CHEZA RWANDA GAMES LTD N’UNDI v. NGABO BALINDA

# CHEZA RWANDA GAMES LTD N’UNDI v. NGABO BALINDA

- Source: Amategeko - Section: Decisions (Judgements) - Date: 2025-01-06 - Case/document no.: RCOMA 00010/2024/CA - Collection: Court of Appeal

## Text

## Page 1

CHEZA RWANDA GAMES LTD N’UNDI v. NGABO BALINDA [Rwanda URUKIKO RW’UBUJURIRE – RCOMA 00010/2024/CA (Kamere, P.J.) 06 Mutarama 2025] Amategeko agenga imiburanishirize y’imanza z’imbonezamubano – Kureka ikirego – Ni ukwiyambura ububasha bwo kuburana kandi bituma ibintu bisubira uko byari bimeze ku mpande zombi mbere y’uko Urukiko ruregerwa. Incamake y’ikibazo: Uru rubanza rwatangiriye mu Rukiko Rukuru rw’Ubucuruzi ku kirego cyatanzwe na Daniel Ngabo Balinda asaba ko icyemezo cyafashwe n’Urukiko rw’Ubucuruzi rwa Kinshasa/Gombe kirangirizwa mu Rwanda, rwemeza ko icyo cyemezo kirangirizwa mu Rwanda. CHEZA RWANDA GAMES Ltd na BHAMRE PRASAD batanze ikirego mu Rukiko Rukuru rw’Ubucuruzi gitambamira urubanza RCOM 00019/2024/HCC, basaba ko icyemezo cyarufashwemo giteshwa agaciro, batanga kandi ikirego cyihutirwa basaba guhagarika irangizarubanza ku rubanza rwemeza ko icyemezo kirangirizwa mu Rwanda. Urukiko Rukuru rw'Ubucuruzi rwaciye urubanza rwemeza ko icyo kirego cyitakirwa kuko ikirego gishingirwaho (ikirego cyo gutambamira urubanza rwaburanishijwe) ubwacyo ari ikirego kiburanishwa mu buryo bwihutirwa, bidashoboka ko hatangwa ikindi kirego cyihutirwa kigishingiyeho kuko ubwihutire bwabyo ari bumwe. CHEZA RWANDA GAMES Ltd na BHAMRE PRASAD batishimiye icyo cyemezo bajuririye mu Rukiko rw’Ubujurire bavuga ikirego gitambamira urubanza rwemeje exequatur ari ikirego cy’iremezo bityo ikirego cyigishamikiyeho cyagombaga kwakirwa bityo iby’Urukiko Rukuru rw’Ubucuruzi rwemeje exequatur nk’ikirego cyihutirwa bitari bikukirikije amategeko. Mu iburanisha ry’urwo rubanza mu Rukiko rw’Ubujurire CHEZA RWANDA GAMES Ltd na BHAMRE PRASAD bamenyesheje urwo Rukiko ko baretse ikirego kuko icyo cyari gishamikiyeho kiri mu Rukiko Rukuru rw’Ubucuruzi cyamaze kuburanishwa ndetse hategerejwe isomwa ry’urubanza. Urukiko rusuzuma ikibazo cyijyanye nuko kureka ikirego gukozwe n’abajuriye. Incamake y’icyemezo: Kureka ikirego ni ukwiyambura ububasha bwo kuburana kandi bijyana no kwiyambura uburenganzira umuntu yari afite bwo gukomeza gukurikirana icyo kirego ndetse bituma ibintu bisubira uko byari bimeze ku mpande zombi mbere y’uko Urukiko ruregerwa. Rwemeje ibyo kureka ikirego. Amategeko yashingiweho: Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 122 n’iya 124.

Nta manza zifashishijwe

## Page 2

Urubanza I. IMITERERE Y′URUBANZA [1] Ku wa 20/11/2024, Urukiko Rukuru rw’Ubucuruzi rwaciye urubanza RCOM 00019/2024/HCC, aho Daniel Ngabo Balinda yari yareze asaba urukiko “Kwemeza ko icyemezo cy’Urukiko no RRC. 025 cyafashwe n’Urukiko rw’Ubucuruzi rwa Kinshasa/Gombe (Tribunal de Commerce de Kinshasa / Gombe) ku wa 23/08/2024 kirangirizwa mu Rwanda (Exequatur)”. Icyo kirego kikaba cyaratanzwe nk’inyandiko nsobanurakirego itanzwe n’umuburanyi umwe (requête unilatérale). Urukiko rwemeje ko icyo kirego gifite ishingiro, ko icyo cyemezo kirangirizwa mu Rwanda. [2] Ku wa 29/11/2024, CHEZA RWANDA GAMES Ltd na BHAMRE PRASAD batanze ikirego mu Rukiko Rukuru rw’Ubucuruzi gitambamira urubanza RCOM 00019/2024/HCC, basaba ko icyemezo cyarufashwemo giteshwa agaciro, icyo kirego gihabwa numero RCOM 00029/2024/HCC. [3] Batanze kandi n’ikirego cyihutirwa cyahawe numero RCOM 00030/2024/HCC, gishamikiye ku rubanza numero RCOM 00029/2024/HCC, muri icyo kirego cyihutirwa basaba guhagarika irangizwa ry’urubanza RCOM 00019/2024/HCC rwemerera icyemezo no RRC. 025 kurangirizwa mu Rwanda, mu gihe ikirego cy’iremezo kitaraburanishwa ngo gifatirwe umwanzuro. Mu iburanisha kandi ababuranyi basabwe gutanga ibisobanuro ku bijyanye n’iyakirwa ry’ikirego hashingiwe kuri kamere yacyo ndetse no kuri kamere y’ikirego iki gishingiyeho. [4] Mu guca urubanza RCOM 00030/2024/HCC, ku wa 06/12/2024 Urukiko Rukuru rw'Ubucuruzi rwasanze ikirego abarega bashingiyeho batanga ikirego cyihutirwa ari ikirego cyo gutambamira urubanza rwaburanishijwe mu buryo bw’ibirego byihutirwa cyatanzwe nk’inyandiko nsobanurakirego itanzwe n’umuburanyi umwe, kandi mwene ibyo birego bikaba biri mu cyiciro cy’ibirego byihutirwa, bityo n’ikirego gitambamira cyangwa kijuririra bene ibyo birego na cyo gifatwa nk’ikirego cyihutirwa. Kubera iyo mpamvu Urukiko rusanga kuba ikirego gishingirwaho ubwacyo ari ikirego kiburanishwa mu buryo bwihutirwa, bidashoboka ko hatangwa ikindi kirego cyihutirwa kigishingiyeho kuko ubwihutire bwabyo ari bumwe, bityo rwemeza ko ikirego RCOM 00030/2024/HCC kitakirwa. [5] Iki cyemezo ntabwo CHEZA RWANDA GAMES Ltd na BHAMRE PRASAD bacyishimiye, bakijuririra muri uru Rukiko rw’Ubujurire, ikirego cyandikwa kuri RCOMA 00010/2024/CA, basobanura ko kuba ikirego cyihutirwa kigomba gutangwa hari ikirego cy’iremezo bigaragara mu gika cya 2 cy’ingingo ya 189 y’Itegeko ryerekeye imiburanishirize y’imanza mbonezamubano, iz’ubucuruzi, iz’umurimo n’iz’ubutegetsi nk’uko ryahinduwe kandi ryujujwe kugeza ubu1, babona ko “Inyandiko nsobanurakirego itanzwe n’umuburanyi umwe ishobora gukoreshwa mu bibazo byose bisaba ko hafatwa icyemezo cyihuse bitari ngombwa ko

1 Iyo ngingo ikaba iteganya ibi bikurikira: “Inyandiko nsobanurakirego itanzwe n’umuburanyi umwe ni uburyo budasanzwe bwo kuregera umucamanza umusaba kugira ibyo aramira mu buryo bwihuse. Ibikubiye muri iyo nyandiko bigomba kandi kuba ari ibibazo bigaragara ko nta mpaka biteye ku buryo byaba ngombwa ko undi muburanyi ahamagarwa”.

## Page 3

habanza gutangwa ikirego cy’iremezo”. Bavuga ko ibyo birego byombi batanze bigirwa n’ibirego bisaba ko imanza zaciriwe hanze y’u Rwanda zirangirizwa mu Rwanda, bityo basanga kuba Urukiko Rukuru rw’Ubucuruzi rwarafashe urubanza RCOM 00019/2024/HCC rwemeje exequatur nk’ikirego cyihutirwa bitari bikukirikije amategeko. Bakanzura ko kuba ikirego RCOM 00029/2024/HCC gitambamira urwo rubanza RCOM 00019/2024/HCC rwemeje exequatur ari ikirego cy’iremezo, ikirego cyihutirwa RCOM 00030/2024/HCC kigishamikiyeho cyaragombaga kwakirwa. [6] Iburanisha ry’urubanza ryashyizwe ku wa 06/01/2025, ababuranyi bose baritaba, CHEZA RWANDA GAMES Ltd na BHAMRE PRASAD bahagarariwe na Me Iyakaremye Bosco, Daniel Ngabo Balinda ahagarariwe na Me Turatsinze Emmanuel. Me Iyakaremye Bosco abwira Urukiko ko kubera ko ikirego cy’iremezo RCOM 00029/2024/HCC cyamaze kuburanishwa mu Rukiko Rukuru rw’Ubucuruzi, ababuranyi bakaba bategereje gusa isomwa ry’urwo rubanza, nta mpamvu igihari yo gukomeza uru rubanza mu Rukiko rw’Ubujurire, ko abo ahagarariye baretse iki kirego bashingiye ku biteganywa n’ingingo ya 122 y’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi. [7] Urukiko rw’Ubujurire na rwo rushingiye kuri iyo ngingo ya 122 y’Itegeko rimaze kuvugwa, rufatira icyemezo mu ntebe y’Abacamanza, rwemeza ko CHEZA RWANDA GAMES Ltd na BHAMRE PRASAD baretse ikirego bari batanze, icyo cyemezo gisobanurwa mu ngingo zikurikira: II. IKIBAZO KIGIZE URU RUBANZA N’ISESENGURA RYACYO

Gusuzuma ibijyanye no kureka ikirego kwakozwe na CHEZA RWANDA GAMES Ltd na BHAMRE PRASAD. [8] Ingingo ya 122 y’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, iteganya ibi bikurikira: “Kureka ikirego ni ukwiyambura ububasha bwo kuburana. Bijyana no kwiyambura uburenganzira umuntu yari afite bwo gukomeza gukurikirana icyo kirego. Ukwemera k’undi muburanyi si ngombwa”. Ingingo ya 124 igika cya 1 y’iryo tegeko igateganya ko “Kureka ikirego no kureka urubanza bituma ibintu bisubira uko byari bimeze ku mpande zombi mbere y’uko Urukiko ruregerwa”. [9] Muri uru rubanza hari ikibazo cyo kumenya niba CHEZA RWANDA GAMES Ltd na BHAMRE PRASAD bakwemererwa kureka ubu bujurire ku kirego cyabo bita icyihutirwa mu gihe icyo cyari gishamikiyeho mu Rukiko Rukuru rw’Ubucuruzi cyamaze kuburanishwa ndetse hategerejwe isomwa ry’urwo rubanza. [10] Urukiko rw’Ubujurire rushingiye ku ngingo z’Itegeko zimaze kuvugwa haruguru, rurasanga ubusabe bwa CHEZA RWANDA GAMES Ltd na BHAMRE PRASAD bwo kureka ikirego batanze bikurikije amategeko, Urukiko rugomba kubibemerera, ibintu bigasubira uko byari bimeze mbere y’uko baregera uru Rukiko rw’Ubujurire, hakagumaho imikirize y’urubanza RCOM 00030/2024/HCC rwaciwe n'Urukiko Rukuru rw'Ubucuruzi ku wa 06/12/2024.

## Page 4

III. ICYEMEZO CY’URUKIKO [11] Rwemeje ko CHEZA RWANDA GAMES Ltd na BHAMRE PRASAD baretse ikirego bari batanze; [12] Ruvuze ko amafaranga y’amagarama y’uru rubanza yatanzwe na CHEZA RWANDA GAMES Ltd na BHAMRE PRASAD ahwanye n’ibyarukozwemo.