UBUSHINJACYAHA v. NZABAKIRA

UBUSHINJACYAHA v. NZABAKIRA

- Source: Amategeko - Section: Decisions (Judgements) - Date: 2025-03-18 - Case/document no.: RPAA 00280/2023/CA, - Collection: Court of Appeal

Text

Page 1

UBUSHINJACYAHA v. NZABAKIRA [Rwanda URUKIKO RW’UBUJURIRE – RPAA 00280/2023/CA, (Rutazana, P.J.,) 18 Werurwe 2025] Amategeko agenga ibyaha n’ibihano – Icyaha cy’ubwicanyi – Ubusembure – Ubusembure bwumvikana nk’impamvu ngabanyagihano igizwe no kuba uwakoze icyaha yarabitewe n’uko yari yabanje gukorerwa igikorwa kimubabaza gikomeye kandi kimurenganya – Habaho ubusembure igihe hari ibikorwa ukurikiranyweho icyaha yakorewe n’uwakorewe icyaha (victime), bituma ako kanya amukorera icyaha aregwa. Ni ishingano y’uregwa uburanisha ubusembure kubuzamura no ku butangira ibimenyetso, umucamanza akaba afite ishingano yo kubusuzuma mu gihe abisabwa n’uregwa mu buryo bweruye kandi bwumvikana. Amategeko agenga ibyaha n’ibihano – Gusaba kugabanyirizwa ibihano – Iyo uregwa nta kindi anenga urubanza yajuririye, uretse gusa kuvuga ko atagabanyirijwe igihano bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha n’ingaruka zacyo (……), cyakora mu bujurire Umucamanza akaba agomba kuzirikana ko yemerewe gusa guhindura igihano cyatanzwe n’Umucamanza wo mu Rukiko rubanza ari uko amaze kugaragaza ko urwo Rukiko rwaba rwarakoresheje nabi itegeko cyangwa ubushishozi bwarwo mu gutanga igihano. Incamake y’ikibazo: Uwitwa Nzabakira Eric yatemaguye umugore we witwa Sumwiza Chantal mu mutwe, ku ijosi inyuma, mu mabere no ku kiganza

akoresheje umuhoro, ahita afatwa, maze atangira gukurikiranwa. Iperereza rirangiye, Ubushinjacyaha bwamureze mu Rukiko Rwisumbuye rwa Nyagatare akurikirnyweho ubwinjiracyaha mu cyaha cy’ubwicanyi, busaba ko kimuhama agahanishwa igifungo cy’imyaka 25. Nzabakira Eric yaburanye yemera ko yatemye umugore we Sumwiza Chantal, avuga ko yabitewe n’uko uyu yagurishije amasaka atabimubwiye yabimubaza aho kumusubiza akamumena ifu mu maso, bituma barwana, maze amusangayo aramutema. Urukiko Rwisumbuye rwa Nyagatare, rushingiye ku kuba Nzabakira Eric yemera ko yakubise umugore we umuhoro mu mutwe akanabishinjwa n’umugore we n’abatangabuhamya batandukanye, rwemeje ko ahamwa n’ubwinjiracyaha mu cyaha cy’ubwicanyi, maze rumuhanisha igifungo cy’imyaka makumyabiri n’itanu (25). Nzabakira Eric yajuririye Urukiko Rukuru, Urugereko rwa Rwamagana asaba kugabanyirizwa igihano kuko yemeye icyaha mu buryo budashidikanywaho anagisabira imbabazi. Ubushinjacyaha bwaburanye buvuga ko adakwiriye kugabanyirizwa igihano kubera ubugome yakoranye icyaha. Urukiko Rukuru, Urugereko rwa Rwamagana, rwasanze Nzabakira Eric atagaragaza impamvu yatumye atemagura umugore we, bityo imyiregurire ye ikaba idakwiye gufatwa nko kwemera icyaha mu buryo budashidikanywaho ku buryo byafatwa nk’impamvu nyoroshyacyaha ituma agabanyirizwa igihano, bityo ko adakwiye kugabanyirizwa igihano.

Page 2

Nzabakira Eric yongeye kujuririra Urukiko rw’Ubujurire asaba kugabanyirizwa igihano kuko yemera icyaha mu buryo budashidikanywaho, avuga kandi ko yakoze icyaha aregwa abitewe n’ubusembure. Uhagarariye Ubushinjacyaha avuga ko ubujurire bwa Nzabakirana Eric nta shingiro bufite kuko impamvu ashingiraho ubusembure atazitangira ibimenyetso, kandi akaba adakwiriye kugabanyirizwa igihano kubera ubugome yakoranye icyaha, bikagaragazwa no kuba yarafashe umuhoro aramwirukankana, amusanga mu nzu amutema mu mutwe, ku ijosi, ku mabere no ku kiganza, hanyuma asohoka avuga ko icyo yashakaga akigezeho. Incamake y’icyemezo: 1. Ubusembure bwumvikana nk’impamvu ngabanyagihano igizwe no kuba uwakoze icyaha yarabitewe n’uko yari yabanje gukorerwa igikorwa kimubabaza gikomeye kandi kimurenganya. Habaho ubusembure igihe hari ibikorwa ukurikiranyweho icyaha yakorewe n’uwakorewe icyaha (victime), bituma ako kanya amukorera icyaha aregwa. Ni ishingano y’uregwa uburanisha ubusembure kubuzamura no ku butangira ibimenyetso, umucamanza akaba afite ishingano yo kubusuzuma mu gihe abisabwa n’uregwa mu buryo bweruye kandi bwumvikana.

2. Iyo uregwa nta kindi anenga urubanza yajuririye, uretse gusa kuvuga ko atagabanyirijwe igihano bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha n’ingaruka zacyo (……), cyakora mu bujurire Umucamanza akaba agomba kuzirikana ko yemerewe gusa guhindura igihano cyatanzwe n’Umucamanza wo mu Rukiko rubanza ari uko amaze kugaragaza ko urwo Rukiko rwaba rwarakoresheje nabi itegeko cyangwa ubushishozi bwarwo mu gutanga igihano. Ubujurire nta shingiro bufite. Amategeko yashingiweho: Itegeko Nº 059/2023 ryo ku wa 04/12/2023 rihindura itegeko Nº 68/2018 ryo ku wa 30/08/2018 riteganya ibyaha n’ibihano, ingingo ya 2. Imanza zifashishijwe: Urubanza RPAA038/15/CS rw’Ubushinjacyaha na Sezikeye Emmanuel, rwaciwe n’Urukiko rw’Ikirenga ku wa 15/09/2017; Urubanza RPAA 00462/2023/CA rw’ Ubushinjacyaha na Nsengimana Jean Claude, rwaciwe n’Urukiko rw’Ubujurire ku wa 15/11/2024; Urubanza RPAA 00582/2021/CA rw’ Ubushinjacyaha na Nyiraminani Julienne na bagenzi be, rwaciwe n’Urukiko rw’Ubujurire ku wa 25/02/2025; Urubanza RPA 00060/2021/CA haburana Ubushinjacyaha na Nsabimana Callixte alias Sankara na bagenzi be, rwaciwe n’Urukiko rw’Ubujurire ku wa 04/04/2022. Urubanza I. IMITERERE Y’URUBANZA

Page 3

[1] Ku wa 28/06/2020 mu Mudugudu wa Musasa, Akagari ka Bibare, Umurenge wa Muhura, Akarere ka Gatsibo mu Ntara y’Iburasirazuba, Nzabakira Eric yatemaguye umugore we witwa Sumwiza Chantal mu mutwe, ku ijosi inyuma, mu mabere no ku kiganza akoresheje umuhoro, ahita afatwa atangira gukurikiranwa. [2] Iperereza rirangiye Ubushinjacyaha bwamureze mu Rukiko Rwisumbuye rwa Nyagatare akurikirnyweho ubwinjiracyaha mu cyaha cy’ubwicanyi, busaba ko kimuhama agahanishwa igifungo cy’imyaka 25. Nzabakira Eric yaburanye yemera ko yatemye umugore we Sumwiza Chantal, agasobanura ko yabitewe n’uko uyu yagurishije amasaka atabimubwiye yabimubaza ahi kumusubiza akamumena ifu mu maso bigatuma barwana hanyuma umugore akajya inyuma y’inzu agakomeza kwivovota, amusangayo aramutema. [3] Mu rubanza RP 01077/2020/TGI/NYG rwaciwe n’Urukiko Rwisumbuye rwa Nyagatare ku wa 26/08/2020, rushingiye ku kuba Nzabakira Eric yemera ko yakubise umugore we umuhoro mu mutwe akanabishinjwa n’umugore we n’abatangabuhamya barimo Turatsinze Elias, Ndindayino Evariste na Musanabaganwa Spéciose; rushingiye kandi ku nyandiko mvugo y’ifatira ry’umuhoro yamutemesheje no kuri raporo ya muganga wasuzumye Sumwiza Chantal igaragaza ko yatemwe, rwemeje ko Nzabakira Eric ahamwa n’ubwinjiracyaha mu cyaha cy’ubwicanyi, rumuhanisha igifungo cy’imyaka makumyabiri n’itanu (25). [4] Nzabakira Eric yajuririye Urukiko Rukuru, Urugereko rwa

Rwamagana asaba kugabanyirizwa igihano kuko yemeye icyaha mu buryo budashidikanywaho anagisabira imbabazi, kandi icyaha akaba yaragikoze kubera uburakari yatewe no kuba yarabajije umugore we impamvu yagurishije imyaka akamwihorera ahubwo akamumenaho ifu akanamubwira ko ntacyo yari yabona. Ubushinjacyaha bwaburanye buvuga ko Nzabakira Eric adakwiriye kugabanyirizwa igihano kubera ubugome yakoranye icyaha. [5] Mu rubanza RPA 00708/2020/HC/RWG rwaciwe n’Urukiko Rukuru, Urugereko rwa Rwamagana ku wa 30/05/2023, rwasanze Nzabakira Eric atagaragaza impamvu yatumye atemagura umugore we, bityo imyiregurire ye ikaba idakwiye gufatwa nko kwemera icyaha mu buryo budashidikanywaho ku buryo byafatwa nk’impamvu nyoroshyacyaha ituma agabanyirizwa igihano; rwasanze kandi icyaha ashinjwa yaragikoranye ubugome, rwemeza ko adakwiye kugabanyirizwa igihano. [6] Nzabakira Eric yongeye kujuririra Urukiko rw’Ubujurire, urubanza ruhabwa RPAA 00280/2023/CA, ruburanishwa mu ruhame ku wa 04/03/2025, Nzabakira Eric yunganiwe na Me Gashirabake Pascal Aboubakar naho Ubushinjacyaha buhagarariwe na Habimana Jean Cabin, Umushinjacyaha ku rwego rw’Igihugu. [7] Nzabakira Eric n’umwunganira bavuga ko ubujurire bwe bushingiye ku mpamvu ebyiri: kugaragaza ko yakoze icyaha kubera ubusembure bugaragarira mu kuba umugore we yaramumennye ifu mu maso akanamubwira ko agiye kumufungisha ibyo arwanira akabibura byose, no gusaba kugabanyirizwa igihano kuko yemera icyaha mu buryo budashidikanywaho. [8] Uhagarariye Ubushinjacyaha avuga ko ubujurire bwa Nzabakirana Eric nta shingiro bufite kuko impamvu ashingiraho ubusembure atazitangira ibimenyetso, kandi akaba adakwiriye kugabanyirizwa igihano kubera ubugome yakoranye icyaha.

Page 4

[9] Urukiko rurasuzuma ibibazo bikurikira bigize urubanza: Kumenya niba Nzabakira Eric yarasembuwe n’imyitwarire y’umugore we Sumwiza Chantal bikamutera gukora icyaha. Kumenya niba Nzabakira Eric ashobora kugabanyirizwa igihano. II. ISESENGURA RY’IBIBAZO BIGIZE URUBANZA 1.Kumenya niba Nzabakira Eric yarasembuwe n’imyitwarire y’umugore we Sumwiza Chantal bikamutera gukora icyaha [10] Nzabakira Eric na Me Gashirabake Pascal Aboubakar umwunganira bavuga yakoze icyaha kubera umujinya yatewe no kuba ubwo ku wa 28/06/2020 yari ageze mu rugo yashwanye n’umugore we kuko yari asanze yagurishije amasaka n’ubunyobwa, amubajije impamvu yatumye abigurisha aho kumusubiza ahita amumena ifu mu maso bahera ubwo barwana, Umuyobozi w’Umudugudu araza arabakiza, hanyuma umugore amubwira ko agiye kumufungisha ibyo arwanira akabibura byose, bituma agira umujinya ajya mu nzu azana umuhoro aramutema; bagasaba uru Rukiko kwemeza ko iyo myitwarire ya Sumwiza Chantal ariyo yatumye amutema, rukamugenera igihano rushingiye ku ngingo z’Itegeko ziteganya ibyaha n’ibihano muri rusange zerekeye ubusembure. [11] Uhagarariye Ubushinjacyaha avuga ko harebwe uburyo icyaha cyakozwemo nta busembure bwabayeho kuko Nzabakira Eric yatemye umugore we yabigambiriye, bikagaragazwa no kuba yarafashe umuhoro aramwirukankana, undi amuhungira kwa Musanabaganwa Spéciose ariko amusanga mu nzu amutema mu mutwe, ku ijosi, ku

mabere no ku kiganza, hanyuma asohoka avuga ko icyo yashakaga akigezeho. Uhagarariye Ubushinjacyaha akomeza asobanura ko ikindi kigaragaza ko nta busembure bwabayeho ari uko kandi nta kimenyetso Nzabakira Eric atanga cyemeza ko umugore we yamumennyeho ifu y’ubugari koko, kandi ko n’iyo byaba byarabayeho, hashingiwe ku murongo watanzwe mu manza zaciwe ku bijyanye n’ubusembure, bitafatwa nk’igikorwa gikomeye, kibabaza kandi kimurenganya Nzabakira Eric yaba yarakorewe ku buryo cyari gutuma ahita atema umugore we agamije kumwica.

UKO URUKIKO RUBIBONA [12] Impaka kuri iyi ngingo zishingiye ku kumenya niba Nzabakira Eric yarasembuwe n’imyitwarire y’umugore we Sumwiza Chantal bikaba ari byo byamuteye kugora icyaha. [13] Ikibazo cyo kumenya igihe imyitwarire y’uwakorewe icyaha ifatwa nk’ubusembure no kumenya ufite inshingano zo kubugaragaza cyatanzweho umurongo n’Urukiko rw’Ikirenga mu rubanza RPAA038/15/CS rwaciwe ku wa 15/09/2017 haburana Ubushinjacyaha na Sezikeye Emmanuel (igika cya 21), no mu zindi manza zaciwe n’uru Rukiko nyuma yarwo harimo nk’urubanza RPAA 00462/2023/CA rwaciwe ku wa 15/11/2024 haburana Ubushinjacyaha na Nsengimana Jean Claude (igika cya 16-17) n’urubanza RPAA 00582/2021/CA rwaciwe n’Urukiko rw’Ubujurire ku wa 25/02/2025 haburana Ubushinjacyaha na Nyiraminani Julienne na bagenzi be (igika cya 17). Izo manza zihurije ku murongo ukurikira: “Ubusembure bwumvikana nk’impamvu ngabanyagihano igizwe no kuba uwakoze icyaha yarabitewe n’uko yari yabanje gukorerwa igikorwa kimubabaza gikomeye kandi kimurenganya. Habaho ubusembure igihe hari

Page 5

ibikorwa ukurikiranyweho icyaha yakorewe n’uwakorewe icyaha (victime), bituma ako kanya amukorera icyaha aregwa. Ni ishingano y’uregwa uburanisha ubusembure kubuzamura no ku butangira ibimenyetso, umucamanza akaba afite ishingano yo kubusuzuma mu gihe abisabwa n’uregwa mu buryo bweruye kandi bwumvikana.” [14] Ku birebana n’uru rubanza, imyitwarire ya Sumwiza Chantal Nzabakira Eric avuga ko yatumye amutema ni uko yamumennye ifu mu maso akanamubwira ko agiye kumufungisha ibyo arwanira akabibura byose. [15] Urukiko rw’Ubujurire rurasanga ibijyanye no kuba umugore we yaramumennyeho ifu Nzabakira Eric yarabiburanishije mu rubanza rujuririrwa nk’impamvu nyoroshyacyaha yatuma agabanyirizwa igihano, Urukiko ntirwabiha agaciro rushingiye ku mvugo y’umutangabuhamya witwa Musanabaganwa Spêciose wemeza ko ahubwo Nzabakira Eric ari we wamennye ifu ku mugore we ubwo yari atashye yasinze agasanga umugore we atetse ibidufu; kuri uru rwego uretse kubivuga gusa Nzabakira Eric nta kimenyetso atanga kibigaragaza kikanavuguruza ibyashingiweho n’Urukiko mu rubanza rujuririrwa. Urukiko rurasanga kandi no mu ibazwa rye mu Bushinjacyaha, ku kibazo cya 7 aho yari abajijwe ku byavugwaga ko yasanze umugore we akora ibidufu agafata ifu akayimumenaho, Nzabakira Eric yarasubije ko yahamagaye umugore we araza Nzabakira Eric ahita amufata n’umujinya, kuko umugore we ari we wari ufite agafuka kariho ifu ihita imeneka; muri iki gisubizo akaba atavuga ko umugore we yamumennye ifu mu maso; ibi byose bikaba bishimangira ko ibyo avuga nta kimenyetso yatanze kibigaragaza, bityo iyi mpamvu ye y’ubujurire ikaba nta shingiro ifite.

2.Kumenya niba Nzabakira Eric ashobora kugabanyirizwa igihano [16] Nzabakira Eric n’umwunganira bavuga ko indi mpamvu yatumye ajurira ari ugusaba kugabanyirizwa igihano kuko yemera icyaha mu buryo budashidikanywaho. Basobanura ko mu rubanza rujuririrwa Urukiko rutamugabanyirije igihano rushingiwe ku mpamvu z’uko atemeye icyaha mu buryo budashidikanywaho ngo kuko atagaragaza impamvu yatumye agikora, kandi akaba yaragikoranye ubugome, rwirengagije ko yaragaragaje ko yakoze icyaha abitewe n’uko umugore we yamumennyeho ifu; naho kuba icyaha cyarakoranywe ubugome bikaba bitabuza ko uregwa agabanyirizwa igihano hashingiwe ku biteganywa mu mu ngingo ya 59 y’Itegeko No 68/2018 ryo ku wa 30/08/2018 riteganya ibyaha n’ibihano muri rusange nk’uko ryahinduwe kugeza ubu. [17] Bakomeza bavuga ko igihano Nzabakira Eric yahanishijwe ari cyo kinini giteganywa n’itegeko (maximum), basaba uru Rukiko kukigabanya kikagezwa munsi y’igihano gito gishoboka (minimum) kuko yemeye icyaha mu buryo budashidikanywaho, hashingiwe ku murongo watanzwe mu rubanza RPAA 00300/2021/CA rwaciwe n’Urukiko rw’Ubujurire ku wa 21/10/2022 haburana Ubushinjacyaha na Hagenimana Innocent, no ku byemejwe mu rubanza RS/INCONST/SPEC 00003/2019/CS rwaciwe n’Urukiko rw’Ikirenga ku wa 04/12/2019 aho rwasobanuye ko akamaro k’igihano katareberwa ku buremere bw’icyaha cyakozwe, ahubwo kareberwa cyane mu cyo icyo gihano cyamarira ugihawe hagamijwe kumwigisha no kumugorora, ndetse no ku ngingo ya 29 n’iya 151 z’Itegeko Nshinga rya Repubulika y’u Rwanda ziteganya ko igihano ntayegayezwa gitesha agaciro ugihawe.

Page 6

[18] Uhagarariye Ubushinjacyaha avuga ko nk’uko byasobanuwe n’Urukiko rw’Ikirenga mu rubanza RPAA 00312/2021/CA rwaciwe ku wa 29/07/2022 haburana Ubushinjacyaha na Mbonabucya Donatien,Urukiko rugena igihano rukurikije uburemere bw’icyaha cyakozwe, ingaruka cyateye, impamvu zatumye agikora, uko uwagikoze yari asanzwe yitwara, imibereho ye bwite n’uburyo icyaha cyakozwemo, bityo umucamanza akaba adategetswe byanze bikunze kugabanya igihano niyo haba hari impamvu nyoroshyacyaha; ko rero no ku bireba Nzabakira Eric, igihano cy’igifungo cy’imyaka 25 yahanishijwe kidakwiriye guhinduka hashingiwe ku bugome yakoranye icyaha ubwo yakurikiranaga umugore we aho yari yamuhungiye akamutemagura umubiri wose. [19] Ku bijyanye n’urubanza RS/INCONST/SPEC00003/2019/SC rwaciwe n’Urukiko rw’Ikirenga Nzabakira Eric n’umwunganira basaba ko rushingirwaho akagabanyirizwa igihano kugeza munsi y’igihano gito giteganyijwe n’Itegeko, uhagariye Ubushinjacyaha avuga ko rutakurikizwa kuko nyuma y’uko ruciwe hari undi murongo watanzwe mu zindi manza zaciwe hagasobanurwa ko imirongo yafashwe hagendewe ku itegeko ryavuyeho, idakomeza gukurikizwa.

UKO URUKIKO RUBIBONA [20] Impaka kuri iyi ngingo zishingiye ku kumenya niba Nzabakira Eric shobora kugabanyirizwa igihano. [21] Nk’uko byemejwe mu rubanza RPA 00060/2021/CA rwaciwe n’Urukiko rw’Ubujurire ku wa 04/04/2022 haburana Ubushinjacyaha na Nsabimana Callixte alias Sankara na bagenzi be (mu gika cya 252 na 254) iyo uregwa nta kindi anenga urubanza yajuririye, uretse gusa kuvuga ko atagabanyirijwe igihano bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha n’ingaruka zacyo (……), cyakora mu bujurire Umucamanza akaba agomba kuzirikana ko yemerewe gusa guhindura igihano cyatanzwe n’Umucamanza wo mu Rukiko rubanza ari uko amaze kugaragaza ko urwo Rukiko rwaba rwarakoresheje nabi itegeko cyangwa ubushishozi bwarwo mu gutanga igihano. [22] Ku birebana n’uru rubanza, dosiye igaragaza ko mu rubanza rujuririrwa Urukiko rutagabanyirije Nzabakira Eric rushingiye ku bugome yakoranye icyaha. Urukiko rw’Ubujurire rurasanga koko Nzabakira Eric yarakoze icyaha kiremereye kandi agikorana ubugome kuko nk’uko abyiyemerera bikaba byaranemejwe n’abatangabuhamya Musanabaganwa Spêciose na Ndindayo Evariste ubwo babazwaga mu Bugenzacyaha, yatemaguye umugore we ahantu hanyuranye ku mubiri1 (mu musaya, ku ijosi inyuma, mu mabere no ku kiganza), kandi akaba yaragikoze abishaka kuko babanje kurwana abantu barabakiza, bakagira

ngo byarangiye ariko Nzabakira Eric agafata umuhoro agakurikriana umugore we aho yari yamuhungiye kwa Musanabaganwa Spêciose akamusanga mu nzu akamutema, yarangiza agasohoka avuga ko icyo yagambiriye akigezeho, ibi ubwabyo bikaba ari impamvu nkomezacyaha. [23] Urukiko rw’Ubujurire rurasanga cyakora izo mpamvu nkomezacyaha zirebewe hamwe no kuba nta kindi cyaha Nzabakira Eric yahamijwe n’inkiko mu buryo buzwi, byashingirwaho akagabanyirizwa igihano hashingiwe ku biteganywa n’ingingo ya 2 y’Itegeko Nº 059/2023 ryo ku

1 Ibi binagaragazwa na Raporo ya muganga wasuzumye Sumwiza Chantal iri muri dosiye.

Page 7

wa 04/12/2023 rihindura itegeko Nº 68/2018 ryo ku wa 30/08/2018 riteganya ibyaha n’ibihano muri rusange yavuzwe haruguru, mu bushishozi bw’ru Rukiko rukaba rusanga yahanishwa igifungo cy’imyaka cumi n’itanu (15) aho kuba igifungo cy’imyaka makumyabiri n’itanu (25) yari yahanishijwe mbere, kugira ngo asobanukirwe n’uburemere bw’icyaha yakozwe kandi ahabwe amahirwe yo kugororwa no kwikosora. III. ICYEMEZO CY’URUKIKO [24] Rwemeje ko ubujurire bwa Nzabakira Eric bufite ishingiro kuri bimwe. [25] Rwemeje ko urubanza RPA 00708/2020/HC/RWG rwaciwe n’Urukiko Rukuru, Urugereko rwa Rwamagana, ku wa 30/05/2023 ruhindutse gusa ku birebana n’igihano Nzabakira Eric ahanishijwe. [26] Ruhanishije Nzabakira Eric igifungo cy’imyaka cumi n’itanu (15). [27] Rutegetse ko Nzabakira Eric asonewe amagarama y'urubanza kuko aburana afunze.