UBUSHINJACYAHA vs RUSASURA

# UBUSHINJACYAHA vs RUSASURA

- Source: Amategeko - Section: Decisions (Judgements) - Date: 2024-03-07 - Case/document no.: RPAA 00177/2022/CA - Collection: Court of Appeal

## Text

## Page 1

UBUSHINJACYAHA vs RUSASURA [Rwanda URUKIKO RW’UBUJURIRE – RPAA 00177/2022/CA (Kanyange, P.J.) 07 Werurwe 2024] Itegeko ryerekeye imiburanishirize y’imanza z’inshinjabyaha – ubuzime – Urupfu – Urupfu rw’ukuricyiranyweho icyaha – Ikirego cy’ikurikiranacyaha kizima kubera urupfu rw’uregwa cyaba cyaratanzwe cyangwa kitaratangwa. Incamake y’ikibazo: Uru rubanza rwatangiye, Ubushinjacyaha burega Rusasura mu Rukiko Rwisumbuye rwa Rusizi bumukurikiranyeho icyaha cy’ubwicanyi, nyuma yuko bumucyetseho icyaha cyo kwica umwana we w’umukobwa witwa Nyirangirimana. Rusarura yaburanye yemera icyaha, avuga ko yishe umwana we amukubise isuka ku ijosi, amujijije imitungo. Urukiko rwemeje ko afamwa n’icyaha cy’ubwicanyi, rumuhanisha igifungo cya burundu. Rusasura yajuriye mu Rukiko Rukuru, Urugereko rwa Rusizi, avuga ko yahamijwe icyaha cy’ubwicanyi buturutse ku bushake kandi ari ibintu byamugwiririye, ko yagombye guhanirwa icyaha cy’ubwicanyi budaturutse ku bushake. Urukiko mu rubanza RPA00145/2019/HC/RSZ, rwemeje ko nta wundi mugambi Rusaruura yari afite uretse uwo kwica, ruvuga ko n’ubwo yemeye icyaha atagomba kugabanyirizwa igihano, maze rwemeza ko ubujurire bwe nta shingiro bufite. Rusasura ntiyanyuzwe n’icyo cyemezo, ajurira mu Rukiko rw’Ubujurire, ariko apfa ubujurire bwe butaraburanishwa, uhagarariye ubushinjacyaha ndetse n’umwunganira bavuze ko habayeho ubuzime bw’ikurikiranacyaha kuri Rusasura.Urukiko mu rubanza RPAA00177/2022/CA, rwemeje ko habaye ubuzime bw’ikurikiranacyaha kuri Rusasura. Incamake y’icyemezo: Ikirego cy’ikurikiranacyaha kizima kubera urupfu rw’uregwa cyaba cyaratanzwe cyangwa kitaratangwa. Bityo, birabujijwe gukurikirana uregwa utakiriho cyangwa kuryoza icyaha abazungura; no mu gihe uregwa apfuye nyuma y’uko urubanza rujuririwe, Urukiko rugomba kuvuga gusa ko habayeho ubuzime bw’ikurikiranacyaha. Ikirego cy’ikurikiranacyaha cyarazimye kubera urupfu rw’uregwa. Amategeko yashingiweho: Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha nk’uko ryahinduwe, Ingingo ya 5, igika cya mbere Nta manza zifashishijwe: Inyandiko z’abahanga zifashishijwe: Michel FRANCHIMONT, Ann JACOBS et Adrien MASSET, Manuel de Procédure Pénale, Collection de la Faculté de droit de l’Université de Liège, 4ème Edition, Editions Larcier, Bruxelles, 2012, p.100 URUBANZA

## Page 2

I. IMITERERE Y’URUBANZA [1] Ku wa 07/07/2018, Rusasura Uziel yishe umwana we w’umukobwa witwa Nyirangirimana Esther amuteye icyuma, bimenyekane atangira gukurikiranwa. [2] Nyuma y’iperereza, Ubushinjacyaha bwamureze mu Rukiko Rwisumbuye rwa Rusizi bumukurikiranyeho icyaha cy’ubwicanyi yakoze ku wa 07/07/2018. [3] Rusasura Uziel yaburanye yemera icyaha, avuga ko yishe umwana we amukubise isuka ku ijosi, amujijije imitungo yari amaze gutwara avuga ko ari iya nyina. [4] Urukiko rushingiye ku byo Rusasura Uziel yemeye, imvugo z’abatangabuhamya n’icyemezo cya muganga cyemeje ko Nyirangirimana yapfuye azize icyuma yatewe, rwemeje ko ahamwa n’icyaha cy’ubwicanyi, rumuhanisha igifungo cya burundu. [5] Rusasura Uziel yajuriye mu Rukiko Rukuru, Urugereko rwa Rusizi, avuga ko yahamijwe icyaha cy’ubwicanyi buturutse ku bushake kandi ari ibintu byamugwiririye, ko yagombye guhanirwa icyaha cy’ubwicanyi budaturutse ku bushake. [6] Urukiko rwaciye urubanza RPA00145/2019/HC/RSZ ku wa 08/03/2022, rusanga hakurikijwe uburyo icyaha cyakozwe nta wundi mugambi Rusasura yari afite uretse uwo kwica, rusanga kandi n’ubwo yemeye icyaha atagomba kugabanyirizwa igihano, maze rwemeza ko ubujurire bwe nta shingiro bufite, ko nta gihindutse ku mikirize y’urubanza yajuririye. [7] Rusasura Uziel yajuriye mu Rukiko rw’Ubujurire, urubanza rwandikwa kuri RPAA00177/2022, ariko apfa ubujurire bwe butaraburanishwa. [8] Urubanza rwahamagawe ku wa 07/03/2024 hitaba uwari wagenwe kunganira Rusasura Uziel, Me Ntazika Néhémie, Ubushinjacyaha buhagarariwe na Gakwerere Javan, Umushinjacyaha ku rwego rw’Igihugu, hasuzumwa ikibazo cy’uregwa wajuriye agapfa urubanza rutaraburanishwa. Bombi bavuze ko habayeho ubuzime bw’ikurikiranacyaha kuri Rusasura Uziel, maze Urukiko rufatira icyemezo mu ntebe mu buryo bukurikira: UKO URUKIKO RUBIBONA [9] Ingingo ya 5, igika cya mbere, agace ka 1º, y’Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha nk’uko ryahinduwe, iteganya ko ikirego cy’ikurikiranacyaha kizima iyo uwakoze icyaha apfuye. [10] Abahanga mu mategeko nabo bavuga ko ikirego cy’ikurikiranacyaha kizima kubera urupfu rw’uregwa, cyaba cyaratanzwe cyangwa kitaratangwa; ibi bikaba bituruka ku ihame ry’uko hahamwa uwakoze icyaha, bityo bikaba bibujijwe gukurikirana uregwa utakiriho cyangwa kuryoza icyaha abazungura; ko mu gihe uregwa apfuye nyuma y’uko urubanza rujuririwe, Urukiko rugomba kuvuga gusa ko habayeho ubuzime bw’ikurikiranacyaha1

1 Michel FRANCHIMONT, Ann JACOBS et Adrien MASSET, Manuel de Procédure Pénale, Collection de la Faculté de droit de l’Université de Liège, 4ème Edition, Editions Larcier, Bruxelles, 2012, p.100: “L’action publique s’éteint par le décès de l’inculpé ou du prévenu, qu’elle ait ou non été intentée. La règle est dictée par le principe de la personnalité des peines qui interdit de poursuivre un délinquant défunt ou d’intenter un procès pénal à ses héritiers (…). Si une voie de recours était exercée avant le décès, la juridiction saisie par celle-ci devrait se borner à constater l’extinction de l’action publique”.

## Page 3

[11] Muri dosiye (IECMS) harimo inyandiko mpine y’uwapfuye yatanzwe n’ibitaro bya Gihundwe, yemeza ko Rusasura Uziel yapfuye ku wa 18/09/2023. Harimo kandi inyandiko yatanzwe n’Igororero rya Rusizi nayo yemeza ko Rusasura Uziel yapfuye azize uburwayi. [12] Hashingiwe rero ku biteganywa n’ingingo ya 5 y’Itegeko Nº 027/2019 ryo ku wa 19/09/2019 ryavuzwe haruguru, Urukiko rurasanga harabaye ubuzime bw’ikirego cy’ikurikiranacyaha ku cyaha cy’ubwicanyi Rusasura Uziel yari akurikiranyweho n’Ubushinjacyaha kubera ko yapfuye ku wa 18/09/2023 nk’uko bigaragazwa n’icyemezo cya muganga kiri muri dosiye ndetse n’inyandiko yatanzwe n’Igororero rya Rusizi. III. ICYEMEZO CY’URUKIKO [13] Rwemeje ko ikirego cy’ikurikiranacyaha ku cyaha cy’ubwicanyi Rusasura Uziel yari akurikiranyweho n’Ubushinjacyaha cyazimye kubera ko yapfuye; [14] Rutegetse ko amagarama y’uru rubanza aherera ku Isanduku ya Leta.