CANAL PLUS INTERNATIONAL v. VICTORY TV LTD

CANAL PLUS INTERNATIONAL v. VICTORY TV LTD

- Source: Amategeko - Section: Decisions (Judgements) - Date: 2019-10-03 - Case/document no.: RCOM 00869/2019/TC - Collection: Commercial Court

Text

Page 1

CANAL PLUS INTERNATIONAL v. VICTORY TV LTD [Rwanda URUKIKO RW’UBUCURUZI – RCOM 00869/2019/TC (Umutesi, P.J.) 03 Ukwakira 2019] Amategeko agenga umutungo bwite mu by’ubwenge – Uburenganzira ku gihangano – Uruhushya rwo gukora ibijyanye n’uburenganzira umuhanzi afite ku mutungo – Umuhanzi w’igihangano, akoresheje amasezerano, ashobora guha umuntu ku giti cye cyangwa ishyirahamwe uruhushya rwo gukora ibikorwa bijyanye n’uburenganzira afite ku mutungo. Uruhushya rushobora kuba rwihariye cyangwa rutihariye. Uruhushya rugira agaciro gusa iyo rushyizwe mu nyandiko, kandi rukaba ruriho umukono w’abagiranye amasezerano. Amasezerano agomba kandi gusobanura mu buryo bwumvikana ko uruhushya rwihariye cyangwa ko rutihariye. Incamake y’ikibazo: Uru rubanza rukomoka ku kirego CANAL PLUS INTERNATIONAL yatanze mu Rukiko rw’Ubucuruzi irega VICTORY TV Ltd ivuga ko iyibangamira ku burenganzira bwo kwerekana imikino y’umupira w’amaguru ya Premier League na UEFA champions League Mu Rwanda, kandi ubwo ari uburenganzira bwihariye (droit exclusif) yahawe na Premier League (Football Association Premier League Limited) na Union of European Football Associations (UEFA). Ikavuga ko yo na Super Sport Limited bandikiye ubuyobozi bw’urwego rw’igihugu rushinzwe kugenzura imikorere y’inzego zimwe z’imirimo ifitiye Igihugu akamaro (RURA), basaba ko nk’urwego rufite amateleviziyo mu nshingano zarwo rwabafasha

rugategeka Victory TV Ltd kurekeraho gukora ibikorwa byo kwerekana imikino yavuzwe haruguru mu Rwanda kubera ko bibangamiye bikomeye inyungu z’ayo masosiyete (CANAL PLUS INTERNATIONAL na Super Sport Limited) afite uburenganzira bwihariye (droit exclusif), RURA nayo iyisubiza iyizeza ko igiye gukora iperereza ku bijyanye n’uko Victory TV Ltd yaba yerekana bene iyo mikino mu Rwanda nta burenganzira ibiherewe na ba nyir‟ubwite, ko kandi Victory TV Ltd isabwe kuba ihagaritse ibyo bikorwa. Isoza isaba indishyi. Ku ruhande rw’Uregwa (VICTORY TV Ltd) yaburanye atanga inzitizi yo kutakira ikirego ishingiye ku kuba CANAL PLUS INTERNATIONAL nta nyungu n’ububasha ifite byo kurega kuko iregera ibitari ibyayo kandi banyirabyo bahari, ko kandi ko yagura uburenganzira bwo kwerekana imipira ariko n’abandi babugura. Yongeraho kandi ko urega atagaragaza amasezerano yagiranye na FA na UEFA, ko n’inyandiko zihari ziri scanné zitagaragaza n’iba ari amasezerano ko kandi uwazitanze atari we wareze. Ikavuga ko nta nyungu n’ububasha CANAL PLUS INTERNATIONAL ifite byo kurega kandi ko indishyi isaba itazihabwa. Incamake y’icyemezo: Umuhanzi w’igihangano, akoresheje amasezerano, ashobora guha umuntu ku giti cye cyangwa ishyirahamwe uruhushya rwo gukora ibikorwa bijyanye n’uburenganzira afite ku mutungo. Uruhushya rushobora kuba rwihariye cyangwa rutihariye. Uruhushya rugira agaciro gusa iyo rushyizwe mu nyandiko, kandi rukaba ruriho umukono w’abagiranye amasezerano. Amasezerano agomba kandi gusobanura mu buryo bwumvikana ko uruhushya rwihariye cyangwa ko rutihariye. Ikirego gifite ishingiro.

Page 2

Amategeko yashingiweho: Itegeko N° 31/2009 ryo kuwa 26/10/2009 rigamije kurengera umutungo bwite mu by‟ubwenge, Ingingo ya 232. Nta manza zifashishijwe Urubanza I. IMITERERE Y′URUBANZA [1] CANAL PLUS INTERNATIONAL irega Victory TV Ltd kuba ihungabanya uburenganzira bwayo, aho ikora ibikorwa byo kwerekana imikino y’umupira w‟amaguru ya Premier League na UEFA champions League Mu Rwanda, kandi ubwo ari uburenganzira bwihariye CANAL PLUS INTERNATIONAL yahawe na Premier League (Football Association Premier League Limited) na Union of European Football Associations (UEFA). Mu nama ntegurarubanza yabaye tariki ya 12/06/2019, Victory TV Ltd yatanze inzitizi ku ngwate itangwa n‟abanyamahanga, iyo nzitizi ihabwa ishingiro, CANAL PLUS INTERNATIONAL itegekwa gutanga ingwate ingana na 1.000.000Frw; [2] Iburanisha ry‟urubanza kuri iki kirego ryabaye tariki ya 09/09/2019, CANAL PLUS INTERNATIONAL ihagarariwe na Me William KARAIGA na Me Bizimana Emmanuel naho Victory TV Ltd ihagarariwe na Me Ngarambe Lambert na Me Kiroha Olivier; [3] Ababuranira Victory TV Ltd batanze inzitizi yo kutakira ikirego cyatanzwe na CANAL PLUS INTERNATIONAL ngo kuko idafite ububasha n’inyungu byo kuregera ibintu bitari ibyayo, basobanura ko imipira inyura kuri za TV zitandukanye ifite ba nyirayo (FA na UEFA), ko rero kuba CANAL PLUS INTERNATIONAL ijya kugura bumwe mu burenganzira kuri FA cyangwa UEFA bidasobanuye ko

ijya mu mwanya wabo; [4] Ababuranira CANAL PLUS INTERNATIONAL bavuga ko inzitizi itangwa na Victory TV Ltd nta shingiro ifite, ko CANAL PLUS INTERNATIONAL ifite inyungu n’ububasha byo kurega kuko yahawe na Premier League (Football Association Premier League Limited) na Union of European Football Associations (UEFA) uburenganzira busesuye bwo kwerekana imipira mu Rwanda. Kuri iyi nzitizi, urukiko rwafashe icyemezo cyo kuzayisuzumira hamwe n‟urubanza mu mizi, iburanisha rirakomeza; [5] Ababuranira CANAL PLUS INTERNATIONAL bavuga ko Victory TV Ltd yategekwa guhagarika burundu ibikorwa byo kwerekana imikino y‟umupira w‟amaguru ya Premier League na UEFA champions League Mu Rwanda, kuko uburenganzira bwihariye bwo kwerekana iyo mikino bufitwe na CANAL PLUS INTERNATIONAL, basaba n‟indishyi; [6] Ababuranira Victory TV Ltd bavuga ko CANAL PLUS INTERNATIONAL nta bubasha ifite bwo kurega mu gihe itagaragaza amasezerano ayiha uburenganzira bwo kwerekana imipira y‟amaguru ya Premier League na UEFA champions League mu Rwanda, ko kandi Victory TV Ltd yo ifite aho igura imipira yerekana, basaba indishyi;

Page 3

[7] Urukiko rusanga ikigomba gusuzumwa muri uru rubanza ari: ❖ Ukumenya niba CANAL PLUS INTERNATIONAL ifite inyungu n‟ububasha bwo kurega; ❖ Ukumenya niba Victory TV Ltd ibangamira uburenganzira bwa CANAL PLUS INTERNATIONAL bwo kwerekana imikino y‟umupira w‟amaguru ya Premier League na UEFA champions League Mu Rwanda, ikaba yategekwa kubihagarika; ❖ Ukumenya ishingiro ry‟indishyi zisabwa muri uru rubanza;

II. ISESENGURA RY′IBIBAZO BIRI MURI URU

RUBANZA

a) Kumenya niba CANAL PLUS INTERNATIONAL ifite inyungu n’ububasha bwo kurega [8] Ababuranira Victory TV Ltd bavuga ko CANAL PLUS INTERNATIONAL iregera ibintu bitari ibyayo kuko imipira inyura kuri za TV zitandukanye ifite ba nyirayo (FA na UEFA), ngo kuba CANAL PLUS INTERNATIONAL ijya kugura bumwe mu burenganzira kuri FA cyangwa UEFA ntibisobanuye ko ijya mu mwanya wa ba nyir‟imipira kuko uko yagura ari ko n‟abandi bose bagura; [9] Ababuranira Victory TV Ltd bavuga ko uretse inyandiko nazo zitari umwimerere FA cyangwa UEFA atari zo zareze Victory TV Ltd, ngo CANAL PLUS INTERNATIONAL rero nta nyungu ifite zo kuregera ibintu bitari ibyayo kuko nta n‟amasezerano igaragaza yagiranye na ba nyir‟imipira, cyangwa ububasha bwo kubatangira ikirego, bakomeza bavuga ko kuba FA cyangwa UEFA yakwandikira RURA bigaragaza ko ari zo zonyine zifite uburenganzira bwo kuregera ibyabo, ngo Victory Tv yahawe na RURA licence izamara imyaka itanu bityo ngo ibyo tele 10 ishaka gukora ibyitirira CANAL PLUS INTERNATIONAL sibyo kuko ishaka kuguma ku isoko yonyine; [10] Ababuranira CANAL PLUS INTERNATIONAL bavuga ko Premier League (Football Association Premier League Limited) na Union of European Football Associations (UEFA) zahaye CANAL PLUS INTERNATIONAL uburenganzira busesuye bwo kwerekana imikino, ndetse hakaba hari n’amasezerano abigaragaza ariko akaba atagomba kujya hanze kuko aba arimo amabanga, ko

rero ifite inyungu n’ububasha byo kurega kandi ikaba ibangamiwe n’ibikorwa bya Victory TV Ltd kuko yo kugirango igire uburenganzira bwo kwerekana imikino igomba kwishyura CANAL PLUS INTERNATIONAL; [11] Ababuranira Victory TV Ltd bavuga ko icyagaragaza uburenganzira CANAL PLUS INTERNATIONAL yahawe ari amasezerano, ko amabaruwa atangwa n‟urega nta gaciro yahabwa kuko CANAL PLUS INTERNATIONAL ari umuguzi kimwe na Victory TV Ltd;

Page 4

[12] Ingingo ya 6, 13º y‟Itegeko N° 31/2009 ryo kuwa 26/10/2009 rigamije kurengera umutungo bwite mu by‟ubwenge nk’uko ryahinduwe kandi ryujujwe kugeza ubu iteganya ko “uruhushya rwihariwe”: ari amasezerano y’uruhushya atuma nyir’uburenganzira bw’umuhanzi aha umuntu uruhushya rwo gukora mu buryo abyemerewe, ibikorwa byerekeye uburenganzira bwe ku mutungo, nta muntu wundi n’umwe ubyemerewe kabone n’iyo yaba nyir’uburenganzira ku gihangano, ingingo ya 232 y’iryo tegeko iteganya ko Umuhanzi w’igihangano, akoresheje amasezerano, ashobora guha umuntu ku giti cye cyangwa ishyirahamwe uruhushya rwo gukora ibikorwa bijyanye n’uburenganzira afite ku mutungo. Uruhushya rushobora kuba rwihariye cyangwa rutihariye. Uruhushya rugira agaciro gusa iyo rushyizwe mu nyandiko, kandi rukaba ruriho umukono w’abagiranye amasezerano. Amasezerano agomba kandi gusobanura mu buryo bwumvikana ko uruhushya rwihariye cyangwa ko rutihariye; [13] Kuba Premier League (Football Association Premier League Limited) na Union of European Football Associations (UEFA) ari bo ba nyir‟imipira inyura kuri za TV zitandukanye ntibishidikanywaho, ndetse n‟ababuranira CANAL PLUS INTERNATIONAL ntibabihakana, gusa bo bavuga ko ba nyir‟imipira bamaze kuvugwa bayihaye uburenganzira bwo kwerekana imikino y‟imipira y‟amaguru mu Rwanda, ibi kandi bigaragazwa n‟ibaruwa yo kuwa 05/02/2019, ubuyobozi bwa THE FOOTBALL ASSOCIATION

PREMIER LEAGUE LTD bwandikiye ubuyobozi bwa RURA (Rwanda Utilities Regulatory Authority) ikakirwa kuwa 13/02/2019, bugaragaza ko uwo bwahaye uburenganzira bwo kwerekana imikino “live” y‟amarushanwa ya Primier League kuri television mu Rwanda ari SuperSport, ko kandi Premier League yemereye SuperSport guha ubwo burenganzira (Sub-Licensing) CANAL PLUS INTERNATIONAL, bikongera kugaragazwa n‟ibaruwa yo kuwa 09/04/2019, Union of European Football Associations (UEFA) yanditse ishimangira ko yahaye CANAL PLUS INTERNATIONAL na SuperSport uburenganzira bwo kwerekana imikino y‟imipira y‟amaguru ku marushanwa yose ya UEFA Champions League, mu bihugu byo munsi y‟ubutayu bwa Sahara harimo n‟u Rwanda; [14] Urukiko rero rushingiye ku ngingo ya 3 y‟Itegeko No 22/2018 ryo ku wa 29/04/2018 ryerekeye imiburanishirize y‟imanza z‟imbonezamubano, iz‟ubucuruzi, iz‟umurimo n‟iz‟ubutegetsi iteganya ko ikirego cyakirwa mu rukiko iyo urega afite ububasha, inyungu n’ubushobozi byo kurega, keretse igihe itegeko ribiteganya ukundi, no ku ngingo ya 83 y‟iryo tegeko iteganya ko impamvu ituma ikirego kitakirwa ari ingingo yose isaba kutakira ikirego cy’umuburanyi, hatinjiwe mu mizi yacyo, kubera ko adafite uburenganzira bwo kurega, nko kuba adafite ububasha n’inyungu zo kurega, ubusaze bw’ikirego, kurenza igihe cyo kurega, urubanza rwabaye itegeko cyangwa kudatanga amagarama, harabayeho amasezerano

yo kwikiranura cyangwa iyo hari imihango itarubahirijwe iteganywa n’itegeko, rusanga CANAL PLUS INTERNATIONAL ifite inyungu n‟ububasha byo kurega kuko igaragaza ko yahawe uburenganzira bwihariye na Premier League (Football Association Premier League Limited) na Union of European Football Associations (UEFA) ari bo ba nyir‟imipira inyura kuri za TV zitandukanye, kandi ikaba ivuga ko ubwo burenganzira bubangamiwe na Victory TV Ltd yerekana iyo mipira itarabiherewe uburenganzira na ba nyirayo; [15] Urukiko rusanga ibivugwa n‟ababuranira Victory TV Ltd ko mu kugaragaza inyungu n‟ububasha CANAL PLUS INTERNATIONAL yagombye kuba igaragaza amasezerano yagiranye na ba nyir‟imipira, nta shingiro bifite kuko bo ubwabo (ba nyir‟imipira) banditse bahamya ko ubwo burenganzira CANAL PLUS INTERNATIONAL ibufite;

Page 5

[16] Urukiko rusanga kandi inyungu n‟ububasha byo kurega

CANAL

PLUS INTERNATIONAL ibukomora mu ngingo ya 259 y‟Itegeko N° 31/2009 ryo kuwa 26/10/2009 ryavuzwe haruguru iteganya ko rubisabwe na nyir’uburenganzira burengerwa, ufite uruhushya cyangwa undi muntu wese ubifitemo inyungu, urukiko rubifitiye ububasha rushobora gutegeka: 1° guhagarika igikorwa kinyuranyije n’amategeko n’igikorwa icyo ari cyo cyose gihungabanya uburenganzira burengerwa n’iryo tegeko, bityo rero ikirego cyayo kigomba kwakirwa kigasuzumwa;

b) Kumenya niba Victory TV Ltd ibangamira uburenganzira bwa CANAL PLUS INTERNATIONAL bwo kwerekana imikino y’umupira w’amaguru ya Premier League na UEFA champions League Mu Rwanda, ikaba yategekwa kubihagarika [17] Ababuranira CANAL PLUS INTERNATIONAL bavuga ko iyo sosiyete ikora ubucuruzi bujyanye no kwerekana imikino itandukanye n‟imyidagaduro, nk‟imikino y‟umupira w‟amaguru n‟indi mikino itandukanye mu buryo bw‟amashusho ku ma televiziyo muri Afurika n’u Rwanda rurimo (“CANAL + Bouquets”), kandi ikaba ikora ubwo bucuruzi mu Rwanda ihagarariwe na sosiyete yitwa TELE 10 Ltd ifite ikicaro I Kigali (Agent); [18] Ababuranira CANAL PLUS INTERNATIONAL bavuga ko yahawe uburenganzira bwihariye (droit exclusif) na Premier League (Football Association Premier League Limited) bwo kwerekana imikino y‟umupira w‟amaguru yo mu bwongereza (English Premier League games) mu Rwanda, inahabwa kandi uburenganzira bwihariye (droit exclusif) na Union of European Football Associations (UEFA) bwo kwerekana imikino y‟umupira amaguru ya Champions League (UEFA Champions League Games) mu bice bimwe by‟Afurika (SubSaharan Africa) harimo n’u Rwanda; [19] Ababuranira CANAL PLUS INTERNATIONAL bavuga ko ku wa 02/11/2018, CANAL PLUS INTERNATIONAL na Super Sport Limited bandikiye ubuyobozi bw‟urwego rw‟igihugu rushinzwe kugenzura imikorere y’inzego zimwe z’imirimo ifitiye Igihugu akamaro (RURA), basaba ko

nk‟urwego rufite amateleviziyo mu nshingano zarwo rwabafasha rugategeka Victory TV Ltd kurekeraho gukora ibikorwa byo kwerekana imikino yavuzwe haruguru mu Rwanda kubera ko bibangamiye bikomeye inyungu z‟ayo masosiyete (CANAL PLUS INTERNATIONAL na Super Sport Limited) afite uburenganzira bwihariye (droit exclusif), RURA nayo isubiza CANAL PLUS INTERNATIONAL iyizeza ko igiye gukora iperereza ku bijyanye n‟uko Victory TV Ltd yaba yerekana bene iyo mikino mu Rwanda nta burenganzira ibiherewe na ba nyir‟ubwite, ko kandi Victory TV Ltd isabwe kuba ihagaritse ibyo bikorwa; [20] Ababuranira CANAL PLUS INTERNATIONAL bavuga ko kuwa 30/10/2018, Ubuyobozi bwa Football Association Premier League Limited bwandikiye Victory TV Ltd buyimenyesha ko ibikorwa byayo byo kwerekana imikino y‟umupira w‟amaguru ya Premier League (Premier League Games), nta ruhushya ibiherewe cyangwa ngo ubwo burenganzira ibuhabwe na sosiyete zahawe nayo uburenganzira bwihariye (droit exclusif), bikomeje kubangamira inyungu zayo ndetse n‟iz‟amasosiyete yahawe ubwo burenganzira bwihariye, ko rero yahagarika ibyo bikorwa ndetse igahita ibigaragaza kuri email yayo (legal@premierleague.com), ariko ngo byabaye iby‟ubusa kuko Victory TV Ltd yaryumyeho yikomereza ibikorwa byayo byo kwerekana iyo

Page 6

mikino nta ruhushya ibiherewe na ba nyir‟ubwite, bityo ngo yategekwa guhagarika burundu ibikorwa byo kwerekana iyo mikino; [21] Ababuranira Victory TV Ltd bavuga ko urukiko rwashingira ku ngingo ya 12 y‟Itegeko No 22/2018 ryo ku wa 29/04/2018 ryavuzwe haruguru, ngo ababuranira CANAL PLUS INTERNATIONAL bagaragaza amabaruwa gusa ariko ntibagaragaza amasezerano yabo, bityo ngo mu gihe batabyerekana nka Victory TV Ltd ntacyo babivugaho, ndetse ngo babona nta bubasha CANAL PLUS INTERNATIONAL ifite bwo kurega; [22] Me KIROHA Olivier avuga ko ababuranira CANAL PLUS INTERNATIONAL bagombye kugaragaza aho Victory TV Ltd yerekaniye iyo mipira mu gifaransa, ko rero abarega bakabaye batanga amasezerano kuko imipira Victory TV Ltd yerekana hari aho iyigura kandi hakaba hari amasezerano; [23] Me Bizimana Emmanuel avuga ko icyo basabye urukiko ari uko Victory TV Ltd ihagarika kwerekana imipira kuko nta burenganzira ifite, ngo si ukubabuza gukora, akomeza avuga ko icyiza ari uko bemera ko imipira bayerekana, ko niba imipira barayiguze kuri sky bagombye kwerekana ibaruwa, ngo CANAL PLUS INTERNATIONAL rero ifite uburenganzira bwo kwerekana iyo mipira; [24] Me KARAIGA William avuga ko hari ibaruwa yo kuwa 30/10/2018, yandikiwe Victory TV Ltd babihanangiriza babasaba guhagarika ibikorwa byo kwerekana imipira, bababwira ko nta burenganzira babifitiye, ngo nta kindi cyakorwa rero uretse guhagarika

Victory TV Ltd kwerekana imipira nta burenganzira babifitiye; [25] Ababuranira Victory TV Ltd bavuga ko batamenya aho ibaruwa yo kuwa 30/10/2018, yaturutse kuko ari ibintu biri “scanné” batazi aho abarega babikuye, ko kandi uwabyanditse atari we urega; [26] Ingingo ya 232 y‟Itegeko N° 31/2009 ryo kuwa 26/10/2009 ryavuzwe haruguru iteganya ko Umuhanzi w’igihangano, akoresheje amasezerano, ashobora guha umuntu ku giti cye cyangwa ishyirahamwe uruhushya rwo gukora ibikorwa bijyanye n’uburenganzira afite ku mutungo. Uruhushya rushobora kuba rwihariye cyangwa rutihariye. Uruhushya rugira agaciro gusa iyo rushyizwe mu nyandiko, kandi rukaba ruriho umukono w’abagiranye amasezerano. Amasezerano agomba kandi gusobanura mu buryo bwumvikana ko uruhushya rwihariye cyangwa ko rutihariye, ngingo ya 259 y‟iryo tegeko iteganya ko rubisabwe na nyir’uburenganzira burengerwa, ufite uruhushya cyangwa undi muntu wese ubifitemo inyungu, urukiko rubifitiye ububasha rushobora gutegeka: 1° guhagarika igikorwa kinyuranyije n’amategeko n’igikorwa icyo ari cyo cyose gihungabanya uburenganzira burengerwa n’iri tegeko, ingingo ya 3 y′itegeko Nᵒ15/2004 ryo kuwa 12/06/2004 ryerekeye ibimenyetso mu manza n′itangwa ryabyo iteganya ko buri muburanyi agomba kugaragaza ukuri kw’ibyo aburana; [27] Ibaruwa yo kuwa 05/02/2019, THE FOOTBALL ASSOCIATION PREMIER LEAGUE LTD (the Premier League) yandikiye RURA (Rwanda Utilities Regulatory Authority), ikakirwa tariki ya 13/02/2019, igaragaza ko SuperSport International yagiranye amasezerano na The Premier League ayiha uburenganzira bwihariye bwo kwerekana mu buryo bw‟iyumvabona (audio-visual rights) amarushanwa ya Premier League y‟imipira y‟amaguru mu buryo bwa “Live”

Page 7

hakoreshejwe “DTH (i.e. satellite) delivery, IPTV DELIVERY, cable TV delivery, digital terrestrial televisions delivery and analogue terrestrial broadcast in (inter alia)” mu Rwanda, ko kandi The Premier League yemereye SuperSport kuba nayo yaha CANAL PLUS INTERNATIONAL, binyuze mu masezerano uburenganzira (sub-licensing) bwo kwerekana mu rurimi rw‟igifaransa iyo mikino, muri iyo baruwa kandi The Premier League yagaragazaga ko undi wese wakwerekana iyo mikino mu Rwanda uretse SuperSport, Canal+, Econet cyangwa “a sub-lincensee of Econet”, yaba abikoze adafite uburenganzira bwa The Premier League, ko rero ibikorwa na Victory TV Ltd bitemewe nayo (The Premier League), na none mu ibaruwa yo kuwa 30/10/2018, The Premier League yandikiye Victory TV, yayigaragarizaga ko ari yo (The Premier League) ifite uburenganzira bwo guha abandi bantu uburenganzira bwo kwerekana amarushanwa y‟imikino y‟umupira w‟amaguru ya Premier League mu Rwanda, ko rero bayisaba (Victory TV) guhagarika kwerekana iyo mikino mu Rwanda kuko bamenye ko babikora kandi bikaba bibangamiye uburenganzira bwabo; [28] Ibaruwa yo kuwa 09/04/2019, The Union of European Football Associations (UEFA) yandikiye abo bireba (To whom it may concern), igaragaza abahawe uburenganzira bwo kwerekana imikino ya UEFA Champions League na Super Cup 2018/19, 2019/20 na 2020/21, iyo baruwa igaragaza ko UEFA ari yo ifite uburenganzira bwose

ku mutungo bwite mu by‟ubwenge ujyanye n‟ayo marushanwa, ko ariko hari abo yahaye uburenganzira bwo kwerekana amarushanwa y‟imikino y‟umupira w‟amaguru mu bihugu byo munsi y‟ubutayu bwa SAHARA harimo n‟u Rwanda, ari bo CANAL PLUS INTERNATIONAL na SuperSport, ko Victory TV yo nta burenganzira yahawe na UEFA bwo kwerekana iyo mikino; [29] Kuba Victory TV Ltd yerekana imikino y‟umupira w‟amaguru ya Premier League na UEFA Champions League mu Rwanda, ntibihakanwa n‟abayiburanira, uretse gusa kuvuga ko iterekana imikino ya Premier League yo mu rurimi rw‟igifaransa, ariko ntibabigaragariza ibimenyetso, urukiko rusanga rero ibi bibangamiye uburenganzira bwa CANAL PLUS INTERNATIONAL kuko yo yahawe ubwo burenganzira nk‟uko bigaragazwa n‟amabaruwa amaze kuvugwa haruguru; [30] Urukiko rusanga kandi kuba CANAL PLUS INTERNATIONAL na SuperSport barandikiye RURA (ibaruwa yo kuwa 02/11/2018) bayisaba ko yakemura ikibazo cya Victory TV Ltd ibangamiye uburenganzira bwabo, RURA nayo ikagaragaza ko nyuma yo kubona iyo baruwa yatangiye gukora iperereza ko ndetse yasabye Victory TV guhagarika kwerekana imikino ya Premier League na UEFA Champions League mu Rwanda ku butaka bw‟u Rwanda (ibaruwa yo kuwa 26/11/2018), nabyo bigaragaza ibikorwa bya Victory TV Ltd byo kubangamira uburenganzira bwa CANAL PLUS INTERNATIONAL, bityo rero ikaba ihagaritswe burundu ku gukora ibikorwa byo kwerekana imikino y‟umupira w‟amaguru ya Premier League na UEFA Champions League mu Rwanda kuko ibikora mu buryo bunyuranyije n‟amategeko;

c) Kumenya ishingiro ry’indishyi zisabwa muri uru rubanza [31] Ababuranira CANAL PLUS INTERNATIONAL bavuga ko kubera ibikorwa bya Victory TV binyuranyije n‟amategeko ndetse bihungabanya uburenganzira bwa Canal+ bikanayitera igihombo gikomeye, ngo CANAL PLUS INTERNATIONAL yahabwa indishyi zingana na USD 5,000,000, ngo kuko ubucuruzi bwayo bwahungabanyijwe bikomeye n‟ibikorwa bya Victory TV

Page 8

Ltd, aho CANAL PLUS INTERNATIONAL yatewe igihombo no kuba hari undi ukora ibikorwa byakabaye biyinjiriza amafaranga, kandi Victory TV Ltd nayo ikaba yarakuye inyungu mu bikorwa byo kwerekana imipira mu gihe itari ibyemerewe, cyane ko ngo urega aba yishyuye Amafaranga menshi kugirango ahabwe uburenganzira na English Premier League/UEFA Champions League bwo kwerekana iyi mikino y‟umupira w‟amaguru mu Rwanda; [32] Ababuranira CANAL PLUS INTERNATIONAL bavuga ko kuba yarashowe mu rubanza n‟ibikorwa by‟uregwa byatumye ihatakariza byinshi bikubiyemo igihembo cy‟avoka, ikurikiranarubanza, igarama, igihembo cy„umuhesha w‟inkiko n‟izindi depenses, ndetse mu gihe urubanza rukiba ikazakomeza gutakaza amafaranga mu kurukurikirana harimo nk‟ingendo ikora, amafaranga yo gufotora inyandiko zitandukanye, itumanaho ndetse n‟igihe imara ikora ibijyanye n‟uru rubanza bikayibuza gukora ibindi biyifitiye akamaro, bityo ngo urukiko rwayigenera igihembo cya avoka kingana na 5.000.000Frw, 1.000.000Frw y‟ikurikiranarubanza na 20.000Frw y‟igarama, basoza basaba ko banasubizwa ingwate itangwa n‟abanyamahanga batanze; [33] Ababuranira Victory TV Ltd bavuga ko indishyi zisabwa na

CANAL

PLUS INTERNATIONAL nta shingiro zifite, kuko idafite ububasha n‟inyungu zo kurega Victory kuko iregera ibitari ibyayo, bakomeza bavuga ko kuba Canal + yarashoye Victory Tv Ltd mu manza z‟amaherere iyitesha agaciro mu bafatanyabikorwa bayo (startimes) no mu nzego za leta (RURA), ngo byatumye ihatakariza byinshi, bityo ngo Canal + igomba gutanga indishyi z‟akababaro zingana na 100.000.000Frw, igihembo cya avoka mu rwego rwa référé na principal 15.000.000Frw, n‟indishyi z‟ikurikiranarubanza 5.000.000Frw; [34] Ababuranira CANAL PLUS INTERNATIONAL bavuga ko indishyi zisabwa na Victory TV Ltd nta shingiro zifite kuko idashobora kuzisobanura; [35] Ingingo ya 260 y‟Itegeko N° 31/2009 ryo kuwa 26/10/2009 ryavuzwe haruguru iteganya ko hakurikijwe icyemezo cyafashwe n’urukiko rubifitiye ububasha, nyir’uburenganzira burengerwa wahohotewe ahabwa n’uwamuhohoteye indishyi ikwiye. Indishyi ikwiye igenwa hashingiwe ku buremere by’icyaha nyir’uburenganzira burengerwa yakorewe, agaciro k’inyungu uwahohoteye yakuye mu cyaha yakoze n’amafaranga yagiye ku rubanza nyir’uburenganzira burengerwa yagejeje ku nzego z’ubuyobozi, cyangwa ku nkiko zibifitiye ububasha; [36] Kuba Victory TV Ltd yarabangamiye uburenganzira bwa

CANAL PLUS INTERNATIONAL bwo kwerekana imikino y‟umupira w‟amaguru ya Premier League na UEFA Champions League mu Rwanda, urukiko rusanga byarayiteje igihombo bityo rero indishyi isaba irazikwiye cyane ko byanabaye ngombwa ko iregera urukiko kugirango uburenganzira bwayo bwere gukomeza kubangamirwa, ishyiraho abavoka bo kuyiburanira, rusanga ariko na none indishyi CANAL PLUS INTERNATIONAL isaba ari umurengera cyane ko itanagaragaza urwunguko rwayo ndetse n‟inyungu Victory TV Ltd yavanye mu kwerekana imikino imaze kuvugwa, bityo rero mu bushishozi bw‟urukiko indishyi igomba guhabwa zikaba zigenwe mu buryo bukurikira: indishyi zingana na 10.000.000Frw zituruka ku gihombo CANAL PLUS INTERNATIONAL yagize kubera igikorwa cya VICTORY TV Ltd cyo kwerekana imikino yavuzwe haruguru itabifitiye uburenganzira, indishyi z‟ikurikiranarubanza zingana n‟amafaranga ibihumbi Magana abiri (200.000Frw), igihembo cya avoka kingana n‟amafaranga ibihumbi Magana atanu (500.000Frw), n‟igarama ringana n‟amafaranga ibihumbi makumyabiri

Page 9

(20.000Frw), urukiko rusanga kandi CANAL PLUS INTERNATIONAL igomba gusubizwa ingwate itangwa n‟abanyamahanga yatanze ingana n‟amafaranga miliyoni (1.000.000Frw); [37] Ku bijyanye n‟indishyi zisabwa na Victory TV Ltd urukiko rusanga izo ndishyi nta shingiro zifite kuko ntacyo CANAL PLUS INTERNATIONAL yayangirije;

III. ICYEMEZO CY′URUKIKO [38] Rwemeye kwakira ikirego cyatanzwe na CANAL PLUS INTERNATIONAL rugisuzumye rusanga gifite ishingiro; [39] Rwemeje ko ibikorwa bya Victory TV Ltd byo kwerekana imikino y‟umupira w‟amaguru ya Premier League na UEFA Champions League mu Rwanda, bibangamiye uburenganzira bwa CANAL PLUS INTERNATIONAL; [40] Rutegetse Victory TV Ltd guhagarika ibikorwa byayo byo kwerekana imikino y‟umupira w‟amaguru ya Premier League na UEFA Champions League mu Rwanda kuko binyuranyije n‟amategeko; [41] Rutegetse Victory TV Ltd guha CANAL PLUS INTERNATIONAL indishyi zingana n‟amafaranga miliyoni icumi (10.000.000Frw) z‟igihombo yatewe n‟ibikorwa bya Victory TV Ltd byo kwerekana imikino y‟umupira w‟amaguru ya Premier League na UEFA Champions League mu Rwanda, itabiherewe uburenganzira na ba ny‟iriyo mipira ari bo The Premier League (Football Association Premier League Limited) na Union of European Football Associations (UEFA), cyangwa se ngo ibuhabwe na

CANAL

PLUS INTERNATIONAL; [42] Rutegetse Victory TV Ltd guha CANAL PLUS INTERNATIONAL indishyi z‟ikurikiranarubanza zingana n‟amafaranga ibihumbi Magana abiri (200.000Frw), n‟igihembo cya avoka kingana n‟amafaranga n‟amafaranga ibihumbi Magana atanu (500.000Frw); [43] Rutegetse ko

CANAL PLUS INTERNATIONAL isubizwa ingwate itangwa n‟abanyamahanga yaciwe ingana n‟amafaranga y‟u Rwanda miliyoni imwe (1.000.000Frw); [44] Rutegetse Victory TV Ltd gusubiza CANAL PLUS INTERNATIONAL ingwate y′amagarama yatanze irega ingana n′amafaranga y′u Rwanda ibihumbi makumyabiri (20.000Frw), itayatanga mu gihe giteganywa n‟amategeko agakurwa mu byayo ku ngufu za Leta;