SEBANANI v. UBUSHINJACYAHA

# SEBANANI v. UBUSHINJACYAHA

- Source: Amategeko - Section: Decisions (Judgements) - Date: 2025-11-21 - Case/document no.: RPAA 00299/2025/CA - Collection: Court of Appeal

## Text

## Page 1

SEBANANI v. UBUSHINJACYAHA [Rwanda URUKIKO RW’UBUJURIRE – RPAA 00299/2025/CA (Kanyange, P.J.) 21 Ugushyingo 2025] Amategeko agenga imiburanishirize y’imanza nshinjabyaha – Icyaha cyo gusambanya umwana – Ibimenyetso – Mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale) ababuranyi bakaba barahawe uburyo bwo kuhaba ngo banyomozanye, urukiko nirwo rwemeza ko ibyo bimenyetso bishobora kwemerwa. Incamake y’ikibazo: Uwitwa Mujawamariya Odette yareze Sebanani Severin mu Bugenzacyaha avuga ko yasambanyije umwana we (wa Sebanani) w’imyaka 11 witwa U.U.F yabyaranye n’umugore babanaga nyuma bakaza gutandukana, ibyo bituma Sebanani atangira gukurikiranwa. Nyuma y’iperereza, Ubushinjacyaha bwareze Sebanani mu Rukiko Rwisumbuye rwa Muhanga icyaha cyo gusambanya umwana, bushingiye ku bimenyetso bigizwe n’imvugo z’uwo mwana, iz’abatangabuhamya hamwe na raporo ya muganga, bityo bumusabira guhanishwa igifungo cya burundu. Uregwa yaburanye ahakana icyaha, avuga ko ari icyo yahimbiwe bitewe n’amakimbiranye yari afitanye na nyina w’umwana. Urukiko rwasesenguye ibimenyetso bitandukanye byatanzwe n’Ubushinjacyaha, rusanga ibyo bimenyetso bikomeye kandi bidashidikanywaho, maze rwemeza ko Sebanani ahamwa n’icyaha cyo gusambanya umwana, rumuhanisha igifungo cya burundu. Sebanani yajuririye Urukiko Rukuru / Urugereko rwa Nyanza, avuga ko Urukiko Rwisumbuye rwamuhamije icyaha atakoze, avuga kandi ko mu mvugo z’uwo mwana harimo kwivuguruza. Uhagarariye Ubushinjacyaha yasubije avuga ko ibyo umwana yavuze ko yicuye agasanga nta kariso yambaye kandi yayiraranye ari ukuri, kuko umwana w’imyaka 11 aba azi ibyamubayeho, bityo asaba ko hagumaho imikirize y’urubanza rwajuririwe. Urukiko rwasanze Sebanani atarabashije kuvuguruza ibimenyetso byashingiweho n’Urukiko rwa mbere, hamwe na raporo ya muganga igaragaza ko nta karangabusugi umwana afite kandi ko yari afite udusebe ku gitsina, maze rwemeza ariko ko uregwa akwiye kugabanyirizwa igihano kuko ari ubwa mbere akurikiranwe mu nkiko mu buryo buzwi kandi nta kigaragaza ko hari indi myitwarire mibi yari asanganwe, bityo rumuhanisha igifungo cy’imyaka 22. Sebanani yajuririye Urukiko rw’Ubujurire, we n’umwunganira bavuga ko Urukiko rwamuhamije icyaha cyo gusambanya umwana kandi we nk’uregwa atarapimwe ngo ibizamini bye bihuzwe n’iby’uwo mwana mu rwego rwo kugaragaza ukuri, avuga kandi ko imvugo za nyina w’umwana zitagombaga gushingirwaho kuko bafitanye amakimbirane. Uhagarariye Ubushinjacyaha avuga ko izo mpamvu nta shingiro zifite, kuko nta kintu cyafashwe mu gitsina cy’umwana (samples) kuburyo cyari gupimwa, kandi ko nta bimenyetso yatanze bigaragaza amakimbirane avuga ko yari afitanye na nyina w’umwana.

## Page 2

Urukiko rw’Ubujurire rwasuzumye ibijyanye no kumenya niba Urukiko rwaragombaga gupimisha Sebanani Severin no kumenya niba imvugo za nyina w’umwana ashinjwa gusambanya zitaragombaga gushingirwaho. Incamake y’icyemezo: Mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale) ababuranyi bakaba barahawe uburyo bwo kuhaba ngo banyomozanye, urukiko nirwo rwemeza ko ibyo bimenyetso bishobora kwemerwa. Ubujurire nta shingiro bufite. Amategeko yashingiweho: Itegeko N°15/2004 ryo ku wa 12/06/2004 ryerekeye ibimenyetso mu manza n’itangwa ryabyo, ingingo ya 119. Imanza zifashishijwe: Urubanza RPAA 00692/2021/CA rw’Ubushinjacyaha na Ndayishimiye; rwaciwe n’Urukiko rw’Ubujurire ku wa 20/01/2023; Urubanza RPAA 00199/2025/CA rw’Ubushinjacyaha na Umuhire Udahemuka na Habumugisha Egide, rwaciwe n’Urukiko rw’Ubujurire ku wa 30/10/2025.

Urubanza

I. IMITERERE Y’URUBANZA [1] Uwitwa Mujawamariya Odette yareze Sebanani Severin mu Bugenzacyaha ko yasambanyije umwana we (wa Sebanani ) w’imyaka 11 witwa U.U.F1 yabyaranye n’umugore babanaga nyuma bakaza gutandukana, uwo mwana na musaza we bakaba barabanaga na nyirakuru Mujawamariya Odette; ko uwo mwana yababwiye ko ubwo we na musaza we bari bagiye gusura se, baryamanye uko ari batatu we aryama hagati, yicuye yumva yambaye ubusa se arimo kumusambanya, bucyeye ahita ataha se adahari abibwira nyirakuru, bituma Sebanani Severin atangira gukurikiranwa. [2] Nyuma y’iperereza, Ubushinjacyaha bwareze Sebanani Severin mu Rukiko Rwisumbuye rwa Muhanga icyaha cyo gusambanya umwana, bushingiye ku bimenyetso bigizwe n’imvugo z’uwo mwana, iz’abatangabuhamya na raporo ya muganga, bumusabira guhanishwa igifungo cya burundu. [3] Sebanani Severin yaburanye ahakana icyaha, avuga ko ari icyo yahimbiwe bitewe n’amakimbiranye yari afitanye na nyina wa U.U.F. [4] Mu rubanza RP 00484/2020/TGI/MHG rwaciwe ku wa 18/02/2021, Urukiko rwasesenguye ibimenyetso byatanzwe n’Ubushinjacyaha bigizwe n’imvugo za U.U.F. ushinja se

1 Yahawe iri zina kuko ari umwana

## Page 3

ko yakangutse agasanga yamukuyemo ikariso arimo kumusambanya akabibwira musaza we akanamusaba ko ari we waryama hagati ariko akabyanga, bwacya agataha igitaraganya yagera kwa nyirakuru agahita abimubwira, bagahita bamujyana kwa muganga maze raporo ikagaragaza ko mu gitsina cye hari harimo udusebe, rusanga rero ibyo bimenyetso bikomeye kandi bidashidikanywaho, rubishingiraho rwemeza ko Sebanani Severin ahamwa n’icyaha cyo gusambanya umwana, rumuhanisha igifungo cya burundu. [5] Sebanani Severin yajuririye Urukiko Rukuru/Urugereko rwa Nyanza, avuga ko Urukiko rwamuhamije icyaha atakoze, ko ahubwo byatewe n’amakimbirane yari afitanye na nyina w’uwo mwana wamukoresheje ngo amubeshyere, ko kandi mu mvugo z’uwo mwana harimo kwivuguruza, kuko yavuze ko yicuye agasanga yambaye ubusa, yongera kubwira nyirakuru ko yakangutse agasanga se arimo kumusambanya, mu gihe musaza we bari kumwe abihakana. [6] Uhagarariye Ubushinjacyaha yasubije ko ibyo umwana yavuze ko yicuye agasanga nta kariso yambaye kandi yayiraranye ari ukuri, kuko umwana w'imyaka 11 aba azi ibyamubayeho, kandi ko Sebanani Severin nawe yemera ko bararanye, asaba ko hagumaho imikirize y’urubanza rwajuririwe. [7] Mu rubanza RPA 00258/2021/HC/NYZ rwaciwe ku wa 28/02/2025, Urukiko rwasanze Sebanani Severin atarabashije kuvuguruza ibimenyetso byashingiweho n’Urukiko rwa mbere, bigizwe n’imvugo z’umwana we wasobanuye ko yicuye agasanga arimo kumusambanya akabibwira musaza we bari baryamanye, bwacya agataha se adahari akabibwira nyirakuru; raporo y’Ubuyobozi bw’Inzego z’Ibanze yemeza ko Sebanani Severin amaze kumenya ko icyaha yakoze cyamenyekanye, yatangiye kwihisha akitwaza ibyuma avuga ko uzashaka kumufata azamwica; imvugo za nyirakuru w’umwana wasobanuye ibyo uyu yamubwiye na raporo ya muganga igaragaza ko nta karangabusugi afite kandi ko yari afite udusebe ku gitsina. Rwasanze ariko akwiye kugabanyirizwa igihano kuko ari ubwa mbere akurikiranwe mu nkiko mu buryo buzwi kandi nta kigaragaza ko hari indi myitwarire mibi yari asanganwe, rumuhanisha igifungo cy’imyaka 22. [8] Sebanani Severin yajuririye Urukiko rw’Ubujurire, urubanza ruhabwa RPAA 00299/2025/CA, iburanisha ribera mu ruhame ku wa 04/11/2025 Sebanani Severin yunganiwe na Me Munyaneza Gonzague, Ubushinjacyaha buhagarariwe na Uwanziga Lydia, Umushinjacyaha ku rwego rw’Igihugu. [9] Mu myanzuro y’ubujurire no mu miburanire, Sebanani Severin n’umwunganira bavuga ko Urukiko rwamuhamije icyaha cyo gusambanya umwana kandi atarapimwe ngo ibizamini bye bihuzwe n’iby’uwo mwana mu rwego rwo kugaragaza ukuri, ko n’imvugo za nyina w’umwana zitagombaga gushingirwaho kuko bafitanye amakimbirane kandi akaba avuga ibyo yabwiwe n’uwo mwana. [10] Uhagarariye Ubushinjacyaha avuga ko izo mpamvu nta shingiro zifite, kuko nta kintu cyafashwe mu gitsina cy’umwana (samples) kuburyo cyari gupimwa, ko kandi amakimbirane Sebanani Severin avuga ko yari afitanye na nyina w’umwana nta bimenyetso ayagaragariza.

## Page 4

[11] Muri uru rubanza harasuzumwa ibijyanye no kumenya niba Urukiko rwaragombaga gupimisha Sebanani Severin no kumenya niba imvugo za nyina w’umwana ashinjwa gusambanya zitaragombaga gushingirwaho. II. ISESENGURA RY’IBIBAZO BIRI MU RUBANZA Kumenya niba Urukiko rwaragombaga gupimisha Sebanani Severin no kumenya niba imvugo za nyina w’umwana zitaragombaga gushingirwaho [12] Sebanani Severin n’umwunganira basaba ko hakosorwa inenge ziri mu manza zabanje, zirimo kuba atarapimwe ngo ibizamini bye bihuzwe n’iby’umwana ashinjwa gusambanya kugira ngo bigaragaze ukuri kw’ibyabaye, ko rero nawe yagombaga gupimwa hakarebwa niba igitsina cye cyarahuye n’icy’uwo mwana, hakanarebwa ko hari ibimenyetso byavuye kuri uwo mwana biri kuri Sebanani Severin mu gihe yari kuba atakarabye, kuko hari ibindi byatera ibisebe muganga yabonye ku gitsina cy’umwana ndetse n’ibyatuma akarangabusugi kavaho, cyane cyane ko raporo ya muganga itemeza ko umwana yasambanyijwe ahubwo igaragaza ko nta karangabusugi afite, ko afite ibisebe ku gitsina nta n’amasohoro amuriho, mu gihe umwana avuga ko yaryamye yambaye ikariso agakanguka ntayo yambaye kandi ko yumvise atose, kuba rero muganga atarabonye amasohoro bikaba bitumvikana. [13] Sebanani Severin n’umwunganira bavuga kandi ko Urukiko rwashingiye ku buhamya bwatanzwe na nyina w’umwana kandi bafitanye amakimbirane, kuko bari barashakanye mu buryo butemewe n’amategeko babana nabi bombi bashinjanya gucana inyuma, baratandukana, ko ikigaragaza ayo makimbirane ari uko batakibana. Bavuga kandi ko imvugo za nyina w’umwana zashingiweho hemezwa ko Sebanani Severin yararanye n’umwana ku buriri bumwe kandi kurarana na we bitavuze kumusambanya, ndetse ko avuga ibyo atahagazeho kuko atari ahari ahubwo ari ibyo yabwiwe n’umwana, bityo ko yagirwa umwere kuko nta bimenyetso bifatika bimushinja icyaha uretse ubuhamya bw’abantu batari bahari, kandi bizwi ko bafitanye amakimbirane, ko ahubwo uwo mwana yahamagazwa akagira ibyo asobanura kuko ubu ari mukuru. [14] Uhagarariye Ubushinjacyaha avuga ko izo mpamvu nta shingiro zifite, kuko nta kintu cyafashwe mu gitsina cy’umwana (samples) ku buryo cyari gupimwa, ko ikigaragara muri dosiye ari uko umwana yasuzumwe na muganga agakora raporo agaragaza ko nta karangabusugi afite, ko mu gitsina cye hatukura harimo udusebe kandi ko nta masohoro yari arimo, ko rero ibyari gukurwa kuri Sebanani Severin, byari guhuzwa n’ibizamini by’umwana iyo mu gitsina cye hagaragamo amasohoro, akaba ari yo mpamvu we atapimwe. Iyo raporo ya muganga kandi ikaba ari ikimenyetso cyunganira ibindi bimenyetso byashingiweho birimo imvugo y’umwana wavuze ko ari Sebanani Severin wamusambanyije, raporo y’inzego z’ibanze n’imvugo z’abatangabuhamya. [15] Uhagarariye Ubushinjacyaha avuga kandi ko amakimbirane Sebanani avuga ko yari afitanye na nyina wa U.U.F. nta bimenyetso ayatangira nk’uko biteganywa n’ingingo ya 4 y’Itegeko N° 062/2024 ryo ku wa 20/06/2024 rigenga ibimenyetso22, ko n’ibyo avuga ko ibyo uwo

2 Iyo ngingo iteganya ko: “(1) Urega cyangwa utanze ikibazo agaragaza ikimenyetso cy’ibyo aregera cyangwa asaba. Uwiregura agaragaza ikimenyetso gishyigikira ukwiregura kwe. Icyakora, umucamanza cyangwa ukemura ikibazo ashobora gutegeka umuburanyi cyangwa umwe mu bafitanye ikibazo cyangwa undi muntu gutanga cyangwa kwerekana ikimenyetso afite”.

## Page 5

mwana yavuze bitabayeho ahubwo ari ibyo yashyizwemo na nyina nta shingiro bifite, kuko atari uwo mwana gusa ubivuga, ahubwo yanabibwiye musaza we bikimara kuba, amusaba ko yaryama hagati aranga, hakaba n’imvugo z’uwo musaza we wasobanuye ko se akimara kumenya ko arimo gushakishwa yamubwiye ko icyatumye U.U.F. ataha ari uko yanyaye ku buriri kandi atari byo. Asanga kandi nta mpamvu yo gutumiza uwo mwana kuko ibyo yavuze icyaha kikimara kuba aribyo bifite agaciro, akaba rero yaba aje kuvuga ibyo bamubwiye ngo ashinjure se, ko rero Urukiko rwakwemeza ko ubujurire bwe nta shingiro bufite hakagumaho urubanza rwajuririwe. UKO URUKIKO RUBIBONA [16] Impaka muri uru rubanza zishingiye ku kumenya niba Urukiko rwarirengagije gupimisha Sebanani Severin ngo ibizamini bye bihuzwe n’iby’umwana ashinjwa gusambanya, no kumenya niba imvugo za nyina w’umwana zitaragombaga gushingirwaho kuko bafitanye amakimbirane kandi akaba avuga ibyo yabwiwe n’umwana. [17] Ku byerekeye ibimenyetso mu manza, mu rubanza RPAA 00692/2021/CA rwaciwe n’Urukiko rw’Ubujurire ku wa 20/01/2023 haburana Ubushinjacyaha na Ndayishimiye Jean Damascène, hasesenguwe ingingo ya 119 y’Itegeko N°15/2004 ryo ku wa 12/06/2004 ryerekeye ibimenyetso mu manza n’itangwa ryabyo3, harebwe cyane cyane ku mwihariko w’imanza nshinjabyaha, maze Urukiko rusobanura ko mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale) ababuranyi bakaba barahawe uburyo bwo kuhaba ngo banyomozanye, kandi ko urukiko arirwo rwemeza ko ibyo bimenyetso bishobora kwemerwa. Iri hame ryashingiweho mu zindi manza zakurikiyeho zaciwe n’uru Rukiko, urwaciwe bwa nyuma akaba ari urubanza RPAA 00199/2025/CA, rwaciwe ku wa 30/10/2025, haburana Ubushinjacyaha na Umuhire Udahemuka Régis na Habumugisha Egide. [18] Kugira ngo Sebanani Severin ahamwe n’icyaha cyo gusambanya umwana, inkiko zabanje zabishingiye ku bimenyetso bigizwe n’imvugo z’umwana we wasobanuye ko yicuye agasanga arimo kumusambanya akabibwira musaza we bari baryamanye, bugacya ataha se adahari agahita abibwira nyirakuru, raporo y’Ubuyobozi bw’Inzego z’Ibanze yemeza ko Sebanani Severin amaze kumenya ko icyaha yakoze cyamenyekanye yatangiye kwihisha akitwaza ibyuma avuga ko uzashaka kumufata azamwica, imvugo za nyirakuru w’uwo mwana wasobanuye ibyo yamubwiye na raporo ya muganga igaragaza ko nta karangabusugi afite kandi ko yari afite udusebe ku gitsina. [19] Ku birebana na U.U.F., mu nyandikomvugo ye yo mu Bugenzacyaha, yavuze ko ku wa 27/03/2020 saa 02h46’ bwenda gucya ubwo yari aryamanye na se na musaza we, yumvise se arimo kumusambanya, asobanura ko yaryamye yambaye ikanzu n’ikariso ari hagati ya se na musaza we, bigeze ayo masaha yumva yambaye ubusa se arimo kumusambanya, agira ubwoba bwo gusakuza, yumvise akangutse ahita amanura ikanzu arayimwambika, bucyeye arakaraba azinga imyenda ye se adahari arataha, abwira musaza we ko se yamusambanyije, ageze kwa nyirakuru nawe arabimubwira.

3 Iyo ngingo ihura n’ingingo ya 87 y’Itegeko Nº 062/2024 ryo ku wa 20/06/2024 rigenga ibimenyetso.

## Page 6

[20] Naho mu nyandikomvugo ya musaza wa U.U.F., witwa Amani Chris Brown, yavuze ko babyutse nijoro U.U.F. akamubwira ko atazongera kurara hagati kuko se amukora ku gitsina akanamusoma, ko bukeye U.U.F. yahise azinga imyenda ye arataha avuga ko se yamufashe ku ngufu, se atashye asanga yagiye, amubwira ko yajyanywe n’uko yanyaye ku buriri kandi ntabyo yari yakoze, ko yahise ajya kwa nyirakuru ubyara se nyuma se yumvise bavuga ko arimo guhigwa kuko yafashe umwana ku ngufu ntiyongera kumubona, agaruka ku munsi uwo mwana yagombaga gutahiraho. [21] Muri dosiye harimo kandi raporo ya muganga wasuzumye U.U.F., igaragaza ko nta masohoro (spermatozoïde) yamubonetseho, mu mwanzuro agaragaza ku myanya ndangagitsina ye hari hatukuye hariho n’udusebe (genital examination revealed redness with small lacerations on labia minora), ko nta karangabusugi agifite (no hymen found), ko n’ibizamini bya raboratwari byagaragaje ko afite uburwayi (urogenital infection). [22] Urukiko rw’Ubujurire rurasanga ibyo Sebanani Severin n’umwunganira bavuga ko raporo ya muganga itagaragaza ko umwana yasambanyijwe, bitahabwa ishingiro kuko muganga wamusuzumye yagaragaje ko myanya ndangagitsina ye hari hatukuye kandi hariho udusebe duto, iyo raporo kandi ikaba itagomba kurebwa ukwayo ahubwo ireberwa hamwe n’ibindi bimenyetso, muri byo hakaba harimo imvugo z’umwana umushinja kumusambanya, imvugo za musaza w’uwo mwana yabwiye ko se yamusambanyije, n’iza nyirakuru w’uwo mwana wavuze ibyo yamubwiye akimugeraho. [23] Ku bivugwa na Sebanani Severin n’umwunganira ko ibimenyetso byagaragajwe na raporo ya muganga bishobora guterwa n’ibindi bintu, Urukiko rw’Ubujurire rurasanga nta shingiro bifite kuko ibyo bindi bavuga ko byabitera ntabyo muganga yagaragaje, bakaba kandi badasobanura impurirane yo kuba Sebanani yarararanye n’umwana akavuga ko yamusambanyije, akabibwira musaza we, bugacya ataha se adahari, yagera kwa nyirakuru agahita avuga ibyo se yamukoreye akajyanwa kwa muganga, raporo yakozwe ikagaragaza ibimenyetso birebana n’ihohoterwa ry’igitsina, yahuzwa n’imvugo z’uwo mwana bikagaragaza ko iryo hohoterwa ari ingaruka z’igikorwa yavuze ko yakorewe na se. [24] Ku bijyanye n’uko Sebanani Severin atapimwe ngo ibizamini bye bihuzwe n’iby’umwana aregwa gusambanya, Urukiko rw’Ubujurire rurasanga iyo mpamvu nayo nta shingiro ifite kuko hari raporo ya muganga yuzuzanya n’ibindi bimenyetso Urukiko rwashingiyeho rumuhamya icyaha ku buryo kuba atarapimwe ntacyo byahindura ku gaciro k’ibyo bimenyetso. [25] Ku byo SEBANANI Severin n’umwunganira bavuga ko bitumvikana ukuntu muganga atabonye amasohoro kuri U.U.F. kandi yaravuze ko yaryamye yambaye ikariso agakanguka ntayo yambaye kandi atose, Urukiko rw’Ubujurire rurasanga iby’uko yari atose nta bigaragara mu nyandikomvugo ye, ahubwo yasobanuye ko mbere yo kuva kwa se yabanje gukaraba, bikaba rero byari gutuma hari ibimenyetso bitamubonekaho. [26] Ku birebana n’imvugo za nyina w’umwana, Sebanani Severin n’umwunganira bavuga ko zitagombaga gushingirwaho kuko bafite ibyo bapfa, ndetse ko avuga ibyo yabwiwe n’umwana, Urukiko rurasanga mu manza zaciwe n’inkiko zabanje, ntaho izo mvugo zashingiweho ahubwo hashingiwe ku mvugo z’umwana n’iza nyirakuru.

## Page 7

[27] Ku bisabwa na Sebanani Severin n’umwunganira ko U.U.F. yahamagazwa akagira ibyo asobanura kuko ubu ari mukuru, Urukiko rurasanga atari ngombwa gutumiza uwo mwana, kuko ibyo yavuze bikubiye mu nyandikomvugo yakorewe mu Bugenzacyaha iri muri dosiye, kandi n’ubwo yari akiri umwana akaba atari kuyoberwa kuvuga ibyamubayeho harebwe ikigero yari afite (imyaka 11); kuba rero yarakuze bikaba bitakwambura agaciro ibyo yavuze mbere, cyane cyane ko bifite ibimenyetso bibishimangira bigizwe cyane cyane na raporo ya muganga, n’abatangabuhamya yabibwiye, ndetse n’imyitwarire ya Sebanani Severin nyuma y’uko icyaha kimenyekanye nk’uko yasobanuwe muri raporo y’inzego z’ibanze ikaba igaragaza ko hari icyo yishinjaga. [28] Hashingiwe ku byasobanuwe, Urukiko rw’Ubujurire rurasanga kuba Sebanani Severin atarasuzumwe bitatesha agaciro ibimenyetso byashingiweho kuko bigaragaza ukuri kw’ibyabaye, kandi ko mu kumuhamya icyaha hatashingiwe ku mvugo za nyina w’umwana nk’uko abivuga, bityo imikirize y’urubanza yajuririye ikaba idahindutse, hakanagumaho igifungo cy’imyaka makumyabiri n’ibiri (22) yahanishijwe kubera ko gikwiranye n’uburemere bw’icyaha yakoze. III. ICYEMEZO CY’ URUKIKO [29] Rwemeje ko ubujurire bwatanzwe na Sebanani Severin nta shingiro bufite; [30] Rwemeje ko urubanza RPA 00258/2021/HC/NYZ rwaciwe n’Urukiko Rukuru/Urugereko rwa Nyanza ku wa 28/02/2025 rugumanye agaciro mu ngingo zarwo zose; [31] Rutegetse ko igifungo cy’imyaka makumyabiri n’ibiri (22) Sebanani Severin yahanishijwe ku cyaha cyo gusambanya umwana kigumyeho.