UBUSHINJACYAHA vs RWAGAHUNGU

# UBUSHINJACYAHA vs RWAGAHUNGU

- Source: Amategeko - Section: Decisions (Judgements) - Date: 2025-05-23 - Case/document no.: RPAA00587/2024/CA - Collection: Court of Appeal

## Text

## Page 1

UBUSHINJACYAHA vs RWAGAHUNGU [Rwanda URUKIKO RW’UBUJURIRE – RPAA00587/2024/CA (Kanyange, P.J.) 23 Gicurasi 2025] Amategeko Mpanabyaha – kujurira – kugabanya ibihano – Iyo abaregwa nta kindi banenga urubanza rwajuririwe uretse kuvuga gusa ko batagabanyirijwe bihagije, buri mucamanza ku rwego urwo ari rwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo ariko ko Umucamanza yemerewe gusa guhindura igihano cyatanzwe n’Umucamanza wo mu Rukiko rubanza ari uko amaze kugaragaza ko rwaba rwarakoresheje nabi itegeko cyangwa ubushishozi bwarwo mu gutanga icyo gihano. Amategeko Mpanabyaha – inyito y’icyaha – Igihe cyose icyemezo cy’Urukiko kitaraba ndakuka, inyito y’icyaha ishobora guhinduka, ariko uregwa agahabwa igihe cyo kugira icyo abivugaho, mu rwego rwo kubahiriza ihame ryo kwiregura. Incamake y’ikibazo: Uru rubanza rwatangiye Ubushinjacyaha burega Rwagahungu mu Rukiko Rukiko Rwisumbuye rwa Nyagatare icyaha cyo gusambanya umwana w’umukobwa w’imyaka cumi n’irindwi (17) witwa I.D byakurikiwe no kubana nk’umugore n’umugabo ndetse amutera inda babyarana umwana w'umuhungu. Busaba Urukiko kumuhamya icyaha, rukamuhanisha igifungo cy’imyaka makumyabiri (20). Rwagahungu yaburanye yemera icyaha, ariko ko umukobwa yamubwiye ko afite imyaka 20, bashatse ibyemezo by’amavuko basanga yaravutse mu mwaka wa 2003 nyamara musaza we na nyina baravugaga ko yavutse mu 2001. Urukiko mu rubanza RP00701/2021/TGI/NYG, rushingiye ku kuba uregwa yaremeye icyaha, n’imvugo z’abatangabuhamya, n’icyemezo cy’amavuko kigaragaza ko uwo mukobwa yari ataruzuza imyaka y’ubukure, ariko raporo y’ubuyobozi bw’Umudugudu n’Akagali batuyemo itagaragaza ko babanaga nk’umugabo n’umugore ahubwo ko babyaranye, rumuhanisha igifungo kigabanyije cy’imyaka 20 kuko yemeye ko yasambanyije I.D akanabisabira imbabazi. Rwagahungu yajuriye mu Rukiko Rukuru, Urugereko rwa Rwamagana asaba kongera kugabanyirizwa igihano hashingiwe ku zindi mpamvu zitashingiweho ku rwego rwa mbere, zigizwe no kuba ari ubwa mbere akoze icyaha no kuba yaribeshye kuri I.D kuko yari azi ko ari mukuru, nawe kandi akaba yari akiri muto kuko yari afite imyaka 20, anasaba gusubikirwa igihano. Ubushinjacyaha bwasubije ko Rwagahungu yagabanyirijwe igihano ahanishwa igifungo cy’imyaka makumyabiri (20), ariko ko Urukiko rwashingira ku itegeko rishya rukongera kumugabanyiriza igihano. Urukiko mu rubanza RPA00951/2021/HC/RWG, rushingiye ku kuba uregwa yaremeye icyaha kuva mu iperereza kugera mu iburanisha, rwemeza ko ubujurire bwe bufite ishingiro kuri bimwe, rumuhanisha igifungo cy’imyaka cumi n’itanu(15). Rwavuze kandi ko isubikagihano asaba atarihabwa kuko igihano yahanishijwe kirenze imyaka itanu. Rwagahungu yatanze ubujurire bwa kabiri mu Rukiko rw’Ubujurire, avuga ko ubujurire bwe bugamije gusaba kugabanyirizwa igihano gusa. Ubushinjacyaha buvuga ko impamvu y’ubujurire bwa Rwagahungu nta shingiro ifite kuko ibyo asaba yabihawe ahanishwa igihano gito gishoboka ku cyaha cyamuhamye. Urukiko mu rubanza RPAA00587/2024/CA, rwemeje ko ubujurire bwa Rwagahungu bufite ishingiro ku birebana no kugabanyirizwa igihano kuko icyaha cyamuhamijwe ku rwego rwa mbere ari ugusambanya umwana bitakurikiwe no kubana nkumugabo n’umugore bitajuririwe n’ubushinjacyaha, rwemeza ko agabanyirizwa agahabwa igihano cy’imyaka icumi (10) kuko hari izindi mpamvu nyoroshyacyaha.

## Page 2

Incamake y’icyemezo:1. Iyo abaregwa nta kindi banenga urubanza rwajuririwe uretse kuvuga gusa ko batagabanyirijwe bihagije, buri mucamanza ku rwego urwo ari rwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo ariko ko Umucamanza yemerewe gusa guhindura igihano cyatanzwe n’Umucamanza wo mu Rukiko rubanza ari uko amaze kugaragaza ko rwaba rwarakoresheje nabi itegeko cyangwa ubushishozi bwarwo mu gutanga icyo gihano. 2.Igihe cyose icyemezo cy’Urukiko kitaraba ndakuka, inyito y’icyaha ishobora guhinduka, ariko uregwa agahabwa igihe cyo kugira icyo abivugaho, mu rwego rwo kubahiriza ihame ryo kwiregura. Ubujurire bufite ishingiro ku jyanye no kuganyirizwa igihano. Amategeko yashingiweho: ibiteganywa n’ingingo ya 49 y’Itegeko N° 68/2018 ryo ku wa 30/8/2018 riteganya ibyaha n’ibihano muri rusange, Imanza zifashishijwe: Urubanza RPA00060/2021/CA, haburana Ubushinjacyaha na Nsabimana Callixte alias Sankara na bagenzi be rwaciwe n’Urukiko rw’Ubujurire ku wa 04/04/2022 Urubanza RPAA00435/2024/CA/2024/CA Ubushinjacyaha buburana na Bagirinshuti Philbert rwaciwe n’Urukiko rw’Ubujurire ku wa 28/03/2025 igika cya 15. Urubanza rubanziriza urundi RS/INJUST/RP 00001/2021/SC haburana ubushinjacyaha na Kirenga Brian rwaciwe n’Urukiko rw’Ikirenga ku wa 23/12/2022, Urubanza RPAA0001/14/CS, haburana Ubushinjacyaha na Mukaruyange Athanasie rwaciwe n’Urukiko rw’Ikirenga ku wa 23/02/2018 Urubanza RPAA00333/2023/CA, haburana Ubushinjacyaha na Ngirinshuti Didier rwaciwe n’Urukiko rw’Ubujurire ku wa 25/09/2024. Urubanza. I. IMITERERE Y’URUBANZA [1] Mu mwaka wa 2019, Rwagahungu Emmanuel yasambanyije umwana w’umukobwa w’imyaka cumi n’irindwi (17) banabana nk’umugore n’umugabo ndetse amutera inda babyarana umwana w'umuhungu, ayo makuru amenyekanye Rwagahungu Emmanuel atangira gukurikiranwa. [2] Nyuma y’iperereza, Ubushinjacyaha bwamureze mu Rukiko Rwisumbuye rwa Nyagatare bumukurikiranyeho icyaha cyo gusambanya umwana byakurikiwe no kubana nk’umugabo n’umugore, bushingiye ku kuba yaremeye icyaha akanashinjwa n’uwo yasambanyije, abatangabuhamya na raporo y’ubuyobozi, bumusabira igifungo cy’imyaka makumyabiri (20). [3] Mu kwiregura, Rwagahungu Emmanuel yavuze ko yemera icyaha ashinjwa, ariko ko umukobwa yamubwiye ko afite imyaka 20, bashatse ibyemezo by’amavuko basanga yaravutse mu mwaka wa 2003 nyamara musaza we na nyina baravugaga ko yavutse mu 2001. [4] Urukiko rwaciye urubanza RP00701/2021/TGI/NYG ku wa 15/07/2021, rusanga hari ibimenyetso byemeza ko Rwagahungu Emmanuel yakoze icyaha akurikiranweho bigizwe no kuba yaracyemeye, avuga ko yatangiye kubana na I.D nk’umugabo n’umugore kuva mu mwaka wa 2019, uyu nawe aba ariko abivuga, na nyina (wa Rwagahungu) akaba yaravuze ko yabanje kubyarana n’uwo mukobwa nyuma baza kubana nk’umugabo n’umugore, hakaba n’icyemezo cy’amavuko kigaragaza ko uwo mukobwa yari ataruzuza imyaka y’ubukure. Rwasanze ariko raporo y’ubuyobozi bw’Umudugudu n’Akagali batuyemo

## Page 3

ntaho igaragaza ko babanaga nk’umugabo n’umugore ahubwo ko babyaranye, uwo mukobwa akaba yarabasabye ko babwira iwabo wa Rwagahungu bakamuha icyiciro kubera umwana babyaranye, bityo ko yahanirwa icyaha cyo gusambanya umwana ariko bitakurikiwe no kubana nk’umugabo n’umugore, rumuhanisha igifungo kigabanyije cy’imyaka 20 kuko yemeye ko yasambanyije I.D akanabisabira imbabazi. [5] Rwagahungu Emmanuel yajuriye mu Rukiko Rukuru, Urugereko rwa Rwamagana asaba kongera kugabanyirizwa igihano hashingiwe ku zindi mpamvu zitashingiweho ku rwego rwa mbere, zigizwe no kuba ari ubwa mbere akoze icyaha no kuba yaribeshye kuri I.D kuko yari azi ko ari mukuru, nawe kandi akaba yari akiri muto kuko yari afite imyaka 20, anasaba gusubikirwa igihano. [6] Ubushinjacyaha bwasubije ko Rwagahungu Emmanuel yagabanyirijwe igihano ahanishwa igifungo cy’imyaka makumyabiri (20), ariko ko Urukiko rwashingira ku itegeko Nº 059/2023 ryo ku wa 04/12/2023 ridingura Itegeko Nº 68/2018 ryo ku wa 30/06/2018 riteganya ibyaha n’ibihano muri rusange, icyo gihano kikongera kikagabanywa. [7] Urukiko rwaciye urubanza RPA00951/2021/HC/RWG ku wa 29/05/2024, rusanga icyaha Rwagahungu yakoze cyo gusambanya umwana bakanabana nk’umugabo n’umugore gihanishwa igifungo cya burundu, ko nubwo yagabanyirijwe igihano agahanishwa igifungo cy’imyaka makumyabiri (20), kuba mu bujurire yarakomeje kwemera icyaha no gusaba imbabazi, icyo gihano cyakongera kugabanywa hashingiwe ku ngingo ya 2 agace ka a, y’Itegeko Nº 059/2023 ryo ku wa 04/12/2023 ryavuzwe haruguru, ivuga ko iyo yari impamvu nyoroshya igifungo cya burundu gishobora kugabanywa ariko ntikijye munsi y’imyaka 15. Rwasanze kandi isubikagihano asaba atarihabwa kuko igihano yahanishijwe kirenze imyaka itanu, mu kwanzura rwemeza ko ubujurire bwe bufite ishingiro kuri bimwe, rumuhanisha igifungo cy’imyaka cumi n’itanu (15). [8] Rwagahungu Emmanuel yatanze ubujurire bwa kabiri mu Rukiko rw’Ubujurire, urubanza rwandikwa kuri RPAA00587/2024/CA, ruhabwa itariki yo kuburanishwa yo ku wa 08/05/2025, uwo munsi ruburanishwa yunganiwe na Me Micomyiza Lilian, Ubushinjacyaha buhagarariwe na Habimana Jean Cabin, Umushinjacyaha ku rwego rw’Igihugu. [9] Mu myanzuro y’ubujurire no mu miburanire, Rwagahungu Emmunuel n’umwunganira bavuga ko ubujurire bwe bugamije gusaba kugabanyirizwa igihano, ko ibindi yavuze mu mwanzuro we bitahabwa agaciro. [10] Uhagarariye Ubushinjacyaha avuga ko impamvu y’ubujurire bwa Rwagahungu Emmanuel nta shingiro ifite kuko ibyo asaba yabihawe ahanishwa igihano gito cy’igifungo cy’imyaka cumi nitanu (15). [11] Ikibazo kigomba gusuzumwa muri uru rubanza ni ukumenya niba igihano Rwagahungu Emmanuel yahawe cyakongera kugabanywa. II. ISESENGURA RY’IKIBAZO KIGIZE URUBANZA Kumenya niba igihano Rwagahungu Emmanuel yahawe cyakongera kugabanywa [12] Rwagahungu Emmanuel n’umwunganira bavuga ko ubujurire bwe bugamije gusaba kugabanyirizwa igihano yahanishijwe n’Urukiko Rukuru, hashingiwe ku mpamvu nyoroshyacyaha zirimo kuba ari ubwa mbere akurikiranwe mu nkiko, kuba yari mu kigero kimwe na I.D kuko uyu yari afite imyaka cumi n’itandatu (16) undi afite imyaka cumi n’icyenda(19), kuba yaramaze kwicuza no kuba icyaha yahoze ari icyo gusambanya umwana gusa kuko batabanye nk’umugore n’umugabo, ko kandi igihano yahawe kigabanyijwe byatuma ajya gufasha I.D kwita ku mwana yabyaye.

## Page 4

[13] Uhagarariye Ubushinjacyaha avuga ko impamvu y’ubujurire bwa Rwagahungu nta shingiro ifite kuko ibyo asaba yabihawe ahanishwa igifungo cy’imyaka 15 mu gihe yashoboraga guhanishwa igifungo cya burundu, ko hashingiwe ku murongo watanzwe n’uru Rukiko mu rubanza RPA00060/2021/CA rwaciwe ku wa 04/04/20221, ntaho mu rubanza rujuririrwa Urukiko rwakoresheje nabi itegeko cyangwa ubushishozi bwarwo mu kumugenera igihano, ko rero ntacyo gukosora gihari cyatuma urubanza ruhinduka ku birebana n’igihano. [14] Ku birebana n’icyaha Rwagahungu yakoze, uhagarariye Ubushinjacyaha avuga ko Urukiko rwahinduye inyito y’icyaha bitewe n’uko ibintu bimeze (facts) ariko ko rutabisobanuye, ko ahubwo rwateye urujijo mu kudasobanura impamvu rwavuze ko yakoze icyaha cyo gusambanya umwana byakurikiwe no kubana nk’umugore n’umugabo mu gihe mu Rukiko Rwisumbuye yahamijwe icyaha cyo gusambanya umwana, ko Urukiko rwabisuzuma. UKO URUKIKO RUBIBONA [15] Impaka kuri iyi ngingo zishingiye ku kumenya niba Rwagahungu Emmanuel ashobora kugabanyirizwa igihano cy’igifungo cy’imyaka 15 yahawe n’Urukiko Rukuru. [16] Ikibazo nk’iki cyatanzweho umurongo mu rubanza RPA00060/2021/CA rwaciwe n’Urukiko rw’Ubujurire ku wa 04/04/2022 haburana Ubushinjacyaha na Nsabimana Callixte alias Sankara na bagenzi be, wakomeje no gukurikizwa mu manza zaciwe nyuma, uruheruka akaba ari urubanza RPAA00435/2024/CA/2024/CA rwaciwe n’Urukiko rw’Ubujurire ku wa 28/03/2025 Ubushinjacyaha buburana na Bagirinshuti Philbert (igika cya 15). Muri izo manza, Urukiko rw’Ubujurire rwavuze ko iyo abaregwa nta kindi banenga urubanza rwajuririwe uretse kuvuga gusa ko batagabanyirijwe bihagije, buri mucamanza ku rwego urwo ari rwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo hakurikijwe ibiteganywa n’ingingo ya 49 y’Itegeko N° 68/2018 ryo ku wa 30/8/2018 riteganya ibyaha n’ibihano muri rusange, ariko ko Umucamanza yemerewe gusa guhindura igihano cyatanzwe n’Umucamanza wo mu Rukiko rubanza ari uko amaze kugaragaza ko rwaba rwarakoresheje nabi itegeko cyangwa ubushishozi bwarwo mu gutanga icyo gihano2. [17] Nk’uko byibukijwe mu miterere y’uru rubanza, Rwagahungu Emmanuel yaburanye mu Rukiko Rwisumbuye rwa Nyagatare yemera icyaha, urwo Rukiko narwo rusanga hari ibimenyetso bikimuhamya, ariko ko atabanye na I.D nk’umugore n’umugabo ahubwo agomba guhamwa n’icyaha cyo gusambanya umwana gusa, rushingira ku mpamvu nyoroshyacyaha yo kuba yaremeye icyaha akanagisabira imbabazi, rumuhanisha igifungo cy’imyaka makumyabiri (20). [18] Imikirize y’urubanza rwajuririwe igaragaza ko Urukiko Rukuru rwavuze ko Rwagahungu yakoze icyaha cyo gusambanya umwana bakanabana nk’umugabo n’umugore gihanishwa igifungo cya burundu, rusanga igihano yahawe ku rwego rwa mbere cyakongera kugabanywa kubera ko mu bujurire yakomeje kwemera icyaha no gusaba imbabazi, rukigabanya rushingiye ku ngingo ya 2 agace ka a, y’Itegeko Nº 059/2023 ryo ku wa 04/12/2023 ryavuzwe haruguru, ivuga ko iyo yari impamvu nyoroshya igifungo cya burundu gishobora kugabanywa ariko ntikijye munsi y’imyaka 15, rumuhanisha igifungo cy’imyaka cumi n’itanu (15) . [19] Nubwo Ubushinjacyaha buvuga ko Urukiko Rukuru rwahinduye inyito y’icyaha uretse ko bwongera bukavuga ko rutabisobanuye ahubwo rwateje urujijo, Urukiko rurasanga isesengura ry’imikirize y’urubanza rwajuririwe igaragaza ko icyo Rwagahungu Emmanuel yari yajuririye, ari ukugabanyirizwa igihano no kugisubika, ibyo bibazo biba ari byo bisuzumwa, hakaba ntaho Urukiko

1 Haburana Ubushinjacyaha na NSABIMANA Callicte alias Sankara na bagenzi be 2 Uyu murongo warakurikijwe no mu manza za vuba, harimo urubanza Nº RPAA 00752/2024/CA, rwaciwe n’Urukiko rw’Ubujurire ku wa 27/03/2025 haburana Ubushinjacyaha na Nsekanabo Augustin

## Page 5

rwasuzumye ibirebana no guhindura inyito y’icyaha, cyane cyane ko rutari no kubikora ababuranyi batabigiyeho impaka nk’uko byatanzweho umurongo n’Urukiko rw’Ikirenga mu rubanza RPAA0001/14/CS rwaciwe ku wa 23/02/2018 haburana Ubushinjacyaha na Mukaruyange Athanasie3, uwo murongo ukaba waranakomeje gukurikizwa mu manza zaciwe nyuma4, ahubwo bigaragara ko mu kuvuga ko yakoze icyaha cyo gusambanya umwana byakurikiwe no kubana nk’umugabo n’umugore, rushobora kuba rwarabishingiye ku kuba aricyo yarezwe nk’uko rwabivuze mu gika cya mbere cy’urubanza, ariko ntirwasuzuma icyo Urukiko rwemeje ko ari cyo Rwagahungu agomba guhanirwa cyo gusambanya umwana gusa nyamara rwari rwabivuze mu gika cya kabiri cy’urubanza. [20] Urukiko rurasanga rero kuba ku rwego rwa mbere Rwagahungu yarahamijwe icyaha cyo gusambanya umwana gusa kandi Ubushinjacyaha ntibubijuririre cyangwa ngo habeho guhindura inyito y’icyaha nk’uko byavuzwe haruguru, Urukiko Rukuru rwarakoze ikosa mu kuvuga ko yakoze icyaha cyo gusambany umwana byakurikiwe no kubana nk’umugabo n’umugore, iryo kosa kandi rikaba ryaragize ingaruka ku birebana n’uburyo rwagabanyije igihano, kuko rwashingiye ku gace ka (a) k’ingingo ya 2 y’Itegeko Nº 059/2023 ryo ku wa 04/12/2023 ryavuzwe haruguru5 bitewe nuko rwafashe ko icyaha yakoze gihanishwa igifungo cya burundu, mu gihe rwagombaga gushingira ku gace ka (b) k’ingingo imaze kuvugwa6, kuko icyaha Urukiko Rwisumbuye rwemeje ko ari cyo kimuhama gihanishwa igifungo kitari munsi y’imyaka makumyabiri (20) ariko kitarengeje imyaka makumyabiri n’itanu (25)7, bityo iryo kosa rikaba rigomba gukosorwa Rwagahungu Emmanuel akagabanyirizwa igihano hashingiwe ku gace ka (b) k’ingingo ya 2 nk’uko byasobanuwe. [21] Urukiko rw’Ubujurire rurasanga rero, usibye impamvu yo kwemera icyaha Urukiko Rukuru rwashingiyeho rugabanya igihano, binagaragara ko Rwagahungu yakoze icyaha akiva mu bwana kuko yari afite imyaka cumi n’icyenda (19), ikigero cy’imyaka kidatandukanye cyane n’icy’umwana yasambanyije (16) ndetse akaba ari ubwa mbere akurikiranwe mu nkiko, bityo izo mpamvu zikaba zashingirwaho igihano yahawe kikongera kikagabanywa. [22] Mu kugabanya icyo gihano, Urukiko rurashingira ku zindi manza zaciwe ku bantu barezwe icyaha nk’icyo Rwagahungu Emmanuel akurikiranyweho, harimo urubanza RPAA00333/2023/CA rwaciwe ku wa 25/09/2024 haburana Ubushinjacyaha na Ngirinshuti Didier wari mu kigero kimwe na Rwagahungu Emmanuel kuko yari afite imyaka cumi n’icyenda (19), agasambanya umwana w’imyaka cumi n’itandatu (16), Urukiko rukaba rwaramugabanyirije igihano rushingiye ku kuba ari ubwa mbere akurikiranweho icyaha mu buryo buzwi no kuba yari akiva mu bwana, rumuhanisha igifungo cy’imyaka icumi (10), bityo kuba izo mpamvu azihuriyeho na Rwagahungu Emmanuel, nawe yagabanyirizwa muri ubwo buryo mu rwego rwo gutanga ubutabera busa ku bibazo bisa, agahanishwa igifungo cy’imyaka icumi (10), bityo urubanza rwajuririwe rukaba ruhindutse ku byerekeye igihano. III. ICYEMEZO CY’URUKIKO [23] Rwemeje ko ubujurire bwa Rwagahungu Emmanuel bufite ishingiro ku birebana no kugabanyirizwa igihano;

3 Umurongo uvuga ko igihe cyose icyemezo cy’Urukiko kitaraba ndakuka, inyito y’icyaha ishobora guhinduka, ariko uregwa agahabwa igihe cyo kugira icyo abivugaho, mu rwego rwo kubahiriza ihame ryo kwiregura. 4 Reba urubanza rubanziriza urundi nº RS/INJUST/RP 00001/2021/SC rwaciwe n’Urukiko rw’Ikirenga ku wa 23/12/2022, haburana ubushinjacyaha na KIRENGA Brian 5 Ivuga ko iyo yari impamvu nyoroshya igifungo cya burundu gishobora kugabanywa ariko ntikijye munsi y’imyaka 15 6 Ivuga ko igifungo kimara igihe kizwi kiva ku mezi 6 kuzamura gishobora kugabanywa, ariko ntikijye munsi ya kimwe cya kabiri cy’igihano gito giteganyirijwe icyaha cyakozwe; 7 Reba ingingo ya 133, (2) y’Itegeko y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange nk’uko ryahinduwe kugeza ubu.

## Page 6

[24] Rwemeje ko imikirize y’urubanza RPA00951/2021/HC/RWG rwaciwe n’Urukiko Rukuru,Urugereko rwa Rwamagana ku wa 29/05/2024, ihindutse ku bijyanye n’igihano Rwagahungu Emmanuel yari yahanishijwe; [25] Ruhanishije Rwagahungu Emmanuel igifungo cy’imyaka icumi (10) mu mwanya w’igifungo cy’imyaka cumi n’itanu (15) yari yahanishijwe; [26] Rutegetse ko amagarama y’urubanza aherera ku Isanduku ya Leta kuko Rwagahungu Emmanuel yajuriye afunze, akaba asonewe kuyatanga.