MUHITTIN ISILDAK vs PLATEFORME COMPANY RWANDA Ltd

# MUHITTIN ISILDAK vs PLATEFORME COMPANY RWANDA Ltd

- Source: Amategeko - Section: Decisions (Judgements) - Date: 2025-07-18 - Case/document no.: 00002/2025/CA - Collection: Court of Appeal

## Text

## Page 1

MUHITTIN ISILDAK vs PLATEFORME COMPANY RWANDA Ltd [Rwanda URUKIKO RW’UBUJURIRE – 00002/2025/CA (Kamere, P.J.) 18 Nyakanga 2025] Amategeko yerekeye imiburanishirize y’imanza Mbonezamubano – Gukosoza cyangwa Gusobanuza urubanza – iyo urubanza rw’iremezo rwarengeje igihe cyo kujuririrwa, kurukosora cyangwa kurusobanura bishobora gutuma rujuririrwa, mu gihe ubujurire bushingiye gusa ku cyemezo cyafashwe ku byerekeye ikosorwa cyangwa isobanura ry’urubanza, icyakora ibi ntibishoboka ku manza zitaciwe n’urukiko rumwe. Incamake y’ikibazo: Uru rubanza rwatangiye Muhittin Isildak irega Plateforme Company Rwanda Ltd mu Rukiko rw’Ubucuruzi ivuga ko ku wa 01/01/2024 yagiranye amasezerano y’ubuode nuwo arega ku giciro cy’Amadolari y’Amerika 750 buri kwezi, ariko ko iyo sosiyete yanze kwishyura umwenda w’ubukode ungana n’ubukode bw’amezi icumi (10). Urubanza rwaraburanwe kugeza mu Rukiko Rukuru rw’Ubucuruzi, maze mu rubanza RCOMA00737/2024/HCC rwaciwe ku wa 19/12/2024 urwo Rukiko rushimangira ibyemejwe mu Rukiko rw’Ubucuruzi mu rubanza RCOM01630/2024/TC ko umwenda ukomoka ku bukode bw’inzu Plateforme Company Rwanda Ltd ibereyemo Muhittin Isildak ungana n’amadorali y’Amerika ibihumbi mirongo irindwi na bitanu (75.000USD). Plateforme Company Rwanda Ltd yajuririye Urukiko rw’Ubujurire, mu rubanza RCOMAA00007/2025/CA rwaciwe ku wa 21/03/2025, rwemeza ko ubujurire bwatanzwe na Plateforme Company Rwanda Ltd butakiriwe kuko yatinze kujurira. Plateforme Company Rwanda Ltd yatanze ikindi kirego RS/RECT/RCOM 00001/2025/HCC mu Rukiko Rukuru rw’Ubucuruzi isaba urwo Rukiko gukosora no gusobanura icyemezo rwafashe mu rubanza no RCOMA00737/2024/HCC, aho rushingiye ku kuba yararezwe kwishyura ibirarane by’ubukode bw’amezi 10 mu gihe ubukode bwa buri kwezi bwumvikanyweho yari 750USD, rwategetse Plateforme Company Rwanda Ltd kwishyura 75.000USD, kandi yaragombaga gutegekwa kwishyura 7.500USD kuko ari yo ahwanye n’amezi 10 y’ibirarane by’amafaranga y’ubukode. Urukiko Rukuru rw’Ubucuruzi mu rubanza RS/RECT/RCOM00001/2025/HCC, rusobanura ko rushingiye ku kuba mu kujurira urubanza rwaciwe ku rwego rubanza n’Urukiko rw’Ubucuruzi Plateforme Company Rwanda Ltd itarajuririye ingano y’umwenda, icyo kirego cyayo cyo gukosoza no gusobanuza urubanza nta shingiro gifite. Plateforme Company Rwanda Ltd yajuririye urwo rubanza mu Rukiko rw’Ubujurire, isaba ko ingano y’umwenda yishyuzwa ikosorwa. Urukiko rw’Ubujurire mu rubanza RSA/RECT/RCOM00001/2025/CA, nyuma yuko impande zombi zigerageje kumvikana bikananirana, Urukiko rwemeje ko ubujurire bwatanzwe na Plateforme Company Rwanda Ltd bufite ishingiro, ko urubanza RCOMA00737/2024/HCC rwaciwe n’Urukiko Rukuru rw’Ubucuruzi rukosowe ku bijyanye n’ingano y’umwenda w’ubukode Plateforme Company Rwanda Ltd igomba kwishyura Muhittin Isildak, ukaba ugomba kuba amadolari ibihumbi birindwi na magana atanu (7.500 USD), aho kuba amadolari ibihumbi mirongo irindwi na bitanu (75.000USD); rwemeza ko uru rubanza rwuzuza urubanza RCOMA00737/2024/HCC. Muhittin Isildak yatanze ikindi kirego mu Rukiko rw’Ubujurire, avuga ko ajuririra urubanza RCOMA00737/2024/HCC rwaciwe n’Urukiko Rukuru rw’Ubucuruzi rwari rumaze gukosorwa n’urubanza RSA/RECT/RCOM 00001/2025/CA rwaciwe n’Urukiko rw’Ubujurire, Asobanura ko Urukiko rw’Ubujurire mu rubanza RSA/RECT/RCOM 00001/2025/CA rwakosoye gusa ingano y’umwenda Plateforme Company Rwanda Ltd ibereyemo Muhittin Isildak ariko ntirwagira icyo ruvuga ku bujurire bwuririye ku bundi bwari bwaratanzwe na Muhittin Isildak mu rubanza rukosorwa aho

## Page 2

yasabaga ko umwenda w’ubukode ugomba gukomeza kubarwa mu gihe cyose Plateforme Company Rwanda Ltd yari igikomeje kumubera mu nzu. Muri iki kirego gishya asaba ko ubwo bujurire bwari bwuririye ku bundi bugomba guhabwa ishingiro ngo kuko kugeza uyu munsi Plateforme Company Rwanda Ltd itarishyura umwenda wose ibereyemo Muhittin Isildak. Mbere yo kwiregura mu mizi, Plateforme Company Rwanda Ltd yatanze inzitizi isaba kutakira ubujurire bwa Muhittin Isildak kuko bwatanzwe mu bihe no mu buryo bidafite amategeko bikurikije. Muhittin Isildak avuga ko kuba Urukiko rw’Ubujurire rwaremeje ko urubanza RSA/RECT/RCOM00001/2025/CA rwuzuza urubanza RCOMA00737/2024/HCC rwaciwe n’Urukiko Rukuru rw’Ubucuruzi ku wa 19/12/2024, bituma uru Rukiko rukwiriye no kwakira ubujurire bwuririye ku bundi bwari bwaratanzwe na Muhittin Isildak muri urwo rubanza rwakosowe hanyuma rukabufataho icyemezo ko bufite ishingiro. Urukiko mu rubanza 00002/2025/CA, rwemeje ko inzitizi yo kutakira ikirego ifite ishingiro kuko cyatanzwe mu nzira no buryo bunyuranyije n’Amategeko. Incamake y’icyemezo: Iyo urubanza rw’iremezo rwarengeje igihe cyo kujuririrwa, kurukosora cyangwa kurusobanura bishobora gutuma rujuririrwa, mu gihe ubujurire bushingiye gusa ku cyemezo cyafashwe ku byerekeye ikosorwa cyangwa isobanura ry’urubanza, icyakora ibi ntibishoboka ku manza zitaciwe n’urukiko rumwe. Bityo, nta na rimwe byashoboka iyo urubanza rukosora cyangwa se rusobanura rwaciwe n’Urukiko rw’Ubujurire, kuko uru Rukiko ruba rwararuciye ku rwego rwa nyuma, aho rudashobora kurugarukaho mu cyakwitwa ubujurire (appel/appeal) kandi rukaba rudashobora kujuririrwa mu Rukiko rw’Ikirenga. Amategeko yashingiweho: Itegeko N°30/2018 ryo ku wa 02/06/2018 ryerekeye ububasha bw’inkiko Ingingo ya 52, igika cya nyuma Itegeko Nº 22/2018 ryo ku wa 29/04/2018 ryerekeye imiburanishirize y’imanza z’Imbonezamubano, iz’ubucuruzi, iz’umurimo n’iz’ubutegetsi, Ingingo ya 111, 152 igika cya 3, 140 igika cya 5. Nta manza zifashishijwe. Urubanza. I. IMITERERE Y′URUBANZA [1] Muhittin Isildak yatanze ikirego mu Rukiko rw’Ubucuruzi avuga ko ku wa 01/01/2024 yakodesheje inyubako ye na Plateforme Company Rwanda Ltd ku giciro kingana n’Amadolari y’Amerika 750 buri kwezi, ariko ko iyo sosiyete yanze kwishyura ku bushake, ko umwenda w’ubukode uregwa yari imubereyemo ungana n’ubukode bw’amezi icumi (10). Urubanza rwaraburanwe kugeza aho Plateforme Company Rwanda Ltd yajuririye Urukiko Rukuru rw’Ubucuruzi, maze mu rubanza RCOMA00737/2024/HCC rwaciwe ku wa 19/12/2024 urwo Rukiko rushimangira ibyemejwe ku rwego rubanza ko umwenda ukomoka ku bukode bw’inzu Plateforme Company Rwanda Ltd ibereyemo Muhittin Isildak ungana n’amadorali y’Amerika ibihumbi mirongo irindwi na bitanu (75.000 USD), ko ubujurire bwatanzwe na Plateforme Company Rwanda Ltd nta shingiro bufite, ko imikirize y’urubanza RCOM01630/2024/TC rwaciwe ku wa 20/11/2024 n’Urukiko rw’Ubucuruzi, idahindutse. [2] Plateforme Company Rwanda Ltd yajuririye Urukiko rw’Ubujurire, mu rubanza RCOMAA00007/2025/CA rwaciwe ku wa 21/03/2025, uru Rukiko rwemeza ko ubujurire bwatanzwe na Plateforme Company Rwanda Ltd butakiriwe kuko yatinze kujurira, rutegeka Plateforme Company

## Page 3

Rwanda Ltd kwishyura Muhittin Isildak 500.000Frw y’igihembo cya Avoka na 200.000Frw y’ikurikiranarubanza, kuri urwo rwego. [3] Hagati aho Plateforme Company Rwanda Ltd yatanze ikindi kirego RS/RECT/RCOM00001/2025/HCC mu Rukiko Rukuru rw’Ubucuruzi isaba urwo Rukiko gukosora no gusobanura icyemezo rwafashe mu rubanza RCOMA00737/2024/HCC rwavuzwe haruguru, aho rushingiye ku kuba yararezwe kwishyura ibirarane by’ubukode bw’amezi 10 mu gihe ubukode bwa buri kwezi bwumvikanyweho yari 750USD, rwategetse Plateforme Company Rwanda Ltd kwishyura 75.000USD, kandi mu by’ukuri yaragombaga gutegekwa kwishyura 7.500USD kuko ari yo ahwanye n’amezi 10 y’ibirarane by’amafaranga y’ubukode. [4] Ku wa 07/02/2025, Urukiko Rukuru rw’Ubucuruzi rwaciye urubanza RS/RECT/RCOM00001/2025/HCC, rusobanura ko rushingiye ku kuba mu kujurira urubanza rwaciwe ku rwego rubanza n’Urukiko rw’Ubucuruzi Plateforme Company Rwanda Ltd itarajuririye ingano y’umwenda, icyo kirego cyayo cyo gukosoza no gusobanuza urubanza nta shingiro gifite. [5] Plateforme Company Rwanda Ltd yajuririye urwo rubanza muri uru Rukiko rw’Ubujurire, ubujurire bwayo bwandikwa kuri RSA/RECT/RCOM 00001/2025/CA, urubanza ruburanishwa ku wa 05/05/2025, Plateforme Company Rwanda Ltd ihagarariwe na Me Ngilinshuti Jean Bosco, naho Muhittin Isildak ahagarariwe na Me Ndorimana Arnaud, iburanisha ryimurirwa ku wa 12/05/2025 kugira ngo ababuranyi babanze bagerageze gukemura mu bwumvikane ikibazo bafitanye, ariko bananirwa kumvikana, ku wa 12/05/2025 urubanza ruraburanishwa, Plateforme Company Rwanda Ltd ihagarariwe nka mbere, naho Muhittin Isildak ahagarariwe na Me Ineza Jules Lambert. [6] Ku wa 19/05/2025, uru Rukiko rwaciye urubanza RSA/RECT/RCOM 00001/2025/CA, rwemeza ko ubujurire bwatanzwe na Plateforme Company Rwanda Ltd bufite ishingiro, ko urubanza RCOMA00737/2024/HCC rwaciwe n’Urukiko Rukuru rw’Ubucuruzi ku wa 19/12/2024 rukosowe ku bijyanye n’ingano y’umwenda w’ubukode Plateforme Company Rwanda Ltd igomba kwishyura Muhittin Isildak, ukaba ugomba kuba amadolari ibihumbi birindwi na magana atanu (7.500USD), aho kuba amadolari ibihumbi mirongo irindwi na bitanu (75.000USD); rwemeza ko uru rubanza rwuzuza urubanza RCOMA00737/2024/HCC rwaciwe n’Urukiko Rukuru rw’Ubucuruzi ku wa 19/12/2024. [7] Muhittin Isildak yatanze iki kirego muri uru Rukiko rw’Ubujurire, gihabwa 00002/2025/CA, avuga ko ajuririra urubanza RCOMA00737/2024/HCC rwaciwe n’Urukiko Rukuru rw’Ubucuruzi ku wa 19/12/2024 rwari rumaze gukosorwa n’urubanza RSA/RECT/RCOM 00001/2025/CA rwaciwe n’Urukiko rw’Ubujurire ku wa 19/05/2025. Asobanura ko Urukiko rw’Ubujurire mu rubanza RSA/RECT/RCOM00001/2025/CA rwaciye ku wa 19/05/2025 rwakosoye gusa ingano y’umwenda Plateforme Company Rwanda Ltd ibereyemo Muhittin Isildak ariko ntirwagira icyo ruvuga no ku bujurire bwuririye ku bundi bwari bwaratanzwe na Muhittin Isildak mu rubanza rukosorwa aho yavugaga ko umwenda w’ubukode ugomba gukomeza kubarwa mu gihe cyose Plateforme Company Rwanda Ltd yari igikomeje kumubera mu nzu, akavuga muri iki kirego ko ubwo bujurire bwari bwuririye ku bundi bugomba guhabwa ishingiro ngo kuko kugeza uyu munsi Plateforme Company Rwanda Ltd itarishyura umwenda wose ibereyemo Muhittin Isildak. [8] Uhagarariye Muhittin Isildak asobanura kandi ko mu gika cya 31 cy’urubanza RCOMA00737/2024/HCC uwari ahagarariye Muhittin Isildak yatanze ubujurire bwuririye ku ubundi nk’uko biteganywa n’ingingo ya 152 y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi1 aho yagaragarizaga Urukiko Rukuru rw’Ubucuruzi ko n’ubwo urega yasabye ko hemezwa umwenda ungana

1 Aho iyo ngingo ya 152 ibisobanura mu buryo bukurikira : “Uregwa mu rukiko rujuririrwa ashobora na we kugira ibyo asaba yiregura.”

## Page 4

n’amezi 10 ari yo ahwanye na 750$ ku kwezi ko hagombaga kwiyongeramo ukundi kwezi uhereye igihe urubanza rwo mu Rukiko rw’Ubucuruzi rwasomewe; nyamara ngo n’ubwo Urukiko ntacyo rwabivuzeho Muhittin Isildak yanze kubijuririra kuko n’ubundi na mbere hose yifuzaga ko Plateforme Company Rwanda Ltd yamwishyura ku neza ariko Plateforme Company Rwanda Ltd yo ngo yakomeje kujurira ari na ko itinza irangizwa ry’urubanza, ibi ngo akaba ari byo bituma Muhittin Isildak aregera amezi 6 y’ubukode yarenzeho kugeza ubwo urubanza rukosorwa mu Rukiko rw’Ubujurire; bityo muri uru rubanza 00002/2025/CA asaba Urukiko ko rwategeka Plateforme Company Rwanda Ltd kumwishyura umwenda uhwanye n’amezi 16 uhwanye na 12.000 $us ndetse rugategeka kwishyura Muhittin Isildak amadolari yatakaje mu gihe yari ategereje ko urubanza rwe rurangizwa nk’uko ayagaragaza mu bimenyetso binyuranye yatanze mu rubanza ku mugereka. [9] Mbere yo kwiregura mu mizi ku ngingo z’ubujurire zimaze kuvugwa haruguru, Plateforme Company Rwanda Ltd yatanze inzitizi isaba kutakira ubujurire bwatanzwe na Muhittin Isildak ngo kubera ko bwatanzwe mu bihe no mu buryo bidafite amategeko bikurikije. [10] Iburanisha ry’urubanza ryashyizwe ku wa 07/07/2025, ruburanishwa gusa ku nzitizi yo kutakira ubujurire n’amafaranga y’ikurikiranarubanza n’igihembo cya avoka, Muhittin Isildak ahagarariwe na Me Ineza Jules Lambert, naho Plateforme Company Rwanda Ltd ihagarariwe na Me Ngilinshuti Jean Bosco. Isomwa ry’urubanza rishyirwa ku wa 18/07/2025, ari nacyo gihe rusomeweho. II. ISUZUMWA RY’IBIBAZO BIGIZE URU RUBANZA Gusuzuma niba iki kirego cy’ubujurire bwatanzwe na Muhittin Isildak cyujuje ibisabwa n’amategeko ku buryo cyakwakirwa [11] Me Ngilinshuti Jean Bosco, uhagarariye Plateforme Company Rwanda Ltd, asaba kutakira ubu bujurire Muhittin Isiladak yatanze ashingiye ku ngingo ya 140 igika cya kabiri y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi2, kuko iyi ngingo yumvikanisha ko umuntu ashobora guhitamo kujurira urubanza rukosora rwonyine cyangwa se akarujurira hamwe n’urubanza rwakosowe iyo na rwo rushobora kujuririrwa. [12] Asobanura ko ibyo Muhittin Isildak yakoze bitandukanye n’ibiteganywa n’ingingo y’Itegeko agaragaza ko yashingiyeho, kubera impamvu zikurikira : Kuvuga ko ushobora kujuririra imanza zombi (Urukosora n’urwakosowe) mu gihe zombi zishobora kujuririrwa byumvikanisha ko urubanza rw’iremezo ruba rugifite ibihe byo kujuririrwa kandi na rwo ubwarwo rushobora kujurirwa mu Rukiko ruri hejuru yarwo, urubanza rukosora na rwo rukaba rushobora kujuririrwa mu rukiko ruri hejuru y’urwaruciye ; Urubanza rukosora rwaciwe n’Urukiko rw’Ubujurire rufite RSA/RECT/RCOM 00001/2025/CA ku wa 19/05/2025, ntirushobora kujuririrwa rwonyine kuko ingingo ya 52 igika cya nyuma y’Itegeko N°30/2018 ryo ku wa 02/06/2018 ryerekeye ububasha bw’inkiko, ivuga ko imanza zaciwe n’Urukiko rw’Ubujurire zitajurirwa ; Urubanza rwaciwe n’Urukiko Rukuru rw’Ubucuruzi RCOMA00737/2024/HCC na rwo ntirushobora kujurirwa mu Rukiko rw’Ubujurire kubera ko ibihe byo kurujuririra byarenze, kandi uru rubanza rwaciwe ku wa 19/12/2024 n’iyo rwaba rushobora kujuririrwa mu Rukiko rw’Ubujurire ntirwashobora guhuzwa n’ururukosora kuko rwo rwamaze gucibwa ku rwego rwa nyuma ntirugishobora kujuririrwa.

2 Iyo ngingo ya 140 ikaba iteganya ibi bikurikira: “Urubanza rusobanura cyangwa rukosora urundi rwuzuza urubanza rwasabiwe gusobanurwa cyangwa gukosorwa. Rushobora kujuririrwa rwonyine cyangwa hamwe n’urubanza rw’iremezo mu gihe imanza zombi zishobora kujuririrwa”.

## Page 5

[13] Uburanira Plateforme Company Rwanda Ltd avuga ko asanga rero hadashobora kujuririrwa izi manza zombi kubera ko muri zose nta na rumwe rushobora kujurirwa, ibi kandi ngo bikaba byumvikana kuko urubanza rwaciwe n’Urukiko rw’Ubujurire rudashobora kongera kujuririrwa muri urwo Rukiko. Asoza avuga ko ibi amaze gusobanura haruguru ari ibisanzwe bizwi (Court Notice) kuko igitekerezo kiri mu ngingo ya 140 igika cya kabiri cyumvikanisha ko Umushingamategeko yashatse ko mu gihe Umucamanza akosoye urubanza akagira ibyo akosora birebana n’urubanza rukosorwa, uwo bibangamiye ashobora kubijuririra byose hamwe mu Rukiko ruri hejuru y’urwakosoye urubanza. Plateforme ikaba isanga ubu bujurire budakwiye kwakirwa ngo busuzumwe kuko bwatanzwe nabi ndetse bukaba butari mu bubasha bw’Urukiko rw’Ubujurire. [14] Me Ineza Jules Lambert, uhagarariye Muhittin Isildak, avuga ko ku wa 22/05/2025 uwo aburanira yajuririye urubanza RCOMA00737/2024/HCC ashingiye ku ngingo ya 140 igika cya 5 y’Itegeko ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi (CPCCSA), kuko hari ikibazo cyavutse mu kurukosora, kandi ko n’ubwo rwabaye itegeko muri system ya IECMS ngo rushobora kongera kuba actif. Asobanura kandi ko kuba Urukiko rw’Ubujurire rwaremeje ko urubanza RSA/RECT/RCOM 00001/2025/CA rwuzuza urubanza RCOMA 00737/2024/HCC rwaciwe n’Urukiko Rukuru rw’Ubucuruzi ku wa 19/12/2024, bituma uru Rukiko rukwiriye no kwakira ubujurire bwuririye ku bundi bwari bwaratanzwe na Muhittin Isildak muri urwo rubanza rwakosowe hanyuma rukabufataho icyemezo ko bufite ishingiro, ko urubanza RCOMA00737/2024/HCC ruhindutse ku kijyanye n’ingano y’umwenda, rugategeka Plateforme Company Rwanda Ltd kwishyura Muhittin Isildak 180 $us ahwanye n’inyungu z’ubukererwe ku kwishyura ubukode bw’amezi 16, kumusubiza 10.000 $us yakoresheje ategereje ko urubanza ruba ndakuka, kumwishyura amezi 16 y’ubukode itamwishyuye kubera gutinza irangizwa ry’Urubanza, no kumwishyura ibyo yakoresheje bihwanye na 10.000 $us igihe yari ategereje ko urubanza rwe rurangizwa. UKO URUKIKO RUBIBONA [15] Impaka ziri hagati y’ababuranyi zishingiye ku kumenya niba urubanza RCOMA00737/2024/HCC rwaciwe ku wa 19/12/2024 rukuzuzwa n’urubanza RSA/RECT/RCOM00001/2025/CA rwaciwe n’Urukiko rw’Ubujurire ku wa 19/05/2025, rushobora kujuririrwa rwonyine cyangwa zombi icyarimwe, kandi ubwo bujurire bukakirwa bukanasuzumwa n’uru Rukiko rw’Ubujurire, hagendewe ku biteganywa n’ingingo ya 140 y’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’Imbonezamubano, iz’ubucuruzi, iz’umurimo n’iz’ubutegetsi. [16] Ingingo ya 140 y’iryo Tegeko yavuzwe haruguru iteganya ibikurikira : “Ikirego gikosora cyangwa gisobanura urubanza kiburanishwa nk’inyandiko nsobanurakirego itanzwe n’umuranyi umwe. Urubanza rukosora urundi rukosora gusa amakosa y’imyandikire. Urubanza rusobanura cyangwa rukosora urundi rwuzuza urubanza rwasabiwe gusobanurwa cyangwa gukosorwa. Rushobora kujuririrwa rwonyine cyangwa hamwe n’urubanza rw’iremezo mu gihe imanza zombi zishobora kujuririrwa. Gusaba gukosora cyangwa gusobanura urubanza bikorwa mu gihe cy’ukwezi kumwe uhereye igihe umuburanyi yamenyeye imikirize y’urubanza. Igihe cy’ubujurire cy’urubanza rusobanura cyangwa rukosora urundi ni ukwezi kumwe gitangira kubarwa uhereye ku munsi w’isomwa ry’urwo rubanza rusobanura cyangwa rukosora urubanza rw’iremezo. Iyo urubanza rw’iremezo rwarengeje igihe cyo kujuririrwa, kurukosora cyangwa kurusobanura bishobora gutuma rujuririrwa, mu gihe ubujurire bushingiye gusa ku cyemezo cyafashwe ku byerekeye ikosorwa cyangwa isobanura ry’urubanza”. [17] Ingingo ya 52 igika cya nyuma y’Itegeko N°30/2018 ryo ku wa 02/06/2018 ryerekeye ububasha bw’inkiko iteganya ko imanza zaciwe n’Urukiko rw’Ubujurire zitajuririrwa. [18] Ibika bya nyuma by’izi ngingo zombi bifatiwe hamwe byumvikanisha ko ku birebana n’urubanza rw’iremezo RCOMA00737/2024/HCC rwaciwe ku wa 19/12/2024 n’Urukiko Rukuru rw’Ubucuruzi,

## Page 6

n’ubwo bidashidikanwaho n’impande zombi ko rwakosowe rwaramaze kuba itegeko, ruramutse rwongeye kwemererwa kujuririrwa hashingiwe ku biteganywa n’igika cya nyuma cy’ingingo ya 140, ubwo bujurire bwajyanwa mu Rukiko rw’Ubujurire, uru Rukiko kandi rukaba ari narwo ku wa 19/05/2025 rwaciye ku rwego rwa nyuma urubanza RSA/RECT/RCOM 00001/2025/CA rukosora urwavuzwe haruguru rw’iremezo. Umuntu akaba yakwibaza ukuntu mu gihe MUHITTIN Isildak yashingira ku nenge avuga ko ziri mu rubanza RSA/RECT/RCOM 00001/2025/CA, akajuririra urubanza rw’iremezo RCOMA 00737/2024/HCC, izo nenge zasuzumirwa mu Rukiko rw’Ubujurire ruvugwaho kuba rwaraziteje, maze ibyo bikaba byakwitwa ubujurire (appel/appeal). [19] Uru Rukiko rurasanga ibiteganywa mu gika gisoza cy’ingingo ya 140 y’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ko “iyo urubanza rw’iremezo rwarengeje igihe cyo kujuririrwa, kurukosora cyangwa kurusobanura bishobora gutuma rujuririrwa, mu gihe ubujurire bushingiye gusa ku cyemezo cyafashwe ku byerekeye ikosorwa cyangwa isobanura ry’urubanza”, bidashoboka ku manza zitaciwe n’urukiko rumwe. By’umwihariko uru Rukiko rurasanga nta na rimwe byashoboka iyo urubanza rukosora cyangwa se rusobanura rwaciwe n’Urukiko rw’Ubujurire, kuko uru Rukiko ruba rwararuciye ku rwego rwa nyuma, aho rudashobora kurugarukaho mu cyakwitwa ubujurire (appel/appeal) ndetse rukaba rudashobora kujuririrwa mu Rukiko rw’Ikirenga. [20] Rushingiye kuri ibi bimaze gusobanurwa haruguru, uru Rukiko rurasanga mu rwego rw’amategeko (sur le plan juridique) ntaho rwabona rushingira rwemera kwakira iki kirego cy’ubujurire bwa Muhittin Isildak, ndetse no mu rwego rw’uko ibintu byagenda (sur le plan pratique) rurasanga ruramutse rwemeye kwakira iki kirego rutabona aho rushingira rwita uru rubanza urubanza rw’ubujurire. Bityo ibisabwa na Plateforme Company Rwanda Ltd ko ubujurire bwatanzwe na Muhittin Isildak butakirwa muri uru Rukiko bikaba bigomba guhabwa ishingiro. Ibyerekeye amafaranga y’ikurikiranarubanza n’igihembo cya Avoka yasabwe mu rubanza [21] Plateforme Company Rwanda Ltd, ishingiye ku ngingo ya 111 y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, irasaba Urukiko rw’Ubujurire ko nyuma yo kubona ko ubujurire butagomba kwakirwa, Muhittin Isildak wakomeje kuyishora mu manza agomba gutegekwa kuyishyura 3.000.000Frw akubiyemo ikurikiranarubanza n’igihembo cya Avoka. Mu iburanisha, Me Ineza Jules Lambert, uhagarariye Muhittin Isildak, avuga ko Urukiko rusanze bifite ishingiro, abihariye ubushishozi bwarwo. UKO URUKIKO RUBIBONA [22] Ingingo ya 111 y’Itegeko N° 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibi bikurikira : “Ikirego cy’amafaranga y’ikurikiranarubanza ni ikirego gishamikira ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishirizwa rimwe n’ikirego cy’iremezo. Gishobora kandi kwakirwa kikanaburanishwa n’iyo ikirego cy’iremezo cyaba kitakiriwe”. Ingingo ya 152 igika cya 3 y’iryo Tegeko igateganya ko “Mu gihe ubujurire bw’ibanze butakiriwe, cyangwa bwasibwe, ntibibuza ko uregwa mu ubujurire asaba amafaranga y’ikurikiranarubanza”. [23] Hakurikijwe ibiteganywa n’izo ngingo kandi ikirego cy’ubujurire bwa Muhittin Isildak kikaba kitakiriwe nk’uko byasobanuwe haruguru, Urukiko rurasanga uwarezwe agomba kugenerwa amafaranga asaba ariko agenwe mu bushishozi bw’Urukiko kuko ayo asaba ari umurengera, bityo Muhittin Isildak akaba agomba kwishyura Plateforme Company Rwanda Ltd amafaranga ibihumbi magana atanu

## Page 7

(500.000Frw) y’igihembo cya Avoka n’ibihumbi magana abiri (200.000 Frw) y’ikurikiranarubanza, kuri uru rwego. III. ICYEMEZO CY’URUKIKO [24] Rwemeje ko inzitizi yo kutakira ubujurire bwa Muhittin Isildak yatanzwe na Plateforme Company Rwanda Ltd ifite ishingiro. [25] Rutegetse Muhittin Isildak kwishyura Plateforme Company Rwanda Ltd amafaranga ibihumbi magana atanu (500.000Frw) y’igihembo cya Avoka n’ibihumbi magana abiri (200.000Frw) y’ikurikiranarubanza, kuri uru rwego. [26] Ruvuze ko amafaranga y’amagarama y’uru rubanza yatanzwe na Muhittin Isildak ahwanye n’ibyarukozwemo.