PYRAMIDES MINERALS SUPPLY Ltd v AKARERE KA NYAMASHEKE

# PYRAMIDES MINERALS SUPPLY Ltd v AKARERE KA NYAMASHEKE

- Source: Amategeko - Section: Decisions (Judgements) - Date: 2025-03-28 - Case/document no.: RCOMAA 00080/2024/CA - Collection: Court of Appeal

## Text

## Page 1

PYRAMIDES MINERALS SUPPLY Ltd v AKARERE KA NYAMASHEKE [Rwanda URUKIKO RW’UBUJURIRE – RCOMAA 00080/2024/CA (Munyangeri, P.J., Ngagi, Kamere, J.) 28 Werurwe 2025] Amategeko agenga imiburanishirize y’imianza – Kureka ikirego - Kureka ikirego ni ukwiyambura ububasha bwo kuburana bidasaba ukwemera k’undi muburanyi, bijyana no kwiyambura uburenganzira umuntu yari afite bwo gukomeza gukurikirana icyo kirego. Amategeko agenga imiburanishirize y’imianza – Kureka ikirego – Ingaruka zo kureka ikirego - Uretse ikirego cyangwa urubanza ashobora gucibwa amafaranga y’amagarama cyangwa igihembo cya Avoka n’andi yose yatanzwe n’uwo yari yareze mu gukurikirana urubanza. Incamake y’ikibazo: Ku wa 28/12/2016 Akarere ka Nyamasheke kagiranye amasezerano yo kuvugurura no gusana imihanda y’igitaka mu gihe cy’umwaka umwe, no kuyibungabunga (maintenance) mu gihe cy’imyaka itatu (3) ku giciro cya 2.033.946.479,99 Frw hakubiyemo umusoro (VAT), na 379.606.000 Frw yo kuyibungabunga na rwiyemezamirimo witwa PYRAMIDES MINERALS SUPPLY Ltd. Uyu rwiyemezamirimo ngo ntiyaje kurangiza imirimo mu gihe cyumvikanyweho bituma Akarere gasesa amasezerano, na we ntiyabyishimira, akarega mu Rukiko rw’Ubucuruzi avuga ko ayo masezerano yasheshwe mu buryo budakurikije amategeko kandi ko yaciwe indishyi z’ubukererwe za 10% kandi zitagomba kurenga 5%. Asobanura ko yatangiye akazi ku wa 14/06/2018, nyuma y’umwaka n’igice amasezerano asinywe, byagera ku wa 07/10/2019 Akarere kagasesa amasezerano kamubwira ko yananiwe kurangiza isoko kandi ayo masezerano yaragombaga kurangira ku wa 28/11/2019. Akomeza avuga ko n’ubukererwe bwaba bwarabaye bwaturutse ku makossa y’Akarere kuko katishyuye abaturage mbere y’uko imirimo itangira, kuba hari ibyiyongereye ku bigomba gukorwa ariko igihe nticyongerwe, n’ibindi. Urukiko rwasanze ikirego cya PYRAMIDES MINERALS SUPPLY Ltd nta shingiro gifite mu ngingo zacyo zose. Uyu yajuririye Urukiko Rukuru rw’Ubucuruzi ivuga urukiko rwabanje rwirengagije ibimenyetso byerekana ko amasezerano yasheshwe mu buryo budakurikije amategeko kandi ko igomba gusubizwa amafaranga y’ibihano n’ingwate yafatiriwe. Ubujurire bwarakiriwe, urukiko rwemeza ko ubujurire bufite ishingiro kuri bimwe, ko imirimo PYRAMIDE MINERALS SUPPLY Ltd itishyuwe ifite agaciro ka 188,892,545 Frw, ko ibihano byo gukereza imirimo PYRAMIDE MINERALS SUPPLY Ltd igomba gutegekwa guha Akarere ka Nyamasheke ari 85,303,879 Frw) ndetse ko ingwate yafatiriwe itagomba gusubizwa. Urega yajuririye icyo cyemezo mu Rukiko rw’Ubujurire ariko ku munsi w’iburanisha amenyesha urukiko ko aretse ikirego. Uregwa yasabye ko n’ubwo habayeho kureka ikirego, uwareze agomba gutegekwa kwishyura indishyi zzijyanye n’ikurikirana rubanza n’igihembo cya Avoka. Incamake y’icyemezo: 1. Kureka ikirego ni ukwiyambura ububasha bwo kuburana bidasaba ukwemera k’undi muburanyi, bijyana no kwiyambura uburenganzira umuntu yari afite bwo gukomeza gukurikirana icyo kirego; 2. Uretse ikirego cyangwa urubanza ashobora gucibwa amafaranga y’amagarama cyangwa igihembo cya Avoka n’andi yose yatanzwe n’uwo yari yareze mu gukurikirana urubanza.

## Page 2

Ukureka ikirego kuremewe. Amategeko yashingiweho: Itegeko N⁰ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 122, 124. Nta manza zifashishijwe. Urubanza I. IMITERERE Y’URUBANZA [1] Ku wa 28/12/2016, PYRAMIDE MINERALS SUPPLY Ltd yagiranye n’Akarere ka Nyamasheke amasezerano yo kuvugurura no gusana imihanda y’igitaka, no kuyibungabunga (maintenance) mu gihe cy’imyaka itatu (3). Muri ayo masezerano impande zombi zumvikanye ko PYRAMIDE MINERALS SUPPLY Ltd izakora iryo soko ku giciro cya 1.818.653.878 Frw harimo n’umusoro (VAT), na 379.606.000 Frw yo kuyibungabunga (maintenance) nk’uko bigaragara ku rupapuro rwa 2 n’urwa 91 z’ayo masezerano, zanumvikanye ko iyo mirimo izakorwa mu gihe cy’amezi cumi n’abiri (12) ndetse n’imyaka itatu (3) yo kuyibungabunga (maintenance), kandi ko ibyo bihe bizabarwa uhereye ku munsi iboneyeho ibaruwa iyemerera gutangira imirimo. Nyuma yo gukora inyigo y’imirimo yagombaga gukorwa yiyongereye, ibyo byatumye igiciro cyumvikanyweho cyiyongera kiba 2.033.946.479,99 Frw hakubiyemo umusoro (VAT), na 379.606.000 Frw yo kuyibungabunga (maintenance). Ku wa 7/10/2019, Akarere ka Nyamasheke kandikiye PYRAMIDE MINERALS SUPPLY Ltd ibaruwa isesa amasezerano kuko yananiwe kurangiza isoko yahawe. [2] PYRAMIDE MINERALS SUPPLY Ltd yareze Akarere ka Nyamasheka mu Rukiko rw’Ubucuruzi ivuga ko yatangiye akazi ku wa 14/06/2018, nyuma y’umwaka n’igice amasezerano asinywe, byagera ku wa 07/10/2019, Akarere ka Nyamasheke kakayandikira ibaruwa isesa amasezerano mu buryo bunyuranije n’amategeko, kagaragaza ko gashingiye ku kuba ngo yarananiwe kurangiza isoko yahawe, kandi amasezerano yaragombaga kurangira ku wa 28/11/2019, kakaba karirengagije ko mu ikorwa ry’iyo mirimo PYRAMIDE MINERALS SUPPLY Ltd yagiye ibangamirwa n’ibikorwa by’abakozi b’ako Karere kugira ngo inanirwe kurangiza inshingano zayo n’imirimo mu gihe cyateganyijwe, ko kandi kirengagije amakosa yako akurikira: - kuba katarishyuye abaturage mbere yuko imirimo itangira bigatuma mu gihe yari itangiye abaturage bakora imyigaragambyo bakayibuza gukora bigatuma akazi gahagarara, ndetse uko kutabishyura bigatuma abashinzwe umushinga bayobya umuhanda bakawucisha mu manga imirimo ikiyongera, ariko ntikongere igihe cy’iyo mirimo y’inyongera, kandi kongera kuwuhanga byaratwaye iminsi mirongo itatu (30) itarateganyijwe muri devis; - kuba mu gutangira akazi yarasanze umushinga kateguye ukoze nabi bigatuma iwusubiramo hakiyongeraho 129.580m3 z’itaka yagombaga gucukura no gutunda,

## Page 3

ariko igihe cyo kubikora kingana n’iminsi 144 ntikacyongera ahubwo amasezerano agakomeza kuba umwaka umwe (1); - kuba itarishyuriwe igihe biturutse ku irari ry’indonke ku bari bahagarariye umushinga ku rwego rw’ako Karere, ari bo NIZEYIMANA Eddy Palatin na KASIBANTE George, aho yakoraga fagitire aho kugira ngo bazisinye bazitange bakazibika, kandi igihe imirimo yari imaze gukorwa ku kigero cya 90%, hakaba hari hamaze kwishyurwa amafaranga y’imirimo ingana na 25% gusa, ibyo bikaba binyuranye n’ibiteganywa mu masezerano yagiranye n’ako Karere, bityo bikaba byaratumye imirimo idindira. [3] Isobanura ko Ubuyobozi bw’umushinga bwirengagije izo ngorane bukayihatira kwemera ibihano by’ubukererwe bingana na 170.607.758 Frw, angana na 10% kandi mu bisanzwe Itegeko riteganya ko bene ibyo bihano bitarenza 5% y’amafaranga y’umushinga wose. Ko Nizeyimana Eddy Palatin wari Ingenieur uhagarariye Akarere ka Nyamasheke kuri ubu ufunzwe akurikiranyweho icyaha cyo gusaba indonke, na Kabisante wari uhagarariye COVICON yagenzuraga imirimo, bayisabye ruswa ya 100.000.000 Frw ikazibura, bigatuma bayinaniza bikomeye, aho bayibujije gukura amabuye bugufi bikaba ngombwa ko iyatwara mu bwato, kuyima aho kumena igitaka hafi bigatuma ikijyana mu birometero byinshi, banga kuyisinyira kuri fagitire kugeza aho ikora imirimo ku kigero cya 90% y’akazi kandi karayishyuye gusa 25%. Kandi ko imirimo yakoze igaragara mu ibarura rusange ryakozwe ku wa 24/08/2020 hari uyihagarariye, uhagarariye Akarere ka Nyamasheke Nizeyimana Eddy Palatin, uhagarariye COVICON yagenzuraga imirimo, ndetse n’uhagarariye RTDA, ryagaragaje ko ifite agaciro ka 358.236.130 Frw, bityo ko ari yo kagomba kuyishyura, ko ariko aho kuyishyura imirimo yakoze, kaseshe amazerano mu buryo bunyuranije n’amategeko. [4] Ibyo byatumye PYRAMIDE MINERALS SUPPLY Ltd isaba Urukiko rw’Ubucuruzi kwemeza ko Akarere ka Nyamasheke kaseshe amasezerano yo ku wa 28/12/2016 mu buryo budakurikije amategeko, kugategeka kuyishyura 358.236.130 Frw y’imirimo yakoze nk’uko yagaragajwe mu ibarura rusange ry’imirimo yakozwe ryo ku wa 24/08/2020, kuyisubiza 233.509.037 Frw y’ingwate yo kurangiza imirimo neza yafatiriye, kuyisubiza 170.607.758 Frw y’ibihano yaciwe, no kuyiha indishyi zikomoka ku gihombo kayiteje zingana na 84.139.913 Frw, amafaranga y'ikurikiranarubanza angana na 5.000.000 Frw) na 3.000.000Frw y'igihembo cya Avoka. [5] Mu rubanza No RCOM 00594/2021/TC rwaciwe ku wa 26/10/2021, Urukiko rw’Ubucuruzi rwemeje ko: - ikirego cya PYRAMIDE MINERALS SUPPLY Ltd nta shingiro gifite mu ngingo zacyo zose; - ikirego kiregera kwiregura cy’Akarere ka Nyamasheke gifite ishingiro; - Akarere ka Nyamasheke kaseshe amasezerano Nº RFRDP/01215/W yo ku wa 28/12/2016 yo kuvugurura, gusana imihanda y’igitaka, no kuyibungabunga (maintenance) mu gihe cy’imyaka itatu (3) kagiranye na PYRAMIDE MINERAL SUPPLY Ltd ku mpamvu zifite ishingiro, zikurikije amategeko; - PYRAMIDE MINERAL SUPPLY Ltd yishyura Akarere ka Nyamasheke 65.325.235 Frw na 500.000 Frw y’igihembo cya Avoka, yose hamwe ikishyura 65.825.235 Frw.

## Page 4

[6] PYRAMIDE MINERALS SUPPLY Ltd yajuririye Urukiko Rukuru rw’Ubucuruzi, ubujurire bwayo bwandikwa kuri No RCOMA 00747/2021/HCC, ku munsi w’iburanisha ntiyitaba, urubanza rurasibwa, hanyuma irarubyutsa ikirego cyandikwa kuri No RCOMA 00232/2023/HCC, Urukiko rwemera ko rubyutswa. [7] PYRAMIDE MINERALS SUPPLY Ltd yajuriye inenga ko Urukiko rw’Ubucuruzi rwirengagije ibimenyetso yatanze bigaragaza ko amasezerano yaseshwe mu buryo budakurikije amategeko, n’ibigaragaza ko igomba gusubizwa amafaranga y’ibihano, gusubizwa ingwate yafatiriwe, kwishyurwa amafaranga y’imirimo itarishyuwe, no guhabwa indishyi; ko kandi itari gutegekwa kwishyura Akarere ka Nyamasheke amafaranga y’imirimo itarangije nay’igihembo cya Avoka, isoza isaba amafaranga y’ikurikiranarubanza n’igihembo cya Avoka. Akarere ka Nyamasheke kireguye kavuga ko ubujurire bwa PYRAMIDE MINERALS SUPPLY Ltd nta shingiro bufite, gasaba ko itegekwa kugaha amafaranga y’igihembo cya Avoka. [8] Mu rubanza No RCOMA 00232/2023/HCC rwaciwe ku wa 11/10/2024, Urukiko Rukuru rw’Ubucuruzi rwemeje ko: - ubujurire bwa PYRAMIDE MINERALS SUPPLY Ltd bufite ishingiro kuri bimwe; - urubanza No RCOM 00594/2021/TC rwajuririwe ruhindutse kuri bimwe; - Akarere ka Nyamasheke kaseshe amasezerano mu buryo

bukurikije amategeko; - imirimo PYRAMIDE MINERALS SUPPLY Ltd itishyuwe ifite agaciro ka 188,892,545 Frw; - ibihano byo gukereza imirimo PYRAMIDE MINERALS SUPPLY Ltd igomba gutegekwa guha Akarere ka Nyamasheke ari 85,303,879 Frw); - PYRAMIDE MINERALS SUPPLY Ltd itagomba gusubizwa ingwate yafatiriwe; - indishyi zingana na 84,139,913 Frw PYRAMIDE MINERALS SUPPLY Ltd yasabye itagomba kuzihabwa; - Akarere ka Nyamasheke kishyura PYRAMIDE MINERALS SUPPLY Ltd umwenda ungana na 133,533,352 Frw; - nta mafaranga y’igihembo cy’Avoka n’ay’ikurikiranarubanza PYRAMIDE MINERALS SUPPLY Ltd igomba guhabwa; - ingwate y’amagarama yatanzwe na PYRAMIDE MINERALS SUPPLY Ltd ihwanye n’ibyakozwe mu rubanza. [9] PYRAMIDE MINERALS SUPPLY Ltd yajuririye uru Rukiko, ubujurire bwayo bwandikwa kuri No RCOMAA 00080/2024/CA. Urubanza rwaburanishijwe mu ruhame ku wa 05/03/2025, PYRAMIDE MINERALS SUPPLY Ltd ihagarariwe na Me Nkiranuye Gratien, naho Akarere ka Nyamasheke gahagarariwe na Me Cyubahiro Fiat, ababuranyi bemerera Urukiko ko bagiye kugerageza gukemura ikibazo bafitanye mu nzira y’ubwumvikane bakazamenyesha Urukiko icyo bagezeho bitarenze ku wa 27/03/2025, urubanza rwimurirwa ku wa 28/03/2025. Ku wa 27/03/2025, Me Nkiranuye Gratien yashyize inyandiko muri sisiteme (IECMS) amenyesha

## Page 5

Urukiko ko PYRAMIDE MINERALS SUPPLY Ltd iretse ikirego cy’ubujurire yatanze. Ku wa 28/03/2025, urubanza rwaburanishijwe mu ruhame, ababuranyi bahagarariwe nka mbere, hanyuma uhagarariye PYRAMIDE MINERALS SUPPLY Ltd amenyesha Urukiko ko nk’uko babyanditse iyi iretse ikirego cy’ubujurire yatanze. II. IBIBAZO BIGIZE URUBANZA N’ISESENGURWA RYABYO 1. Kumenya niba PYRAMIDE MINERALS SUPPLY Ltd yakwemererwa ukureka ikirego cy’ubujurire yatanze [10] Me Nkiranuye Gratien, uhagarariye PYRAMIDE MINERALS SUPPLY Ltd avuga ko uwo ahagaraririye, ashingiye ku ngingo ya 122 y’Itegeko N⁰ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, yasanze bitakiri ngombwa ko urubanza rwakomeza, ikaba iretse ikirego cy’ubujurire yatanze cyanditse kuri No RCOMAA 00080/2024/CA. [11] Me Cyubahiro Fiat, uhagarariye Akarere ka Nyamasheke avuga ko ibijyanye no kureka ikirego bidasaba ko babyemera, gusa ko asaba Urukiko kugenera Akarere ka Nyamasheke amafaranga y’ibyagiye ku rubanza kasabye. UKO URUKIKO RUBIBONA [12] Ingingo ya 122 y’Itegeko N⁰ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibukurikira: “Kureka ikirego ni ukwiyambura ububasha bwo kuburana. Bijyana no kwiyambura uburenganzira umuntu yari afite bwo gukomeza gukurikirana icyo kirego. Ukwemera k’undi muburanyi si ngombwa”. [13] Nk’uko byibukijwe haruguru, mu iburanisha ryabaye ku wa 28/03/2025, Me Nkiranuye Gratien yamenyesheje Urukiko ko PYRAMIDE MINERALS SUPPLY Ltd iretse ikirego cy’ubujurire yatanze nk’uko yabyanditse mu ibaruwa yashyize muri dosiye ya IECMS ku wa 27/03/2025; Akarere ka Nyamasheke kavuga ko ibijyanye no kureka ikirego bidasaba ko kabyemera. [14] Hashingiwe ku biteganywa n’ingingo ya 122 y’Itegeko N⁰ 22/2018 ryo ku wa 29/04/2018 ryavuzwe haruguru, Urukiko rurasanga nta cyabuza PYRAMIDE MINERALS SUPPLY Ltd kwemererwa ukureka ikirego cy’ubujurire yatanze cyanditse kuri No RCOMAA 00080/2024/CA. 1. 2. Kumenya niba amafaranga y’ikurikiranarubanza n’igihembo cya Avoka asabwa muri uru rubanza afite ishingiro [15] Uhagarariye AKARERE KA NYAMASHEKE asaba Urukiko rw’Ubujurire gutegeka PYRAMIDE MINARALS SUPPLY Ltd guha AKARERE KA NYAMASHEKE amafaranga ibihumbi magana atanu (500.000 Frw) y’igihembo cya Avoka n'ibihumbi magana abiri (200.000 Frw) y'ikurikiranarubanza, kuri uru rwego.

## Page 6

[16] Uhagarariye PYRAMIDE MINERALS SUPPLY Ltd, avuga ko Itegeko ryemera gusa ko hatangwa amafaranga y’ikurikiranarubanza n’igihembo cya Avoka, ariko ntayo AKARERE KA NYAMASHEKE kasabye mu myanzuro yako. UKO URUKIKO RUBIBONA [17] Ingingo ya 124, igika cya kabiri, y’Itegeko No 22/2018 ryo ku wa 29/04/2018 ryibukijwe haruguru, iteganya ibikurikira: “Uretse ikirego cyangwa urubanza ashobora gucibwa amafaranga y’amagarama cyangwa igihembo cya Avoka n’andi yose yatanzwe n’uwo yari yareze mu gukurikirana urubanza”. [18] Nk’uko bigaragara muri dosiye mu gice cyiswe Parties submissions, mu gace ka kiswe Procedural fees, Akarere ka Nyamasheke kasabye amafaranga ibihumbi magana atanu (500.000 Frw) y’igihembo cya Avoka n'ibihumbi magana abiri (200.000 Frw) y'ikurikiranarubanza, kuri uru rwego, ndetse no mu nyandikomvugo y’inama ntegurarubanza yo ku wa 05/02/2025, karabishimangiye. Bityo ibyo uhagarariye PYRAMIDE MINERALS SUPPLY Ltd avuga ko Akarere ka Nyamasheke ntayo kasabye, nta shingiro bifite. [19] Urukiko rushingiye ku ngingo ya 124 y’Itegeko No 22/2018 ryo ku wa 29/04/2018 yibukijwe haruguru, rurasanga amafaranga y’igihembo cya Avoka n’ikurikiranarubanza Akarere ka Nyamasheke gasaba, gakwiye kuyahabwa, kuko ubujurire bwa PYRAMIDE MINERALS SUPPLY Ltd bwatumye gakurikirana urubanza gashaka na Avoka wo kugahagararira muri uru rubanza; bityo PYRAMIDE MINERALS SUPPLY Ltd igomba guha Akarere ka Nyamasheke amafaranga ibihumbi magana atanu (500.000 Frw) y’igihembo cya Avoka n’amafaranga ibihumbi magana abiri (200,000 Frw) y’ikurikiranarubanza. Yose hamwe akaba ibihumbi magana arindwi (700,000 Frw). III. ICYEMEZO CY’URUKIKO [20] Rwemeye ukureka ikirego cy’ubujurire No RCOMAA 00080/2024/CA byasabwe na PYRAMIDE MINERALS SUPPLY Ltd. [21] Rutegetse PYRAMIDE MINERALS SUPPLY Ltd kwishyura Akarere ka Nyamasheke amafaranga ibihumbi magana atanu (500.000 Frw) y’igihembo cya Avoka n’amafaranga ibihumbi magana abiri (200,000 Frw) y’ikurikiranarubanza. Yose hamwe akaba ibihumbi magana arindwi (700,000 Frw). [22] Ruvuze ko ingwate y’amagarama yatanzwe ihwanye n’ibyakozwe mu rubanza.