ZJ CONSTRUCTION COMPANY Ltd v WORKERS AFFORDABLE PROPERTIES Ltd N’ABANDI

# ZJ CONSTRUCTION COMPANY Ltd v WORKERS AFFORDABLE PROPERTIES Ltd N’ABANDI

- Source: Amategeko - Section: Decisions (Judgements) - Date: 2025-05-23 - Case/document no.: RCOMAA 00083/2022/CA - Collection: Court of Appeal

## Text

## Page 1

ZJ CONSTRUCTION COMPANY Ltd v WORKERS AFFORDABLE PROPERTIES Ltd N’ABANDI [Rwanda URUKIKO RW’UBUJURIRE - RCOMAA 00083/2022/CA (Munyangeri, P.J., Ngagi, Kamere, J.) 23 Gicurasi 2025] Amategeko agenga imiburanishirize y’imanza – Gusiba urubanza - Iyo urega atitabye urukiko nta mpamvu, uregwa ashobora gusaba ko urubanza rusibwa cyangwa agasaba ko ruburanishwa mu mizi yarwo, urubanza ruciwe rukazafatwa nk’aho rwaburanishijwe ababuranyi bahari, keretse iyo urukiko, ku nyungu z’ubutabera kandi mu buryo buteganywa n’iri tegeko, rusanze ari ngombwa ko urubanza rwimurirwa ku yindi tariki kugira ngo urega yongere ahamagazwe. Incamake y’ikibazo: ZJ CONSTRUCTION COMPANY Ltd yagiranye amasezerano y’ubwubutsi na WORKERS AFFORDABLE PROPERTIES Ltd (WPA) aho yagombaga kubaka imisingi 41 ku 832.933.887 Frw. Nyuma yaje guhabwa n’andi masezerano yo kugeza umuriri kuri iyo site. Uregwa yaje gusesa amasezerano bituma urega atanga ikirego mu Rukiko rw’Ubucuruzi avuga ko hari ibikorwa yakoze ariko akaba atarishyuwe amafaranga yabyo anasaba n’indishyi zinyuranye. WPA isobanura ko ibyo urega avuga nta shingiro bifite kuko yishyuza imirimo atigeze akora kandi ko n’amasezerano yasheshwe mu buryo bukurikije amategeko. Muri uru rubanza haje kugobokamo Rukundo Iddy Radjabu, Ntibitura Yusufu, MUSAMA Ltd, Nsengiyumva Claude, Nsengiyumva Amon, Muhire Viateur na MEGANEWTON Ltd basaba Urukiko gutegeka ZJ CONSTRUCTION COMPANY Ltd kubishyura imyenda ibafitiye ikomoka ku bikoresho bayigemuriye n’imirimo bayikoreye kuri iyo site. Urukiko rushingiye ku masezerano atandukanye ababuranyi bagiranyi, rwasanze ikirego cyatanzwe n’urega gifite ishingiro kuri bimwe ndetse no kugoboka mu rubanza ku bushake bifite ishingiro, ko hari umwenda WAP ibereyemo urega, ko kandi urega hari umwenda abereyemo abagobotse ku bushake. Urega, uregwa n’abagobotse bose bajuririye icyo cyemezo bagaragaza ko hari ibyo batishimiye. Izi manza zose zahurijwe hamwe, ziburanishirizwa kuri n˚ RCOMA 00209/2021/HCC CMB RCOMA 00211/2021/HCC CMB RCOMA 00212/2021/HCC, Urukiko Rukuru rw’Ubucuruzi rwemeza ko ubujurire bwa ZJ CONSTRUCTION COMPANY Ltd n’ubwa WORKERS AFFORDABLE PROPERTIES Ltd, nta shingiro bufite; ZJ CONSTRUCTION COMPANY Ltd yajuririye icyo cyemezo mu Rukiko rw’Ubujurire ivuga ko Urukiko Rukuru rw’Ubucuruzi rwirengagije ibimenyetso n’amategeko. Mu gihe cy’iburanisha, WAP yagaragaje inzitiuzi ko hari urundi rubanza iburana mu Rukiko rw’Ubucuruzi rwo gutangiza igihombo bityo ko uru rwaba ruhagaze. Urwo rubanza rumaze kuburanishwa rukemeza ko nta mpamvu ihari yatuma WAP itangiza igihombo, uru rubanza narwo rwasubukuwe. Mu iburanisha, ZJ CONSTRUCTION COMPANY Ltd, yajuriye, ntiyigeze iboneka, uwari uyihagarariye amenyesha ko atakiyiburanira kuko amasezerano bari bafitanye yarangiye kandi n’umuyobozi wayo akaba atakiboneka. Ababuranyi bitabye Urukiko basabye ko ubujurire bwatanzwe na ZJ CONSTRUCTION COMPANY Ltd busibwa mu bitabo by’ibirego by’uru Rukiko, kuko yahamagawe mu buryo bukurikije amategeko ntiyitabe nta mpamvu.

## Page 2

Incamake y’icyemezo: Iyo urega atitabye urukiko nta mpamvu, uregwa ashobora gusaba ko urubanza rusibwa cyangwa agasaba ko ruburanishwa mu mizi yarwo, urubanza ruciwe rukazafatwa nk’aho rwaburanishijwe ababuranyi bahari, keretse iyo urukiko, ku nyungu z’ubutabera kandi mu buryo buteganywa n’iri tegeko, rusanze ari ngombwa ko urubanza rwimurirwa ku yindi tariki kugira ngo urega yongere ahamagazwe. Urubanza N˚ RCOMAA 00083/2022/CA rugomba gusibwa mu bitabo by’Urukiko rw’Ubujurire. Amategeko yashingiweho: Itegeko N˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibikurikira, ingingo ya 54, 111. Urubanza I. IMITERERE Y’URUBANZA

[1] ZJ CONSTRUCTION COMPANY Ltd yagiranye na WORKERS

AFFORDABLE PROPERTIES (WAP) Ltd amasezerano yo kuyubakira imisingi (fondations) mirongo ine n’umwe (41) y’inzu zitandukanye kuri site iri i Gahanga mu Karere ka Kicukiro ku giciro cy’amafaranga miliyoni magana inani ma mirongo itatu n’ebyiri, ibihumbi magana acyenda na mirongo itatu na bitatu na magana inani na mirongo inani n’arindwi (832.933.887 Frw) n’andi y’inyongera yo kuzana umuriro w’amashanyarazi kuri iyo site ku kiguzi cy’amafaranga miliyoni cumi n’enye, ibihumbi ijana na mirongo itanu na bitandatu na magana abiri na mirongo itanu n’ane (14.156.254 Frw). WAP Ltd yaje gusesa ayo masezerano ivuga ko ZJ CONSTRUCTION COMPANY Ltd itayubahirije. [2] ZJ CONSTRUCTION COMPANY Ltd yatanze ikirego mu Rukiko rw’Ubucuruzi, irusaba gutegeka WAP Ltd kuyishyura amafaranga miliyoni magana atandatu na mirongo icyenda n’indwi, ibihumbi ijana na mirongo itanu n’icyenda na magana atanu na makumyabiri n’umunani (697.159.528 Frw) akomoka ku masezerano yo ku wa 31/05/219 yasheshe mu buryo bunyuranyije n’amategeko, indishyi mbonezamusaruro, iz’akababaro, ikurikiranarubanza n’igihembo cya Avoka. [3] WAP Ltd yireguye ivuga ko ZJ CONSTRUCTION COMPANY Ltd yishyuza imirimo yakoze n’ibitarateganyijwe mu masezerano, ko ayo masezerano yaseshwe mu buryo bukurikije amategeko, ikirego cyatanzwe na ZJ CONSTRUCTION COMPANY Ltd kikaba nta shingiro gifite. Mu gusoza isaba guhabwa indishyi z’ibyangiritse kubera kutubahiriza amasezerano, izo gufunga site n’igihombo yatewe, iz’ikurikiranarubanza n’igihembo cya Avoka. [4] Rukundo Iddy Radjabu, Ntibitura Yusufu, MUSAMA Ltd, Nsengiyumva Claude, Nsengiyumva Amon, Muhire Viateur na MEGANEWTON Ltd bagobotse ku bushake muri urwo rubanza, basaba Urukiko gutegeka ZJ CONSTRUCTION COMPANY Ltd kubishyura imyenda

## Page 3

ibafitiye ikomoka ku bikoresho bayigemuriye n’imirimo bayikoreye kuri site ya Gahanga. Abagobotse kandi uretse MEGANEWTON Ltd, basoje basaba guhabwa inyungu z’umwenda buri wese aberewemo, indishyi z’akababaro, iz’ikurikiranarubanza n’igihembo cya Avoka, banasaba irangizarubanza ry’agateganyo. [5] Mu rubanza n˚ RCOM 00893/2020/TC rwaciwe n’Urukiko rw’Ubucuruzi ku wa 16/02/2021, urwo Rukiko rushingiye ku masezerano atandukanye ababuranyi bagiranye, ku ngingo zinyuranye z’Itegeko n˚45/2011 ryo ku wa 25/11/2011 rigenga amasezerano, ku ngingo zinyuranye z’Itegeko n˚15/2004 ryo ku wa 12/06/2004 ryerekeye ibimenyetso mu manza n’itangwa ryabyo no ku Itegeko n˚22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, rwemeje ko: - Ikirego cya ZJ CONSTRUCTION COMPANY Ltd gifite ishingiro kuri bimwe; - Umwenda usigaye ZJ CONSTRUCTION COMPANY Ltd iberewemo na WAP Ltd ungana n’amafaranga miliyoni mirongo inani n’esheshatu, ibihumbi magana atatu na cumi na bitanu na magana atatu na mirongo itatu n’icyenda (86.315.339 Frw), wiyongereyeho inyungu zawo zingana n’amafaranga miliyoni ebyiri, ibihumbi magana acyenda na mirongo icyenda na bine na mirongo icyenda n’arindwi (2.994.097 Frw) kuri invoice n˚002/WAP/2019 ndetse n’umusoro wa VAT ungana n’amafaranga ibihumbi mirongo itanu na birindwi, ibihumbi magana abiri na mirongo itatu na bitandatu na magana atatu na makumyabiri n’atanu ( 57.236.325 Frw) kuri invoice n˚ 001/WAP/2019;

- ZJ CONSTRUCTION COMPANY Ltd ibereyemo MUSAMA Ltd umwenda ungana n’amafaranga miliyoni mirongo itatu n’esheshatu, ibihumbi mirongo itandatu n’umunani na magana inani (36.068.800 Frw); - ZJ CONSTRUCTION COMPANY Ltd ibereyemo Rukundo Iddy Radjabu umwenda ungana n’amafaranga miliyoni cumi n’umunani, ibihumbi magana ane na mirongo ine n’umunani na magana inani (18.480.800 Frw); - ZJ CONSTRUCTION COMPANY Ltd ibereyemo Ntibitura Yusufu umwenda ungana n’amafaranga miliyoni cumi n’eshatu n’ibihumbi magana ane na mirongo irindwi (13.470.000 Frw); - ZJ CONSTRUCTION COMPANY Ltd ibereyemo Nsengiyumva Claude amafaranga miliyoni cumi n’eshanu n’ibihumbi magana abiri na mirongo itanu (15.250.000 Frw); - ZJ CONSTRUCTION COMPANY Ltd ibereyemo Nsengiyumva

Amon amafaranga miliyoni cumi n’eshatu n’ibihumbi magana acyenda na mirongo itandatu (13.960.000 Frw); - ZJ CONSTRUCTION COMPANY Ltd ibereyemo Muhire Viateur amafaranga miliyoni eshatu n’ibihumbi magana acyenda na mirongo itandatu na bitanu (3.965.000 Frw);

## Page 4

- ZJ CONSTRUTION OMPANY Ltd ibereyemo MEGANEWTON amafaranga miliyoni mirongo itatu n’eshanu n’ibihumbi magana arindwi na makumyabiri (35.720.000 Frw);

[6] Urukiko rw’Ubucuruzi rwategetse kandi ko: - WAP Ltd yishyura ZJ CONSTRUCTION COMPANY Ltd amafaranga ibihumbi ijana (100.000 Frw) y’indishyi z’ikurikiranarubanza, amafaranga miliyoni ebyiri (2.000.000 Frw) y’igihembo cya Avoka n’ibihumbi makumyabiri (20.000 Frw) y’amagarama y’urubanza; - ZJ CONSTRUCTION COMPANY Ltd yishyura Rukundo Iddy Radjabu, Ntibitura Yusufu, MUSAMA Ltd, Nsengiyumva Claude, Nsengiyumva Amon, Muhire Viateur na MEGANEWTON Ltd amafaranga ibihumbi mirongo itanu (50.000 Frw) y’indishyi z’ikurikiranarubanza kuri buri wese no gusubiza buri wese amafaranga ibihumbi makumyabiri (20.00 Frw) y’amagarama y’urubanza; - ZJ CONSTRUCTION COMPANY Ltd kwishyura Rukundo Iddy Radjabu, Ntibitura Yusufu, MUSAMA Ltd, Nsengiyumva Claude, Nsengiyumva Amon na MEGANEWTON Ltd amafaranga ibihumbi magana atandatu (600.000 Frw) kuri buri wese y’igihembo cya Avoka.

[7] ZJ CONSTRUCTION COMPANY Ltd yajuririye urwo rubanza mu Rukiko Rukuru rw’Ubucuruzi, ikirego cyandikwa kuri N˚ RCOMA 00209/2021/HCC itanga impamvu zikurikira: - Kuba Urukiko rw’Ubucuruzi rwarirengagije ibimenyetso bigaragaza ko WAP Ltd igomba kwishyura fagitire ya kabiri, kwishyura amafaranga miliyoni magana abiri na makumyabiri n’enye, ibihumbi ijana na mirongo itanu na bine na magana atanu na makumyabiri n’umunani (224.154.528 Frw) agaragara kuri fagitire ya gatatu (3) n’amafaranga miliyoni magana ane na mirongo itanu n’umunani, ibihumbi ijana na makumyabiri na bitanu na magana atatu na mirongo itatu n’umunani (458.125.338 Frw) agaragara kuri fagitire ya mbere (1); - Kuba nta cyo Urukiko rw’Ubucuruzi rwavuze ku mirimo ZJ CONSTRUCTION COMPANY Ltd yakoze ifite agaciro kangana n’amafaranga miliyoni mirongo itatu, ibihumbi magana acyenda na makumyabiri na bine na magana inani na mirongo irindwi (30.924.870 Frw); - Kuba Urukiko rw’Ubucuruzi rwarirengagije ibimenyetso byerekana ibikoresho byasigaye muri site bitishyuwe igihe ZJ CONSTRUCTION COMPANY Ltd yasohokaga.

[8] Rukundo Iddy Radjabu, Ntibitura Yussufu, Nsengiyumva Amon na MUSAMA Ltd na bo bajuririye urwo rubanza, ubujurire bwabo bwandikwa kuri nº CMB RCOMA 00211/2021/HCC, bavuga ko Urukiko rw’Ubucuruzi rwanze kubagenera inyungu n’indishyi ku mpamvu zidahuye n’amategeko.

## Page 5

[9] WAP Ltd na yo yajuririye urwo rubanza, ubujurire bwayo bwandikwa kuri n˚ RCOMA 00212/2021/HCC itanga impamvu zikurikira: - Kuba itaragombaga kwishyuzwa fondations ebyiri yubatse zitari ziri mu masezerano kandi atari ZJ CONSTRUCTION COMPANY Ltd yazubatse; - Kuba umusoro wa TVA warabazwe mu buryo bunyuranyije n’amategeko; - Kuba ZJ CONSTRUCTION COMPANY Ltd yaragombaga gutegekwa kwishyura ibikoresho byaburiye kuri site; - Kuba itaragombaga gucibwa indishyi, ko ahubwo yari kugenerwa izo kutubahiriza amasezerano. Yasoje isaba guhabwa indishyi z’ibyagiye ku rubanza.

[10] Izi manza zose zahurijwe hamwe, ziburanishirizwa kuri n˚ RCOMA 00209/2021/HCC CMB RCOMA 00211/2021/HCC CMB RCOMA 00212/2021/HCC. [11] Ku bujurire bwatanzwe na ZJ CONSTRUCTION COMPANY Ltd, WAP Ltd yireguye ivuga ko ku birebana n’ibimenyetso byirengagijwe, idasobanura icyo inenga ibisobanuro byatanzwe n’Urukiko rw’Ubucuruzi kuri fagitire n˚1, na ho ko kuri fagitire n˚2, Urukiko rwigereye ku kiburanwa rwibonera ukuri. Ku ngingo y’ubujurire irebana n’amafaranga miliyoni mirongo itatu, ibihumbi magana acyenda na makumyabiri na bine na magana inani na mirongo irindwi ( 30.924.870 Frw), ZJ CONSTRUCTION COMPANY Ltd yavuze ko itishyuwe, WAP Ltd yireguye ivuga ko ayo mafaranga atigeze agibwaho impaka mu rwego rwa mbere, ku birebana n’ibikoresho byasigaye kuri site, WAP Ltd yireguye ivuga ko nta bikoresho bya ZJ CONSTRUCTION COMPANY Ltd byasigaye kuri site, ko ahubwo isaba ko ZJ CONSTRUTION COMPANY Ltd yayiriha ibikoresho byayo (bya WAP Ltd) byaburiye kuri site. Ku birebana n’indishyi za ZJ CONSTRUTION COMPANY Ltd zitabazwe neza, WAP Ltd yireguye ivuga ko nta n’izo ikwiye kubera ko itarangije amasezerano, isaba ahubwo ko izo yaciwe zavanwaho. [12] Ku byerekeye ubujurire bwatanzwe na Rukundo Iddy Radjabu, Ntibitura Yusufu, Nsengiyumva Amon na MUSAMA Ltd bavuga ko batagenewe indishyi n’inyungu, ZJ CONSTRUCTION COMPANY Ltd yireguye ivuga ko yemera ko ibereyemo umwenda abayihaye ibikoresho, ko ariko yagombaga kubishyura ari uko na yo yishyuwe. [13] Mu rubanza N˚ RCOMA 00209/2021/HCC CMB RCOMA 00211/2021/HCC CMB RCOMA 00212/2021/HCC rwaciwe n’Urukiko Rukuru rw’Ubucuruzi ku wa 09/06/2022, urwo Rukiko rushingiye ku ngingo zinyuranye z’itegeko n˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, no ku ngingo zinyuranye z’itegeko N˚ 45/2011 ryo ku wa 25/11/2011 rigenga amasezerano, rwemeje ko: - Ubujurire bwa ZJ CONSTRUCTION COMPANY Ltd n’ubwa WORKERS AFFORDABLE PROPERTIES Ltd, nta shingiro bufite; - Ubujurire bwa MUSAMA Ltd, Rukundo Iddy Radjabu, Ntibitura Yusufu, na Nsengiyumva Amon bufite ishingiro kuri bimwe; - ZJ CONSTRUCTION COMPANY Ltd igomba guha MUSAMA Ltd, Rukundo Iddy Radjabu, Ntibitura Yusufu, na Nsengiyumva Amon inyungu z’umwenda wemejwe

## Page 6

ku rwego rubanza kandi ko zingana n’amafaranga miliyoni icyenda, ibihumbi magana atatu na mirongo itandatu n’umunani na magana inani (9.368.800 Frw) kuri MUSAMA Ltd,amafaranga miliyoni ebyiri, ibihumbi magana atandatu na makumyabiri na magana arindwi na rimwe (2.620.701 Frw) kuri Rukundo Iddy Radjabu, amafaranga miliyoni imwe, ibihumbi magana acyenda na cumi n’ijana na mirongo itatu n’atandatu (1.910.136 Frw) kuri Ntibitura Yusufu n’amafaranga miliyoni imwe, ibihumbi magana acyenda na mirongo irindwi na magana atandatu na makumyabiri na rimwe (1.970.621 Frw) kuri Nsengiyumva Amon; - ZJ CONSTRUCTION COMPANY Ltd igomba guha MEGANEWTON Ltd indishyi z’ibyo yatakaje mu rubanza ku rwego rw’ubujurire zingana n’amafaranga ibihumbi magana atanu (500.000 Frw); - Hagumyeho imikirize y’urubanza N˚ RCOM 00893/2020/TC rwaciwe n’Urukiko rw’Ubucuruzi ku wa 16/02/2021 uretse inyungu n’indishyi bimaze kuvugwa haruguru byiyongereyeho; - Amafaranga ibihumbi mirongo ine (40.000 Frw) ZJ CONSTRUCTION COMPANY Ltd na WORKERS AFFORDABLE PROPERTIES Ltd buri wese yatanzeho ingwate y’amagarama ajurira, ahwanye n’ibyakozwe mu rubanza; - ZJ CONSTRUCTION COMPANY Ltd isubiza MUSAMA Ltd, Rukundo Iddy Radjabu, Ntibitura Yusufu na Nsengiyumva Amon, amafaranga ibihumbi mirongo ine (40.000 Frw) batanzeho ingwate y’amagarama bajurira.

[14] ZJ CONSTRUCTION COMPANY Ltd yajuririye urwo rubanza muri uru Rukiko, ubujurire bwayo bwandikwa kuri n˚ RCOMAA 00083/2022/CA, ivuga ko Urukiko Rukuru rw’Ubucuruzi rwirengagije amategeko n’ibimenyetso yarushyikirije.Urubanza rwaburanishijwe mu ruhame ku wa 06/09/2023, ZJ CONSTRUCTION COMPANY Ltd ihagarariwe na Me Bayingana Janvier, WAP Ltd ihagarariwe na Me Cyiza Clément, MEGANEWTON Ltd ihagarariwe na Me Ndahimana Jean Bosco, Nsengiyumva Claude, Muhire Viateur, Nsengiyumva Amon, Ntibitura Yusufu, Rukundo Iddy Radjabu na MUSAMA Ltd bahagarariwe na Me Niyomugabo Christophe. [15] Mbere yo kwinjira mu mizi y’urubanza, uhagarariye WAP Ltd yasabye ko iburanisha ry’uru rubanza ryaba rihagaze kubera ko sosiyete ahagarariye yatangije inzira yo gusaba itangizwa ry’ikurikirana ry’igihombo, ikaba ifite urubanza N˚ RCOMA 00092/2023/HCC mu Rukiko Rukuru rw’Ubucuruzi rutaracibwa. [16] Uhagarariye ZJ CONSTRUCTION COMPANY Ltd n’uhagarariye MEGANEWTON Ltd bavuga ko gutangiza inzira y’ikurikiranwa ry’igihombo bidahagarika iburanisha ry’izindi manza sosiyete ifite, naho uhagarariye Nsengiyumva Claude, Muhire Viateur, Nsengiyumva Amon, Ntibitura Yusufu, Rukundo Iddy Radjabu na MUSAMA Ltd avuga ko asanga iburanisha ryahagarara. [17] Urukiko rw’Ubujurire rwasuzumye ikibazo cyo kumenya niba iburanisha ry’uru rubanza ryahagarikwa kugeza ubwo ikirego gisaba itangizwa ry’ikurikirana ry’igihombo cyatanzwe na WAP Ltd kizacibwaho urubanza burundu, ababuranyi bamenyeshwa ko icyemezo kuri icyo kibazo

## Page 7

kizasomwa ku wa 19/09/2023.Uwo munsi Urukiko rwasomye icyemezo mu rubanza rubanziriza urundi mu rubanza n˚ RCOMAA 00083/2022/CA, mu buryo bukurikira: - Rwemeje ko inzitizi yatanzwe na WORKERS AFFORDABLE PRPPERTIES (WAP) Ltd, ifite ishingiro; - Rwemeje ko iburanisha ry’urubanza N˚ RCOMAA 00083/2022/CA risubitswe, kugeza igihe urubanza N˚RCOMA 00092/2023/HCC ku itangizwa ry’ikurikirana ry’igihombo cya WAP Ltd ruciriwe cyangwa igihe ZJ CONSTRUCTION COMPANY Ltd ikuriweho isubika ryo gukurikirana umwenda iberewemo n’iyo sosiyete; - Rwemeje ko igihe iburanisha ry’uru rubanza rizasubukurirwa, kizamenyeshwa ababuranyi hifashishijwe IECMS; - Amagarama y’urubanza aba asubitswe.

[18] Mu rubanza N˚ RCOMA 00092/2023/HCC CMB RCOMA 00146/2023/HCC CMB RCOMA 00149/2023/HCC CMB RCOMA 00150/2023/HCC CMB RCOMA 00151/2023/HCC CMB RCOMA 00156/2023/HCC CMB RCOMA 00157/2023/HCC CMB RCOMA 00158/2023/HCC CMB RCOMA 00159/2023/HCC rwaciwe n’Urukiko Rukuru rw’Ubucuruzi ku wa 09/02/2024, urwo Rukiko rushingiye ku ngingo ya 7, iya 8, iya 10 n’iya 12 z’itegeko n˚ 075/2021 ryo ku wa 06/12/2021 ryerekeye igihombo, ku ngingo ya 111 y’itegeko n˚22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, no ku ngingo ya 26 y’Amabwiriza n˚01/2014 yerekeye ibihembo mbonera by’Abavoka, rwemeje ko: - ubujurire bwatanzwe na WORKERS AFFORDABLE PROPERTIES Ltd, bufite ishingiro kuri bimwe; - ubujurire bwatanzwe na RUZINDANA Egide, bufite ishingiro; - ubujurire bwatanzwe na UWAMAHORO Adeline, bufite ishingiro kuri bimwe;

- ubujurire bwatanzwe na Ngarambe Théodomir, bufite ishingiro kuri bimwe; - ubujurire bwatanzwe na Nkusi Alfred, bufite ishingiro kuri bimwe; - ubujurire bwatanzwe na NIYONSABA Marie Josée, bufite ishingiro kuri bimwe; - ubujurire bwatanzwe na KABAGIRE Divin, bufite ishingiro kuri bimwe; - ubujurire bwatanzwe na MUGEMANSHURO Alfred, bufite ishingiro kuri bimwe; - ubujurire bwatanzwe na Ngarambe Christian, bufite ishingiro kuri bimwe; - imikirize y’urubanza n˚ RCOM 01680/2022/HCC rwaciwe n’Urukiko rw’Ubucuruzi ku wa 03/01/2023, ihindutse kuri bimwe; - nta mpamvu iteganywa n’amategeko ihari, yo gutangiza gahunda y’izahura no gushyiraho umucungamutungo w’agateganyo wa WORKERS AFFORDABLE PROPERTIES Ltd;

## Page 8

- WORKERS AFFORDABLE PROPERTIES Ltd itagaragaje umutungo w’ibanze washingirwaho mu kuzahura ubucuruzi bwayo, ko nta bushobozi yagaragaje bwo kwishyura amafaranga yakoreshwa muri gahunda y’izahura; - WORKERS AFFORDABLE PROPERTIES Ltd iha RUZINDANA Egide muri ubwo bujurire, 60,000 Frw y’ingwate y’amagarama yatanze ku rwego rwa mbere (20,000 Frw) no ku rwego rw’ubujurire (40,000 Frw).

[19] Nyuma y’icibwa ry’urwo rubanza, urubanza N˚ RCOMAA 00083/2022/CA rwahawe itariki y’isubukurwa ry’iburanisha yo ku wa 10/02/2025, uwo munsi ZJ CONSTRUCTION COMPANY Ltd ntiyitaba Urukiko, Me Bayingana Janvier wari uyihagarariye mu maburanisha yabanje akaba yarandikiye Urukiko arumenyesha ko ubutumwa yari afite bwo kuyihagararira bwarangiye kandi ko yabuze uwari umuyobozi wayo witwa Muganza Eugēne. WORKERS AFFORDABLE PROPERTIES Ltd yari ihagarariwe na Me Cyiza Clément, Nsengiyumva Claude, Muhire Viateur, Nsengiyumva Amon, Ntibitura Yusufu, Rukundo Iddy Radjabu na MUSAMA Ltd bahagarariwe na Me Niyomugabo Christophe. [20] Iburanisha ry’urubanza ryimuriwe ku wa 16/04/2025 kugira ngo ZJ CONSTRUCTION COMPANY Ltd ihamagarwe ahatazwi, uwo munsi iburanisha rirasubikwa kubera ko umwe mu bacamanza bagize inteko iburanisha yari yagize ibyago, ryimurirwa ku wa 07/05/2025. Uwo munsi ZJ CONTRUCTION COMPANY Ltd na none ntiyitabye Urukiko kandi yarahamagawe ahatazwi, abandi baburanyi bitabye kandi bahagarariwe nka mbere, babajijwe icyo bavuga ku kuba urega atitabye Urukiko, basaba ko urubanza rusibwa. Basoza basaba guhabwa amafaranga basabye y’ibyagiye ku rubanza. [21] Nyuma y’izi mpaka, harasuzumwa ibibazo bikurikira:

a. Kumenya niba urubanza N˚ RCOMAA 00083/2022/CA rwasibwa mu bitabo by’Urukiko; b. Ibyerekeye inishyi, amafaranga y’ikurikiranarubanza n’igihembo cya Avoka ababuranyi basaba

II. ISESENGURA RY’IBIBAZO BIGIZE URUBANZA

1. Kumenya niba urubanza N˚ RCOMAA 00083/2022/CA rwasibwa mu bitabo by’Urukiko

[22] Nk’uko dosiye y’urubanza ibigaragaza, ZJ CONSTRUCTION COMPANY Ltd yahamagawe ahatazwi isabwa kwitaba Urukiko ku wa 16/04/2025 bitewe n’uko Me Bayingana Janvier wahoze ayihagarariye mu maburanisha yabanje yamenyesheje Urukiko ko atakiyihagarariye kubera ko igihe cy’ubutumwa yari yarahawe cyarangiye, anavuga ko umuyobozi wayo witwa Muganza Eugēne atakiboneka.

## Page 9

[23] Ababuranyi bitabye Urukiko basabye ko ubujurire bwatanzwe na ZJ CONSTRUCTION COMPANY Ltd busibwa mu bitabo by’ibirego by’uru Rukiko, kuko yahamagawe mu buryo bukurikije amategeko ntiyitabe nta mpamvu.

Uko Urukiko rubibona

[24] Ingingo ya 54, igika cya mbere y’itegeko N˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibikurikira: “Iyo urega atitabye urukiko nta mpamvu, uregwa ashobora gusaba ko urubanza rusibwa cyangwa agasaba ko ruburanishwa mu mizi yarwo, urubanza ruciwe rukazafatwa nk’aho rwaburanishijwe ababuranyi bahari, keretse iyo urukiko, ku nyungu z’ubutabera kandi mu buryo buteganywa n’iri tegeko, rusanze ari ngombwa ko urubanza rwimurirwa ku yindi tariki kugira ngo urega yongere ahamagazwe.” [25] Urukiko rw’Ubujurire rurasanga kuba ZJ CONSTRUCTION COMPANY Ltd ititabiriye iburanisha nta mpamvu, byumvikana ko nta nyungu ifite yo gukurikirana urubanza rwayo, bityo, urubanza yafunguje muri uru Rukiko rukaba rugomba gusibwa mu bitabo by’ibirego byarwo nk’uko biteganywa n’itegeko ndetse akaba ari nacyo cyifuzo cy’abaregwa.

1. 2. Ibyerekeye indishyi, amafaranga y’ikurikiranarubanza n’igihembo cya Avoka ababuranyi basaba

[26] Uhagarariye Nsengiyumva Claude, Muhire Viateur, Nsengiyumva Amon, Ntibitura Yusufu, Rukundo Iddy Radjabu na MUSAMA Ltd asaba Urukiko rw’Ubujurire gutegeka ZJ CONSTRUCTION COMPANY Ltd guha buri wese mu bo ahagarariye indishyi z’akababaro zingana n’amafaranga miliyoni eshanu (5,000,000 Frw) kubera gushorwa mu manza, kwishyura buri wese amafaranga miliyoni ebyiri (2,000,000 Frw) y’igihembo cya Avoka kuri uru rwego, n’amafaranga ibihumbi magana atanu (500,000 Frw) kuri buri wese y’ikurikiranarubanza. [27] Uhagarariye MEGANEWTON Ltd asaba uru Rukiko gutegeka ZJ CONSTRUCTION COMPANY Ltd guha uwo ahagarariye indishyi zo gushorwa mu manza zingana n’amafaranga miliyoni imwe n’ibihumbi magana atanu (1,500,000 Frw). [28] Mu myanzuro yayo, ZJ CONSTRUCTION COMPANY Ltd ivuga ko isanga indishyi Nsengiyumva Claude na bagenzi be basaba nta ho zishingiye, ko ariko Urukiko rusanze bazikwiye, rwazibagenera. Na ho ku zisabwa na MEGANEWTON Ltd ivuga ko uretse kuba ari umurengera nta n’ishingiro ryazo, ko ariko Urukiko rusanze ikwiye kuzigenerwa, WAP Ltd ari yo yategekwa kuzitanga. [29] Mu myanzuro, ZJ CONSTRUCTION COMPANY Ltd isaba Urukiko rw’Ubujurire gutegeka WAP Ltd kuyishyura amafaranga miliyoni icumi (10,000,000 Frw) y’igihembo cya

## Page 10

Avoka yishyuye ku nzego zose n’amafaranga miliyoni eshatu (3,000,000 Frw) y’ikurikiranarubanza. Ku ndishyi isabwa na WAP Ltd, ivuga ko nta shingiro zifite.

[30] WAP Ltd ivuga ko indishyi zisabwa na ZJ CONSTRUCTION COMPANY Ltd nta shingiro zifite, ko ahubwo ari yo ikwiye kuyiha izingana na miliyoni ebyiri (2,000,000 Frw).

Uko Urukiko rubibona [31] Ingingo ya 111 y’itegeko nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko “Ikirego cy’amafaranga y’ikurikiranarubanza ni ikirego gishamikiye ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishwa rimwe n’ikirego cy’iremezo. Gishobora kandi kwakirwa kikaburanishwa n’iyo ikirego cy’iremezo cyaba kitakiriwe”. [32] Urukiko rw’Ubujurire rurasanga ababuranyi basaba indishyi zo gushorwa mu manza badakwiye kuzihabwa kubera ko batagaragaza ishingiro ryazo. Rurasanga kandi amafaranga y’ikurikiranarubanza n’igihembo cya Avoka ZJ CONSTRUCTION COMPANY Ltd isaba itagomba kuyahabwa kubera ko urubanza yaregeye rwasibwe kubera amakosa yayo, naho abandi baburanyi basaba amafaranga y’ikurikiranarubanza n’igihembo cya Avoka bakaba bagomba kuyahabwa ariko agenwe mu bushishozi bwarwo kuko ayo basaba ari menshi. [33] Uru Rukiko rurasanga mu bushishozi bwarwo, ZJ CONSTRUCTION COMPANY Ltd igomba guha Nsengiyumva Claude, Muhire Viateur, Nsengiyumva Amon, Ntibitura Yusufu, Rukundo Iddy Radjabu na MUSAMA Ltd, buri wese amafaranga ibihumbi magana abiri (200,000 Fr y’ikurikiranarubanza n’amafaranga ibihumbi magana atatu (300,000 Frw) y’igihembo cya Avoka kuri uru rwego, naho WORKERS AFFORDABLE PROPERTIES Ltd igahabwa amafaranga ibihumbi magana abiri (200,000 Frw) y’ikurikiranarubanza n’amafaranga ibihumbi magana atatu (300,000 Frw) y’igihembo cya Avoka kuri uru rwego.

III. ICYEMEZO CY’URUKIKO

[34] Rwemeje ko urubanza N˚ RCOMAA 00083/2022/CA rusibwe mu bitabo by’Urukiko rw’Ubujurire. [35] Rutegetse ZJ CONSTRUCTION COMPANY Ltd guha Nsengiyumva Claude, Muhire Viateur, Nsengiyumva Amon, Ntibitura Yusufu, Rukundo Iddy Radjabu na MUSAMA Ltd, buri wese amafaranga ibihumbi magana abiri (200,000 Frw) y’ikurikiranarubanza n’amafaranga ibihumbi Magana atanu (500,000 Frw) y’igihembo cya Avoka kuri uru rwego.

## Page 11

[36] Rutegetse ZJ CONSTRUCTION COMPANY Ltd guha MEGANEWTON Ltd amafaranga ibihumbi magana abiri (200,000 Frw) y’ikurikiranarubanza n’amafaranga ibihumbi magana atanu (500,000 Frw) y’igihembo cya Avoka kuri uru rwego. [37] Ruvuze ko amafaranga y’ingwate y’amagarama ZJ CONSTRUCTION COMPANY Ltd yatanze ijurira, ahwanye n’ibyakozwe mu rubanza.