UBUSHINJACYAHA v. IRAGENA

# UBUSHINJACYAHA v. IRAGENA

- Source: Amategeko - Section: Decisions (Judgements) - Date: 2025-11-18 - Case/document no.: RPAA 00495/2025/CA - Collection: Court of Appeal

## Text

## Page 1

UBUSHINJACYAHA v. IRAGENA [Rwanda URUKIKO RW’UBUJURIRE – RPAA 00495/2025/CA (Mukamurenzi, P.J.) 18 Ugushyingo 2025] Amategeko agenga imanza z’inshinjabyaha – Kugurisha ibiyobyabwenge – Kugabanya igihano iyo hari impamvu nyoroshyacyaha – Iyo hari impamvu nyoroshyacyaha zemejwe n’umucamanza, icyaha cyo kugurisha ibiyobyabwenge gihanishwa igifungo cya burundu n’ihazabu itari munsi ya 20.000.000 Frw ariko itarenze 30.000.000 Frw, icyo gihano gishobora kugabanywa ariko ntikijye munsi y’igifungo cy’imyaka 15 n’ihazabu 5.000.000 Frw. Incamake y’ikibazo: Iragena Josiane yakurikiranyweho n’Ubushinjacyaha icyaha cyo kubika no gucururuza ibiyobyabwenge bwo mu bwoko bw’urumogi nyuma yuko afatanywe udupfunyika 24 tw’urumogi, bumuregera Urukiko Rwisumbuye rwa Muhanga. Uregwa aburana yemera icyaha. Urwo Rukiko rwaciye urubanza rwemeza ko uregwa ahamwa n’iicyaha cyo gucuruza ibiyobyabwenge, rumuhanisha igifungo cy’imyaka 25 n’ihazabu ya 20.000.000 Frw. Uregwa yajuririye mu Rukiko Rukuru, Urugereko rwa Nyanza asaba ko inyito y’icyaha yahindurwa agahanirwa icyaha cyo gufatanwa urumogi kuko atarucuruje. Urwo Rukiko rwemeza ko ahamwa n’icyaha cyo gucuruza ibiyobyabwenge byo mu bwoko bw’urumogi nk’uko byemejwe ku rwego rwa mbere. Icyakora rumugabanyiriza ibihano kubera ko ari ubwa mbere akurikiranyweho icyaha, rumuhanisha igifungo cy’imyaka 15 n’ihazabu ya 5.000.000 Frw. Uregwa yajuririye mu Rukiko rw’Ubujurire asaba kongera kugabanyizwa igihano kuko ibyo yahanishijwe ari birebire kandi yaraburanye yemera icyaha aregwa mu buryo budashidikanywaho anagisabira imbabazi ndetse anasobanura uburyo yagikoze. Ubushinjacyaha buvuga ko igihano uregwa yahanishijwe kitakongera kugabanywa kuko aricyo gito gishoboka giteganywa n’Itegeko Nº 059/23 ryo ku wa 4/12/23 rihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange. Incamake y’icyemezo: Iyo hari impamvu nyoroshyacyaha zemejwe n’umucamanza, icyaha cyo kugurisha ibiyobyabwenge gihanishwa igifungo cya burundu n’ihazabu itari munsi ya 20.000.000 Frw ariko itarenze 30.000.000 Frw, icyo gihano gishobora kugabanywa ariko ntikijye munsi y’igifungo cy’imyaka 15 n’ihazabu 5.000.000 Frw. Ubujurire nta shingiro bufite. Nta mategeko yashingiweho Imanza zifashishijwe: RPAA 00538/2024/CA; Ubushinjacyaha vs Cyuzuzo Jean Claude rwaciwe n’Urukiko rw’Ubujurire ku wa 21/01/2025;

## Page 2

RPAA 00885/2024/CA; Ubushinjacyaha vs Nshimiyimana Eric rwaciwe n’Urukiko rw’Ubujurire ku wa 16/05/2025. Urubanza I. IMITERERE Y’URUBANZA [1] Ku wa 09/02/2022, Iragena Josiane ari mu Mudugudu wa Gitega, mu Kagari ka Kivumu, mu Murenge wa Musambira, Akarere ka Kamonyi, yafashwe afite urumogi udupfunyika makumyabiri na tune (24 boules), yaruhishe mu mabere, ashyikirizwa Ubugenzacyaha, atangira gukurikiranwa. Nyuma y’iperereza, Ubushinjacyaha bwamureze mu Rukiko Rwisumbuye rwa Muhanga icyaha cyo kubika no gucuruza ibiyobyabwenge byo mu bwoko bw’urumogi, aburana yemera icyaha aregwa. [2] Mu rubanza RP 00230/2022/TGI/MHG rwaciwe ku wa 09/3/2022, Urukiko rwemeje ko Iragena Josiane ahamwa n’icyaha cyo gucuruza ibiyobyabwenge byo mu bwoko bw’urumogi rushingiye ku kuba yaraburanye urubanza mu mizi yemera icyaha; ku mvugo za Yankurije Béatrice na Mutsindashyaka Isaϊe no ku nyandikomvugo y’ifatira ry’urumogi, maze rumuhanisha igifungo cy’imyaka 25 n’ihazabu ya 20.000.000 Frw [3] Iragena Josiane yajuririye Urukiko Rukuru, Urugereko rwa Nyanza asaba ko inyito y’icyaha yahindurwa agahanirwa icyaha cyo gufatanwa urumogi kuko atarucuruje. Uhagarariye Ubushinjacyaha yavuze ko ibyo asaba bitahabwa ishingiro kubera ko yemera kubika urumogi kandi yari arubitse kugirango arugurishe. [4] Mu rubanza RPA 00215/2022/HC/NYZ rwaciwe ku wa 22/04/2025, Urukiko Rukuru, Urugereko rwa Nyanza rwasanze ubujurire bwatanzwe na Iragena Josiane bugamije gusaba guhindurirwa inyito y’icyaha nta shingiro bufite, rwemeza ko ahamwa n’icyaha cyo gucuruza ibiyobyabwenge byo mu bwoko bw’urumogi nk’uko byemejwe ku rwego rwa mbere. Icyakora, urwo Rukiko rumugabanyiriza ibihano kubera ko ari ubwa mbere akurikiranyweho icyaha, rumuhanisha igifungo cy’imyaka 15 n’ihazabu ya 5.000.000 Frw. [5] Iragena Josiane yajuririye imikirize y’urubanza mu Rukiko rw’Ubujurire, urubanza ruhabwa RPAA 00495/2025/CA, iburanisha ribera mu ruhame ku wa 06/11/2025, Iragena Josiane yitabye yunganiwe na Me Munyansanga Gisèle naho Ubushinjacyaha buhagarariwe na Ntawangundi Béatrice. [6] Mu myanzuro y’ubujurire no mu miburanire ye, Iragena Josiane avuga ko yajuriye agamije gusaba ko ibihano yahawe byakongera kugabanywa kuko ari birebire kandi yaraburanye yemera icyaha aregwa mu buryo budashidikanywaho anagisabira imbabazi ndetse anasobanura uburyo yagikoze. Naho Uhagarariye Ubushinjacyaha avuga ko igihano yahanishijwe kitakongera kugabanywa kuko aricyo gito gishoboka giteganywa n’Itegeko Nº 059/23 ryo ku wa 4/12/23 rihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange.

## Page 3

[7] Muri uru rubanza harasuzumwa ikibazo cyo kumenya niba igihano Iragena Josiane yahanishijwe gishobora kongera kugabanywa.

II. ISESENGURA RY’IKIBAZO KIGIZE URUBANZA Kumenya niba igihano Iragena Josiane yahanishijwe gishobora kongera kugabanywa [8] Iragena Josiane avuga ko impamvu yatumye ajurira ari ukugira ngo atakambire uru Rukiko rwongere rumugabanyirize igihano yahawe kuko kiremereye kandi yaraburanye yemera icyaha aregwa mu buryo budashidikanywaho anagisabira imbabazi, ko indi mpamvu ituma abisaba ari uko yasize abana bato bakeneye kurerwa, kandi nawe akaba yarize imyuga izamubeshaho mu buzima busanzwe. [9] Umwunganira avuga ko ibyo asaba byasuzumwa mu bushishozi bw’Urukiko, ariko ku bwe asanga igihano yahawe cy’igifungo cy’imyaka 15 n’ihazabu ya 5 000 000 Frw gikurikije amategeko, kandi ko yabimusobanuriye. [10] Uhagarariye Ubushinjacyaha avuga ko Iragena Josiane yahanishijwe igihano gito gishoboka nk’uko biteganywa n’ingingo ya 2 y’Itegeko Nº 059/23 ryo ku wa 04/12/23 rihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ko rero kitakongera kugabanywa. UKO URUKIKO RUBIBONA [11] Impaka ziri mu rubanza zishingiye ku kumenya niba igifungo cy’imyaka 15 n’ihazabu ya 5.000.000 Frw Urukiko Rukuru, Urugereko rwa Nyanza rwahanishije Iragena Josiane gishobora kongera kugabanywa. [12] Ikibazo kijyanye no kumenya igihano gito gishobora guhabwa uwahamijwe icyaha cyo gucuruza ibiyobyabwenge byo mu bwoko bw’urumogi mu gihe hari impamvu nyoroshyacyaha, cyasesenguwe n’Urukiko rw’Ubujurire mu manza zitandukanye zirimo Urubanza RPAA 00538/2024/CA, rwaciwe n’Urukiko rw’Ubujurire ku wa 21/01/2025 haburana Ubushinjacyaha na Cyuzuzo Jean Claude1 ndetse n’urubanza RPAA 00885/2024/CA, rwaciwe n’Urukiko rw’Ubujurire ku wa 16/05/2025 Ubushinjacyaha buburana na Nshimiyimana Eric2. Umurongo uhuriweho n’izo manza ni uko iyo hari impamvu nyoroshyacyaha zemejwe n’umucamanza, icyaha cyo kugurisha ibiyobyabwenge gihanishwa igifungo cya burundu n’ihazabu itari munsi ya 20.000.000 Frw ariko itarenze 30.000.000 Frw, icyo gihano gishobora kugabanywa ariko ntikijye munsi y’igifungo cy’imyaka 15 n’ihazabu 5.000.000 Frw. [13] Nk’uko imikirize y’urubanza rujuririrwa ibigaragaza, Urukiko Rukuru, urugereko rwa Nyanza rushingiye ku kuba ari ubwa mbere Iragena Josiane akurikiranywe, rwamugabanyirije igihano kiva ku gifungo cy’imyaka 25 n’ihazabu ya 20.000.000 Frw yahanishijwe ku rwego rwa mbere, rumuhanisha igifungo cy’imyaka 15 n’ihazabu ya 5.000.000 Frw.

1 igika cya 12 cy’urwo rubanza. 2 igika cya 18 cy’urwo rubanza

## Page 4

[14] Urukiko rw’Ubujurire rushingiye ku murongo wavuzwe haruguru mu gika cya 12, rurasanga igifungo cy’imyaka 15 n’ihazabu ya 5.000.000 Frw Iragena Josiane yahanishijwe n’Urukiko Rukuru, urugereko rwa Nyanza kidashobora kongera kugabanywa, kuko igihano yahawe ari cyo gito gishoboka giteganyirijwe icyaha cyo gucuruza ibiyobyabwenge byo mu bwoko bw’urumogi mu gihe hari impamvu nyoroshyacyaha zemejwe n’umucamanza. Bityo rero, urubanza yajuririye rukaba rugumanye agaciro mu ngingo zarwo zose.

III. ICYEMEZO CY’URUKIKO [15] Rwemeje ko ubujurire bwa Iragena Josiane nta shingiro bufite; [16] Rwemeje ko imikirize y’urubanza RPA 00215/2022/HC/NYZ rwaciwe n’Urukiko Rukuru, Urugereko rwa Nyanza ku wa 22/04/2025 idahindutse; [17] Rwemeje ko igihano cy’igifungo cy’imyaka 15 n’ihazabu 5.000.000 Frw, Iragena Josiane yahanishijwe mu rubanza rujuririrwa kigumyeho.