HABYARIMANA v MTN RWANDACELL LTD (2)

HABYARIMANA v MTN RWANDACELL LTD (2)

- Source: Amategeko - Section: Decisions (Judgements) - Date: 2024-03-05 - Case/document no.: RS/INJUST/RCOM 00002/2022/SC - Collection: Supreme Court

Text

Page 1

HABYARIMANA vs. MTN RWANDACELL Ltd [Rwanda URUKIKO RW’IKIRENGA – RS/INJUST/RCOM 00002/2022/SC (Ntezilyayo, P.J., Hitiyaremye, Cyanzayire, Kazungu, Kalihangabo J.) 05 Werurwe 2024] Amategeko arengera umutungo bwite mu by’ubwenge – Uburyozwe – Indishyi – Umuntu cyangwa sosiyete icuruza ibihangano muntu mu izina rye bwite no nyungu ze bwite atabiherewe uburenganzira na nyiri bihangano arabiryozwa kuko birengerwa n’itegeko. Amategeko agenga imiburanishirize y’imanza z’ubucuruzi – Ubwumvikane – Ubuhuza busoza urubanza nta yindi mihango, maze hakarangizwa ibikubiye mu masezerano y’ubwumvikane. Incamake y’ikibazo: Uwitwa Habyarimana Charles yareze MTN Rwandacell Ltd mu Rukiko rw'Ubucuruzi rwa Nyarugenge, avuga ko MTN yakoresheje mu bucuruzi bwayo buyibyarira inyungu ibihangano muntu bye (personnages fictifs) Kanyombya na Sekaganda, itabiherewe uburenganzira, ikaba yarahungabanyije uburenganzira bwe bw'umuhanzi kuri ibyo bihangano, kuko ari uburenganzira nyamuntu n'uburenganzira bw'umutungo, bityo akaba asaba uru Rukiko kuyitegeka kumuha indishyi zitandukanye. MTN yatanze inzitizi yo kutakira ikirego cya Habyarimana Charles, ivuga ko nta bubasha afite bwo gutanga ikirego kuko certificate of registration igaragaza ko Société de production audiovisuelle et Multimédia 2a2m ariyo yahawe uburenganzira bwo kurengera ibyo bihangano Habyarimana avuga ko aribye. Urukiko rwemeje ko ikirego

kitakiriwe kuko adafite ububasha. Habyarimana yajuririye mu Rukiko Rukuru rw'Ubucuruzi, maze rwemeza ko afite ububasha bwo kuregera ko ibihangano muntu Kanyombya na sekaganda, bityo ko imikirize y'urubanza rwajuririwe iteshejwe agaciro, maze urubanza rwoherezwa mu Rukiko rw’Ubucuruzi kugira ngo ruruburanishe mu mizi. Urubanza rwoherejwe mu Rukiko rw'Ubucuruzi, sosiyete Yellow dot Rwanda Ltd, sosiyete Netsolutions Ltd, Kayitankore Ndjoli na Niyitegeka Gratien bagobokeshwa mu rubanza bisabwe na MTN. Urukiko rwemeje ko MTN yakoresheje abantu bahangano Kanyombya na Sekaganda mu bucuruzi biyibyarira inyungu ibifitiye uburenganzira. Habyarimana yajuririye Urukiko Rukuru rw’Ubucuruzi, maze rwemeza ko ubujurire bwe nta shingiro bufite, ajurira nanone mu Rukiko rw'Ubujurire, urwo rukiko rwemeza ko ubujurire bwa kabiri yatanze butari mu bubasha bwarwo. Nyuma yaho, Habyarimana yanditse asaba ko urubanza rwaciwe n'Urukiko Rukuru rw’Ubucuruzi rusubirwamo ku mpamvu z’akarengane avuga ko umuhanzi w'igihangano ari we ufite umwanya w'ibanze ku burenganzira nyamuntu no ku burenganzira bw'umutungo ku gihangano cye kandi ko kugira ngo umuntu afatwe nka nyir'igihangano bihagije ko izina rye rigaragara ku gihangano mu buryo busanzwe bukoreshwa iyo nta kimenyetso kibivuguruza. MTN yisobanura ivuga ko filimi zakinywemo abantu bahangano Kanyombya na Sekaganda zitandikishijwe ku mazina ya Habyarimana ahubwo zandikishijwe na Société de production

Page 2

Audio, Audiovisuelle et Multimédia 2 à 2m yanditse kuri Marie Goretti Niragire, ku buryo ariyo igaragara kuri certificat, bityo ko ariyo ifite uburenganzira bw'umuhanzi kuri ibyo bihangano. Sosiyete Netsolutions Ltd nayo yiregura ivuga ko ikibazo cyo kumenya niba Habyarimana Charles ari nyir'ibihangano muntu Kanyombya na Sekaganda ntacyo akivugaho kuko amasezerano Netsolutions Ltd yagiranye na Niyitegeka Gratien arebana n'inzenya ze bwite, akaba ntaho ahuriye n'ibyo bihangano muntu. Niyitegeka Gratien avuga ko abisabwe na Habyalimana Charles yakinnye umuntu muhangano Sekaganda muri filimi ZIRARA ZISHYA, ko nta handi yakoresheje iryo zina usibye ko mu buzima busanzwe baramuhamagara akitaba, avuga kandi ko abona nta mpamvu yagombaga kuzanwa mu rubanza kuko amasezerano yagiranye na Netsolutions Ltd ntaho ahuriye n'umuntu muhangano Sekaganda. Kayitankore Ndjoli (Kanyombya) nawe aburana avuga ko atari umuntu muhangano wa Habyarimana Charles kuko batigeze bakorana amasezerano, kandi ko izina Kanyombya yakinnye kuva mu mwaka wa 2002 yitwa muri filimi ari we warihimbiye, bityo ko niba Habyarimana Charles yarandikishije iryo zina aryita igihangano cye yaba ari amakosa yakoze kuko yakabaye yaramusabye uburenganzira bwo gukoresha izina rye no kuryandikisha. Habyarimana avuga kandi ko asaba ko MTN yategekwa kumuha indishyi zishingiye ku kuba yakoresheje ibihangano bye mu bucuruzi

buyibyarira inyungu, nta burenganzira yabitangiye, avuga kandi ko ibyo MTN ivuga ko ibihangano muntu Kanyombya na Sekaganda ataribyo byacurujwe ku rubuga rwayo, ahubwo ko hacurujwe inzenya za Kayitankore Ndjoli na Niyitegeka Gratien nta shingiro bifite. Habyarimana yerekana kandi ko MTN ikora ubucuruzi bw'amayinite (unités), internet n'ibindi, ku buryo iyo umuntu akeneye gucuruza content, yo imuha platform acururizaho, bakemeranya uburyo bazagabana inyungu. MTN ivuga nanone ko kugira ngo ibihangano bifatwe nk'aho bikoreshejwe nta burenganzira bitangiwe, bigomba kuba byarandikishijwe nk’umutungo bwite, kandi ko nta kimenyetso Habyarimana Charles agaragaza ko yandikishije ibihangano muntu Kanyombya na Sekaganda nk'umutungo we bwite, ko n'icyandikishijwe muri RDB ari filimi ZIRARA ZISHYA atari ibyo bihangano muntu. Urubanza rwakomeje mu mizi, hasuzumwa ibibazo byo Kumenya nyir’uburenganzira burengerwa ku bihangano muntu Kanyombya na Sekaganda, no Kumenya niba MTN yaracuruje ibihangano muntu Kanyombya na Sekaganda nta burenganzira bitangiwe. Ku bijyanye n’indishyi zisabwa na Habyarimana Charles zishingiye ku byo avuga ko MTN yacuruje ibihangano muntu Kanyombya na Sekaganda nta burenganzira bitangiwe, ndetse n’indishyi zisabwa kuri uru rwego, Urukiko rwamenyesheje ababuranyi ko hazabanza gufatwa icyemezo ku bibazo bibiri bimaze kuvugwa. Urukiko rwaciye urubanza rubanziriza urundi, rwemeza ko Habyarimana Charles ariwe nyir’uburenganzira burengerwa n’itegeko ku bihangano muntu Kanyombya na Sekaganda,

Page 3

rwemeza kandi ko MTN yakoresheje ibyo bihangano muntu bya Habyarimana Charles mu bucuruzi buyibyarira inyungu nta burenganzira ibifitiye. Nyuma y’icyo cyemezo, Urukiko rwongeye guhamagara ababuranyi kugira ngo haburanishwe ikibazo cy’indishyi cyari gisigaye. Iburanisha rigitangira, ababuranyi bamenyesheje Urukiko ko bifuza kujya mu buhuza, ndetse bemeranya ku muhuza Prof. Sam Rugege, urukiko rurabyemeza. Prof. Sam Rugege yashyikirije Urukiko raporo y’ubuhuza, ivuga ko Habyarimana Charles na MTN bashoboye kumvikana ku kibazo cy’indishyi, kandi ko impande zombi zasinye amasezerano y’ubwumvikane ku kibazo kirebana n’indishyi. Urukiko rwamenyesheje abari mu rubanza ko rwabonye raporo y’umuhuza ivuga ko impaka bari bafitanye ku ndishyi zakemutse burundu, kandi ko nta gisigaye gusuzumwa. Incamake y’icyemezo:1. Umuntu cyangwa sosiyete icuruza ibihangano muntu mu izina rye bwite no nyungu ze bwite atabiherewe uburenganzira na nyiri bihangano arabiryozwa kuko birengerwa n’itegeko. 2.Ubuhuza busoza urubanza nta yindi mihango, maze hakarangizwa ibikubiye mu masezerano y’ubwumvikane. Urukiko rutegetse ko umwanzuro w’ubuhuza urangizwa uko wanditse. Amategeko yashingiweho: Itegeko N° 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 241, 7°. Imanza zifashishijwe: Urubanza RS/INJUST/RC 00022/2018/SC rwa

Busoro Gervais na Busoro Mugunga Desiré n’abandi, rwaciwe n’Urukiko rw’Ikirenga ku wa 28/06/2019; Urubanza RS/INJUST/RAD 00002/2020/SC rwa Semapondo Charles na Rwasimpenzi Wellars n’abandi, rwaciwe n’Urukiko rw’Ikirenga ku wa 10/12/2021. Urubanza I. IMITERERE Y’URUBANZA [1] Habyarimana Charles yareze MTN Rwandacell Ltd (yitwa MTN muri uru rubanza) mu rukiko rwahoze ari Urukiko rw’Ubucuruzi rwa Nyarugenge, isaba ko yategekwa kumuha indishyi zinyuranye zishingiye ku kuba yarakoresheje mu bucuruzi bwayo buyibyarira inyungu ibihangano muntu bye (personnages fictifs) Kanyombya na Sekaganda, itabiherewe uburenganzira. [2] Yasobanuraga ko ibyo bihangano muntu bigaragara mu gitabo cyitwa BIBLE, mu kindi cyitwa SCENARIO no muri filimi NTAWE UMENYA AHO BWIRA AGEZE, HARANIRA KUBAHO, ZIRARA ZISHYA yanditse akanayobora; ko MTN igendeye ku bwamamare bwabo

Page 4

yubatse icyo yise SERIVISI Y’URWENYA YA Kanyombya na SERIVISI Y’IKINAMICO Sekaganda, inabahindurira imisusire. [3] MTN yatanze inzitizi yo kutakira ikirego, ivuga ko Habyarimana Charles nta bubasha afite bwo kugitanga kuko certificate of registration Nº 16/09/RDB igaragaza ko Société de production audiovisuelle et Multimédia 2a2m ariyo yahawe uburengazira bwo kurengera ibyo bihangano. Mu rubanza RCOM 00999/2017/TC/NYGE rwaciwe ku wa 29/12/2017, Urukiko rw’Ubucuruzi rwa Nyarugenge rwemeje ko ikirego cyatanzwe na Habyarimana Charles kitakiriwe kuko adafite ububasha bwo kugitanga. [4] Habyarimana Charles yajuririye Urukiko Rukuru rw’Ubucuruzi, maze mu rubanza RCOMA 00055/2017/CHC/HCC rwaciwe ku wa 08/03/2018, rwemeza ko afite ububasha bwo kuregera ko abantu bahangano Kanyombya na Sekaganda, bagaragara muri générique za filimi NTAWE UMENYA AHO BWIRA AGEZE, HARANIRA KUBAHO, ZIRARA ZISHYA bakoreshejwe mu bindi bikorwa nta burenganzira bitangiwe, ruvuga ko imikirize y’urubanza rwajuririwe iteshejwe agaciro, ko urubanza rwoherezwa mu Rukiko rw’Ubucuruzi kugira ngo ruruburanishe mu mizi, runategeka MTN kumwishyura 800.000 Frw y’igihembo cy’Avoka. [5] Urubanza rwoherejwe mu Rukiko rw’Ubucuruzi, YELLOWDOT Rwanda Ltd, NETSOLUTIONS Ltd, Kayitankore Ndjoli na Niyitegeka Gratien bagobokeshwa mu rubanza bisabwe na MTN. Mu rubanza RCOM 00731/2019/TC rwaciwe ku wa 04/10/2019, urwo rukiko rwemeje

ko MTN, YELLOWDOT Rwanda Ltd na NETSOLUTIONS Ltd zakoresheje abantu bahangano Kanyombya na Sekaganda, mu rwego rw’ubucuruzi ku buryo buzibyarira inyungu zibifitiye uburenganzira, rutegeka Habyarimana Charles guha MTN 700.000 Frw y’igihembo cy’Avoka. [6] Urwo rukiko rwafashe icyo cyemezo rusobanura ko: a. Muri générique ya filimi ZIRARA ZISHYA hagaragaramo umuntu muhangano witwa Sekaganda,, ufite amazina nyakuri ya NIYITEGEKA Gratien, muri iyo filimi hamwe no muri filimi HARANIRA KUBAHO na NTAWE UMENYA IYO BWIRA AGEZE hagaragaramo umuntu muhangano witwa Kanyombya usanzwe witwa Kayitankore Ndjoli. Ibyo ni ibimenyetso bihamya ko Kayitankore Ndjoli na Niyitegeka Gratien bafatanyije na Habyarimana Charles guhanga abantu bahangano bavuzwe no guhanga filimi bakinnyemo abo bantu bahangano, bakaba bafite uburenganzira bungana n’ubwa Habyarimana Charles kuri abo bantu bahangano bakinnye muri filimi zavuzwe; b. Nubwo Kayitankore Ndjoli na Niyitegeka Gratien baba bari bafitanye amasezerano y’umurimo na Habyarimana Charles mu gihe bakinaga filimi ZIRARA ZISHYA, HARANIRA KUBAHO bitwa Kanyombya na Sekaganda, ntibibambura uburenganzira ku bantu bahangano bakinnye bitwa, keretse amasezerano bagiranye na Habyarimana Charles ababuza ku buryo bweruye gukoresha ayo mazina y’abantu bahangano; c. Kuba Kayitankore Ndjoli na Niyitegeka Gratien barakoze amasezerano agurisha ibihangano byabo by’urwenya/inzenya bahimbye mu mazina y’ibihangano muntu Kanyombya na Sekaganda, bari babifiteho uburenganzira kuko bagurishaga umutungo wabo bwite;

Page 5

d. Kuba MTN, YELLOWDOT Rwanda Ltd na NETSOLUTIONS Ltd baracuruje inzenya zitiriwe abo bantu bahangano Kanyombya na Sekaganda, nta kosa bakoze kuko bari babiherewe uburenganzira na ba nyirabyo Kayitankore Ndjoli na Niyitegeka Gratien, kandi aba bafatanyije na Habyarimana Charles guhanga abantu bahangano bavuzwe. [7] Habyarimana Charles yajuririye Urukiko Rukuru rw’Ubucuruzi. Mu rubanza RCOMA 00876/2019/HCC rwaciwe ku wa 15/01/2021, rwemeza ko ubujurire bwe nta shingiro bufite, rumutegeka guha MTN 1.000.000Frw y’igihembo cy’Avoka na 700.000 Frw y’ikurikiranarubanza. [8] Urwo rukiko rwasobanuye ko Habyarimana Charles yivugira ko ntacyo arega Kayitankore Ndjoli na Niyitegeka Gratien, kandi ko nta kibazo afite ku masezerano bagiranye na YELLOWDOTS Rwanda Ltd na NETSOLUTIONS Ltd kuko yerekeranye n’inzenya zabo bwite, akaba adahakana ibyavuzwe na Kayitankore Ndjoli ko izina Kanyombya ariwe waryihimbiye aryita iyo character yagaragaye muri filimi bakoranye. Urukiko rwavuze ko ntaho rwahera rwemeza ko icyo Habyarimana Charles yise ibihangano muntu bye bya Kanyombya na Sekaganda, (characters) bagaragaye muri filimi ZIRARA ZISHYA, HARANIRA KUBAHO na NTAWE UMENYA IYO BWIRA AGEZE, ari byo bicishwa no ku rubuga rwa MTN. [9] Habyarimana Charles yajuririye Urukiko rw’Ubujurire, urwo Rukiko rwemeza ko ubujurire bwa kabiri yatanze butari mu bubasha bwarwo. Ku wa 18/11/2021, Me Bundogo Innocent,

mu izina rya Habyarimana Charles yandikiye Perezida w’Urukiko rw’Ubujurire, asaba ko urubanza RCOMA 00876/2019/HCC rwaciwe n’Urukiko Rukuru rw’Ubucuruzi ku wa 15/01/2021 rusubirwamo ku mpamvu z’akarengane, nawe amaze kubisuzuma yandikira Perezida w’Urukiko rw’Ikirenga asaba ko urwo rubanza rusubirwamo. Perezida w’Urukiko rw’Ikirenga amaze gusuzuma raporo yashyikirijwe, yemeje ko urubanza rwavuzwe rwongera kuburanishwa, rushyirwa kuri gahunda y’iburanisha yo ku wa 18/01/2023 mu Rukiko rw’Ikirenga. [10] Kuri iyi tariki Urukiko rwahamagaye urubanza rusanga hitabye Habyarimana Charles yunganiwe na Me Bundogo Innocent, MTN ihagarariwe na Me Kabera Jean Claude afatanyije na Me Bizimana Emmanuel, NETSOLUTIONS Ltd ihagarariwe na Me Semadwinga Claude, Niyitegeka Gratien ahagarariwe na Me Uwamahoro Marie Grâce, Kayitankore Ndjoli yitabye ariko adafite Avoka, naho YELLOWDOT Rwanda Ltd ititabye ariko yarahamagawe ahatazwi. Urukiko rushingiye ku kuba Kayitankore Ndjoli nta Avoka afite kandi bitemewe ko umuburanyi aburana imbere y’Urukiko rw’Ikirenga atamufite, rwasubitse iburanisha kugira ngo ahabwe igihe cyo kumushaka, runategeka ko mu iburanisha ry’ubutaha na Niyitegeka Gratien azitaba ubwe na Avoka we. [11] Urubanza rwaburanishijwe mu ruhame ku itariki ya 17/04/2023, Habyarimana Charles yunganiwe na Me Bundogo Innocent, MTN ihagarariwe na Me Kabera Jean Claude afatanyije na Me Bizimana

Emmanuel, NETSOLUTIONS Ltd ihagarariwe na Me Semadwinga Claude, Niyitegeka Gratien yunganiwe na Me Uwamahoro Marie Grâce, Kayitankore Ndjoli yunganiwe na Me Nshimiyimana Moubaraka naho YELLOWDOT Rwanda Ltd ititabye ariko yarahamagawe ahatazwi. [12] Urukiko rwahereye ku nzitizi yatanzwe na Me Semadwinga Claude, mu izina rya NETSOLUTIONS Ltd, avuga ko hashingiwe ku biteganywa n’ingingo ya 55 y’Itegeko N 30/2018

Page 6

ryo ku wa 02/06/2018 rigena ububasha bw’inkiko, ikirego cya Habyarimana Charles kitagombaga kwakirwa kuko nta karengane agaragaza mu kirego cye, rumenyesha ababuranyi ko atari ngombwa kuyisuzuma kuko idashingiye ku mpamvu ndemyagihugu kandi, nk’uko byafashweho umurongo mu manza zinyuranye1, iyo Perezida w’Urukiko rw’Ikirenga yemeje ko urubanza rwongera kuburanishwa, ruburanishwa mu mizi nta zindi nzitizi zitanzwe zatuma urubanza rutaburanishwa mu mizi uretse inzitizi ndemyagihugu. [13] Nyuma yo gufata icyo cyemezo, urubanza rwakomeje mu mizi. Ibibazo byaburanyweho ni ibi bikurikira: a. Kumenya nyir’uburenganzira burengerwa ku bihangano muntu Kanyombya na Sekaganda; b. Kumenya niba MTN yaracuruje ibihangano muntu Kanyombya na Sekaganda nta burenganzira bitangiwe. Ku bijyanye n’indishyi zisabwa na Habyarimana Charles zishingiye ku byo avuga ko MTN yacuruje ibihangano muntu Kanyombya na Sekaganda nta burenganzira bitangiwe, ndetse n’indishyi zisabwa kuri uru rwego, Urukiko rwamenyesheje ababuranyi ko hazabanza gufatwa icyemezo ku bibazo bibiri bimaze kuvugwa. [14] Ku wa 23/06/2023, Urukiko rwaciye urubanza rubanziriza urundi, rwemeza ko: a. Habyarimana Charles ariwe nyir’uburenganzira burengerwa n’itegeko ku bihangano muntu Kanyombya na Sekaganda; b. MTN yakoresheje ibyo bihangano muntu bya Habyarimana Charles mu bucuruzi buyibyarira inyungu nta burenganzira ibifitiye. [15] Nyuma

y’icyo cyemezo, Urukiko rwongeye guhamagara ababuranyi kugira ngo haburanishwe ikibazo cy’indishyi cyari gisigaye. Ku wa 17/10/2023, bose baritabye, Habyarimana Charles yunganiwe na Me Bundogo Innocent, MTN ihagarariwe na Me Kabera Jean Claude, NETSOLUTIONS Ltd ihagarariwe na Me Semadwinga Claude, Niyitegeka Gratien ahagarariwe na Me Uwamahoro Marie Grâce, Kayitankore Ndjoli yunganiwe na Me Karangwa Olivier, naho YELLOWDOT Rwanda Ltd ititabye ariko yarahamagawe ahatazwi. [16] Iburanisha rigitangira, ababuranyi bamenyesheje Urukiko ko bifuza kujya mu buhuza, ndetse bemeranya ku muhuza Prof. Sam Rugege. [17] Nyuma yo kumva ibyifuzo by’ababuranyi, Urukiko rwemeje ko iburanisha ry’uru rubanza risubitswe, ababuranyi bakajya mu buhuza. Rwemeje kandi ko Prof. Sam Rugege ari we muhuza muri uru rubanza hagati ya Habyarimana Charles na MTN, ko agomba gutanga raporo y’ubuhuza bitarenze ku wa 31/12/2023. [18] Ku wa 29/12/2023, Prof. Sam Rugege yashyikirije Urukiko raporo y’ubuhuza yakozwe kuri iyo tariki, ivuga ko Habyarimana Charles na MTN bashoboye kumvikana ku kibazo

1 Urubanza RS/INJUST/RC 00022/2018/SC hagati ya Busoro Gervais na Busoro Mugunga Desiré n’abandi, rwaciwe n’Urukiko rw’Ikirenga ku wa 28/06/2019, igika cya 18; n’urubanza RS/INJUST/RAD 00002/2020/SC hagati ya Semapondo Charles na Rwasimpenzi Wellars n’abandi, rwaciwe n’Urukiko rw’Ikirenga ku wa 10/12/2021.

Page 7

cy’indishyi, ku buryo ku wa 28/12/2023, basinye amasezerano y’ubwumvikane mu rubanza RS/INJUST/RCOM 00002/2022/SC ku kibazo kirebana n’indishyi. [19] Iburanisha ryo kwemeza umwanzuro w’ubuhuza ryabaye ku wa 05/03/2024, abari mu rubanza bose bitabye, Habyarimana Charles yunganiwe na Me Bundogo Innocent, MTN ihagarariwe na Me Kabera Jean Claude, Niyitegeka Gratien ahagarariwe na Me Uwamahoro Marie Grâce, Kayitankore Ndjoli yunganiwe na Me Kagabo Théoneste, naho NETSOLUTIONS Ltd na YELLOWDOT Rwanda Ltd zititabye ariko zarahamagawe mu buryo bukurikije amategeko. Urukiko rwamenyesheje abari mu rubanza ko rwabonye raporo y’umuhuza ivuga ko impaka bari bafitanye ku ndishyi zakemutse burundu, kandi ko nta gisigaye gusuzumwa. II. IKIBAZO KIGIZE URUBANZA N’ISESENGURA RYACYO Kumenya niba Umwanzuro w’ubuhuza wakwemezwa  [20] Hashingiwe kuri raporo y’ubuhuza yo ku wa 29/12/2023 ivuga ko Habyarimana Charles na MTN bumvikanye ku kibazo cy’indishyi cyari gisigaye gusuzumwa muri uru rubanza, Urukiko rurasanga uru rubanza rugomba gusozwa nta yindi mihango, bityo hakazarangizwa ibikubiye mu masezerano y’ubwumvikane Habyarimana Charles na MTN bagiranye ku wa 28/12/2023, nk’uko biteganywa n’ingingo ya 241, 7° y’Itegeko N° 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, iteganya ko inyandiko y’ubwumvikane iriho umukono w’impande zombi n’ubwunzi byakorewe hanze y’urukiko ari inyandikompesha. III. ICYEMEZO CY’URUKIKO [21] Rwemeje ko ikibazo cy’indishyi cyari gisigaye gusuzumwa mu rubanza RS/INJUST/RCOM 000002/2021/SC, gikemuwe nk’uko Habyarimana Charles na MTN Rwandacell Ltd babyemeranyijweho mu masezerano bagiranye. [22] Rutegetse ko umwanzuro w’ubuhuza urangizwa uko wanditse.