rudashaka gushyikirana rutahatirwa kubanza kujya kwumvikana kandi nta tegeko ribiteganya, nk’uko byemejwe n’Urukiko rw’Ikirenga mu rubanza RCOMAA0012/13/CS rwaciwe ku wa 13/06/2014. [26] Kuri iki kibazo, Urukiko Rukuru rw’Ubucuruzi rushingiye ku ngingo ya 12 y’amasezerano yabaye hagati ya Radiant na Pyramide Minerals Supply Ltd yo kwishingira ko mirimo izakorwa neza (contrat d’assurance/ caution bonne fin), iteganya ko igihe haramuka havutse impaka mu iyubahirizwa ry’amasezerano zakemurwa mu bwumvikane, byananirana hakitabazwa inkiko inkiko zibifitiye ububasha, no kubyashingiweho n’Urukiko rw’Ubucuruzi mu gika cya 10, harimo ko ubwo bwumvikane ntaho buhuriye n’ubuteganywa mu bukemurampaka cyangwa mu bwunzi bwateganijwe n’itegeko, no kuba rwarashingiye ku murongo watanzwe mu rubanza RCOMAA0012/13/CS rwaciwe n’Urukiko rw’Ikirenga ku wa 13/06/2014 rwasanze Pyramide Minerals Supply Ltd itagaragaza icyo inenga icyemezo cyafashwe n’Urukiko rw’Ubucuruzi kuri iyi ngingo, ko ahubwo ikomeza kuvuga gusa ko ikibazo cyari kubanza gukemurirwa mu bwumvikane byananirana, hakitabanzwa inkiko; hanyuma rusanga umurongo watanzwe n’Urukiko rw’Ikirenga muri urwo rubanza ukwiye kugenderwaho mu guca urubanza kuko uwajuriye atigeze asaba ko urwo rubanza rutashingirwaho, ngo anabitangire ibisobanuro. [27] Urukiko rurasanga nubwo inkiko zombi zitakoresheje amagambo amwe, kandi akaba atari n’itegeko ko ziyakoresha, iby’ingenzi zashingiyeho n’uko ubwumvikane buteganywa mu ngingo 12 y’amasezerano yabaye hagati ya Radiant na Pyramide Minerals Supply Ltd yo kwishingira ko mirimo izakorwa neza (contrat d’assurance/ caution bonne fin) ntaho buhuriye n’ubuteganywa mu bukemurampaka cyangwa mu bwunzi bwateganijwe n’itegeko, kuko uruhande rudashaka gushyikirana rutahatirwa kubanza kujya kwumvikane kandi nta tegeko ribiteganya, no ku kumurongo watanzwe n’Urukiko rw’Ikirenga mu rubanza RCOMAA0012/13/CS; bityo kuri iki kibazo inkiko zombi zabanje zashingiye ku mpamvu zimwe. [28] Ku kibazo kijyanye no kumenya niba Radiant Insurance Company Ltd igomba gusubizwa amafaranga y’ingwate yishyuriye Pyramide Minerals Supply Ltd iregera, Urukiko rw’Ubucuruzi, nyuma yo kwibutsa ingingo zitandukanye z’amategeko n’inyandiko ziri muri dosiye, rwasanze ntaho hateganyijwe ko Radiant ishobora kubuzwa kwishyura iyo ngwate mu gihe uwagiranye amasezerano n’Akarere abitambamiye kuko iyo nyandiko igaragaza neza yuko Radiant Insurance Company Ltd izahita yishyura iyo ngwate igihe cyose izabisabwa n’Akarere ku busabe bwayo bwa mbere, Radiant Insurance Company Ltd itarinze kubaza Akarere nk’ibyo uwatsindiye isoko ari we rwiyemezamirimo

## Page 9

yaba atarubahirije muri iryo soko no kubitangira ibimenyetso cyangwa kubanza kumubaza icyo abitekerezaho kw’itangwa ry’iyo ngwate niba koko itarubahirije amasezerano y’iryo soko mbere yo kwishyura iyo ngwate. [29] Urukiko na none rwashingiye ku ngingo ya 5 y’ amasezerano yiswe “contrat d’assurance caution bonne fin” yo ku wa 21/08/2017 yakozwe hagati ya Pyramide Minerals Supply Ltd n’umwishingizi wayo Gafaranga Ismael na Radiant Insurance Company Ltd, iteganya ko nyuma yo kwishyura Akarere iyo ngwate, Radiant Insurance Company Ltd ifite uburenganzira bwo kuzakurikirana Pyramide Minerals Supply Ltd ikayishyuza amafaranga y’ingwate yayitangiye, ndetse no ku ngingo ya 6 n’iya 7 z’ayo masezerano, rusanga Pyramide Minerals Supply Ltd itemerewe kuba yazana ikibazo yaba ifitanye n’Akarere ka Kamonyi ibuza Radiant kurangiza inshingano zayo imbere y’Akarere. [30] Kuri iki kibazo, Urukiko Rukuru rw’Ubucuruzi, narwo rushingiye ku ngingo z’amategeko no kunyandiko zigaragara muri dosiye, nk’uko n’Urukiko rw’Ubucuruzi rwabikoze, rwasanze imvugo ya Pyramide Minerals Supply Ltd ko Radaint Insurance Company Ltd itagomba kwishyura Akarere ka Kamonyi ingwate yo kurangiza neza imirimo nta shingiro ifite. Rwanzura ko rwemeranya n’Urukiko rw’Ubucuruzi ku cyemezo rwafashe cyo gutegeka Pyramide Minerals Supply Ltd kwishyura Radiant Insurance Company Ltd 189,400,758 Frw y’ingwate yo kurangiza imirimo (garantie de bonne exécution). [31] Kuri iki kibazo, Urukiko rurasanga inkiko zombi zarahuriye ku kuba mu nyandiko zagaragajwe ntaho hateganyijwe ko Radiant Insurance Company Ltd ishobora kubuzwa kwishyura ingwate mu gihe uwagiranye amasezerano n’Akarere abitambamiye kuko izo nyandiko zigaragaza neza ko Radiant Insurance Company Ltd izahita yishyura iyo ngwate igihe cyose izabisabwa n’Akarere ka Kamonyi ku busabe bwayo bwa mbere itarinze kukabaza nk’ibyo uwatsindiye isoko yaba atarubahirije muri iryo soko. Urukiko ruraranga kuri iki kibazo Pyramide Minerals Supply Ltd n’umwishingizi wayo baratsinzwe mu nkiko zabanje hashingiwe ku mpamvu zimwe. [32] Ku kibazo kijyanye n’ishingiro ry’inyungu zatangwa zasabwaga na Radiant Insurance Company Ltd, Urukiko rw’Ubucuruzi, rushingiye ku ngingo ya 144 y’Itegeko No 45/2011 ryo ku wa 25/11/2011 rigenga amasezerano no ku ngingo ya 9 y’amasezerano yo kwishingira ikorwa neza ry’imirimo Radiant Insurance Company Ltd yagiranye na Pyramide Minerals Supply Ltd, rwasanze izo nyungu za 1.5% buri kwezi kuri ayo mafaranga y’ingwate yatindanywe zigomba gutangwa zikabarwa zihereye ku itariki ya 11/10/2021 igihe Pyramide Minerals Supply Ltd yamenyesherejwe bwa mbere kwishyura iyo ngwate y’ayo mafaranga 189.400.758Frw. [33] Kuri iki kibazo, n’ubwo Urukiko Rukuru rw’Ubucuruzi rutagarutse ku ngingo z’amategeko no ku ngingo y’amasezerano nk’uko byakozwe n’Urukiko rw’Ubucuruzi, ariko narwo rwasanze nta cyari kubuza Radiant Insurance Company Ltd kwishyura nk’uko byasobanuwe haruguru. Rusanga kandi kuba Pyramide Minerals Supply Ltd yarategetswe kwishyura inyungu n’Urukiko rw’Ubucuruzi rwaciye urubanza rujuririrwa, nta kosa rwakoze kuko izo nyungu zigendanye n’umwenda remezo wamaze kwemerezwa ishingiro. [34] Kuri iki kibazo cy’inyungu, nubwo inkiko zombi zitakoresheje amagambo amwe, ariko icy’ingenzi zahuriyeho nuko mu gihe byemejwe ko Pyramide Minerals Supply Ltd yishyura Radiant Insurance Company Ltd amafaranga y’ingwate, hanyuma igatinda kuyishyura, nta mpamvu ayo amafaranga atagomba kubarirwa inyungu kandi zikishyurwa na Pyramide Minerals Supply Ltd. Kuri iki kibazo na none inkiko zabanje zashingiye ku mpamvu zimwe. [35] Mu kwanzura kuri iki kibazo cyo kumenya niba Pyramide Minerals Supply Ltd yaratsinzwe mu nkiko zombi hashingiwe ku mpamvu zimwe, Urukiko rurasanga ku ngingo zasuzumwe n’Urukiko

## Page 10

rw’Ubucuruzi zikajuririrwa mu Rukiko Rukuru rw’Ubucuruzi nk’uko zagaragajwe haruguru, inkiko zombi zarashingiye ku mpamvu zimwe nubwo hari aho zitagiye zikoresha amagambo amwe, kandi nk’uko byibukijwe haruguru, mu RCOMAA0048/16/CS rwaciwe 19/05/2017, Urukiko rw’Ikirenga rwasobanuye ko mu gusuzuma ko impamvu zashingiweho umuburanyi atsindwa mu nkiko zombi ari zimwe, hatarebwa ko zakoresheje amagambo amwe, ahubwo harebwa niba inkiko zombi zarashubije ku buryo bumwe ingingo zirebana n’ikiburanwa. [36] Ku byo abahagarariye Pyramide Minerals Supply Ltd na Gafaranga Ismael bavuga ko ko kibazo cyo kumenya niba ikirego cyatanzwe na Radiant Insurance Company Ltd kitari kwakirwa kuko hatabanje inzira y’ubwumvikane, Urukiko Rukuru rw’Ubucuruzi ntacyo rwashingiyeho, kuko rwakoporoye ibyashingiweho n’Urukiko rw’Ubucuruzi, ko rero batatsinzwe mu nkiko zombi hashingiwe ku mpamvu zimwe, Urukiko rurasanga nta shingiro byahabwa, kuko nk’uko byasobanuwe haruguru, Urukiko Rukuru rw’Ubucuruzi rwaragaragaje impamvu rwashingiyeho mu gufata icyemezo. Ikindi kandi n’iyo Urukiko Rukuru rw’Ubucuruzi rwaba rwarashingiye ku magambo cyangwa ku gitekerezo cyashingiweho n’Urukiko rw’Ubucuruzi, maze rukanzura ko rwemeranya n’ibyavuzwe n’Urukiko rubanza, ntaho bihuriye no gukoporora bivugwa mu rubanza RS/INJUST/RC00007/2020/SC kuko byitwa gukoporora iyo Urukiko rwakoporoye ijambo ku rindi nta na gito rusize cyangwa ruhinduye ku bisobanuro byatanzwe mu rubanza rwari rwajuririwe kandi ntiruvuge ko rwemeranya narwo4. Ibi ni nako uru Rukiko rwabibonye mu rubanza RCOMAA00061/2022/CA rwaciwe ku wa 25/11/2022, haburana Maxwell Ltd hamwe na Mpagazehe Robert na Rwanda Public Procurement Authority (RPPA)5. [37] Urukiko rurasanga ibivugwa n’abahagarariye Pyramide Minerals Supply Ltd na Gafaranga Ismael ko kuba Gafaranga Ismael ntacyo yategetswe n’Urukiko rw’Ubucuruzi bigaragaza ko batatsinzwe mu nkiko zombi hashingiwe ku mpamvu zimwe, nta shingiro byahabwa, kuko Gafaranga Ismael atigeze ajurira muri uru Rukiko asaba ko atagomba gufatanya na Pyramide Minerals Supply Ltd kwishyura cyangwa ko atishingira umwenda wa Pyramide Minerals Supply Ltd, kandi ibibazo byasuzumwe n’inkiko zombi zabanjye nibyo byajuririwe muri uru Rukiko. Rurasanga na none ibyo Pyramide Minerals Supply Ltd itabyuriraho ivuga ko itatsinzwe hashingiwe ku mpamvu zimwe, kuko Gafaranga Ismael yarezwe mu rubanza nk’umwishingizi wagombaga gufatanya n’uwo yishingiye kwishyura, bikaba rero byumvikana ko ku byuririraho byaba ari ukunyuranya n’ihame ry’uko amasezerano y’ubwishingire aba ashamikiye ku masezerano y’iremezo kandi akurikira amerekezo yayo (l’accessoire suit le principal). Bityo ubujurire bwa Pyramide Minerals Supply Ltd na Gafaranga ntibwakiriwe kuko batsinzwe mu nkiko zombi hashingiwe ku mpamvu zimwe. 2. Kumenya niba amafaranga y’ikurikiranarubanza n’igihembo cya Avoka bisabwa muri uru rubanza bifite ishingiro [38] Uhagarariye Radiant Insurance Company Ltd asaba Urukiko rw’Ubujurire kuzayigenera amafaranga y’igihembo cya Avoka angana na miliyoni ebyiri (2.000.000Frw) n’ay’ikurikiranarubanza angana n’ibihumbi magana atanu (500.000Frw) yo kuri uru rwego. [39] Uhagarariye Akarere ka Kamonyi asaba Urukiko rw’Ubujurire gutegeka Pyramide Minerals Supply Ltd na Gafaranga Ismael kwishyura Akarere ka Kamonyi amafaranga ibihumbi magana atanu (500.000Frw) y’ikurikiranarubanza. [40] Uhagarariye Pyramide Minerals Supply Ltd na Gafaranga Ismael biregura bavuga ko amafaranga Radiant Insurance Company Ltd n’Akarere ka Kamonyi basaba nta shingiro afite, kubera ko Inkiko zabanje zabarenganije, bityo ko basaba Urukiko rw’Ubujurire kubarenganura.

4 RS/INJUST/RC00007/2020/SC rwaciwe n’Urukiko rw’Ikirenga ku wa 25/06/2021, Twagirayezu Alice n’abandi baburana na Twagirayezu Albert na Umumaranyota Agnès. 5 Reba igika cya 53.

## Page 11

UKO URUKIKO RUBIBONA [41] Ingingo ya 111 y’Itegeko N°22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibikurikira: ikirego cy’amafaranga y’ikurikiranarubanza ni ikirego gishamikira ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishirizwa rimwe n’ikirego cy’iremezo. Gishobora kandi kwakirwa kikanaburanishwa n’iyo ikirego cy’iremezo cyaba kitakiriwe. [42] Urukiko rurasanga Radiant Insurance Company Ltd ikwiriye guhabwa amafaranga y‘igihembo cya Avoka n’ikurikiranarubanza isaba kuko hari ibyo yatakaje ikurikirana uru rubanza, ariko kuba urubanza rugarukiye ku nzitizi, mu bushishozi bwarwo ruyigeneye ibihumbi magana atanu (500.000Frw) y’igihembo cya Avoka n’amafaranga (200.000Frw) y’ikurikiranarubanza. Naho Akarere ka Kamonyi ko kagenerwa ayo gukurikirana urubanza gusa, rukaba rukageneye ibihumbi magana abiri (200.000 Frw) y’ikurikirarubanza; yose akaba agomba kwishyurwa na Pyramide Minerals Supply Ltd ifatanije na Gafaranga Ismael. III. ICYEMEZO CY’URUKIKO [43] Rwemeje ko inzitizi y’iburabubasha bw’uru Rukiko yatanzwe na Radiant Insurance Company Ltd hamwe n’Akarere ka Kamonyi ifite ishingiro. [44] Rwemeje ko ubujurire bwa Pyramide Minerals Supply Ltd na Gafaranga Ismael butakiriwe kuko butari mu bubasha bw’Urukiko rw’Ubujurire. [45] Rutegetse Pyramide Minerals Supply Ltd na Gafaranga Ismael gufatanya kwishyura Radiant Insurance Company Ltd amafaranga ibihumbi magana atanu (500.000Frw) y’igihembo cya Avoka n’amafaranga ibihumbi magana abiri (200.000Frw) y’ikurikiranarubanza kuri uru rwego. [46] Rutegetse Pyramide Minerals Supply Ltd na Gafaranga Ismael gufatanya kwishyura Akarere ka Kamonyi amafaranga ibihumbi magana abiri (200.000Frw) y’ikurikiranarubanza kuri uru rwego. [47] Ruvuze ko amagarama yatanzwe ahwanye n’ibyakozwe mu rubanza.