KALISA N’UNDI v. MODERN TRUCKERS Ltd N’UNDI

# KALISA N’UNDI v. MODERN TRUCKERS Ltd N’UNDI

- Source: Amategeko - Section: Decisions (Judgements) - Date: 2025-05-29 - Case/document no.: RCOMAA 00060/2024/CA - Collection: Court of Appeal

## Text

## Page 1

KALISA N’UNDI v. MODERN TRUCKERS Ltd N’UNDI [Rwanda URUKIKO RW’UBUJURIRE – RCOMAA 00060/2024/CA, (Ngagi, P.J.,) 29 Gicurasi 2025] Amategeko agenga imiburanishirize y’imanza z’ubucuruzi – Ukureka urubanza – Nta cyabuza umuburanyi kwemererwa ukureka urubanza yaburanaga, iyo bigaragara ko yitabye Urukiko avuga ko abyemera. Incamake y’ikibazo: Sosiyete SIMACO Ltd na Kalisa Jérémie nyiri sosiyete AFRIFOAM bavuga ko bari basanzwe bafitanye amasezerano y’imikoranire na sosiyete MODERN COAST BUILDERS AND CONTRACTORS Ltd, aho iyi yagombaga kujya izana ibicuruzwa bya SIMACO Ltd ibikuye Mombasa ibyinjiza mu Rwanda. Nyuma yaho, sosiyete MODERN COAST BUILDERS AND CONTRACTORS yaje gufatira ibicuruzwa byayo bifite agaciro k’amadolari y’Amerika ibihumbi mirongo itatu na bitanu na magana atatu na mirongo irindwi n’atandatu n’ibice mirongo itanu na bitandatu (35,376.56 USD), ivuga ko iyifitiye umwenda w’amadolari y’Amerika ibihumbi ijana na birindwi na magana acyenda mirongo itatu na rimwe n’ibice mirongo icyenda (107,931.90 USD), ukomoka ku bindi bikorwa by’ubwikorezi yayikoreye mbere. SIMACO Ltd na Kalisa Jérémie nyiri AFRIFOAM bareze sosiyete MODERN TRUCKERS Ltd na MODERN COAST BUILDERS AND CONTRACTORS Ltd mu Rukiko rw’Ubucuruzi, kuko izi sosiyete ebyiri zikorana, barusaba kubategeka kurekura no kubashikiriza kontineri zabo bafatiriye binyuranyije n’amategeko. Urukiko rw’Ubucuruzi rwemeje ko ikirego cyatanzwe na SIMACO Ltd na Kalisa Jérémie nyiri AFRIFOAM kitakiriwe. SIMACO Ltd na Kalisa Jérémie nyiri AFRIFOAM bajuririye urwo rubanza mu Rukiko Rukuru rw’Ubucuruzi, bavuga ko Urukiko rw’Ubucuruzi rwagombaga kwakira ikirego cyabo. Urukiko Rukuru rw’Ubucuruzi rwemeje ko: -Ubujurire bwa SIMACO Ltd na Kalisa Jérémie nyiri AFRIFOAM bufite ishingiro kuri bimwe; -Ikirego cyatanzwe mu rwego rwa mbere na SIMACO Ltd na Kalisa Jérémie (nyiri AFRIFOAM), cyagombaga kwakirwa gusa ku bijyanye n’ikibazo cyarebaga SIMACO Ltd na MODERN TRUCKERS Ltd, kijyanye n’uko Urukiko rwategeka MODERN TRUCKERS Ltd gusubiza SIMACO Ltd kontineri zayo 3; -Imikirize y’urubanza RCOM 01153/2022/TC iteshejwe agaciro gusa ku bijyanye gusa no kutakira ikibazo cyarebaga SIMACO Ltd na MODERN TRUCKERS Ltd, maze uru rubanza rukoherezwa Urukiko rw’Ubucuruzi, rukaruburanisha gusa ku bijyanye n’icyo kibazo. Kalisa Jérémie na sosiyete SIMACO Ltd bajuririye urwo rubanza mu Rukiko rw’Ubujurire. Uwo munsi Kalisa Jérémie n’umwunganira bamenyesha Urukiko ko baretse urubanza muri uru Rukiko.

## Page 2

Uhagarariye MODERN COAST BUILDERS AND CONTRACTORS Ltd avuga ko bemera ukureka rubanza kwa Kalisa Jérémie na SIMACO Ltd, ariko ko uwo ahagarariye asaba miliyoni ibyeri n’ibihumbi magana atandatu (2,600,000Frw) y’igihembo cya Avoka n’ikurikiranarubanza nk’uko yayasabye mu myanzuro. Incamake y’icyemezo: Nta cyabuza umuburanyi kwemererwa ukureka urubanza yaburanaga, iyo bigaragara ko yitabye Urukiko avuga ko abyemera. Urukiko rwemeye ukureka urubanza byasabwe na Kalisa Jérémie nyiri AFRIFOAM na SIMACO Ltd. Amategeko yashingiweho: Itegeko N⁰ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 123 niya 124. Nta manza zifashishijwe. Urubanza I. IMITERERE Y’URUBANZA [1] SIMACO Ltd na Kalisa Jérémie nyiri AFRIFOAM bavuga ko SIMACO Ltd yari isanzwe ifitanye na MODERN COAST BUILDERS AND CONTRACTORS Ltd amasezerano y’imikoranire, aho iyi yagombaga kujya izana ibicuruzwa bya SIMACO Ltd ibikuye Mombasa, ko ariko yaje gufatira ibicuruzwa byayo bifite agaciro k’amadolari y’Amerika ibihumbi mirongo itatu na bitanu na magana atatu na mirongo irindwi n’atandatu n’ibice mirongo itanu na bitandatu (35,376.56 USD), aho kugira ngo ibipakire inabigeze kuri SIMACO Ltd, ishingiye ku kuba ngo iyifitiye umwenda w’amadolari y’Amerika ibihumbi ijana na birindwi na magana acyenda mirongo itatu na rimwe n’ibice mirongo icyenda (107,931.90 USD), ukomoka ku bindi bikorwa by’ubwikorezi yayikoreye mbere. SIMACO Ltd ikavuga ko nta mwenda ifitiye MODERN COAST BUILDERS AND CONTRACTORS Ltd. [2] SIMACO Ltd na Kalisa Jérémie nyiri AFRIFOAM bareze MODERN TRUCKERS Ltd na MODERN COAST BUILDERS AND CONTRACTORS Ltd mu Rukiko rw’Ubucuruzi, barusaba gutegeka MODERN TRUCKERS Ltd kurekura kontineri za SIMACO Ltd yafatiriye binyuranyije n’amategeko no gutegeka MODERN COAST BUILDERS AND CONTRACTORS Ltd gushyikiriza AFRIFOAM kontineri zayo. Basobanuye ko MODERN TRUCKERS Ltd na MODERN COAST BUILDERS AND CONTRACTORS Ltd ari sosiyete z’umuntu umwe, akaba yarazikoreshaga mu bikorwa bihura, ko baziregeye hamwe kuko MODERN COAST BUILDERS AND CONTRACTORS Ltd ari yo yari ihagarariye MODERN TRUCKERS Ltd, ikaba kandi inafite icyicaro mu Rwanda, ndetse ari na yo yakiraga amafaranga akagera kuri MODERN TRUCKERS Ltd, kuko MODERN TRUCKERS Ltd yo ari sosiyete y’inyamahanga, kandi ko zidakwiye gutandukanywa kubera ko imwe ikorera indi. Urwo rubanza rwaburanishijwe MODERN TRUCKERS Ltd na COAST BUILDERS AND CONTRACTORS Ltd zidahari.

## Page 3

[3] Mu rubanza RCOM 01153/2022/TC rwaciwe n’Urukiko rw’Ubucuruzi ku wa 29/06/2023, urwo Rukiko rushingiye ku ngingo ya 6 n’iya 14 z’itegeko N˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano,iz’ubucuruzi, iz’umurimo n’iz’ubutegetsi, ku ngingo ya 106 y’Itegeko N˚ 15/2004 ryo ku wa 12/06/2004 ryerekeye ibimenyetso mu manza n’itangwa ryabyo ryubahirizwaga icyo gihe, rwemeje ko ikirego cyatanzwe na SIMACO Ltd na KALISA Jérémie nyiri AFRIFOAM kitakiriwe, kandi ko ingwate y’amagarama ingana n’amafaranga ibihumbi mirongo ine (40.000 Frw) SIMACO Ltd na Kalisa Jérémie nyiri AFRIFOAM batanze barega, iguma mu Isanduku ya Leta kuko ihwanye n’ibyakozwe muri urwo rubanza. [4] SIMACO Ltd na Kalisa Jérémie nyiri AFRIFOAM bajuririye urwo rubanza mu Rukiko Rukuru rw’Ubucuruzi, bavuga ko Urukiko rw’Ubucuruzi rwagombaga kwakira ikirego cyabo. Basoje basaba amafaranga y’ikurikiranarubanza n’igihembo cya Avoka. [5] MODERN COAST BUILDERS AND CONTRACTORS Ltd yireguye ivuga ko icyo kirego kitagombaga kwakirwa koko, MODERN TRUCKERS Ltd yo ikaba itaritabye Urukiko kandi yaramenyeshejwe umunsi w’iburanisha, ndetse itarakoze n’imyanzuro yo kwiregura, bityo bisabwe na SIMACO Ltd na KALISA Jérémie urubanza ruburanishwa idahari. [6] Mu rubanza RCOMA 00394/2023/HCC rwaciwe n’Urukiko Rukuru rw’Ubucuruzi ku wa 25/07/2024, urwo Rukiko rushingiye ku ngingo ya 14 no ku ngingo ya 158, igika cya 2 z’Itegeko N˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, rwemeje ko: - Ubujurire bwa SIMACO Ltd na Kalisa Jérémie nyiri AFRIFOAM bufite ishingiro kuri bimwe; - Ikirego cyatanzwe mu rwego rwa mbere na SIMACO Ltd na Kalisa Jérémie (nyiri AFRIFOAM), cyagombaga kwakirwa gusa ku bijyanye n’ikibazo cyarebaga SIMACO Ltd na MODERN TRUCKERS Ltd, kijyanye n’uko Urukiko rwategeka MODERN TRUCKERS Ltd gusubiza SIMACO Ltd kontineri zayo 3; - Imikirize y’urubanza RCOM 01153/2022/TC iteshejwe agaciro gusa ku bijyanye gusa no kutakira ikibazo cyarebaga SIMACO Ltd na MODERN TRUCKERS Ltd, uru rubanza rukoherezwa Urukiko rw’Ubucuruzi, rukaruburanisha gusa ku bijyanye n’icyo kibazo; - Kalisa Jérémie nyiri AFRIFOAM agomba kwishyura MODERN COAST BUILDERS AND CONTRACTORS, amafaranga ibihumbi magana atanu (500,000 Frw) y’igihembo cya Avoka. [7] Kalisa Jérémie nyiri AFRIFOAM na SIMACO Ltd bajuririye urwo rubanza mu Rukiko rw’Ubujurire, ubujurire bwabo bwandikwa kuri RCOMAA 00060/2024/CA. Urubanza rwahamagajwe ku wa 10/03/2025, rwimurwa ku wa 13/05/2025, kugira ngo MODERN TRUCKERS Ltd ihamagazwe kuri e-mail yayo info@modern.co.ke, kuri iyo tariki nabwo rwimurirwa ku wa 27/05/2025, kugira ngo Me Ndahimana Jean Bosco abashe gutegura urubanza. Ku wa 27/05/2025, urubanza ruburanishwa mu ruhame Kalisa Jérémie nyiri AFRIFOAM yunganiwe na Me Ndahimana Jean Bosco, SIMACO Ltd ihagarariwe na Kalisa Jérémie yunganiwe na Me Ndahimana Jean Bosco, MODERN COAST BUILDERS AND CONTRACTORS ihagarariwe na Me Nsengiyumva Abel, naho MODERN TRUCKERS Ltd

## Page 4

ititabye, Urukiko rufata icyemezo cyo kuburanisha urubanza idahari, urubanza ruciwe rukazafatwa nk’aho ababuranyi bose bari bahari. Uwo munsi Kalisa Jérémie n’umwunganira bamenyesha Urukiko ko baretse urubanza. II.IBIBAZO BIGIZE URUBANZA N’ISESENGURWA RYABYO 1.Kumenya niba Kalisa Jérémie nyiri AFRIFOAM na SIMACO Ltd bakwemererwa kureka urubanza [8] Kalisa Jérémie n’umwunganira bavuga ko Kalisa Jérémie na SIMACO Ltd baretse urubanza RCOMAA 00060/2024/CA bari bajuririye muri uru Rukiko. [9] Uhagarariye MODERN COAST BUILDERS AND CONTRACTORS Ltd avuga ko bemera ukureka rubanza kwa Kalisa Jérémie na SIMACO Ltd, ariko ko uwo ahagarariye asaba miliyoni ibyeri n’ibihumbi magana atandatu (2,600,000Frw) y’igihembo cya Avoka n’ikurikiranarubanza nk’uko yayasabye mu myanzuro. UKO URUKIKO RUBIBONA [10] Ingingo ya 123, igika cya mbere, y’Itegeko N⁰ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibikurikira: “Kureka urubanza ni uburenganzira umuburanyi afite bwo kuvuga ko aretse urubanza yari yaregeye, uwo yaregaga akabyemera”. [11] Nk’uko byibukijwe haruguru, mu iburanisha ryo ku wa 27/05/2025, Kalisa Jérémie na SIMACO Ltd bavuze ko baretse urubanza RCOMAA 00060/2024/CA bari bajuririye muri uru Rukiko; uhagarariye MODERN COAST BUILDERS AND CONTRACTORS Ltd nawe avuga ko bemeye ukureka urubanza kwa SIMACO Ltd na Kalisa Jérémie nyiri AFRIFOAM. [12] Hashingiwe ku biteganywa n’ingingo ya 123 y’Itegeko N⁰ 22/2018 ryo ku wa 29/04/2018 yibukijwe haruguru, Urukiko rurasanga nta cyabuza Kalisa Jérémie nyiri AFRIFOAM na SIMACO Ltd kwemererwa ukureka urubanza RCOMAA 00060/2024/CA baburanaga mu Rukiko rw’Ubujurire, cyane ko MODERN COAST BUILDERS AND CONTRACTORS Ltd yitabye Urukiko ivuga ko ibyemera. 2.Kumenya niba MODERN COAST BUILDERS AND CONTRACTORS Ltd yagenerwa amafaranga y’igihembo cya Avoka n’ikurikiranarubanza isaba [13] MODERN COAST BUILDERS AND CONTRACTORS Ltd isaba guhabwa miliyoni ibyeri n’ibihumbi magana atandatu (2,600,000 Frw) y’igihembo cya Avoka n’ikurikiranarubanza. [14] Kalisa Jérémie nyiri AFRIFOAM na SIMACO Ltd bavuga ko amafaranga y’igihembo cya Avoka n’ikurikiranarubanza MODERN COAST BUILDERS AND CONTRACTORS Ltd isaba itagombaga kuyahabwa, cyane ko nabo batakaje amafaranga menshi kuva uru rubanza rwatangira ku rwego rwa mbere. UKO URUKIKO RUBIBONA

## Page 5

[15] Ingingo ya 124, igika cya kabiri, y’Itegeko N 22/2018 ryo ku wa 29/04/2018 ryibukijwe haruguru, iteganya ibikurikira: “Uretse ikirego cyangwa urubanza ashobora gucibwa amafaranga y’amagarama cyangwa igihembo cya Avoka n’andi yose yatanzwe n’uwo yari yareze mu gukurikirana urubanza”. [16] Urukiko rushingiye ku ngingo ya 124 y’Itegeko N 22/2018 ryo ku wa 29/04/2018 yibukijwe haruguru, rurasanga kuba Kalisa Jérémie nyiri AFRIFOAM na SIMACO Ltd barajuririye uru Rukiko byaratumye MODERN COAST BUILDERS AND CONTRACTORS Ltd ishaka Avoka wo kuyihagararira, bityo mu bushishozi bw’Urukiko igomba guhabwa amafaranga ibihumbi magana atanu (500,000 Frw) y’igihembo cya Avoka cyane ko ari nawe wakurikiranye uru rubanza. Akaba agomba gutangwa na Kalisa Jérémie nyiri AFRIFOAM na SIMACO Ltd bafatanyije. III. ICYEMEZO CY’URUKIKO [17] Rwemeye ukureka urubanza byasabwe na Kalisa Jérémie nyiri AFRIFOAM na SIMACO Ltd. [18] Rutegetse Kalisa Jérémie nyiri AFRIFOAM na SIMACO Ltd gufatanya kwishyura MODERN COAST BUILDERS AND CONTRACTORS Ltd amafaranga ibihumbi magana atanu (500.000 Frw) y’igihembo cya Avoka. [19] Ruvuze ko ingwate y’amagarama yatanzwe ihwanye n’ibyakozwe mu rubanza.