UBUSHINJACYAHA v. NTAWUHIGUMUGABO

# UBUSHINJACYAHA v. NTAWUHIGUMUGABO

- Source: Amategeko - Section: Decisions (Judgements) - Date: 2025-10-30 - Case/document no.: RPAA001331/2024/CA - Collection: Court of Appeal

## Text

## Page 1

UBUSHINJACYAHA v. NTAWUHIGUMUGABO [Rwanda URUKIKO RW’UBUJURIRE – RPAA001331/2024/CA (Mukandamage, J. P.) 30 Ukwakira 2025] Amategeko agenga ibimenyetso – Ibimenyetso mu manza nshinjabyaha – Mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye, ababuranyi bakaba barahawe uburyo bwo kuhaba ngo banyomozanye, kandi ko urukiko arirwo rwemeza ko ibyo bimenyetso bishobora kwemerwa. Incamake y’ikibazo: Ubushinjacyaha bwareze Ntawuhigumugabo mu Rukiko Rwisumbuye rwa Gasabo, nyuma y’uko hakozwe iperereza bugasanga yarasambanyije umwana w’imyaka irindwi, bumusabira guhamwa n’icyaha cyo gusambanya umwana no guhanishwa igihano cy’igifungo cya burundu. Uregwa yaburanye ahakana icyaha aregwa, avuga ko abamurega bamubeshyera bamuziza igare bari baramuguriye bakarimwiba, ko ibyo yemeye mu Bugenzacyaha yabitewe n’inkoni yakubiswe, asaba kugirwa umwere. Urukiko Rwisumbuye, rushingiye ku bimenyetso, rwasanze Uregwa ahamwa n’icyaha cyo gusambanya umwana, maze rumuhanisha igifungo cya burundu. Uregwa yajuririye icyo cyemezo mu Rukiko Rukuru avuga ko yahamijwe icyaha atakoze, ko urukiko rwashingiye ku mvugo z’abatangabuhamya bafitanye isano ya hafi n’abamurega, kandi ko atigeze apimwa ngo hamenyekane ko amasohoro Muganga yabonye mu gitsina cy’umwana ari aye, kuko kuba akarangabusugi k’umwana karacitse bishobora guterwa n’indi mpamvu. Avuga kandi ko ubwo yari mu Bugenzacyaha yemeye icyaha kubera inkoni yakubiswe no kuba atari yunganiwe ndetse ko afite ikibazo cyo mu mutwe, asaba ko cyakurikiranwa. Ubushinjacyaha buvuga ko ubujurire bw’Uregwa butahabwa ishingiro, kuko raporo ya Muganga yagaragaje ko hari ibimenyetso by’uko umwana yasambanyijwe kandi ko yemeye icyaha mu Bugenzacyaha. Bityo, Urukiko Rukuru rwaciye urubanza rwemeza ko ibimenyetso byatanzwe n’Ubushinjacyaha bihamya Uregwa icyaha cyo gusambanya umwana, ko kuba atarapimwe bidakuraho ibindi bimenyetso birimo kuba mu Bugenzacyaha yaremeye ko yasambanyije umwana. Icyo cyemezo, Uregwa yakijuririye muri uru Rukiko rw’Ubujurire avuga ko yahamijwe icyaha atakoze kuko urukiko rwashingiye ku bimenyetso bishidikanywaho, asaba kugirwa umwere. Asobanura ko kuba raporo ya Muganga igaragaza ko mu gitsina cy’umwana hatukuye kandi ari ibya vuba, bidasobanuye ko byatewe no gusambanywa nawe. Avuga kandi ko atajyanwe kwa Muganga ngo apimwe, ndetse ibipimo bye bihuzwe n’ibyapimwe ku mwana, maze hamenyekane niba koko ari we wamusambanyije. Uregwa akomeza avuga ko ubuhamya bwa Musabyimana butari bukwiye gushingirwaho nk’ikimenyetso kimuhamya icyaha, kuko yamenye ko umwana yasambanyijwe bivuye mu bandi bana, ntabanze kubibwira nyina w’umwana ngo abe ari we ubikurikirana, yanareba mu gitsina cy’umwana ntahite amujyana kwa Muganga, kuko bigaragara ko yajyanwe nyuma y’iminsi 3, ibimenyetso byarasibanganye. Asobanura kandi ko ubwo buhamya bwa Musabyimana buvuguruzanya na raporo yakozwe n’inzego z’ibanze, ko uko kuvuguruzanya gushimangira ko nta kuri kuri mu byo ashinjwa. Ubushinjacyaha bwasubije ubujurire bw’Uregwa buvuga ko ibimenyetso byashingiweho n’inkiko zabanje, birimo raporo ya Muganga wasuzumye umwana, ubuhamya bwa Musabyimana, bishimangira ukwemera icyaha kw’Uregwa ubwo yabazwaga mu gihe cy’iperereza, bikaba ari ibimenyetso bihagije. Busobanura ko Muganga wasuzumye umwana yagendeye kubyo yasabwe gukora, kandi ko ibyo yagaragaje byuzuzanya n’ibindi bimenyetso bihuriza ku kuba umwana yarasambanyijwe, ndetse ko bitari itegeko ko Uregwa yagombaga gupimwa. Ku bijyanye n’ubuhamya bwatanzwe, Ubushinjacyaha buvuga ko icyaha cyakorewe umwana kireba sosiyeti muri rusange, kitarebaga umwana na nyina gusa, ahubwo ko umuntu uwo ari we wese yemerewe gutanga amakuru ku nzego zibishinzwe mu gihe amenye ikorwa ry’icyaha, kimwe n’uko Ubugenzacyaha

## Page 2

bushobora kwibwiriza bukaba bwagenza icyaha nk’iki mu gihe kimenyekanye. Ku bijyanye n’ibyo Uregwa avuga ko yemeye icyaha mu Bugenzacyaha kubera inkoni yakubiswe, Ubushinjacyaha busobanura ko usibye kubivuga gusa nta bimenyetso abitangira, kandi ko ataribyo byonyine byashingiweho gusa, ahubwo hari n’ibindi bimenyetso birimo ubuhamya na raporo ya Muganga wasuzumye umwana. Incamake y’icyemezo: Mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye, ababuranyi bakaba barahawe uburyo bwo kuhaba ngo banyomozanye, kandi ko urukiko arirwo rwemeza ko ibyo bimenyetso bishobora kwemerwa. Ubujurire nta shingiro bufite. Amategeko yashingiweho: Itegeko Nº 062/2024 ryo ku wa 20/06/2024 rigenga ibimenyetso, ingingo ya 87. Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, ingingo ya 111. Itegeko N° 68/2018 ryo ku wa 30/08/2018 riteganya ibyaha n’ibihano muri rusange nk’uko ryahinduwe kugeza ubu, ingingo ya 133. Itegeko N° 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, ingingo ya 119. Imanza zifashishijwe: RPA0010/06/CS - RPA0011/06/CS - RPA0012/06/CS, Ubushinjacyaha v. Sgt Ntaganira na bagenzi be rwaciwe n’Urukiko rw’Ikirenga ku wa 18/07/2008. RPAA01283/2024/CA, Ubushinjacyaha v. Ndayizeye rwaciwe n’Urukiko rw’Ubujurire ku wa 18/07/2025. Urubanza I. IMITERERE Y’URUBANZA [1] Musabyimana Delphine yamenye amakuru yuko umwana witwa U.C.1 w’imyaka 7 y’amavuko abereye nyina w’abo afite ikibazo mu gitsina, hanyuma arebye abona havamo amaraso avanze n’ibintu by’umweru, umwana amubwira ko mu ijoro ryo ku wa 05/06/2019, ubwo nyina atari ahari, Ntawuhigumugabo Vincent yinjiye mu nzu ntiyagira icyo avuga amuryama hejuru amushyiramo ikinyoni cye, arize amukubita urushyi ahita asohoka aragenda. Ntawuhigumugabo Vincent yarafashwe atangira gukurikiranwa n’Ubugenzacyaha. [2] Nyuma y’iperereza, Ubushinjacyaha bwareze Ntawuhigumugabo Vincent mu Rukiko Rwisumbuye rwa Gasabo icyaha cyo gusambanya umwana, busaba ko ahamwa n’icyo cyaha agahanishwa igifungo cya burundu. [3] Ntawuhigumugabo Vincent yaburanye ahakana icyaha aregwa, avuga ko abamurega bamubeshyera bamuziza igare bari baramuguriye bakarimwiba, ko ibyo yemeye mu Bugenzacyaha yabitewe n’inkoni yakubiswe, asaba kugirwa umwere.

1 Amazina arahinwe kubera kamere y’icyaha n’imyaka y’uwahohotewe.

## Page 3

[4] Mu rubanza RP00944/2019/TGI/GSBO rwaciwe ku wa 27/11/2020, Urukiko Rwisumbuye rwa Gasabo rwasanze Ntawuhigumugabo Vincent ahamwa n’icyaha cyo gusambanya umwana, rumuhanisha igifungo cya burundu rushingiye ku bimenyetso bikurikira: a) imvugo ze mu Bugenzacyaha yemera icyaha; b) raporo ya Muganga igaragaza ko umwana yasambanyijwe; c) Ubuhamya bwatanzwe na Musabyimana Delphine watanze ikirego; [5] Ntawuhigumugabo Vincent yajuririye Urukiko Rukuru avuga ko yahamijwe icyaha atakoze, ko urukiko rwashingiye ku mvugo z’abatangabuhamya bafitanye isano ya hafi n’abamurega, kandi ko atigeze apimwa ngo hamenyekane ko amasohoro Muganga yabonye mu gitsina cy’umwana ari aye, kuko kuba akarangabusugi k’umwana karacitse bishobora guterwa n’indi mpamvu. Yavuze kandi ko yemeye icyaha mu Bugenzacyaha abitewe n’inkoni yakubiswe no kuba atari yunganiwe, ndetse ko afite ikibazo cyo mu mutwe, asaba ko cyakurikiranwa. Uhagarariye Ubushinjacyaha yavuze ko ubujurire bwa Ntawuhigumugabo Vincent butahabwa ishingiro, kuko raporo ya Muganga yagaragaje ko hari ibimenyetso by’uko umwana yasambanyijwe kandi ko yemeye icyaha mu Bugenzacyaha. [6] Mu rubanza RPA00022/2021/HC/KIG rwaciwe ku wa 13/11/2024, Urukiko Rukuru rwasanze ubujurire bwatanzwe na Ntawuhigumugabo Vincent nta shingiro bufite, kuko ibimenyetso byatanzwe n’Ubushinjacyaha bikimuhamya, ko kuba atarapimwe bidakuraho ibindi bimenyetso birimo kuba mu Bugenzacyaha yaremeye ko yasambanyije umwana, hanyuma rumugabanyiriza igihano kubera ko ari ubwa mbere akurikiranwe mu butabera ku buryo buzwi, rumuhanisha imyaka 20 y’igifungo. [7] Ntawuhigumugabo Vincent yajuririye Urukiko rw’Ubujurire, urubanza ruhabwa RPAA01331/2024/CA. Iburanisha mu ruhame ryabaye ku wa 08/10/2025, Ntawuhigumugabo Vincent yunganiwe na Me Musasangohe Illuminée, naho Ubushinjacyaha buhagarariwe na Habineza Jean Damascène, Umushinjacyaha ku rwego rw’Igihugu. [8] Mu myanzuro no mu miburanire, Ntawuhigumugabo Vincent avuga ko yahamijwe icyaha cyo gusambanya umwana hashingiwe ku bimenyetso bishidikanywaho, agasaba kugirwa umwere. Uhagarariye Ubushinjacyaha avuga ko ubujurire bwe nta shingiro bufite, kuko ibimenyetso byose bimuhamya icyaha mu buryo budashidikanywaho, ko urubanza rwajuririwe rutahinduka. [9] Muri uru rubanza harasuzumwa ikibazo cyo kumenya niba Ntawuhigumugabo Vincent yarahamijwe icyaha cyo gusambanya umwana hashingiwe ku bimenyetso bishidikanywaho. II. ISESENGURWA RY’IKIBAZO KIGIZE URUBANZA Kumenya niba Ntawuhigumugabo Vincent yarahamijwe icyaha cyo gusambanya umwana hashingiwe ku bimenyetso bishidikanywaho [10] Ntawuhigumugabo Vincent na Me Musasangohe Illuminée umwunganira bavuga ko Urukiko Rukuru rwamuhamije icyaha cyo gusambanya umwana rushingiye ku bimenyetso bishidikanywaho. Bavuga ko kuba raporo ya Muganga igaragaza ko mu gitsina cy’umwana hatukuye kandi ari ibya vuba, bidasobanuye ko byatewe no gusambanywa na Ntawuhigumugabo Vincent, kuko byashoboraga guterwa nuko Musabyimana Delphine yakorakoye mu gitsina cy’umwana. Bavuga kandi ko Ntawuhigumugabo Vincent atajyanwe kwa Muganga ngo apimwe, ndetse ibipimo bye bihuzwe n’ibyapimwe ku mwana, maze hamenyekane niba koko ari we wamusambanyije. [11] Ntawuhigumugabo Vincent na Me Musasangohe Illuminée umwunganira bavuga kandi ko ubuhamya bwa Musabyimana Delphine butari bukwiye gushingirwaho nk’ikimenyetso kimuhamya

## Page 4

icyaha, kuko yamenye ko umwana yasambanyijwe bivuye mu bandi bana, ntabanze kubibwira nyina w’umwana ngo abe ari we ubikurikirana, yanareba mu gitsina cy’umwana ntahite amujyana kwa Muganga, kuko bigaragara ko yajyanwe nyuma y’iminsi 3, ibimenyetso byarasibanganye. [12] Ntawuhigumugabo Vincent na Me Musasangohe Illuminée umwunganira bavuga na none ko ubuhamya bwa Musabyimana Delphine wavuze ko yasuzumye umwana akamenya ko yasambanyijwe buvuguruzanya na raporo y’inzego z’ibanze ivuga ko iwabo w’uyu mwana bagiye kumukarabya bakabona igitsina cye cyangiritse, akababwira ko yasambanyijwe na Ntawuhigumugabo Vincent, uko kuvuguruzanya kukaba gushimangira ko nta kuri kuri mu byo ashinjwa. [13] Ntawuhigumugabo Vincent na Me Musasangohe Illuminée umwunganira bavuga ndetse ko Urukiko Rukuru rwashingiye ku mvugo ze yemera icyaha, rwirengagije ko yacyemeye kubera gukubitwa, yanavuga ko yakubiswe ntibihabwe agaciro, runirengagiza amakimbirane afitanye na nyina w’umwana akomoka ku igare rye yibwe. [14] Ntawuhigumugabo Vincent na Me Musasangohe Illuminée umwunganira basoza basaba ko yagirwa umwere, hashingiwe ku biteganywa n’ingingo ya 111 y’Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha n’umurongo watanzwe mu rubanza RPAA00340/2022/CA rwaciwe n’Urukiko rw’Ubujurire ku wa 20/12/2024, haburana Ubushinjacyaha, Ndizihiwe Fabrice n’undi, uvuga ko ugushidikanya kurengera ushinjwa. [15] Uhagarariye Ubushinjacyaha avuga ko ibimenyetso byashingiweho n’inkiko zabanje, birimo raporo ya Muganga wasuzumye umwana, ubuhamya bwa Musabyimana Delphine, bishimangira ukwemera icyaha kwa Ntawuhigumugabo Vincent ubwo yabazwaga mu gihe cy’iperereza, bikaba ari ibimenyetso bihagije. Avuga ko Muganga wasuzumye umwana yagendeye kubyo yasabwe gukora, kandi ibyo yagaragaje byuzuzanya n’ibindi bimenyetso bihuriza ku kuba umwana yarasambanyijwe. Avuga na none ko atari itegeko ko na Ntawuhigumugabo Vincent yagombaga gupimwa. [16] Ku birebana nuko Musabyimana Delphine yamenye ko umwana yasambanyijwe bivuye mu bandi bana, ariko ntabanze kubibwira nyina ngo abe ari we ubikurikirana, yanareba mu gitsina cy’umwana ntahite amujyana kwa Muganga, Uhagarariye Ubushinjacyaha avuga ko icyaha cyakorewe umwana kireba sosiyeti muri rusange, kitarebaga umwana na nyina gusa, ahubwo ko umuntu uwo ari we wese yemerewe gutanga amakuru ku nzego zibishinzwe mu gihe amenye ikorwa ry’icyaha, kimwe n’uko Ubugenzacyaha bushobora kwibwiriza bukaba bwagenza icyaha nk’iki mu gihe kimenyekanye. [17] Uhagarariye Ubushinjacyaha avuga ko ibyo Ntawuhigumugabo Vincent avuga ko hari ukuvuguruzanya ku byavuzwe na Musabyimana Delphine na raporo y’inzego z’ibanze, byaba ari ikibazo abantu batanze amakuru ku buryo busa ijana ku ijana mu gihe batayamenye cyangwa batayabwiwe mu buryo bumwe, byatuma ahubwo hibazwa niba batabyumvikanyeho. Avuga kandi ko icy’ingenzi ari uko impande zombi zihuriza ku kuba umwana yasambanyijwe n’uregwa nk’uko n’umwana yabisobanuye, bikanashimangirwa na raporo ya Muganga. [18] Ku byo Ntawuhigumugabo Vincent avuga ko yemeye icyaha mu Bugenzacyaha kubera ko yakubiswe, Uhagarariye Ubushinjacyaha avuga ko uretse kuba abivuga nta kimenyetso abitangira, ariko ko inkiko zabanje zitashingiye ibyemezo byazo ku kwemera icyaha gusa, ahubwo hari n’ibindi bimenyetso birimo ubuhamya na raporo ya Muganga wasuzumye umwana. Avuga kandi ko mu rubanza RPA0010/06/CS - RPA 0011/06/CS - RPA0012/06/CS rwaciwe n’Urukiko rw’Ikirenga ku wa 18/07/2008, haburana Ubushinjacyaha, Sgt Ntaganira na bagenzi be, hatanzwe umurongo uvuga ko Umucamanza adategetswe gushingira ku mvugo ihakana icyaha mu rukiko mu gihe uregwa yacyemeye mu nzego z’ikurikiranacyaha, ko ashobora gushingira ku mvugo zavugiwe mu nzego z’ikurikiranacyaha iyo asanze arizo zihuje n’ukuri kw’ibyabaye, kandi zifite ibindi bimenyetso bizunganira. Asaba ko nta cyahinduka ku rubanza rwajuririwe.

## Page 5

UKO URUKIKO RUBIBONA [19] Impaka muri uru rubanza zishingiye ku kumenya niba Ntawuhigumugabo Vincent yarahamijwe icyaha cyo gusambanya umwana w’imyaka 7 y’amavuko hashingiwe ku bimenyetso bishidikanywaho. [20] Kubyerekeranye n’ibimenyetso mu manza n’itangwa ryabyo, mu rubanza RPAA00692/2021/CA rwaciwe n’Urukiko rw’Ubujurire ku wa 20/01/2023, haburana Ubushinjacyaha na Ndayishimiye Jean Damascène, hasesenguwe ingingo ya 119 y’Itegeko N° 15/2004 ryo ku wa 12/06/2004 ryerekeye ibimenyetso mu manza n’itangwa ryabyo2, harebwe cyane cyane ku mwihariko w’imanza nshinjabyaha, maze urukiko rusobanura ko mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye3 ababuranyi bakaba barahawe uburyo bwo kuhaba ngo banyomozanye, kandi ko Urukiko arirwo rwemeza ko ibyo bimenyetso bishobora kwemerwa. Iri hame ryashingiweho mu zindi manza zakurikiyeho zaciwe n’uru rukiko, harimo n’urubanza RPAA01283/2024/CA rwaciwe ku wa 18/07/2025, haburana Ubushinjacyaha na Ndayizeye. [21] Mu rubanza RPA00022/2021/HC/KIG rujuririrwa, Ntawuhigumugabo Vincent yahamijwe icyaha cyo gusambanya umwana w’imyaka 7 y’amavuko hashingiwe ku bimenyetso bikurikira: a) imvugo ze mu Bugenzacyaha aho yavuze ko yari yasinze asanga umwana aho yari aryamye yasinziriye amujya hejuru aramusambanya, abikorana igihunga yikanga ko nyina yari asize mu kabari ahamusanga; b) imvugo ya Musabyimana Delphine watanze ikirego, wavuze ko Nyirabuseruka yamusanze mu rugo amubwira ko umwana abereye nyina wabo witwa U. C. afite ikibazo mu gitsina, arebye mu gitsina cy’umwana abona hari kuzamo amaraso avanze n’ibintu by’umweru, umwana amubwira ko Ntawuhigumugabo Vincent yaje mu ijoro nyina adahari amusanga aho aryama na barumuna be amuryama hejuru amukorera ibintu, arize amukubita urushyi ahita asohoka aragenda; c) raporo yakozwe ku wa 09/06/2019 na Dr Umutoni Marie Linganwa wo ku bitaro bya Kacyiru, wasuzumye umwana ku wa 06/07/2019, asanga mu gitsina cye harimo udusharu kandi hatukuye cyane, bigaragara ko akarangabusugi aribwo kagishwanyagurika kandi harimo amashyira, yanzura avuga ko umwana agaragaza ibimenyetso byo gusambanywa.4 [22] Urukiko rw’Ubujurire rurasanga ibyo Ntawuhigumugabo Vincent avuga ko kuba raporo ya Muganga igaragaza ko mu gitsina cy’umwana hatukuye kandi ari ibya vuba, bidasobanuye ko byatewe nuko yamusambanyije, ahubwo byatewe nuko Musabyimana Delphine yakorakoye mu gitsina cye nta shingiro bifite, kubera ko Muganga yagaragaje ko byaturutse ku kuba umwana yarasambanyijwe. Kuba kandi Ntawuhigumugabo Vincent atarajyanwe kwa Muganga ngo apimwe, ntabwo byabuza ko ibindi bimenyetso byatanzwe n’Ubushinjacyaha bisuzumwa ngo bihabwe agaciro bikwiye, kuko n’iyo apimwa hari kuboneka ikimenyetso kindi kigomba gusuzumirwa hamwe n’ibindi. [23] Urukiko rw’Ubujurire rurasanga kandi nta mpamvu igaragara Ntawuhigumugabo Vincent atanga yatuma ubuhamya bwa Musabyimana Delphine buteshwa agaciro, kuko ibyo yavuze ko yabonye ku mwana, na Muganga yabibonye ko umwana yasambanyijwe. [24] Urukiko rw’Ubujurire rurasanga na none kuba Urukiko Rukuru rwarashingiye ku mvugo ya Ntawuhigumugabo Vincent mu nzego z’ikurikiranacyaha bifite ishingiro, kuko yemeye ko yari yasinze, maze asanga umwana aho yari aryamye asinziriye aramusambanya afite igihunga yikanga ko nyina yari asize mu kabari yahamusanga, ibyo yemeye bika bihura n’ibisobanuro by’umwana nawe wavuze ko

2 Iyo ngingo ihura n’ingingo ya 87 y’Itegeko Nº 062/2024 ryo ku wa 20/06/2024 rigenga ibimenyetso. 3 “Principe de la liberté de la preuve en matière pénale”. 4 “Labia majora, vestibule, fourchette red with abrasions, hymen recently torn with a lot of yellowish discharge. Conclusion: she has evidences of sexual assault”.

## Page 6

Ntawuhigumugabo Vincent yamusanze aho aryamye nijoro nyina adahari, aramusambanya, arize amukubita urushyi ahita asohoka aragenda. Byongeye kandi, nk’uko byasobanuwe haruguru, Muganga yasanze koko umwana yasambanyijwe, byumvikana ko ibyo Ntawuhigumugabo Vincent yemeye ku ikubitiro ari byo bihuye n’ukuri, n’ubwo yageze nyuma akabihakana, avuga ko yabyemejwe nuko yakubiswe, kandi ko abamureze bamubeshyera bamuziza amakimbirane bafitanye ashingiye ku igare yibwe. [25] Urukiko rw’Ubujurire rurasanga rero ibimenyetso byashingiweho n’Urukiko rwabanje ruhamya Ntawuhigumugabo Vincent icyaha cyo gusambanya umwana byuzuzanya kandi bidashidikanywaho, bityo ubujurire bwe nta shingiro bufite. [26] Urukiko rw’Ubujurire rurasanga, kuba ubujurire bwatanzwe na Ntawuhigumugabo Vincent nta shingiro bufite, byumvikana ko hagomba kugumaho imikirize y’urubanza yajuririye, cyane cyane ko igihano cy’igifungo cy’imyaka 20 yahawe gihwanye n’uburemere bw’icyaha yakoze cyo gusambanya umwana muto cyane w’imyaka 7 y’amavuko akamwangiza nk’uko bigaragazwa na raporo ya Muganga, kandi we ari mukuru afite imyaka 30 y’amavuko. III. ICYEMEZO CY’URUKIKO [27] Rwemeje ko ubujurire bwatanzwe na Ntawuhigumugabo Vincent nta shingiro bufite. [28] Rwemeje ko urubanza rwajuririwe RPA00022/2021/HC/KIG rwaciwe n’Urukiko Rukuru ku wa 13/11/2024 rudahindutse. [29] Rutegetse ko igihano cy’igifungo cy’imyaka 20 Ntawuhigumugabo Vincent yahawe ku cyaha cyo gusambanya umwana w’imyaka 7 y’amavuko kigumyeho.