RWEMA v. RWANDATEL SP

RWEMA v. RWANDATEL SP

- Source: Amategeko - Section: Decisions (Judgements) - Date: 2012-06-11 - Case/document no.: RCOM 0006/12/CS - Collection: Supreme Court

Text

Page 1

RWEMA v. RWANDATEL SP [Rwanda URUKIKO RW’IKIRENGA – RCOM 0006/12/CS (Mutashya, P.J., Munyangeri na Rugabirwa, J.) 11 Kamena 2012] Amategeko agenga imanza z’ubucuruzi – Amasezerano y’ubucuruzi – Ikirego cyihutirwa – Gusubirishamo urubanza ingingo nshya – Ifatira ry’agateganyo – Urukiko ntirwafata icyemezo mu kirego cyihutirwa kuko ari icyagateganyo – Ikirego gisaba gusubirishamo urubanza ingingo nshya aba ari inzira idasanzwe ikorerwa urubanza rwabaye itegeko, Umuburanyi ntiyasaba urukiko gufatira umutungo w’uwo baburana byagateganyo kuko bikorerwa mu rubanza rukiburanishwa, Itegeko n◦ 18/2004 ryo kuwa 20/06/2004 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 187. Incamake y’ikibazo: Rwema yareze RWANDATEL mu Rukiko Rukuru rw’Ubucuruzi umwenda ungana na 4.523.900 frws y’agaciro k’ibikoresho yayihaye mu rwego rw’amasezerano bagiranye y’ubucuruzi bw’umuriro. RWANDATEL nayo imurega umwenda ungana na 37.173.008 frws ukomoka ku masezerano bari bagiranye yo kumucururiza ama karita ya telefone. Urukiko rutegeka Rwema kwishyura RWANDATEL amafaranga angana na 28.834.173 frws. Rwema yajuririye mu Rukiko rw’Ikirenga, nyuma asubirishamo uru rubanza ingingo nshya muri uru rukiko. Aza no gutanga ikirego cyihutirwa gishamikiye kuri iki kirego cyo gusubirishamo ingingo nshya. Yanasabye urukiko yuko rwafatira amafaranga ya RWANDATEL SP

ari muri konti yayo muri BCR, avuga ko aramutse atsinze urubanza yasabiye gusubirishamo yazasanga ayo mafaranga yarahishwe kuzindi konti zitazwi. RWANDATEL yo ikavuga ko ntaho Rwema ashingira ikirego cye cyihutirwa kuko agishingira ku gusubirishamo ingingo nshya kandi ari inzira idasanzwe y’ubujurire idahagarika irangiza ry’urubanza. Incamake y’icyemezo :1. Urukiko ntirwafata icyemezo gihindura ibyemezo byarwo mu birego byihutirwa kuko biba ari iby’agateganyo 2. Umuburanyi ntiyasaba yuko Urukiko rw’Ikirenga rwafatira by’agateganyo umutungo wuwo baburana kuko bikorerwa urubanza rukiburanishwa mu nkiko rutaraba itegeko, ahubwo yakwegera inzego zishinzwe kurangiza imanza kugira ngo niba yumva hari ibyo imugomba hashingiwe ku rubanza rwaciwe zibimuheshe. Ikirego cyihutirwa nta shingiro gifite. Amagarama y’urubanza aherereye kuwareze. Amategeko yashingiweho Itegeko n◦18/2004 ryo kuwa 20/06/2004 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 187.

Page 2

Nta manza zifashishijwe Urubanza I. IMITERERE Y’URUBANZA. [1] RWEMA Muhamahoro Pascal yareze RWANDATEL mu Rukiko Rukuru rw’Ubucuruzi umwenda ungana na 4.523.900 frw y’agaciro k’ibikoresho yayihaye mu rwego rw’amasezerano ya sous- traitance bagiranye ngo imucururize umuriro, RWANDATEL nayo yatanze ikirego kigamije kwiregura yishyuza RWEMA umwenda uhwanye na 37.173.008 frw n’indishyi zinyuranye, akomoka ku masezerano bari baragiranye yo kuyicururiza amakarita ya telephone. [2] Urukiko Rukuru rw’Ubucuruzi rwaciye urubanza rutegeka RWEMA kwishyura RWANDATEL 28.834.173 frw havuyemo 2.100.000 frw y’agaciro k’ibikoresho bye, ikanamusubiza ”COMPUTER LAPTOP” imwe na ”EVDOS” eshatu. [3] RWEMA yajuririye Urukiko rw’Ikirenga, rwaciye urubanza kuwa 12/11/2010, rukemeza ko ubujurire bwa RWEMA bufite ishingiro kuri bimwe, maze rugategeka RWEMA kwishyura RWANDATEL SP 1.871.154 frw, ariko runategeka RWANDATEL SP guha RWEMA agaciro k’ibikoresho bye kangana na 2.200.000 frw, ikanamusubiza ”EVDOS” eshatu na ”ORDINATEUR PORTABLE” imwe yahawe ngo imucururize umuriro. [4] RWEMA yasubirishijemo urwo rubanza ingingo nshya mu Rukiko rw’Ikirenga, icyemezo cy’ibanzirizasuzuma cyemeje ko yemerewe gusubirishamo urubanza rwe ingingo nshya. [5] RWEMA yatanze ikirego cyihutirwa gishamikiye kuri iki kirego cyo gusubirishamo ingingo nshya urubanza ruburanishwa mu ruhame kuwa 07/06/2012 RWEMA MUHAMAHORO Pascal

yiburanira naho RWANDATEL SP iburanirwa na Me GAHONGERWA na Me BUZAYIRE Angèle. II. IKIBAZO KIGIZE URUBANZA N’ISESENGURA RYACYO. Kumenya niba Urukiko rw’Ikirenga rushobora gufatira by’agateganyo umutungo wa RWANDATEL ku kirego rwashyikirijwe cyo gusubirishamo urubanza ingingo nshya no kuvunja mu mafaranga ”LAP TOP” na ”EVDOS” nk’uko RWEMA MUHAMAHORO abisaba. [6] RWEMA MUHAMAHORO Pascal mu gusobanura ikirego cye, asaba uru rukiko gufatira amafaranga ya RWANDATEL SP arenga 26.000.000 frw ari kuri konte yayo muri BCR, ngo kuko aramutse atsinze urubanza yasabiye gusubirwamo yazasanga ayo mafaranga yarahishwe ku yandi makonte atazwi. Asaba kandi ko ku byerekeye “computer “ na “EVDOS” uru rukiko rwabiha agaciro mu mafaranga kugira ngo azabone uko yishyurwa ngo kuko yasanze byaragurishijwe.

Page 3

[7] Me GAHONGERWA na Me BUZAYIRE Angèle baburanira RWANDATEL SP bavuga ko nta hantu RWEMA Muhamahoro ashingira ikirego cye cyihutirwa kuko agishingira ku gusubirishamo urubanza ingingo nshya kandi iyi nzira idasanzwe y’ubujurire idahagarika irangiza ry’urubanza, uretse gusa iyo iryo rangiza ryahagaritswe bitangiwe impamvu n’Urukiko, ifatira asaba rikaba rishingiye ku rubanza rwamaze gucibwa akaba rero yakagombye kurisaba abarangiza urubanza, byananirana akitabaza inzego zibishinzwe, noneho havuka impaka akaba aribwo yitabaza inkiko. [8] Ku byerekeye no gusaba ko “computer LAPTOP“ imwe na “EVDOS” eshatu byo yagombaga gusubizwa byahabwa agaciro mu mafaranga ababuranira RWANDATEL basanga nta shingiro bifite kuko ibyemezo bifashwe mu birego byihutirwa biba ari iby’agateganyo, Urukiko rukaba rutafata icyemezo gihindura ibyemezo byarwo muri bene izi manza. [9] Ikirego RWEMA MUHAMAHORO yashyikirije Urukiko rw’Ikirenga ni ikirego gisubirishamo urubanza ingingo nshya, ikirego nk’iki kikaba ari inzira idasanzwe ikorerwa urubanza rwabaye itegeko, ruba rusigaje gusa kurangizwa kandi nk’uko ingingo ya 187 y’itegeko n◦ 18/2004 ryo kuwa 20/06/2004 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi ibiteganya gusubirishamo urubanza ingingo nshya bikaba bidahagarika irangiza rubanza. Ibyo RWEMA asaba by’uko Urukiko rw’Ikirenga rwafatira umutungo wa

RWANDATEL by’agateganyo uri muri BCR kuri konti n◦ 5004260-01-45, bikaba bitahabwa agaciro kuko bikorerwa urubanza rukiburanishwa mu nkiko rutaraba itegeko. Urukiko rukaba rusanga ahubwo yakwegera inzego zishinzwe kurangiza imanza kugira ngo niba yumva hari ibyo RWANDATEL imugomba hashingiwe ku rubanza rwaciwe zibimuheshe. [10] Urukiko rurasanga kandi ku byerekeye “LAP TOP” na “EVDOS” RWEMA asabira ko byavunjwa mu mafaranga, nabyo biri mu bijyanye no kurangiza imanza, rukaba ntaho rwahera rubihindura mu mafaranga, ahubwo nk’uko byasobanuwe haruguru akaba yakwifashisha inzego zishinzwe kurangiza imanza kugira ngo zibimuheshe nk’uko urubanza rwabitegetse. [11] Hashingiwe ku bisobanuro bitanzwe haruguru, urukiko rusanga ikirego cyihutitrwa cya RWEMA MUHAMAHORO Pascal nta shingiro gifite. III. ICYEMEZO CY’URUKIKO. [12] RWEMEJE ko ikirego cyihutirwa cya RWEMA Muhamahoro Pascal nta shingiro gifite. [13] RUMUTEGETSE kwishyura 9.600 frw y’amagarama y’uru rubanza, atayatanga mu gihe cy’iminsi 8, ayo mafaranga, akurwa mubyo atunze ku ngufu za Leta.