UBUSHINJACYAHA vs UWAMAHORO

# UBUSHINJACYAHA vs UWAMAHORO

- Source: Amategeko - Section: Decisions (Judgements) - Date: 2025-01-28 - Case/document no.: RPAA 00280/2024/CA - Collection: Court of Appeal

## Text

## Page 1

UBUSHINJACYAHA vs UWAMAHORO [Rwanda URUKIKO RW’UBUJURIRE – RPAA 00280/2024/CA (Mukamurenzi,P.J.) 28 Mutarama 2025] Amategeko mpanabyaha – Ibihano – Ubujurire – kugabanyirizwa igihano – Mu rwego rw’ibirego nshinjabyaha iyo abaregwa nta kindi banenga urubanza rwajuririwe, uretse kuvuga gusa ko batagabanyirijwe bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo. Ariko ko mu bujurire, Umucamanza agomba kuzirikana ko yemerewe gusa guhindura igihano cyatanzwe n’Umucamanza wo mu Rukiko rubanza, ari uko amaze kugaragaza ko Urukiko rubanza rwaba rwarakoresheje nabi itegeko cyangwa ubushishozi bwarwo mu gutanga icyo gihano. Incamake y’ikibazo: Uru rubanza rwatangiye Ubushinjacyaha burega Uwamahoro mu Rukiko Rwisumbuye rwa Rusizi icyaha cyo gutunda, kubika no kugurisha mu gihugu ikiyobyabwenge cyo mu bwoko bw'urumogi, bunasaba ko ahamwa n’icyo cyaha, agahanishwa igihano cy’igifungo cya burundu. Uwamahoro yaburanye yemera icyaha aregwa, avuga ko yari amaze kugurisha rucye, avuga ko acuruza urumugi kuko umugabo we yari afunze. Urukiko mu rubanza RP00059/2022/TGI/RSZ, rushingiye ku bimenyetso biri muri dosiye nka raporo y’inzego z’ibanze, ukwemera icyaha k’uregwa; n’imvugo z’abatangabuhamya, rwemeje ko Uwamahoro ahamwa n’icyaha cyo gucuruza ikiyobyabwenge gihambaye cyo mu bwoko bw’urumogi, rumuhanisha igifungo cy’imyaka makumyabiri n’itanu (25) n’ihazabu y’amafaranga miliyoni makumyabiri (20.000.000Frw). Uwamahoro yajuririye imikirize y’urwo rubanza mu Rukiko Rukuru, Urugereko rwa Rusizi avuga ko Urukiko Rwisumbuye rwamuhanishije igihano kiremereye kandi yemera icyaha, asaba ko yagabanyirizwa igihano kandi icyo ahawe kigasubikwa. Ubushinjacyaha bwavuze ko ibyo asaba nta shingiro bifite kuko yagabanyirijwe igihano, ariko buvuga ko yakongera kugabanyirizwa igihano kuko yemera icyaha kandi akaba yarafatanwe ingano nto y’urumogi. Urukiko mu rubanza RPA00102/2022/HC/RSZ rwemeje ko ikirego cy’ubujurire cya Uwamahoro gifite ishingiro kuri bimwe, ko urubanza ko urubanza rwajuririwe , ruhindutse ku birebana n’igihano kigabanyijwe hashingiwe ku mpamvu nyoroshyacyaha zitandukanye. rumuhanisha igifungo cy’imyaka icumi n’itanu (15) n’ihazabu ya miliyoni icumi (10.000.000Frw). Uwamahoro yajuririye imikirize y’urwo rubanza mu Rukiko rw’Ubujurire, asaba kugabanyirizwa igihano, kuko yemera icyaha, kandi akaba aribwo bwa mbere aguye mu cyaha. Ubushinjacyaha buvuga ko impamvu uregwa yashingiyeho ajurira, zifite ishingiro ku bijyanye no kugabanyirizwa igihano cy’ihazabu gusa, agahanishwa ihazabu ya miliyoni 5.000.000Frw, ariko ko igihano cy’igifungo cy’imyaka 15 cyo kitagabanywa. Urukiko mu rubanza RPAA00280/2024/CA rwemeje ko igihano cy’igifungo cyahawe Uwamahoro kitakongera kugabanywa ariko rugabanya igihano cy’ihazabu, rumuhanisha ihazabu ya miliyoni 5.000.000Frw. Incamake y’icyemezo: Mu rwego rw’ibirego nshinjabyaha iyo abaregwa nta kindi banenga urubanza rwajuririwe, uretse kuvuga gusa ko batagabanyirijwe bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo. Ariko ko mu

## Page 2

bujurire, Umucamanza agomba kuzirikana ko yemerewe gusa guhindura igihano cyatanzwe n’Umucamanza wo mu Rukiko rubanza, ari uko amaze kugaragaza ko Urukiko rubanza rwaba rwarakoresheje nabi itegeko cyangwa ubushishozi bwarwo mu gutanga icyo gihano. Ubujurire nta shingiro bufite. Urubanza rwajuririwe ruhindutse gusa ku byerekeye ihazabu. Amategeko yashingiweho: Itegeko Nº 059/2023 ryo ku wa 04/12/2023 ihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ingingo ya 2 Itegeko N˚ 68/2018 ryo ku wa 30/8/2018 riteganya ibyaha n’ibihano muri rusange, n’ingingo ya 49 Itegeko Nº 68/2018 ryo ku wa 30/8/2018 riteganya ibyaha n’ibihano muri rusange nk’uko ryahinduwe n’ingingo ya 11 y’Itegeko Nº 69/2019 ryo ku wa 08/11/2019, Ingingo ya 263, Igika cya gatatu, Imanza zifashishijwe: Urubanza RPA00060/2021/CA rwaciwe n’Urukiko rw’Ubujurire ku wa 04/04/2022 haburana Ubushinjacyaha, Nsabimana Callixte alias Sankara na bagenzi be. Urubanza RPAA00367/2023/CA haburana Ubushinjacyaha na Bapfakurera Jean Claude bita Kazungu rwaciwe n’Urukiko rw’Ubujurire ku wa 20/12/2024 Urubanza RPAA00436/2024/CA, haburana Ubushinjacyaha na Bikorimana Jean Baptise rwaciwe n’Urukiko rw’Ubujurire ku wa 21/01/2025 Urubanza, RPAA00097/2024/CA haburana Ubushinjacyaha na Twagirumukiza Sibomana Athanase rwaciwe n’Urukiko rw’Ubujurire ku wa 20/12/2024, igika cya 17 Urubanza RPAA 00099/2024/CA, haburana Ubushinjacyaha na Manizabayo Gilbert Alias Nkurunziza Jean Pierre rwaciwe ku wa 16/12/2024, igika cya 19 Urubanza

I. IMITERERE Y’URUBANZA [1] Mu ijoro ryo ku wa 06/02/2022, mu Mudugudu wa Renga, Akagari ka Muhehwe, Umurenge wa Rwimbogo, Akarere ka Rusizi, inzego z’ibanze n’inzego z’umutekano zahawe amakuru y’uko Vestine acuruza urumogi, zijya kumusaka, zimusangana udupfunyika makumyabiri na kamwe (21) yari abitse mu rugo. Zimushyikiriza Ubugenzacyaha atangira gukurikiranwa. [2] Iperereza rirangiye, Ubushinjacyaha bwamureze mu Rukiko Rwisumbuye rwa Rusizi bumukurikiranyeho icyaha cyo gutunda, kubika no kugurisha mu gihugu ikiyobyabwenge cyo mu bwoko bw'urumogi, bunasaba ko ahamwa n’icyo cyaha, agahanishwa igihano cy’igifungo cya burundu nk’uko biteganywa n’ingingo ya 11 y’Itegeko Nº69/2019 ryo ku wa 08/11/2019 rihindura ingingo ya 263 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange. [3] Uwamahoro Vestine yaburanye yemera icyaha aregwa, avuga ko yari amaze kugurisha udupfunyika tubiri tw’urumogi gusa, abitewe n’uko umugabo we yari amaze gufungwa. [4] Mu rubanza RP00059/2022/TGI/RSZ rwaciwe ku wa 18/02/2022, Urukiko Rwisumbuye rwa Rusizi rwasanze hari ibimenyetso bigaragaza ko Uwamahoro Vestine yakoze icyaha aregwa bikurikira: Kuba yaraburanye yemera icyaha akurikiranyweho; Imvugo z’abatangabuhamya bamufatanye urumogi;

## Page 3

Raporo y’inzego z’ibanze yemeza ko yari asanzwe azwiho ibikorwa byo kugurisha ibiyobyabwenge byo mu bwoko bw’urumogi; Inyandikomvugo y’ifatira ry’urumogi yashyizeho umukono. Urukiko rushingiye kuri ibyo bimenyetso, rwemeje ko Uwamahoro Vestine ahamwa n’icyaha cyo gucuruza ikiyobyabwenge gihambaye cyo mu bwoko bw’urumogi, rumuhanisha igifungo cy’imyaka makumyabiri n’itanu (25) n’ihazabu ingana n’amafaranga miliyoni makumyabiri (20.000.000Frw). [5] Uwamahoro Vestine yajuririye imikirize y’urubanza mu Rukiko Rukuru, Urugereko rwa Rusizi avuga ko Urukiko Rwisumbuye rwamuhanishije igihano kiremereye kandi atarigeze arushya inzego z’ubutabera, kuko yemeye icyaha kuva yafatwa, ariko ntirwabyitaho nk’impamvu nyoroshyacyaha, bituma ahanwa nk’uwaburanye atemera icyaha, asaba ko yagabanyirizwa igihano, icyo ahawe kigasubikwa, agahabwa amahirwe yo gusubira mu muryango nyarwanda no kurera abana yasize. Uhagarariye Ubushinjacyaha yavuze ko ibyo asaba nta shingiro bifite kuko yagabanyirijwe igihano, ariko kandi harebwe ko yafatanwe ingano nto y’urumogi nta cyabuza Urukiko kongera kumugabanyiriza. [6] Mu rubanza RPA00102/2022/HC/RSZ rwaciwe ku wa 11/04/2024, Urukiko Rukuru, Urugereko rwa Rusizi rwemeje ko ikirego cy’ubujurire cyatanzwe na Uwamahoro Vestine gifite ishingiro kuri bimwe, ko urubanza RP00059/2022/TGI/RSZ rwaciwe n’Urukiko Rwisumbuye rwa Rusizi ku wa 18/02/2022, ruhindutse gusa ku birebana n’igihano kigabanyijwe hashingiwe ku kuba Uwamahoro Vestine ari ubwa mbere akoze icyaha, kuba yaraburanye yemera icyaha, ku ngano ntoya y’urumogi yafatanwe no ku biteganywa n’ingingo ya 2 y’Itegeko Nº 059/2023 ryo ku wa 04/12/2023 rihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange. Urukiko Rukuru rumuhanisha igifungo cy’imyaka icumi n’itanu (15) n’ihazabu ingana na miliyoni icumi (10.000.000Frw). [7] Uwamahoro Vestine yajuririye imikirize y’urwo rubanza mu Rukiko rw’Ubujurire, urubanza ruhabwa RPAA00280/2024/CA, ruburanishwa mu ruhame ku itariki ya 10/01/2025, Uwamahoro Vestine yunganiwe na Me Mukakalisa Jeanne d’Arc, naho Ubushinjacyaha buhagarariwe na Uwizeye Jean Marie, Umushinjacyaha ku rwego rw’Igihugu. [8] Mu mwanzuro w’ubujurire no mu miburanire, Uwamahoro Vestine n’umwunganira bavuga ko yajuriye kugira ngo asabe kugabanyirizwa igihano cy’igifungo cy’imyaka 15 n’ihazabu ya miliyoni icumi (10.000.000Frw) yahanishijwe n’Urukiko Rukuru, urugereko rwa Rusizi kubera ko yemera icyaha yarezwe akanagisabira imbabazi, kandi akaba aribwo bwa mbere aguye mu cyaha yakoze abitewe n’ubukene nyuma y’aho umugabo we afungiwe nawe azira gucuruza ibiyobyabwenge. [9] Uhagarariye Ubushinjacyaha avuga ko impamvu uregwa yashingiyeho ajurira, zifite ishingiro ku bijyanye no kugabanyirizwa igihano cy’ihazabu gusa, ko asaba Urukiko kumugabanyiriza igihano cy’ihazabu ya 10.000.000Frw yategetswe gutanga, agahanishwa ihazabu ya miliyoni 5.000.000Frw, ariko ko igihano cy’igifungo cy’imyaka 15 cyo kitagabanywa. [10] Muri uru rubanza ikibazo kigomba gusuzumwa ni icyo kumenya niba igihano UWAMAHORO Vestine yahanishijwe cyakongera kugabanywa. II. ISESENGURA RY’IKIBAZO KIGIZE URUBANZA Kumenya niba igihano UWAMAHORO Vestine yahanishijwe cyakongera kugabanywa. [11] Uwamahoro Vestine n’umwunganira bavuga ko yajuriye asaba ko igihano yahawe cyo gufungwa imyaka 15 n’ihazabu ya miliyoni icumi 10.000.000Frw byagabanywa kuko yihannye, akaba yaremeye icyaha yarezwe akanagisabira imbabazi, akaba kandi aribwo bwa mbere yari aguye mu cyaha yakoze

## Page 4

abitewe n’ibibazo by’ubukene yarimo bwo kubona amafaranga y’ubukode nyuma y’uko umugabo we nawe yari amaze gufungirwa gucuruza ibiyobyabwenge by’urumogi. Basaba ko mu kumugabanyiriza igihano, hashingirwa ku ngingo ya 2 y’Itegeko Nº 059/2023 ryo ku wa 04/12/2023 rihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange. [12] Uhagarariye Ubushinjacyaha avuga ko Uwamahoro Vestine yagabanyirijwe igihano hashingiwe ku kuba yaraburanye yemera icyaha no kuba aribwo bwa mbere yari aguye mu cyaha, Urukiko Rukuru rumuhanisha igifungo cy’imyaka cumi n’itanu (15) n’ihazabu ya miliyoni icumi (10.000.000), ko asanga ubujurire bwe bufite ishingiro gusa ku byerekeranye no kugabanyirizwa ihazabu ya miliyoni icumi (10.000.000) yagabanywa agategekwa gutanga miliyoni eshanu (5.000.000Frw), naho igifungo cy’imyaka 15 cyo kikaba kitakongera kugabanywa kubera ko aricyo gito umushingamategeko yateganyije igihe hari impamvu nyoroshyacyaha. UKO URUKIKO RUBIBONA [13] Impaka ziri kuri iyi ngingo zishingiye ku kumenya niba Uwamahoro Vestine yakongera kugabanyirizwa igihano yahanishijwe n’Urukiko Rukuru kikajya munsi y’igifungo cy’imyaka cumi n’itanu (15) n’ihazabu y’amafaranga y’u Rwanda miliyoni icumi (10.000.000Frw). [14] Ku byerekeranye no kugabanya igihano mu gihe hari impamvu nyoroshyacyaha, ingingo ya 2 y’Itegeko Nº 059/2023 ryo ku wa 04/12/2023 ihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange mu buryo bukurikira : “Iyo umucamanza yemeje impamvu nyoroshyacyaha, ashobora kugabanya igihano ku buryo bukurikira: (a) igifungo cya burundu gishobora kugabanywa ariko ntikijye munsi y’igihano cy’igifungo cy’imyaka 15“; (…), (d) “igihano cy’ihazabu gishobora kugabanywa kugeza kuri kimwe cya kane cy’igihano cy’ihazabu gito giteganyirijwe icyaha cyakozwe”. [15] Ikibazo cyo kongera kugabanyirizwa igihano mu gihe ariyo mpamvu y’ubujurire yonyine, cyatanzweho umurongo mu rubanza RPA00060/2021/CA rwaciwe n’Urukiko rw’Ubujurire ku wa 04/04/2022 haburana Ubushinjacyaha, Nsabimana Callixte alias Sankara na bagenzi be. Muri urwo rubanza Urukiko rw’Ubujurire rwagaragaje ko mu rwego rw’ibirego nshinjabyaha iyo abaregwa nta kindi banenga urubanza rwajuririwe, uretse kuvuga gusa ko batagabanyirijwe bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo hakurikijwe ibiteganywa n’ingingo ya 49 y’Itegeko N˚ 68/2018 ryo ku wa 30/8/2018 riteganya ibyaha n’ibihano muri rusange1 , ariko ko mu bujurire, Umucamanza agomba kuzirikana ko yemerewe gusa guhindura igihano cyatanzwe n’Umucamanza wo mu Rukiko rubanza, ari uko amaze kugaragaza ko Urukiko rubanza rwaba rwarakoresheje nabi itegeko cyangwa ubushishozi bwarwo mu gutanga icyo gihano2. Uyu murongo wakurikijwe mu manza zitandukanye zaciwe n’uru Rukiko, mu ziheruka harimo nk’urubanza RPAA00367/2023/CA rwaciwe ku wa 20/12/2024 haburana Ubushinjacyaha na Bapfakurera Jean Claude bita Kazungu3. [16] Mu bika bikurikira harasuzumwa niba mu guhanisha Uwamahoro Vestine igifungo cy’imyaka cumi n’itanu (15) n’ihazabu y’amafaranga y’u Rwanda miliyoni icumi (10.000.000Frw) ku cyaha yahamijwe cyo gucuruza ibiyobyabwenge byo mu bwoko bw’urumogi, Urukiko Rukuru, urugereko rwa Rusizi rwarakoresheje nabi itegeko cyangwa se ubushishozi bwarwo.

1 Iteganya ko “Umucamanza atanga igihano akurikije uburemere bw'icyaha, ingaruka icyaha cyateye, impamvu zatumye uregwa agikora, uko uwagikoze yari asanzwe yitwara, imibereho ye bwite n’uburyo icyaha cyakozwemo’’. 2 Urubanza n° RPA 00060/2021/CA rwaciwe n’Urukiko rw’Ubujurire ku wa 04/04/2022 haburana Ubushinjacyaha, NSABIMANA Callixte alias Sankara na bagenzi be, igika cya 252-254.

3 Reba igika cya 15 cy’urwo rubanza.

## Page 5

[17] Nk’uko imikirize y’urubanza rujuririrwa ibigaragaza, Urukiko Rukuru, Urugereko rwa Rusizi narwo rushingiye ku murongo watanzwe mu rubanza RPA00060/2021/CA rwavuzwe, rwasanze Urukiko Rwisumbuye rwa Rusizi rutaragabanyirije Uwamahoro Vestine igihano ngo rujye munsi y’igihano gito cyateganyirijwe icyaha cyo gucuruza urumogi kandi rwemeje ko hari impamvu nyoroshyacyaha zishingiye ku kuba yaraburanye yemera icyaha, kuba ari ubwa mbere ahamwe n’icyaha, imyifatire ye n’uburyo yakozemo icyaha, ku ngano y’urumogi yafatanywe. Urwo Rukiko rushingiye kuri izo mpamvu nyoroshyacyaha no kuba akomeje gusaba kugabanyirizwa igihano, runashingiye ku biteganwa n’ingingo ya 2 agace ka (a) y’Itegeko Nº 059/2023 ryo ku wa 04/12/2023 rihindura ingingo ya 60 y’Itegeko nº 68/2018 ryo ku wa 30/08/2018 ryavuzwe haruguru, rwamugabanyirije igihano, rumuhanisha igifungo cy’imyaka cumi n’itanu (15) n’ihazabu ingana na miliyoni icumi (10.000.000Frw), gisimbura igifungo cy’imyaka makumyabiri n’itanu (25) n’ihazabu ya miliyoni makumyabiri (20.000.000Frw). [18] Imanza zitandukanye zaciwe n’uru Rukiko ku bantu bahamwe n’ibyaha birimo gucuruza, kubika no gutunda ibiyobyabwenge byo mu bwoko bw’urumogi biteganywa kandi bigahanwa n’ingingo ya 263, igika cya gatatu, y’Itegeko riteganya ibyaha n’ibihano muri rusange nk’uko ryahinduwe kugeza ubu4 , rwemeje ko badashobora kugabanyirizwa igihano ku buryo kijya munsi y’igifungo cy’imyaka cumi n’itanu (15) n’ihazabu ya miliyoni eshanu (5.000.000Frw)5. Mu manza ziheruka gukurikiza uwo murongo harimo nk’urubanza RPAA00436/2024/CA rwaciwe n’uru Rukiko ku wa 21/01/2025 haburana Ubushinjacyaha na Bikorimana Jean Baptise6. [19] Urukiko rw’Ubujurire rurasanga rero Urukiko Rukuru, urugereko rwa Rusizi rwaragabanyirije Uwamahoro Vestine igihano cy’igifungo ku buryo buhagije, rumuhanisha igihano gito cy’igifungo cy’imyaka 15 giteganyirizwa icyaha cyo gucuruza urumogi. Uru Rukiko rusanga ariko harebwe y’Itegeko Nº 059/2023 ryo ku wa 04/12/2023 ryavuzwe haruguru, ihazabu yategetswe gutanga yo itaragabanyijwe mu buryo bukwiye, ikaba igomba kongera kugabanywa kugeza kuri ¼ cy’ihazabu nto yateganyijwe ku cyaha kimuhama kuko yafatanwe ingano nto y’urumogi rungana n’udupfunyika 21 yacuruzaga. Bityo akaba agomba guhanishwa igifungo cy’imyaka 15 n’ihazabu ya 5.000.0000Frw isimbura ihazabu ya miliyoni icumi (10.000.000Frw) yari yahanishijwe mu rubanza rujuririrwa III. ICYEMEZO CY’URUKIKO [20] Rwemeje ko ubujurire bwa Uwamahoro Vestine nta shingiro bufite; [21] Rwemeje ko urubanza RPA00102/2022/HC/RSZ rwaciwe n’Urukiko Rukuru, Urugereko rwa Rusizi ku wa 11/04/2024 ruhindutse gusa ku byerekeye ihazabu; [22] Ruhanishije Uwamahoro Vestine igifungo cy’imyaka cumi n’itanu (15) n’ihazabu ya miliyoni eshanu (5.000.000Frw) ; [23] Rutegetse ko Uwamahoro Vestine asonerwa gutanga amagarama y’urubanza kuko aburana afunzwe.

4 Ingingo ya 263, igika cya gatatu, y’Itegeko Nº 68/2018 ryo ku wa 30/8/2018 riteganya ibyaha n’ibihano muri rusange nk’uko ryahinduwe n’ingingo ya 11 y’Itegeko Nº 69/2019 ryo ku wa 08/11/2019 iteganya ibikurikira: “Umuntu ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranyije n’amategeko, aba akoze icyaha. Iyo abihamijwe n’urukiko ahanishwa : (1o) igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 Frw) ariko atarenze miliyoni mirongo itatu (30.000.000Frw) ku byerekeye ibiyobyabwenge bihambaye”. 5 Reba igika cya 17 cy’ urubanza, RPAA 00097/2024/CA rwaciwe ku wa 20/12/2024 haburana Ubushinjacyaha na Twagirumukiza Sibomana Athanase, igika cya 17 cy’urubanza rwaciwe n’Urukiko rw’Ubujurire ku wa 20/12/2024, haburana Ubushinjacyaha na Nkebukande Claver, igika cya 19 cy’urubanza RPAA 00099/2024/CA rwaciwe ku wa 16/12/2024 Ubushinjacyaha na Manizabayo Gilbert Alias Nkurunziza Jean Pierre n’izindi. 6 Reba igika cya 15 cy’urwo rubanza.