UBUSHINJACYAHA v RENZAHO

# UBUSHINJACYAHA v RENZAHO

- Source: Amategeko - Section: Decisions (Judgements) - Date: 2025-01-30 - Case/document no.: RPAA 00045/2024/CA - Collection: Court of Appeal

## Text

## Page 1

UBUSHINJACYAHA v RENZAHO [Rwanda URUKIKO RW’UBUJURIRE - RPAA 00045/2024/CA (Umugwaneza, P.J.) 30 Mutarama 2025] Amategeko agenga imanza z’inshinjabyaha – Igabanya gihano - Iyo abaregwa nta kindi banenga urubanza rwajuririwe uretse kuvuga gusa ko batagabanyirijwe igihano bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo amaze kugaragaza ko urukiko rwabanje rwaba rwarakoresheje nabi itegeko cyangwa ubushishozi bwarwo mu gutanga icyo gihano. Incamake y’ikibazo: Renzaho yasambanyije umwana w’umukobwa w’imyaka 16 witwa Umuhoza amutera inda. Ubugenzacyaha bumaze kumenya amakuru y’ikorwa ry’icyo cyaha, Renzaho yarafashwe arafungwa akorerwa dosiye ihabwa ubushinjacyaha nabwo bumurega mu Rukiko Rwisumbuye rwa Nyarugenge bumurega icyaha cyo gusambanya umwana. Renzaho yaburanye yemera ko yaryamanye n’Umuhoza ariko ko yari aziko afite imyaka 21. Urukiko rwasanze icyaha kimuhama rumuhanisha igifungo cy’imyaka 15. Uregwa ntiyanyuzwe n’icyo cyemezo akijurira mu Rukiko Rukuru asaba ko yagabanyirizwa kuko aho amarije kumenya ko yasambanyije umwana w’imyaka 16, ubu yemera icyaha akagisabira imbabazi akanasaba kugabanyirizwa igihano agahabwa ikingana n’imyaka amaze muri gereza akajya kwita kuri mushiki we ndetse n’umwana we. Urukiko Rukuru rwasanze atakongera kugabanyirizwa igihano kuko yagabanyirijwe bihagije. Uregwa yajuririye icyo cyemezo mu Rukiko rw’Ubujurire asaba kugabanyirizwa igihano. Uru rukiko rwasuzumye ikibazo cyo kumenya niba Renzaho yakongera kugabanyirizwa igihano, aho avuga ko yemera icyaha mu buryo budashidikanywaho, ko yemera umwana yabyaye bivuye muri icyo cyaha, kuba ari ubwa mbere akurikiranywe n’inkiko, kuba kandi mu gihe cy’imyaka 3 amaze afunzwe yaramaze kugororoka akaba abishingiraho asaba imbabazi umuryango nyarwanda anasaba kugabanyirizwa igihano. Ubushinjacyaha busobanura ko uregwa yagabanyirijwe bihagije kandi nta kindi anenga imicire y’urubanza rwajuririwe uretse gusaba kugabanyirizwa imbabazi gusa bityo bukaba busanga atakongera kubanyirizwa igihano. Incamake y’icyemezo: Iyo abaregwa nta kindi banenga urubanza rwajuririwe uretse kuvuga gusa ko batagabanyirijwe igihano bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo amaze kugaragaza ko urukiko rwabanje rwaba rwarakoresheje nabi itegeko cyangwa ubushishozi bwarwo mu gutanga icyo gihano. Ubujurire nta shingiro bufite. Amategeko yashingiweho: Itegeko N° 68/2018 ryo ku wa 30/08/2018 riteganya ibyaha n’ibihano muri rusange nk’uko ryahinduwe kugeza ubu, ingingo ya 49.

## Page 2

Imanza zifashishijwe: RPA 00060/2021/CA, Ubushinjacyaha na Nsabimana Callixte alias Sankara n’abandi rwaciwe n’Urukiko rw’Ubujurire ku wa 04/04/2022; RPAA 00026/2024/CA, Ubushinjacyaha na Mutesiwimana Jean de Dieu, rwaciwe n’Urukiko rw’Ubujurire ku wa 20/12/2024; RPAA 00253/2022/CA, Ubushinjacyaha na Nzabahimana Christophe rwaciwe n’Urukiko ku wa 29/04/2024. Urubanza I. IMITERERE Y’URUBANZA [1] Renzaho Ismael yaketsweho gusambanya umwana w’umuukobwa witwa Umuhoza Assia wari ufite imyaka cumi n’itandatu (16) y’amavuko amutera inda abyara umwana witwa Hady Usufati Gaju. Ubushinjacyaha bwamukurikiranyeho icyaha cyo gusambanya umwana, mu Rukiko Rwisumbuye rwa Nyarugenge, busaba kwemeza ko kimuhama agahanishwa igifungo cy’imyaka makumyabiri n’itanu (25). Umuhoza Assiya yisunze Ubushinjacyaha yatanze ikirego cy’indishyi, asaba guhabwa indishyi zitandukanye zikomoka ku cyaha yakorewe. [2] Renzaho Ismael yaburanye yemera ko yasambanye na Umuhoza Assia umutera inda abyara umwana w’umukobwa, ariko ko icyo gihe Umuhoza yari afite imyaka makumyabiri n’umwe (21), ko icyo bapfa cyatumye amurega ari uko atatanze indezo y’umwana, bityo ko aribyo yahanirwa. [3] Mu rubanza N° RP 00476/2020/TGI/NYGE rwaciwe ku wa 29/09/2021, Urukiko Rwisumbuye rwa Nyarugenge rushingiye ku mvugo ya Umuhoza Assia ushinja Renzaho Ismael ko yamusambanyije akamutera inda, imvugo ya Renzaho Ismael wiyemerera ko yasambanyije Umuhoza Assia amutera inda abyara umwana w’umukobwa, icyemezo cy’amavuko cya Umuhoza Assia kigaraga ko yavutse tariki ya 26/9/2003, icyemezo cy’amavuko cy’umwana Umuhoza Assia yabyaye witwa Hady Usufati Gaju kigaragaza ko yavutse ku wa 10/10/2019; rwemeje ko Renzaho Ismael ahamwa n’icyaha cyo gusambanya umwana, ahanishwa igifungo cy’imyaka cumi n’itanu (15), rumutegeka guha Umuhoza Assia indishyi zikomoka ku cyaha yamukoreye zingana na miliyoni eshatu z’amafaranga y’u Rwanda (3.000.000 Frw). [4] Renzaho Ismael yajuririre urwo rubanza mu Rukiko Rukuru, avuga ko atamenye neza ko umukobwa yasambanije yari ataruzuza imyaka y’ubukure, ko aho abimenyeye abisabira imbabazi, asaba kugabanyirizwa igihano agahabwa ikingana n’imyaka amaze muri Gereza, akabasha kujya kwita ku mwana we no kuri mushiki we waretse ishuri kuko ari we wamwishyuriraga amafaranga y’ishuri. [5] Ubushinjacyaha bwavuze ko ubujurire bwe nta shingiro bufite kuko nta kwicuza agaragaza ahubwo yishakira gusa kurekurwa agataha, buvuga kandi ko nta mpavu ihari yatuma yongera kugabanyirizwa igihano, bityo ko hahamaho imikirize y’urubanza rwajuririwe. [6] Mu rubanza N° RPA 01512/2021/HC/KIG rwaciwe ku wa 12/10/2023, Urukiko Rukuru rwasanze Renzaho Ismael atakongera kugabanyirizwa igihano kuko ku rwego rwa mbere

## Page 3

yagabanyirijwe mu buryo bukwiye, rwemeza ko ubujurire bwe nta shingiro bufite, ko urubanza yajuririye rudahindutse. [7] Renzaho Ismael yajuririye Urukiko rw’Ubujurire, urubanza ruhabwa N° RPAA 00045/2024/CA, ruburanishwa mu ruhame ku wa 16/01/2025, Renzaho Ismael yunganiwe na Me Bizimana Olivier, Ubushinjacyaha buhagarariwe na Butera Oscar, Umushinjacyaha ku rwego rw’igihugu. [8] Mu myanzuro y’ubujurire no mu miburanire, Renzaho Ismael n’umwunganira basaba ko yakongera kugabanyirizwa igihano kuko atagabanyirijwe bihagije. Uhagarariye Ubushinjacyaha avuga ko, ubujurire bwa Renzaho Ismael nta shingiro bufite kuko impamvu ashingiraho asaba kugabanyirizwa igihano ari nazo yashingiyeho mu bu jurire bwa mbere, Urukiko ruzisuzumye rusanga nta shingiro zifite, ko ibyakozwe mu bujurire bwa mbere bikwiye kandi bikurikije amategeko, bityo urubanza rwajuririwe rukaba rudakwiriye guhindurwa. [9] Hakurikijwe imiburanire y’impande zombi, muri uru rubanza harasuzumwa ikibazo cyo kumenya niba Renzaho Ismael yakongera kugabanyirizwa igihano. II. ISESENGURA RY’IKIBAZO KIRI MU RUBANZA Ibyerekeye kumenya niba Renzaho Ismael yakongera kugabanyirizwa igihano [10] Renzaho Ismael n’umwunganira, bavuga ko mu Rukiko Rwisumbuye Renzaho Smael yahamijwe icyaha cyo gusambanya umwana ahanishwa igifungo cy’imyaka cumi n’itanu (15), ajuririra Urukiko Rukuru asaba kugabanyirizwa igihano, urwo Rukiko rwemeza ko ubujurire bwe nta shingiro bufite, rugumishaho igihano yahanishijwe n’Urukiko Rwisumbuye, basaba ko cyakongera kugabanywa kuko n’ubwo mu Rukiko Rwisumbuye yagabanyijwe ariko atagabanyirijwe bihagije. [11] Renzaho Ismael avuga ko mu kumugabanyiriza igihano hazashingirwa ku mpamvu nyoroshyacyaha zirimo: kuba kuva yatangira gukurikiranwa yemera icyaha mu buryo budashikanywaho; kuba yicuza cyane ko yahemukiye umuryango we bwite, umwana yahohoteye n’umuryango nyarwanda muri rusange; kuba ari ubwa mbere yakurikiranwaho icyaha mu buryo buzwi; kuba yemera umwana yabyaye ndetse akaba yemera kuza mufasha ngo agire imibereho myiza afatanyije na nyina; kuba mu gihe cy’imyaka itatu amaze afunze, yaramaze kugororoka no kumenya imyitwarire ikwiye umunyarwanda ufite indagaciro igihugu kimutegerejeho; kuba afite umuryango yari asanzwe yitaho mu buzima bwa buri munsi, aramutse agabanyirijwe igihano akaba yabona umwanya wo kujya kubitaho agifite imbaraga; kuramira “budjet” Leta yamutangagaho kuko abagororwa baba batunzwe na Leta kandi uko umuntu amara igihe kini muri Gereza ari nako Leta imutangaho byinshi kurushaho; kurushaho guha agaciro ihame ry’uko uburemere bw’igihano ataribwo bugorora umunyacyaha.

## Page 4

[12] Me Bizimana Olivier, asaba Urukiko rw’Ubujurire gushingira ku ngingo ya 491, iya 582 n’iya 593z’Itegeko N° 68/2018 ryo ku wa 30/08/2018 riteganya ibyaha n’ibihano muri rusange nk’uko ryahinduwe kugeza ubu, no ku mirongo yatanzwe n’Urukiko rw’Ikirenga ndetse n’Urukiko rw’Ubujurire mu manza zitandukanye harimo urubanza N° RS/REV/INJUST/PEN 0001/17/CS – RS 00001/2017/CS rwaciwe n’Urukiko rw’Ikirenga ku wa 13/04/2017 habura Ubushinjacyaha, Bahirwe Geoffrey na Mukagatoya Marie, mu gika cya 41, aho Urukiko rw’Ikirenga rwemeje ko akamaro k’igihano katareberwa gusa ku buremere bw’icyaha cyakozwe, ko ahubwo hagomba kwitabwa no ku nyungu za rubanda mu gukumira ko icyaha cyazasubira no ku nyungu z’uregwa hagendewe ku mwihariko wa buri rubanza, n’urubanza N° RPAA 00022/2021/CA rwaciwe n’Urukiko rw’Ubujurire ku wa 29/07/2022 haburana Ubushinjacyaha na Uwambajimana Grâce mu gika cya 52 na 53 aho Urukiko rwemeje ko nta cyabuza Urukiko rwajuririwe kongera kugabanya igihano cyatanzwe n’Urukiko rubanza mugihe rusanze kirebewe hamwe n’uburemere bw’icyaha cyakozwe kitaragabanyijwe bihagije; maze rukagabanyiriza igihano Renzaho Ismael kugeza ku kuri ½ cy’igihano gito giteganyijwe ku cyaha cyo gusambanya umwana cyamuhamye nk’uko biteganywa n’ingingo ya 2 y’Itegeko N° 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange. [13] Uhagarariye Ubushinjacyaha avuga ko ubujurire bwa Renzaho Ismael nta shingiro bufite kuko impamvu ashingiraho asaba kugabanyirizwa igihano ari nazo yashingiyeho mu bu jurire bwa mbere, Urukiko ruzisuzumye rusanga nta shingiro zifite, akaba atabasha kuvuguruza ibisobanuro byatanzwe n’Urukiko mu bujurire bwa mbere, nta n’icyo anenga urubanza rwaciwe kuri urwo rwego rw’ubujurire, ahubwo yongeye gusaba kugabanyirizwa igihano ashingiye ku mpamvu yari yaratanze mbere, Ubushinjacyaha bukaba busanga ibyakozwe mu bujurire bwa mbere bikwiye kandi bikurikije amategeko, bityo urubanza rwajuririwe rukaba rudakwiye guhindurwa. [14] Ku bijyanye n’imanza uwunganira Renzaho Ismael asaba ko zashingirwaho uwo yunganira akagabanyirizwa igihano, uhagarariye Ubushinjacyaha avuga ko izo manza zitashingirwaho kuko umurongo wazitanzwemo utagikurikizwa nyuma y’Itangazwa ry’Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, aho ingingo yaryo ya 02 iteganya igabanya ry’igihano mu gihe hari impamvu nyoroshyacyaha zemezwa n’umucamanza, yahinduye ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, kandi umurongo wari usanzweho ukaba udashobora gukurikizwa mu gihe itegeko wari ushingiyeho rwavuyeho cyangwa ryahindutse nk’uko byemejwe mu rubanza Nº RPAA 00385/2022/CA rwaciwe n’Urukiko rw’Ubujurire ku wa 17/01/2024 Ubushinjacyaha buburana na Hategekimana Tukuri, mu gika cyarwo cya 15 n’icya 16. Uko Urukiko rubibona

1 Ivuga ko “Umucamanza atanga igihano akurikije uburemere bw'icyaha, ingaruka icyaha cyateye, impamvu zatumye agikora, uko uwagikoze yari asanzwe yitwara, imibereho ye bwite n’uburyo icyaha cyakozwemo”. 2 Ivuga ko “Umucamanza ubwe ni we ugena niba impamvu nyoroshyacyaha zemezwa n’umucamanza zahabwa agaciro. Kwemeza impamvu nyoroshyacyaha bigomba gusobanurwa mu cyemezo cy’urukiko”. 3 Ivuga ko “Umucamanza ashobora kugabanya ibihano nk’iyo: ……. 3º mu ntangiriro z’iburanisha ku rwego rwa mbere, ushinjwa yireze akemera icyaha mu buryo budashidikanywa”.

## Page 5

[15] Impaka kuri iyi ngingo zishingiye ku kumenya niba igihano cyo gufungwa imyaka cumi n’itanu (15) Renzaho Ismael yahanishijwe n’Urukiko Rukuru ku cyaha cyo gusambanya umwana yahamijwe, gikwiye kongera kugabanywa. [16] Ku bijyanye n’itangwa ry’ibihano, ingingo ya 49 y’Itegeko N° 68/2018 ryo ku wa 30/08/2018 riteganya ibyaha n’ibihano muri rusange nk’uko ryahinduwe kugeza ubu, ivuga ko “Umucamanza atanga igihano akurikije uburemere bw'icyaha, ingaruka icyaha cyateye, impamvu zatumye agikora, uko uwagikoze yari asanzwe yitwara, imibereho ye bwite n’uburyo icyaha cyakozwemo”. [17] Ku birebana no kugabanyirizwa igihano mu gihe ariyo mpamvu yonyine y’ubujurire, byatanzweho umurongo mu rubanza N° RPA 00060/2021/CA rwaciwe n’Urukiko rw’Ubujurire ku wa 04/04/2022 haburana Ubushinjacyaha, Nsabimana Callixte alias Sankara na bagenzi be. Muri urwo rubanza Urukiko rw’Ubujurire rwemeje ko mu rwego rw’ibirego nshinjabyaha, iyo abaregwa nta kindi banenga urubanza rwajuririwe uretse kuvuga gusa ko batagabanyirijwe igihano bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo hakurikijwe ibiteganywa n’ingingo ya 49 y’Itegeko N° 68/2018 ryo ku wa 30/8/2018 riteganya ibyaha n’ibihano muri rusange, ariko ko mu bujurire, Umucamanza agomba kuzirikana ko yemerewe gusa guhindura igihano cyatanzwe n’Umucamanza wo mu Rukiko rubanza, ari uko amaze kugaragaza ko urwo Rukiko rwaba rwarakoresheje nabi Itegeko cyangwa ubushishozi bwarwo mu gutanga icyo gihano. Uyu murongo wakurikijwe mu manza zitandukanye zakurikiyeho zaciwe n’uru Rukiko, harimo n’urubanza Nº RPAA 00026/2024/CA, rwaciwe n’Urukiko rw’Ubujurire ku wa 20/12/2024 Ubushinjacyaha buburana na Mutesiwimana Jean de Dieu, ukaba ari nawo ugiye gukurikizwa muri uru rubanza. [18] Mu bika bikurikira harasuzumwa niba mu guhanisha Renzaho Ismael igifungo cy’imyaka cumi n’itanu (15) ku cyaha yahamijwe cyo gusambanya umwana, Urukiko rwarakoresheje nabi Itegeko cyangwa se ubushishozi bwarwo. [19] Nk’uko bigaragara mu manza zabanje, Renzaho Ismael yaburanye ku rwego rwa mbere yemera ko yasambanye na Umuhoza Assia amutera inda abyara umwana w’umukobwa, ariko ko uyu mukobwa yari mukuru, ko yari afite imyaka makumyabiri n’umwe (21) y’amavuko, Urukiko Rwisumbuye rwa Rwanyarugenge, rusanga hari ibimenyetso byemeza ko yamusambanyije akiri umwana, rumuhamya icyaha cyo gusambanya umwana, rusanga ariko akwiye kugabanyirizwa igihano kuko ari ubwa mbere akurikiranyweho icyaha mu nzego z’ubutabera kandi akaba adahakana ko yasambanyije Umuhoza Assia, rumuhanisha igifungo cy’imyaka cumi n’itanu (15). Mu bujurire yemeye icyaha mu buryo budashikanywaho, avuga ko atari azi ko umukobwa yasambanyije yari akiri umwana, aho abimenyeye akaba asaba imbabazi no kugabanyirizwa igihano, Urukiko Rukuru rusanga atakwitwaza ko atamenye ko umukobwa yasambanjyije yari ataruzuza imyaka y’ubukure ngo bimubere impamvu ituma agabanyirizwa igihano, rusanga kandi Urukiko rubanza rwaramugabanyirije igihano mu buryo bukwiye, kikaba kitakongera kugabanywa, maze rwemeza ko ubujurire bwe nta shingiro bufite. [20] Urukiko rw’Ubujurire rurasanga nk’uko Urukiko Rukuru rwabibonye, kuba Renzaho Ismael ataramenye ko umukobwa agiye gusambanya ataruzuza imyaka y’ubukure, bitamubera impamvu yatuma agabanyirizwa igihano yahawe, kuko yagize uburangare ntiyabanza gushishoza

## Page 6

ngo amenye neza niba uwo agiye gusambanya atari umwana urengerwa n’amategeko, akaba atakwitwaza amakosa ye ngo asabe ko yashingirwaho agabanyizwe igihano. [21] Urukiko rw’Ubujurire rurasanga na none nk’uko n’Urukiko Rukuru rwabibonye, igifungo cy’imyaka cumi n’itanu (15) Renzaho Ismael yahawe gihwanye n’uburemere bw’icyaha yakoze, kuko yasambanyije umwana aruta w’imyaka cumi n’itandatu (16) we afite imyaka mirongo itatu n’ibiri (32), amutera inda, bituma agira inshingano zo kurera umwana yabyaye kandi nawe yari agikeneye kurerwa, bityo icyo gihano kikaba kitagomba kugabanywa. [22] Urukiko rw’Ubujurire rurasanga hari n’izindi manza zaciwe n’uru Rukiko ku bantu bakoze icyaha nk’icyo Renzaho Isamel yakoze nabo bagiye bahanishwa igihano kijya kungana n’icyo yahanishije, harimo nk’urubanza N°RPAA 00253/2022/CA rwaciwe n’Urukiko ku wa 29/04/2024, haburana Ubushinjacyaha na Nzabahimana Christophe, wahamijwe icyaha cyo gusambanya umwa w’imyaka cumi n’itandatu (16) akamutera inda, mu gihe we yakoze icyaha afite imyaka mirongo itatu n’itandatu (36), Urukiko rw’Ubujurire rumugabanyiriza igihano cy’igifungo cy’imyaka makumyabiri yari yahanishijwe n’inkiko zibanaza, rumuhanisha igifungo cy’imyaka cumi n’itandatu (16), rushingiye ku mpamvu nyoroshyacyaha y’uko ari ubwa mbere yakurikiranywa n’inzego z’ubutabera. Bityo Renzaho Isamel nawe wakoze icyaha afite imyaka mirongo itatu n’ibiri (32), agasabanya umwana ufite imyaka cumi n’indatu (16), akamutera inda, igihano yahanishijwe n’Urukiko Rukuru cyo gufungwa imyaka cumi n’itanu (15) kikaba kidakwiye kugabanywa. [23] Ku bijyanye n’imiburanire ya Me Bizimana Olivier y’uko hashingirwa ku ngingo ya 2 y’Itegeko N° 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, maze Renzaho Ismael akagabanyirizwa igihano kugeza kuri ½ cy’igihano gito giteganyirijwe icyaha yakoze (ikuvuga ½ cy’imyaka 20), Urukiko rw’Ubujurire rirasanga nta shingiro ifite kuko nk’uko byemejwe mu rubanza N° RPAA 00752/2021/CA rwaciwe n’Urukiko rw’Ubujurire ku wa 28/02/2024 Ubushinjacyaha buburana na Ndayambaje Eugène, atari ihame ko igihe haje Itegeko rishya rigabanya igihano mu buryo bworohe, Urukiko ruhita rutanga igihano gito giteganyijwe mu itegeko rishya, ahubwo rugabanya igihano mu bushishozi bwarwo rurebye uburemere bw’icyaha, ndetse n’ingaruka zacyo, rugatanga igihano gikwiranye n’icyaha cyakozwe, mu mbago z’igihano giteganywa n’itegeko rishya. Bivuze ko Urukiko rushobora kwanga kongera kumugabanyiriza igihano yahanishijwe mu gihe rusanga kiri mu rugero (fourchette) rw’igiteganywa n’Itegeko rishya kandi gikwiranye n’icyaha yakoze. [24] Hashingiwe ku bisobanuro bimaze gutangwa, Urukiko rw’Ubujurire rurasanga ubujurire bwa Renzaho Ismael nta shingiro bufite, hakaba hagomba kugumaho imikirize y’urubanza yajuririye. III. ICYEMEZO CY’URUKIKO [25] Rwemeje ko ubujurire bwatanzwe na Renzaho Ismael nta shingiro bufite; [26] Rwemeje ko urubanza N° RPA 01512/2021/HC/KIG rwaciwe n’Urukiko Rukuru ku wa 12/10/2023, rudahindutse;

## Page 7

[27] Rutegetse ko amagarama y’urubanza aherereye ku Isanduku ya Leta kuko Renzaho Ismael yajuriye afunze akaba asonewe kuyatanga.