UBUSHINJACYAHA v. SIBOBUGINGO

UBUSHINJACYAHA v. SIBOBUGINGO

- Source: Amategeko - Section: Decisions (Judgements) - Date: 2025-01-27 - Case/document no.: RPAA 00405/2024/CA - Collection: Court of Appeal

Text

Page 1

UBUSHINJACYAHA v. SIBOBUGINGO [Rwanda URUKIKO RW’UBUJURIRE – RPAA 00405/2024/CA (Tugireyezu, P.J.,) 27 Mutarama 2025] Amategeko agenga ibyaha n’ibihano – Icyaha cyo gukubita no gukomeretsa byateye urupfu – Mu rwego rw’ibirego nshinjabyaha iyo abaregwa nta kindi banenga rubanza rwajuririwe, uretse kuvuga gusa ko batagabanyirijwe bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo. Amategeko agenga ibyaha n’ibihano – Kwemera icyaha – Kuba uregwa yemera icyaha, akagisabira imbabazi, akaba aribwo bwa mbere akoze icyaha, ni impamvu nyoroshyacyaha ituma yagabanyirizwa igihano, ariko kuba bigaragara ko yakoranye icyaha yahamijwe n’ubugome ndengakamere, uko kwemera icyaha ntacyo kuba kukimariye uregwa ku birebana no kugabanyirizwa igihano. Incamake y’ikibazo: Nyuma y’iperereza, Ubushinjacyaha bwatanze ikirego mu Rukiko Rwisumbuye rwa Rubavu, bukurikiranyeho Sibobugingo Cyprien icyaha cyo kwica Bagiramenshi Damascène, abigambiriye, busaba ko icyaha cyamuhama akagihanirwa. Sibobugingo Cyprien yaburanye yemera ko yakubise igiti Bagiramenshi Damascène, ko ariko atari agambiriye kumwica kuko yabitewe n’ubusinzi no kuba yaritabagara kuko nawe yabanje kumukubita icyo giti, asaba imbabazi no kugabanyirizwa ibihano. Urukiko Rwisumbuye rwa Rubavu rushingiye ku bimenyetso, rwemeje ko Sibobugingo

Cyprien ahamwa n’icyaha cyo kwica Bagiramenshi Damascène, ariko kuko yaburanye yemera icyaha kandi akaba ari bwo bwa mbere akoze icyaha bizwi rwamugabanyirije igihano cy’igifungo cy’imyaka makumyabiri n’itanu (25). Sibobugingo Cyprien ntiyishimiye imikirize y’urubanza, ajuririra mu Rukiko Rukuru, Urugereko rwa Musanze, avuga ko asaba kugirwa umwere kuko icyaha yagikoze yitabara. Mu mwanzuro w’inyongera, asaba ko inyito y’icyaha yahinduka kikitwa gukubita no gukomeretsa aho kuba ubwicanyi. Nyuma y’isesengura ry’ibimenyetso, Urukiko Rukuru, Urugereko rwa Musanze rwemeza ko inyito y’icyaha ihindutse mu bujurire aho kuba icyaha cy’ubwicanyi bibaye gukubita no gukomeretsa byateye urupfu, maze ruhanisha Sibobugingo Cyprien igihano cy’igifungo cy’imyaka cumi n’itanu (15 ) ibarwa uhereye igihe yafungiweho by’agateganyo ku wa 27/11/2021 n’ihazabu y’amafaranga miliyoni eshatu (3.000.000 Frw). Sibobugingo Cyprien ntiyishimiye iyo mikirize y’urubanza, ajuririra mu Rukiko rw’Ubujurire avuga ko asaba kongera kugabanyirizwa ibihano kubera ko icyo yahawe cy’imyaka 15 ari kirekire ukurikije ibyaranze imyiregurire ye, avuga kandi ko kuva agifatwa yemeye icyaha yaba mu Bugenzacyaha, mu Bushinjacyaha no mu Rukiko avuga ko ibikorwa yakoze abisabira imbabazi.

Page 2

Ubushinjacyaha buvuga ko hagenderwa ku ngingo ya 11 y’itegeko rya 2023 kuko ariryo riteganya igihano gito, ugereranyije n’iryari ririho igihe yakoraga icyaha, Sibobugingo Cyprien yakongera akagabanyirizwa igihano agahanishwa igifungo cy’imyaka 10 kuko ikwiranye n’uburemere bw’icyaha yakoze cyo kuvutsa ubuzima umuntu. Urukiko rw’Ubujurire rurasanga igihano cy’igifungo cy’imyaka cumi n’itanu (15 ans) n’ihazabu ya 3.000.000 Frw Sibobugingo Cyprien yahanishijwe n’Urukiko Rukuru, Urugereko rwa Musanze kigomba kugumaho. Incamake y’icyemezo: 1.Mu rwego rw’ibirego nshinjabyaha iyo abaregwa nta kindi banenga rubanza rwajuririwe, uretse kuvuga gusa ko batagabanyirijwe bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo.

2. Kuba uregwa yemera icyaha akagisabira imbabazi akaba aribwo bwa mbere akoze icyaha ni impamvu nyoroshyacyaha ituma uregwa yagabanyirizwa igihano, ariko kuba bigaragara ko yakoranye icyaha yahamijwe n’ubugome ndengakamere, uko kwemera icyaha ntacyo kuba kukimariye uregwa ku birebana no kugabanyirizwa igihano. Ubujurire nta shingiro bufite.

Amategeko yashingiweho: Itegeko Nº 059/2023 ryo ku wa 04/12/2023 rihindura itegeko Nº 68/2018ryo ku wa 30/08/2018 riteganya ibyaha n’ibihano muri rusange, ingingo ya 11;

Itegeko N˚ 68/2018 ryo ku wa 30/8/2018 riteganya ibyaha n’ibihano muri rusange, ingingo ya 49. Imanza zifashishijwe: Urubanza RPA 00060/2021/CA rw’ Ubushinjacyaha na Nsabimana Callixte alias Sankara na bagenzi be, rwaciwe n’Urukiko rw’Ubujurire ku wa 04/04/2022; Urubanza RPAA0126/11/CS rw’Ubushinjacyaha na Niyonsaba Boniface, rwaciwe n’Urukiko rw’Ikirenga ku wa 08/05/2015. Urubanza I. IMITERERE Y’URUBANZA [1] Mu ijoro ryo ku wa 25/11/2021 Sibobugingo Cyprien yashyamiranye na Bagiramenshi Damascène barimo basangira inzoga, Nyiri akabare asohora Bagiramenshi Damascène ajya hanze, Sibobugingo Cyprien atashye amusanga hanze barongera baratongana, afata igiti arakimukubita agwa mu muferege, amusangamo akomeza kumukubita, atabaje haza abamutabara, bamujyana kwa muganga, apfira mu nzira, Sibobugingo Cyprien yahise ashyikirizwa inzego z’iperereza atangira gukurikiranwa.

Page 3

[2] Iperereza rirangiye, Ubushinjacyaha bwatanze ikirego mu Rukiko Rwisumbuye rwa Rubavu, bukurikiranyeho Sibobugingo Cyprien icyaha cyo kwica abigambiriye, busaba ko cyamuhama akagihanirwa. [3] Sibobugingo Cyprien yaburanye yemera ko yakubise igiti Bagiramenshi Damascène, ko ariko atari agambiriye kumwica kuko yabitewe n’ubusinzi no kuba yaritabagara kuko nawe yabanje kumukubita icyo giti, asaba imbabazi no kugabanyirizwa ibihano. [4] Mu rubanza RP 00812/2021/TGI/RBV rwaciwe ku wa 30/12/2021, Urukiko Rwisumbuye rwa Rubavu rwasanze hari ibimenyetso byemeza ko uregwa yakoze icyaha, birimo: Kuba Kuba Sibobugingo Cyprien yiyemerera ko yishe Bagiramenshi Damascène amukubise inkoni mu mutwe no ku bindi bice by’umubiri; Kuba yaramukubise ikintu gishobora kwica vuba (inkoni) kandi ayimukubita ahantu hica vuba (mu mutwe); Imvugo z’abatangabuhamya barimo Nzapfakumunsi Laurent na Hakorimana Gahinja Peter bari kumwe mu kabare basobanuye ko igihe batonganaga, Sibobugingo Cyprien yamubwiye ko amukozeho yamwica, ko n’igihe yari amaze gusohoka amusanze hanze akamukubita igiti agwa mu muferege, yamusanzemo akomeza kukimujomba mu mutwe agamije kumwica; Icyemezo cya muganga wasuzumye umurambo wa Bagiramenshi Damascène nacyo cyerekana ko ibikomere yagize mu mutwe aribyo byabaye impamvu y’urupfu rwe. Urukiko rushingiye kuri ibyo bimenyetso, rwemeje ko Sibobugingo Cyprien ahamwa n’icyaha

cyo kwica Bagiramenshi Damascène, ariko kuko yaburanye yemera icyaha kandi akaba ari bwo bwa mbere akoze icyaha bizwi rwamugabanyirije igihano cy’igifungo cy’imyaka makumyabiri n’itanu (25). [5] Sibobugingo Cyprien ntiyishimiye imikirize y’urubanza, ajuririra mu Rukiko Rukuru, Urugereko rwa Musanze, avuga ko asaba kugirwa umwere kuko icyaha yagikoze yitabara. Mu mwanzuro wa nyuma kuko yatanze imyanzuro myinshi, asaba ko inyito y’icyaha yahinduka kikitwa gukubita no gukomeretsa aho kuba ubwicanyi. [6] Uhagarariye Ubushinjacyaha yaburanye avuga ko ibisobanurwa na Sibobugingo Cyprien bitahabwa ishingiro kuko ibyo asaba ko bitakwitabwaho, ko ahubwo harebwa ibikorwa yakoze bigahuzwa n’inyito y’icyaha aribyo bikwiye kwitabwaho mbere yo kureba ibindi asobanura kuko yamukubise ikintu gishobora kwica vuba (inkoni) kandi akimukubita ahantu hica vuba (mu mutwe) nk’uko muganga wasuzumye umurambo we yabyemeje. [7] Mu rubanza RPA 00074/2022/HC/MUS rwaciwe ku wa 21/05/2024, Urukiko Rukuru, Urugereko rwa Musanze rwasanze Sibobugingo Cyprien yarashyamiranye na Bagiramenshi Damascène bari mu kabari, ibi byumvikanisha ko Sibobugingo Cyprien ava iwe nta mugambi wo kwica Bagiramenshi Damascène yari afite, kuba bari mu kabari harabayeho gutongana bikagera n’ubwo nyiri ako kabari asohora Bagiramenshi Damascène hanze, Sibobugingo Cyprien amusanze hanze bakongera bagatongana, agafata igiti akakimukubita umubiri wose, ataribyo byakwitwa ubwicanyi, maze rwemeza ko inyito y’icyaha ihindutse mu bujurire aho kuba icyaha cy’ubwicanyi bibaye gukubita no gukomeretsa byateye urupfu, ruhanisha Sibobugingo Cyprien igihano

Page 4

cy’igifungo cy’imyaka cumi n’itanu (15 years) ibarwa uhereye igihe yafungiweho by’agateganyo ku wa 27/11/2021 n’ihazabu y’amafaranga miliyoni eshatu (3.000.000 Frw). [8] Sibobugingo Cyprien ntiyishimiye iyo mikirize y’urubanza, ajuririra mu Rukiko rw’Ubujurire. Urubanza ruhabwa RPAA 00405/2024/CA, iburanisha rishyirwa ku wa 07/01/2025, Sibobugingo Cyprien yunganiwe na Me Rusagara Innocent naho Ubushinjacyaha buhagarariwe na Uwizeye Jean Marie, Umushinjacyaha ku rwego rw’Igihugu. [9] Mu mwanzuro w’ubujurire no mu miburanire yabo, Sibobugingo Cyprien n’umwunganira bavuga ko asaba kongera kugabanyirizwa ibihano kubera ko icyo yahawe cy’imyaka 15 ari kirekire ukurikije ibyaranze imyiregurire ye. Basobanura ko kuva Sibobungingo agifatwa yemeye icyaha yaba mu Bugenzacyaha, mu Bushinjacyaha no mu Rukiko avuga ko ibikorwa yakoze abisabira imbabazi. [10] Uhagarariye Ubushinjacyaha avuga ko hagenderwa ku ngingo ya 11 y’itegeko rya 2023 kuko ariryo riteganya igihano gito, ugereranyije n’iryari ririho igihe yakoraga icyaha, Sibobugingo Cyprien yakongera akagabanyirizwa igihano agahanishwa igifungo cy’imyaka 10 kuko ikwiranye n’uburemere bw’icyaha yakoze cyo kuvutsa ubuzima umuntu. [11] Urukiko ruhereye kuri izo mpaka, rurasanga ikibazo gikwiye gusuzumwa muri uru rubanza ari: Kumenya niba Sibobugingo Cyprien yakongera kugabanyirizwa igihano. II. ISESENGURA RY’IKIBAZO KIGIZE URUBANZA Kumenya

niba Sibobugingo Cyprien yakongera kugabanyirizwa igihano. [12] Sibobugingo Cyprien n’umwunganira bavuga ko asaba kongera kugabanyirizwa ibihano kubera ko icyo yahawe cy’imyaka 15 ari kirekire ukurikije ibyaranze imyiregurire ye. Basobanura ko kuva Sibobungingo Cyprien agifatwa yemeye icyaha yaba mu Bugenzacyaha, mu Bushinjacyaha no mu Rukiko avuga ko ibikorwa yakoze abisabira imbabazi. [13] Uhagarariye Ubushinjacyaha avuga ko hagenderwa ku ngingo ya 11 y’itegeko rya 2023 kuko ariryo riteganya igihano gito, ugereranyije n’iryari ririho igihe yakoraga icyaha, Sibobugingo Cyprien yakongera akagabanyirizwa igihano agahanishwa igifungo cy’imyaka 10 kuko ikwiranye n’uburemere bw’icyaha yakoze cyo kuvutsa umuntu ubuzima.

UKO URUKIKO RUBIBONA [14] Hakurikijwe ibivugwa n’ababuranyi, Urukiko rurasanga impaka muri uru rubanza zishingiye ku kumenya niba Sibobugingo Cyprien yakongera kugabanyirizwa igihano. [15] Ikibazo cyo kongera kugabanyirizwa igihano mu gihe ariyo mpamvu y’ubujurire cyatanzweho umurongo mu rubanza RPA 00060/2021/CA rwaciwe n’Urukiko rw’Ubujurire ku wa 04/04/2022 haburana Ubushinjacyaha, Nsabimana Callixte alias Sankara na bagenzi be. Muri urwo rubanza Urukiko rw’Ubujurire rwagaragaje ko mu rwego rw’ibirego nshinjabyaha iyo abaregwa nta kindi banenga rubanza rwajuririwe, uretse kuvuga gusa ko batagabanyirijwe

Page 5

bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo hakurikijwe ibiteganywa n’ingingo ya 491 y’Itegeko N˚ 68/2018 ryo ku wa 30/8/2018 riteganya ibyaha n’ibihano muri rusange, ariko ko mu bujurire, Umucamanza agomba kuzirikana ko yemerewe gusa guhindura igihano cyatanzwe n’Umucamanza wo mu Rukiko rubanza, ari uko amaze kugaragaza ko Urukiko rubanza rwaba rwarakoresheje nabi itegeko cyangwa ubushishozi bwarwo mu gutanga icyo gihano22. [16] Mu gutanga igihano, Umucamanza areba imibereho y’uwakoze icyaha mbere yo kugikora, igihe yagikoraga na nyuma yo kugikora, akabihuza n’uko icyaha cyakozwe, uburemere bwacyo n’ingaruka cyateye muri sosiyete, bivuze ko atanga igihano akigereranyije n’icyaha cyakozwe (principe de la proportionnalité de la peine à l’infraction), ibyo akabikora agamije kurengera sosiyete, guhana koko uwakatiwe, kurengera inyungu z’uwahohotewe, anabihuza n’inyungu yo gusubiza mu buzima busanzwe uwakatiwe no gukumira ibyaha bishya33. [17] Dosiye igaragaza ko mu guhana Sibobugingo Cyprien, Urukiko Rukuru rwashingiye ku ngingo ya 11, agace ka (6) riteganya ko iyo gukubita cyangwa gukomeretsa byateye urupfu, igihano kiba igifungo kitari munsi y’imyaka 10 ariko kitarenze imyaka 20 n’ihazabu itari munsi ya 3.000.000 Frw ariko itarenze 5.000.000 Frw.” [18] Dosiye y’urubanza

igaragaza ko Sibobugingo Cyprien yashyamiranye na Bagiramenshi Damascène barimo basangira inzoga, nyiri akabare asohora Bagiramenshi Damascène ajya hanze, Sibobugingo Cyprien atashye amusanga hanze barongera baratongana, afata igiti arakimukubita agwa mu muferege, amusangamo akomeza kumukubita ndetse hakaba hari icyemezo cya muganga wasuzumye umurambo wa Bagiramenshi Damascène nacyo cyerekana ko ibikomere yagize mu mutwe aribyo byabaye impamvu y’urupfu rwe. [19] Dosiye igaragaza kandi ko ari ubwa mbere Sibobugingo Cyprien akurikiranyweho icyaha kandi kuva yafatwa yemeje icyaha anagisabira imbabazi. Ibyo akaba aribyo byatumye Urukiko Rukuru rumugabanyiriza igihano bituma rumuhanisha igifungo cy’imyaka cumi n’itanu (15 years) ibarwa uhereye igihe yafungiweho by’agateganyo ku wa 27/11/2021 n’ihazabu y’amafaranga miliyoni eshatu (3.000.000 Frw). [20] Urukiko rw’Ubujurire rusanga ariko nk’uko byasobanuwe haruguru mu gutanga igihano hatagenderwa gusa ku mpamvu nyoroshyacyaha zatanzwe ahubwo mu gutanga igihano hakurikizwa uburemere bw’icyaha (1), ingaruka icyaha cyateye (2), impamvu zatumye uregwa agikora (3), uko uwagikoze yari asanzwe yitwara (4) imibereho ye bwite (5) n’uburyo icyaha cyakozwemo (6), ndetse ibyo bikaba bigomba guhuzwa no kurengera sosiyete, guhana koko uwakatiwe, kurengera inyungu z’uwahohotewe, anabihuza n’inyungu yo gusubiza mu buzima

1 iteganya ko “Umucamanza atanga igihano akurikije uburemere bw’icyaha, ingaruka icyaha cyateye, impamvu zatumye agikora, uko uwagikoze yari asanzwe yitwara, imibereho ye bwite n’uburyo icyaha cyakozwemo’’

2 Reba rubanza RPA 00060/2021/CA rwaciwe n’Urukiko rw’Ubujurire ku wa 04/04/2022 haburana Ubushinjacyaha, Nsabimana Callixte alias Sankara na bagenzi be, igika cya 252-254

3 ‘’ Le choix de la peine par le juge doit donc obéir à cinq considérations: la protection de la société, la punition du condamné, la prise en compte des intérêts de la victime, la réinsertion du condamné et la lutte contre la récidive.’’, Harald Renoult, Droit pénal général, 19e édition, Bruylant-Paradigme, Bruxelles, 2020, P. 291

Page 6

busanzwe uwakatiwe no gukumira ibyaha bishya, ku bw’ibyo harebwe uburyo Sibobugingo Cyprien yakozemo icyaha yahamijwe, aho yafashe igiti agikubita Bagiramenshi Damascène agwa mu muferege, Sibobugingo Cyprien amusangamo akomeza kumukubita mu mutwe azi neza ko ari mu cyico ndetse agakomeza kumukubita no kubindi bice by’umubiri ndetse nk’uko byahamijwe na muganga ibikomere by’izo nkoni yakubise Bagiramenshi Damascène mu mutwe akaba aribyo byamuviriyemo urupfu, bigaragaza ubugome ndengakamere bwakoranywe icyo cyaha. [21] Urukiko rw’Ubujurire rurasanga ubundi kuba uregwa yemera icyaha akagisabira imbabazi akaba aribwo bwa mbere akoze icyaha ari impamvu nyoroshyacyaha ituma uregwa yagabanyirizwa igihano nk’uko Sibobugingo Cyprien n’umwunganira babivuga, ariko nk’uko bimaze gusobanurwa haruguru icyaha Sibobugingo Cyprien yahamijwe yagikoranye ubugome ndengakamere kandi iyo bigaragaye ko mu ikorwa ry’icyo cyaha uregwa yagikoranye ubugome ndengakamere, ukwemera icyaha ntacyo kuba kukimariye uregwa ku birebana no kugabanyirizwa igihano. Uwo ni nawo murongo watanzwe n’Urukiko rw’Ikirenga mu rubanza RPAA0126/11/CS rwaciwe ku wa 08/05/2015 aho rwemeje ko imbabazi Niyonsaba Boniface asaba atagomba kuzihabwa kuko icyaha aregwa yagikoranye ubugome ndengakamere. [22] Urukiko rw’Ubujurire rurasanga harebwe ubugome bwakoranywe icyaha Sibobugingo Cyprien yahamijwe, yakabaye yarahanishijwe igihano

kinini giteganywa n’itegeko aricyo cy’imyaka 20 n’ihazabu itari munsi ya 3.000.000 Frw ariko itarenze 5.000.000 Frw4 ariko kuba yaremeye icyaha, akagisabira imbabazi ndetse akaba ari nabwo bwa mbere yari akoze icyaha byatumye Urukiko Rukuru rumugabanyiriza igihano avanwa kuri icyo gihano yagombaga guhabwa ahabwa igifungo cy’imyaka cumi n’itanu (15 ans) n’ihazabu ya 3.000.000 Frw. [23] Urukiko rw’Ubujurire rurasanga igifungo cy’imyaka cumi n’itanu (15 ans) n’ihazabu ya 3.000.000 Frw Sibobugingo Cyprien yahanishijwe n’Urukiko Rukuru, gihwanye n’icyaha cyo gukubita no gukomeretsa byateye urupfu yahamijwe mu kumukosora we ubwe no kubera isomo abandi bishora mu bikorwa byo guhohotera abandi ku rugero rwo kubavutsa ubuzima, kikaba kitakongerwa kugabanya kuko yagabanyirijwe bihagije ukurikije uburemere bw’icyaha yakoze n’uburyo yagikozemo, bityo urukiko rwajuririwe rukaba rusanga Urukiko Rukuru rutarakoresheje nabi itegeko cyangwa ubushishozi bwarwo mu gutanga icyo gihano kikaba rero kigomba kugumaho. [24] Ku birebana n’ibivugwa n’Ubushinjacyaha ko hagenderwa ku ngingo ya 11 y’itegeko rya 2023 Sibobugingo Cyprien yakongera akagabanyirizwa igihano agahanishwa igifungo cy’imyaka 10, Urukiko rurasanga nta shingiro byahabwa kuko nk’uko byasobanuwe haruguru rwasanze uregwa yaragabanyirijwe bihagije kandi ibyo byatanzweho umurongo n’Urukiko rw’Ikirenga mu rubanza RPAA 66/08/SC5 ndetse n’uru rukiko mu rubanza RPA 00060/2021/CA6 6, aho

4 Reba ingingo ya 11, agace ka (6) Itegeko nº 059/2023 ryo ku wa 04/12/2023 rihindura itegeko nº 68/2018ryo ku wa 30/08/2018 riteganya ibyaha n’ibihano muri rusange

5 mu rubanza RPAA 66/08/SC, rwaciwe n’Urukiko rw’Ikirenga ku wa 6/2/2009, haburana Ubushinjacyaha na Kabahizi Jean. Reba ku rupapuro rwa gatatu, igika cya 7, no mu rubanza RPAA 0085/09/CS rwaciwe n’Urukiko rw’Ikirenga ku wa 17/06/2011, haburana Ubushinjacyaha na Havugimana Innocent, urupapuro rwa kabiri, igika cya 6.

6 Reba urubanza RPA 00060/2021/CA rwaciwe n’Urukiko rw’Ubujurire haburana Ubushinjacyaha na Rusesabagina Paul na bagenzi be, urupapuro rwa 91, igika cya 264.

Page 7

hagaragajwe ko abaregwa badakwiye kongera kugabanyirizwa igihano hashingiwe ku kuba baragabanyirijwe igihano mu buryo buhagije ku rwego rwa mbere. [25] Hashingiwe ku byasobanuwe haruguru n’ibiteganywa ingingo ya 11, agace ka (6) Itegeko Nº 059/2023 ryo ku wa 04/12/2023 rihindura itegeko Nº 68/2018ryo ku wa 30/08/2018 riteganya ibyaha n’ibihano muri rusange, Urukiko rw’Ubujurire rurasanga igihano cy’igifungo cy’imyaka cumi n’itanu (15 ans) n’ihazabu ya 3.000.000 Frw Sibobugingo Cyprien yahanishijwe n’Urukiko Rukuru, Urugereko rwa Musanze kigomba kugumaho. III. ICYEMEZO CY’URUKIKO [26] Rwemeje ko ubujurire bwa SIBOBUGINGO Cyprien nta shingiro bufite; [27] Rwemeje ko imikirize y’urubanza RPA 00074/2022/HC/MUS rwaciwe n’Urukiko Rukuru, Urugereko rwa Musanze ku wa 21/05/2024 idahindutse mu ngingo zarwo zose; [28] Rwemeje ko igihano cy’igifungo cy’imyaka cumi n’itanu (15 ans) n’ihazabu ya 3.000.000 Frw Sibobugingo Cyprien yahanishijwe mbere kigumyeho; [29] Rutegetse ko Sibobugingo Cyprien asonewe amagarama y'urubanza kuko aburana afunze.