UBUSHINJACYAHA v. UWAMUNGU

# UBUSHINJACYAHA v. UWAMUNGU

- Source: Amategeko - Section: Decisions (Judgements) - Date: 2024-12-20 - Case/document no.: RPAA 00472/2023/CA - Collection: Court of Appeal

## Text

## Page 1

UBUSHINJACYAHA v. UWAMUNGU [Rwanda URUKIKO RW’UBUJURIRE – RPAA 00472/2023/CA (Mukandamage, P.J.,) 20 Ukuboza 2024] Amategeko agenga imanza nshinjabyaha – Icyaha cyo gusambanya umwana w’imyaka ikenda (9) y’amavuko– Kugabanyirizwa igihano – Mu rwego rw’ibirego nshinjabyaha iyo abaregwa nta kindi banenga urubanza rwajuririwe, uretse kuvuga gusa ko batagabanyirijwe bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo. Incamake y’ikibazo: Uwamungu Elias w’imyaka mirongo itatu n’umwe (31) y’amavuko yarezwe mu Bugenzacyaha na Mukandutiye Joselyne avuga ko yasambanyije umwana we witwa I. E. w’imyaka icyenda (9) y’amavuko). Nyuma y’iperereza, Ubushinjacyaha bwatanze ikirego mu Rukiko Rwisumbuye rwa Gicumbi burega Uwimana Elias icyaha cyo gusambanya umwana, busaba ko ahamwa n’icyo cyaha, agahanishwa igifungo cya burundu. Uwamungu yaburanye yemera icyaha, avuga ko atabikoze nkana kuko abana n’uburwayi bwo mu mutwe, ko mu Mudugudu bose bazi ko abana n’ubwo bumuga, asaba ubufasha bwo kujyanwa kwa Muganga. Urukiko Rwisumbuye rwa Gicumbi rwasanze hari ibimenyetso bitandukanye bigaragaza ko uregwa yakoze icyaha cyo gusambanya umwana, birimo kuba yemera icyaha, icyemezo cy’amavuko, icyemezo cya Muganga kigaragaza ko umwana yakoreshejwe imibonano mpuzabitsina, maze urukiko rumuhanisha igifungo cya burundu. Uwamungu yajuririye ntiyishimiye imikirize y’urubanza maze ajurira mu Rukiko Rukuru asaba kugabanyirizwa igihano kuko yaburanye yemera icyaha. Uhagarariye Ubushinjacyaha yavuze ko ubujurire nta shingiro bufite, kubera ko Urukiko Rwisumbuye rwa Gicumbi rwamuhamije icyaha rushingiye ku mvugo ze ubwe yemera icyaha n’ibindi bimenyetso bwatanze. Urukiko Rukuru rwemeje ko rumugabanyirije igihano kuko ari ubwa mbere akoze icyaha kandi yacyemeye ku rwego rwa mbere no mu mwanzuro w’ubujurire, maze rumuhanisha igifungo cy’imyaka makumyabiri (20). Uwamungu yajuririye nanone mu Rukiko rw’Ubujurire, avuga ko ingingo y’ubujurire ari imwe yerekeranye no gusaba kugabanyirizwa igihano. Ubushinjacyaha nabwo buvuga ko Uwamungu adakwiye kugabanyirizwa igihano, kubera ko icyo yahawe gihwanye n’uburemere bw’icyaha yakoze, kuko yakoze icyaha cyo gusambanya umwana afite imyaka mirongo itatu n’umwe (31) y’amavuko, agikora ari umugabo wubatse, atinyuka gusambanya umwana w’imyaka icyenda (9) y’amavuko, bityo ko igihano cy’imyaka makumyabiri (20) Urukiko Rukuru rwamuhaye rumugabanyirije gihwanye n’uburemere bw’icyaha yakoze.

## Page 2

Incamake y’icyemezo: Mu rwego rw’ibirego nshinjabyaha iyo abaregwa nta kindi banenga urubanza rwajuririwe, uretse kuvuga gusa ko batagabanyirijwe bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo. Ubujurire nta shingiro.

Amategeko yashingiweho: Itegeko N° 68/2018 ryo ku wa 30/8/2018 riteganya ibyaha n’ibihano muri rusange, ingingo ya 49. Imanza zifashishijwe: Urubanza RPA 00060/2021/CA rw’ Ubushinjacyaha, Nsabimana Callixte alias Sankara na bagenzi be, rwaciwe n’Urukiko rw’Ubujurire ku wa 04/04/2022 Urubanza I. IMITERERE Y’URUBANZA [1] Ku wa 20/05/2019, Uwamungu Elias yarezwe mu Bugenzacyaha na Mukandutiye Joselyne avuga ko yasambanyije umwana we witwa I. E. w’imyaka icyenda (9) y’amavuko, ko yabimenye bitewe n’uko yabonanye umwana igiceri cy’amafaranga ijana y’u Rwanda (100 Frw), amubajije aho yayakuye amubwira ko ari Uwimana Elias wayamuhaye amaze kumusambanya. [2] Nyuma y’iperereza, Ubushinjacyaha bwatanze ikirego mu Rukiko Rwisumbuye rwa Gicumbi burega Uwimana Elias icyaha cyo gusambanya umwana, busaba ko ahamwa n’icyo cyaha, agahanishwa igifungo cya burundu giteganywa n’ingingo ya 133 y’Itegeko N° 68/2018 ryo ku wa 30/08/2018 riteganya ibyaha n’ibihano muri rusange. [3] Uwamungu Elias yaburanye yemera icyaha, avuga ko atabikoze nkana kuko abana n’uburwayi bwo mu mutwe, ko mu Mudugudu bose bazi ko abana n’ubwo bumuga, asaba ubufasha bwo kujyanwa kwa Muganga. [4] Mu rubanza RP 00112/2020/TGI/GIC rwaciwe ku wa 18/03/2020, Urukiko Rwisumbuye rwa Gicumbi rwasanze hari ibimenyetso bigaragaza ko Uwimana Elias yakoze icyaha cyo gusambanya umwana, birimo kuba yemera icyaha, icyemezo cy’amavuko kigaragaza ko umwana wahohotewe yavutse ku wa 16/04/2010, icyemezo cya Muganga kigaragaza ko umwana yakoreshejwe imibonano mpuzabitsina n’ubuhamya bwatanzwe na Tumuhuriyeho Angelique. Urukiko rwasanze kandi ibyo Uwimana Elias avuga ko afite uburwayi bwo mu mutwe nta shingiro bifite, kuko nta kimenyetso abitangira, maze rumuhanisha igifungo cya burundu. [5] Uwamungu Elias yajuririye Urukiko Rukuru asaba kugabanyirizwa igihano kuko yaburanye yemera icyaha, mu iburanisha avuga ko ku rwego rwa mbere yahamijwe icyaha cyo gusambanya umwana rutabanje kumusuzumisha ngo rurebe niba yaranduje umwana agakoko

## Page 3

gatera SIDA. Uhagarariye Ubushinjacyaha yavuze ko ubujurire bwa Uwamungu Elias nta shingiro bufite, kubera ko Urukiko Rwisumbuye rwa Gicumbi rwamuhamije icyaha rushingiye ku mvugo ze ubwe yemera icyaha n’ibindi bimenyetso bwatanze. [6] Mu rubanza RPA 00666/2020/HC/KIG rwaciwe ku wa 27/10/2023, Urukiko Rukuru rwasanze impamvu y’ubujurire y’uko Uwamungu Elias yajyanwa gupimishwa agakoko gatera SIDA ari ingingo nshya ataburanishije ku rwego rwabanje, ariko rumugabanyiriza igihano kuko ari ubwa mbere akoze icyaha kandi yacyemeye ku rwego rwa mbere no mu mwanzuro w’ubujurire, hanyuma rumuhanisha igifungo cy’imyaka makumyabiri (20). [7] Uwamungu Elias yajuririye Urukiko rw’Ubujurire, urubanza ruhabwa RPAA 00472/2023/CA, ruburanishwa mu ruhame ku wa 04/12/2024, Uwamungu Elias yunganiwe na Me Mukwende Milimo Olivier, naho Ubushinjacyaha buhagarariwe na Habineza Jean Damascène, Umushinjacyaha ku rwego rw’Igihugu. [8] Mu myanzuro no mu miburanire, Uwamungu Elias avuga ko ingingo y’ubujurire ari imwe yerekeranye no gusaba kugabanyirizwa igihano, ko indi yari yatanzwe ijyanye no kutaryozwa icyaha kubera uburwayi bwo mu mutwe atakiyikomeje kubera ko nta bimenyetso abifitiye. Uhagarariye Ubushinjacyaha avuga ko Uwamungu Elias adakwiye kugabanyirizwa igihano, kubera ko icyo yahawe gihwanye n’uburemere bw’icyaha yakoze. [9] Ikibazo kigomba gusuzumwa muri uru rubanza ni icyo kumenya niba igihano Uwamungu Elias yahawe cyagabanywa. II. ISESENGURA RY’IKIBAZO KIGIZE URUBANZA Kumenya niba igihano Uwamungu Elias yahawe kitakongera kugabanywa [10] Uwamungu Elias n’umwunganira bavuga ko yemeye icyaha ku buryo budasubirwaho, ko ari ubwa mbere akurikiranyweho icyaha mu buryo buzwi, ko nta ngaruka zikomeye cyane icyaha yakoze cyagize k’uwagikorewe harebwe ibyo raporo ya muganga yagaragaje, bagasaba ko hashingirwa ku ngingo ya 2, igika cya mbere, y’Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, maze akagabanyirizwa igihano yahawe kikagera ku myaka cumi n’itanu (15) y’igifungo. [11] Uhagarariye Ubushinjacyaha avuga ko Uwamungu Elias yakoze icyaha cyo gusambanya umwana afite imyaka mirongo itatu n’umwe (31) y’amavuko, agikora ari umugabo wubatse, atinyuka gusambanya umwana w’imyaka icyenda (9) y’amavuko, akaba asanga igihano cy’imyaka makumyabiri (20) Urukiko Rukuru rwamuhaye rumugabanyirije gihwanye n’uburemere bw’icyaha yakoze. Avuga kandi ko hari umurongo watanzwe mu rubanza RPAA 0021/14/CS - RPAA 0022/14/CS rwaciwe n’Urukiko rw’Ikirenga ku wa 13/10/2017, haburana Ubushinjacyaha na Uzabakiriho, uvuga ko Umucamanza atanga igihano akurikije uburemere bw'icyaha, ingaruka icyaha cyateye, impamvu zatumye uregwa agikora, uko yari asanzwe yitwara, imibereho ye bwite n’uburyo icyaha cyakozwemo, agasaba ko urubanza rwajuririwe rutahinduka. UKO URUKIKO RUBIBONA

## Page 4

[12] Ku bijyanye no kugabanyirizwa igihano mu gihe ariyo mpamvu y’ubujurire yonyine, byatanzweho umurongo mu rubanza RPA 00060/2021/CA rwaciwe n’Urukiko rw’Ubujurire ku wa 04/04/2022 haburana Ubushinjacyaha, Nsabimana Callixte alias Sankara na bagenzi be, uwo murongo ukaba uvuga ko mu rwego rw’ibirego nshinjabyaha iyo abaregwa nta kindi banenga urubanza rwajuririwe, uretse kuvuga gusa ko batagabanyirijwe bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo hakurikijwe ibiteganywa n’ingingo ya 49 y’Itegeko N° 68/2018 ryo ku wa 30/8/2018 riteganya ibyaha n’ibihano muri rusange, ariko ko mu bujurire, Umucamanza agomba kuzirikana ko yemerewe gusa guhindura igihano cyatanzwe n’Umucamanza wo mu rukiko rubanza, ari uko amaze kugaragaza ko urwo rukiko rwaba rwarakoresheje nabi itegeko cyangwa ubushishozi bwarwo mu gutanga icyo gihano. Uyu murongo wakurikijwe mu manza zitandukanye zakurikiyeho zaciwe n’uru Rukiko, harimo n’urubanza RPAA 262/2023/CA rwaciwe ku wa 29/11/2024, haburana Ubushinjacyaha na Uwizeyimana Chantal. [13] Mu bika bikurikira harasuzumwa niba mu guhanisha Uwamungu Elias igifungo cy’imyaka makumyabiri (20) ku cyaha cyo gusambanya umwana w’imyaka icyenda (9) y’amavuko, urukiko rwabanje rwaba rwarakoresheje nabi itegeko cyangwa ubushishozi bwarwo ku buryo icyo gihano cyagabanywa. [14] Nk’uko bigaragara mu manza zabanje, ku rwego rwa mbere Uwamungu Elias yaburanye yemera icyaha, Urukiko Rwisumbuye rwa Gicumbi rusanga ukwemera icyaha n’ibindi bimenyetso rwashyikirijwe n’Ubushinjacyaha bimuhamya icyaha cyo gusambanya umwana, rumuhanisha igifungo cya burundu. Mu bujurire, Urukiko Rukuru rwasanze hari impamvu nyoroshyacyaha zatuma agabanyirizwa igihano, rumuhanisha igifungo cy’imyaka makumyabiri (20), aho kuba igifungo cya burundu. [15] Urukiko rw’Ubujurire rurasanga icyaha Uwamungu Elias yakoze cyo gusambanya umwana utarageza ku myaka cumi n’ine (14) y’amavuko ari icyaha gikomeye, kuko gihanishwa igifungo cya burundu, kandi icyo cyaha yagikoze ari mukuru, kuko yari afite imyaka mirongo itatu n’umwe (31) y’amavuko, kandi ari umugabo wubatse, agikorera umwana muto cyane w’imyaka icyenda (9) y’amavuko, bityo igihano yahawe cy’imyaka makumyabiri (20) nticyakongera kugabanywa, kuko cyagabanyijwe bihagije kandi hitawe ku mpamvu y’uko yaburanye yemera icyaha. [16] Hashingiwe ku rubanza rwatanze umurongo rwavuzwe haruguru no ku bisobanuro bimaze gutangwa, Urukiko rw’Ubujurire rurasanga ubujurire bwa Uwimana Elias bugamije kugabanyisha igihano yahawe n’Urukiko Rukuru nta shingiro bufite, urubanza yajuririye rukaba rugomba kugumana agaciro mu ngingo zarwo zose. III. ICYEMEZO CY’URUKIKO [17] Rwemeje ko ubujurire bwatanzwe na Uwamungu Elias nta shingiro bufite; [18] Rwemeje ko urubanza RPA 00666/2020/HC/KIG rwaciwe n’Urukiko Rukuru ku wa 27/10/2023 rugumanye agaciro mu ngingo zarwo zose;

## Page 5

[19] Rutegetse ko igihano cy’igifungo cy’imyaka makumyabiri (20) Uwamungu Elias yahawe ku cyaha cyo gusambanya umwana w’imyaka icyenda (9) y’amavuko kigumyeho; [20] Ruvuze ko amagarama y’urubanza aherereye ku Isanduku ya Leta, kuko Uwamungu Elias yajuriye afunze, akaba asonewe kuyatanga.