MINSIRAGWIRA vs. URUGAGA RW’ABAVOKA MU RWANDA

# MINSIRAGWIRA vs. URUGAGA RW’ABAVOKA MU RWANDA

- Source: Amategeko - Section: Decisions (Judgements) - Date: 2023-11-16 - Case/document no.: RAD 00006/2023/HC/KIG - Collection: High Court

## Text

## Page 1

MINSIRAGWIRA vs. URUGAGA RW’ABAVOKA MU RWANDA [Rwanda URUKIKO RUKURU – RAD 00006/2023/HC/KIG – (Kamanzi, J. P.) 16 Ugushyingo 2023] Amategeko agenga imanza z’ubutegetsi – Itangwa ry’ibihano – Igabanywa ry’igihano cyatanzwe – Urukiko rushobora kugabanya igihano impamvu z’ubujurire zitahawe ishingiro, hagamijwe gutanga igihano gihwanye n’uburemere bw’ikosa kabone n’ubwo iby’igihano byaba bitaburanyweho. Incamake y’ikibazo: Minsiragwira yibukijwe n’Urugaga rw’Abavoka mu Rwanda gutanga igice cya kabiri cy’umusanzu w’umwaka wa 2023 ntiyagitanga ku gihe ntarengwa yari yahawe ndetse ntiyasaba Ubuyobozi bw’Urugaga ngo rumwongerere igihe bituma Komisiyo y’imyitwarire imufatira igihano cyo guhagarikwa gukora umwuga w’ubwavoka mu gihe cy’amezi atandatu. Ibi byatumye atanga ikirego muri uru Rukiko asaba gukurirwaho icyo cyemezo kimuhagarika. Mu myanzuro ye yashyikirije urukiko, Urega avuga ko yishyuye uwo musanzu akererewe kubera ibibazo by’uburwayi bw’umugore we yagize, akaba yari yabimenyesheje Urugaga bityo, akaba asaba uru Rukiko kumurenganura dore ko ibyo asabwa byose yabyishyuye nubwo umugore we yakomeje kumererwa nabi. Urugaga rw’Abavoka mu Rwanda ruvuga ko Urega yahawe igihe ntarengwa cyo kuba yishyuye uwo musanzu wasabwaga ariko ntiyacyubahirije, nta nubwo yasabye kongererwa igihe niba yarahuye n’inzitizi nkuko n’abandi basanzwe babigenza iyo bahuye n’imbogamizi, akaba ariyo mpamvu yafatiwe ibihano na Komisiyo ishinzwe imyitwarire y’abavoka. Ariko mbere yo gufatirwa ibyo bihano Komisiyo yaramuhamagaye kimwe n’abandi batari batanze uwo musanzu ariko ntiyitabye ahubwo yanditse ibaruwa bayakira kuri uwo munsi yagombaga kwitabiraho ifite umutwe w’amagambo uvuga ngo kutitabira ubutumire bw’inteko ya komisiyo ishinzwe imyitwarire no kwisobanura impamvu yo gutinda gutanga umusanzu. Incamake y’icyemezo: Urukiko rushobora kugabanya igihano impamvu z’ubujurire zitahawe ishingiro, hagamijwe gutanga igihano gihwanye n’uburemere bw’ikosa kabone n’ubwo iby’igihano byaba bitaburanyweho. Ikirego cy’ubujurire nta shingiro gifite. Amategeko yashingiweho: Itegeko N°30/2018 ryo ku wa 02/06/2018 rigena ububasha bw’inkiko, ingingo ya 49. Itegeko No 22/2018 ryo ku wa 29/04/2018 ryerekeye imiburanishirize y'imanza z'imbonezamubano, iz'ubucuruzi, iz'umurimo n'iz'ubutegetsi, ingingo ya 12. Itegeko No 83/2013 ryo kuwa 11/09/2013 rishyiraho urugaga rw’abavoka mu Rwanda, ingingo ya 52. Itegeko No15/2004 ryo kuwa 12/06/2004 ryerekeye ibimenyetso mu manza n’itangwa ryabyo, ingingo ya 4. Imanza zifashishijwe: RPAA 00194/2021/CA, Ubushinjacyaha na Ndayishimiye Emmanuel alias Shema rwaciwe n’Urukiko rw’Ubujurire ku wa 22/07/2022. RPAA 00069/2021/CA, Ubushinjacyaha na Nyiranzeyimana Odette rwaciwe n’Urukiko rw’Ubujurire ku wa 28/07/2022.

## Page 2

RPAA 00039/2021/CA, Ubushinjacyaha na Shakabatenda Jean de Dieu rwaciwe n’Urukiko rw’Ubujurire ku wa 02/07/2021.

I. IMITERERE Y’URUBANZA [1] Ku itariki ya 12/05/2023, Abavoka bose bari batarishyura bohererejwe ubutumwa bubibutsa kwishyura igice cya 2 cy’umusanzu w’Urugaga wa 2023. Itariki ntarengwa yo kuwishyura ikaba yari 31/05/2023. Igihe ntaregwa cyageze Me Minsiragwira Assumani atarishyura umusanzu wagenwe ndetse akaba atarandikiye Umukuru w’Urugaga rw’Abavoka ngo amusabe kongererwa igihe cyo kwishyura umusanzu, Komisiyo ishinzwe imyitwarire y’Abavoka ifata icyemezo cyo kumuhanisha igihe cy’amezi 6 adakora umwuga w’ubwavoka Me Minsiragwira Assumani ntiyishimira icyemezo yafatiwe aregera uru rukiko asaba ko cyavanwaho uru rubanza rutangira gutyo. [2] Muri uru rubanza harasuzumwa ibibazo bikurikira: II. ISESENGURA RY’IBIBAZO BIGIZE URUBANZA 1. Kubirebana no kumenya niba Me Minsiragwira Assumani atari akwiye guhanwa na Komisiyo ishinzwe imyitwarire y’Abavoka bitewe n’ibibazo byamubayeho [3] Me Minsiragwira Assumani mu mwanzuro yashikirije urukiko no mw’iburanisha avuga ko Komisiyo Ishinwe Imyiwarire y’Abavoka mu Rwanda yafashe icyemezo cyo kuwa 14/07/2023 kimuhagarika mu mwuga w’abavoka mu gihe cy’amezi atandatu (6 mois), abimenyeshwa kuwa 31/07/2023 n’Umunyamabanga w’Urugaga rw’Abavoka mu Rwanda. Komisiyo ivuga ko, atubahirije ishingano z’abavoka zijyanye no gutanga umusanzu wagenwe ivuga ko atitabye. [4] Me Minsiragwira Assumani avuga ko Umusanzu yawishyuye igihe cyararenze ku mpamvu yamenyesheje urugaga zirimo kuba yari afite umurwayi, umugore we bashakanye byemewe n’amategeko yararwaye bikomeye, inda yagiye hanze ya Nyababyeyi (trompe), akomeza kuremba, nyuma muganga afata icyemezo cyo kurokora umubyeyi bavanamo umwana upfuye, bajya kumushingura, nk’uko bigaragazwa n’impapuro za muganga zemeza ko umubyeyi yararwaye ko n’umwana yapfuye. [5] Avuga ko Urugaga rwaramuhamagaye uwo munsi, yagombaga kwitaba, umugore yari ameze nabi, yandikira urugaga uwo munsi ko Umugore akomeje kumererwa nabi,ababwira ko mugihe kitarenze kuwa 01/08/2023, ku bijyanye n’umusanzu,azaba yabikemuye n’ubwo yahuye nizo nzitizi z’uburwayi, ko azatanga umusanzu bitarenze tariki ya 01/08/2023 cyangwa akayatanga mbere yaho, umusanzu yarawishyuye mbere yiyo tariki yari yiyemeje cyane ko buri wese watinze kwishyura umusanzu avuga cyangwa agatanga umunsi ntarengwa azaba yishyuye umusanzu. [6] Me Minsiragwira Assumani avuga ko iki cyemezo cyamufatiwe kimbangamiye kandi yahuye n’ibibazo by’ubuzima busanzwe ,buri wese byamubaho, ikindi iki cyemezo gishobora kuzamugiraho ingaruka kutajya gutorerwa imwe mu myanya y’Ubuyobozi bw’Urugaga kandi ibyabayeho nta ruhare yabigizemo ahubwo n’inzitizi byaje bitunguranye ihame “il n’y a pas la règle sans exception”. [7] Mu mategeko yabo (Abavoka), ntarundi rwego ruteganijwe,gushyikirizwa ikibazo, nk’iki, mu rwego rwo Gutakamba,cg kujurira ,usibye urukiko, gusa , akaba ariyo mpamvu baregeye urukiko basaba no kurenganurwa cyane ko byose yabyishyuye, yaba Umusanzu, ndetse n’Amakarita yo kwivuza nayo yarayishyuye kandi nanubu Umugore we ntarakira,agikomeje kumererwa nabi.

## Page 3

[8] Me Muhirwa Ngabo Audance uburanira Urugaga rw’Abavoka mu Rwanda avuga ko ku itariki ya 12/05/2023, Abavoka bose bohererejwe ubutumwa bubibutsa kwishyura igice cya 2 cy’umusanzu w’Urugaga wa 2023. Itariki ntarengwa yo kuwishyura ikaba yari 31/05/2023. Me Minsiragwira Assumani akaba atarubahirije icyo gihe cyari giteganyijwe kuko iyo tariki ya 31/05/2023 yageze atarishyura umusanzu wagenwe ndetse akaba atarandikiye Umukuru w’Urugaga rw’Abavoka ngo amusabe kongererwa igihe cyo kwishyura umusanzu nkuko abandi babigenza iyo bagize imbogamizi zitandukanye. [9] Avuga ko ku itariki ya 01/06/2023 yanditse “e-mail” asaba Umukuru w’Urugaga rw’Abavoka kumusabira uruhushya rwo gusura abakiliya be (Mugabonkundi Prosper, Hageniyaremye Angele, Kamasa Diogene na Ndori Jean Alex) mu Igororero rya Miyove aho yasabye kujyayo tariki ya 02/06/2023, ku itariki ya 05/06/2023 yongeye kwandikira Umukuru w’Urugaga rw’Abavoka amusaba kumusabira uruhushya rwo gusura umukiliya we Umulisa Josianne mu Igororero rya Musanze aho yasabye kujyayo ku itariki ya 06/06/2023, ku itariki kandi ya 19/06/2023 nabwo yongeye kwandikira Umukuru w’Urugaga rw’Abavoka amusaba kumusabira uruhushya rwo gusura abakiliya be ( Uwayisenga Alphonsine, Mutatseneza Assumpta na Umutesi Josee) mu Igororero rya Mageragere aho yabasuye ku itariki ya 20/06/2023. [10] Me Muhirwa Ngabo Audance avuga ko ayo matariki yose yegeranye n’iminsi yari iteganyijwe yo kwishyura umusanzu ndetse bakaba bagamije kugaragaza ko Me Minsiragwira atari arwaye nkuko abivuga kuko impushya yasabye zigaragaza ko yari mu kazi. Ku itariki ya 08/06/2023 kimwe n’abandi ba Avoka batari bishyuye umusanzu kugeza kuri 31/05/2023, Me Minsiragwira Assumani yandikiwe ubutumwa kuri e-mail ye yibutswa kwishyura igice cya 2 cy’umusanzu wa 2023 maze asabwa kuwishyura bitarenze tariki ya 09/06/2023 ariko ntiyawishyura ndetse ntiyigeze anerekana imbogamizi afite nk’uko abandi b’Avoka babigenje bagasubiza iyo e- mail basobanura ko bahuye n’imbogamizi ndetse bamwe muribo impamvu z’abo zikaba zarumvikanye bakongererwa igihe cyo kwishyura( Cfr Me Hategekimana Emmanuel). [11] Nkuko bisanzwe bigenda kuba Avoka batishyuye umusanzu w’Urugaga ku gihe giteganyijwe aho Umukuru w’Urugaga rw’Abavoka ahita abashyikiriza Komisiyo Ihoraho Ishinzwe Imyitwarire y’Abavoka, Umukuru w’Urugaga rw’Abavoka ntabwo yahise ashyikiriza Komisiyo Abavoka batubahirije igihe cyagenwe cyo kwishyura umusanzu ahubwo yakomeje gutegereza ko abari basigaye kwishyura ko bakwishyura umusanzu basabwa aho yabategereje mu gihe kingana n’ukwezi kose agamije kureba ko bakubahiriza ibyo basabwa kugeza ho yabonye binangiye hashize ukwezi kose kuko Urutonde rw’Abatari bishyuye rwariho Me Minsiragwira Assumani rwashyikirijwe Komisiyo Ishinzwe Imyitwarire y’Abavoka ku itariki ya 06/07/2023. [12] Kuri iyo tariki ya 06/07/2023 Komisiyo Ishinzwe Imyitwarire y’Abavoka yahamagaje Abavoka bose bari batarishyura Igice cya 2 cy’Umusanzu w’Urugaga ibasaba kwitaba Komisiyo ku itariki ya 14/07/2023 saa tanu (11h00) z’amanywa maze kuri ayo masaha Me Minsiragwra wari watumijwe ntiyitaba Komisiyo ndetse Komisiyo imuhanisha igihano cyo guhagarikwa mu mwuga igihe cy’amezi 6 icyo cyemezo akaba yarakimenyeshejwe kuri 28/07/2023 aho kuba 31/07/2023 nkuko abivuga. Ku munsi wo kwitaba Komisiyo, ubwo kuri 14/07/2023 saa saba na makumyabiri n’ibiri(13h22) Komisiyo yasoje imirimo yayo kuri uwo munsi nibwo bakiriye ibaruwa ya Me Minsiragwira Assumani yandikiye Umukuru w’Urugaga rw’Abavoka ifite umutwe w’amagambo uvuga ngo kutitabira ubutumire bw’inteko ya komisiyo ishinzwe imyitwarire no kwisobanura impamvu yo gutinda gutanga umusanzu ko ibisobanuro bya Me Minsiragwira Assumani byari muri iyo baruwa yo kuwa 14/07/2023 saa saba na makumyabiri n’ibiri (13h20’)yaragomba kwitaba saa tanu (11h00) kuri uwo munsi. UKO URUKIKO RUBIBONA

## Page 4

[13] Ingingo ya 49, 1° y’Itegeko N°30/2018 ryo ku wa 02/06/2018 rigena ububasha bw’inkiko kubirebana n’ububasha bw’ihariye mu manza z’ubutegetsi, iteganya ko mu manza z’ubutegetsi, Urukiko Rukuru rufite ububasha bwihariye bukurikira: 1° kuburanisha mu rwego rwa mbere n’urwa nyuma ubujurire bw’ibyemezo byafashwe mu nama y’Urugaga rw’Abavoka kimwe n’impaka zavutse mu matora y’abagize inzego z’urwo rugaga. Ibi bigaragaza ko ibyakozwe na Me Minsiragwira Assumani Khamissi byo kujurira icyemezo yafatiwe cyavuzwe haruguru bishingiye kw’itegeko. [14] Uru rukiko rubona ibivugwa na Me Minsiragwira Assumani Khamissi byabaye ku mugore we kurwara igihe kirekire n’inda yaratwite ikavamo n’umwana agapfa bibabaje, gusa amategeko ngenga mikorere y’urugaga rw’Abavoka mu Rwanda agomba kuyubahiriza kuko aya mategeko niyo afasha uru rwego guhuriza hamwe abantu bafite imyumvire n’ibitekerezo bitandukanye akora nka “social cement” yo kubahuriza hamwe bagamije kugera ku ntego biyemeje. [15] Imisanzu iteganijwe mu ngingo ya 52 y’Itegeko No 83/2013 ryo kuwa 11/09/2013 rishyiraho Urugaga rw’Abavoka mu Rwanda n’ingombwa kuko ariyo ituma uru rugaga rubasha kubahiriza inshingano zarwo, guhana udatanze iyi misanzu mu gihe cyateganijwe bifite ishingiro kuko abakwemera kwikuraho amafaranga bayashira mu kigega babereye abanyamuryango haramutse hatabayeho bene ibi bihano baba mbarwa (very few). Ibisobanuro bitangwa na Me Minsiragwira Assumani Khamissi byatumye atabasha kwishyura igice cya 2 cy’umusanzu w’Urugaga wa 2023 mu gihe, nta shingiro bifite kuko atigeze amenyesha ubuyobozi bw’urugaga rw’Abavoka mu Rwanda imbogamizi yahuye nazo, kandi nk’uko Me Muhirwa Ngabo Audance yabisobanuye mw’iburanisha ryo kuwa 3/11/2023, iyo Me Minsiragwira Assumani Khamissi asobanura imbogamizi yahuye nazo byari kumvikana nk’uko n’abandi bahuje umwuga babisobanuye bikumvikana cyane ko n’igihe Komisiyo ishinzwe imyitwarire yamuhamagazaga kuyitaba kuwa 14/07/2023 ntiyigeze ayitaba saa tanu nk’uko yabisabwe ntiyanagira n’impamvu atanga akoresheje uburyo bwose ateganyirizwa n’amategeko, “email, sms, telephone, whatsapp” cyangwa gutuma mugenzi we bahuje umwuga kubirebana n’Inshingano y’ubuvandimwe no kwizerana hagati y’abavoka bivugwa mu mategeko ngenga mikorere y’urugaga bivuze ko guhanwa kwa Me Minsiragwira Assumani Khamissi byari bifite ishingiro kuko ibisobanuro atanga bitahindura ibyashingiweho mu cyemezo nimero 041/CD/2023 cya Komisiyo ishinzwe imyitwarire y’Abavoka mu Rwanda cyo kuwa 14/07/2023. 2. Kubirebana n’ibihano Me Minsiragwira Assumani Khamissi yahanishijwe mu cyemezo nimero 041/CD/2023 cya Komisiyo ishinzwe imyitwarire y’Abavoka mu Rwanda cyo kuwa 14/07/2023 [16] Mu cyemezo Nº 041/CD/2023 cya Komisiyo Ishinzwe Imyitwarire y’Abavoka mu Rwanda cyo kuwa 14/07/2023 Me Minsiragwira Assumani Khamissi yahanishijwe igihano cyo guhagarikwa mu mwuga w’Abavoka mu gihe cy’ingana n’amezi atandatu (6 months) bikamenyeshwa inkiko n’izindi nzego zifite aho zihuriye n’Ubutabera. [17] Uru rukiko rubona ku muntu wari ubeshejweho no kunganira abandi no kubahagararirira mu nkiko kumara igice cy’umwaka nta rukiko yemerewe kujyamo cyangwa ahandi hahuriye n’ubutabera nka RIB ari igihano kinini, usibye no ku muntu ugifatiwe n’umuryango we n’iterambere ry’igihugu rirahadindirira kubera ko imisoro uhanwe yakabaye atanga nayo ihagarara, n’ubwo cyemezo nimero 041/CD/2023 cya Komisiyo ishinzwe imyitwarire y’Abavoka mu Rwanda cyavuzwe haruguru gifite ishingiro ariko igihano cyagitanzwemo kikaba kigomba kugabanuka aho kuba amezi 6 akaba amezi atatu (3months) abarwa ahereye kuva igihe Me Minsiragwira Assumani Khamissi yamenyesherejweho igihano yafatiwe kuwa 28/07/2023, bitewe n’uko iki gihano yakirangije, kubirebana n’uru rubanza Me Minsiragwira Assumani Khamissi agomba guhita atangira imirimo ye agana inkiko zo mu Rwanda nahandi hose hafite aho hahuriye n’Ubutabera uru rubanza rukimara gusomwa.

## Page 5

[18] Kubirebana no kuba impamvu zo kujurira icyemezo nimero 041/CD/2023 cya Komisiyo Ishinzwe Imyitwarire y’Abavoka mu Rwanda cyo kuwa 14/07/2023 zatanzwe na Me Minsiragwira Assumani Khamissi zidahawe ishingiro ariko urukiko rukagira icyo ruvuga ku gihano gikubiye mu cyemezo ndetse rukakigabanya, s’umwihariko w’uru rukiko muri uru rubanza kuko no mu rubanza RPAA 00194/2021/CA rwaciwe ku wa 22/07/2022 rw’Ubushinjacyaha na Ndayishimiye Emmanuel alias Shema, kubirebana no kumenya niba Urukiko rushobora kugabanya igihano impamvu z’ubujurire zitahawe ishingiro ku bijyanye n’imikorere y’icyaha, hemejwe ko kuba Ndayishimiye Emmanuel ntacyo anenga urubanza ajuririra, bituma ubujurire bwe budahabwa ishingiro. Urukiko ariko rwasanze nubwo yakoze icyaha gikomeye cyo gusambanya umwana ufite imyaka 11 nta cyabuza ko agabanyirizwa igihano hashingiwe ku mpamvu nyororashyacyaha ijyanye no kuba ari ubwa mbere akoze icyaha no kuba yarakoze icyaha aribwo akiva mu busore, kuba uwajuriye ntacyo aba anenga urubanza yajuririye, nta cyabuza ko urukiko rugabanyiriza igihano uregwa hagamijwe gutanga igihano gihwanye n’uburemere bw’icyaha kabone n’ubwo iby’igihano byaba bitaburanyweho bityo ahanishwa igifungo cy’imyaka 15 aho kuba igifungo cya burundu yahawe n’Urukiko Rukuru. [19] Hari n’izindi manza zafashe umurongo nk’uyu zirimo Urubanza RPAA 00069/2021/CA rwaciwe ku wa 28/07/2022 rw’Ubushinjacyaha na Nyiranzeyimana Odette. Muri uru rubanza, Urukiko rwasanze ukwemera icyaha k’uregwa mu bujurire ntacyo byamumarira ariko rushingiye ku kuba ubwinjiracyaha yakoze bwo kwica umugabo we nta ngaruka zikomeye byateje kuko uwo yashakaga kwicisha atapfuye kandi abagombaga kumwica nta gikomere cyo ku mubiri bamuteye, rumuhanisha igifungo cy’imyaka 10 aho kuba igifungo cy’imyaka 25 yari yahanishijwe n’Urukiko rubanza. [20] Urubanza RPAA 00039/2021/CA rwaciwe ku wa 02/07/2021 rw’Ubushinjacyaha na Shakabatenda Jean de Dieu. Impamvu ze z’ubujurire zijyanye no kwemeza ko urumogi yafatanywe rwari urwo kunywa aho kuba urwo gucuruza (…) ntizahawe ishingiro ariko hashingiwe ku kuba yarafatanywe udupfunyika 4 gusa tw’urumogi no kuba ari ubwa mbere akoze icyaha bizwi, rwemeza ko agabanyirizwa igihano agahabwa igifungo cy’imyaka umunani (8) n’ihazabu ya 5.000.000 Frw, aho kuba igifungo cy’imyaka 25 n’ihazabu ya 21.000.000 Frw yari yahanishijwe n’inkiko zabanje. 3. Kubirebana n’igihembo cy’Avoka n’amafaranga y’ikurikirana rubanza [21] Me Muhirwa Ngabo Audance yasabye ko urugaga rw’Abavoka mu Rwanda aburanira rwahabwa amafaranga y’ikurikirana rubanza n’igihembo cy’umunyamategeko bingana n’amafaranga miliyoni imwe n’igice (1.500.000frw). [22] Me Minsiragwira Assumani Khamissi avuga ko aya mafaranga nta shingiro afite akaba atatangwa. [23] Uru rukiko rubona n’ubwo urugaga rw’Abavoka mu Rwanda rwaburaniwe na Me Muhirwa Ngabo Audance, nta kigaragaza ko ari akazi yabakoreye ngo agahemberwe kuko nta masezerano yagiranye n’urugaga yagaragarije uru rukiko, rukaba rero ntaho rwahera rumugenera iki gihembo naho gukurikirana urubanza nabyo nta ho rwahera kuko atigeze agaragaza icyo urugaga rwatakaje mu mafaranga kuburyo cyasubizwa. [24] Harebwe ibiteganywa n’ingingo ya 4 y’Itegeko No 15/2004 ryo kuwa 12/06/2004 ryerekeye ibimenyetso mu manza n’itangwa ryabyo iteganya ko urukiko ruca urubanza rwaregewe hakurikijwe ibimenyetso bihuje na kamere y’ikiburanwa. Ibi kandi nibyo biteganijwe n’ingingo ya 12 y'Itegeko No 22/2018 ryerekeye imiburanishirize y'imanza z'imbonezamubano, iz'ubucuruzi, iz'umurimo n'iz'ubutegetsi kubirebana n’ugomba kugaragaza ibimenyetso iteganya ko urega agomba kugaragaza ibimenyetso by’ibyo aregera. Iyo abibuze, uwarezwe aratsinda.

## Page 6

[25] Nukuvuga ko usibye kuba Me Muhirwa Ngabo Audance asaba ko bahabwa amafaranga miliyoni imwe n’igice (1.500.000frw) nta kimenyetso nakimwe yagaragarije urukiko cyashingirwaho mu kuyagena, bivuze ko icyemezo nimero 041/CD/2023 cya Komisiyo ishinzwe imyitwarire y’abavoka cyafashwe kuwa 14/7/2023 gihindutse kubirebana n’igihano, amezi atandatu asimbujwe amezi 3, ku mpamvu z’uko aya mezi Me Minsiragwira Assumani Khamissi yayarangije agomba guhita akomeza imirimo ye nk’uko byari bimeze mbere y’uko ahanwa. III. ICYEMEZO CY’URUKIKO [26] Rwemeje ko ikirego cyatanzwe na Me Minsiragwira Assumani Khamissi ajurira icyemezo nimero 041/CD/2023 cya Komisiyo ishinzwe imyitwarire y’abavoka cyafashwe kuwa 14/7/2023 nta shingiro gifite. [27] Rwemeje ko icyemezo nimero 041/CD/2023 cya Komisiyo ishinzwe imyitwarire y’abavoka cyafashwe kuwa 14/7/2023 gihindutse kubirebana n’igihano, amezi atandatu asimbujwe amezi 3, ku mpamvu z’uko aya mezi Me Minsiragwira Assumani Khamissi yayarangije agomba guhita akomeza imirimo ye nk’uko byari bimeze mbere y’uko ahanwa. [28] Rukijije ko Me Minsiragwira Assumani Khamissi atsinzwe ko Urugaga rw’Abavoka mu Rwanda, mu izina ry’umuyobozi warwo atsinze. [29] Amagarama y’urubanza Me Minsiragwira Assumani Khamissi yatanzeho ingwate arega ahwanye n’ibyakozwe muri uru rubanza byose.