UWAMUNGU vs. LETA Y’U RWANDA (MINEDUC)

# UWAMUNGU vs. LETA Y’U RWANDA (MINEDUC)

- Source: Amategeko - Section: Decisions (Judgements) - Date: 2023-09-21 - Case/document no.: RAD 00010/2022/HC/KIG - Collection: High Court

## Text

## Page 1

UWAMUNGU vs. LETA Y’U RWANDA (MINEDUC) [Rwanda URUKIKO RUKURU – RAD 00010/2022/HC/KIG – (Harerimana, J. P.) 21 Nzeri 2023] Amategeko agenga imanza z’umurimo – Ivugururwa ry’urwego rwa Leta – Umwanya w’umurimo – Kuba umwanya w’umurimo wahinduriwe inyito, ndetse ukavanwa mu kigo warurimo ugashyirwa mu kigo gishyashya, ufatwa nk’umwanya mushya ugomba gukorerwa ipiganwa mu kigo wajyanywemo. Incamake y’ikibazo: Uwamungu yatanze ikirego muri uru Rukiko Rukuru asaba indishyi zitandukanye zo kuba yarahagaritswe by’agateganyo mu buryo budakurikije amategeko, nyuma y’uko umwanya w’ubugenzuzi bw’amashuri yakoragaho muri MINEDUC wimuriwe mu kindi kigo aricyo NESA, naho MINEDUC yo ikaburana ivuga ko iryo hagarikwa ryakowe mu buryo bukurikije amategeko. Muri uru rubanza hasuzumwe icyo kibazo impande zombi zitumvikanyeho, aho mu myanzuro y’Urega avuga ko MINEDUC yamuhagaritse ntacyo ishingiyeho kuko mu myanya y’imirimo yarimo inshingano zabo yagiye yimurwa ivanwa mu kigo kimwe ishyirwa mu kindi maze we n’abagenzi be bakazisangayo nta piganwa rikozwe, akaba ariko byagombaga gukorwa muri iki kibazo. Ashingiye ku rubanza rwaciwe n’Urukiko rw’Ubujurire ku kibazo gisa n’iki, Uregwa avuga ko Urega yirukanwe mu buryo bukurikije amategeko. Incamake y’icyemezo: Kuba umwanya w’umurimo wahinduriwe inyito, ndetse ukavanwa mu kigo warurimo ugashyirwa mu kigo gishyashya, ufatwa nk’umwanya mushya ugomba gukorerwa ipiganwa mu kigo wajyanywemo. Ikirego nta shingiro gifite. Amategeko yashingiweho: Itegeko No 017/2020 ryo kuwa 07/10/2020 rishyiraho sitati rusange y’abakozi ba Leta, ingingo ya 40. Itegeko No 67/2018 ryo ku wa 30/08/2018 rigena inshingano, imitunganyirize n’imikorere bya Komisiyo y’Igihugu Ishinzwe Abakozi ba Leta, ingingo ya 5. Iteka rya Perezida No 128/01 ryo ku wa 03/12/2020 ryerekeye gushaka abakozi ba Leta n’amahugurwa, ingingo ya 28. Imanza zifashishijwe: RADA 00003/2022/CA, Habiryayo n’abagenzi be vs. Leta y’u Rwanda (MINEDUC) rwaciwe n’Urukiko rw’ubujurire kuwa 09/06/2023. Urubanza I. IMITERERE Y’ URUBANZA [1] Uwamungu Victorien yabaye umukozi wa MINEDUC nk’umugenzuzi w’imirimo aza guhagarikwa kuko umwanya yakoragamo utari ukirimo. [2] Uwamungu Victorien yatanze ikirego mu Rukiko Rukuru, urubanza ruhabwa RAD 00010/2022/HC/KIG, iburanisha riba kuwa 7/9/2023, Uwamungu Victorien atitabye naho |Leta

## Page 2

y‘u Rwanda (MINEDUC) ihagarariwe na Me Habumuremyi Prosper, akaba yarasabye ko rwaburanishwa Uwamungu Victorien adahari, Urukiko rwemeza ko ruburanishwa adahari hakazasuzumwa imyanzuro yashyikirije Urukiko, urubanza rukazafatwa nkaho yari ahari. [3] Mu myanzuro ye, Uwamungu Victorien avuga ko ibyo MINEDUC yakoze byo kumuhagarika by‘agateganyo bitakurikije amategeko, agasaba indishyi zitandukanye. [4] Mu myanzuro yayo no mu miburanire, Leta y‘u Rwanda ( MINEDUC ) ihagarariwe na Me Habumuremyi Prosper avuga ko Uwamungu Victorien yirukanywe bikurikije amategeko, ikaba yaratanze urubanza rwaciwe n‘Urukiko rw’ubujurire ku bibazo bisa nk’ibi. [5] Urukiko, rushingiye kuri izo mpaka, rusanga hakwiye gusuzumwa ibibazo bikurikira: - Kumenya niba Uwamungu Victorien yarirukanywe bidakurikije amategeko. - Kumenya niba indishyi asaba zifite ishingiro. - Kumenya niba amafaranga y’ibyakoreshejwe mu rubanza asabwa muri uru rubanza afite ishingiro. II. ISESENGURA RY’IBIBAZO BIGIZE URUBANZA 1. Kumenya niba Uwamungu Victorien yarirukanywe bidakurikije amategeko [6] Mu myanzuro ye, Uwamungu Victorien avuga ko ibyo MINEDUC yakoze byo kumuhagarika by’agateganyo na bagenzi be ntaho byashingiye kuko nta mirimo yabo yavuyeho ahubwo ko yimuriwe ahandi muri NESA ivuye muri MINEDUC bivuga ko imyanya y’imirimo yarimo inshingano zabo nkuko zagiye ziva muri “Inspection Generale de l’education” batangiriyeho ndetse zakwimurirwa muri REB bakazisangayo, zavayo nabwo zigiye muri MINEDUC bakazisangayo nta piganwa ribayeho ni nako byari gukorwa muri iki ikibazo zimuriwe muri NESA dore ko ibyasabwaga kuzuza muri iyo myanya bari babyujuje n’ikimenyetso nuko bapiganiye imyanya yaje kuba mike mu ivugurura kandi bakayitisindira; ashingiye ku ngingo ya 40 y’Itegeko No 017/2020 ryo kuwa 07/10/2020 rishyiraho sitati rusange y’abakozi ba Leta ko asanga yarahagaritswe hatubahirijwe amategeko. [7] Leta y’u Rwanda, MINEDUC ivuga ko yahagaritswe bikurikije amategeko; Me Habumuremyi Prosper uyihagarariye akaba yaratanze urubanza rwaciwe n’Urukiko rw’ubujurire ku kibazo gisa nk’iki. UKO URUKIKO RUBIBONA [8] Ikibazo gisa nk’iki cyakemuwe n’Urukiko rw’ubujurire mu rubanza RADA 00003/2022/CA rwaciwe n’Urukiko rw’ubujurire aho muri urwo rubanza, Habiryayo na bagenzi be bari abagenzuzi b’umurimo kimwe na Uwamungu Victorien. Minisitiri w’Uburezi yagiye yandikira buri wese ku giti cye ibaruwa imumenyesha ko ahagaritswe ku kazi kubera ko imyanya bakoragamo itari ikiri ku mbonerahamwe y’imyanya y’imirimo (organigramme) y’iyo Minisiteri. Nyuma yo gutakamba no kujurira ntibanyurwe n’igisubizo bahawe, baregeye Urukiko Rukuru, basaba kurenganurwa, gusubizwa mu kazi no kugenerwa indishyi zo gusezererwa by’agateganyo mu kazi mu buryo bunyuranyije n’amategeko. [9] Muri urwo rubanza, Urukiko rw’Ubujurire rwasanze kuba imyanya y’ubugenzuzi bw’amashuri yari yahinduriwe inyito, ndetse ikanavanwa muri Minisiteri y’Uburezi igashyirwa mu kigo gishyasha, Minisiteri y’Uburezi idafiteho uburenganzira mu ishyirwa mu myanya ry’abakozi, nta kabuza ko yafashwe nk’imyanya mishya yagombaga gukorerwa ipiganwa mu kigo yajyanywemo, ari na byo Komisiyo y’Igihugu Ishinzwe Abakozi ba Leta yasobanuriye Minisiteri y’Uburezi mu ibaruwa yavuzwe haruguru yo ku wa 23/02/2021, aho iyo Komisiyo yibukije Minisiteri y’Uburezi ko nta bubasha ifite bwo gushakira NESA abakozi. Ibi kandi

## Page 3

binateganywa n’ingingo ya 28, igika cya kabiri y’Iteka rya Perezida No 128/01 ryo ku wa 03/12/2020 ryerekeye gushaka abakozi ba Leta n’amahugurwa. ko ibyakozwe na Komisiyo y’Igihugu ishinzwe abakozi ba Leta kandi ibihererwa ububasha n’ingingo ya 5,1˚ y’Itegeko No 67/2018 ryo ku wa 30/08/2018 rigena inshingano, imitunganyirize n’imikorere bya Komisiyo y’Igihugu Ishinzwe Abakozi ba Leta, iteganya ko Komisiyo ifite inshingano zo kugenzura ko inzego za Leta zishyira abakozi mu myanya y’imirimo binyuze mu mucyo kandi mu buryo bumwe ku bashaka akazi bose. [10] Urukiko rwasanze kuba Minisiteri y’Uburezi ari yo ireberera NESA, bitavuze ko ifite ububasha bwo kuyishakira abakozi, abajuriye bakaba bari bafite inshingano zo gupiganirwa imyanya mishya muri NESA, mu gihe Minisiteri y’Uburezi yari yagaragaje ko ifite ubushake bwo kubashyira mu myanya ibakoresha ikizamini mu buryo bw’ikiganiro, Komisiyo ifite inshingano zo kureberera uko inzego za Leta zishyira mu myanya abakozi ba Leta, ikayimenyesha ko ibyo yakoze binyuranyije n’amategeko, ndetse igasaba ko icyo kizamini giteshwa agaciro. Ku bijyanye no kuba abajuriye bavuga ko hari bamwe mu bakozi bakoranaga Minisiteri y’Uburezi yohereje mu bindi bigo aho batanze urugero rw’uwitwa Nsabimana David wari ushinzwe ubwubatsi iyo Minisiteri yahaye akazi muri Rwanda Housing Authority, Urukiko rwasanze ibaruwa imuha akazi, igaragaza ko ari Rwanda Housing Authority yamwandikiye imumenyesha ko yahawe akazi muri icyo Kigo, ikaba igaragaza ko icyo Minisiteri y’Uburezi yakoze ari ugushyikiriza icyo kigo dosiye ye kugira ngo kiyigeho, akaba rero atari Minisiteri y’Uburezi yamuhaye akazi muri Rwanda Housing Authority. [11] Ku bijyanye no kuba abajuriye basaba gusubizwa mu kazi ngo kubera ko imyanya bakoragamo igihari muri NESA, Urukiko rwasanze bivugira ko iyo myanya yakorewe ibizamini ishyirwamo abandi bakozi, kuba rero iyo myanya yari yafashwe nk’imyanya mishyashya bitewe no kuba yari yahinduriwe inyito, ibisabwa ndetse n’inshingano, bakiyambura uburenganzira bwo kugerageza amahirwe ngo bapiganwe bakozi bashaka nk’abandi akazi, batasaba kujya mu myanya yarangije gushyirwamo abakozi, cyane ko hagaragajwe ko bahagaritswe by’agateganyo, banasezererwa mu bakozi ba Leta mu buryo bukurikije amategeko. Hashingiwe ku biteganywa n’amategeko yavuzwe haruguru ndetse n’ibisobanuro bitanzwe, Urukiko rwasanze abajuriye barahagaritswe by’agateganyo mu kazi, basezererwa mu bakozi ba Leta mu buryo bukurikije amategeko, akaba nta karengane bakorewe, ku buryo bashyirwa mu myanya y’ubugenzuzi bw’amashuri muri NESA. [12] Hashingiwe kuri ibyo byemejwe mu rubanza rwavuzwe haruguru, Urukiko rurasanga Uwamungu Victorien ufite ikibazo gisa nk’icyabo bagenzi be yarirukanywe mu buryo bukurikije amategeko. 2. Kumenya niba indishyi asaba zifite ishingiro [13] Mu myanzuro ye, uhagarariye Uwamungu Victorien avuga ko ashingiye ko ihagarikwa ryakozwe binyuranyije n’ingingo ya 40 y’itegeko ryavuzwe haruguru , agasaba ko yabihererwa indishyi zinyuranye zikurikira: Indishyi zingana n’imyaka yari asigaje no ajye mu zabukuru dore ko yavutse 1981 akaba afite imyaka 40 akaba asigaje 20, indishyi asaba azikaba zibazwe ko ku kwezi yahembwaga 453.573 frw hanyuma wakuba umwaka akaba 5.442.876 frw Asigaje imyaka 20 ngo ajye muzabukuru bivuga 5.442.876 frw x 20= 108.857.520 frw ; Indishyi z’akababaro zingana na 5000.000 frw. [14] Mu myanzuro yayo no mu miburanire, Leta y’u Rwanda (MINEDUC) ihagarariwe na Me Habumuramyi Prosper asaba ko indishyi zisabwa zitahabwa ishingiro. UKO URUKIKO RUBIBONA [15] Urukiko ruhereye ko rwasanze Uwamungu Victorien yarirukanywe bikurije amategeko, rusanga n’indishyi asaba nta shingiro zifite.

## Page 4

3. Kumenya niba amafaranga y’ibyakoreshejwe mu rubanza asabwa n’uregwa afite ishingiro [16] Mu mwanzuro we, Uwamungu Victorien asaba Urukiko ko rutegeka MINEDUC ko yishyura igihembo cy’avocat kingana na 2.000.000 frw, amafaranga y'ikurikirarubanza angana na 500.000 frw n’ingwate y’igarama angana na 40.000 frw. [17] Mu myanzuro yayo no mu miburanire, Leta y’u Rwanda (MINEDUC) ihagarariwe na Me Habumuremyi Prosper avuga ko ibyo asaba nta shingiro bifite kuko yishoye mu manza nta mpamvu. Akavuga ko ahubwo ariwe ukwiriye gutanga amafaranga y’ igihembo cy’avoka cya 500 000 frw. UKO URUKIKO RUBIBONA [18] Urukiko ruhereye ko ikirego cyatanzwe na Uwamungu Victorien nta shingiro gifite, rusanga n’indishyi zisabwa zidafite ishingiro. ku Kijyanye n’ igihembo cy’avoka gisabwa na Leta y’u Rwanda, rusanga afite ishingiro bityo igahabwa 500 000 frw. III. ICYEMEZO CY’URUKIKO [19] Rwemeje ko ikirego cyatanzwe na Uwamungu Victorien cy’uko yirukanywe mu buryo budakurikije amategeko nta shingiro gifite. [20] Rutegetse Uwamungu Victorien guha Leta y’u Rwanda (MINEDUC) amafaranga ibihumbi magana atanu (500 000 frw) y’igihembo cy’avoka. [21] Ruvuze ko ingwate y’igarama urega yatanze ahwana n’ibyakozwe mu rubanza.