UBUSHINJACYAHA v. DUSABE

# UBUSHINJACYAHA v. DUSABE

- Source: Amategeko - Section: Decisions (Judgements) - Date: 2025-04-17 - Case/document no.: RPAA 00154/2024/CA - Collection: Court of Appeal

## Text

## Page 1

UBUSHINJACYAHA v. DUSABE [Rwanda URUKIKO RW’UBUJURIRE – RPAA 00154/2024/CA (Umugwaneza, P.J.,) 17 Mata 2025] Amategeko agenga ibyaha n’ibohano – Icyaha cyo gutunda no gucuruza ibiyobyabwenge (urumogi) – Icyaha gihanishwa igifungo cya burundu ntigishobora kugabanyirizwa igihano hashingiwe ku mpamvu nyoroshyacyaha ku buryo kijya munsi y’igifungo cy’imyaka 15, kandi n’ihazabu iteganyijwe ntishobora kugabanywa ngo ibe yajya munsi ya kimwe cya kane cy’ihazabu nto iteganyirijwe icyaha cyakozwe. Incamake y’ikibazo: Dusabe Jean Damascène yafatanwe udupfunyika 22 tw’urumogi, Ubushinjacyaha bwamureze icyaha cyo gutunda no gucuruza ibiyobyabwenge (urumogi) mu Rukiko Rwisumbuye rwa Gicumbi, aburana yemera icyaha aregwa, ariko akavuga ko rutari urwe. Urukiko Rwisumbuye rwa Gicumbi rushingiye ku kuba Dusabe Jean Damascène yemera ko yafatanwe urumogi, maze rwemeje ko ahamwa n’icyaha cyo gutunda no gucuruza ibiyobyabwenge byo mu bwoko bw’urumogi, ahanishwa igifungo cy’imyaka makumyabiri n’itanu n’ihazabu y’amafaranga y’u Rwanda miliyoni makumyabiri (20.000.000Frw). Dusabe Jean Damascène yajuririye Urukiko Rukuru, avuga ko yahanishijwe igihano kiri hejuru kandi yaraburanye yemera icyaha anagisabira imbabazi, asaba ko icyo gihano cyagabanywa ndetse kikanasubikwa. Ubushinjacyaha bwavuze ko ibyo Dusabe Jean Damascène asaba yabihabwa kubera ko mu gihe urubanza rwe rwari rutaracibwa burundu hasohotse Itegeko ryoroshya ibihano, bityo ko yagabanyirizwa igihano agahanishwa igifungo cy’imyaka cumi n’itanu (15) n’ihazabu y’amafaranga y’u Rwanda miliyoni eshanu (5.000.000Frw). Urukiko Rukuru rwasanze Dusabe Jean Damascène akwiye kugabanyirizwa igihano kuko yaburanye yemera icyaha akagisabira imbabazi, akaba ataragoye ubutabera ndetse akaba ari ubwa mbere akoze icyaha, ahanishwa igifungo cy’imyaka cumi n’itanu (15), ariko ko atasubikirwa igihano kuko ahanishijwe igifungo kirenze imyaka itanu. Dusabe Jean Damascène yongeye kujurira mu Rukiko rw’Ubujurire, asaba ko yakongera kugabanyirizwa igihano kugeza munsi y’igihano gito giteganywa n’Itegeko, kuko iyo hari amategeko abiri ahana rimwe ryariho icyaha gikorwa n’irindi ryasohotse nyuma ariko urubanza rukiburanishwa, Itegeko rikoreshwa ni iryorohereza uregwa hashingiwe ku manza zaciwe aho Urukiko rwagabanyirije ibihano abakoze icyaha gisa nk’icye baganishwa igihano kiri munsi y’igihano gito giteganywa n’Itegeko. Ubushinjacyaha buvuga ko igihano Dusabe Jean Damascène yahanishijwe kidashobora kongera kugabanywa kuko aricyo gito gishoboka ku cyaha yahamijwe. Incamake y’icyemezo: Icyaha gihanishwa igifungo cya burundu ntigishobora kugabanyirizwa igihano hashingiwe ku mpamvu nyoroshyacyaha ku buryo kijya munsi y’igifungo cy’imyaka 15,

## Page 2

kandi n’ihazabu iteganyijwe ntishobora kugabanywa ngo ibe yajya munsi ya kimwe cya kane cy’ihazabu nto iteganyirijwe icyaha cyakozwe. Ubujurire nta shingiro bufite.

Amatgeko yashingiweho: Itegeko N° 059/2023 ryo ku wa 04/12/2023 ihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ingingo ya 2. Imanza zifashishijwe: Urubanza RPAA 00048/2020/CA rw’ Ubushinjacyaha na Bimenyimana Jean Paul, rwaciye n’Urukiko rw’Ubujurire ku wa 26/05/2022; Urubanza RPAA 00367/2020/CA rw’ Ubushinjacyaha na Twagirumukiza Innocent Réponse, rwaciwe n’Urukiko rw’Ubujurire ku wa 22/12/2023; Urubanza RPAA 00538/2024/CA, rw’ Ubushinjacyaha na Cyuzuzo Jean Claude rwaciwe n’Urukiko rw’Ubujurire ku wa 21/01/2025. Urubanza I. IMITERERE Y’URUBANZA [1] Ku itariki ya 13/07/2019, Dusabe Jean Damascène yafatanwe udupfunyika 22 tw’urumogi, amaze gufatwa ajya kwerekana ahantu hahise urundi urumogi kwa Byiringiro Dominique, bahasanga udupfunyika 19 tw’urumogi rutabye mu butaka. Ubushinjacyaha bwamureze icyaha cyo gutunda no gucuruza ibiyobyabwenge (urumogi) mu Rukiko Rwisumbuye rwa Gicumbi, aburana yemera ko yafatanwe udupfunyika 22 tw’urumogi, ariko akavuga ko rutari urwe, ko Byiringiro Dominique yamuhamagaye ngo aze amutume kuri Harinda, ahageze Byiringiro Dominique ataburura mu mbuga avanamo “enveloppe” arayimuha, mu gihe ari kureba ibyo aribyo inzego z’umutekano ziba zirahageze, Byiringiro Dominiques ariruka hafatwa Dusabe Jean Damascène. [2] Mu rubanza RP 00484/2020/TGI/GIC rwaciwe ku wa 19/08/2020, Urukiko Rwisumbuye rwa Gicumbi rushingiye ku kuba Dusabe Jean Damascène yemera ko yafatanwe udupfunyika 22 tw’urumogi, kuba yemera ko ari nawe wagaragaje aho urundi rumogi udupfunyika 19 rwari rutabye, n’ubuhamya bwa Kambari wagize uruhare mu ifatwe rye, rwemeje ko Dusabe Jean Damascène ahamwa n’icyaha cyo gutunda no gucuruza ibiyobyabwenge byo mu bwoko bw’urumogi, ahanishwa igifungo cy’imyaka makumyabiri n’itanu n’ihazabu y’amafaranga y’u Rwanda miliyoni makumyabiri (20.000.000Frw). [3] Dusabe Jean Damascène yajuririye Urukiko Rukuru, avuga ko yahanishijwe igihano kiri hejuru kandi yaraburanye yemera icyaha anagisabira imbabazi, asaba ko icyo gihano cyagabanywa ndetse kikanasubikwa. Ubushinjacyaha bwavuze ko ibyo Dusabe Jean Damascène asaba yabihabwa kubera ko mu gihe urubanza rwe rwari rutaracibwa burundu hasohotse Itegeko ryoroshya ibihano, bityo ko yagabanyirizwa igihano agahanishwa igifungo cy’imyaka cumi n’itanu (15) n’ihazabu y’amafaranga y’u Rwanda miliyoni eshanu (5.000.000Frw).

## Page 3

[4] Mu rubanza RPA 01000/2020/HC/KIG rwaciwe ku wa 28/02/2024, Urukiko Rukuru rwasanze Dusabe Jean Damascène akwiye kugabanyirizwa igihano kuko yaburanye yemera icyaha akagisabira imbabazi, akaba ataragoye ubutabera ndetse akaba ari ubwa mbere akoze icyaha, ahanishwa igifungo cy’imyaka cumi n’itanu (15) n’ihazabu y’amafaranga y’u Rwanda miliyoni eshanu (5.000.000Frw). Urukiko rwasanze ariko Dusabe Jean Damascène atasubikirwa igihano kuko ahanishijwe igifungo kirenze imyaka itanu. [5] Dusabe Jean Damascène yongeye kujurira mu Rukiko rw’Ubujurire, urubanza ruhabwa RPAA 00154/2024/CA, ruburanishwa mu ruhame ku wa 03/04/2025, yunganiwe na Me Ruberwa N. Silas, Ubushinjacyaha buhagarariwe na Ninahazwa Roselyne, Umushinjacyaha ku rwego rw’Igihugu. [6] Mu bujurire bwe, Dusabe Jean Damascène n’umwunganira basaba ko yakongera kugabanyirizwa igihano kugeza munsi y’igihano gito giteganywa n’Itegeko, hashingiwe ku manza zaciwe aho Urukiko rwagabanyirije ibihano abakoze icyaha gisa nk’icye baganishwa igihano kiri munsi y’igihano gito giteganywa n’Itegeko. Ubushinjacyaha buvuga ko igihano Dusabe Jean Damascène yahanishijwe kidashobora kongera kugabanywa kuko aricyo gito gishoboka ku cyaha yahamijwe. [7] Hakurikijwe iyo miburanire, Urukiko rurasanga muri uru rubanza, ikibazo kigomba gusuzumwa ari ikijyanye no kumenya niba Dusabe Jean Damascène ashobora kongera kugabanyirizwa igihano. II. ISESENGURA RY’IKIBAZO KIGIZE URUBANZA Kumenya niba Dusabe Jean Damascène ashobora kongera kugabanyirizwa igihano [8] Dusabe Jean Damascène avuga ko yahanishijwe igihano kiremereye kandi yaremeye icyaha kuva mu Bugenzacyaha anagisabira imbabazi kandi akaba ari ubwa mbere yakurikiranwaho icyaha icyo aricyo cyose, asaba ko izo mpamvu nyoroshyacyaha zakwitabwaho akagabanyirizwa igihano kugeza munsi y’igihano gito giteganywa n’Itegeko hashingiwe ku byemejwe n’Urukiko rw’Ikirenga mu rubanza RS/INJUST/PEN 0001/17/CS-RP 00001/2017/CS rwaciwe ku wa 06/03/2017 haburana Ubushinjacyaha, Bahirwa Geoffrey n’abandi, cyane cyane mu gika cya 41, aho Urukiko rwavuze ko akamaro k’igihano katareberwa gusa mu buremere bw’icyaha cyakozwe ahubwo hagomba no kwitabwa ku nyungu z’uregwa hagamijwe kumusubiza vuba mu buzima busanzwe, maze rugabanyiriza igihano Bahirwe Geoffrey kugeza munsi y’igihano gito giteganwa n’Itegeko. [9] Me Ruberwa N. Silas, avuga ko Dusabe Jean Damascène yaburanye yemera icyaha aregwa ariko Urukiko Rukuru rumuhanisha igifungo cy’imyaka cumi n’itanu (15) n’ihazabu y’amafaranga y’u Rwanda miliyoni eshanu (5000.000Frw) rushingiye ku ngingo ya 2 y’Itegeko N° 059/2023 ryo ku wa 14/12/2023 rihindura Itegeko N° 68/2018 ryo ku wa 30/08/2018 riteganya ibyaha n’ibihano muri rusange ryasohotse icyaha gikuriranwe cyarakozwe kandi nk’uko byemejwe mu rubanza RPAA 00251/2022/CA rwaciwe ku wa 28/02/2024 haburana ubushinjacyaha na Ntakirutimana Damien mugika cyarwo cya 20 no mu rubanza RPAA 00624/2022/CA rwaciwe ku wa 22/02/2024 haburana ubushinjacyaha na Niyibizi Anicet igika cya 17, iyo hari amategeko abiri ahana rimwe ryariho icyaha gikorwa n’irindi ryasohotse nyuma ariko urubanza rukiburanishwa,

## Page 4

Itegeko rikoreshwa ari iryorohereza uregwa; bityo rero ko hari gushingirwa ku mirongo yatanzwe mbere y’uko ingingo ya 2 y’Itegeko N° 059/2023 ryavuzwe haruguru isohoka, ivuga ko iyo hari impamvu nyoroshyacyaha uregwa agabanyirizwa igihano kugeza munsi y’igihano gito giteganywa n’amategeko, kuko ariyo yorohereza uregwa. [10] Me Ruberwa N. Silas akomeza avuga ko, hashingiwe ku murongo watanzwe n’Urukiko rw’Ikirenga mu rubanza RS/INCONST/SPEC/00003/2019/SC rwaciwe ku wa 4/12/2019, ingingo ya 2 y’Itegeko N° 059/2023 ryavuzwe haruguru, inyuranyije n’Itegeko Nshinga kuko ibuza Umucamanza guca urubanza ashingiye ku bwigenge ahabwa n’Itegeko, bityo ko itagomba gushingirwaho, ahubwo ko hashingirwa ku rubanza RPAA 00305/2021/CA rwaciwe ku wa 26/04/2023 haburana Ubushinjacyaha na Nyirandikubwayo Jeannette nawe warezwe icyaha cyo gucuruza urumogi ahanishwa n’Urukiko rw’Ubujurire igifungo cy’imyaka itanu (5) n’ihazabu y’amafaranga y’u Rwanda miliyoni eshanu (5000.000 Frw) aho kuba imyaka makumyabiri (20) yahanishijwe n’Urukiko Rukuru, n’urubanza RPAA 00295/2021/CA rwaciwe ku wa 04/09/2023 haburana Ubushinjacyaha na Ngendahimana Cyprien nawe waregwaga icyaha cyo gucuruza urumogi, wahanishijwe n’Urukiko rw’Ubujurire igifungo cy’imyaka itandatu (6) aho kuba igifungo cy’imyaka makumyabiri (20) yahanishijwe n’Urukiko Rukuru, maze Dusabe Jean Damascène nawe akagabanyirizwa igihano agahanishwa igifungo cy’imyaka itanu (5). [11] Ubushinjacyaha buvuga ko, hashingiwe ku biteganywa n’ingingo ya 2 y’Itegeko N˚ 059/2023 ryo ku wa 04/12/2023 rihindura Itegeko N˚ 68/2018 ryo ku wa 30/08/2018 riteganya ibyaha n’ibihano muri rusange, agace ka (a) na (d), igihano Dusabe Jean Damascène yahanishijwe n’Urukiko Rukuru aricyo gito gishoboka kikaba kitakongera kugabanywa. [12] Ku bijyanye no gushingira ku manza zaciwe zemeje ko igihano gishobora kugabanywa kikajya munsi y’igihano gito giteganyirijwe icyaha cyakozwe, Ubushinjacyaha buvuga ko bitahabwa ishinhiro kuko nk’uko byemejwe mu rubanza RPAA 00048/2020/CA rwaciwe n’Urukiko rw’Ubujurire ku wa 26/05/2022, haburana Ubushinjacyaha na Bimenyimana Jean Paul (igika cya 26), umurongo wari uriho udashobora gukurikizwa mu gihe Itegeko wari ushingiyeho ryavuyeho (cyangwa ryahinduwe). UKO URUKIKO RUBIBONA [13] Mu manza zitandukanye zaciwe ku bantu bahamijwe icyaha cyo kubika, gucuruza no gutunda ibiyobyabwenge (urumogi) bahanishijwe n’Urukiko Rukuru igihano cy’igifungo cy’imyaka cumi n’itanu (15) n’ihazabu y’amafaranga y’u Rwanda miliyoni eshanu (5.000.000 Frw) hashingiwe ku mpamvu nyoroshyacyaha, bakajurira basaba kongera kugabanyirizwa igihano, Urukiko rw’Ubujurire rushingiye ku ngingo ya 21 y’Itegeko N° 059/2023 ryo ku wa 04/12/2023 ihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, rwemeje ko icyaha gihanishwa igifungo cya burundu kidashobora kugabanyirizwa igihano hashingiwe ku mpamvu nyoroshyacyaha ku buryo kijya munsi y’igifungo

1 Ivuga ko: Iyo umucamanza yemeje impamvu nyoroshyacyaha, ashobora kugabanya igihano ku buryo bukurikira: (a) igifungo cya burundu gishobora kugabanywa ariko ntikijye munsi y’igihano cy’igifungo cy’imyaka 15; (…), (d) igihano cy’ihazabu gishobora kugabanywa kugeza kuri kimwe cya kane cy’igihano cy’ihazabu gito giteganyirijwe icyaha cyakozwe.

## Page 5

cy’imyaka 15, kandi ko n’ihazabu iteganyijwe idashobora kugabanywa ngo ibe yajya munsi ya kimwe cya kane cy’ihazabu nto iteganyirijwe icyaha cyakozwe2. [14] Na none Urukiko rw’Ubujurire rwifashishije ibyemejwe mu rubanza RPAA 00048/2020/CA rwaciye ku wa 26/05/2022 haburana Ubushinjacyaha na Bimenyimana Jean Paul3, rwemeje ko imanza zose zaciwe mbere y’uko Itegeko Nº 59/2023 ryo ku wa 04/12/2023 rihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange yateganyaga uburyo bwo kugabanya ibihano risohoka, zitagikoreshwa4. [15] Nk’uko imikirize y’urubanza rujuririrwa ibigaragaza, mu Rukiko Rukuru Dusabe Jean Damascène yagabanyirijwe igihano, ahanishwa igifungo cy’imyaka cumi n’itanu n’ihazabu y’amafaranga y’u Rwanda miliyoni eshanu (5.000.000 Frw) ku cyaha kimuhama cyo gutunda no gucuruza ibiyobyabwenge byo mu bwoko bw’urumogi, aho kuba igifungo cy’imyaka makumyabiri n’itanu (25) n’ihazabu y’amafaranga y’u Rwanda milioni makumyabiri (20.000.000 Frw) yari yahanishijwe n’Urukiko Rwisumbuye rwa Gicumbi. [16] Urukiko rw’Ubujurire rurasanga igihano cy’igifungo cy’imyaka cumi n’itanu (15) n’ihazabu y’amafaranga y’u Rwanda miliyoni eshanu (5.000.000 Frw) Dusabe Jean Damascène yahanishijwe n’Urukiko Rukuru, kidashobora kongera kugabanywa kuko cyagabanyijwe mu buryo buhagije kandi kikaba aricyo gihano gito giteganywa n’Itegeko ku cyaha kimuhama cyo gutunda no gucuruza ibiyobyabwenge byo mubwoko bw’urumogi, kikaba kidashobora kugibwa munsi. [17] Naho ku bijyanye n’imanza zaciwe z’abantu baregwa icyaha nk’icyo Dusabe Jean Damascène aregwa bagabanyirijwe igihano kugeza munsi y’igihano gito giteganywa n’Itegeko, Urukiko rw’Ubujurire rurasanga izo manza zidashobora gushingirwaho kuko umurongo zashingiyeho wemerera Umucamanza kugabanya igihano kugeza munsi y’igihano gito giteganywa n’Itegeko igihe hari impamvu nyoroshyacyaha, wari ushingiye ku ngingo ya 60 y’Itegeko N° 68/2018 ryo ku wa 30/08/2018 riteganya ibyaha n’ibihano muri rusanga, iyo ngingo ikaba yarahinduwe n’ingingo ya 2 y’Itegeko N° 059/2023 ryo ku wa 04/12/2023, kandi nk’uko byemejwe mu manza zibukijwe mu gika cya 14 cy’uru rubanza, bene izo manza zigabanya igihano kugeza munsi y’igihanogito giteganywa n’Itegeko zikaba zitagikoreshwa. [18] Ku bijyanye n’imiburanire ya Me Ruberwa N. Silas, y’uko Itegeko N° 059/2023 ryo ku wa 04/12/2023 rihindura Itegeko N° 68/2018 ryo ku wa 30/08/2018 riteganya ibyaha n’ibihano muri rusange ritagombaga gushingirwaho kuko ryasohotse icyaha cyarakozwe, Urukiko rw’Ubujurire rurasanga nta shingiro ifite kuko Itegeko rihana icyaha cy’ikoreshwa ritemewe

2 Murizo harimo nk’urubanza RPAA 00538/2024/CA rwaciwe ku wa 21/01/2025 haburana Ubushinjacyaha na Cyuzuzo Jean Claude (igika cya 12), urubanza RPAA 00594/2024/CA rwaciwe ku wa 26/02/2025 haburana Ubushinjacyaha na Uwayezu Claudette (igika cya 14) n’zindi.

3Urwo rubanza mu gika cyarwo cya 26 rwemeje ko Umurongo wari uriho udashobora gukurikizwa mu gihe itegeko wari ushingiyeho ryavuyeho cyangwa ryahinduwe.

4 Reba urubanza RPAA 00367/2020/CA rwaciwe ku wa 22/12/2023 haburana Ubushinjacyaha na Twagirumukiza Innocent Réponse (igika cya 17-18), urubanza RPAA 00538/2024/CA rwaciwe ku wa 21/01/2025, haburana Ubushinjacyaha na Cyuzuzo Jean Claude (igika cya 12) n’izindi

## Page 6

ry’ibiyobyabwenge4 ritigeze rihinduka kuva aho icyaha gikurikiranwe cyakorewe, ahubwo icyahindutse ni ingingo 60 y’iryo Tegeko yateganyaga uburyo ibihano bigabanywa igihe hari impamvu nyoroshyacyaha, yateganyaga ko iyo hari impamvu nyoroshyacyaha, igihano cyo gufungwa burundu gishobora kugabanywa ariko ntikijye munsi y’igifungo cy’imyaka 25, yaje guhindurwa n’ingingo ya 2 y’Itegeko N° 059/2023 ryavuzwe haruguru, iteganya ko iyo hari impamvu nyoroshyacyaha, igifungo cya burundu gishobora kugabanywa ariko ntikijye munsi igifungo cy’imyaka 15. Bivuze ko ingingo ya 2 y’Itegeko N° 059/2023 ariyo igabanya igihano ku buryo bworoheje (igifungo cya burundu gishobora kugabanywa ariko ntikije munsi y’imyaka 15) ugereranyije n’ingingo ya 60 y’Itegeko N° 68/2018 (igifungo cya burundu gishobora kugabanywa ariko ntikijwe munsi y’imyaka 25) igihe hari impamvu nyoroshyacyaha. Urukiko rw’Ubujurire rurasanga rero, nta kosa ryakozwe mu gushingira kuri iyo ngingo ya 2 y’Itegeko N° 059/2023 yavuzwe haruguru. [19] Ku bijyanye na none n’imiburanire ya Me Ruberwa N. Silas y’uko ingingo ya 2 y’Itegeko N° 059/2023 ryavuzwe haruguru inyuranyije n’Itegeko Nshinga, bityo ko idakwiye gushingirwaho, Urukiko rw’Ubujurire rurasanga nayo nta shingiro ifite kuko uretse kuba abivuga mu magambo gusa atagaragaza ko hari icyemezo cyafashwe n’Urukiko rubifite ububasha kibyemeza uko nk’uko biteganywa mu ngingo ya 796 n’iya 727 z’Itegeko N° 30/2018 ryo ku wa 02/06/2018 rigena ububasha bw’inkiko nk’uko ryahinduwe kugeza ubu. [20] Hashingiwe ku bisobanuro byose byatanzwe muri uru rubanza, Urukiko rw’Ubujurire rurasanga ubujurire bwatanzwe na Dusabe Jean Damascène nta shingiro bufite, urubanza yajuririye rukaba rudahindutse. III. ICYEMEZO CY’URUKIKO [21] Rwemeje ko ubujurire bwatanzwe na Dusabe Jean Damascène, nta shingiro bufite; [22] Rwemeje ko imikirize y’urubanza RPA 01000/2020/HC/KIG, rwaciwe n’Urukiko Rukuru ku wa 28/02/2024, idahindutse; [23] Rwemeje ko igihano cy’igifungo cy’imyaka cumi n’itanu (15) n’ihazabu y’amafaranga y’u Rwanda miliyoni eshanu (5.000.000Frw) Dusabe Jean Damascène yahanishijwe muri urwo rubanza, kigumyeho; [24] Rutegetse ko Dusabe Jean Damascène asonewe gutanga amagarama y’urubanza kuko aburana afunze.

Reba urubanza RPAA 00367/2020/CA rwaciwe ku wa 22/12/2023 haburana Ubushinjacyaha na Twagirumukiza Innocent Réponse (igika cya 17-18), urubanza RPAA 00538/2024/CA rwaciwe ku wa 21/01/2025, haburana Ubushinjacyaha na Cyuzuzo Jean Claude (igika cya 12) n’izindi