LETA Y’U RWANDA v. KARANGWA N’ABANDI

LETA Y’U RWANDA v. KARANGWA N’ABANDI

- Source: Amategeko - Section: Decisions (Judgements) - Date: 2010-09-17 - Case/document no.: RADA 0001/09/CS - Collection: Supreme Court

Text

Page 1

LETA Y’U RWANDA v. KARANGWA N’ABANDI [Rwanda URUKIKO RW’IKIRENGA – RADA 0001/09/CS (Mukanyundo, P.J., Kanyange na Munyangeri Ngango, J.) 17 Nzeri, 2010] Amategeko agenga imiburanyishirize y’imanza z’ubutegetsi – Gutambamira urubanza – Inzira yo gutambamira urubanza rwaciwe n’Urukiko rw’Ikirenga irazitiye. Incamake y’ikibazo: Nyuma y’uko Urukiko rw’Ikirenga rutegetse ELECTROGAZ guha Karangwa amafaranga 207.976.000 Frw z’indishyi m’urubanza RADA 0005/08/CS, Leta y’u Rwanda ya tambamiye urwo rubanza ivuga ko ELECTROGAZ ni kigo cyayo ishakira ingingo y’imali yaciwe indishyi zivuzwe haruguru itagararijwe ko hari igihombo yateje sosiyete ya Karangwa. Karagwa yatanze inzitizi y’ukutakira ikirego kitambamira urubanza RADA 0005/08/CS. Kubera ka itegeko rigena ububasha bw’Urukiko rw’Ikirenga, itemera inzira yo gutambamira urubanza rwaciwe n’urwo rukiko. Leta y’u Rwanda ikavuga ko icyo iryo Itegeko rivuga nukbuza abantu babaye ababuranyi mu rubanza kurutambamira kandi nyamara Leta y’u Rwanda yo itarigeze ihagararirwa mu rubanza rutambamirwa. Incamake y’icyemezo: Inzira yo gutambamira urubanza rwaciwe n’Urukiko rw’Ikirenga itemewe. Ikirego gitambamira urubanza RADA 0005/08/CS rwaciwe n’Urukiko rw’Ikirenga kitakiriwe kuko kinyuranije n’ibyo amategeko ateganya. Amagarama y’urubanza aherera ku Isanduku ya Leta. Amategeko yashingiweho: y’Itegeko Ngenga n° 01/2004 ryo kuwa 29/01/2004 2004

rigena imitunganyirize, imikorere n’ububasha by’Urukiko rw’Ikirenga, ingingo ya 84. Imanza zifashishizwe: Khalid v. Ahmed ABDULATIF RC 0002/09/CS, rwaciwe n’Urukiko rw’Ikirenga kuwa19/03/2010. Uwigabire v. Rusekerampunzi n’abandi , RCOM 0010/09/CS rwaciwe 30/04/2010 Urubanza I. IMITERERE Y’URUBANZA MURI MAKE [1] Uru rubanza rukomoka ku masezerano ELECTROGAZ yagiranye na KARANGWA Eugène yo kumuha transformateur ya 400 KVA yo gukoresha mu ruganda rwe rwitwa FIDECAR. [2] ELECTROGAZ yaje kwisubiza ya transformateur ya 400 KVA iyisimbuza iya 50 KVA, yandika ko ikenewe byihutirwa ariko izabasubiza indi nka yo nibaramutse batangiye imirimo y’uruganda iteganyijwe.

Page 2

[3] ELECTROGAZ yaje gusubiza KARANGWA ya transformateur ariko akomeza kuburana indishyi mu Rukiko Rukuru rwa Repubulika. Mu rubanza RADA 0005/08/CS, urwo rukiko rwemeje ko KARANGWA atsinzwe, ajurira mu Rukiko rw’Ikirenga, maze rutegeka ELECTROGAZ kumuha 207.976.000 frw y’indishyi. [4] Leta y’u Rwanda, ihagarariwe n’Intumwa Nkuru yayo yungirije, yatambamiye urubanza RADA 0005/08/CS kubera ko ELECTROGAZ ari ikigo cya Leta, ishakira ingengo y’imali, ikaba yaraciwe indishyi zingana na 207. 976.000 frw, nyamara itagaragarijwe ko hari igihombo yateje Sosiyete FIDECAR ya KARANGWA Eugène. [5] Mu myanzuro isubiza, Me BATWARE Jean Claude uburanira KARANGWA avuga ko asanga mbere yo kuburanisha urubanza mu mizi yarwo, habanza gusuzumwa ibyerekeranye n’iyakirwa ry’ikirego cyatanzwe na Leta y’u Rwanda. [6] Iburanisha ry’urubanza ryabaye kuwa 05/08/2010, hasuzumwa gusa ikibazo cy’iyakirwa ry’ikirego. II. ISESENGURA RY’IKIBAZO CYASUZUMWE Iyakirwa ry’ikirego cya Leta y’u Rwanda gitambamira urubanza RADA 0005/08/CS. [7] Uburanira KARANGWA avuga ko ikirego cya Leta y’u Rwanda gitambamira urubanza kidakwiye kwakirwa, kubera ko ingingo ya 84 y’Itegeko Ngenga n° 01/2004 ryo kuwa 29/01/2004 rigena imitunganyirize, imikorere n’ububasha by’Urukiko rw’Ikirenga nk’uko ryahinduwe kandi rikuzuzwa kugeza ubu, itemera inzira yo gutambamira urubanza rwaciwe n’Urukiko rw’ Ikirenga. [8] Intumwa Nkuru ya Leta

yungirije yo ivuga ko ikirego cya Leta y’u Rwanda gitambamira urubanza RADA 0005/08/CS gishobora kwakirwa ngo kubera ko icyo ingingo ya 84 y’Itegeko Ngenga n° 01/2004 ryo kuwa 29/01/2004 2004 rigena imitunganyirize, imikorere n’ububasha by’Urukiko rw’Ikirenga ibuza ari uko abantu babaye ababuranyi mu rubanza barutambamira, nyamara Leta y’u Rwanda yo itarigeze ihagararirwa mu rubanza rutambamirwa, ko interprétation itangwa na Me BATWARE kuri iyi ngingo batayihuje. [9] Uburanira ELECTROGAZ avuga ko iby’uko ingingo ya 84 y’Itegeko Ngenga n° 01/2004 ryo kuwa 29/01/2004 ryavuzwe itemera ko uru rubanza rutambamirwa mu Rukiko rw’Ikirenga, nk’uko Me BATWARE abisobanura nta kindi yabivugaho, ahubwo ko Urukiko rwazabisuzuma. Mu rwego rw’amategeko, ingingo ya 84 y’Itegeko Ngenga n° 01/2004 ryo kuwa 29/01/2004 ryavuzwe haruguru igira iti : bitabangamiye uburyo buteganyijwe n’amategeko bwo gusubirishamo urubanza rwaciwe burundu, urubanza rwaciwe n’Urukiko rw’Ikirenga ntirushobora kongera kuburanishwa…. [10] Urukiko rurasanga ingingo y’Itegeko Ngenga ivuzwe haruguru isobanura neza ko izindi nzira zose zigamije gusaba ko urubanza rwaciwe n’Urukiko rw’Ikirenga rwongera kuburanishwa zizitiye uretse iyo gusubirishamo urubanza rwaciwe burundu ingingo nshya yonyine yemewe, ibyo kandi bikaba bihura n’umurongo wafashwe n’uru Rukiko mu manza zabanjirije uru ( RC 0002/09/CS rwaciwe kuwa 19/03/2010 hamwe na RCOM 0010/09/CS rwaciwe 30/04/2010 ) zemeje ko inzira yo gutambamira urubanza mu Rukiko rw’Ikirenga itemewe. [11] Hashingiwe ku bisobanuro bitanzwe haruguru, Urukiko rurasanga ikirego gitambamira urubanza cya Leta y’u Rwanda kitagomba kwakirwa kuko cyatanzwe mu buryo bunyuranije n’amaitegeko.

Page 3

III. ICYEMEZO CY’URUKIKO [12] Rwemeje ko ikirego cya Leta y’u Rwanda gitambamira urubanza RADA 0005/08/CS kitakiriwe kuko kinyuranije n’ibyo amategeko ateganya. [13] Ruvuze ko amagarama y’uru rubanza aherera ku Isanduku ya Leta.